މީރު ސައިތައްޓެއް

އިނގިރޭސިވިލާތުގެ މަޝްހޫރު އަދީބު ޖޯޖް އޯވެލް (25 ޖޫން 1903 ން 21 ޖަނަވަރީ 1950 ށް) ގެ އަސްލު ނަންފުޅަކީ އެރިކް އާތަރ ބްލެއާ އެވެ.  މުޅި ދުނިޔެއަށް މަޝްހޫރުވެ ވަޑައިގެންފައިވަނީ އަމިއްލަ ނަންފުޅުގެ ބަދަލުގައި، އަދަބީ ލިޔުއްވުންތަކުގައި ބޭނުންކުރެއްވި ތަޚައްލުސުންނެވެ. ޖޯޖް އޯވެލް ދިގު މަޒްމޫނާއި ވާހަކަ ލިޔުއްވިއެވެ. ދިގު މުއްދަތަކަށް ނޫސްވެރިކަންވެސް ކުރެއްވިއެވެ. ޖޯޖް އޯވެލްގެ ލިޔުއްވުމުގައި ލަފުޒުތައް އަތުރައްވަވާ ފަހި ގޮތަކުން އޭނާގެ ލިޔުއްވުންތައް ކިޔަން ފަސޭހަ ކަމަށް އަދަބީ ލިޔުމަށް ފާޑު ވިދާޅުވާ ބޭފުޅުން ލިޔުއްވައެވެ. މުޖްތަމައުގައި ހުންނަ ހުތުރު ކަންކަމަށް ޖެހިލުމެއް ނެތި ފާޑު ވިދާޅުވިއެވެ. ގިނަ ބަޔަކަށް ޖޯޖް އޯވެލްގެ ލިޔުއްވުން ތައާރަފު ވެފައިވާނީ " އެނިމަލް ފާމް" އާއި " 1984 " މި ދެ ފޮތުންނެވެ. މިއީ ހުސްވި ސާސްކަފުގައި ލިޔެ ޝާއިއު ކުރެވުނު އެންމެ މަޝްހޫރު ފޮތްތަކުގެ ތެރޭގައި ހިމެނޭނެ ދެފޮތެވެ. މިއީ ޖޯޖް އޯވެލްގެ ލިޔުއްވުމެއްގެ ތަރުޖަމާއެކެވެ.

" މީރުކޮށް ކައްކަން ދަސްކޮށްދޭ އަތްމަތީ ފޮތެއް ތިބާ ހުޅުވާލައި ފޮތުގެ ފިހުރިސްތުން ' ސައި' ހޯދަން އުޅެފިނަމަ އެކަމުގައި ތިބާއަކަށް ކާމިޔާބެއް ނުވާނެއެވެ! ފަހަރެއްގައި ސައި ހަދާނެ ގޮތް ހިމަނާފައި އޮތް ފޮތެއް އަތުޖެހުނު ނަމަވެސް، ގިނަފަހަރަށް ފެންނަން އޮންނާނީ އެކަން ކުރާނެ އާންމު އުސޫލެވެ. އެ މުހިންމު ކަންތައް ވަކި ތަރުތީބަކުން ކުރިޔަށް ގެންދާނެ ގޮތަށް ގިނަ ފަހަރު އަލި އަޅުވާލައިފައެއް ނުވާނެއެވެ! މިއީ އަހަރެން ވަރަށް ހައިރާންވާ ކަމެކެވެ. އެހެނީ، މީރުކޮށް ސައި ބުއިމަކީ އެބައެއްގެ ދިރިއުޅުމުގައި އަސާސީ ކަމެއްގެ ގޮތުގައި ބަލައިގަންނަނީ ހަމަ އެކަނި އިނގިރޭސިނެއް ނޫނެވެ. އަޔަރލޭންޑު، އޮސްޓްރޭލިޔާ އަދި ނިޔުޒިލެންޑުގެ ރައްޔިތުންވެސް ހަމަ އަހަރުމެން ފަދައިން، މީރު ސައި ބުއިމަކީ އެމީހުންގެ ދުވަހުގެ މުހިންމު ބައެއް ކަމުގައި ދެކެއެވެ.

