(11 ޖަނަވަރީ 2026 ގައި ޝާއިއުކުރި ބަޔާ ގުޅޭ)
ޠަރީފް ބިން މާލިކް
(1)
އައްޒަޣަލް ގައުމު ދޫކުރައްވައި އެފްރިކާއަށް ވަޑައިގެންނެވި ޚަބަރު ލިބުނީމާ ފެރްނާންދޯއަށް އަބޫ ޢަބްދުﷲ ތަހުނިޔާގެ މެސެޖެއް ފޮނުވައިފިއެވެ. އަދި ގްރަނާދާގައި އުފާވެރިކަމުގެ މެހެފިލްތައް އިންތިޒާމުކުރާން އަމުރު ނެރެފިއެވެ.
ރޭގަނޑުގެ ވަގުތެވެ. އަލްޙަމްރާގެ ކުރިބޯށިތަކާއި ފާރުތައް ވިދަވިދައި ހުރީ ދިއްލައިފައިވާ ދަންމަރުތަކުގެ އަލީންނެވެ. ގަނޑުވަރުގެ ތަނަވަސް މާލަމެއްގައި އަބޫ ޢަބްދުﷲގެ ފަރާތުން އޭނާގެ އަމީރުންނާއި ވަފާތެރިންނަށް ދެވުނު ރޭގަނޑުގެ ކެއުމަކަށް އިންސާފު ކުރެވެމުން ދަނީއެވެ. ކެއުމަށް ފަހު މިއުޒިކާއި ނެށުމުގެ ކަންތައް ފެށިއްޖެއެވެ. ރާގެ ތަށިތައް ދައުރުވާން ފަށައިފިއެވެ. މެހެފިލް އެންމެ ވަރުއަރައިގެން ދިޔަ ވަގުތު، މަސްތުގެ ހާލަތުގައި ހުރެގެން އަބޫ ޢަބްދުﷲ ކޮޅަށް ތެދުވެ ވާހަކަދައްކާން ފަށައިފިއެވެ. [އަހަރެން މިއީ ބަދުނަސީބު މީހެއް ކަމަށް ކަލޭމެންގެ ތެރެއިން ބައެއް މީހުން ކިޔައި އުޅެއެވެ. މިއަދުން ފެށިގެން އެއްވެސް މީހަކު އެހެން ކިޔައިގެން ނުވާނެއެވެ. އަހަރެން މިއީ ގްރަނާދާގެ ރަސްގެފާނެވެ. ފެރްނާންދޯއަކީ އޭނާގެ ވައުދުފުޅު ފުއްދަވާ ބޭފުޅެކެވެ. ގްރަނާދާގެ މުޅި ސަރަހައްދު އަހަންނަށް އެކީގައި ލިބޭނެއެވެ. ކަލޭމެން ހިމޭނުން ތިބީ ކީއްވެގެން ހެއްޔެވެ؟ ހޭނށެވެ. ލަވަކިޔާށެވެ. ނަށާށެވެ. ބޭނުން ވަރަކަށް ރާ ބޯށެވެ. އަހަރެން ކަލޭމެންނަށްޓަކައި އަލްޙަމްރާގައި ރާގެ ކޯރެއް ހަދާނަމެވެ. އަލްޕުކްރާގެ މޭވާބަގީޗާތަކުގައި އެހެރަ ހުރިހައި މޭބިސްކަދުރަކުން ހަދާނީ ރާއެވެ. އަހަރެން ވާނީ އުފާ ފައުޅުކުރާން ހުރިހައި ރައްޔިތުންނަށް އަންގައިފައެވެ. އެކަމަކު ބައެއް ވިޔާނުދާ މީހުން އެބައިމީހުންގެ މަގުބައްތިތައް ނިއްވައިލައިގެން ތިބި ވާހަކަ އެބަ އިވެއެވެ. އެކަންތައް އެހެން އެވަނީ ބޭރުން ގްރަނާދާއަށް އަރައި ތިބެގެން، ކްރިސްޓިއަނުން ތިމަންމެނަށް އެބަ އަނިޔާކުރެއޭ ކިޔައި ވާހަކަ ފަތުރާ މީހުންގެ ސަބަބުންނެވެ. އަހަރެން މި ބުނަނީއެވެ. އެއީ ދޮގު ވާހަކަތަކެކެވެ. އެފަދަ މީސްމީހުން މިރަށަށް އެރުމުގެ ހުއްދައެއް މީގެ ފަހަކުން ނުލިބޭނެއެވެ. މާތްވެގެންވާ ފެރްނާންދޯއާ ދެކޮޅަށް އުފުލާ އަޑެއް އޮވެގެން ނުވާނެއެވެ. އެއީ އަހަރެން ހުއްދަކުރާނޭ ކަމެއް ނޫނެވެ. އެއީ އަހަރެމެންގެ މުހްސިނެވެ. މިހާރު އަލްޙަމްރާއިން މި ފެންނަ ހުރިހައި ކަމަކީ އޭނާގެ ހެޔޮފުޅުކަމުގެ ނަތީޖާއެވެ.]
