އަހަރެންގެ ގަލަން މިއުފުލާލީ އަހަރެން ތައުބާވާން ޖެހުނުގޮތުގެ ޚުލާޞާއެއް ލިޔުމަށެވެ. އަހަރެން ގެއްލިގެންދިޔަ ގޮތުގެ ވާހަކަ ލިޔުމަށެވެ. އަހަރެން ތައުބާވީމެވެ. ތައުބާވީ އަތްމަތި ދަތިވެގެނެއް ނޫނެވެ. ނޫނީ ދިމާވި ހިތްދަތި ކަމެއްގެ ސަބަބުނެއްވެސް ނޫނެވެ. އަދިކިއެއްތަ އަހަރެންނަށް ވަނީ ދުނިޔަވީ ހުރިހާ އުފަލެއް ލިބިފައެވެ. ހުރިހާ މިނިވަންކަމެއް ލިބިފައެވެ. އަހަރެން ސިކުނޑީގައި ސެކިއުލަރިޒަމްގެ ހުރިހާ ފިކުރެއްވަނީ އަށަގެންފައެވެ. އެމީހުންގެ ގޮތްތަކަކީ އަހަރެންގެ ވެސް ގޮތެވެ. ދަސްތޫރެވެ. އެމީހުންގެ ފޮތްތަކުން އަހަރެންގެ ފޮތްހަރުގަނޑު ވަނީ ފުރާލާފައެވެ. އަހަރެންގެ ހުވަފެނަކީ ހިޖާބު ނަގާ އެއްލާލުމެވެ. އަހަރެންގެ ފުރަތަމަ ދަޢުވާއަކީ އަންހެނުންނަށް ކާރު ދުއްވުމުގެ ހުއްދަ ލިބުމެވެ. އަހަރެން ކޮންމެ މުނާސަބަތެއްގައި އެވާހަކަ ދައްކަމެވެ. މުސްކުޅި ބޯދާ ފިކުރުތަކުން ސަޢުދީ އަންހެނުން ދުރުކޮށް ފިރިހެނުންގެ އަޅުވެތިކަމުން މިނިވަންކުރުމަކީ އަހަރެންގެ އެންމެ އިސް މަސައްކަތެވެ. އެގޮތުން އަހަރެން ސަޢުދީ އަންހެނުންނަށް ވިސްނައިދޭން ފެށީމެވެ. ފިރިހެނުންގެ ހަރުކަށިކަމުގެ ވާހަކައެވެ. އަޅުވެތި ކުރުވުމުގެ ވާހަކައެވެ. ޖަމަލު ގެންގުޅޭގޮތަށް އަންހެނުން ގެންގުޅޭ ވާހަކައެވެ. މިނިވަން ޚިޔާލުގެ ފިރިހެނުންނަކީ އަންހެނުންގެ އިޙްސާސްތައް ދަންނަ އަދި އެމީހުނާ އެކުގައި މަސައްކަތް ކުރާ ބައެއްގެ ގޮތުގައި ތަމްސީލު ކޮށްދޭ މީހުންނެވެ. ދީންވެރި ފިރިހެނުންނަކީ ސަހަރާގެ މީހުންނެވެ. އަދި އެބައިމީހުންނަކީ އަންހެނުންނަށް އެއްވެސް ރަޙުމެއް ނެތް ހަރުކަށި ބައެއްގެ ގޮތުގައި ވިސްނައިދިނީމެވެ. ލަވައާއި މިޔުޒިކަކީ ހެނދުނާ ހަވީރުގެ ރޫޙުގެ ކާނާއެވެ.
