ބޭސްފަރުވާ ކުރުމަށް ނުވަތަ މީހުންގެ މަސްއަލަތައް ޙައްލުކޮށްދިނުމަށް ޖިންނީންގެ އެހީ ހޯދުން

މިހާރަކަށް އައިސް އަނެއްކާ ވެސް ރުޤްޔާގެ ވާހަކަތައް އިތުރުވަމުންދާ އަޑު ވަނީ ގަދަވެފައެވެ. ޖިންނި ޝައިޠާނުންގެ އެހީ ހޯދައިގެން މީސްތަކުންގެ މުދާ ބޭއިންސާފުން ކަމުންދާ ޚަބަރުތައް ވަނީ އޮލަވެފައެވެ. މިފަދަ މަސައްކަތްތައް ކުރާ " ބޭސްވެރިން" ނަކީ މީހުންނަށް އަނިޔާވެރިވާ ބައެއްކަން ކަށަވަރެވެ. މީހުންނަށް އޮޅުވާލައިގެން މީހުންގެ މުދާތައް ކެއުމަކީ ޙަރާން ކަމެއްކަން ނޭނގޭފަދައެވެ.  މާތް ﷲ ވަޙީ ކުރެއްވިއެވެ. ((  يَا أَيُّهَا الَّذِينَ آمَنُوا لَا تَأْكُلُوا أَمْوَالَكُم بَيْنَكُم بِالْبَاطِلِ – النساء : 29 – މާނައީ : އޭ إيمان ވެއްޖެ މީސްތަކުންނޭވެ! باطل ގޮތުގައި ތިޔަބައިމީހުންގެ މުދާތައް ތިޔަބައިމީހުންގެ މެދުގައި ނުކާށެވެ!  ))

އަލްއިމާމު އަޙްމަދުގެ ރައުޔު

އިބްނު މުފްލިޙު (އަލްއާދާބުއް ޝަރްޢިއްޔަތު) ނަމަކަށް ކިޔާ ފޮތުގައި ވިދާޅުވިއެވެ. (( އަލްބަރްޒާޠީގެ ރިވާޔަތް ބުނާގޮތުގައި ޖިންނި މޮޔަވާ މީހުންނަށް ފަންޑިތައިންނާއި (ރުޤްޔާއިންނާއި) ތަވީދުތަކުން ފަރުވާ ކުރާމީހުން ބުނާގޮތުގައި އެމީހުން ފަރުވާ ހޯދަނީ ޖިންނިއާ ވާހަކަދައްކައިގެންނެވެ. އަދި މި ޖިންނި އެމީހުންނަށް ޚިދްމަތް ކުރެއެވެ. މި ފަދަ މީހުންނާ ބެހޭގޮތުން މާތް ﷲ ރުއްސުންލެއްވި އިމާމު އަޙްމަދު ވިދާޅުވިއެވެ: އެއްވެސް މީހަކު އެފަދަ ކަމެއް ކުރުމަކީ އަހުރެން ލޯބިކުރާ ކަމެއް ނޫނެވެ. އަހުރެން އެދެނީ އެ ކަން ނުކުރުމަށެވެ. ))

ކުވައިތުގެ ފިޤްހީ ވިދާރާގެ ފަތުވާ  

ކުވައިތުގެ (الموسوعة الفقهيّة الكويتيّة) ބަލައިގެންފައި ވަނީ މި ރައުޔެވެ. ފިޤްހީ  މި އެކުމާފާނުގެ  4 ވަނަ ވޮލިއުމުގެ 18 ވަނަ ޞަފްޙާގައި އައިސްފައި ވެއެވެ. ( ﷲނޫން އެހެން ފަރާތަކުން ވާގިވެރިކަން ހޯދުމަކީ (އެއީ އިންސިއެއްގެ ކިބައިން ކަމުގައި  ވިޔަސް އަދި ޖިންނިއެއްގެ ކިބައިން ކަމުގައި ވިޔަސް) ޝިރްކެކެވެ. އަދި އެއީ ކުފްރެކެވެ. ޖިންނިއެއްގެ ކިބައިން ވާގި ހޯދުމަކީ މަނާ ކަމެކެވެ. މާތް ﷲ ވަޙީ ކުރެއްވިއެވެ. (( وَأَنَّهُ كَانَ رِجَالٌ مِّنَ الْإِنسِ يَعُوذُونَ بِرِجَالٍ مِّنَ الْجِنِّ فَزَادُوهُمْ رَهَقًا – الجن: 6 – މާނައީ : އަދި އިންސީންގެ ތެރެއިން ފިރިހެންބަޔަކު، ޖިންނީންގެ ތެރެއިން ފިރިހެންބަޔެއްގެ ކިބައިން ރައްކާތެރިކަމަށް އެދޭކަމުގައިވޫއެވެ. ފަހެ (އެކަމުގެ ސަބަބުން) އެއުރެންނަށް (އެބަހީ: ޖިންނީންނަށް) އެއުރެން (އެބަހީ: އިންސީން) كافر ކަމާއި ބޮޑާކަން އިތުރުކުރޫއެވެ. ))