އެކަމަކު ރަށުތެރޭގެ ކަންތައް އޮތީ އަލްޙަމްރާތެރޭގައި އޮތް ގޮތަކަށް ނޫނެވެ. ސަރުކާރުގެ އަމުރަށް ރަށުގެ މަގުތަކާއި ގޯޅިތަކުގައި ދިއްލި ދަންމަރުތައް އަބޫ ޢަބްދުﷲއާ ދެކޮޅަށް މުޒާހިރާކުރާ މީހުން ގަދަކަމުން ނިއްވައިލައިފިއެވެ. މުޒާހިރާކުރާ މީހުން ގެންދިޔައީ ރަށުތެރޭގެ އެތަންމިތާނގައި ގައުމުގެ ޣައްދާރުންނާ ދެކޮޅަށް އަޑު އުފުލަމުންނެވެ. އަބޫ ޢަބްދުﷲގެ ވަފާތެރިންގެ ގޭގޭދޮށުގައި ހުރީ ބައްތި ދިއްލައިފައެވެ. އެ ގޭގެއަށް މުޒާހިރާކުރާ މީހުން ގެންދިޔައީ ގައު އުކަމުންނެވެ. ޢިލްމުވެރިންގެ ވަރަށް ގިނަ ބަޔަކު ތިބީ މުޒާހިރާކުރާ މީހުންނާ އެކުގައެވެ. ޢިލްމުވެރިންގެ ތެރޭގައި ހިމެނޭ މުނާފިގުވައްތަރުގެ މީހުން މިސްކިތަށް އަރައިތިބެ އަބޫ ޢަބްދުﷲގެ އުމުރު ދިގުކުރައްވާތޯ ދުޢާކުރަމުން ގެންދަނީއެވެ. ޒުވާން ދަރިވަރުން ނުކުމެ، އެފަދަ މުނާފިގުން މިސްކިތުން ނެރެ ތަޅައި އަނިޔާކޮށް އެބަހަދައެވެ. ފިރިހެނުންނެކޭ އެއްފަދައިން އަންހެނުންވެސް ރަށު ތެރެއަށް ނުކުމެ މުޒާހިރާކުރަމުން އެބަ ގެންދެއެވެ. އެ އަންހެނުންގެ ތެރޭގައި ގްރަނާދާގެ މީހުންގެ އިތުރަށް ބޭރުން އަރައި ހިމާޔަތަށް އެދިތިބި އަންހެނުންވެސް ހިމެނެއެވެ. އެމީހުން ގެންދަނީ މަލަޚާއާއި ބީޣާގައި ކްރިސްޓިއަނުން އިސްލާމުންނަށް ކުރަމުން ގެންދާ އަނިޔާގެ ވާހަކަތައް ރައްޔިތުންނަށް ކިޔައިދެމުންނެވެ.