މީރު ސައި ބުއިމަކީ ގިނަ ބައެއްގެ ހަޔާތުގައި މުހިންމު ކަމެއް ނަމަވެސް، މީރު ސައިތައްޓެއް ހަދާނެ ގޮތް  މިއީ ހާދަހައި ޚިޔާލު ތަފާތު ކަމެކެވެ! އެބަޔަކު ސައި ހަދަނީ ހަމަ އެންމެ މޮޅަށް ކަމުގައި ވަކާލާތު ކުރާ މީހުން ގިނަވެ، މިކަމުގެ ބަހުސް ކުރުމުގައި ޖޯޝާއި ފޯރިވެސް އިންތިހާއަށް މައްޗަށް އަރައިގެން ދެއެވެ!

އެންމެ މީރުކޮށް ސައި ހަދާނެ ގޮތުގެ ލިޔުމެއް ވަކި ތަރުތީބަކުން އަހަރެންވެސް މިހާރު އެކުލަވައިލައިގެން އެބަ ގެންގުޅެމެވެ. އެއީ ވަކި ތަރުތީބަކުން އެގާރަ ބަޔަށް ބަހައިލެވިގެން އެކުލެވޭ މުހިންމު ފިޔަވަޅުތަކެކެވެ. މި އެގާރަ ފިޔަވަޅުގެ ތެރެއިން ދެ ޕޮއިންޓާ މެދު ގިނަ ބަޔަކު ފަހަރެއްގައި އެއްބަސް ވެދާނެއެވެ! ދެން ހުރި ކަންކަމުގެ ތެރެއިން  ކުރަން ޖެހޭ ހަތަރު ކަމަކާމެދު އެތައް ބަޔަކު ދެބަސްވާނެއެވެ! އެކަމާ މެދަކު ޝައްކެއްވެސް ނެތެވެ!

އަހަރެން އެކުލަވާލައިފައި މިވާ، މީރު ސައި ހެދުމުގެ އުސޫލުގެ ކޮންމެ ފިޔަވަޅަކީ ވަރަށް މުހިންމު ރަން ނުކުތާއެއް ކަމުގައި ނޫނީ ނުދެކެމެވެ.

އެންމެ ފުރަތަމަ ކަމަކީ މޮޅު، މީރު ސައިފަތް ޚިޔާރު ކުރުމެވެ. މިކަމުގައި އެންމެ ރަނގަޅީ އިންޑިޔާ ނުވަތަ ސިލޯނު ސައިފަތެވެ. ތެދެކެވެ، ޗައިނާ ސައިފަތަކީ އޭގައި ފޮރުވިފައިވާ މުހިންމު ބައިތަކެއް ހިމެނޭ ފަތެކެވެ. އަދި ޗައިނާ ސައިފަތުން ހަދާ ސަޔަށް ކިރު އަޅަން ނުޖެހުމަކީ އެ ސައި ބޯން އާދަވެފައިވާ މީހަކަށް މި އާދަމަތީ ދެމިހުރުމުގައި މާ ޚަރަދު ބޮޑު ނޫން ކަމެއް ކަންވެސް ގަބޫލު ކުރަމެވެ. ނަމަވެސް  ވަރުބަލިވެފައިވާ މީހެއްގެ މޯޅިކަން ދުއްވާލައި ހޭލައްވައިލާ ބައި އެ ބަލިބަލި ސަޔަކު ނުހުންނާނެއެވެ. އެ ސައި ބުއިމަށްފަހު މީހާގެ އުއްމީދު ރޯޝަންވެ، ވިސްނުން މާ ޙިކުމަތްތެރިވެ، ދުނިޔެ މާ ފެހިކޮށް ދައްކައިދޭ ސިފަތަކެއް ޗައިނާ ސަޔަކު ހަމަ ޔަގީނުންވެސް ނުހިމެނެއެވެ!

އިނގިރޭސީންގެ އާންމު ބަސްމަގުގައި، ހިތްހަމަޖެހުމާއި އުފާވެރި ރާގެއްގައި، މީރު ސައިތައްޓެކޭ އެ ބުނަނީ އިންޑިޔާ ސައިފަތުގެ ވާހަކައެވެ. ސައި ހަދަންވާނީ ފޮދުވަރުންނެވެ. އެވަގުތަކަށް ބޭނުންވާ މިންވަރަށް ފޯންޗެއްގައެވެ. ފެން ކެއްކި ބޮޑު ކުރަޔަށް ސައިފަތް އަޅައިގެން އެ ތައްޔާރު ކުރާ ސަޔަކީ އެއްވެސް ހާލެއްގައި މީރު ސަޔެއްނޫނެވެ.  އަދި އަމުދުން ސިފައިންނަށް، ރަށްބޭރުގައިވާ ފޭލިގެތަކުގައި ބޮޑެތި ސަމާވަރުގައި އެ ކައްކާ ސަޔަކީ ގިރިސް ރަހަޔާއި އުވަފެން ރަހަ ލާ ބުއިމެކެވެ. އެޔަކީ ސަޔެއްނޫނެވެ.