ހުރިހާ ވައްތަރެއްގެ ނެށުމަކީ އަހަރެންގެ ހިތާމަތައް ފިލުވައިދޭ އެއްޗެއްގެ ގޮތުގައި ބެލީމެވެ. މިޒަމާނުގެ އަންހެނުންނަށް ދިމާވާ މައްސަލަތަކަކީ މިމުޖުތަމަޢުގައި އޮންނަ ބޯދާ(ދީނީ) ތަރުބިޔަތުގެ މައްސަލަތަކެއް ކަމުގައި ބެލީމެވެ. އަހަރެން ބެލީ އަހަރެންނަކީ އެހެން އަންހެނުންނަށް ވުރެ މަތީމީހެއް ކަމަށެވެ. މިގޮތަށް އެމިނިވަން ޚިޔާލުތަކާއެކު އަހަރުތަކެއް ހޭދަ ކޮށްފީމެވެ.
އެއްދުވަހަކު އަހަރެން ޝޮޕިން ސެންޓެރެއްގެ ތެރޭގައި އިށީނދެގެން އިންދާ ފެންނަނީ ދީންވެރި، ދީނަށް ލޯބިކުރާ އަދި ދީނީގޮތަށް ހެދުން އަޅައިގެން ހުރި ޒުވާން ފިރިހެން ކުއްޖަކު ހިނގާފައި ދިޔަތަނެވެ. އެކުއްޖާ ހިނގާފައި ދިޔައީ އިސްދަށަށް ޖަހައިގެންނެވެ. އުމުރަކީ ގާތްގަނޑަކަށް ވިހި އަހަރެވެ. އަހަރެންގެ ވިސްނުން އެކުއްޖާއަށް ގޮސް ހުއްޓުނެވެ. ތަފާތު ފިކުރުތަކާއި ޚިޔާލުތައް އަންނަން ފަށައިފިއެވެ. މާޒީވެ ގޮސްފައިވާ ޚިޔާލުތަކެވެ. ފަހަކަށްއައިސް އަބަދުވެސް އަހަރެން ދީނީ ސިފަތަކަށް މަލާމާތް ކުރީމެވެ. ނަމަވެސް އެކުއްޖާގެ ހުރި ސިފައަށް ނޫނީ އެނާގެ ދީނި ކުލައަށް ސަމާލުކަން ދޭން ފެށީމެވެ. އަހަރެން ދެކެމުންއައީ ދީނީ މީހުންގެ ސަބަބުން ތަހުޒީބީ މުޖުތަމަޢަށް ހުރަސް އެޅޭ ކަމަށެވެ. އެކަމަކު މިއަދު އަހަރެންނަށް އެކުއްޖާ ހެދުން އަޅައިގެން ހުރިގޮތް ކަމުދިޔައީ ކީއްވެ ކަމެއް ނޭނގުނެވެ.
އަހަރެންގެ ސިކުނޑިއަށް ވެރިވި ފިކުރާއި މެދު ވިސްނަން ފެށީމެވެ. ހިތުގައި ކުރެހިފައި އޮތީ ބައެއް މީހުން ދީންވެރިވެގެން އުޅެނީ ކުރާނެ ކަމެއް ނެތުމުން މީސްތަކުންނަށް ދެއްކުމަށް ކަމަމަށެވެ. ނަމަވެސް ދީނަށް ލޯބި ކުރާ މީހުންގެތެރޭގައި ބޮޑުތި ޢިލްމުވެރިންނާއި ޑޮކްޓަރުން ހިމެނެއެވެ. މުއްސަނދިން ހިމެއެވެ. އެމީހުންވަނީ ހުޅަނގުން އިރަށް ދުނިޔޭގެ ވެރިކަން ކޮށްފައެވެ.