ތިން ދުވަސް ވާންދެން އަބޫ ޢަބްދުﷲ އުފާ ފާޅުކުޅައެވެ. އެ ތިން ދުވަހު އަލްޙަމްރާގެ ހަތަރުފާރު ވެގެން ދިޔައީ ޚިޔާނަތްތެރީންގެ ހުނުމާއި އާއްމު ރައްޔިތުންގެ އާހާ ދެމެދު ލެވިފައިވާ ހުރަހެއް ކަމުގައެވެ. އެ ތިން ދުވަހު އަލްޙަމްރާގައި ރާ ތަށިތައް ދައުރުވަމުން ދިޔައިރު ރައްޔިތުންގެ ލޮލުން ދިޔައީ ލޭކަރުނަ ފައިބަމުންނެވެ. ހަތަރުވަނައަށް ވީ ދުވަހު އަބޫ ޢަބްދުﷲ އިނީ ފެރްނާންދޯގެ ސިޓީއެއް ކިޔާށެވެ.
[އަޅުގަނޑަށް ޚަބަރު ލިބެމުންދާ ގޮތުގައި ގްރަނާދާގެ ރައްޔިތުން ތިބީ މަނިކުފާނާ ރުހިގެންނެއް ނޫނެވެ. އަނެއްކޮޅުން ރަށަށް ބާޣީން އަރަމުންދާ ކަމަށްވެސް ވަނީ އެނގިފައެވެ. އެހެންވީމާ އިސްލާމުންނާއި ކްރިސްޓިއަނުންނާ ދެމެދު އެހެން ހަނގުރާމައެއް ނުކޮށް ފަރުޖެއްސޭނޭ ގޮތެއް ކަމަށް ފެންނަނީ މަނިކުފާނު އަޅުގަނޑާ ގްރަނާދާ ހަވާލުކުރެއްވުމެވެ. މި ސިޓީގެ ޖަވާބުގައި އަޅުގަނޑު އަހަން ބޭނުންވަނީ އެންމެ ވާހަކައެކެވެ. އެއީ އަޅުގަނޑުމެންގެ ލަޝްކަރަށް ގްރަނާދާގެ ދޮރާށި ބަންދުނުކުރައްވާނޭ ވާހަކައެވެ. އެހެން ނޫން ނަމަ އަޅުގަނޑަށް ޖެހޭނީ ބާރުގެ ބޭނުންކުރާށެވެ. ގްރަނާދާއަށް ގޮސް އަޅުގަނޑު މަނިކުފާނުގެ ކުރިމަގު އޮންނާނޭ ގޮތެއް ނިންމާނަމެވެ. އަޅުގަނޑުގެ ފަރާތުން ހެޔޮކަމަށް އެދިވަޑައިގަންނަވާނަމަ ޖެހިވަޑައިގަންނަވާނީ އެއްވެސް ޝަރުތަކާ ނުލައި ކިޔަމަންތެރިކަން އަދާކުރައްވާށެވެ.]
އަބޫ ޢަބްދުﷲ ފަދައިން އެ ވަގުތު އެތާނގައި ތިބި އަމީރުންގެވެސް މަސްތު ފިލައި ހިނގައްޖެއެވެ. އެންމެންމެ ދެ ލޯ ބޮޑުގެން އެކަކު އަނެކަކާ ދިމާއަށް ބަލާން ފަށައިފިއެވެ. އަލްޙަމްރާގެ މާހައުލަށް މާޔޫސުކަން ވެރިވެއްޖެއެވެ.
އަބޫ ޢަބްދުﷲ، ފެރްނާންދޯގެ މަންދޫބާ ދިމާއަށް ބަލައިލައިފައި ބުންޏެވެ. [ދެ ދުވަހެއްގެ ތެރޭގައި އަހަރެމެންގެ ޖަވާބު ފެރްނާންދޯ ރަސްގެފާނަށް ލިބިވަޑައިގެންފާނެއެވެ.]
