(7 ޖުލައި 2020 ގައި ޝާއިއުކުރި ބަޔާ ގުޅޭ)
މުޅި އެމެރިކާގައި ރުޅިވެރިކަމުގެ ހުޅުގަނޑު ފެތުރެންފެށީ ހައިރާންވާހައި ހަލުވިކޮށެވެ. ދަރިފުޅުގެ ބައްޕަ އުފަންވީ 1968 ވަނަ އަހަރުގެ ހޫނު މޫސުމެއްގައެވެ. ބައްޕަ ހަނދާން ހުންނަން ފެށީންސުރެ ހުދުނަސްލުގެ މީހުން ފިޔަވައި ދެންތިބި ހުރިހައި ކުލައެއްގެ އިންސާނުންނަށް ތަފާތު އުނދަގޫ ދައްކަމުން އާދެއެވެ. މިހާރު އެހެން މުއައްސަސާތަކަށްވުރެ ފުލުހުން ކުރާ ޖެއްސުމާއި އުނދަގުލާއި ގަދަބަދަވި އަނިޔާ ފާހަގަވާލެއް މާ ބޮޑީއެވެ. އެމީހުންގެ އަތުގައި އަބަދުވެސް ނުރައްކާތެރި ހަތިޔާރު ހުންނާތީ އެމީހުންނަށް ކުރެވެން އޮތް އަނިޔާވެސް މާ ބިރުވެރީއެވެ.
މިފަހަރު މީހުން އެހައި ރުޅި ގަދަވީ ތިން ސަބަބަކާ ހުރެއެވެ. އެމެރިކާގައި ކަޅުނަސްލުގެ މީހުން އުޅޭ ނިސްބަތަށް ބަލާއިރު، މިހާރު ހަލުވިކޮށް މި ފެތުރޭ ރޯގާގައި ކަޅުމީހުން މަރުވަމުން ދަނީ މާ ގިނައިންނެވެ. އެމީހުން އުޅެން ޖެހޭ ގޮތުންނާއި ލިބެންވާ ފަރުވާ ނުލިބުން ފަދަ ކަންކަމުގެ ސަބަބުންނެވެ. މިއީވެސް މިކަންކަމާ ވިސްނާމީހުން ރުޅިއައިސްފައިތިބި ސަބަބެކެވެ. އާމުދަނީ ހޯދަން ކުރަމުން އައި މަސައްކަތްތަކަށް ބަލާއިރުވެސް ދޮންމީހުންނަށްވުރެ ކަޅުމީހުންނަށް ލިބޭގެއްލުން މާ ބޮޑު ކަމަށް ފާހަގަވުމަކީވެސް އަނެއް ސަބަބެވެ. އަނެއްކަމަކީ ފުލުހުންގެ ނޭއްގާނީ ކަމާއި ކަޅުމީހުންނަށް އަމާޒުކޮށް އަބަދުމެ ދައްކާ ގަދަބަދަވިކަމެވެ! ފުނޑުފުނޑުވެ ބައިބައި ވެފައިވާ މުޖްތަމައެއް، ދަރިފުޅަށް މި ދައްކައިލެވުނީ، ތެޅިފައިވާ މޫނުބަލާ ލޯގަނޑަކުންނެވެ!
