
އަހަރެންގެ އުމުރުން މިހާރު ފަސްދޮޅަހަށްވުރެ އިތުރުވެއްޖެއެވެ. މައިންބަފައިން އަތުން މުދަލެއް ވާރުތަނުވެ، އުމުރުން ފަނަރަވަރަކަށް އަހަރުން ސުރެ އަރާމެއް ނެތި އަހަރެން ކުރި ބުރަ މަސައްކަތުން، ގަނެ އަމިއްލަކޮށްފައިވާ ހަތަރު ފިހާރަ ބާޒާރުގައި މިހާރު ހުންނާނެއެވެ. ތިންތަން ކުއްޔަށް ދީފައި އަނެއް ފިހާރަ މި ހިންގަނީ އަހަންނެވެ. އަންހެނުންނާއި އެކީގައި ދިރިއުޅެމުން މިއަންނަނީ އަމިއްލަ ގެއެއްގައެވެ. ބޮޑެތިވެ އަމިއްލަ ދިރިއުޅުމެއް ފަށާފައި ތިބި ދެ ފިރިހެން ދަރިންގެ، އަހަރެންގެ ދެލޯ ފަދަ ކާފަދަރިންވެސް މިހާރު އެބަ ތިއްބެވެ. ދަރަންޏެއް ނެތި، އަހަރެން އުޅެމުން އައި މަޑުމައިތިރި ރީތި ދިރިއުޅުން އެފުށް މިފުށަށް ޖެހީ މިހާރު އެންމެންގެ ދޫމަތީގައި އޮންނަ ކޮރޯނާގެ ސަބަބުން ވާންޖެހުނު ފުރަބަންދުގެ ތެރޭގައެވެ!
އަހަރުމެން ދިރިއުޅޭ ސަހަރުގައި ކޮރޯނާ ވަބާ ފެތުރެން ފަށައި، ހަރުކަށި ފުރަބަންދެއް ސަރުކާރުން އިއުލާނު ކުރުމުގެ ކުރިން، އަހަރެންގެ އަންހެނުން އަހަންނާމެދު ކަންބޮޑުވާން ފަށައިފިއެވެ. ފިހާރަ ހިންގުން ޒުވާނުންނާ ހަވާލުކޮށް ގިނައިން ގޭގައި އުޅެން ހިތްވަރުދީ، އަބަދު ހެން ހުންނަނީ މިވާހަކަ ދައްކައިލަ ދައްކައިލައެވެ. ނަމަވެސް، މުދަލުގެ ވެރިން ފެންނަން ނުހުންނަ ވިޔަފާރިގެތަކަށް ވާގޮތް މާ ގިނައިން ފެނިފައިވާތީ، ބާޒާރަށް ނުގޮސް ގޭގައި މަޑުކުރާހިތް ނުވަނީއެވެ.
މިހެންވެ، ބަސްނާހާ ފިރިމީހާއަށް ހަމަވިސްނުން އެންމެ އަވަހަށް އަންނާނެ ގޮތެއް އަންހެނުން ރާވައިފިއެވެ. އެދުވަހު އަހަރެން ބާޒާރުން އައީ މަޣްރިބު ނަމާދު ކޮށްގެންނެވެ. ގެއަށް އައިސް ވަންއިރު، އަންހެނުން އިނީ ވަރަށް މޮޅިންނެވެ. ސުފުރާމަތި ހީވަނީ ބޮޑު ޖާފަތަކަށް ތައްޔާރު ކޮށްފައި އޮތް ހެންނެވެ. ދެރަ ކަމަކީ އަމިއްލަ ދެއަތުން މި ހުރިހައި މަސައްކަތް ކުރި މީހާގެ މޫނުމަތިން އުފާވެރިކަމެއް ފެންނާން ނެތުމެވެ!
ވީގޮތެއް އަހައި އޮޅުން ފިލުވުމުން އެނގުނީ، އަހަރެންގެ އަންހެނުން ރޭވި ގޮތަށް ކަންތައް ކުރިޔަށް ނުދިޔަ ކަމެވެ. އަންހެނުންގެ ހިތުގައި އޮތީ މީރުކޮށް ކައްކާފައި، ދެދަރިންނާއި އެކުދިންގެ އަނބިންނާއި މާމަދަރިންނާ އެކީގައި މީރު ކެއުމެއް ކަމުން، އަހަރެން ދެން މި ނުރައްކާތެރި ދުވަސްވަރު ބާޒާރަށް ދިޔުން ބުއްދިވެރި ނޫންކަމުގައ، އެކުދިންލައްވައި ބުނުވުމެވެ. ނަމަވެސް ބޭކާރު ބަހަނާތަކެއް ދައްކައި ދެބެންކުރެ އެކަކުވެސް މައިންބަފައިން ދެކިލައި އާއިލީ ކަމެއްގައި މަޝްވަރާކޮށްލަން ބޭނުމެއް ނުވިއެވެ!
