الْحَمْدُ لِلَّهِ رَبِّ الْعَالَمِينَ وَالصَّلاَةُ وَالسَّلاَمُ عَلَى الْمَبْعُوثِ رَحْمَةً لِلْعَالَمِينَ،، وَبَعْدُ!
މިދުވަސްވަރު މީޑިޔާގައި އެންމެ ހޫނުވެފައިވާ މައްސަލައަކީ ޝަރުޢީ ޒިނޭއަކާއި ޤާނޫނީ ޒިނޭއެއްގެ ވާހަކައެވެ. އަޅުގަނޑުމެންގެ ޝައިޚުން ޝަރުޢީ ޒިނޭއެއްގެ ވާހަކަ ދައްކަވާއިރު ޤާނޫނީ ބޭފުޅުން ދައްކަވަނީ ޤާނޫނީ ޒިނޭއެއްގެ ވާހަކައެވެ. މިމައްސަލަ ހޫނުވެ އެކިގޮތްގޮތަށް ބޭބޭފުޅުން ތަފާތު ލިއުންތައް ލިއުއްވައި އެއްބަޔަކު އަނެއް ބަޔަކަށް ފާޑުވިދާޅުވެ، ބަސްތައް ރައްދު ކުރަށްވަމުން ގެންދަވާތީވެ، މާތް ﷲގެ އިރާދަފުޅާއި ވާގިފުޅާއެކު އަޅުގަނޑުވެސް މިމައްސަލައާމެދު ކޮންމެވެސް އެއްޗެއް ބުނެލަން ބޭނުންވީއެވެ. އެހެންކަމުން މި އަރައިރުމުގެ ޙަޤީޤަތަކީ ކޮބައިކަން ކުރުގޮތަކަށް ބަޔާންކޮށްލެވޭތޯ ބަލާނަމެވެ.
ޒިނޭއަކީ މުޖްތަމަޢު ހަލާކުކޮށް ފަސާދަކޮށްލާ ނުބައި ޢަމަލެއް
ޒިނޭއަކީ މުޖްތަމަޢެއް ފަސާދަކޮށް، ނަސްލު އޮޅުވާލައި، ބަލިތަކަށް މަގުކޮށާލަދޭ އެންމެ ނުބައި ވަސީލަތެެވެ. މިސަބަބާހުރެ އިސްލާމް ދީންވަނީ ޒިނޭކުރުން މަނާކޮށް އެކަން ޙަރާމް ކޮށްފައެވެ. އަދި އެންމެ ބޮޑު ފާފައިގެ ގޮތުގައި އެކަން ހިމަނާފައެވެ. ކަން މިހެން ހުރުމާއެކު އިސްލާމް ދީންވަނީ ޒިނޭއަށް މަގުފަހިވާނެ އެންމެހައި މަގުތަކެއް ބަންދުކޮށް އެކަން މަނާކޮށްފައެވެ. މާތް ﷲ ވަޙީ ކުރަށްވާފައި ވެއެވެ. وَلَا تَقْرَبُوا الزِّنَا ۖ إِنَّهُ كَانَ فَاحِشَةً وَسَاءَ سَبِيلًا މާނައީ: އޭ މުސްލިމުންނޭވެ! ތިޔަބައިމީހުން ޒިނޭއާ ކައިރިނުވާށެވެ. މިހެނީ އެއީ ހަޑިހުތުރުވެގެންވާ ބޮޑު ފާފަައެކެވެ. އަދި ނުބައި ވެގެންވާ މަަގެކެވެ.
ޒިނޭގެ ބައިތައް
އިސްލާމީ ނަޒަރަކުން ބަލާއިރު ޒިނޭގައި ދެވައްތަރެއް ވާކަމުގައި ޢިލްމުވެރިން ވިދާޅުވެފައި ވެއެވެ. އެއީ ޙަޤީޤީ ޒިނޭއާއި މަޖާޒީ ޒިނޭއެވެ. މިދެވައްތަރުގެ ތެރެއިން އިސްލާމް ދީނުގައި ވަނީ ޙަޤީޤީ ޒިނޭއަކީ ކޮބައި ކަމާއި އެކަން ސާބިތުކުރާނެ ގޮތާއި އެއަށް ލިބެންޖެހޭ އަދަބު ކަނޑައަޅާފައެވެ. މަޖާޒީ ޒިނޭއަށް ޤުރުއާނާއި ޙަދީޘުން ވަކި އަދަބެއް ކަނޑައަޅާފައި ނެތުމާއެކު އިސްލާމީ ފިޤުހުގައި ވަނީ އޭގެ ތެރޭން ބައެއް ކަންކަމާމެދު ތަޢުޒީރު ކުރުމާއި އެނޫނަސް ކަމުގެ ބާވަތުން އެކަށޭނަ އަދަބު ދިނުން ޤާޟީގެ އިޚްތިޔާރަށް ދޫކޮށްލާފައެވެ. އަދި އެކަންކަން ކުރިމީހާއަށް އޮތްގޮތަކީ އަވަހަށް ތައުބާވުމެވެ.