އިންސާނުންގެ ގައިހަމުގެ ކުލަޔަށް ނުވަތަ ނަސްލަށް ބަލައި އެކިވަރުގެ ޖެއްސުމާއި ގޯނާ ކުރުން މި ހިނގަނީ އެމެރިކާގައި އެކަންޏެއްނޫނެވެ. ދަރިފުޅުގެ ދޮށްޓަށް ތިބި ދޮންބެއާއި ދޮންދައްތަ އުފަންވީ އޮސްޓްރޭލިއާގައެވެ. އެގައުމުގައިވެސް، އެބައްރަށް ހުދުނަސްލުގެ މީހުން އައިއިރުވެސް ރަށުގައިތިބި ރަށްވެރިންނަށް ސަރުކާރުންނާއި އެކި ފަރާތްތަކުން ކަންތައް ކުރާގޮތާމެދު ނުރުހިގެން އެކި ދުވަސްވަރުގައި މުޒާހަރާ ކުރެއެވެ. އޮސްޓްރޭލިޔާގެ އަސްލު ރައްވެހީންނަކީ، އިނގިރޭސީން މުޅި ދުނިޔޭގައި ހަންފެތުރި ދުވަސްވަރުގެ ހިތި ހަނދާންތައް މިހާރުވެސް ހަނދާންހުރި ބައެކެވެ. ބައްޕަ އުފަންވި އިނގިރޭސިވިލާތުގެ ބްރިސްޓޮލްގައި މުޒާހަރާ ކުރި މީހުން، (އެއީ ހަމަ ޖޯޖް ފްލޮއިޑް މަރައިލުމުގެ ހިތާމަޔާއި ރުޅީގައި ވިލާތުގައި ކުރެވުނު މުޒާހަރާއެކެވެ.) އެމީހުން އައި ރުޅީގައި، އެއްޒަމާނެއްގައި އަޅުން ގަނެވިއްކި މީހެއްގެ ބޮޑު ބުދެއްގައި ވާބައްދައި ވައްޓާލައި އެންމެ ފަހުން އެހިސާބުން މޫދައްވެސް އެ ބުދު އެއްލައިލިއެވެ.
ދަރިފުޅާއެވެ. ނޫސްވެރިއެއްގެ ހައިސިއްޔަތުން އެމެރިކާގެ އެކި ހިސާބުހިސާބުގައި ބައްޕަ ދަތުރުކޮށްފީމެވެ. އެކި ފަހަރުމަތިން އެކި ހިސާބަށެވެ. އެމެރިކާގެ ދެކުނު އިސްޓޭޓުތަކުގައި، ނަސްލީ ހަމަހަމަކަން ހޯދަން މިންނަތް މަސައްކަތް ކުރާ މީހުންނާ އެކީގައި އިށީނދެ ވާހަކަދެއްކީމެވެ. ހުދުނަސްލުގެ މީހުންނަށް ލިބިފައިވާ ހައްގުތައް ކަޅުމީހުންނަށް ހޯދައިދޭން އުޅުމުގެ ތެރޭގައި އެކިވަރުގެ އަނިޔާ ލިބިފައިވާ މީހުންނާ ބައްދަލު ކުރީމެވެ. އެމީހުންގެ ވާހަކަތައް އަޑުއެހީމެވެ.
ހުދުނަސްލުގެ މީހުންނަކީ މާ މަތިވެރި ބައެއްކަމުގައި ދެކޭމީހުންގެ ލިޔުންތައް ކިޔައި އެމީހުން ދައްކަން ހުރިވާހަކަތައްވެސް އަޑުއަހައިފީމެވެ. އެމީހުން ބޭނުމީ ކަޅު މީހުންނާއި ހުދުނަސްލުގެ މީހުން، އުފަންވާ ދުވަހުންސުރެ މަރުވެ ކަށްވަޅަށް ދާންދެން ދެބައިމީހުން ވަކިން ދިރިއުޅުމެވެ!
