އިސްކޫލުގެ ދަރިވަރުންގެ އިމްތިހާނެއް ކުރިއަށް ދަނީއެވެ. ދަރިވަރުން އިސްޖަހައިލައިގެން ތިބެ ސުވާލުކަރުދާހުގައި ހުރި ސުވާލުތަކުގެ ޖަވާބު ލިޔަނީއެވެ. ލިޔަމުން ދަނިކޮށް އިމްތިހާނަށް ކަނޑައަޅައިފައި އޮތް ވަގުތު ހަމަވެއްޖެއެވެ. ވަގުތު ހަމަވެއްޖެ ކަމަށް މާލަމުގައި ތިބި މޫލަވެރިން އިއުލާނު ކޮށްފިއެވެ. ޖަވާބު ލިޔުން ވަގުތުން ހުއްޓައިލާން ޖެހުނީއެވެ.
އިމްތިހާނު މާލަމުގައި ކަންތައް ހިނގާ ގޮތަކީ ދިރިއުޅުމުގެ ކަންތައްވެސް ހިނގާ ގޮތެވެ. ދުނިޔޭގައި ދިރިއުޅޭ ކޮންމެ ފިރިހެނަކާއި އަންހެނަކުމެ ދިރިއުޅެމުން މި ގެންދަނީ ބޮޑު އިމްތިހާނު މާލަމެއްގައެވެ. ކޮންމެ މީހަކުމެ އެ މީހެއްގެ އިމްތިހާނު ކަރުދާސް ފުރިހަމަ ކުރަނީއެވެ. ކޮންމެ މީހަކަށްވެސް ލިބިފައި ވަނީ ކަނޑައަޅައިފައިވާ ވަކި ވަގުތެކެވެ. ނުވަތަ މުއްދަތެކެވެ. އެ މުއްދަތު ހަމަވެ، ވަގުތު ޖެހުމާއެކު މަރުގެ މަލާއިކަތާ ވަޑައިގެން ވިދާޅުވާނެއެވެ. ހުއްޓައިލާށެވެ. ކަލޭގެ އަމަލުގެ ވަގުތު ހަމަވެއްޖެއެވެ. ދެން އޮތީ މަރުވުމެވެ. މަރުވުމަށް ފަހު ކަލޭ ހެއްދެވި އިލާހުގެ ކުރިފުޅުމައްޗަށް ހާޒިރުވެ ޖަވާބުދާރީވުމެވެ. ނަތީޖާ ލިބިގަތުމެވެ. ތައުލީމީ އިމްތިހާނުގައި ދަރިވަރުންނަށް ކުރިމަތިވާ ހާލަތަކީ ކޮންމެ ފިރިހެނަކާއި އަންހެނަކަށް ދިރިއުޅުމުގެ އިމްތިހާނުގައި ކުރިމަތިވާ ހާލަތު ދެނެގަތުމަށް ބޭނުން ކުރެވިދާނޭ ކުޑަކުޑަ މިސާލެކެވެ. ނަމޫނާއެކެވެ. ދިރިއުޅުމަކީ އިމްތިހާނުގެ ހާލަތަށް ކިޔާ ނަމެކެވެ. މަރަކީ އާދަމުގެދަރިޔާ އޭނާގެ އަމަލުތަކުގެ ނަތީޖާ ލިބިގަތުމަށްޓަކައި އެހެން ދުނިޔެއަކަށް ދިއުމަށް ކިޔާ ނަމެކެވެ.
އަޅުގަނޑުމެން މި ދުނިޔޭގައި ދިރިއުޅޭން ޖެހެނީ ދަރިވަރަކު އޭނާގެ އިމްތިހާނު މާލަމުގައި ވަގުތު ހޭދަކުރާ ގޮތަށެވެ. މުޅި ދިރިއުޅުން ވޭތުކުރާން ޖެހެނީ އެ ނަފުސިއްޔާތުގެ މަތީގައެވެ. ކޮންމެ މީހަކުމެ ގަދައަޅައި މަސައްކަތް ކުރާން ވާނީ ﷲ ތަޢާލާ ދެއްވި އިމްތިހާނު ކަރުދާސް ހެޔޮގޮތުގައި ހައްލު ކުރާށެވެ. އިމްތިހާނު ނިންމުމަށް ފަހު ނަތީޖާއާ ކުރިމަތިލާ ދުވަހު ނާކާމިޔާބީގެ ހިތާމަވެރި ޚަބަރުގެ ބަދަލުގައި، ކާމިޔާބީގެ އުފާވެރި ޚަބަރު ލިބޭނޭ ގޮތަކީ އެއީއެވެ.
(މަވްލާނާ ވަޙީދުއްދީން ޚާންގެ ލިޔުއްވުމެއްގެ ތަރުޖަމާ)
