މިލިޔުމަކީ ، 12 ފެބްރުވަރީ 2021 ވީ ހުކުރުދުވަހުގެ ހުކުރު ޚުތުބާއިން ތަޞައްވުރު ކުރެވިފައިވާ ދީނީ ހޭލުންތެރިކަމުގެ މަޢުލޫމާތުތަކެއް ހިމެނިގެންވާ ލިޔުމެކެވެ. ހުކުރު ޚުތުބާގައި ހިމެނޭ ދީނީ މަޢުލޫމާތާއި ޚުތުބާއިން ފެތުރިގެންދާން ޖެހޭ ދީނީ މަޢުލޫމާތުގެ އިޙްސާސަކީ އެކި ގޮތްގޮތުން ، އެކި ވަޞީލަތްތައް ބޭނުންކުރެވި ފަށްފަށް ކުރެވެންޖެހޭނެ އެއްޗެކެވެ. އޮޅުމަކުން ނަމަވެސް ، މީހެއްގެ ކަންފަތަށް އިވި ، ލޮލަށްފެނި ، ކިޔައިލެވިގެން ، ބަލައިލެވިގެން ، ދީނީގޮތުން ، ކުޑަނަމަވެސް ހޭލުންތެރިކަމެއް ގެނެސްދެވޭނެ މަގެއް ފަހިވެގެން ދިއުމަށް ، އެއްގޮތަށްވުރެ ގިނަގޮތް ބޭނުންކުރެވިގެން ދިއުމަކީ މުހިންމު ކަމެކެވެ.
އާޚިރަތްދުވަހަކީ ، ކަށަވަރުންވެސް އަންނާނެ ދުވަހެކެވެ. އިންސާނާ ފުރާނައަޅުއްވައި ދުނިޔެއަށް ފޮނުއްވާ ބީދައިން ، އެކަލާނގެ ޙަޟުރަތަށް އަނބުރާ ގެންދެވުމަކީ އެކަލާނގެ ކަށަކުޅަދުންވަންތަކަމުގެ ތެރެއިންވާ ކަމެކެވެ. އެކަން ދުނިޔެއިން ، އަޅުގަނޑުމެންނަށް ފެންނަމުން އެބަދެއެވެ. މަރުނުވާ އެއްވެސް އިންސާނަކު ، ﷲ ދުނިޔެއަށް ފޮނުއްވާފައެއް ނުވެއެވެ. ދުނިޔެ އުފެދުނީއްސުރެ ، އެކިދުވަސްތަކަށް އިންސާނާގެ ދިރިއުޅުން ދުނިޔޭގައި ލެއްވިއެވެ. އެހެން ނަމަވެސް ، މަރުނުވާ ހަމަ އެކަކުވެސް ދުނިޔެއަށް ފޮނުއްވާފައެއް ނުވެއެވެ. އިންސާނާ އުފައްދަވައި ، ދުނިޔެއަށް ފޮނުއްވަނީ ފިޠުރަތުގެ ސާފުސީދާ ގޮތުގައި ތާހިރުކަންމަތީގައި އެއްވެސް ކުށެއްނެތިއެވެ. އަދި ދުނިޔޭގައި އުޅުމަށް ވަކިހަމަތަކަކާއި ، ވާޖިބު އަދި ފަރުޟު ކަންތައްތަކެއް އެއިންސާނާއާ މަތިކުރައްވާފައެވެ. ވަކިގޮތަކަށް ދުނިޔޭގައި އުޅެން އަންގަވާފައެވެ. އަދި އެގޮތްތަކަށް ނޫޅެވިއްޖެނަމަ ، އަދަބުގެގޮތުގައި ޢަޒާބު ދެވޭނެކަމުގެ އިންޒާރާ އެކުގައެވެ. އަދި އެގޮތަށް އުޅެވިއްޖެނަމަ ، ޢިނާމުގެ ގޮތުގައި ސަވާބު ދެއްވާނެކަން އަންގަވާފައެވެ. މިއީ އަޅުގަނޑުމެން ދިރިމިއުޅޭ ދުނިޔޭގެވެސް ދުނިޔަވީ ޤާނޫނެވެ. ކުށެއްކުރެވިއްޖެނަމަ ، އަދަބު ލިބެއެވެ. ފައިދާހުރި ރަނގަޅުކަމެއް ކުރެވިއްޖެނަމަ އަތްތިލަބަޑިޖަހައި ޢިނާމު ލިބެއެވެ.