މީރު ސައި ހަދަން ކަމުދާ ފޯންޗު ހަދާފައި ހުންނަންވާނީ ކޯރު ކިސަޑު މުށިންނެވެ. މައުދަނުން ހަދާފައި ހުންނަ ފޯންޗުގައި މީރު ސައި ހެދުމަކީ ވާނޭ ކަމެއް ނޫނެވެ. އަދި އޮފުލީ މައުދަނު ފޯންޗު މިކަމަށް މާ ކަމުނުދެއެވެ! ތިންވަނަ ކަމަކީ ސައިފަތް އެޅުމުގެ ކުރިން ފޯންޗު ހޫނު ކުރުމެވެ. ބައެއް މީހުން ހަދާހެން ހޫނުކުރި ފެން ފޯންޗަށް އަޅައި އެތެރޭގައި ހޫނުފެން ޖެހޭގޮތައް ފޯންޗު އަރިއަރިއަށް ހަލުވައިގެން އެތެރެ ހޫނު ކުރުމަކީ މިކަން ކުރަން އެންމެ ރަނގަޅު ގޮތެއް ނޫނެވެ. ފޯންޗު ހޫނު ކުރަން އެންމެ ރަނގަޅީ ހަމަ އުނދުންމަތީގައި ކުޑައިރުކޮޅަކު މަޑުގިނީގައި ބަހައްޓައިގެން ކުރާ ހޫނުންނެވެ.

ދެން ވިސްނާން ޖެހޭ ކަމަކީ ސައިގެ ކުލައަށެވެ! ކެކިކެކި ހުރި ހޫނުފެން ފޯންޗަށް އަޅާއިރު އެފޯންޗުގައި ހުންނަންވާނީ ކުޑަކޮންވެސް މުއްބާރުކަމެއް، ދަހިކަމެއްނެތި، ނުހަނު ދީލަތި ކަމާއެކު އަޅާފައިވާ ސައިފަތެވެ. ސައިސަމުސަލަކުން ހަ އުސްތުނބުގެ މީރު ސައިފަތް އެއް ލީޓަރު ފެން އެޅޭވަރުގެ ފޯންޗަކަށް  އަޅަންވާނެއެވެ. އިގުތިސޯދު ކުރާނީ ސައި ހަދާ ވަގުތަކު ނޫނެވެ.  އަހަރެން ދެކޭ ގޮތުގައި އަސްކެނި ފެންހެން ހުންނަ ސައިގެ ވިހި ތައްޓަށް ވުރެ ކުލަ ގަދަ ބާރު ހުރި މީރު އެއް ސައިތަށި، ހަށިގަނޑު ތާޒާކޮށްލަން މާ ރަނގަޅެވެ. މީރުކޮށް ސައިބޯން އާދަ ވެފައިވާ މީހުންގެ ކިބައިގައި ފާހަގަވާ އެއް ކަމަކީ، އެމީހުން ބޯ ސައިގެ ކުލަ ގަދަ ކަމާއި، އެއް އަހަރުން އަނެއް އަހަރަށް އެ ބޯ ސައިގެ ކުލަވެސް ގަދަކުރަމުން އަންނަ އައުމެވެ. މިކަން ދައުލަތުންވެސް ގަބޫލު ކުރައްވައި އިނގިރޭސި ވިލާތުގައި މަދަނީ ޚިދުމަތުގައި ދިގު މުއްދަތެއްގައި މަސައްކަތް ކުރެއްވި ބޭބޭފުޅުންނަށް، ދައުލަތުން ޕެންޝަން ދެއްވައި އެބޭފުޅުންނަށް އަރުވާ ސައިފަތުގެ މިންވަރު ކޮންމެ އަހަރަކު އިތުރު ކުރައްވައެވެ. ( ޖޯޖް އޯވެލް މި ލިޔުން ލިޔުއްވީ ދެވަނަ ބޮޑު ހަނގުރާމަ ނިމި، އަދި ހަމަސްދުވަސް ވެސް ނުވަނީހެވެ.)

