ބާރުލީއަކީ ރޯދަވެރިޔާއަށް ވަރަށް މުހިންމު އެއްޗެއް

عَنْ عَائِشَةَ زَوْجِ النَّبِيِّ صَلَّى اللَّهُ عَلَيْهِ وَسَلَّمَ أَنَّهَا كَانَتْ إِذَا مَاتَ الْمَيِّتُ مِنْ أَهْلِهَا فَاجْتَمَعَ لِذَلِكَ النِّسَاءُ ثُمَّ تَفَرَّقْنَ إِلَّا أَهْلَهَا وَخَاصَّتَهَا أَمَرَتْ بِبُرْمَةٍ مِنْ تَلْبِينَةٍ فَطُبِخَتْ ثُمَّ صُنِعَ ثَرِيدٌ فَصُبَّتْ التَّلْبِينَةُ عَلَيْهَا ثُمَّ قَالَتْ كُلْنَ مِنْهَا فَإِنِّي سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ التَّلْبِينَةُ مُجِمَّةٌ لِفُؤَادِ الْمَرِيضِ تُذْهِبُ بَعْضَ الْحُزْنِ (رواه الشيخان)

 ތަރުޖަމާ :

رَسُولُ اللَّهِ ޞައްލަﷲ ޢަލައިހި ވަސައްލަމްގެ އަނބިކަނބަލުން، މާތް ﷲ ރުއްސުންލެއްވި އުއްމުލް މުއުމިނީނަ ސިއްތުނާ ޢާއިޝާގެ ކިބައިން ރިވާވެގެން ވެއެވެ. އެކަމަނާގެ ޢާއިލީ ބޭކަނބަލަކު އަވަހާރަވެގެން އެތަނަށް އަންހެންވެރިން ޙާޟިރުވިއެވެ. ދެން ޖަނާޒާގެ ކަންތައް ނިމި މީސްތަކުން ގޮސް ހަމައެކަނި ޢާއިލާގެ ބޭކަނބަލުންނާއި ޚާއްޞާ ގާތް އެކުވެރިންނަށް ވުމުން އެކަމަނާގެ އަމުރުފުޅަށް ބޮޑު ގުޅިއެއްގައި ބާރުލީ ކެއްކުނެވެ. ދެން ރޮށްޓާއި ތަރުތާރީއާއި ބަކަރިމަސް އަޅައިގެން ސުރުވާއެއް ތައްޔާރު ކުރެވުނެވެ. އެއަށްފަހު ސުރުވާގެ ތެރެއަށް ބާރުލީ އޮއްސާލެވުނެވެ. ދެން އެކަމަނާ ވިދާޅުވިއެވެ. އެންމެހައި ބޭކަނބަލުންވެސް މިބާރުލީ ސުރުވާ ހިއްޕަވާށެވެ. މިހެނީ رَسُولُ اللَّهِ  ޞައްލަﷲ ޢަލައިހި ވަސައްލަމް ޙަދީޘު ކުރެއްވި އަޑު ތިމަން ކަމަނާ އެއްސެވީމެވެ. ބާރުލީއިން ބަލިމީހާގެ ސިކުނޑިއަށް އަރާމު ގެނެސްދެއެވެ. އަދި ބައެއް ހިތާމަތައް ދުރުކޮށްލަ ދެއެވެ.

ބާރުލީގެ ފައިދާ:

ޢިލްމުވެރިން ވިދާޅުވާ ގޮތުގައި ބާރުލީ ނުވަތަ ހިމަގޮދަނަކީ ހަށިގަނޑަށް ވަރަށް ފައިދާ ހުރި އެއްޗެކެވެ. ބަލިތަކަށް ލުއިކަން ގެނެސްދޭ ހިތާމަތަކަށް ލުއިކަން ގެނެސްދީ ސިކުނޑިއަށް އަރާމު ހޯދައިދޭ އެއްޗެކެވެ. ރޯދަ ވެރިޔާ ނުކައި ނުބޮއި ހުރުމުގެ ސަބަބުން އޭނާގެ ހަށިގަނޑަށް ވެރިވެފައިވާ ލޮޑުކަމާއި ގިލަންވެރިކަން ފިލުވައިދެއެވެ. ޢާއިޝަތުގެފާނުންގެ ބަސްފުޅުން ވެސް އެނގޭފަދައިން ހިތުގެ އުދާސްކަން ފިލުވައިދޭނެ އެއްޗެއްގެ ގޮތުގައި ކީރިތި ރަސޫލާ ވަނީ އިރްޝާދު ދެއްވާފައެވެ. މީގެ ފައިދާ ބަޔާން ކުރަށްވަމުން ޙަކީމުން ވިދާޅުވެފައިވާ ގޮތުން ހިމަގޮދަން ފަންޏަކީ ނުވަތަ ބާރުލީ ބަތްޕެނަކީ ކްރޮސްޓްރޯލް ދައްކުރާ އެއްޗެކެވެ. ބައެއް މީހުންގެ ހަށިގަނޑަށާއި ސިކުނޑިއަށް އަންނަ ޑިޕްރެޝަން މައިތިރިކޮށް އޭނާގެމިޒާޖު ބަދަލުކޮށްލުމަށް އެހީތެރިވެދޭ އެއްޗެކެވެ. ހަކުރު ބައްޔާއި ލޭމައްޗަށް ދިއުމަށް އެހީތެރިވެދެއެވެ. ކެންސަރު ޖެހިފައި ތިބޭ މީހުންނަށް ވޭންއެޅުން ލުއިކޮށްދޭ އެއްޗެކެވެ. އެކަމުގައި އެންޓިއޮކްސިޑެންޓުގެ (Antioxidants) ބައި އަދާކުރުމުގައި އެހީތެރިވެދޭ އެއްޗެކެވެ. ޢުމުރުން ދޮށީ މީހުންގެ ހަށިގަނޑަށް ވެރިވަމުންދާ ބަލިކަށިކަމާއި ވަރުބަލިކަން ކުޑަކުރުމުގައި އެހީތެރިވެދެއެވެ. އެހެންކަމުން ޢާލަމްތަކަށް ކައުކުރެއްވި ލޮބުވެރި ޙަދީޘު ކުރަށްވާފައި މިވަނީ، ބާރުލީއަކީ ބަލިމީހާގެ ސިކުނޑިއަށް އަރާމު ގެނެސްދޭ، ހިތާމަތައް ދުރުކޮށްލަދޭ އެއްޗެއް ކަމަށެވެ.

މައްޔިތާގެ ގޭގައި ތިމާގެ މީހުންނަށް ކައްކާފައި ކާންދިނުން:

މިޙަދީޘުން ސާބިތުވާ އެހެންކަމެއް ވެސް އެބަ އޮވެއެވެ. އެއީ މައްޔިތާގެ ގޭގައި ހިތާމަައިގައި ބައިވެރިވެ އުދާސް ފާޅުކުރަމުންދާ، ތިމާގެ މީހުންނަށް ތިމާމެންގެ ކިބައިގައި ތަނަވަސްކަން ހުރިނަމަ ނުވަތަ އެފަދަ ތަނަވަސްކަން ހުރިފަރާތްތަކުން މިގޮތަށް ރަނގަޅު އެއްޗެހި ކައްކާފައި ކާންދިނުމަކީ އެންމެ ރަނގަޅު ކަމެއް ކަމެވެ.