ބައްޕަ އުފަންވީ މާ ދުރުހިސާބެއްގައި ކަމުން، މާކަނޑެއް ހުރަސްކޮށް އެމެރިކާއަށް އާދެވުމުން، މި ދެބައިމީހުންގެ ދިރިއުޅުމުގެ ކަންކަން ދަސްކުރަން ކުރި މަސައްކަތުން އެނގުނީ މީގެ 150 އަކަށް އަހަރު ކުރިން މި ފަސްގަނޑުގައި ދިގު ދާޚިލީ ހަނގުރާމައެއް ކުރެވުނުކަމެވެ. 150 އަކަށް އަހަރު ކުރިން ނިމުނު ހަނގުރާމައެކޭ ލިޔެވުނު ނަމަވެސް، ހަގީގަތުގައި އެ ހަނގުރާމައެއް އަދިވެސް ނުނިމެއެވެ. ދެ ނަސްލުގެ ތަފާތު ބޮޑުވުމަކީ އެމެރިކާގެ ހާލެވެ. ކަންތައް ހުރީ އެގޮތަށް ހަމަޖެހި ނިމިފައެވެ. ދަރިފުޅު އުފަންވި ދުވަސްކޮޅު މީހަކު ރޯމާ ދުވާލު މަގުމައްޗަށް ވައްޓާލައި އެމީހާގެ ކަރަށް ފުލުހަކު ކަކުލުން އޮބައި ފުރާނަ ދުއްވައިލުމަކީ މަދުން ފެންނަ ނާދިރު ކަމެއް ނޫނެވެ. އެއީ ހަމަ އާންމުކޮށް ހިނގާ ސިލްސިލާ ކަމެއްގެ އެންމެބޮޅެކެވެ!
ޚަބަރު ފަތުރާ އިނގިރޭސި ވިލާތުގެ ޖަމާއަތަކުން ބައްޕަ މިރަށަށް ފޮނުވާފައި ހުރިމީހަކަށްވާތީ، ވަށައިގެން ވާ ކަންކަން ދިރާސާކޮށް ކަންކަމުގެ ހަގީގަތް މިހާރު އޮޅުންފިލުވައިފީމެވެ. ތާރީޚީ ކަންތަކާއި މިއަދާ ހަމައަށް ކަންކަން ވަމުން އައިގޮތް ދެނެގަންނާކަށް މާ އުނދަގުލެއް ނޫނެވެ. އެހެން ނަމަވެސް، ބައްޕަ ކަހަލަ ޔޫރަޕު މީހަކަށް ދުވަހަކުވެސް ނުވިސްނޭނެ ހިތި ހަގީގަތަކީ، ކަޅުމީހެއްގެ ގޮތުގައި އާދައިގެ ދިރިއުޅުމެއްގައި އެމެރިކާގެ ހުދުނަސްލުގެ މީހުންގެ ތެރޭގައި އުޅެން ޖެހުމުން، ކޮންމެ ދުވަހަކު އެތައް ފަހަރަކު ތަހައްމަލު ކުރަން ޖެހޭ ކަންކަމެވެ. އެމީހުންގެ އިހްސާސްތައް ބައްޕައަކަށް ދުވަހަކުވެސް ދެނިއެއް ނުގަނެވޭނެއެވެ.
ބައްޕައަށް އެނގި ޔަގީންވާ ކަމަކީ ދަރިފުޅަކީ ހުދުނަސްލުގެ ދެމަފިރިންގެ ރަން ދަރިޔަކަށްވީތީ، ދަރިފުޅަށް އޮޓޮމެޓިކުން އެލިބުނީ ލައްކަ ގިނަ އިމްތިޔާޒު ތަކެކެވެ. ދަރިފުޅު ކުރި މޮޅު ކަމަކާނުލައި ދިރިއުޅުމުގެ ރޭހުގައި މާ ކުރިޔަށް ޖެހިލެވުނީއެވެ! ފިހާރަޔަކަށް ވަނަސް ކާރެއް ދުއްވިޔަސް ދަރިފުޅަކަށް މީހުން ޝައްކުގެ ނަޒަރަކުން ނުބަލާނެއެވެ. ދަރިފުޅު ދުއްވަމުން ދިޔަ ކާރުގައި އެއްބޮކި އަނދާފައޭ ކިޔާފައި މަގުގެ އެއްކައިރިއަށް ފުލުހުން ހުއްޓުވިޔަސް ދަރިފުޅަށް އަނިޔާއެއް ނުކުރާނެއެވެ. ހުތުރުބަހުން ވާހަކައެއް ނުދައްކާނެއެވެ. ދަރިފުޅާ އެކީގައި އުފަންވި ކަޅު ނަސްލުގެ ކުއްޖަކަށްވުރެ ދަރިފުޅުގެ އުމުރު ދިގުވުން މާގާތެވެ. މެދު މަދަރުސީ ތައުލީމު ނިންމައި މަތީ ތައުލީމުގެ ހަރުފަތްތަކުން އަރައިގެން ދިޔުން ދަރިފުޅަށް މާ ފަސޭހަވާނެއެވެ! ކުރާ މަސައްކަތަކުން ބޮޑު މުސާރަ ދަރިފުޅަށް ލިބުމުގެ ފުރުސަތު މާ ބޮޑެވެ. ހުދު ނަސްލުގެ ކުއްޖަކަށްވީތީއެވެ.