ދުނިޔެއަށް އުފަންކުރެއްވި ކޮންމެ އިންސާނަކުވެސް ، ކުރިން ދެންނެވިފަދައިން ، މިދުނިޔެއިން ވަކިވެއެވެ. ﷲ އަންގަވާފައިވާ ގޮތަށް ކަންކަން ކުރެވިގެންނާއި ނުކުރެވިގެންވާ ޙާލުގައެވެ. އަޅުގަނޑުމެން އެންމެންގެ ބަފައިކަލުން ، އަދި އިންސާނުން އުފެއްދެވުމުގެ އަޞްލުކަމުގައިވާ ، އާދަމުގެ ދަރިންގެ ބައްޕާފުޅު ، ސަލާމްލެއްވި އާދަމުގެފާނު އަވަހާރަވީ ، އެއްހާސް އަހަރު ދުނިޔޭގައި ހުންނެވުމަށްފަހުގައެވެ. އިބިލީހުގެ ވަސްވާހުގައި ޖެހި ، އެކަލޭގެފާނަށް ﷲ ނަހީކުރެއްވިކަމެއް ކުރެއްވުނު ހިނދު ، ސުވަރުގެއިން ދުނިޔެއަށް ފޮނުއްވުނެވެ. އިންސާނަކަށް ކުށެއްކުރެވިގެން އަދަބެއް ނުވަތަ އަޒާބެއް ނުލިބޭނެނަމަ ، އެކަލޭގެފާނަށް އެ އަދަބެއް ލިބިވަޑައެއް ނުގަންނަވާނެއެވެ. އެހެންކަމުން ، އާދަމުގެ ދަރިންކަމުގައިވާ ، އަޅުގަނޑުމެން ، އާދައިގެ އިންސާނުންނަށް ، ﷲ ގެ އަމުރުފުޅާ ޚިލާފުވުމުން އަދަބެއް ނުލިބޭނެކަމަށް ، ހިތަށް އަރުވައިލުމަކީވެސް ބޮޑުވެގެންވާ ކުށެކެވެ. މަގުފުރެދުމެއް މެއެވެ. އަދި އެއީ ، ﷲ ސުބްޙަނަހޫ ވަތަޢާލާމަތިން ، އެއިންސާނާ ހަނދުމަނުކުރާކަމުގެ ހެއްކެކެވެ.
ސަލާމްލެއްވި އާދަމުގެފާނަށްފަހު ، ރަސޫލުންނާއި ނަބީބޭކަލުންކުރެ ، ދެން އެންމެ ގިނަދުވަހު ދުނިޔޭގައި ހުންނެވީ ސަލާމްލެއްވި ނޫހުގެފާނެވެ. އެކަލޭގެފާނު 950 އަހަރު ދުނިޔޭގައި އުޅުއްވިއެވެ. ސަލާމްލެއްވި އިބްރާހީމުގެ ފާނު 195 އަހަރު ، އަދި ސަލާމްލެއްވި އިސްމާޢީލްގެފާނު 137 އަހަރު ދުނިޔޭގައި އުޅުއްވިއެވެ. ސަލާމްލެއްވި މޫސާގެފާނު 125 އަހަރު ، އަދި ހާރޫނު ޢަލައިހިއްސަލާމް 119 އަހަރު ދުނިޔޭގައި އުޅުއްވިއެވެ. މިއެންމެ ބޭކަލުންނަނކީވެސް ، މާތް ﷲ ގެ ރުއްސެވުންލިބިވަޑައިގެން ، އެކަލާނގެ އިޚްތިޔާރު ކުރައްވާފައިވާ ރަސޫލު ބޭކަލުންނާއި ނަބީބޭކަލުންނެވެ.
ރަސޫލުކަމާއި ނަބީކަން ޚަތިމްކުރެއްވި މިއުއްމަތުގެ މާތް ނަބިއްޔާ ، ކައުއިތުރު ރަސޫލާ މުޙައްމަދު ޞައްލަﷲ ޢަލައިހި ވަސައްލަމަ ދުނިޔޭގައި ހުންނެވީ 63 އަހަރުއެވެ. އެކަލޭގެފާނަކީ ، އިންސީންގެ ތެރެއިން ﷲ އެންމެ މާތްކުރެއްވި އިންސާނާއެވެ. ﷲ ގެ އަމުރުފުޅު ، މީސްތަކުންނާ ހަމަޔަށް ފުރިހަމަޔަށް ގެނެސްދެއްވައި ، އެއަމުރުފުޅުތައް ތަންފީޒުކުރައްވައި ، މީސްތަކުންނަށް އެކަންކަން ހަނދާންކޮށްދެއްވުމަށް ، އިންސާނުންގެ ތެރެއިން ﷲ އިޚުތިޔާރުކުރެއްވި ، ނަބިއްޔުންނާއި ރަސޫލުން ، މިދުނިޔެ ދޫކުރައްވައި ވަޑައިގެންފައިވަނީ ، އެބޭކަލުންގެ ވާޖިބު ފުރިހަމަޔަށް އަދާކުރައްވާފައެވެ. އެކަނލާގެ ބާވައިލެއްވި ފޮތްތަކުން އެކަންކަން ހާމަކުރެއްވުމުގެ އިތުރަށް ، އެބޭކަލުން މެދުވެރިކުރައްވައި ، ﷲ ގެ ރުއްސެވުމާއި ފުއްސެވުން އިންސާނާއަށް ލިބޭނެމަގާއި ގޮތް ، އިންސާނުންނާ ހަމަޔަށް ﷲ ވަނީ ގެނެސްދެއްވާފައެވެ. އެކަލާނގެ ބާވައިލެއްވި އެންމެ މާތް އަދި އެންމެ ފަހުގެ ކަލާމްފުޅު ، ކީރިތި ޤުރުއާނަކީ ، އެފޮތް ބާވައިލެއްވުމުން އެކަލާނގެ ބާވައިލެއްވި އެހެން ހުރިހައި ފޮތްތަކެއްވަނީ ބާތިލު ކުރައްވައި މަންޝޫޚު ކުރައްވާފައެވެ. އަދި އެންމެ މާތްދީން ، އިސްލާމްދީން އައުމުން އެހެން ދީންތައްވަނީ ބާތިލު ކުރައްވާފައެވެ.
