މާތް ﷲ ރުއްސުންލެއްވި އަބޫ ހުރައިރަތުގެފާނުގެ އަރިހުން ރިވާވެގެން ވެއެވެ. رسول الله صلى الله عليه وسلم ޙަދީސް ކުރެއްވިއެވެ. (( الْمُؤْمِنُ القَوِيُّ، خَيْرٌ وَأَحَبُّ إلى اللهِ مِنَ المُؤْمِنِ الضَّعِيفِ، وفي كُلٍّ خَيْرٌ احْرِصْ على ما يَنْفَعُكَ، واسْتَعِنْ باللَّهِ وَلا تَعْجَزْ، وإنْ أَصابَكَ شيءٌ، فلا تَقُلْ لو أَنِّي فَعَلْتُ كانَ كَذا وَكَذا، وَلَكِنْ قُلْ قَدَرُ اللهِ وَما شاءَ فَعَلَ، فإنَّ لو تَفْتَحُ عَمَلَ الشَّيْطانِ – أخرجه مسلم (٢٦٦٤)، وابن ماجه (٤١٦٨)، وأحمد (٨٧٧٧)، والنسائي في «السنن الكبرى» (١٠٤٥٧) – މާނައީ : ﷲގެ ޙަޟްރަތުގައި ނިކަމެތި މުއުމިނާއަށް ވުރެ ވަރުގަދަ މުއުމިނާގެ ހެޔޮކަމާއި ލޮބުވެތިކަން ބޮޑުވެގެންވެއެވެ. އަދި އެއިން ކޮންމެ މީހެއްގެ ކިބައިގައި ވެސް ހެޔޮކަން ވެއެވެ. ތިބާއަށް ފައިދާހުރި ކަންތަކަށް ތިބާ ދަހިވެތިވާށެވެ! އަދި ތިބާ ﷲގެ ޙަޟްރަތުން ވާތްގަށް އެދޭށެވެ! އަދި ތިބާ ނުކުޅެދުންތެރި ނުވާށެވެ! ތިބާއާ މުޞީބަތެއް ކުރިމަތިވެއްޖެނަމަ، ފަހެ ، ތިބާ ނުބުނާށެވެ. އަހުރެން މިވެނި ކަމެއް އެވެނި ކަމެއް ކުރިނަމަ މިވެނި ކަމެއް އެވެނިކަމެއް ވީހެވެ. އެހެނަސް ތިބާ ބުނާށެވެ. އެއީ ﷲގެ މިންވަރުފުޅެވެ. އަދި އެކަލާނގެ އިރާދަފުޅު ކުރެއްވި ކަމެއް ވެދެއެވެ. ފަހެ ހަމަކަށަވަރުން " ނަމަ" އަކީ ޝައިޠާނާގެ ޢަމަލުތަކަށް ދޮރު ހުޅުވައިދޭނެ ކަމެކެވެ. ))
ރަސޫލާ ޞައްލަﷲ ޢަލައިހި ވަސައްލަމްގެ މި ބަސްފުޅަކީ އެކަލޭގެފާނުގެ " ޖަވާމިޢުލް ކަލިމަ" އިގެ ތެރޭގައި ގުނާލެވޭ ބަސްފުޅެކެވެ. މިއީ އެކަލޭގެފާނުގެ އުއްމަތަށް ދެއްވާފައިވާ ވަރަށް އަގުބޮޑު ނަސޭހަތެކެވެ. ވަރަށް ޞަރީޙަ ގޮވައިލެއްވުމެކެވެ. ﷲގެ ޙަޟްރަތުގައްޔާއި އެކަލާނގެ ރަސޫލާގެ އަރިހުގައި ލޮބުވެތިކަން ލިބިގެންވާ ބާރުގެ ސަބަބުތައް ހޯދުމަށް އިސްލާމީ އުއްމަތުގެ ފަރްދުންނަށާއި ޖަމާޢަތްތަކަށް ގޮވައިލެއްވި ގޮވައިލުމެކެވެ. ކޮންމެ ކަމެއްގައި ވެސް ހިމެނޭ މާއްދީ އަދި މާނަވީ ބާރުތައް ހޯދުމަށް ދެއްވި އިރްޝަދެކެވެ. އިންސާނާގެ ގާތުގައި ހުރިހާ މާނައެއްގައި ލޮބުވެތިކަން ބޮޑު ބާރުތަކާ ހަމައަށް ދެވޭތޯ މަސައްކަތް ކުރުމަށް ދެއްވި ހިތްވަރުދެއްވުމެކެވެ. ﷲ ސުބަޙާނަހޫ ވަ ތަޢަލާ މުއުމިނުން ނިކަމެތީންގެ ފަޅީގައި ތިބުމަށް ލޯބިވެވޮޑިނުގަންނަވަތެވެ. އަދި ގޮންޖެހުންތަކާ ކުރިމަތިލުމަށް ޖެހިލުންވާ ބަޔަކަށް ވާކަށް ވެސް އެދިވޮޑިނުގަންނަވަތެވެ. އަދި ދުޝްމަނުންނާ ކުރިމަތިލުމުގައި ފިޑި ބަޔަކަށް ވާކަށް ވެސް ރުހިވޮޑިނުގަންނަވަތެވެ.
