ކީރިތި ރާސޫލާއަށް ޞަލަވާތާއި ސަލާމް ލެއްވުން އެދި ގިނަގިނައިން ދުޢާކުރަމެވެ. މުސްލިމުންގެ ހިތްތަކުގައި ރަސޫލު اللَّه صلى الله عليه وسلم އަށް ދެވިފައިވަނީ ވަރަށް މަތިވެރި ޤަދަރެކެވެ. މުސްލިމުން ރަސޫލާ صلى الله عليه وسلم އަށް ނިހާޔަތަށް ލޯބި ކުރެއެވެ. މާތްކޮށް ހިތައެވެ. މުސްލިމުން އެ މީހުންގެ އަނބިންނާއި ދަރިންނާއި އެމީހުންގެ އަމިއްލަ ނަފުސަށްވުރެ ބޮޑަށް ރަސޫލާ صلى الله عليه وسلم އަށް މާތްކޮށް ހިތައެވެ. ލޯބި ކުރެއެވެ. އެކަމަކު އަހަރުމެންވާ ލޯބި ވާން ޖެހެނީ ރަސޫލާ صلى الله عليه وسلم އަށް ތަބާވުމުގައެވެ. އެކަލޭގެފާނަށް ޞަލަވާތާއި ސަލާމް ލައްވާށިއެވެ. އާމީން! اللَّه ވަޙީކުރައްވާފައިވަނީ {قُلْ إِن كُنتُمْ تُحِبُّونَ اللَّـهَ فَاتَّبِعُونِي يُحْبِبْكُمُ اللَّـهُ وَيَغْفِرْ لَكُمْ ذُنُوبَكُمْ ۗ وَاللَّـهُ غَفُورٌ رَّحِيمٌ } (آل عمران:31) މާނައީ: "ކަލޭގެފާނު ވިދާޅުވާށެވެ! ތިޔަބައިމީހުން، االلَّه އަށް ލޯބިވާކަމުގައި ވަނީނަމަ، ފަހެ، ތިޔަބައިމީހުން، ތިމަންކަލޭގެފާނަށް ތަބާ ވާށެވެ! އޭރުން، اللَّه ، ތިޔަބައިމީހުންދެކެ ލޯބިވެވޮޑިގެންވާނެތެވެ. އަދި، ތިޔަބައިމީހުންނަށްޓަކައި، ތިޔަބައިމީހުންގެ ފާފަތައް ފުއްސަވައިދެއްވާނެތެވެ. اللَّه އީ، ގިނަގިނައިން ފާފަފުއްސަވާ، ރަޙީމް ވަންތަ ރަސްކަލާނގެއެވެ." ޝައްކެއްނެތް ގޮތުގައި ރަސޫލާ صلى الله عليه وسلم ފިޔަވައި އަހަރުމެން މުސްލިމުން އެންމެން އެންމެ ބޮޑަށް ލޯބި ކުރާ ދެވަނަފަރާތެއް ނުވެއެވެ. ހަމަކަށަވަރުން ރަސޫލާ صلى الله عليه وسلم ގެ ޢަޞްޙާބުންވަނީ އެކަލޭގެފާނަށް ލޯބި ކުރުމުގައި އަމިއްލަ ނަފުސު ފަނާކުރައްވާ ފައެވެ. އެއިން ޞާޙާބީއަކަށް ރަސޫލާ صلى الله عليه وسلم ހަނދުމަފުޅުވުމުން އެބޭކަލުންވަނީ އެބޭކަލުންގެ އަނބިންނާއި ދަރިން ދޫކުރައްވައި ރަސޫލާގެ އަރިހަށް ވަޑައިގެންފައެވެ.