އާޚިރަތް ދުވަސް އަންނާނެކަމާއި ، އެދުވަހަށް އީމާންވުމަށް ، ކީރިތި ޤުރުއާނާއި ރަސޫލު ޞައްލަﷲ ޢަލައިހި ވަސައްލަމަގެ ސުންނަތުން ، އިސްލާމީ އުއްމަތަށް ވަނީ އަންގަވާފައެވެ. އާޚިރަތް ދުވަހަކީވެސް އަދި ޤިޔާމަތް މަޙުޝަރުދުވަހަކީ ، ކަށަވަރުންވެސް އަންނާނެ ދުވަހެކެވެ. އާޚިރަތްދުވަހަކީ ދުނިޔޭގެ އެންމެ ފަހު ދުވަހެވެ. އެދުވަހުގެ އިންތިޒާމްތައް ﷲ ވަނީ ވަރަށް ފުރިހަމަޔަށް ރާއްވަވާފައެވެ. އަޅުގަނޑުމެން މިބާއްވާ ޢާންމު ޙަފުލާތަކާއި ޖަލްސާތަކުގެ އިންތިޒާމުތަކާ ނުބައްދަލު ، ޤުދުރަތީ ފުރިހަމަ ނިޒާމެއްވަނީ ލައްވަވާފައެވެ. އިންސާނާ ދިރިދުނިޔޭގައި އުޅުމަށް ރޭވޭ މިޕްރޮގްރާމް ތަޢާރުފްވެގެންދަނީ ، އިންސާނާ ދުނިޔެއަށް ފޮނުއްވާ ސާޢަތުން ފެށޭ ، އަދި އެއިންސާނާ ދުނިޔެއަށް ނޭވާލާ ހިސާބުންނެވެ. އެޕްރޮގްރާމް ރާވަނީ ކުށެއްނެތް ސާފު ތާހިރުކަންމަތީ ދުނިޔެއަށް އުފަންވާ އިންސާނާ އަމިއްލަޔަށެވެ. ޕްރޮގްރާމް ފެށުމަށްފަހު ، މެދުތެރޭގައި ހިނގަމުންދާނީ ، އެއިންސާނާ އަމިއްލަޔަށް އިޚުތިޔާރުކުރާ ކަންތައްތަކެކެވެ. ރަނގަޅުކަންކަމާއި ނުބައި ކަންކަމެވެ. އެކަމެއް ނުކުރުމަށް ﷲ އަންގަވާފައިވާ ކަންކަމާއި ، ނަހީކުރައްވާފައިވާ ކަންކަމެވެ. ތިމާފަދަ އެހެން އިންސާނުން ޤަބޫލުކުރާ ކަންކަމާއި ނުޤަބޫލުކަންކަމެވެ. އެކަމެއް ކުރުމުން ، އެހެން މީހުން ހިލައުކައި ގާއުކައި އަނިޔާކޮށް ހަދާނެއެވެ. އަދި ހަމައެފަދައިން އެކަމެއް ކުރުމުން އަތްތިލަބަޑިޖަހާ އުފާފާޅުކުރާނެ ކަންކަންވެސް އެޕްރޮގްރާމުގައި ހިމެނޭނެއެވެ. ނޭނގިކުރެވޭ ކަންކަމާއި ކަނޑައެޅިގެން އެނގިގެން ކުރާ ކަންކަންވެސް އެ ޕްރޮގްރާމުގައި ހިމެނޭނެއެވެ. ވަކިހިސާބަކުން އަންނާނީ އާޚިރަތުގެ ވަގުތެވެ. އާޚިރަތުގެ ޢަލާމާތްތައް އެއިންސާނާއަށް ފެންނާނެއެވެ.