ހުރިހައި ނަސްލުގެ މީހުންގެ ދިރިއުޅުމަށް އައި ފާގަތި ކަމުގެ ވާހަކަ އަކީ އަހަރުމެން މިހާރަކަށް އައިސް މާ ގިނައިން ދައްކާ ވާހަކައެކެވެ. ލަންޑަން ކަހަލަ ބޮޑު ސަހަރެއްގެ މޭޔަރުގެ މަގާމަށް އިންޑިޔާމަތިކޮޅު އޭޝިޔާ މީހަކު ހޮވުނު ވަހަކައެވެ. ކަޅުނަސްލުގެ ޒުވާނަކު އެމެރިކާގެ ވެރިކަމަށް ހޮވި އަޅުން ލައްވައި ކުރުވި މަސައްކަތުން އަޅައިފައިވާ ގަނޑުވަރެއްގައި އެންމެ ފަހުން ކަޅު ރައީސަކު ވެރިކަން ކުރެއްވި ވާހަކައެވެ. ނަމަވެސް ބައްޕައަށް މިހާރު އެނގޭ ހަގީގަތަކީ، ހުރިހައި ނަސްލުގެ މީހުންނަށް ހަމަހަމަ ހައްގުތަކެއް ލިބި އެއް ފެންވަރެއްގައި ދިރިއުޅެން ލިބުމަކީ ހަގީގަތަކަށް ވާނޭ ހުވަފެނެއް ނޫންކަމެވެ!
ދަރިފުޅާއެވެ! ދަރިފުޅު އުފަންވުމުން އުފާވެގެން އުޅުމުގެ ބަދަލުގައި ބައްޕައަށް މި ލިޔެވެނީ ހާދަހައި ނާއުންމީދީ ބަސްކޮޅެކެވެ! ދަރިފުޅަށް އެނގޭހެއްޔެވެ؟ އެމެރިކާ އަށް އާދެވުނީ، ބައްޕަ އަންނަ ހިތުން އުޅޭތާ ލައްކަ ދުވަސް ވީފަހުންނެވެ. ކިޔަވަން އުޅުނު ދުވަސްވަރު، ބައްޕަގެ އެންމެ ޒުވާން ދުވަސްވަރު، މިރަށަށް އައުމުގެ މާ ކުރިންވެސް މިއީ ބައްޕަ ވަރަށް ދެކިލާހިތްވި ރަށެކެވެ. މިރަށުގެ އެންމެ ފައްކާ ކަމަކީ މުޅި ދުނިޔެއަށް މަޝްހޫރު " އެމެރިކާ ހުވަފެނެވެ" އެއީ ބުރަމަސައްކަތް ކުރާ ކޮންމެ މީހަކަށް އަތުޖެހެން އޮތް " ހުވަފެނެއްކަމެވެ" ! ޒުވާން ކުދިން މިރަށުގައި އެ އުފުލާ ޒިންމާ، ބައްޕައަށް ވަރަށް ކަމުދެއެވެ. ދުނިޔޭގެ އެކި ކަންކޮޅުތަކުން އަންނަ ގިނަ މީހުން މިރަށަށް ގެންނަނީ މާ ގިނަ ފައިސާ ތަކެއް ނޫނެވެ. މަތީ ތައުލީމުގެ ސަނަދު ނުވަތަ އެމީހެއްގެ ކިބައިގައި ހުރި ހުނަރެއް ފުދެއެވެ. އެއަށްވުރެ އިތުރު ތަކެއްޗެއް ގެންނާނެކަމެއް ނެތެވެ. ދެން އޮތީ ބުރަ މަސައްކަތުން އެއްކަލަ ހުވަފެން އަމިއްލައަށް ހަގީގަތަކަށް ހެދުމެވެ!