ކައު ރަސޫލާގެ ބަސްފުޅު ގައި ( المؤمن القوي ) އައިސްފައި ވަނީ ޢާއްމުކޮށް މުޢައްރަފުކޮށްނެވެ. އެހެނަސް ހުރިހާ މުއުމިނުންނަކީ ޞަޚްޞިއްޔަތު ވަރުގަދަ ބަޔަކަށް ނުވެ ހިނގައިދާނެއެވެ. ހުރިހާ މުއުމިނުން ޢަޒްމު ވަރުގަދަ ބަޔަކަށް ނުވެ ހިނގައިދާނެއެވެ.އެހެންކަމުގައިވިޔަސް ރަސޫލާ އެމީހުން (ހެޔޮވަންތަކަމުން) އިސތިސްނާއެއް ނުކުރައްވައެވެ. އެކި މީހުންގެ ކިބައިގައި ހެޔޮވަންތަކަން ހުންނާނީ އެކި މިންވަރަށެވެ. ކޮންމެ މުއުމިނަކީ ފައްސި މީހެކެވެ. ރަސޫލާގެ މި ހިތްވަރު ދެއްވުމަކީ ޢަދްލު އިންޞާފެވެ. އެކަލޭގެފާނު އެއްވެސް މީހަކު ނާއުއްމީދު ނުކުރައްވަވަތެވެ.
ބާރު އަންނަނީ ކޮން ތަނަކުން
މި ބާރު އަންނަނީ އީމާންކަމުގެ ހަރުދަނާކަމުންނާއި އިސްލާމްދީނުގެ އަސާސުގައި ހިފަހައްޓާހިފެހެއްޓުމުގެ މަތިންނެވެ. މި ކަންކަމުގެ ސަބަބުން އޭނާއަށް ކެތްތެރިކަމާއި ކެތްތެރިވުންލިބެއެވެ. ކެތްތެރިވުމަށާއި ގަދައަޅައި މަސައްކަތްކުރުމަށާއި ހިއްމަތްކުރުމަށް ޓަކައި ނަފްސާއި ނަފީސުން ޤުރްބާންވުމަށް ފަސްނުޖެހެއެވެ.
މި ބާރު އޭނާއަށް ލިބެނީ ޙައްޤު ބަސް ބުނުމުންނާއި ހެޔޮކަންތަކަށް އަމުރުކުރުމާއި މުންކަރާތް ނަހީ ކުރުމަށް އޭނާ އަޑު އުފުލާތީއެވެ.
މި ބާރު އޭނާއާށް ޙާޞިލުކުރެވެނީ މަތިވެރި އަޚްލާޤުގެ ސަބަބުންނެވެ.
ކެތްތެރިކަމަކީ ބާރެކެވެ.
އޯގާވެރިކަމަކީ ބާރެކެވެ. މަތިވެރި އަޚްލާޤެއްގެ ވެރިއަކުމެނުވީ މީހުންނަށް ރަޙްމު ނުކުރާނެތެވެ. މީހުންނަށް އޯގާވެރިނުވާނެތެވެ.
ޢަދްލުވެރިކަމަކީވެސް ބާރެކެވެ. ޢަދްލުވެރިޔާ ޖައްބާރުންދެކެ ބިރެއް ނުގަންނާނެތެވެ. އަނިޔާލިބިފައިވާ މީހުންގެ ކިބައިން ނަފާ ނަގާކަށް ނޫޅޭނެއެވެ.
ހިތްތިރިކަމަކީ ބާރެކެވެ.