އާޚިރަތުގެ ޢަލާމާތްތަކުގެ ތެރޭގައި ، އެއިންސާނާގެ ޢައުރަ ނިވާނުކުރުމަކީ ޢާންމުކަމަކަށް ވާނެއެވެ. އުސް ޢިމާރާތްތައް އިތުރުވާނެއެވެ. ބިންހެލުންތައް ގިނަވާނެއެވެ. އެއިންސާނާ ބޭނުންވާ ކަންކަންކުރަން ވަގުތުމަދުވެފައި ، ދުވަސް ކުރުވާނެއެވެ. މަހާނަމަތީ މީހުން ހިނގައި ، މަތިމައްޗަށް ކަށްވަޅު ކޮނެވި މީހުން ވަޅުލެވޭނެއެވެ. އަޅުކަން ކުރުމަށް އެއްވާމީހުން ، އިމާމެއްނެތިގެން އަޅުކަން ނުކުރެވޭގޮތް މެދުވެރިވާނެއެވެ. ފިތުނަ ފަސާދަ ޢާންމު ވާނެއެވެ. ޒަކާތަކީ ޓެކްސްގެ ގޮތުގައި ދައްކާ އެއްޗަކަށް ހަދާނެއެވެ. މުދާވެރިކަމާއި މުއްސަނދި ކަމަކީ އޭނާގެ އަމިއްލަ ނަފްސަށް ޙައްޤުވާ މިލްކަކަށް ހަދާނެއެވެ. ފިރިހެނުން މަދުވެފައި އަންހެނުންގެ އާބާދީ އިތުރު ވާނެއެވެ. ދަރިން ، ބަސްނާހައި މައިންބަފައިންނަށް ނުކިޔަމަންތެރިވާނެއެވެ. ޢިލްމު ފެތުރުމުގައި އޮޅުންބޮޅުން ބޮޑުވާނެއެވެ. އިންސާނާ ޢިލްމު އުނގެނޭނީ ހަމައެކަނި ، އޭނާގެ ދުނިޔެ އާބާދު ކުރުމަށްކަމުގައި ހަދާނެއެވެ. ޤާބިލް ނޫންވެރިން ވެރިންނަށްވެ ، ޤާބިލްނޫން މީހުން ވަޒީފާތަކަށް ޢައްޔަން ކުރެވެމުންދާނެއެވެ. އަދި ޤާބިލް މީހުން ބާކީވެ ، ޤާބިލްނޫން މީހުންނާ ވަޒީފާއާއި މަސައްކަތް ޙަވާލު ކުރެވޭނެއެވެ. ވެރިކަމުގެ ނިޒާމުގެ ތެރެއިން ، ދިރިއުޅުން އާރާސްތުކޮށް ، ނުޙައްޤު މުދަލާއި ފައިސާ އަދި މަސައްކަތާއި މަޤާމު ލިބޭތީ ، އެއްކޮޅާއި އިދިކޮޅު ސިޔާސީ މީހުންނަށް ތާއީދު ކުރާމީހުން ގިނަވާނެއެވެ. ރާބުއިމާއި ޒިނޭކުރުން ޢާންމު ވާނެއެވެ. ޚިޔާނާތާއި ފަސާދައިގެ ޢަމަލުތައް އިތުރުވާނެއެވެ. މިޔުޒިކް ކުޅޭ އާލާތްތައް ޢާންމުވެ ، އޯޕަން ސްޓޭޖްގައި ލަވަކިޔާ އަންހެނުން އިތުރުވާނެއެވެ. އުއްމަތުގެ ޚަލީފާއިންނާއި ޢިލްމުވެރިންނަށް ނަފުރަތު އުފެދޭފަދަ ވާހަކަތައް ގިނަވެ ، ދޮގުހެދުމާއި ދޮގުހެކިދިނުމަކީ އެއްވެސް ކަމަކަށް ނުވާނެއެވެ. އަދި އެއީ ކާމިޔާބީއެއްކަމަށް ބެލެވޭނެއެވެ. ދުނިޔޭގެ ބާރުގަދަ ޤައުމުތައް އެއްބައިވެ ، ހިޔަޅެއް ފުއްލާއަކަށް ޙަމަލާދޭ ގޮތަށް މުސްލިމް ޤައުމުތަކަށް ޙަމަލާދީ ބަލިކޮށް ، އިސްލާމީ އުއްމަތް ނިކަމެތި ކުރާނެއެވެ. ކޮންމެއަކަސް ، ދުނިޔެ ފަސާދަވާ މިފަދަ ކިތަންމެ ކިތަންމެ ކަމެއް އެއިންސާނާ ދުނިޔޭގައި އުޅޭ ޕްރޮގްރާމުގައި ހިމެނިގެން ދާނެއެވެ. އެނގިހުރެއާއި ނޭނގުމުގެ ތެރޭގައެވެ. ކުރިންދެންނެވިފަދަ ، ޤިޔާމަތްވުމުގެ ޢަލާމާތްތައް ފާޅުވަމުންގޮސް ، އެންމެ ފަހުން ދުނިޔޭގައި ތިބޭނީ ، އިންސާނުންކުރެ އެންމެ ނުބައި މީހުންނެވެ.