އަބޫ ޢަބްދުﷲގެ ބޮޑު ވަޒީރު، ޠަރީފް ބިން މާލިކަކީ ބަރްބަރީ ގަބީލާއެއްގެ އިސްވެރިއެކެވެ. އޭނާ ތެދުވެވަޑައިގެން ވިދާޅުވިއެވެ. [ފެރްނާންދޯއަށް އަޅުގަނޑުމެންނާ ބެހޭ ގޮތުން ކުށް ހީފުޅެއް ކުރެއްވުނީކަން ޔަގީނެވެ. އެ ކުށް ހީފުޅު ދުރުކުރެވިދާނެއެވެ. މަނިކުފާނު އަމުރުފުޅު ދެއްވައިފިނަމަ އަޅުގަނޑު މިހިރީ ފެރްނާންދޯގެ އަރިހަށް ދާން ތައްޔާރަށެވެ.]
އެހެން އަމީރަކު ތެދުވެ ބުނެފިއެވެ. [ފެރްނާންދޯ އަޅުގަނޑުމެންނަށް ދައްކަވައިފައި އެ އޮތީ އެންމެ ދެ މަގެކެވެ. އެއް ގޮތަކީ އޭނާގެ އަމުރުފުޅު ތަންފީޒުކޮށް، ގޭގެއަށް ގޮސް އެ ވަހުޝީންގެ އިންތިޒާރުގައި ތިބުމެވެ. އެ ނިންމެވުމުގެ ފުރަތަމަ ބޭނުންފުޅަކީ އަޅުގަނޑުމެންގެ އަނބިދަރީންގެ ހުރުމަތް ކަނޑުއްވައިލެއްވުމެވެ. ދެވަނަ މަގަކަށް އޮތީ އިއްޒަތާއި އަބުރާއެކު މަރުވާން ތައްޔާރުވުމެވެ.]
ތިންވަނަ މީހަކު ތެދުވެއްޖެއެވެ. [ހަނގުރާމައަކީ މަރުވާން ރުހުންފަދަ ކަމެކެވެ.]
އަބޫ ޢަބްދުﷲއަށް ކުއްލިއަކަށް އައު ބުއްދިއެއް ކުރެވިއްޖެއެވެ. އޭނާ އުއްމީދީ ރާގަކަށް ބުނެފިއެވެ. [ޠަރީފެވެ. އަބޫ ދާވޫދްގެ އަރިހަށް ވަޑައިގަންނަވާށެވެ. މި ވަގުތު އަޅުގަނޑުމެންނަށް ހެޔޮ މަގެއް ދެއްކެވޭނޭ ބޭފުޅަކީ ހަމައެކަނި އެއީއެވެ. ފެރްނާންދޯގެ ހިތްޕުޅުގައި އަޅުގަނޑުމެންނާމެދު ކުށް ހިއެއް އުފެދިފައިވާނަމަ އެ ހިއެއް ފިލުއްވައިލެއްވޭނީވެސް އޭނާއަށެވެ. ފެރްނާންދޯ މިހާރު ވަނީ އޭނާއަށް ލޮއްޚާގެ ވެރިކަން ދެއްވައިފައެވެ. އަވަހަށް އޭނާގެ އަރިހަށް ވަޑައިގަންނަވާށެވެ.]
ކުޑައިރުކޮޅެއް ފަހުން ޠަރީފް ލޮއްޚާއާ ދިމާއަށް މިސްރާބު ޖައްސަވައިފިއެވެ.
(2)
އަބޫ ދާވޫދަށް ޠަރީފް ފެނުމާއެކު ކޮން ބޭފުޅެއްކަން އެނގިއްޖެއެވެ. އެހެންވީމާ ހޫނު މަރުހާބައެއްކިޔުން ކީއްކުރަންތޯއެވެ؟ އެންމެ ކުޑަމިނުން ތެދުވެ ސަލާންކޮށްލުމަކީވެސް ކުރަންޖެހޭ ކަމެއް ކަމަކަށް އޭނާއަކަށް ނުފެނުނެވެ. އޭނާ ކުޅަހައިވެސް ކަމަކީ ކުރިމަތީގައި ހުރި ހުސް ގޮނޑިއަކަށް އިޝާރަތްކޮށްލުމެވެ.
ޠަރީފް އެ ގޮނޑީގައި އިށީނދެވަޑައިގަތުމަށް ފަހު ޖެހިލުންވެވަޑައިގެން ހުންނަވައި ވިދާޅުވިއެވެ. [އަޅުގަނޑު މި އައީ އަބޫ ޢަބްދުﷲ ފޮނުއްވީމައެވެ.]
