މިއަދުގެ ދުނިޔޭގައި މީހުން ކިތަންމެ ތަރައްޤީވެ ކުރިއަރާފައި ވީނަމަވެސް، މުސްލިމުންނަކީ، އެ ތަރައްޤީގެ ނުރަނގަޅު ފަރާތުން ފެންނަހާކަމެއް ޤަބޫލުކުރަންޖެހޭ ބައެއްނޫނެވެ. ޙަޤީޤަތަކީ މިއީކަމުގައި ވިއަސް، ބައެއް މުސްލިމުން އެހެންމީހުން އުޅޭހާގޮތަކަށް އުޅޭކަމީ ކިތަންމެހައިވެސް ހިތާމަހުރި ކަމެކެވެ.
ދިރިއުޅުމުގެ ހުރިހާކަމެއް ދުނިޔެއާއި އާޚިރަތުގައި އިންސާނުންނަށް އެންމެ ރައްކާތެރި، އެންމެ މަޞްލަޙަތުހުރި ގޮތުގައި ތަރުތީބު ކޮށްދެއްވާފައިވާ ދީނަކީ، އިސްލާމްދީނެވެ. ނަމަވެސް ގިނަބަޔަކު އެކަން ގަބޫލުކުރުމުގެ ބަދަލުގައި މުސްލިމުންނޫން މީހުން ކަންކުރާގޮތަށް ދިރިއުޅުމުގެ ކަންކަން ތަރުތީބުކުރާކަމީ، އެކަމުގެ ގެއްލުން މި ދުނިޔެއާއި އާޚިރަތުގައި އެބައިމީހުންނާ ކުރިމަތިވާނެ ކަމެކެވެ.
މި ދެންނެވުނުފަދަ އެއްކަމަކީ، ދެޖިންސުގެ ޒުވާނުން ކައިވަނިނުކޮށް އެކުގައި ދިރިއުޅެމުން ގެންދިއުމެވެ. ފުރިހަމަ ޞިއްޙަތާއި ޒުވާންކަމުގެ ޖޯޝްއެކުވެފައިވުމާއެކު، އެފަދަ ޖޯޑުތައް މީސްތަކުންގެ ލޯމަތިން އެކަހެރިވެ އެކުގައި ވަގުތުތައް ގުނަމުންދާއިރު ނަފުސުގެ ގޮވުންތަކަށް އިޖާބަދީ ޝަހުވާނީ އެދުންތަކުގެ ކަރުހިއްކުން ފިލުވައިނުލައި ދުވަސްތައް ހޭދަކުރުމަކީ ވުމަށްވުރެ ނުވުން ކައިރި ކަމެކެވެ.
މާތް اللَّهُ ވަޙީކުރެއްވިއެވެ.
"وَلَا تَقْرَبُوا الزِّنَىٰ ۖ إِنَّهُ كَانَ فَاحِشَةً وَسَاءَ سَبِيلًا." (الإسراء: ٣٢)
މާނައީ: [އަދި ތިޔަބައިމީހުން ޒިނޭއާ ގާތްނުވާށެވެ! ހަމަކަށަވަރުން، އެއީ ހުތުރުކަން ބޮޑުވެގެންވާ ފާފައެއް ކަމުގައިވިއެވެ. އަދި މަގެއްގެ ގޮތުން އެކަންތައް ހާދަހާ ނުބައިވެގެންވެއެވެ.]
ޢިލްމުވެރިން ވިދާޅުވާގޮތުގައި ޒިނޭ ޙަރާމްކުރެއްވުމުގައި [ޒިނޭއާ ގާތްނުވާށޭ] އަންގަވާފައިވުމުން، އެކަމުގެ ފާފައިގެ ބޮޑުކަން ކަށަވަރުވެއެވެ. ކައިވަނިނުކޮށް އެކުގައި ނިދައިހެދުމަކީ، ޒިނޭއަށް ހުޅުވިގެންދާ ދޮރެއްކަން ކަށަވަރެވެ.