އިންސާނާ ދުނިޔޭގައި ހުރެ ކުރިޔަށް ގެންދިޔަ ޕްރޮގްރާމުގެ ވަކި ހިސާބަކުން ، އެޕްރޮގްރާމް މެދުކެނޑި ، އިންސާނާގެ އަމިއްލަ ބާރާއި އިޚުތިޔާރު ގެއްލެއެވެ. އެއިޚްތިޔާރާއި ބާރު ގެއްލެނީ ، އިންސާނާއަކީ ، އަމިއްލަޔަށް ދުނިޔެއަށް އައި ނަފުސަކަށް ނުވާތީއެވެ. ﷲ އުފައްދަވައި ޚަލްޤު ކުރެއްވި ނަފުސަކަށްވާތީ ، ﷲ ގެ ޙަޟުރަތަށް އެނބުރިދާން ޖެހޭތީއެވެ. މި ޙާލަތަކީ އާޚިރަތުގެ މަރުޙަލާއެވެ. އާޚިރަތްދުވަހަށް އީމާންވާން ޖެހެނީ މިސަބަބަށްޓަކައެވެ. އެއީ އަންނާނެ ދުވަހެއްކަމަށް ޤަބުލުކުރަން މަޖުބޫރުވަނީ ކުރިން ދެންނެވި ހެކިތައް އެއިންސާނާގެ ދިރިއުޅުމުގައި ފެންނަމުން ދާތީއެވެ. އާޚިރަތަށް ކުރާ ދަތުރުގައި ބަރުޒަޚުގެ ޢާލަމަށް އިންސާނާދާނީ ، ދުނިޔޭގައި ހުރިއިރު ހޯދި ބާރާއި މުދަލާ އަދި ފައިސާފަދަ ހުރިހައި އެއްޗެއް ދޫކޮށްލާފައި ހުސްއަތާއެވެ. އޭނާ ދުނިޔޭގައި ހުރެ ކޮށްފައިވާ ރަނގަޅު އަދި ނުބައި ޢަމަލުތައް ފިޔަވައެވެ. ދުނިޔެއިން ވަކިވެ ދާއިރު ، އޭނާއަށް އިތުރަށް ލިބޭނީ ކަށްވަޅުގައި ، ހަށިގަނޑު ކިރިޔާ ބާއްވާލެވޭވަރުގެ ކުޑަ ގޮޅިއެކެވެ. ދެން ފެށޭނީ އެޢަމަލުތަކުގެ ހިސާބު ކިތާބު ބެލޭ ޤިޔާމަތް ދުވަހުގެ ޕްރޮގްރާމެވެ.
އާޚިރަތް ދުވަހަކީ ، އިންސާނާގެ ހިތަށް ގެނެސް ނުގަނެވޭފަދަ ކައިރީގައި އޮތް ދުވަހެކެވެ. އެދުވަސް އަންނާނީ ކޮންއިރަކުން ، ކޮންދުވަހަކުންކަން ދެނެވޮޑިގެންވަނީ ، ކީރިތިވަންތަ މާތް ﷲ އެވެ. އެއީ އެކަލާނގެ ޔަދު ޤުދުރަތްފުޅުގެ ދަށުގައިވާ ކަމެކެވެ. އާޚިރަތްދުވަހަކީ ހަނދާންކޮށް ، ވާހަކަދައްކައި ، ބިރުވެތިވާން ޖެހޭ ދުވަހެކެވެ. އެއީ އިންސާނާ ދުނިޔޭގައި އުޅޭއިރު ކުރެވޭ ކަންކަމުގެ ހިސާބު ، ޚުދު އެއިންސާނާއަށްވެސް އިޙުސާސް ނުކުރެވޭތީއެވެ. އަދި ﷲ ގެ ޙަޟުރަތަށް ޙާޟިރުކުރެވި އެހިސާބުތައް ބެލޭނެކަން އިންސާނާގެ ހަނދާނުގައި ނުހުންނާތީއެވެ. ޤިޔާމަތްދުވަސް އިންތިޒާމު ކުރެއްވިގެންވަނީ ބިރުވެރި ކަންތައްތަކެއްގެ މައްޗަށެވެ. އިންސާނާ ، އޭނާގެ ދުނިޔަވީ ޕްރޮގްރާމްތައް ފުރިހަމަކުރުމުގައި އަވަދިނެތި އުޅެނިކޮށް ކުރިމަތިވާ ކާރިސާއެއްގެ މައްޗަށެވެ.