އަބޫ ދާވޫދް ބުންޏެވެ. [ތިޔަ އައީ އަހަރެންގެ ލަފައެއް ހޯދާންކަން ދެނަހުރީމެވެ.]
[އެހެން… އެހެންވީމާ ފެރްނާންދޯ އަޅުގަނޑުމެންނަށް ވެވަޑައިގަތް ވައުދުފުޅަށް ޣަދަރުވެރިވެވަޑައިގެންފިކަން މަނިކުފާނަށް އެނގިވަޑައިގެންފިތޯއެވެ؟]
އަބޫ ދާވޫދް ބުންޏެވެ. [ގަވަރުނަރެއްގެ ހައިސިއްޔަތުން އަހަރެންގެ ރަސްގެފާނާ ދެކޮޅަށް ދައްކާ އެއްވެސް ވާހަކައެއް އަހަރެން އަޑެއް ނާހާނަމެވެ. އަދި އޭނާގެވެސް ރަސްގެފާނުގެ އަމުރުފުޅާ ޚިލާފުވާކަށް އަހަރެން އަބޫ ޢަބްދުﷲއަކަށް މަޝްވަރާއެއްވެސް ނުދޭނަމެވެ.]
[އަޅުގަނޑު އައީ މަނިކުފާނަކީ އިސްލާމަކު ކަމަށް ހީކޮށްގެންނެވެ. މަނިކުފާނަކީ ގްރަނާދާއަށް ހެޔޮއެދިވަޑައިގަންނަވާ ބޭފުޅެކެވެ. ލޮއްޚާގެ ގަވަރުނަރަކަށް ވާތީ، މަނިކުފާނު ހިމެނިވަޑައިގަންނަވަނީ ގްރަނާދާގެ ވެރިކަމުގެ ދަށުގައި މަސައްކަތްކުރައްވާ ގަވަރުނަރުންގެ ތެރޭގައެވެ. މިއީ އަޅުގަނޑުމެންގެ ސަހަރެކެވެ. އަޅުގަނޑު މި އައީ މި ވަގުތު ކަންކުރަންވީ ގޮތެއް އޮޅުންފިލުވާން ވެގެންނެވެ.]
އަބޫ ދާވޫދް ބުންޏެވެ. [އާއްމު ގޮތެއްގައި ބާރުގަދަ މީހުންގެ ކުރިމަތީގައި ބާރެއް ނެތް މީހުން ކިޔަމަންތެރިކަން އަދާކުރަނީ އެއްވެސް ޝަރުތަކާ ނުލައެވެ. އަބޫ ޢަބްދުﷲއަށް އަހަރެން ދޭން އޮތް ލަފައަކީ ފެރްނާންދޯގެ ހެޔޮފުޅުކަން ގަބޫލުކޮށް އަމުރުފުޅަށް ބޯ ލަނބާށެވެ.]