މިދުވަސްވަރު ވަރަށް ފޯރިއާއެކު ރަސޫލާ صلى الله عليه وسلم ގެ ޢީދު މީލާދު ފާހަގަ ކުރުމަށް ގިނަ މުސްލިމުންތަކެއް ދަނީ ތައްޔާރު ވަމުންނެވެ. އަޅުގަނޑު އަމިއްލަ ނަފުސާ އެސުއާލު ކުރީމެވެ. އެއީ ރަސޫލާ صلى الله عليه وسلم ގެ ޢީދު މީލާދު ފާހަގަ ކުރުމަކީ އެއީ ދީނުގައި އެއްވެސް އަޞްލެއް އޮތަކަމެއް ތޯއެވެ؟ ނޫނީ ގިނަ މުސްލިމުންތައް އެދުވަސް ފާހަގަ ކުރަނީ ކޮން އަޞްލެއްގެ މައްޗަށް ބިނާކުރެވިގެންތޯއެވެ؟ އަޅުގަނޑު ކޮންމެވެސް ވަރަކަށް ބެލި ބެލުމުން ރަސޫލާ صلى الله عليه وسلم އެކަލޭގެފާނުގެ މީލާދު ފާހަގަ ކުރެއްވި ކަމަށްވެސް އައިސްފައި ނުވެއެވެ. ރަސޫލާ صلى الله عليه وسلم ގެ އެއްވެސް ޞަޙާބީއަކު ރަސޫލާ صلى الله عليه وسلم ގެ ޢީދު މީލާދު ފާހަގަ ކުރެއްވި ކަމަށް އެއްވެސް ޞައްޙަ ރިވާޔަތަކުން އައިސްފައި ނުވާކަން އެނގެއެވެ. ހަމަ އެފަދައިން ތާބިޢީންގެ ފަރާތުންވެސް އެދުވަސް ފާހަގަ ކުރެއްވިކަމަށް އައިސްފައި ނުވެއެވެ. މިއީ އެންމެ މާތް ޤަރުނު ތަކެވެ. އަދި މިޢީ އިސްވެ ބަޔާން ކުރެވުނު ގޮތަށް ރަސޫލާދެކެ އެންމެ ބޮޑަށް ލޯބި ކުރެއްވި ބޭކަލުންނެވެ. އެންމެ މާތް ޤަރުނުތަކެވެ. އެބޭފުޅުންނަށްވެސް އެދުވަސް ފާހަގަ ކުރެވެން އޮތެވެ. އެ ޤަރުނުގެ މީހުން އެކަންތައް ނުކުރެއްވީ ކީއްވެތޯއެވެ؟ އަޅުގަނޑަށް އެނގިފައިވާ ގޮތް ކުށްކަމަށް ނުވާނަމަ ތާރީޚުން ފުރަތަމަވެސް އެދުވަސް ފާހަގަ ކުރެވިފައި ވަނީ ހިޖުރައިން ހަވަނަ ޤަރުނުގައެވެ. އެދެވަސްވަރު ފާޠިމީން ދައުލަތް ވުޖޫދަށް އައެވެ. ފާޠިމީންގެ ވެރިކަމުގައެވެ. އެމީހުން މިއްލަތުން ބޭރުވެފައިވާ ބައެއް ކަމުގައިވެސް ޢިލްމުވެރިންގެ ތެރެއިން ވިދާޅުވެފައިވެއެވެ. އެމީހުންގެ ވެރިކަމުގައި އެކުލެވިގެންވީ އަނދިރި ކަމެވެ. އެމީހުން ވެގެންދިޔައީ ސަލަފުންގެ މަންހަޖާ ދުރުބަޔަކަށެވެ. ވީމާ، ޢީދުމީލާދު ފާހަގަ ކުރުމާ ބެހޭގޮތުން ތިޔަބޭފުޅުންގެ ޚިޔާލަކީ ކޮބައިތޯއެވެ. އަޅުގަނޑަށް ފެންނަނީ اللَّه ގެ ރުއްސުންލެއްވި ޢާއިޝާގެ ކިބައިން އިމާމު ބުޚާރީ އަދި މުސްލިމު ރިވާކުރައްވާފައިވާ މި ޙާދީޘެވެ.: "مَنْ أَحْدَثَ فِي أَمْرِنَا هَذَا مَا لَيْسَ مِنْهُ فَهُوَ رَدٌّ."
މާނައީ: {ތިމަންމެންގެ މިކަމުގައި (އެބަހީ: އިސްލާމްދީނުގައި) އޭގެތެރެއިން ނުވާކަމެއް ގެނެސްގެންފި މީހާ (ދަންނާށެވެ!) އެ ކަމެއްވަނީ، އެ މީހަކަށް ރައްދުވެގެންނެވެ.} (އެބަހީ: އެއީ އެ ކަމަށް ޘަވާބެއްލިބޭނެ ކަމެއްކަމުގައިނުވެއެވެ. އަދި އެ ކަމަކީ، އެ ގޮތަށް ޢަމަލުކުރާ މީހެއްގެ މައްޗަށްވާ ގެއްލުމެއްކަމުގައި ނޫނީ ނުވާހުއްޓެވެ.)] ވީމާ ޢީދު މީލާދު ފާހަގަ ކުރުމަކީ ބިދުޢައެކޭ ނުބުނެވޭނެ ތޯއެވެ؟ والله تعالى أعلم