ރުޅިމަޑުކަމަކީ (ޙިލްމުވެރިކަމަކީ) ބާރެކެވެ. ރުޅިމަޑު މީހާ ހުންނާނީ އެހެންމީހުންގެ ޖެއްސުންކުރުންތަކަށް ވާޞިލުނުވެވޭނެ ހިސާބެއްގައި މާ އުހުގައެވެ.
މި ހުރިހާ ބާރުތަކެއް ކައު ރަސޫލާ ޞައްލަﷲ ޢަލައިހި ވަސައްލަމްގެ މަތިވެރި ޝަޚްޞިއްޔަތުގައި ވެއެވެ. އެކަލޭގެފާނަކީ އެންމެ ހިތްވަރުގަދަ، އެންމެ ދިލަތި، އެންމެ ރުޅިމަޑު ، އެންމެ ޢަދްލުވެރި އިންސާނާއެވެ.
ބާރުވެރިކަން ލިބެނީ ދަށު ދަރަޖައިގެ ޢަމަލުތަކުން ދުރުހެލިވުމުންނެވެ.ޙަސަދަވެރިކަމާއި، ނީހަވެރިކަމާއި ޖާހާއި މަޤާމަށް ޓަކައި އަރާރުންވުމާ ދުރުހެލިވުމުންނެވެ.ދީލަތި މީހާ ބާރު ހޯދުމަށް ޓަކައި މުދަލަކަށް މަޤާމަކަށް ބަރޯސާއެއް ނުވާނެއެވެ. އޭނާގެ ކިބައިގައި ހުރި ކެތްތެރިކަމާއި ހިތްވަރުގަދަކަމާއި ޝަހާމަތްތެރިކަމަކީ އެއްވެސް މީހަކަށް ނިގުޅައިގަނެވޭނެ ކަންކަމެއްނޫނެވެ. އެހެނަސް މުދާ ފޭރިގަނެވިދާނެއެވެ. މަޤާމުން ދުރުކުރެވިދާނެއެވެ.
މުއުމިނާއަށް ބާރުލިބެނީ ރަނގަޅު މަގު އިޚްތިޔާރުކޮށް ދަތުރުކުރަންވީ މަގުޗާޓު ކުރަހައިލެވުނީމައެވެ. އޭނާއަށް ތެދުމަގު ދައްކާ ސަމުގާ ލިބުނީމައެވެ.
އިންސާނާ ނުކުޅެދުންތެރިވަނީ ﷲނޫން ފަރާތްތަކުން ވާގިވެރިކަން ހޯދަން އުޅުމުންނެވެ. އިންސާނާއަށް އެއީ ސަބަބުތަކެއް ކަމުގައި ހީވާ ކަންތައްތަކެއްގައި ހިފަހައްޓައި ﷲއަށް ވަކީލުކުރުމުން ދުރުހެލިވުމުންނެވެ. އިންސާނާއަށް ޢަޒްމާއި ޙިޒްމު ލިބޭނީ ހީވާގިވެ ﷲއަށް ބަރޯސާ ވެވުނު ވަރަކުންނެވެ. ނުކުޅެދުންތެރިކަން އަންނަނީ އެހެންމީހުންގެ އުނި ސިފަތަކަށް ސަމާލުކަން ދެވުނީމައެވެ. ނާޤާބިލުކަމާއި ނާކާމިޔާބު އިޙްސާސްވެ އެހެންމީހުންގެ ބޮލުގައި ތިމާގެ ނާޤާބިލުކަމުގެ ތުހްމަތު އަޅުވަން އުޅުނީމައެވެ. ތިމާ ތިމާގެ މަސްއޫލިއްޔަތުން ރެކެން އުޅުނީމައެވެ.
ނުކުޅެދުންތެރިވަނީ އަޚްލާޤީ އެއްވެސް މިންގަނޑެއްނެތި އެއްވެސް ވިސްނުމެއްނެތި އެއްވެސް ދުރުމިއެއްނެތި އުޅޭމީހަކަށް ވުމުންނެވެ.
ނުކުޅެދުންތެރިއަކަށް ވަނީ އެހެން މީހުންގެ ތޮއްޕާހުގައި އުޅެން ފެށުމުންނެވެ.
ނުކުޅެދުންތެރިވަނީ އަމިއްލައެދުމުން ފޯވުމުންނެވެ. ހެޔޮލަފާ މީހުންނާ ދުރުހެލިވެ ، ހެޔޮ ޢަމަލުތައް ކުރުމުގައި އެއްބާރު ނުލުމުންނެވެ.