ބާރަށް ފެތުރެމުން އަންނަ ރޯގާ ޖެހިދާނެ ކަމުގެ ބިރަށް އަހަރުމެންގެ ދެދަރިން މައިން ބަފައިން އުޅޭ ގެއަށް ނައި ނަމަވެސް، އަންހެނުން އެކުރި ހިތްވަރު ބަލައިގަނެ، ބާޒާރަށް ނުދާން ނިންމައިފީމެވެ. ގޭގައި ކުރާން ހުންނަ ބައެއް ކަންކަން ކޮށްލައި ފޮތް ބަލައިލައި މިހެން އުޅުމުގެ ތެރޭގައި އަންހެނުންނަށް އައި ޚިޔާލެއްގެ މަތިން، ދެބެންނާ ގުޅައި ބައްޕައަށް ކޮރޯނާ ޖެހި ހުންގަދަވެފައިވާ ކަމަށް ބުނެފިއެވެ. އެހެން ބުނުމުން ފޯނުން މަންމައާ ގުޅައި އަހަރެންގެ ހާލު ބަލައެވެ. ބައްޕަ ދެކިލާން އަންނާކަށް ނުކެރުނެވެ. މިހެން ގުޅި ދުވަހެއްގައި އެކުދިން ގާތުގައި، ބައްޕަ މިހާރު މަންމަ އެކަންޏަށް ބެލެހެއްޓޭވަރަށްވުރެ ބަލިކަމުން ހޮސްޕިޓަލަކަށް ގެންދިޔައީ ކަމުގައި އެކުދިންގެ މަންމަ އެއް ދުވަހަކު ބުނެފިއެވެ.
ދެތިން ދުވަސް ފަހުން، ފޯނުން ގުޅައި އެކުދިންގެ ބައްޕަ މަރުވެގެން ދައުލަތުގެ ޚަރަދުގައި ވަޅުލައިފި ކަމާ، މަންމަވެސް މިހާރު މިހުރީ އަމިއްލައަށް އެކަހެރިވެގެން ކަމުގައި ވެސް ބުންޏެވެ. ދެން، ސާދަ ދުވަސްކޮށްފައި އެކުދިންނަށް ގުޅައި، މަންމަ މިހާރު މިހުރީ އެ މުއްދަތު ނިމި ޓެސްޓު ކުރެވި ބައްޔަށް ނައްސިވެފައި ކަމުގައި ބުނެފިއެވެ.
އަހަރެން " މަރުވެގެން ވަޅުލުމަށް ފަހު" މަންމަ ކިބައިގައިވެސް ބަލި ނެތްކަން ޔަގީންކޮށްފައި ދެދަރިންމެ އާއިލާ ގޮވައިގެން އެކުދިންގެ މަންމަ ދެކިލަން ކަމަށް ބުނެ އަހަރުމެންގެ ގެއަށް އަތުވެއްޖެއެވެ. ހުރިހާ އެންމެންވެސް ތިބީ، (އަރަބިންގެ އާދައިގެ މަތިން) ކަޅު ފޭރާމުގައެވެ. ގާތް ގިމާގެ މީހަކު ނިޔާވެއްޖެނަމަ މިއީ ވަރަށް އާންމު ކަމެކެވެ. ހަމަ އެގޮތުގެމަތިން، މަންމައަށް ކަދުރުކޮޅެއްވެސް ގެނައެވެ.
