މީހަކު ބޭނުން ވަނީ އޭނާގެ ދަރިފުޅު ޑަކްޓަރަކަށް ހަދާށެވެ. އެންމެ ފުރަތަމަ އޭނާ ދަރިފުޅު ގާތު ބުނީ ރަނގަޅު ތަނަކުން ޢިމާރާތެއް ހޯދުމަށް ފަހު އެ ތާނގައި ކްލިނިކެއް ހުޅުވާށެވެ. އޭގެ ފަހުން ކިޔަވަން ފަށާށެވެ. އެއްވެސް ބަފަޔަކު އޭނާގެ ދަރިއަކަށް މި ފަދަ ނަސޭހަތެއް ދީފި ނަމަ، އެއީ މޮޔައެއް ކަމަށް ނުވަތަ ހަމަނުޖެހޭ މީހެއް ކަމަށް ތިޔަ ބޭފުޅުން ވިދާޅުވާނެއެވެ. އެހެނީ ޑަކްޓަރުކަން ކިޔެވުމަކީ ކްލިނިކެއް ހުޅުވުމުގެ ކުރިން ކުރަން ޖެހޭ ކަމެކެވެ. އެކަމަކު ހެއްވާ ކަމަކީ އަޅުގަނޑުމެންގެ ލީޑަރުން މި ދެންނެވި ފަދަ "އިދިކޮޅު މަސައްކަތް" ކުރައްވާ ކަމެވެ. އެއިން އެއްވެސް ބޭފުޅަކީ މޮޔައެކޭ ނުވަތަ ހަމަނުޖެހޭ ބޭފުޅެކޭ އަޅުގަނޑުމެން ނުބުނަމުއެވެ. އެ ބޭފުޅުންނަށް އަޅުގަނޑުމެން އަރުވަނީ މުފައްކިރުން ނުވަތަ ޒަޢީމުންގެ ލަޤަބެވެ.
މި ޒަމާނުގެ މުސްލިމް ލީޑަރުން ރައްޔިތުންނަށް ދެއްވާ ޢާއްމު މެސެޖަކީ ނުކުރެވޭ ފަދަ ކަންތައްތައް ކުރަން ދެއްވާ މެސެޖެވެ. އެންމެ ފުރަތަމަ ސިޔާސީ މިނިވަންކަން ހޯދާށެވެ. ޤައުމު ބިނާ ކުރުމުގެ މަސައްކަތް ފަށާނީ އޭގެ ފަހުންނެވެ. އެންމެ ފުރަތަމަ ބިމުން ތަންކޮޅެއް ހޯދާށެވެ. އޭގެ ފަހުން އެ ތާނގައި އިސްލާމީ ނިޒާމެއް ޤާއިމު ކުރާނީއެވެ. އެންމެ ފުރަތަމަ ސަރުކާރު ވައްޓައިލާށެވެ. މުޖުތަމަޢު އިސްލާހު ކުރުމުގެ މަސައްކަތް ފަށާނީ އޭގެ ފަހުންނެވެ. އެންމެ ފުރަތަމަ ރައްޔިތުންގެ މަޖިލީހުގައި ޤާނޫނު އިސްލާހު ކުރާނީއެވެ. ރައްޔިތުންގެ ވިސްނުން އިސްލާހު ކުރުމުގެ މަސައްކަތް ފަށާނީ އޭގެ ފަހުންނެވެ. މިހެން ގޮސް މި ކަހަލަ ކިތަންމެ ކަމެކެވެ.
މި ހުރިހައި ކަންކަމަކީ ކްލިނިކް ހުޅުވުމަށް ފަހު ޑަކްޓަރުކަން ކިޔެވުން ކަހަލަ ކަންކަމެވެ. އެއް ހާސް އަހަރުގެ ބުރަ މަސައްކަތަށް ފަހުވެސް މުސްލިމުންނަށް ނާކާމިޔާބީ އާއި، ބަރުބާދީއާ ކުރިމަތިލާން ޖެހިފައިވާ މައިގަނޑު ސަބަބަކީ މިއީއެވެ.
އިންސާނުންނަކީ ލަކުޑިއެއް ނޫނެވެ. އަދި ދަގަނޑެއްވެސް ނޫނެވެ. ބޭނުންވާ ގޮތަކަށް، ބޭނުން ވަގުތަކު ލަނބައި، ބައްޓަން ކުރެވޭނީ އެހެންނަމަ ނޫންތޯއެވެ؟ އިންސާނާ ބައްޓަން ކުރެވޭނީ އެންމެ ފަހަރަކުއެވެ. ދެން އޭނާ ހުންނާނީ އެ ބައްޓަން ކުރެވުނު ގޮތަކަށެވެ. ޚާރިޖީ ކަންތައްތަކަށް ބަލާފައި ފަށާ ކަންތައްތައް، ދެވަނަ މަރްޙަލާ އާ ހަމައަށް އައިސްފައި ނާކާމިޔާބު ވެގެން ހުއްޓޭ ސަބަބަކީ މިއީ އެވެ. ލީޑަރުން ދާޚިލީ އިސްލާހުގެ ތަޤްރީރު ކުރަން ފަށަނީ، ޚާރިޖީ މަންޒިލާ ހަމައަށް ވާސިލު ވެވުނީމައެވެ. އެކަމަކު އެ ތަޤްރީރުތަކުގެ އެންމެ އިންސައްތައެއްވެސް ކާމިޔާބެއް ނުވެއެވެ. މި ފަދަ ތަޖްރިބާ ތަކަކީ އިންސާނާގެ ނަފްސިއްޔާތު ނޭނގި ކުރިމަތިލެވޭ ތަޖްރިބާ ތަކެކެވެ. ނަސީބު ދެރަ ކަމުން މި ޒަމާނުގެ ހުރިހައި ދީނީ ލީޑަރުންވެސް ގެންގުޅޭ ސިޔާސަތަކީ މިއީއެވެ. އެންމެންމެ ތިބެނީ އިންސާނާގެ ނަފްސިއްޔާތަކީ ކޮބައިކަން ނޭނގޭ ހާލުގައި ތަޤްރީރު ކުރުންމަތީގައެވެ.
ޤައުމު ތަރައްޤީ ކުރުމަކީ ޙަޤީޤަތުގައި އިންސާނާގެ ޝުޢޫރު ތަރައްޤީ ކުރުމެވެ. ވިސްނުން ތަރައްޤީ ކުރުމެވެ. ޝުޢޫރު ތަރައްޤީ ކުރެވުމާއެކު އެހެން ހުރިހައި ތަރައްީޤއެއްގެ މަގު ހުޅުވިގެން ހިނގައިދާނެއެވެ. ޝޫޢޫރުގެ ތަރައްޤީ އާ ނުލައި އެއްވެސް އެއްޗެއް ހާސިލެއް ނުކުރެވޭނެއެވެ. (ތަރުޖަމާއެއް)
ވަރަށް ރަނގަޅު ލިއުމެއް. ބޭނުމީ މިފަދަ ލިއުންތައް