ދަރިފުޅާއެވެ! ބައްޕަ ދާދި ދެންމެއަކު މި ލިޔުނު ކަހަލަ ބަސްމަގު، ބައްޕަގެ އެކުވެރި ޔޫރަޕުމީންނާ ހިއްސާކޮށެއް ނޫޅެމެވެ. އެމެރިކާ އާ މެދު ބައްޕަ ހިތްހަމަ ނުޖެހޭކަން އެމީހުންނަކަށް ނާންގަމެވެ. ފަސްއެނބުރި ބަލައިލާއިރު މިހާރު، އުފަން ރަށަށްވުރެ ގިނައިން އުޅެވިފައި މިހުރީ މިރަށުގައެވެ. ނުހަނު އުފަލުން، ބައްޕަ މިރަށުގެ ރައްވެއްސަކަށް ވާހިތްވި ދުވަސް އައެވެ. ދަރިފުޅަކީ މިރަށަށް އުފަންވި ކުއްޖަކަށްވާތީ ދަރިފުޅަށް މުޅި ދުނިޔެ ބަލައިލަން ދަތުރުކުރެވިދާނެއެވެ. ހައިބަތު ހުރި ބޮޑު ބާޒެއް ޖެހި ޕާސްޕޯޓެއް ހިފައިގެންނެވެ. ނަމަވެސް މިހާރު މިރަށަކީ، ބައްޕަގެ ޒުވާންދުވަސްވަރު ލޯބިވި ރަށެއް ނޫނެވެ. ކަޅުނަސްލުގެ މީހުން ވަކިން، އޭޝިއާ މަތިކޮޅު މީހުން ވަކިން، މިރަށުގެ އަސްލު ރައްވެހީން އަދި މާ އެކަހެރިކޮށް ގެންގުޅެމުން " އެކުވެރި އިސްޓޭޓު ތަކަކުން އުފެދިފައިވާ އެމެރިކާ" އެވެ މިގައުމަށް ކިޔުންވެސް މިހާރު ބަލައިގަނެވޭކަށް ނެތެވެ. އެ ނަމުގައި މާ ހައިބަތެއް މިހާރަކު ދެން ނެތެވެ! އެގައުމެއްގެ އިންސާނުން ބައިބައި ކުރުމަށްފަހު އޮންނާނީ ކޮން އެކުވެރި އިސްޓޭޓް ތަކެއްހެއްޔެވެ؟
ދުނިޔޭގެ ރައްވެހިންނަށް އެމެރިކާ މިހާރު ތަސައްވަރު ކުރެވެނީ، އެހެން ގައުމުތަކުން ނަކަލުކޮށް އެ ރަށްރަށުގައި ހިންގަން ބޭނުން ރީތި ސިފަތަކެއް ހުރި ގައުމެއްގެ ގޮތުގައެއް ނޫނެވެ. އަދި ކިއެއްތަ! މި ރަށުން މިހާރު މިފެންނަނީ، މީހުން ބިރުގަނެ، ނަފުރަތުވާ އެތައް ކަމެކެވެ. މާ ބިރުވެރި ނުރައްކާ ތަނެއްގެ ގޮތުގައެވެ. ސްކޫލުތަކުގައި ބަޑީގެ ހަމަލާއެއް ނުދޭ ހަފުތާއެއް ނާދެއެވެ. ބައެއް ފަހަރު ޚަބަރަކަށް ނުވަނީއެވެ. ފުލުހުންގެ ގަދަބަދަވިކަމުގެ އިންތިހާއެވެ! ބައިނަލް އަގުވާމީ ސިޔާސަތަށް ބަލާއިރު ދެއުޅި އެއްނުވުމެވެ.