މިއަދުގެ ޚަބަރުތައް އަހަމުންދާއިރު، މަޝްހޫރު ޝަޚްޞިއްޔަތެއްގެ ކައިވަނި ކުރެވުނު ވާހަކަ އަންނައިރު، އެ ޖޯޑްގެ އެކަހަރި ދުވަސްތަކުގައި ކައިވަނިން ބޭރުން އެއްކުއްޖަކަށްވުރެ ގިނަ ކުދިން ލިބިފައިވުމީ، އެބައިމީހުންގެ މުޖުތަމަޢުގައި ކުށަކަށް ނުވިއަސް، އަދި އިންތިހާއަށް ލަދުވެތި ކަމެއްކަމުގައި ނުވިއަސް، އެއީ މުސްލިމުންގެ މެދުގައި އެންމެ ބޮޑެތި ފާފައިގެ ތެރެއިންވާ އެންމެ ލަދުވެތި ޢަމަލުތަކުގެ ތެރެއިންވާ ކަމެކެވެ. އެބައިމީހުންނަށް ބޮޑެތިވެގެންވާ ޢުޤޫބާތް ދިނުމަށް އިސްލާމް ދީނުގައި އަންގަވާފައިވާ ބޮޑު ފާފައެކެވެ. މީހަކާ އިނދެ އަނބިފިރިކަމުގެ ގުޅުން ހިންގާފައިވާ މީހަކު ޒިނޭކޮށްފިނަމަ ރަޖަމުކޮށް މަރައިލުމަށް އިސްލާމްދީނުގައި އަންގަވާފައިވަނީ ކަމުގެ ފާފަވެރިކަން ބޮޑުކަމާހުރެއެވެ.
ދުނިޔޭގައި އެ މީހަކަށް އެކަމުގެ ޢުޤޫބާތް ލިބިފައިނުވުމަކީ، އާޚިރަތްދުވަހުން އެ މީހަކަށް އެކަމުގެ ޢުޤޫބާތް ނުލިބޭނެ ކަމެއް ނޫނެވެ. اللَّهُއަށް ބިރުވެތިވެ، ތައުބާވެ ޢަމަލުތައް އިޞްލާޙުނުކޮށް މަރުވެއްޖެނަމަ، އެ ކަމުގެ ޢުޤޫބާތާ ބައްދަލު ކުރާނެކަމީ ކުޑަވެސް ޝައްކެތްނެތް ކަމެކެވެ. މާތް اللَّهُ ވަޙީކުރެއްވިއެވެ.
"وَالَّذِينَ لَا يَدْعُونَ مَعَ اللَّـهِ إِلَـٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّـهُ إِلَّا بِالْحَقِّ وَلَا يَزْنُونَ ۚ وَمَن يَفْعَلْ ذَٰلِكَ يَلْقَ أَثَامًا." (الفرقان: ٦٨)
މާނައީ: [އެއުރެންނީ اللَّهُއާއެކު އެހެން އިލާހަކަށްގޮވައި ނަހަދާމީހުންނެވެ. އަދި اللَّهُ، ޙުރުމަތްތެރި ކުރައްވާފައިވާ ނަފުސެއް، ޙައްޤުގޮތުންނޫނީ، ނުމަރާ މީހުންނެވެ. އަދި ޒިނޭނުކުރާ މީހުންނެވެ. އެއިން ކަމެއްކޮށްފިމީހާ (އެކަމުގެ) ޢުޤޫބާތާ ބައްދަލު ކުރާނެތެވެ.]
މާތް اللَّهُ އަޅަމެންނަށް ހެޔޮވިސްނުންދެއްވައި، އަޅަމެންގެ ޢަމަލުތައް އިޞްލާހުކޮށްދެއްވާށިއެވެ. އާމީން!