އަހަރެން ކޮޓަރީގައި ނުނިކުމެ، އެމީހުން ދައްކާ ވާހަކަ އަޑުއަހަން މަޑުމަޑުން އިނީމެވެ. " މަރުވެފައިވާ" އަހަރެންގެ މައްޗަށް ފާތިހާކިޔަވައި އަވަސް އަވަހަށް އެމީހުން ތައްޔާރު ކޮށްފައިހުރި ލިޔުންތަކެއް ނަގައިފިއެވެ. އެއީ އެކުދިން އަމިއްލައަމިއްލަޔަށް ބައްޕަގެ މުދާ ބެހި ގޮތުގެ ލިޔުންތަކެވެ. ބައްޕަގެ މުދަލެއް ދެދަރިންގެ މައްޗަށް ބަހައި ނިންމިއިރު، މަންމައަށް ލިބެނީ ހަމައެކަނި މަންމަ މިހާރު ދިރިއުޅޭ ގެއެވެ! މުދާބެހުމުގެ ކަންތައް، ބައްޕަޔަށް ސާޅީސްވަންދެން އިހަށް މަޑުކޮށްލަން އެކުދިން ގާތުގައި މަންމަ އާދޭސްކޮށް އެދުމުން އަޑުއެހި މީހަކު ނެތެވެ!
އެކުދިންގެ މައިންބަފައިންގެ މައްޗަށް ހަގީގީ ލޯބީގެ ކުޑަވެސް މިންވަރެއް ނެތި ބަހާނެ ގޮތަކަށް މުދާބަހައި ނިންމައިފިހެން ހީވުމުން ކޮޓަރީގެ ދޮރު ހުޅުވާލައިފައި އެމީހުންގެ ތެރެޔަށް އަހަރެން ނިކުތީމެވެ! އެމީހުން ހައިރާންވެ ބުނާނެ އެއްޗެއް ނޭގިގެން ކޮސްވެފައި ތިއްބައި ހިތުގައި ހުރި ހުރިހައި އެއްޗެއް ގޮވައި ދަރިންނާއި ކާފަދަރިންނާއި އެމީހުން ގެނައި ވިޔާނުދާ ވަކީލާއި ގެއިންނެރެ ފައްސައި ނަގައިލައިފީމެވެ!
އެވެރިން ގެއިން ނެރެ، އެމީހުން ދާނެތާކަށް ދިޔަފަހުން އަހަރެން ހިތަށް އެރީ، އަހަންނަށް ބަލައި ބޮޑުކުރެވުނީ އަމިއްލަ ދަރިން ބާއެވެ، ނުވަތަ ބޮޑު ދެ ކޮރޯނާ އާއި ކުދިކުދި ހަތަރު ކޮރޯނާ ނޫންބާއެވެ!
އެރޭ، އަންހެނުންނާއި ދެމީހުން ކައިގެން ވިސްނީ ބާޒާރުގައި ހުރި ހަތަރު ފިހާރަ ވިއްކައިލާށެވެ. ހިތުގައި އޮތީ ތިން ފިހާރައާއި އަމިއްލަ މުދާހުރި ފިހާރަވެސް ވިއްކާލައި ލިބުނު އެއްޗެއް ސަރުކާރަށް ހަދިޔާކޮށް، ކޮރޯނާ ވަބާގެ ސަބަބުން ބިކަވި މީހުންނަށް އެހީވުމަށެވެ. މިހާރު މި އުޅޭ ގެ ވިއްކައިލާފައި، ރަށްފުށުގެ މަޑުމައިތިރި ހިސާބަކުން ކުޑަ ގެއަކާއި ބިންކޮޅެއް ގަނެ ދެމަފިރިންގެ އުމުރުގައި ބާކީ އޮތް ދުވަސްކޮޅު ހިމޭން ދިރިއުޅުމެއް އުޅޭށެވެ. ބޭންކުގައި ރައްކާ ކުރެވިފައި ހުރި ފައިސާއިން ބަކަރިކޮޅެއް ގަނެ އެސޮރުމެންނަށް ލޯބި ދީ، އަހަރުމެނަށް ބަލައި ބޮޑުކުރެވުނު ބޮޑެތި ކޮރޯނާގެ ބަދަލުގައި ދޮޅަހަކަށް ބަކަރި ބެލެހެއްޓުމުގައި ވަރުބަލިވިޔަސް، ހިތަށް މާ ފަސޭހަވާނެކަމާ މެދު ޝައްކެއްވެސް ނެތެވެ!
(މިއީ އަންޞާރު މުޙައްމަދު އަލްކައިލާނީ ގެ ލިޔުއްވުމެއްގެ ތަރުޖަމާއެކެވެ.)
ވަރަށް ޢިބްރަތްތެރި ވާހަކަ އެއް. ވަރަށް ރީތި. شكرية