އެދުވަހަށްފަހު އަހަރެން ހޯދަމުން ދިޔަ އުފަލާއި އަރާމު އަހަރެންނަށް އެއްވެސް އެއްޗަކަށް ނުވިއެވެ. ލައްޒަތެއް ނުލިބުނެވެ. މިޔުޒިކް އަޑުއަހާހިތެއް ނުވިއެވެ. ޑާންސްކުރާހިތް ކެނޑިއްޖެއެވެ. އަހަރެންނަށް ހީވާންފެށީ ވަރަށް މުހިންމު އެއްޗެއް ގެއްލިއްޖެ ހެންނެވެ. އެއީ ކޮން އެއްޗެއްތޯ އަމިއްލަ ނަފްސާއި ސުވާލު ކުރީމެވެ. ނޭގުނެވެ. ނުވެސް ވިސްނުނެވެ. އަހަރެން ސައިކޭޓްރިސްޓް ޑޮކްޓަރަކަށް ދެއްކީމެވެ. އަހަރެންގެ ހަށިގަނޑު ވަނީ ބުރަހެލި ވެފައެވެ. ލިޔާހިތެއް ނުވެއެވެ. އެކުވެރިންނާއެކު ހީސަމާސާކުރާހިތް ކެނޑިއްޖެއެވެ. އަހަރެންނަށް މިބަދަލުއައި ދުވަހަކީ ކޮބައިތޯ ދެވަނަފަހަރަށް ވިސްނީމެވެ. އެދުވަސް ހަނދާންވެއްޖެއެވެ.
އުފެދުނީ ބޮޑު ސުއާލެވެ. ހުޅަނގުގެ މީހުން އަހަރުމެނަށްވުރެ މާތްބަޔަކީ ހެއްޔެވެ؟ ކޮން ކަމަކުންތޯއެވެ؟ ޓެކްނޮލޮޖީގެ ގޮތުންތޯއެވެ؟ އެމީހުންގެ ޓެކޮނޮލޮޖީ އަންހެނުންނަށް ދިނީ ކޮން ޚިދުމަތެއްތޯއެވެ؟ އަންހެން މީހާއަށް ދިނީ ކޮން މަޤާމެއްތޯއެވެ؟ އެބައިމީހުންނާއެކު މަސައްކަތް ކުރެވުނެވެ. އެމީހުން އުފައްދާފައިވާ ތަފާތު މިޔުޒިކް އާލާތްތަކަށް ނަށަން އެގުނެވެ. އެކި ޒާތްޒާތުގެ ހެދުން އަޅައިގެން ގޮސް ރާތަށި ތަކަށް އިންސާފު ކުރެވުނެވެ. ފިރިހެނުންގެ އަތްމަތީގައި ކުޅޭކުޅޭ ބުދަކަށް ވެވުނެވެ. ބޭނުން ކޮށްފައި އެއްލާލާ ޓިޝޫ އަކަށްވުރެން އަގުދަށްވެވުނެވެ. ކުނި އަޅާ ޑަސްބިނެއްގެ ދަރަޖަ ލިބުނެވެ. އެއްވެސް އަގެއް ނެތެވެ. އިޝްތިހާރުތަކުގައި ބެހެއްޓޭ ފޮޓޯއެކޭ އެއްގޮތްވިއެވެ. ކާރުގެ ޓައިރަކަށް ވިޔަސް އަދި ފައިވާނުގައިވެސް އަންހެނެއްގެ ފޮޓޯއެވެ. އިށީނދެ ތިބެގެންނާއި ކޮޅަށް ތިބެގެންނާއި ނިދާފައި ތިބެގެންނާއި އެކި ގޮތްގޮތަށް މިޔުޒިކަށް ނަށަން އެގުނެވެ. ފިހާރަތަކުގެ ޝޯކޭސްތަކަށް ވެވުނެވެ. އެމީހުންގެ ޖިންސީ އެދުންތަކުގެ ކުރިމަތީގައި ބޭނުންވަގުތަކު ބޭނުން ގޮތަކަށް ބަރަހަނާ ވެވުނެވެ. ބާރ ތަކަށް ދެވުނެވެ. އެއްޖިންސުން ގުޅުން ހިންގުނެވެ.