އާ ސާސްކަފެއް ފެށުނު ދުވަސްވަރު ބައިނަލް އަގްވާމީ މަސްރަހުގައި ދެކެވެން ފެށީ އެމެރިކާގެ ބާރު ކެނޑިފައިވާ ދުނިޔެއެއްގެ ވާހަކައެވެ. މިހާރު ބައްޕައަށް ހީވާ ގޮތުގައި ދައްކަންވީ، ބާރު ކެންޑެމުން އަންނަ އެމެރިކާގެ ވާހަކަ ކަމަށެވެ! ދައްކަންވީ އެއްގަލަށް އަރަން ނޭނގުމުން، ވަކިވަކިވެ ރޫޅެމުން އަނަރޫފަވަމުން އަންނަ، އެއްއިރެއްގައި މާސިންގާ ބާރާއި ނުފޫޒުއޮތް އެމެރިކާއެއްގެ ވާހަކައެވެ!
މިފުރުސަތުގައި ބައްޕަގެ ހަނދާނުން ކައްސައިލައިގެން ނުދަނީސް ލިޔަން ޖެހޭ އެއްކަމަކީ، ދަރިފުޅު އުފަންވުމުން ބައްޕައާއި މަންމަގެ އެންމެ ގާތްތިމާގެ މީހުންނާއި އެކުވެރިން، އެންމެ ގިނައިން އިޝާރާތް ކުރީ ދަރިފުޅަށް " ހޯޕް" ކިޔައި ނަންދިނުމަށެވެ. އިނގިރޭސި ބަހުން އުންމީދުގެ މާނަ ދޭހަވާ ނަމެއް ކިޔަން އެހައި ގިނަ ބަޔަކު ބޭނުންވާނީ އެބަޔަކު، ކިހައިވަރަކަށް ނާއުންމީދުގައި ތިބީމައި ނޫންހެއްޔެވެ؟ ހިތްދަތިވެފައި ތިބިވަރުން، ދަރިފުޅަކީ، އިރާދަ ކުރައްވައިގެން ހެޔޮ ފާލެއްކަމުގައިވުމަށް އެމީހުން އެދެއެވެ! ނަމަވެސް، ބޮޑެތި މީހުން ހަލާކު ކުރަމުން އަންނަ ދުނިޔެއެއް އިސްލާހު ކުރުމަކީ ދަރިފުޅުގެ ވަޒީފާއަކަށް ވުމުގެ ކުރިން، އެއީ ބައްޕަމެންގެ ޖީލުގެ ޒިންމާއެކެވެ! ދަރިފުޅަށް، އުންމީދީ ދުނިޔެއެއް ފަހިކޮށްދިނުމަކީ ބައްޕަމެންގެ ވާޖިބެކެވެ. ދުނިޔޭގެ ވެށި ހަލާކުވެ މޫސުން ދުރާލައި ކިޔަން ނޭނގުމާއި، އަހަރުން އަހަރަށް ބާރުވަމުން އަންނަ ކޮޅިގަނޑުތަކާއި، ކެތް ނުކުރެވޭހައި ހޫނުގަދަ ހޫނު މޫސްންތަކާއި، ފިނިކަމުން އިންތިހާއަށް ފިނިބޮޑު ފިނިމޫސްންތަކަކީ އިންސާނުން އަމިއްލައަށް ކުރަމުން އަންނަ ކަންކަމުގެ ނަތީޖާއެވެ. މުއްސަނދީންނާއި ފަގީރުންގެ ދެމެދުގައިވާ ނުފެންނަ އިންފާރު ބޯވެ ފުޅާވެ އުސްވެ ދެބައިމީހުން ދެދުނިޔެއެއްގައި އުޅޭހައި ތަފާތު ބޮޑުވުމާއި، ޖިންސީ އަނިޔާ އިތުރުވުމާއި، ބިރުވެރި ރޯގާތައް އާންމުވާން ފެށުމާއި މިފަދަ ކަންކަން ގައުމުތަކުގެ އިންފާރަށް ބެލުމެއް ނެތި ފެތުރެން ފެށުމުން މިހާރު އެންމެންނަކީ ބަވަނަވަމުން އަންނަ ދުނިޔެއެއްގެ އެއް ރައްޔިތަކަށް ވެއްޖެއެވެ.