[ފެރްނާންދޯ އަޅުގަނޑުމެންނަށް މަކަރެއް ނުހައްދަވާނޭކަމަށް އެތައް ފަހަރަކު އަބޫ ޢަބްދުﷲއަށް މަނިކުފާނު ދެންނެވީ އަޅުގަނޑުގެ ކުރިމަތީގައެވެ. އެއީ ވެރިކަން ފުޅާކުރެއްވުމުގެ އެދުންފުޅުގައި އުޅުއްވާ ބޭފުޅެއް ނޫން ކަމަށާއި އަޅުގަނޑުމެންނަށް ހެޔޮއެދިވަޑައިގަންނަވާ ބޭފުޅެއް ކަމަށްވެސް ތަކުރާރުކޮށް ވިދާޅުވީމުއެވެ. އައްޒަޣަލް ބަލިކުރެއްވުމަށް ފަހު ގްރަނާދާގެ މުޅި ސަރަހައްދުގެ ވެރިކަން އަބޫ ޢަބްދުﷲއަށް ދެއްވާނެއޭ ވިދާޅުވީވެސް މަނިކުފާނެވެ. އެ ވަޢުދުފުޅަށް ވީ ކިހިނެއްތޯއެވެ؟ ލޮއްޚާގެ ގަވަރުނަރުކަމުގެ އެދުންފުޅުގައި ތިމަން މަނިކުފާނަކީވެސް އިސްލާމެއްކަން މަނިކުފާނުގެ ހަނދުމަފުޅުން ފިލައިގެން ދިއުމަކީ ވަރަށް ދެރަ ކަމެކެވެ. ގްރަނާދާއަށް ކްރިސްޓިއަން ލަޝްކަރު ވަދެއްޖެނަމަ، މަލަޚާގެ އަހުލުވެރިންނަށް ޖެހުނު ނިކަމެތި ހާލަށްވުރެ ދަތި ހާލެއްގައި އަޅުގަނޑުމެން ޖެހޭނޭކަން މަނިކުފާނަށް އެނގިވަޑައިނުގަންނަވަނީތޯއެވެ؟]
އަބޫ ދާވޫދް ފަރުވާކުޑަ ގޮތަކަށް ބުނެލިއެވެ. [އަހަރެން އަދާކުރީ އަބޫ ޢަބްދުﷲއާއި ފެރްނާންދޯއާ ދެމެދުގެ މަންދޫބެއްގެ ދައުރެވެ.]
[ނޫނެކެވެ. މަނިކުފާނު އަދާކުރެއްވީ ފެރްނާންދޯގެ ދޮގު ވަޢުދަށް އިތުބާރު ކުރެއްވުމަށް އަބޫ ޢަބްދުﷲއަށް ވަސްވާސް ދެއްވުމުގެ ދައުރެވެ.]
އަބޫ ދާވޫދް ބުންޏެވެ. [އަބޫ ޢަބްދުﷲ ފަދައިން ނުބައި ކަމެއް ކުރެވުމަކީ އަހަންނަށް ނުކުރެވޭނޭ ކަމަކީ ހެއްޔެވެ؟ އޭރު ކަލޭމެން އެންމެން ތިބީ އަހަންނަށް ތާއީދުކޮށްގެންނެއް ނޫން ހެއްޔެވެ؟ ކަލޭމެން ހަލާކުން ސަލާމަތްވާން ބޭނުމިއްޔާ އަބޫ ޢަބްދުﷲ ވެރިކަމުން ބާލައި ދުރުވިސްނޭ މީހަކު ގްރަނާދާގެ ވެރިކަމަށް އަރުވާކަށް ނުވޭ ހެއްޔެވެ؟ ކްރިސްޓިއަނުންގެ ބަދަލުހިފުމުން ސަލާމަތްވާން އޮތް ހަމައެކަނި ގޮތަކީ ކަލޭމެންގެ މަންދޫބަކު ގޮސް، އެ މީހުންގެ ކިޔަމަނުގައި ތިބޭނޭ ކަމުގެ ފުރިހަމަ ޔަގީންކަން ދިނުމެވެ.]
ޠަރީފް ސުވާލުކުރެއްވިއެވެ. [ގްރަނާދާގެ ރައްޔިތުން އެދި ދަންނަވައިފިނަމަ ވެރިކަމާ ހަވާލުވެ ވަޑައިގަންނަވާން މަނިކުފާނު ވަޑައިގެންފާނަންތޯއެވެ؟]
[އެ މީހުންނަށް ޚިދުމަތެއް ކުރެވިދާނޭ ކަމުގެ ޔަގީންކަން އަހަންނަށް ލިބުނީމާ މީހަކު ނޭދުނަސް ހިނގައިދާނަމެވެ.]
[އެކަމަކު އަޅުގަނޑަށް އެނގިފައިވާ ގޮތުގައި މަނިކުފާނުގެ ބެއްލެވުމުގެ ދަށުގައި ލޮއްޚާގައި ތިބި އިސްލާމުންވެސް ތިބީ އިސާހިތަކު މަރައިލަފާނޭކަމަށް ބިރުންނެވެ.]