ތަބާވާން ޖެހޭ ފަސްވަނަ ފިޔަވަޅަކީ، ފޯންޗަށް ސައިފަތް އަޅަން ޖެހޭ މުހިންމު އުސޫލެވެ. ސައިފަތަކީ  ތުނި ދާގަނޑުފޮތީގެ ކޮތަޅު ކޮތަޅަށް އަޅައި ހައްޔަރުކޮށް ބަނދެވިގެންވާނޭ އެއްޗެއް ނޫނެވެ. ސައިފަތް ހުންނަންވާނީ މިނިވަންކަން މަތީގައެވެ. މިނިވަންކަމުގައި މުޅި ފޯންޗުތެރެއަށް ބުރުއްސާލެވިފައެވެ. ސައި ތައްޔާރު ވުމަށްފަހު، ސައިފުރޭނިން ފުރާނާނެ ކަމެއްވެސް ނެތެވެ. ބައެއް ރަށްރަށުން ދެކޭ ފޯންޗުގައި، ސައި އޮހޭ ވައްގަނޑުގެ އެތެރެ އަނގަމަތީގައި، ފަހަރެއްގައި ސައި ޖޯޑަށް ވެއްޓިދާނެ ސައިފަތް ކޮޅެއް ހިފަހައްޓަން ނަރުދާ ކޮޅެއްވެސް ހަރުކޮށްފައި ހުރެއެވެ. މިހެން ކަންތައް ކުރުމުން ހީވަނީ ސައިފަތަކީ ގެއްލުން ދެނިވި އެއްޗެއް ހެންނެވެ. ހަގީގަތުގައި ސައިފަތްކޮޅެއް ދިރުވިގެން ގެއްލުމެއްވީ ފަހެ ކާކަށް ހެއްޔެވެ؟ ދާގަނޑުފޮތީގެ ކޮތަޅުގައްޔާއި ލޯވަޅުއެޅި މައުދަނީ އެއްޗަކަށް ސައިފަތް އަޅައި ފޯންޗު އެތެރޭގައި ހައްޔަރު ކުރުމުގެ ދެރަކަމަކީ މިހެން ބަނދެ ހައްޔަރުކުރުމުން ސައިފަތުގެ ރީތި ކުލަ އާއި މީރު ރަހަ ސައިފަތުން ދޫވެގެން މުޅި ފޯންޗުތެރެއަށް ބެހިގެން ނުގޮސް އެއެއްޗެއްގައި ބަންދުވެ ހިފެހެއްޓުމެވެ.

ހަވަނަޔަށް އޮތީ ފޯންޗަށް ކެކިކެކި ހުރި ހޫނުފެން އަޅާނޭ ގޮތެވެ. މިކަމުގައި ކަންތައް ކުރަން ޖެހޭ އެންމެ މޮޅު ގޮތަކީ ސައިކުރާދޮށަށް ފޯންޗު ގެންދިއުމެވެ. ނަމަނަމަ ފޯންޗު ހުރިތަނަށް ސައިކުރާ ނު އުފުލާށެވެ. ފޯންޗު ތެރެއަށް ދޫކޮށްލެވިފައި އެވާ ސައިފަތުގައި ފެން ޖެހޭއިރު، އެ މުހިންމު ހިނދުކޮޅުގައި ފެން ހުންނަންވާނީ ހަމަ ކެކިކެކިއެވެ! މިހެންވެ އަލިފާނާ ދުރަށް ސައިކުރާ ނުގެންދާންވެގެން ސައިކުރާ އުނދުންމަތީގައި ހުރިގޮތަށް ހުއްޓައި، އެތަނަށް ފޯންޗު ގެންނާން ޖެހެނީއެވެ. ފޯންޗަށް ސައިކުރާ އަރިކޮށްލާއިރުވެސް ސައިކުރާފުލަށް ހޫނުވާންވާނެއެވެ. މިކަމުގެ ބައެއް މާހިރުން ވިދާޅުވާ ގޮތުގައި، އެންމެ ކަމުދަނީ ސައިކުރަޔަށް، އަލަށް އެޅި ފެން ކެއްކުމެވެ. ނަމަވެސް ކުރިން ކައްކާފައި ހިހޫވެފައިހުރި ފެން ހޫނު ކުރަމުން ގޮސް ކެކޭވަރަށް ހޫނުކޮށްފައި ސައި ހެދުމުން ސައިގެ ރަހަޔަށް ވަކި ތަފާތެއް އަންނަކަމެއް އަހަންނަށް އަދި ފާހަގައެއް ނުކުރެވެއެވެ.