ދަރިފުޅާއެވެ! މާ ގިނަދުވަސްތަކެއް ނުވަނީސް، ބައްޕަމެން ފަރިތަ ނިއުޔޯކް އެ ސަހަރުގެ ކުރީގެ ފަރިކަމަށް އެނބުރި އަންނާނެ ނަމަތާއެވެ! މުޅި ދުނިޔޭގެ ހުރިހައި ގައުމަކުން ކޮންމެވެސް ބަޔަކު މި ނިއުޔޯކުގައި ވަޒަން ކަމުގައި ބަލައިގެން މިހާރު ދިރިއުޅޭނެއެވެ. ބައެއް ދުވަސްދުވަހު، ދުވަހަކުވެސް ނުދެކޭ މީހަކު ދަރިފުޅަށް ނުހަނު ރީތި ހިނިތުންވުމަކުން ހީނލައި ބޯ ޖަހައިލަފާނެއެވެ. ހަމަ ވިދިގެން އަންނަ ދުވަހު އެހެން މީހަކު ހަމަ އެއްވެސް ސަބަބަކާނުލައި ދަރިފުޅަށް ލޯއަޅައިލަފާނެއެވެ! އެއީ ނިއުޔޯކުގެ އާދައެކެވެ! އިރާދަ ކުރެއްވިއްޔާ ދާދި އަވަހަށް ބައްޕަމެންގެ ގާތް ތިމާގެ މީހުންނާއި އެކުވެރި މިތުރުން، ދަރިފުޅު އުރާލައި ލޯބިން ދަރިފުޅަށް ރިވެތި ސަނާ ކިޔާނެއެވެ.
ދަރިފުޅާއެވެ! ބައްޕަ ހިތުގައި އޮތްގޮތަށް ބުނަން ހެއްޔެވެ؟ ކުރީގެ ހާލަތަށް ދުނިޔެ އެނބުރި ރުޖޫއަވުމަށް ބައްޕަ އެދުނު ނަމަވެސް، ދެން ކުރީގެ އާދައިގެ މަތިން އުޅެވެން އޮތް ހެނެއް މިހާރަކު ހިއެއް ނުވެއެވެ! އެއީ މިހާރު ދެބަސް ވެވެން ނެތް ހަގީގަތަކީ، އިސްވެ ދިޔަ ފުރަބަންދާއި، މަގުމަތިން ފެންނަ ރުޅިވެރިކަމުގެ މުޒާހަރާތަކާމެދު ވިސްނައިލާއިރު، ދޭހަވަނީ އިހުގެ އާދައިގެ މަތިން ދެން މާދަމާގެ ކަންކަން ކުރީގައި އޮތްގޮތަށް އިހުގެ އާދަކާދައިގެމަތިން، ކުރިޔަށް ނުގެންދެވޭނެ ކަމެވެ!
