ސްޕެއިންވިލާތުގެ އެންމެ އުތުރުން، ފަރަންސޭސިވިލާތުގެ އިމާ އެންމެ ކައިރީގައި އޮންނަ ބުރްލާޑާ ސަހަރުގައި އޮތް ބައިނަލް އަގުވާމީ، ދުރު ރާސްތާ ދުވުމުގެ ވާދައެއް ނިމެނީއެވެ. މިފަދަ ދުރު ރާސްތާ ދުވުމުގައި މުޅި ދުނިޔެއަށް މަޝްހޫރު ކެންޔާ ދުވުންތެރިޔަކު، ބަލާ މީހުންނަށް ފެންނަ ގޮތުގައި ލުއި ފަސޭހަ ކަމާއެކު އެ ދިގު ރޭސް އެ ނިންމައިލަނީއެވެ. ދެވަނައިގައި، އެކަމަކު ތަންކޮޅެއް ދުރުން ރޭސް ނިންމަން އެއަންނަ އީވާން ފަރްނަންޑޭޒް އަކީ ރަށުމީހެކެވެ.
ދުރު ރާސްތާއަށް ދުވުމުގެ މި ވާދަ ފެށުނީއްސުރެ ކުރި ހޯދައި އަދި ހަމަ އެވާނުގައި ރޭސް ނިންމަން މިހާރު އެ ތައްޔާރުވާ ކެންޔާގެ މަޝްހޫރު ދުވުންތެރިޔާ އަބެލް މުޓާއި އަށް، ކޮންމެވެސް ސަބަބަކާހުރެ ހީވީ ރޭސް އޭނާއަށް ނިންމިއްޖެ ކަމުގައެވެ. މިހެން ހިތައި ދުވެލި މަޑުކުރަން ފެށުމުން ފަހަތުގައި ދުވަމުން އަންނަ ސްޕެއިންވިލާތުގެ ދުވުންތެރިޔާ އިސްޕޭން ބަހުން، ނުހުއްޓައި ދުވުމަށް އިރުޝާދު ދެމުން އައެވެ. ނަމަވެސް ކެންޔާގެ ދުވުންތެރިޔާ އަބެލް މުޓާއި އަކަށް އެކިޔާއެއްޗެއް އޮޅުމެއް ނުފިލިއެވެ. މިހިސާބުން މިހާރު ދެ ދުވުންތެރިން އެއް ހަމަވަނީއެވެ. ރޭސް ނިމުމުގެ ކުރިން ދުވުން ހުއްޓައިލި ވާދަވެރިޔާގެ ކައިރިން އަޅާފައި ގޮސް ރޭސް ނިންމާލައި އަގުބޮޑު ފައިސާގެ އިނާމާއި އެހެނިހެން އިނާމާއި އިޝްތިހާރުގެ ދޮރުތައް ހުޅުވާލެވެން އޮތެވެ. ނަމަވެސް " އިންޓަރނޭޝަނަލް ފެއަރޕްލޭ " ޖަމިއްޔާގެ ވެބްސައިޓުގައި ވާގޮތުގައި، މީނާ ޖެހިލީ ކެންޔާގެ ދުވުންތެރިޔާގެ ފަހަތަށެވެ. ފަހަތުގައި ހުރެގެން މަޑުމަޑުން ކޮއްޕާލައި، އަދި ދުވުން ހުއްޓައިނުލުމަށް އިޝާރާތް ކުރަމުން ރޭސް ނިމެން ބާކީ އޮތް ކުޑަ ތަންކޮޅު ނިންމައިލީ އަބެލް މުޓާއިގެ ފަހަތުގައި ހުރެގެންނެވެ!
ބަލަންތިބި މީހުން ހައިރާންވެ އުފަލުން އަތްތިލަބަޑި ޖަހަނީއެވެ! ކުޅިވަރު ކުޅުމުގައި ފައިސާގެ އިނާމު ތަކާއި އިޝްތިހާރުގެ ބޮޑެތި އެއްބަސްވުންތަކާއި މަޝްހޫރުވުމުގެ ދަޅައިގައި މިހާރު ގިނަ ކުޅުންތެރިން ހަނދާންނެތިފައިވާ ކުޅުމުގެ ރޫހު އަލުން ފެނި އެކަމުގެ އުފަލުގައެވެ.