ޙަޤީޤީ ޒިނޭ
ޙަޤީޤީ ޒިނޭއަކީ ޝަރުޢީ ކައިވެންޏަކާ ނުލައި އޮޅުމެއްނެތި، އަދި ޝައްކުގެ މަޤާމެއްވެސް ނެތި އަންހެނަކާއި ފިރިހެނަކާ ދެމެދު ޖިންސީ ގުޅުން ހިންގުމެވެ. މިބަހީ މިބުނެވުނު އަންހެނާގެ ކުރިމަތީ ފަރާތު ދޮރަކަށް މިބުނެވުނު ފަދަ ފިރިހެނެއްގެ ފިރިހެން ގުނަން ނުވަތަ ގުނަނުގެ ކޮޅު ފޮރުވޭ މިންވަރަށް ބޭނުމެވެ. (ބައެއް ބޭކަލުން ފުރަގަސް ފަރާތު ދޮރުވެސް ހިމެނޭކަމަށް ވިދާޅުވެފައި ވެއެވެ.) މިއީ ބޮޑުވެގެންވާ ފާފަައެކެވެ. އަދި ދުނިޔެއާއި އާޚިރަތުގައި ބޮޑުވެގެންވާ ޢުޤޫބާތް ކަނޑައެޅިފައިވާ ކަމެކެވެ.
މަޖާޒީ ޒިނޭ
މަޖާޒީ ޒިނޭއަކީ މިބުނެވުނު އަންހެނާއާއި ފިރިހެނާއާއި ޝަރުޢީ ހުއްދަ މަގެއް ހޯދުމެއްނެތި ޒިނޭއަށް މަގުފަހިކޮށްދޭފަދަ ކޮންމެވެސް ޢަމަލެއް ހިންގުމެވެ. އެއީ ޝަހުވަތާއެކު ބެލުމާއި ބީހުމާއި ބޮސް ދިނުމާއި ބެއްދުމާއި ތިންވަނަ މީހަކުނެތި އެކަހެރިވުމާއި މިފަދަ ޙަރާމްކުރަނިވި އެންމެހައި ޙަރަކާތް ހިންގުމެވެ. މިއަށް އިޝާރަތް ކުރަށްވައި رَسُولُ اللَّهِ ޞައްލަﷲ ޢަލައިހި ވަސައްލަމް ޙަދީޘު ކުރަށްވާފައި ވެއެވެ. އިމާމު މުސްލިމާއި އެނޫންވެސް މުޙައްދިޘުން ރިވާކުރަށްވާފައި ވެއެވެ. عَنْ أَبِي هُرَيْرَةَ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ كُتِبَ عَلَى ابْنِ آدَمَ نَصِيبُهُ مِنْ الزِّنَا مُدْرِكٌ ذَلِكَ لاَ مَحَالَةَ فَالْعَيْنَانِ زِنَاهُمَا النَّظَرُ وَاْلأُذُنَانِ زِنَاهُمَا الاِسْتِمَاعُ وَاللِّسَانُ زِنَاهُ الْكَلاَمُ وَالْيَدُ زِنَاهَا الْبَطْشُ وَالرِّجْلُ زِنَاهَا الْخُطَا وَالْقَلْبُ يَهْوَى وَيَتَمَنَّى وَيُصَدِّقُ ذَلِكَ الْفَرْجُ وَيُكَذِّبُهُ މާނައީ: މާތް ﷲ ރުއްސުންލެއްވި އަބޫ ހުރައިރާގެ ކިބައިން ރިވާވެގެން ވެއެވެ. رَسُولُ اللَّهِ ޞައްލަﷲ ޢަލައިހި ވަސައްލަމް ޙަދީޘުކުރަށްވާފައިވެއެވެ. ކޮންމެ އާދަމްގެ ދަރިއަކަށްވަަނީ ޒިނޭއިން ޙިއްޞާއެއް ކަނޑައެޅިފައެވެ. އޭނާ އެއިން އޭނާގެ ނަޞީބުގައި ލިޔެވިފައިވާ ޙިއްޞާގައި ބައިވެރިވާނެއެވެ. މިއީ އޭނާއަށް ނަޞީބު ކުރެވުނު ގޮތެވެ. ފަހެ ދަންނާށެވެ! ދެލޮލުން (ޝަހުވަތާއެކު) ބެލުމަކީ ލޮލުގެ ޒިނޭއެވެ. ދެކަންފަަތުން އަޑުއެހުމަކީ ކަންފަތުން ޒިނޭ ކުރުމެވެ. އެފަދަ ވާހަކަ ދެއްކުމަކީ ދުލުގެ ޒިނޭއެވެ. ބީހުމާއި އަތްލުމަކީ ނުވަތަ އަތުން ހިފުމަކީ އަތުގެ ޒިނޭއެވެ. ޒިނޭއަށް މަގުފަހިކުރަން ހިނގާފައި ދިއުމަކީ ފައިގެ ޒިނޭއެވެ. އެފަދަ ކަންކަން ހިތަށް އަރުވައި ފިކުރު ކުރުމަކީ ހިތުގެ ޒިނޭއެވެ. އެއަށްފަހު އޭނާ އެކަމަށް ޝައުޤުވެރި ވާނެއެވެ. އުއްމީދު ކުރާނެއެވެ. ދެން އެއަށްފަހު މިކަންކަން ޙަޤީޤަތަަކަށް ގެންނާނީ އޭނާގެ ޢައުރަ ގުނަނުންނެތެވެ. އެކަމުގައި ޢަމަލީގޮތުން ބައިވެރިވާނަމަ ތެދުކުރީއެވެ. އެއްކިބާވެއްޖެނަމަ ދޮގުކުރީއެވެ. މިއެވެ. އަޅުގަނޑުމެން ދަންނަންޖެހޭ ކަމަކީ މިއިން ކަމެއް ކުރުމަކީ ޙަރާމް ވެގެންވާ ކަމެއް ކަމެވެ. އަދި މިކަންކަމަކީ ފާފަކަމުގައި ވިއަސް ބޮޑު ފާފައިގެ ތެރޭގައި ހިމެނޭ ކަންކަމެއް ނޫނެވެ. އަދި މީގެ ތެރެއިން ބައެއް ކަންކަމަށް ދީނުގައި އަދަބެއް ކަނޑައެޅިފައި ނުވިއަސް އަނެއްބައި ކަންކަމަށް ޝަރީޢަތުން އެކިއެކި އަދަބު ކަނޑައަޅާފައި ވެއެވެ. ޙަޤީޤަތުގައި މިފަދަ މީހަކަށް އޮތީ ކުށް އިޞްލާޙުކޮށް ފުރިހަމަ ތައުބާއަކުން ތައުބާވެ ﷲގެ ޙަޟުރަތަށް ރުޖޫޢަވުމެވެ.
ޝަރުޢީ ޒިނޭއާއި ޤާނޫނީ ޒިނޭއަކީ ކޮބައިބާ؟
ޝަރުޢީ ޒިނޭއާއި ޤާނޫނީ ޒިނޭއަކީ އޮންނަ އެއްޗެއް ނޫނެވެ. މާނައަކީ ޝަަރުޢީ ޒިނޭއޭ ކިޔާއެއްޗެއް ނޯވެއެވެ. އަދި ޤާނޫނީ ޒިނޭއޭ ކިޔާ އެއްޗެއް ވެސް ނޯވެއެވެ. އާދޭހެވެ! އޮންނަނީ ޝަރުޢީ އިޞްޠިލާޙުގައި ނުވަތަ ފިޤުހީ ހަމައިގެ މަތިން ބުނެވޭ ޒިނޭއާއި ޤާނޫނީ ބަހުރުވައިން މާނަކުރެވޭ ޒިނޭއެވެ. އެފަދަ ޒިނޭ ޒިނޭއަކަށް ވަނީ ކިހިނަކުންކަން ޤާނޫނުން ލިޔެ ބަޔާންކުރާނެއެެވެ. އަދި އެއަށް ޙައްޤުވާކަަމަށް ޤާނޫނުން ދެކޭ އަދަބުގެ މިންގަނޑެއްވެސް ލިޔެ ބަޔާން ކުރާނެއެވެ. މިދޭއްޗަކީ ދޭއްޗެއް ނޫނެވެ. ދެބަހުރުވައަކުން ތަޢުބީރު ކުރާ އެކައްޗެކެވެ. އެހެންކަމުން އަދަބު ބަޔާން ކުރުމުގައި އެއް މިންގަނޑަށް ނުފެތޭނަމަ އެމިންގަނޑުގެ އަދަބުން އެމީހާ ސަލާމަތްވި ކަމުގައި ވިއަސް އަނެއް މިންގަނޑުގެ ދަށުން އޭނާއަށް އަދަބު ލިބޭނެއެވެ.