އަންހެނުން މިނިވަން ކުރުމުގެ ނަމުގައި ހިންގުނު ބޮޑު ޖަރީމާއަކީ މިއީއެވެ. މިނޫން އެހެން އެއްވެސް ކަމެއް ނެތެވެ. މިއަވާގައި ޖެހުނު އަންހެންމީހާގެ ޙިޖާބު އެއްލާލެވުނީއެވެ. ކީއްވެ ހެއްޔެވެ؟ ޙިޖާބަކީ ކޮބައި ހެއްޔެވެ؟ އެއީ އަޅުކަމެވެ. އަދި ކޮބައިތޯއެވެ؟ ނަމާދެވެ. ރޯދައެވެ. ޢިއްފަތްތެރިކަމެވެ. ރައްކާތެރިކަމެވެ.
އަހަރެން މިވަނީ އެހުރިހައި ކަމަކުން މަޙްރޫމް ވެގެންނެވެ. މިނިވަން ޚިޔާލުގައި ބޭނުންވަނީ އަހަރެންނަށް ޙިމާޔަތްދީ ރައްކާތެރިކަން ދޭންތިބި މައިންބަފައިންނާއި ފިރިމީހާއަށް ނުކިޔަންތެރި ވުމަށެވެ. ޖިންސީ މިނިވަން ކަމުން ލިބުނީ ކޮން އެއްޗެއް ތޯއެވެ؟ އެއިޑްސްފަދަ ގޮތްނޭގޭ ތަފާތު ބަލިތަކެވެ. އޭރު ކުރެވުނު ދަޢުވާއަކީ އަންހެނުނަށް ފިރިހެނުންގެ ފަރާތުން މިނިވަންކަން ދިނުމުވެ. ކުދިންނާއި އަޅާނުލުމެވެ. ކުދިން ހަމަ މަގުން ގެއްލޭތީ މިއަދު އެމީހުން ގެންދަނީ އެކަމުގެ ދިރާސާތައް ކުރަމުންނެވެ. މަގު ގެއްލޭ ސަބަބު ހޯދާށެވެ. އަހަރެންގެ މިޅަސކުޑި އެމީހުންގެ ވަހަކަ ޤާބޫލު ކުރީ ކިހިނެތް ހެޔެވެ؟ ހަލާކު ހުއްޓެވެ. އަންހެންމީހާ ޙިޖާބުގައި ހުރެގެން ހޯދި ތަރައްޤީ ނުފެނުނީ ކީއްވެ ހެއްޔެވެ؟ އަހަރެން ޑްރައިވިންގ ކުރަން ހުއްދަ ހޯދަން މަސައްކަތް ކުރީ ކީއްވެ ހެއްޔެވެ؟ އަހަރެންގެ ޙިޖާބު ވެއްޓުނީއެވެ. ޢިއްފަތްތެރިކަން ގެއްލުނީއެވެ. އަހަރެންގެ ޢިއްފަތްތެރިކަން ނަގާލުމަކީ ގިނަ ޒުވާން ފިރިހެން ކުދިންގެ އުފަލެވެ. މިކަން މިގޮތަށް ދިމާވާން ޖެހުނު ހުރިހާވެސް ސަބަބަކީ އަހަރެންނަށް ދީން ނޭނގުމެވެ. އެނގުނީ ހަމަ އެކަނި އިސްލާމްދީނުގެ ނަމެވެ. އެއީ އަހަރެންނަށް ކާބަފައިންގެ ފަރާތުން ވާރުތަވީ ނަމެކެވެ. އަދި އަހަރެންނާ ހަނގުރާމަ ކުރާ ޢަދުއްވުން ވަކި ކުރަން ނޭނގުމެވެ. އެމީހުން ހަނގުރާމަ ކުރަނީ އެދުންތަކުންނެވެ. ޝަހުވަތުންނެވެ. އެމީހުންގެ މަސައްކަތުން އަހަރުމެން ޤުރުއާނާ ދުރުކުރިއެވެ. އަދި ދީން އުނގެނުމަށް ހުރަސް އެޅިއެވެ. އެއީ ދުރާލާ ރޭވިގެން ހިނގާ ކަންތަކެވެ. ފުރަތަމަ މަސްތުގައި ޖައްސަނީއެވެ. ދެން އެމީހުންގެ ވިއުގަތެރެއަށް ވައްދަނީއެވެ. އަހަރެންނަށް ނޭނގިއެވެ.