ހަތްވަނައަށް އޮތީ ސައިފަތުގެ މައްޗަށް ކެކިކެކި ހުރި ހޫނުފެން އެޅުމަށްފަހު އިރުކޮޅަކު ބަހައްޓާފައި ޖޯޑުޖޯޑަށް އެޅުމުގެ ކުރިން އެ ސައިފަތު ފެންފޮދު ރީތިކޮށް ސަމުސަލަކުން ގިރައިލުމެވެ. އަދި ބުނަންހެއްޔެވެ. އެންމެ ފައްކަލީ ފޯންޗުން ސައި ބޭރަށް ނުދާގޮތަށް ފޯންޗު ތަޅުވާލައި ފެންމަތީގައި ހުރިނަމަ ހުރި ސައިފަތްކޮޅު ފޯންޗު ފުލަށް ގެނައުމެވެ.

އަށްވަނައަށް އޮތީ ސައި ބޯން ބޭނުންކުރެވޭ ޖޯޑުގެ މުހިންމު ކަމެވެ. އެ ޖޯޑު ހުންނަންވާނީ އިނގިރޭސީން ނާސްތާ ގަޑީގައި ބޭނުންކުރާ ޖޯޑުގެ ކިއްސަރަށެވެ.   އެއީ ހިމަކޮށް އުސްކޮށް ފަރުމާކޮށްފައި ހުންނަ ޖޯޑެކެވެ. މި ޖޯޑަށް ސައި އެޅޭ މިންވަރުވެސް ވަރަށް އެކަށީގެން ވެއެވެ. މާ ތިލަކޮށް ޖޯޑުގެ އަނގަމަތި ބޭރަށް ފޭކޮށް ފަރުމާކޮށްފައިވާ ނަމަ އެ ޖޯޑުގައި ހުރި ސައިފޮދު ބޮއި ނިމުމުގެ ކުރިން އޭގައި ހުރި ސައި ފިނިވެދެއެވެ.

ނުވަވަނަޔަށް ވިސްނަން ޖެހޭ ކަމަކީ ދިޔާކިރުގެ މަތީފަށަލައިގައި ހުންނަ އޮލަ ކްރީމް ކޮޅު ސަމުސަލަކުން ނަގައި އެއްކައިރި ކުރުމަށްފަހު ދެން ހުރިބައި ސަޔަށް އަޅައިގެން ބުއިމެވެ. މަތީފަށަލައިގައި ހުންނަ ކްރީމަކީ ސައިގެ މީރު ރަހަ ކަނޑައިލާ އެއްޗެކެވެ. ގެރިކިރުގެ އެ މުއްސަނދި ފަށަލަޔަކީ ސަޔާ  މާ ގުޅޭ ބައެއް ނޫނެވެ.

ދިހަވަނަޔަށް ހަނދާން ކޮށްދޭ ހިތްވަނީ،  ސަޔާ ގުޅުންހުރި ތަކެތި ޖޯޑަށް އަޅަން ޖެހޭ ތަރުތީބެވެ. ޖޯޑަށް އެންމެ ފުރަތަމަ އަޅަންވާނީ ސަޔެވެ. ރަނގަޅަށް ހަނދާން ބަހައްޓައްޗެވެ. މި ބުނެވުނީ ދެބަސްވުން ވަރަށް އާންމު ކަމެކެވެ. އިނގިރޭސި ވިލާތުގެ ކޮންމެ އާއިލާއެއްގައި މިކަމަށް ތާއީދު ކުރާ ބަޔަކާއި، މިކަން ހަމަ ހިލާ ގަބޫލު ނުކުރާނެ ބަޔަކު އުޅޭނެއެވެ. ކޮންމެ އާއިލާ އެއް ދެ ބަޔަކަށް ބެހެނީ ކޮން ކަމެއްގައި ބާއެވެ؟ އެއީ، ޖޯޑަށް އެންމެ ފުރަތަމަ އަޅަން ޖެހޭނީ ކިރު ކަމަށް ފިސާރި ޔަގީން ކަމާއެކު ބުނާ ބަޔަކާއި، އެންމެ ފުރަތަމަ ސައިޖޯޑުގެ ފުލުގައި ޖެހެންވާނީ ރަތުރަންކުލައިގެ ސައިފޮދެކޭ ކިޔައި ވަކާލާތު ކުރާ މަދު ބައެކެވެ. އަހަރެން މިއީ ފަހުން މި ބުނެވުނު މަދުބައިގެ މީހެކެވެ. އެމީހުންގެ ކޮޅު މޮޅުކުރަން އެމީހުންވެސް ލައްކަ ހުއްޖަތް ދައްކައެވެ. އަހަންނަށް ދެވެން އޮތް ޒުވާބަކީ ހަމަބުއްދިއަށް ބުރަވެ ބުނަން އޮތް ޒުވާބެކެވެ. އެއީ، ކުރިން ސައި އަޅައި ފަހުން ކިރު އަޅަމުން ގިރަމުންދާއިރު، އެމީހަކު ބޭނުން ކުލައެއް އެ ސައިތަށީގައި ޖެހުމުން އެވީ ހުއްޓައިލާށެވެ. ކުރިން ކިރު އޮއްސި މީހުންނަށް މިކަމުގައި މާ ބޮޑު ބާރެއް އަތްމައްޗަކު ނޯވެއެވެ. އެކިފަހަރު އެކި މިންވަރަށް ޖޯޑަށް ކިރު އޮއްސި އެމީހުންނަށް، ހަމަހަމަ މިންގަނޑެއް ނުގެންގުޅެވުން މާ ގާތީއެވެ. މިއީ އަޅުގަނޑު ދެކޭ ގޮތެވެ. އެމީހުން މި ޚިޔާލު ހަމަ އެއްގޮތަކަށްވެސް ބަލައެއް ނުގަންނާނެއެވެ!