ޒިނޭގެ ޙުމާއި އޭގެ އަދަބު
ޒިނޭގެ ހުރިހާ ބާވަތަކީ އިސްލާމީ ޝަރީޢަތުގައި ޙަރާމްވެގެންވާ ކަންކަމެވެ. އެހެނަސް ކުރިން ދެންނެވި ފަދައިން ޙަޤީޤީ ޒިނޭއަކީ ބޮޑުވެގެންވާ ފާފައެކެވެ. އަދި ހަމައެއާއެކު ޙަޤީޤީ ޒިނޭއަކީ އެންމެހައި އިސްލާމީ ޤައުމުތަކުގައި މަނާވެގެންވާ ކަމެކެވެ. ނަމަވެސް މަޖާޒީ ޒިނޭގެ ބާވަތްތައް އިސްލާމީ ބައެއް ޤައުމުތަކުގައި ޤާނޫނީ ގޮތުން މަނާވެގެންވާ ހިނދު އަނެއް ބައި ޤައުމުތަކުގައި ހިމަނާފައި ވަނީ އަޚްލާޤީ ކުށުގެ ތެރޭގައެވެ. އަދި ބައެއް ޤައުމުތަކުގައި ޒިނޭގެ އަދަބު ކަނޑައެޅިފައިވަނީ ކައިވެނި ކޮށްގެން އުޅޭ މީހަކު ޒިނޭ ކުރިކަމުގައި ވާނަމައެވެ. އޭގެ މާނައަކީ ކައިވެނި ނުކޮށް އުޅޭމީހާ އެއިން ބަރީއަވަނީތާއެވެ!
އިސްލާމީ ޝަރީޢަތުގައި (ޙަޤީޤީ) ޒިނޭގެ އަދަބަކީ އިލާހީ އަދަބެވެ. الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا مِائَةَ جَلْدَةٍ وَلَا تَأْخُذْكُمْ بِهِمَا رَأْفَةٌ فِي دِينِ اللَّهِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ وَلْيَشْهَدْ عَذَابَهُمَا طَائِفَةٌ مِنَ الْمُؤْمِنِينَ ﴿2﴾ الزَّانِي لَا يَنْكِحُ إِلَّا زَانِيَةً أَوْ مُشْرِكَةً وَالزَّانِيَةُ لَا يَنْكِحُهَا إِلَّا زَانٍ أَوْ مُشْرِكٌ وَحُرِّمَ ذَلِكَ عَلَى الْمُؤْمِنِينَ ﴿3﴾ މާނައީ: އޭ މުސްލިމުންނޭވެ! ޒިނޭކުރާ އަންހެނާއާއި، ޒިނޭކުރާ ފިރިހެނާއާއި ދެމީހުންކުރެ ކޮންމެ މީހެއްގެ ގައިގައި، ސަތޭކަ އެތިފަހަރުން ޙައްދު ޖަހާށެވެ! އަދި ތިޔަބައިމީހުން اللَّه އަށާއި އާޚިރަތް ދުވަހަށް އީމާން ވާކަމުގައިވަނީނަމަ، اللَّه ގެ ދީނުގައި މިކަމުގައި ކަނޑައެޅިފައި އޮތް ޙުކުމް ތަންފީޒު ކުރުމުގައި އެ ދެމީހުންނާމެދު ކުޑަނަމަވެސް އޯގާވެރިކަމެއް ބަހައްޓައިގެން ނުވާނެއެވެ. އަދި ދަންނާށެވެ! އެ ދެމީހުންނަށް ޢުޤޫބާތް ދެވޭހިނދު މުސްލިމުންގެ ތެރެއިން ބަޔަކު ދެކޭހުށިކަމެވެ! އަދި ދަންނާށެވެ! ޒިނޭކުރާ ފިރިހެނަކަށް ޒިނޭކުރާ އަންހެނަކާ، ނުވަތަ މުޝްރިކު އަންހެނަކާނޫނީ އިނުން އެކަށީގެނެއް ނުވެއެވެ. ހަމައެހެންމެ ޒިނޭކުރާ އަންހެނަކަށް ޒިނޭކުރާ ފިރިހެނަކާ ނުވަތަ މުޝްރިކު ފިރިހެނަކާ ނޫނީ އިނުން އެކަށީގެނެއް ނުވެއެވެ. އަދި ދަންނާށެވެ! ﷲގެ ޙަޟުރަތުން މުސްލިމުންގެ މައްޗަށް ވަނީ ޒިނޭ ޙަރާމް ކުރެއްވެވިގެންނެވެ. މިއެވެ. އާދެ، ޝަރުޢީގޮތުން ޙައްދު ޤާއިމު ކުރުމަކީ މިއީއެވެ. ޙައްދު ޤާއިމު ކުރާނީ ޙާކިމާއެވެ. އޭނާގެ ގާތަށް މައްސަލަ ހުށަހެޅިއްޖެ ނަމައެވެ. މިއީއަކީ ޢާއްމުންގެ ބޮލުގައި އެޅިފައިވާ ޒިއްމާއެއް ނޫނެވެ.
ޝަރުޢީ ހަމަތަކުން ޒިނޭ ސާބިތު ކުރެވޭ މަގުތައް
ޙައްދު ޤާއިމު ކުރުމަށްޓަކައި ޝަރުޢީ ހަމަތަކުގެ މަތިން ޒިނޭ ސާބިތުވާނީ ދެ މަގަކުންނެވެ. ފުރަތަމަ މަގަކީ ޤާޒީގެ ކުރިމަތީގައި ޒިނޭކުރި މީހާ ޒިނޭކުރިކަަމަށް ސާފުބަހުން އެއްބަސްވެ އިޢުތިރާފު ވުމެވެ. ދެެވަނަ މަގަކީ އިތުބާރުހުރި ޢަދުލުވެރި ހަތަރު ފިރިހެނުން މިވެނި މީހަކާ އެވެނި މީހަކާ ދެމީހުން މިވެނި ގޮތަކަށް ޒިނޭކުރަން ތިބިތަން ދުށްކަމަށް ހެކިދިނުމެވެ. އިސްލާމީ ޝަރީޢަތުގަައި ޒިނޭ ސާބިތުވެ، އެއަށް ޝަރުޢީގޮތުން ކަނޑައެޅިފައިވާ ޢުޤޫބާތް ޤާއިމުކުރެވޭނީ ޝަރީޢަތުގެ ކުރިމަތީގައި ކަނޑައެޅިފައިވާ މިބުނެވުނު ދެމަގުންކުރެ މަގަކުން ޒިނޭ ކުރިކަން ސާބިތުވުމުންނެވެ.
ހެކިބަހުން ޒިނޭ ސާބިތު ކުރުމީ އިންތިހާއަށް އުނދަގޫ ކަމެއް
ހެކި ހޯދުމަށް ބަލާއިރު ހެކިވެރިންނަކީ ޢަދުލުވެރި، ތެދުވެރި، މުސްލިމު ފިރިހެނުންނަށް ވާންޖެހޭނެއެވެ. އަދި ޒިނޭގެ މަންޒަރު ދުށުމުގައި އެންމެންނަށް އެއްގޮތަކަށް ފެނުނު ކަމުގައި ޤާޟީގެ ކުރިމަތީ ހެކިދޭން ޖެހޭނެއެވެ. އެނޫންގޮތަކަށް ހެކިބަހުން ޒިނޭ ސާބިތު ނުވާނެއެވެ. މިޝަރުޠުތައް ހަމަވާ ހަތަރު ހެކިން ނެތް ޙާލަތެއްގައި ހެކިބަހުން ޒިނޭ ސާބިތު ނުވާނެއެވެ. އަޅުގަނޑުމެން ދަންނަން ޖެހޭ ކަމަކީ މިފަދަ ހެކިން ހޯދުމަކީ ފަސޭހަ ކަމެއް ނޫންކަމެވެ. ވަކިން ޚާއްޞަކޮށް މިފަދަ ޒަމާނެއްގައި ދޮގު ހެކިދިނުމާއި އީމާންތެރިކަން ރޫޅި، ދުނިޔަވީ އަދުމާއި ތެދާއި ދޮގު ލާމެހި މަސްހުނިވެފައިވާ ދުވަސް ވަރަކު ޝަރީޢަތުގައި މިކަން ސާބިތު ކުރުމަކީ އެހާ ފަސޭހަ ކަމަކަށް ނުވާނެއެވެ.