ކުވައިތުގެ ފިޤްހީ ވިދާރާއިން މި ކަމާ ބެހޭގޮތުން ނެރެފައިވާ ފަތުވާ (7/50) ގައި އައިސްފައި ވެއެވެ.  ބޭސްވެރިކަމާ ބެހޭ ފޮތްތަކުގައި އައިސްފައިވާ ފަތްޕިލާވެއްޔާއި ޖަނަވާރާއި ކެމިކަލް ބޭސްތަކަކީ ތަޖްރިބާއިންނާއި އިތުބާރު ހުރި ޑަކްޓަރުން ފުށުން އައިސްފައިވާ ފަރުވާތަކެކެވެ. މިފަދަ ބޭސްތަކުން ފަރުވާ ކުރުމަކީ ހުއްދަ ކަމެކެވެ. ހަމަ އެފަދައިން  ފަރުވާ ހޯދުމަށް ޓަކައި ﷲގެ ޙަޟްރަތުން ވާގިވެރިކަން ހޯދުމާއި ނަބިއްޔާ  ޞައްލަﷲ ޢަލައިހި ވަސައްލަމް ގެ އަރިހުން ނުވަތަ ޞާލިޙު ސަލަފުންގެ އަރިހުން ވާރިދުވެފައިވާ ދުޢާތަކުން ދުޢާކުރުމުގައި ނުރަނގަޅު ކަމެއް ނެތެވެ. އެހެނަސް ޖިންނި ޝައިޠާނުންނާއި، ތަރިތަކުންނާއި، ފާޑުފާޑުގެ ކުރެހުންތަކުންނާއި ،  ކޮން އެއްޗެއްކަން ނޭނގޭ ނަންތަކުން ވާގި ހޯދުމަކީ ހުއްދަވެގެންވާ ކަންތައްތަކެއްނޫނެވެ. އެ ކަންކަމުގެ ސަބަބުން ޝިރްކާ ހަމައަށް ދެވިދާނެތީއެވެ.

ފަތުވާއާ ބެހޭ ސަޢޫދީ ޢަރަބިއްޔާ ގެ ދާއިމީ ކޮމެޓީގެ ބަސް

މި ކޮމެޓީގެ ފަތުވާ (27/92) ގައި އައިސްފައި ވެއެވެ: މީހަކަށް ޖެހިފައިވާ ބައްޔެއް ދެނެގަތުމަށް ޓަކައި އަދި މި ބައްޔަށް ފަރުވާ ހޯދުމަށް ޓަކައި ޖިންނި ޝައިޠާނުންގެ އެހީ ހޯދުމަކީ ހުއްދަވެގެންވާ ކަމެއްނޫނެވެ. އެހެނީ ޖިންނީންގެ ކިބައިން ވާގިވެރިކަން ހޯދުމަކީ ޝިރްކެކެވެ. މާތް ﷲ ވަޙީ ކުރެއްވިއެވެ. (( وَأَنَّهُ كَانَ رِجَالٌ مِّنَ الْإِنسِ يَعُوذُونَ بِرِجَالٍ مِّنَ الْجِنِّ فَزَادُوهُمْ رَهَقًا – الجن: 6 – މާނައީ : އަދި އިންސީންގެ ތެރެއިން ފިރިހެންބަޔަކު، ޖިންނީންގެ ތެރެއިން ފިރިހެންބަޔެއްގެ ކިބައިން ރައްކާތެރިކަމަށް އެދޭކަމުގައިވޫއެވެ. ފަހެ (އެކަމުގެ ސަބަބުން) އެއުރެންނަށް (އެބަހީ: ޖިންނީންނަށް) އެއުރެން (އެބަހީ: އިންސީން) كافر ކަމާއި ބޮޑާކަން އިތުރުކުރޫއެވެ. ))

އެހެން ބަސްފުޅެއްގައި ވެއެވެ. (( وَيَوْمَ يَحْشُرُهُمْ جَمِيعًا يَا مَعْشَرَ الْجِنِّ قَدِ اسْتَكْثَرْتُم مِّنَ الْإِنسِ ۖ وَقَالَ أَوْلِيَاؤُهُم مِّنَ الْإِنسِ رَبَّنَا اسْتَمْتَعَ بَعْضُنَا بِبَعْضٍ وَبَلَغْنَا أَجَلَنَا الَّذِي أَجَّلْتَ لَنَا ۚ قَالَ النَّارُ مَثْوَاكُمْ خَالِدِينَ فِيهَا إِلَّا مَا شَاءَ اللَّـهُ ۗ إِنَّ رَبَّكَ حَكِيمٌ عَلِيمٌ – الأنعام : 128 – މާނައީ : އެކަލާނގެ، އެއުރެން އެންމެން އެއްކުރައްވާ ދުވަސް ހަނދުމަކުރާށެވެ! (އެދުވަހުން، އެކަލާނގެ وحى ކުރައްވާނެތެވެ.) އޭ ޖިންނީންގެ جماعة ގެ މީހުންނޭވެ! ތިޔަބައިމީހުން އިންސީންގެ ވަރަށްގިނަ މީހުންނަށް މަގުއޮޅުވައިލީމުއެވެ. ދެން އިންސީންގެ ތެރެއިން އެއުރެންގެ އެކުވެރިން ދަންނަވާނެތެވެ. އަޅަމެންގެ ވެރިރަސްކަލާކޯއެވެ! އަޅަމެންގެ އެއްބަޔަކު އަނެއްބަޔެއްގެ ކިބައިން ފައިދާ ހޯދީމުއެވެ. އަދި އިބަރަސްކަލާނގެ، އަޅަމެންނަށް ކަނޑައަޅުއްވައިދެއްވައިފައިވާ أجل އަށް އަޅަމެން ފޯރައްޖައީމުއެވެ. އެކަލާނގެ وحى ކުރައްވާނެތެވެ. ތިޔަބައިމީހުން ތިބޭނެ ތަނަކީ ނަރަކައެވެ. اللَّه އިރާދަކުރެއްވި ވަގުތަކަށް މެނުވީ، އެއުރެން އެތާނގައި ދެމިތިބެނިވި ގޮތުގައެވެ. ހަމަކަށަވަރުން، ކަލޭގެފާނުގެ ވެރިރަސްކަލާނގެއީ، حكيم ވަންތަ މޮޅަށް ދެނެވޮޑިގެންވާ ރަސްކަލާނގެއެވެ. )) މުފައްސިރުން ވިދާޅުވާގޮތުގައި " އެއްބަޔަކު އަނެއް ބައެއްގެ ކިބައިން ފައިދާ ހޯދުމުގެ މާނައަކީ " އިންސީން ޖިންނީން މާތްކޮށް ހިތައި ޤަދަރު ކުރުމެވެ. ޖިންނީން އިންސީންނަށް ޚިދްމަތްކޮށްދީ އެމީހުން އެދޭ އެއްޗެހި ގެނެސްދެއެވެ. އޭގެތެރޭގައި ބަލީގެ ބާވަތްތައް  ބުނެދިނުމާއި ބަލިބަލީގެ ފަރުވާ ކިޔައިދިނުން ވެއެވެ. މި ކަންތައްތައް ކޮށްދޭއިރު ޖިންނިން އިންސީންނަށް ދޮގުވެސް ހަދާނެތެވެ. އެބައިމީހުންނަކީ ކާފިރުން ކަމުގައިވާތީ އެމީހުންގެ ބަސް ޤަބޫލުކުރުން ހުއްދަވެގެން ނުވެތެވެ.