ދުވުމުގެ ވާދަ ނިމި ނޫސްވެރިންނަށް ފުރުސަތު ލިބުމުން، މި ރީތި އަޚުލާގު ދެއްކި ޒުވާން ދުވުންތެރިޔާގާތުގައި، އަބެލް މުޓާއި ކައިރިން އަޅާފައިގޮސް ރޭސް ނުނިންމީ ކީއްވެތޯ ސުވާލު ކުރިއެވެ. އެ ކުރި ސުވާލު ބަލައިގަންނަންވެސް ދަތިކަން ދޭހަވާ ރާގެއްގައި އީވާން ފަރްނަންޑޭޒް ބުންނެވެ. " އަހަރެން އެންމެ ދެކޭ ހިތްވަނީ މުޖްތަމައުގައި އެކަކު އަނެކަކު ލޯބިން ކާމިޔާބާ ދިމާއަށް ކުރިޔަށް ޖައްސައިދޭން އެހީވާ ދުވަހަކެވެ. ވީމާ އަހަރެން އޭނާއަށް ހުރަސް އަޅާނެހެއްޔެވެ؟" ދެން އެ ނޫސްވެރިޔާ ކުރި ސުވާލަކީ، " ތިޔަހެން ވިއްޔާ، އޭނާ މޮޅުވިޔަ ދިނީ ކީއްވެ ހެއްޔެވެ؟" ޒުވާން ދުވުންތެރިޔާ ބުންޏެވެ. " އޭނާ އަށް ރޭސް ނިންމައިދިނީ އަހަންނެއް ނޫނެވެ. އަހަރުމެން ދެންމެ މި ނިންމި ރޭހަކީ ފެށުނީއްސުރެ އޭނާ ކާމިޔާބު ކުރާނޭ ރޭހެއްކަން އެއީ އެންމެނަށްވެސް އެނގެން އޮތް ކަމެކެވެ."
މިވަރުންވެސް މި ނޫސްވެރިޔާ ދުލެއް ނުކުރިއެވެ. " ކެންޔާގެ ދުވުންތެރިޔާ ކުރީގައި ހުރިނަމަވެސް، މިފަހަރު މިއީ ކަލޭގެ ރޭހަކަށް ހެދެން އޮތްތާއެވެ. ކަލޭ، ހަމަ ގަސްތުގައި ނުނިންމީތާއެވެ؟" ޒުވާނާ ވަގުތުން ރައްދުގައި ބުންޏެވެ. " އެފަދަ ކާމިޔާބެއްގައި އޮތީ ކޮން ފޮނިކަމެއް ހެއްޔެވެ؟ އަހަރެންގެ މަންމަ އަހަރެން ބޮޑުކުރީ އިންސާފުވެރި ކަމާއެކު މީހުންނާ ވާދަކޮށްގެން އަމިއްލަ މަސައްކަތުން ކާމިޔާބު ހޯދާށެވެ! ކެންޔާގެ ދުވުންތެރިޔަކީ ބީރައްޓެއްސެކެވެ. އަހަރުމެންގެ ބަހުން ހުރި ލިޔުންތަކަށާއި، މި ދުވުމުގެ ކަންކަމަށް އޭނާ އަދި ހޭނިފައި ނެތުމުން އެ ލާމަސީލު ދުވުންތެރިޔާއަށް، އެރި އޮޅުމެއްގެ ނާޖާއިޒު ފައިދާއެއް ލިބިގަނެގެން ރޭސް ނިންމާފައި ގެއަށްގޮސް އަހަރެންގެ މަންމައަށް ދާއްކާނީ ފަހެ ކޮން މޫނެއްހެއްޔެވެ؟"
إخلاص ތެރިކަމުގެ ލާމަސީލް ނަމޫނާއެއް، މަސްއޫލިއްޔަތު ނަގަން ތިބި
ވެރިންނަށް ރަގަޅު ފިލާވަޅެއް، ޚާއްސަކޮށް ސިޔާސީ ވެރިންނަށް.