ޤިޔާމަތްވުމަށް ، ﷲ އިރާދަކުރައްވައި އެދުވަސް ނިންމަވާހިނދު ، ﷲ ގެ އަމުރުފުޅަށް ، އިސްރާއީލްގެފާނު ތާނަފިލި ފުންމަވައި ލައްވާނެއެވެ. ފުރަތަމަ ތާޅާފިލި ފުމެލައްވާހިނދު ، ވަގުތުން ޤިޔާމަތް ޤާއިމްވެދާހުއްޓެވެ. ތާޅަފިލީގެ އަޑު އެންމެ ފުރަތަމަ އިވޭނީ މަޑުމަޑުންނެވެ. އެއަށްފަހު ، އެއަޑު ގަދަވަމުން އަންނާނެއެވެ. އެއަޑު އިވުމާއެކު މީސްތަކުންގެ ކަރު ލަނބާލައި އުފުލައިލުމާއެކު ކަނުލައި އެއަޑަށް ސަމާލުކަން ދޭނެއެވެ. އަދި މީސްތަކުން މަރުވަމުން ވެއްޓެމުންދާނެއެވެ. އަޑުއިވުމާއި މަރުވުމާ ދެމެދު ، ކުޑަހިނދުކޮޅެއްވެސް ނުނަގާނެއެވެ. ފުރަތަމަ ތާޅަފިލީގެއަޑަށް ، ގަދަކީރިތިވަންތަ ﷲ ސުބްޙާނަހޫ ވަތަޢާލާ މިންވަރު ކުރެއްވި ބަޔަކާއި ތަކެތި ފިޔަވައި އެހެން ހުރިހައި އެއްޗެއް މަރުވެ ، ފަނާވެ ނެތިގެންދާނެއެވެ. ބިން އެހެން ބިމަކަށް އަދި އުޑު އެހެން އުޑުތަކަކަށް ބަދަލު ކުރެވޭ ހުއްޓެވެ. ދެވަނަ ތާޅަފިލި ފުމެލެވޭނީ ފުރަތަމަ ތާޅަފިލި ފުމެލެވޭތާ 40 ވުމުންނެވެ. މިޢަދަދަކީ ﷲ ގެ ޙަޟުރަތުގައި ސިއްރުކުރެވިގެންވާ ޢަދަދެކެވެ. އިންސާނުންނަށް މިޢަދަދު މިނެ ވަޒަންކުރާކަށް ނޭނގޭނެއެވެ. އެއީ 40 އަހަރުކަން ، މަސްކަން ނުވަތަ ދުވަސްކަން ދެނެވޮޑިގެންވަނީ ، ގަދަ ކީރިތިވަންތަ ﷲ ސުބްޙާނަހޫ ވަތަޢާލާއެވެ. 40 ވުމަށްފަހު ، އިސްރާއީލުގެފާނު ، ދެވަނަ ތާޅާފިލި ފުމެލައްވާނެއެވެ. ދެވަނަ ތާޅަފިއްޔާއެކު ، ހިމަފޮދުވާރެއެއް ވެއްސަވާނެއެވެ. މިވާރެޔާއެކު ، ވާރޭވެހުމުން އޮށުން ގަސްފަޅައި ބިމުން މައްޗަށް އަރަމުންދާގޮތަށް ، މީސްތަކުންނަށް ދިރުންލިބި ކޮޅަށް ތެދުވާނެއެވެ. މަރުވެފައި ކަށްވަޅުގައި ތިބި އިންސާނުންނަށް ދިރުންލިބި ، އެންމެހައި ޚަލްޤުތަކުންނަށް ފުރާނައެޅުއްވިގެން ބިންމަތިން ކޮޅަށް ތެދުވާނެއެވެ.
އެއަށްފަހު ، މީސްތަކުންގެ ޢަމަލުތަކުގެ ހިސާބު ބެއްލެވުމަށްޓަކައި ، މަޙުޝަރު ކުރެއްވޭނެއެވެ. މީސްތަކުން މަޙުޝަރު ކުރެއްވޭއިރު ، އިސްލާމްދީނަށް ތަބާވެ ، މުސްލިމު އުއްމަތަށް ނިސްބަތްވާ މީހުންނަށް ނޫރެއް ލިބިގެންވާނެއެވެ. އެއީ އެބައިމީހުން ދުނިޔޭގައި ކުޅަ ހެޔޮ ޢަމަލުތަކުގެ ނަތީޖާއެވެ. މީސްތަކުން މަޙުޝަރުކުރެއްވޭނީ ދުނިޔެއަށް އުފަންކުރެއްވިގޮތަށް ، ހުސްގަޔާ އަދި ހުސްފައިގައެވެ. ކޮންމެ މީހަކުވެސް ހުންނާނީ އެމީހެއްގެ ޢަމަލާއެއްގޮތަށް ، އެމީހަކު މަރުވިއިރު ހުރި ކަމެއްގެ މަތީގައެވެ. ﷲ ގެ ރަސްކަންފުޅު ހަނދުމަކުރުމުން އެއްކިބާވި މީހާ ހުންނާނީ ކަނުމީހެއްގެ ގޮތުގައެވެ. އިޙްރާމް ބަނދެގެންހުއްޓާ މަރުވިމީހާ ހުންނާނީ ތަލްބިޔާ ކިޔާ ޙާލުގައެވެ. ކީރިތި ޤުރުއާނާ ދުރުހެލިވެގެން ދުނިޔޭގައި އުޅުނުމީހާ ހުންނާނީ ، ލިބިފައިއޮންނަ ބިރުވެރިކަމެއްގެ ސަބަބުން އޭނާގެ މޫނު ކަޅުވެގެންވާ ޙާލުގައެވެ. ބޮޑާކަންމަތީ ދުނިޔޭގައި އުޅުނު މީހާ ހުންނާނީ ނިކަމެތިވެގެންވާ ޙާލުގައެވެ. ކާފަރުވި މީހުން ، މޫނުވަތަށް ، ކަނު އަދި މަންމަން މީހެއްގެ ގޮތުގައެވެ.
