1984 ވަނަ އަހަރުގެ ޖަނަވަރީ މަހުގެ 30 ވަނަ ދުވަހު ހެނދުނު ތައި އެއަރވޭޒްގެ ބޯއިންގ 747 މަރުކާގެ މަތިންދާބޯޓެއް ޕާކިސްތާނުގެ ކަރާޗީން ފުރައިގެން ހުޅަނގަށް އުދުއްސާލައިފިއެވެ. ބޯޓު އުދުހެމުން ދިޔައީ އޮނަތިރީސް ހާސް ފޫޓު މަތިންނެވެ. ހަމަ އެ ވަގުތު އިންޑިއަން އެއަރލައިންސްގެ މަތިންދާބޯޓެއް މުމްބައިން ފުރައިގެން ދިއްލީއަށް ދާން އުދުއްސާލަން ތައްޔާރު ވަމުން ދަނީއެވެ. މި ބޯޓުވެސް އުދުހެން ތައްޔާރުވެފައި އޮތީ އޮނަތިރީސް ހާސް ފޫޓު މަތިންނެވެ. ބޯޓު އުދުއްސާލަން ތައްޔާރުވީ ވަގުތު ހަމަ އެ އުސްމިނުގައި އެހެން ބޯޓެއް އެދިމާއަށް ދަތުރު ކުރަމުން އަންނަ ކަމުގެ މަޢުލޫމާތު ލިބިއްޖެއެވެ. އިންޑިއަން އެއަރލައިންސްގެ ބޯޓު ހަމަޖެހިފައިވާ ގަޑިއަށް ފުރައިގެން އެ އުސްމިނުގައި ދަތުރު ކުރަމުން ދިޔަ ނަމަ، އިންޑިއާގެ މަދްޔަ ޕަރްދޭޝްގެ މަންޑްސޫރް ނަމަކަށް ކިޔާ ރަށުގެ މަތީން، ތައި އެއަރވޭޒްގެ މަތިންދާބޯޓުގައި ޖެހުނީހެވެ. ދެ ބޯޓުވެސް ބޯޓުގައި ތިބި ފަސިންޖަރުންނާއެކު ފަނާވެ ނިމިގެން ދިޔައީހެވެ. (ޓައިމްސް އޮފް އިންޑިއާ، 25 ޖަނަވަރީ 1984)
އެއަރ ޓްރެފިކް ކޮންޓްރޯލަށް މި ދެބޯޓުގެ ދަތުރުގެ މަޢުލޫމާތު ލިބުނީ އިންޑިއަން އެއަރލައިންސްގެ ބޯޓު ފުރަން ތައްޔާރުވީ ތަނާއެވެ. އެހެންވީމާ ބޯޓުގެ ކައްޕިތާނަށް އަވަހަށް އިރުޝާދު ދިނީ ތައި އެއަރވޭޒްގެ މަތިންދާބޯޓަށްވުރެ ތިރިން (ފަންސަވީސްހާސް ފޫޓު މަތީން) ދަތުރު ކުރާށެވެ. ނުވަތަ އޮނަތިރީސް ހާސް ފޫޓު މަތިން ދަތުރު ކުރަން ބޭނުން ނަމަ ފަންސަވީސް މިނިޓު ފަހުން ފުރާށެވެ. ކައްޕިތާނު ގަސްތުކުރީ ދެވަނަ އިރުޝާދާ އެއްގޮތަށް ޢަމަލު ކުރާށެވެ. އެހެންވީމާ އިންޑިއަން އެއަރލައިންސްގެ ބޯޓު ފުރީ ކުރީން ހަމަ ޖައްސާފައި އޮތް ގަޑިއަށްވުރެ ފަންސަވީސް މިނިޓު ފަހުންނެވެ. ޖައްވުގައި ދެ ބޯޓު ޖެހި އެތައް ބަޔަކު މަރުވެ، ބޯޓު ހަލާކުވުމުން ސަލާމަތްވީ މި ދެންނެވުނު ފިޔަވަޅުގެ ސަބަބުންނެވެ. ކުރިން ހަމަޖެހިފައި އޮތް ގަޑިއަށް ފުރިނަމަ އިންޑިއަން އެއަރލައިންސްގެ ބޯޓު މަންޑްސޫރު ހުރަސް ކުރާނީ ހެނދުނު ހަތެއް ޖަހާއިރުއެވެ. ގަޑި ބަދަލު ވުމުގެ ސަބަބުން ބޯޓު އެރަށް ހުރަސްކުރީ ހަތްގަޑިބައިވީ ތަނާއެވެ.
އިންޑިއަން އެއަރލައިންސްގެ އޮފިސަރަކު މި ކަންތައްތައް ހިނގި ގޮތް ކިޔައިދެމުން ބުނެފައި ވަނީ ދެ ބޯޓުގެ ފަސިންޖަރުން އެދުވަހު ސަލާމަތްވީ މުޢުޖިޒާތެއްގެ ސަބަބުން ކަމުގައެވެ.
ފުންކޮށް ވިސްނާލައިފިނަމަ މިއީ މުޅި ދިރިއުޅުމުގެވެސް ކަންތައް އޮންނަ ގޮތްކަން ވަރަށް ރީތިކޮށް އެނގެއެވެ. އޮނަތިރީސް ހާސް ފޫޓު މަތިން އުދުހެން ބޭނުންވާ މީހާ އަބަދުވެސް ހަނދާން ކުރަން ޖެހޭ ކަމެއް އޮވެއެވެ. އެއީ އެހެން މީހުންވެސް ހަމަ އެހައި އުހުގައި އެބަ އުޅޭ ކަމެވެ. އުދުހޭ ކަމެވެ. މިފަދަ ޙާލަތެއްގައި އޮންނަނީ ދެގޮތުން ކުރެ އެއް ގޮތެއް ޚިޔާރު ކުރުމެވެ. އެއް ގޮތަކީ އެހެން މީސްމީހުނާމެދު ވިސްނައިލުމެއް ނެތި އުދުހެން ފެށްޓުމެވެ. ނަތީޖާއަކީ އަމިއްލައަށް ހަލާކުވެ "ކުޑަ ޤުރްބާނީ"އެއް ވުމެވެ. ދެވަނަ ގޮތަކީ އެހެން މީހުނަށްވުރެ ތިރިން އުދުހިފައި ސަލާމަތުން ގޮސް މަންޒިލާ ހަމައަށް ވާސިލުވެ "މުޢުޖިޒާތެއް" ދެއްކުމެވެ. ނުވަތަ ބައިގަޑިއިރު ފަހުން ދަތުރު ފެށްޓުމެވެ. މި ދެގޮތުންވެސް ދެވޭނީ ކާމިޔާބީއާ ހަމައަށެވެ. ރައްކާތެރިކަމާއެކު މަންޒިލާ ހަމައަށެވެ. (ތަރުޖަމާއެއް)