ނަހަލާލަށް ވިހެއުން
ނަހަލާލަށް ވިހެއުމަކީ އަންހެނާ ޒިނޭ ކުރިކަމަށް ސާބިތުވާ ހެއްކެކެވެ. އެހެންނަމަވެސް ޢިލްމުވެރިން ދެކެވަޑައިގަންނަވާ ގޮތުގައި ޒިނޭގެ ޝަރުޢީ ހައްދު ޖެހޭނީ އޭނާގެ އިޢުތިރާފުންނެވެ. އޭނާ އެކަމަށް އެއްބަސް ނުވާނަމަ އޭނާގެ މައްޗަށް ޝަރުޢީ ޙައްދު ޤާއިމު ނުކުރެވޭނެއެވެ. އެޙާލަތުގައި އޭނާއަށް ކަނޑައަޅާ ޙުކުމެއް ކަނޑައަޅާނީ ޤާނޫނީ ތަރަހައިންނެވެ. އަދި އެއްބަސްވުމަށް ފަހު އަނބުރާ އިންކާރު ކުރުމުން ވެސް ޙައްދު ޤާއިމު ނުކުރެވޭނެ ކަަމަށް އިމާމު ޝާފިޢީއާއި އެނޫން ބައެއް ޢިލްމުވެރިން ވިދާޅުވެފައި ވެއެވެ.
ޒިނޭގެ ޤާނޫނީ ހެކިތަކާއި އޭގެ އަދަބު
އިސްލާމީ ދުނިޔެއަށް ބަލާއިރު، އެކި ޤައުމުތަކުގައި ޒިނޭ ސާބިތު ކުރުމުގައި އިތުރު އެހެން ހެކިތަކާއި މަގުތަކާއި ޤަރީނާތައް ޤާނޫނީ ގޮތުން ކަނޑައަޅާފައި ވެއެވެ. އެއީ:
1- މީހާ ޒިނޭގެ މާހައުލުގައި ތަލައްބުސުވެ ގައިގޯޅިވުން.
2- އެއްބަސްވުން.
3- ތަޙްޤީޤީ އިދާރާއަކުން ނަގާފައިވާ ބަޔާން.
4- ޒިނޭކުރުމަށް މަގުފަހިކޮށްދޭ ގެއެއްގައި ހުއްޓައި ކަމާބެހޭ ފަރާތުން އަތުލައިގަތުން.
5- ނެގިފައިވާ ޞައްޙަ ފޮޓޯތަކާއި ވީޑިއޯއާއި ޑީއެންއޭ ފަދަ ވަސީލަތްތައް.
ބަޔާންވެދިޔަ ދަލީލުތަކުގެ ތެރެއިން ދެވަނަ ދަލީލު ފިޔަވައި އެހެން ދަލީލަކާހުރެ އިސްލާމީ ޝަރީޢަތުގައި ޙައްދުގެ އަދަބު ޤާއިމު ނުކުރެވޭނެއެވެ. މިބުނެވުނު ހެކިތަކަށް ފިޤުހީ ބަހުރުވައިން ކިޔަނީ ޤަރީނާތަކެވެ. އެހެންނަމަވެސް އޭނާގެ މައްޗަށް ޒިނޭ ސާބިތު ނުވިކަމުގައި ވިއަސް އޭނާގެ ކިބައިން ސާބިތުވެ ފެނިފައިވާ ފާޙިޝުޢަމަލުގެ ކުޑަބޮޑުމިނަށް ބަލައި ތަޢުޒީރު ކުރުމާއި އެނޫނަސް އެމިންވަރުގެ އަދަބެއް ދޭންޖެހޭނެކަމަށް ފިޤުހުވެރިން ވިދާޅުވެފައި ވެއެވެ. މިއީވެސް އިސްލާމީ ޝަރީޢަތުގެ ބައެކެވެ. މިސާލަކަށް އަހަރު ދުވަހަށް އަރުވާލުމެވެ. ނުވަތަ ވަކި މުއްދަތަކަށް ޖަލަށް ލުމެވެ. ތަޢުޒީރު ކުރުމެވެ. މިއީ ޤާޒީގެ އިޚްތިޔާރަށް ދޫކޮށްލެވިފައިވާ ކަމެކެވެ.