ކައު އިތުރު ރަސޫލާ ޞައްލަﷲ ޢަލައިހި ވަސައްލަމަގެ ޙަދީސުން ސާބިތުވާ ގޮތުގައި ، އިރު ހުންނާނީ މީސްތަކުންނާ ވަރަށް ކައިރި ހިސާބެއްގައެވެ. އިރުގެ ގަދަ ހޫނުން ހިއްލާ ދަލުން ތެމިފޯވެ ، އެއްބަޔަކު ތިބޭނީ ޣަރަޤުވެފައެވެ. ތަނބިކައްޓާ ހަމަޔަށް އެއްބަޔަކު ޣަރަޤުވެފައި ތިބޭއިރު ، އެއްބަޔަކު ކަކުލާހަމަޔަށް އަދި އަނެއްބަޔަކު ، މެޔާ ހަމަޔަށާއި ކަރުތާފެނަށް ގެނބިފައި ތިބޭނެއެވެ. އެދުވަހު އިންޞާފުކުރައްވާނީ ގަދަކީރިތިވަންތަ ﷲ ސުންޙާނަހޫ ވަތަޢާލާއެވެ. އެއްވެސް މަޚުލޫޤަކަށް ބޭއިންޞާފެއް ނުކުރެވޭ ހުއްޓެވެ. އެއީ އިންސާނާ ޚަލްޤުކުރެއްވި ﷲ ސުބްޙާނަހޫ ވަތަޢާލާގެ ޙަޟުރަތުން ، ޙައްޤަށް އިންސާފުކުރައްވައި ޢަދުލަށް ނިޔާއިއްވަވާ ދުވަހެވެ. ކީރިތި ޤުރުއާނުގެ ބަޤަރާ ސޫރަތުގެ 281 ވަނަ އާޔަތުގައި ﷲ ވަޙީ ކުރައްވާ އަންގަވާފައިވާ ފަދައިން " ކޮންމެ ނަފުސަކަށްމެ އެނަފުސެއް ހޯދި ކަމެއްގެ ޖަޒާ (އެދުވަހުން) ލިބޭނެތެވެ. އަދި އެއުރެންނަށް ބޭއިންޞާފެއް ނުކުރެވޭ ހުއްޓެވެ. "
އިންސާނާ ދުނިޔޭގައި އުޅުމުގައި ކޮށްފައިވާ އެންމެހައި ޢަމަލުތައް ﷲ ސުންޙާނަހޫ ވަތަޢާލާ މޮޅަށް ދެނެވޮޑިގެން ވެއެވެ. އިންސާނާގެ ޢަމަލުތައް ލިޔެވިފައިވާ ފަތް އެއިންސާނާ އެދުވަހުން ދެކޭނެއެވެ. ކިތަންމެ ސިއްރުން ކޮށްފައިވާ ކަމެއްނަމަވެސް އެފަތުގައި ލިޔެވިގެން ވާނެއެވެ. ﷲ ސުބްޙާނަހޫ ވަތަޢާލާގެ ރަޙުމަތްފުޅުގެ ދަށުން ، އިންސާނާއަށް ސުވަރުގެޔަށް ވަދެވޭނެ ހަމައެކަނި ވަޞީލަތަކީ ، އޭނާ ދުނިޔޭގައި އުޅުމުގައި ކޮށްފައިވާ ހެޔޮ ޢަމަލެވެ. ޤިޔާމަތްދުވަހު ، އޭނާގެ ޢަމަލުނާމާ ކަނާތުން ލިބިއްޖެމީހަކީ ސުވަރުގެވަންތަ ވެރިޔެކެވެ. އަދި އެމީހެއްގެ ޢަމަލުނާމާ ވައަތަށް ލިބިއްޖެ މީހަކީ ، އަބާއްޖަވެރިންގެ ތެރޭގައި ހިމެނިގެން ނަރަކަޔަށް ވަންނާނެ މީހެކެވެ.