އާދެ، މިއަދުން ފެށިގެން އަހަރެން އިސްލާމް ދީނަށް އެނބުރުނީމެވެ. ދީނީ ފިޤުހު ފޮތްތަކާއި އެހެނިހެން ދީނީ ފޮތްތައް ކިޔަން ފެށީމެވެ. އަހަރެންގެ ފަރާތުން ގެއްލިގެންދިޔަ ކޮންމެ ހިނދުކޮޅަކަށް ދެރަވެ ހިތާމަކޮށް ލަދުވެތި ވަމެވެ. އަހަރެންނަށް ފެނުނު އެންމެ ބޮޑު މުޢުޖިޒާތަކީ ކީރިތި ޤުރުއާނެވެ. އަހަރެން މަސައްކަތްފެށީ ޤުރުއާނުގެ ތަފްސީރު އެނގިގަތުމަށެވެ. އަހަރެން މަގުފުރެއްދި ހުރިހާ އެއްޗެއް ގެއިން ނެރެލީމެވެ. ޚާއްޞަކޮށް އަހަރެންގެ ހިތް މުޅީން ސާފުކޮށްލީމެވެ. އެރާގުތައް ހިތުން ފިލައިގެން ދިއުމުން އީމާންކަމުގެ ފޮނިމީރުކަން ހިތަށް ލިބިގެން ދިޔައެވެ. ޤުރުއާން ކިޔަވާ ކޮންމެ ވަގުތަކު މާމުއިގެ ފޮނިކަން ހިތަށް ލިބެއެވެ. އަހަރެން ލޯބިކުރުން އެންމެ ޙައްޤުވެގެންވާ ފަރާތް ކަމުގައިވާ ﷲ އަށް ލޯބި ކުރީމެވެ. އަހަރެން ޙިޖާބަށް ލޯބިކޮށް އަލުން އަނބުރާ އެޙިޖާބް އަޅަން ފެށީމެވެ. وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ މާނައީ: "ތިމަންރަސްކަލާނގެއަށް އަޅުކަންކުރުމަށް މެނުވީ، ތިމަންރަސްކަލާނގެ ޖިންނީންނާއި، އިންސީން ނަހައްދަވަމެވެ." މިއާޔަތުގެ މާނަ މިއަދު އަހަންނަށް އެނގުނެވެ. ރަސޫލާ صلى الله عليه وسلم ގެ ޙަދީޘުފުޅުތައް ކިޔައި އެއަމުރުފުޅުތައް ހިތުގެ އަޑިން ޤަބޫލުކޮށް އެއަށް ޢަމަލު ކުރަން ފެށީމެވެ.
މިވާހަކަ ކިޔާ ކޮންމެ މީހަކަށް ދޭން އޮތް ނަޞޭޙަތަކީ ހަމަ މަގުން ކައްސާ ނުލާށެވެ. ދީން ދޫނުކުރާށެވެ. ދީން އުނގެނޭށެވެ. ދީން ރަނގަޅަށް އެނގިއްޖެ މީހަކު އަނބިދަރިންނާއި މުދަލައްވުރެ ބޮޑަށް އެދީނަށް ލޯބި ކުރާނެއެވެ. ތިބާގެ މިއުޚުތާއަށް އަދި މަގު އޮޅިފައިވާ އެހެން އުޚުތުންނަށް ހިދާޔަތުގެ މަގު ދައްކަވާތޯ ދުޢާ ކޮށްދޭށެވެ.
ގަދަ ކީރިތިވަންތަ ﷲ މިއަޅާއަށާއި ތިބާއަށް ރުހިވޮޑިގަންނަވައި މިއަޅާއާއި ތިބާގެ ފާފަ ފުއްސަވާނދޭވެ! އާމީން!