ނުކުޅެދުންތެރިކަން އަންނަނީ ތިމާގެ ކުށް ޤަބޫލު ނުކުރުމުންނެވެ.ތިމާއަށް އެޅުނު ކަތި ފިޔަވަޅުތައް ރަނގަޅު ކުރުމަށް މަސައްކަތް ނުކުރުމުންނެވެ. ތިމާގެ ކުށް އެހެންމީހުންގެ ބޮލަށް ޖަހަން އުޅުމުންނެވެ. ތިމާގެ ނުރަގަޅު ކަންތައްތައް މަތިޖަހަން އުޅުމުންނެވެ.
ނުކުޅެދުންތެރިވަނީ ފާއިތުވެގެން ދިޔަ ކަންތައްތަކާމެދު ދެރަވެ ކަންބޮޑުވެ މަލާމާތުގެ ޖައްވެއްގެ ތެރެއަށް ވަދެ އުޅެން ފެށުމުންނެވެ.އަހުރެން މިވެނި ކަމެއް މިވެނި ގޮތަކަށް ކުރިނަމަ މިހެނެއް ނުވާނެއޭ ކިޔާ ކުސްތަޅަން ފެށުމުންނެވެ. ހާސަރުތައް ދަމަން ފެށުމުންނެވެ. ބިލާހުގެތެރޭގައި ގެއްލެނިވުމުންނެވެ. ތާކުންތާކު ނުޖެހޭ އުއްމީދުތަކެއްގައި ދުވަސްތައް ފާއިތު ކުރުމުންނެވެ.
ސަލާމްލެއްވި ޔޫސުފުގެފާނަށް ނިކަން ބަލައިބަލާށެވެ! އެކަލޭގެފަނުގެ އަމިއްލަ ނަފްސުފުޅަށް ތަޢުޒިޔާ ވިދާޅުވުމުގައި ޢުމުރުފުޅު ހޭދައެއް ނުކުރައްވައެވެ. އެކަލޭގެފާނަށް އަނިޔާވެރިވެ ވަޑައިގެންނެވި އެކަލޭގެފާނުގެ އަޚުންގެ ކިބައިން ބަދަލު ހިއްޕަވާކަށް މަސައްކަތެއް ނުކުރައްވައެވެ. ހުރަގޭގައި ހުންނެވިއިރުގައި ވެސް ﷲ ގެ ރަޙްމަތުން ނާއުއްމީދުވެ ވަޑައެއް ނުގަންނަވައެވެ. ﷲއަށް ދުޢާކުރެއްވުން މަތީގައި ދެމިހުންނެވިއެވެ. ތެދުވެރިކަމާއި ކެތްތެރިކަމާއެކުގައެވެ. ރަސްގެފާނުގެ ހުވަފެންފުޅާމެދު ވިސްނެވީ ފައްސިކޮށްނެވެ. ނަތީޖާއަކަށް ވީ މިޞްރުގެ އެންމެ ބާރުގަދަ ވަޒީރަށް ވެގެން ދިޔުމެވެ.
ހަކަތަވެރީންނާއި ، ހުނަރުވެރީންނާއި ، ހިއްމަތްތެރީންގެ ކުރިމަތީގައި ދޮރުތައް ވަނީ ހުޅުވިފައެވެ. އިންސާނާ އޭނާގެ ނަފްސުގެ އަގު ވައްޓައިލައިގެން ނުވާނެއެވެ. އޭނާ އަމިއްލައަށް އޭނާގެ ޤަދަރު ވައްޓައިލައިގެން ނުވާނެއެވެ. އާލާތްތަކުގެ ބާރުގަދަ ވިޔަސް ޙަޤީޤީ ބާރު އޮތީ އާލަތުގައެއް ނޫނެވެ. އެ އާލަތްތައް އީޖާދު ކުރާ އިންސަނާގެ ކިބައިގައެވެ. ﷲގެ ޙަޟްރަތުން ވާގި ހޯދާށެވެ! އެއަށްފަހު ކުރިއަށް ނުކުންނާށެވެ! އޭރުން ބާރުވެރިކަން ލިބޭނެތެވެ.
ماشاء الله!
ވަރަށް އުއްމީދީ ލިޔުމެއް!
ޝުކުރިއްޔާ އުސްތާޛު!