ސުވަރުގެޔާއި ނަރަކަޔަށް އިންސާނާ ކުރާ ދަތުރުގައި ، އެއިންސާނާއަށްވަނީ އިޚުތިޔާރުތަކެއް ދެއްވާފައެވެ. ހެޔޮޢަމަލުކޮށްފިމީހާއަކީ ބާއްޖަވެރިޔެކެވެ. ސުވަރުގެވަންތަ ވެރިޔެކެވެ. ޙަރާމް ވެގެންވާ ނުބައި ކަންކަމުން އޭނާގެ ދުނިޔަވީ ޢަމަލުތައް ނުތާހިރުކޮށްފައިވާ މީހާއަކީ ، އަބާއްޖަވެރިންގެ ތެރޭގައި ހިމެނިގެންވާ ނަރަކަވަންތަ ވެރިޔެކެވެ. ގަދައަލިފާނުން އަނދަ އަނދާހުންނަ ނަރަކައިގެ ދަރަކީ ، މީހުންނާއި ހިލައެވެ. ނަރަކަ އަންދަން ބޭނުންކުރެވޭ ދަރުގެ ގޮތުގައި ނަރަކަޔަށްދާ މީހާ އެތަނަށް ވަންނާނީ ، އަމިއްލަ އިޚުތިޔާރުގައި ، ﷲ ގެ އަމުރުފުޅުތަކަށް ނުކިޔަމަންތެރިވި މީހުންގެ ތެރޭގައި ހިމެނިގެންނެވެ.
ނިކަން ވިސްނައިވަޑައިގަންނަވާށެވެ! އިޚުތިޔާރު ކުރާނެ ގޮތްތަކެއް ދައްކަވައި ، އިންސާނާ ދުނިޔެއަށް ފޮނުއްވާ ހިނދު ، މުޅި އިންސާނިއްޔަތަށް އެންމެމޮޅު އަދި އެންމެރަނގަޅުގޮތް ދޫކޮށް ، އަމިއްލަޔަށް މަގުފުރެދިގެން ދިއުމަކީ އިންސާނާ އިޚުތިޔާރު ކުރާ ކިހާނިކަމެތި ކަމެއްތޯއެވެ؟ ސުވަރުގެޔާއި ނަރަކަވަނީ ، އިންސާނާގެ ޢަމަލުތަކަށް ޙައްޤުވާ ދެމަންޒިލެއްގެ ގޮތުގައެވެ. އަމިއްލަޔަށް ދަތުރުކޮށް ދާ ތަނެއްގެ ގޮތުގައި ނަރަކަވެގެން ދިއުމަކީ އިންސާނާ އިޚުޔިޔާރުކުރާ އެންމެ ނިކަމެތި ޙާލަތެވެ.
އެހެންކަމުން ، ވަގުތު ފާއިތުނުވަނިސް ، ﷲ ނަހީކުރައްވައި މަނާކުރައްވާފައިވާ އެންމެހައި ކަންކަމާ ދުރުހެލިވެ ، ދެދުނިޔޭގެ ބާއްޖަވެރިކަން ހުރިމަގަށް ، ތިމާމެންގެ ޢަމަލުތައް ސީދާ ކުރަމާތޯއެވެ ؟ ކުރެވިފައި ކުށްފާފަތަކަށް ތައުބާވެ ، ﷲ ގެ އެންގެވުންތަކަށް ޢަމަލުކުރާ ، އަދި އެކަލާނގެ ލޯބިވެވޮޑިގެންވާ އަޅެއްގެ ގޮތުގައި ދުނިޔެ ދޫކޮށްފައިދާ ބާއްޖަވެރި ނަޞީބުވެރިންގެ ތެރޭގައި ހިމެނޭތޯ ބަލަމާތޯއެވެ ؟ ވަގުތު ފާއިތެއް ނުވެއެވެ. ހެޔޮޢަމަލެއް ކުރުމަށް ލިބޭ ކިތަންމެ ކުޑަ ފުރުޞަތެއްނަމަވެސް ދޫކޮށްނުލަމާތޯއެވެ ! ފާފައެއް ނުވަތަ ﷲ ނަހީކުރައްވާފައިވާ ކަމަކުން ދުރުހެލިވުމަށް ލިބޭ ހަނި ފުރުޞަތެއްނަމަވެސް ދޫކޮށްނުލަމާތޯއެވެ ! ގޯސް ޢަމަލުތަކުން އަޅުގަނޑުމެންގެ ދިރިއުޅުން ސާފުކޮށް ތާހިރުކޮށް ، ހެޔޮޢަމަލުތަކުން ދިރިއުޅުން ސީދާ ކުރަމާތޯއެވެ ! ﷲ އީ ކޮންމެ ކަމެއްވެސް މޮޅަށް ދެނެވޮޑިގެންވާ އަދި އެކަލާނގެ އަޅުތަކުންގެ ތައުބާ ޤަބޫލުކުރައްވައި ، ކުށްތައް ޢަފޫ ކުރައްވާ ، ރަޙީމުވަންތަ ، ރަޙުމާނުވަންތަ ރަސްކަލާނގެއެވެ. ކީރިތި ﷲ ، އަޅަމެން އެންމެންނަށް ތެދުމަގުދައްކަވައި ، އިބަރަސްކަލާނގެ ރުހިވޮޑިގެންވާ އަޅުންކަމުގައި ލައްވައި ދެދުނިޔޭގެ ބާއްޖަވެރިކަން މިންވަރު ކުރައްވާށިއެވެ!