ނަމަވެސް މިހިސާބުން މިއޮތީ ޝަރީޢަތުގެ މިބާވަަތު ޒިނޭގެ ޢަމަލުތައް ސާބިތުކޮށް ކަނޑައަޅައި އެއަށް އެކަށޭނަ އަދަބު ބަޔާންކުރާނެ ޤާާނޫނަކަށް ބޭނުންވެފައެވެ. މިއަދަކު މިކަންކަމެއް މިއަދުގެ ޤާޟީންގެ އަތްމައްޗަކަށް ދުލެއް ނުކުރެވޭނެތީއެވެ. މިކަން މިއަދު ބަޔާންކުރާނީ ޤާނޫނުލް ޢުޤޫބާތުގައެވެ. މިއަށް ކިޔާނީ ޤާނޫނީގޮތުން ޒިނޭ ސާބިތުވުމެވެ. އެހެނަސް ޤާނޫނީ ހެކިތަކުން ސާބިތުވާ ޒިނޭގެ ޢަމަލުތަކާއި ޝަރުޢީގޮތުން ސާބިތުވާ ޒިނޭއާއި މިދެބާވަތުގެ ޒިނޭގެ ޙުކުމާއި އަދަބުވެސް ތަފާތުވެގެން ވެއެވެ. އަޅުގަނޑުމެންނަށް މިއުޅެނީ މިދޭތި އޮޅުވާލައިގެންނެވެ.
ޑީއެންއޭ އިން ޒިނޭ ސާބިތުކުރުމާއި ދަރި ސާބިތު ކުރުން
އިސްލާމީ ޝަރީޢަތުން ޒިނޭ ކަމަށް ކަނޑައަޅާފައިވާ ޙަޤީޤީ ޒިނޭ ބަޔާންވެދިޔަ ދެމަގު ފިޔަވައި އެހެން މަގަކުން ސާބިތު ނުކުރެވޭނެއެވެ. އެބަހީ ޒިނޭގެ ޝަރުޢީ ޙައްދު ޤާއިމު ނުކުރެވޭނެ ވާހަކައެވެ. ވަކިން ޚާއްޞަކޮށް ދަރި ލައްވާނީ ޝަރުޢީ އެނދަށެވެ. އެބަހީ މީހަކާ އިނދެގެން ހުރި އަންހެނަކު ޒިނޭކުރިކަން ސާބިތުވެ ދަރިއަކު ލިބިއްޖެނަމަ ފިރިމީހާ ދަރިއާ އިިންކާރު ނުކުރާހައި ހިނދަކު ދަރިލައްވާނީ ފިރިމީހާއަށެވެ. އެއީ ކީރިތި ރަސޫލާ ޙަދީޘު ކުރަށްވާފައިވާ ފަދައިން الْوَلَدُ لِلْفِرَاشِ ކަމަށް ވާތީއެވެ. (މާނައީ: ދަރި ލައްވާނީ ތަންމައްޗަށެވެ. އެބަހީ ފިރިމީހާއަށެވެ.) މިގޮތުން ޑީއެންއޭ އިން ޒިނޭކުރިމީހާ ވިހެއި ކުއްޖާއާ ގުޅުނު ކަމުގައި ވިއަސް ޒިނޭކުރި މީހާއަށް ދަރި ނުލައްވާނެއެވެ. މިއާ ޚިލާފަށް ބައެއް ޙާލަތްތަކުގައި ޑީއެންއޭއިން ދަރި ސާބިތު ކުރެވިދާާނެ ކަމަށް ޢިލްމުވެރިން ވިދާޅުވެފައި ވެއެވެ. ހަމަމިއުޞޫލުގެ ދަށުން އަދި ޝަރީޢަތުގައި ކަނޑައަޅާފައިވާ ޒިނޭގެ ޙައްދުވެސް އެފަދަ މީހެއްގެ މައްޗަށް ޤާއިމު ނުކުރެވޭނެެއެވެ.