އެންމެ ފަހު ނުކުތާއަކީ،  ތިބާއަކީ ރަޝިޔާ މީހެއް ނޫންނަމަ، ސަޔަށް ހަކުރު އަޅާނެ ކަމެއް ނެތެވެ. މިހެން ލިޔާއިރުވެސް އަހަންނަށް އަނެއްކާވެސް ގިނަ މީހުންގެ ތާއީދު ގެއްލޭނެކަން ރަނގަޅަށް އެނގެއެވެ. މާ ގިނަ ބަޔަކު ތާއީދު ނުކުރި ނަމަވެސް ބުނަން ހެއްޔެވެ. ސަޔަކީ ހަކުރު އަޅައިގެން ފޮނިކޮށްގެން ބޯ ބުއިމެއް ނޫނެވެ. ތިބާއަކީ މީރު ސައި ބޯހިތުން ސައިބޯ މީހެއްނަމަ އެމީރު ރަހަ، ހަކުރު އަޅައިގެން ދުއްވައިލާން ތިޔަ އުޅެނީ އަޅެ ކޮން ބޭނުމެއްގައި ހެއްޔެވެ. ސަޔަށް ހަކުރު އަޅާ ބީދައިން އަސޭމިރުހާއި ލޮނުވެސް އެޅިދާނެތާއެވެ! ސަޔަކީ އޭގެ ތޮބީއަތުގައި ހިތިރަހަ ހުންނަ އެއްޗެކެވެ. ހަކުރު އެޅި ރޯ ފަނި ބޯން ބޭނުން ބަޔަކު، ކޮންމެހެން ސައިފަތް ހޯދާކަށް ނުޖެހެއެވެ. ހޫނު ފެނަށް ހަކުރު އަޅައިގެން ގިރައިލާންވީއެވެ!

ބައެއް މީހުން ބުނާގޮތުގައި، އެމީހުން ސައި ބޯ ސަބަބަކީ، އިނގިރޭސި ވިލާތު ޖައްވު އާންމު ގޮތެއްގައި އޮންނަލެއް ފިނިކަމުންނެވެ. އެތެރެ ހަށި ހޫނުކޮށްލާ ހިތުންނެވެ. ސައިގެ ހިތިރަހައިގެ ބޭނުމަކު ނޫނެވެ. ހަކުރު އަޅަނީ ބޭނުމެއްނެތް ހިތިރަހަ ކަނޑުވައިލާށެވެ.

މަގު އޮޅި ވާވަދެފައި ތިބި އެ ނިކަމެތީންނަށް އަހަރެން ދޭން އޮތް ޖަވާބަކީ، އަޅެ ދެ ހަފުތާއެއްހައި ދުވަހު ހަކުރުކޮޅެއް ނާޅައި ސައި ބޯން އާދަ ކޮށްބަލާށެވެ. ވަރަށް ބޮޑަށް ޔަގީންވާ ގޮތުގައި އެ ސާދަ ދުވަހުގެ ފަހުން، ދެން ދުވަހަކުވެސް އެމީހަކު ސަޔަށް ހަކުރު އަޅައި އެ މީރު ބުއިން ގަޑުބަޑު ކުރާ ހިތެއް ނުވާނެއެވެ!