ބަައެއް ޙާލަތްތަކުގައި ޒިނޭގެ ޝަރުޢީ އަދަބު ފިޔަވައި އެނޫން ޤާނޫނީ އަދަބެއް ދިނުމުގައި ޑީއެންއޭގެ އެހީގައި އެއަދަބެއް ދެވިދާނެއެވެ. އަޅުގަނޑު ދެކޭ ގޮތުގައި އަންހެނަކު ޒިނޭއަށް އެއްބަސްވެ އޭނާއަށް ދަރިއަކު ލިބި އޭނާއާއެކު ޒިނޭކުރީ މިވެނި މީހެކޭ ބުނާހާލު އެދަރިފުޅާ އެފިރިހެންމީހާއާ ދެމެދު ގުޅުން ހުރިތޯ ބެލުމަށްޓަކައި ޑީއެންއޭ ހެދުމަކީ ކުރެވިދާނެ ކަމެކެވެ. އަދި ޑީއެންއޭއިން އެދަަރިފުޅާއި އޭނާއާ ގުޅުން ހުރިކަން ސާބިތުވެއްޖެނަ (ޝަރީއަތުން މަނާކުރާތީވެ) ދަރި ނުލެއްވި ކަމުގައި ވިއަސް އޭނާއަށް ޤާނޫނީ ގޮތުން އަދަބުދީ ތަޢުޒީރު ނުކޮށް ދޫކޮށްލުމަކީ އަންހެނާއަށް ދެވޭ އަނިޔާއަކަށް ނޫނީނުވެނުދާނެއެވެ. އެހެންނަމަވެސް މިފަދަ ޤާނޫނު ހެދުމުގައި ވަަރަށްބޮޑަށް ދެޖިންސުގެ މަޞްލަޙަތަށް ވެސް ވިސްނަންޖެހޭނޭ ކަމަށް ދެކެމެވެ. އެފަަދަ އަންހެނާގެ ކުރީގެ ދިރިއުޅުމުގެ ޙާލަތާއި ދިރިއުޅޭ މާހައުލަށް ރިޢާޔަތް ކޮށް އެފަދަ އަންހެނަކު ބަދަލު ހިފުމުގެ ގޮތުން އޭނާ ރުޅިއަންނަ ފިރިހެނަަކަށް ހަސަދަފިލުވާލެވޭ ހެއްކަކަށް ޑީއެންއޭ ހެދުމުގެ ފުރުޞަތު ދެވިގެން ނުވާނެއެވެ.
މަޝްވަރާ މޭޒުދޮށަށް އައުން
މިމައްސަލާގައި ދީނީ ބޭފުޅުންނާއި ޤާނޫނީ ބޭފުޅުންގެ އަރައިރުމަކީ އަޅުގަނޑަށް ވިސްނޭ ގޮތުގައި ބަހެއްގެ ދެކޮޅުގައި ހިފައިގެން ދެމުންކަހަލަ ކަމެކެވެ. ނުކައިނުފުރާނަމޭ، ކައިގެންނޫނީ ނުފުރާނަމޭ ބުނުން ކަހަލަ ކަމެކެވެ. ޤާނޫނު އެކުލަވާލުމުގައި ދެފަރާތުގެ ބޭފުޅުން އެއްމޭޒު ދޮށެއްގައި ތިއްބަވައިގެން ކުޑަކުޑަ މަޝްވަރާއެއް ކޮށްލައްވަން އެބަޖެހެއެވެ. ބޮޑަށް ރަނގަޅުވާނީ ޝަރުޢީ ގޮތުންނާއި ޤާނޫނީ ގޮތުން ހުނަރުވެެރިވެފައިވާ ބޭފުޅުންކޮޅެއްގެ ބޭނުން ހިފުމެވެ.
އަޅުގަނޑުގެ ދުޢާއަކީ މިފަދަ ފާޙިޝު ޢަމަލުތަކުން އަޅުގަނޑުމެންނާއި އިސްލާމީ މުޖްތަމަޢު ސަލާމަތް ކުރެއްވުމެވެ. އާމީން!
وَصَلَّى اللَّهُ وَسَلَّمَ عَلَى خَيْرِ خَلْقِهِ مُحَمَّدٍ وَآلِهِ وَصَحْبِهِ أَجْمَعِينَ