[އެއީވެސް އެ މީހުން އަދިވެސް ހެޔޮހިތުން އަހަރެންގެ ވެރިކަން ގަބޫލުނުކުރާތީ ވެގެން އުޅޭ ގޮތެކެވެ. އެހެންވީމާ އަހަރެން މި އުޅެނީ ހިތްހަމަޖެހުމާއެކު އެމީހުންނާ ބެހޭ އެއްވެސް ވާހަކައެއް ފެރްނާންދޯއަށް ނުދެންނެވިގެންނެވެ.]
ޠަރީފް ތެދުވެވަޑައިގެންފިއެވެ. [އެހެންވީމާ މަނިކުފާނު ތިޔަ ވިދާޅުވަނީ ގްރަނާދާގެ ހުރިހައި އިސްލާމުން އެއްބައިވެ، މިހާރު ވެރިކަމުގައި ހުންނެވި ބޭފުޅާ ވެރިކަމުން ދުރުކޮށް، ފެރްނާންދޯއަށް ޖާސޫސުކޮށްދޭނޭ މީހަކު ވެރިކަމަށް އައްޔަން ނުކުރަނީސް އިސްލާމުން ސަލާމަތްވާނޭ މަގެއް ނެތްކަމަށްތޯއެވެ؟]
ޔަޜީފް ހީފުޅުކުރެއްވި ގޮތާ ޚިލާފަށް އަބޫ ދާވޫދް ހަމަޖެހިލައިގެން އިނދެ ޖަވާބުދިނެވެ. [މި ކަހަލަ ދަނޑިވަޅުތަކުގައި ޖަޒުބާތީވެގެން ކުރާނޭ ފައިދާއެއް ނޯންނާނެއެވެ. އަހަރެން މިއީ ފެރްނާންދޯގެ ޖާސޫސެއް ކަމަށް ބަލާށެވެ. ކަލޭވެސް ތިޔައީ އޭނާގެ ޚިދުމަތުގައި ތެޅުނު މީހެއް ނޫންހެއްޔެވެ؟ އަމިއްލަ ހިތް ކޮނެލައިގެން ބަލައިބަލާށެވެ. އަބޫ ޢަބްދުﷲގެ ބަދަލުގައި ކަލޭ ވެރިކަމުގައި ހުރިނަމަ ގްރަނާދާގެ ރައްޔިތުންނަށް މާ ރަނގަޅުވީހޭ ހިތަކަށް ނާރާހެއްޔެވެ؟]
[ނާރައެވެ. އަހަރެން އަބޫ ޢަބްދުﷲއަށް ޚިޔާނަތްތެރިއެއް ނުވާނަމެވެ.]
[ވަރަށް ރަނގަޅެވެ. އެކަމަކު ތިޔައީ ގްރަނާދާއަށް ބަލާއިރު އެންމެ ގާބިލު ވެރިއަކީ އަބޫ ޢަބްދުﷲކަމަށް ގަބޫލުކުރުމެއް ނޫނެވެ. ތިޔައީ ބޮޑު ވަޒީރުކަމަށް ފަސޭހަކަމާއެކު ދެވޭނީ އަބޫ ޢަބްދުﷲ ކަހަލަ މީހަކު ރަސްކަމަށް އިސްވީމާ ކަމަށް ކަލެއަށް ފެންނާތީ ގަބޫލުކޮށްގެން އުޅޭ ގޮތެކެވެ. އަބުލްޙަސަން ނުވަތަ އައްޒަޣަލް ފަދަ ބޭފުޅެއްގެ ރަސްކަމުގައި ބޮޑު ވަޒީރުކަމާ ހަމައަށް ދެވިދާނޭ ކަމަށް ގަބޫލުކުރިނަމަ، އެމީހުންނަށް ޚިޔާނާތްތެރިއެއް ނުވީހެވެ. ބޮޑު ވަޒީރުކަން ހޯދާން ވެގެން އަބޫ މޫސާ ކަހަލަ މީހަކު ގަތުލުކުރުވި މީހަކު ދައްކަން ތިޔައީ ރަނގަޅު ވާހަކައެއް ނޫނެވެ. އޭނާ ގަތުލުކުރުވީ އޭނާ ދިރިހުއްޓައި ތިޔަ މަގާމާ ހަމައަށް ނުދެވޭނެކަން އެނގޭތީ ނޫންހެއްޔެވެ؟ އޭނާއަކީ ގްރަނާދާގެ ބޮޑު ވަޒީރުކަމަށް ގެންނަން އެންމެ ރަނގަޅު މީހާކަން ނުދަންނަ އެއްވެސް މީހަކު ގްރަނާދާގައި އެބައުޅޭ ހެއްޔެވެ؟ އަހަރެންގެ އެކުވެރިޔާއެވެ. އަހަރެމެން ދެމީހުންގެ ކުރިމަތީގައިވެސް އޮތީ އަމިއްލަ އެދުމެވެ. ކަލޭ ތިޔަހަރީ އަމިއްލަ އެދުން ފުއްދާން ވެގެން އަބޫ ޢަބްދުﷲގެ ބައިވެރިއަކަށް ވެގެންނެވެ. އަހަރެން މިހިރީ އަހަރެންގެ އަމިއްލަ އެދުން ފުއްދާންވެގެން ފެރްނާންދޯއަށް ބައިއަތު ހިފައިގެންނެވެ. މިހާރުވެސް ކަލޭ ތިޔަ ބިރުގަންނަނީ ގްރަނާދާ ހަލާކުވެގެން ހިނގައިދާނެތީއެއް ނޫނެވެ. ބިރުން ތިޔަ އުޅެނީ އަބޫ ޢަބްދުﷲ ރަސްކަމުން ބާލައިފިނަމަ ކަލޭގެ ބޮޑު ވަޒީރުކަން ގެއްލިދާނެތީއެވެ.]
ޠަރީފް ކޯފާގެ ރާގެއްގައި ވިދާޅުވިއެވެ. [ކަލެއަކީ ބޮޑު ޝައިޠާނެކެވެ.]
އަބޫ ދާވޫދްގެ ތުންފަތް މައްޗަށް ފުރަތަމަ ފަހަރަށް ހިނިތުންވުމެއް ވެރިވިއެވެ. [ކުޑަ ޝައިޠާނަކު ބޮޑު ޝައިޠާނާގެ ވަރުގަދަކަމަށް އިއުތިރާފުވަނީ ހެއްޔެވެ؟] ދެން އޭނާގެ ރާގަށް ސީރިއަސްކަން އަތުވެއްޖެއެވެ. [ޠަރީފެވެ. ކަލޭ ކަންބޮޑުވާނޭ ކަމެއް ނެތެވެ. ކަލޭގެ އަމާޒަކަށް އޮތީ ބޮޑުވަޒީރުކަމެވެ. އެ މަގާމުގައި ދެމިހުރެވޭނީ އަބޫ ޢަބްދުﷲ ރަސްކަމުގައި ދެމިހުރީމާ ކަމަށް ހީކުރެވެންޏާ އެއީ ކުށް ހިއެކެވެ. ގްރަނާދާގެ ވެރިއެއްކަމުގައި ފެރްނާންދޯ ހަމަޖައްސަވާން ގަސްތުކުރައްވަނީ ކާކުކަމެއް އަދި އަހަންނަކަށް ނޭނގެއެވެ. އެކަމަކު ވަގުތު ޖެހުނީމާ ބޮޑު ވަޒީރުކަމަށް އެންމެ އެކަށީގެންވާ މީހަކީ ކަލެއޭ އަހަރެން ދަންނަވައިފާނަމެވެ. ފެތެމުންދާ އޮޑިއަކަށް ނާރައި، އެފަދަ އޮޑިތައް ފެތުމާއި ސަލާމްވުމުގެ މަގު ކޮށައިދޭ މީހާއަށް ތާއީދުކުރުން ކިހިނެއް ވާނެހެއްޔެވެ؟ ގްރަނާދާގެ ރަސްކަލަކަށް ވާންވެސް އަދި ވަޒީރަކަށް ވާންވެސް ފެރްނާންދޯގެ ރުހުން ބޭނުންވާނޭކަން މިހާރު ކަލެއަށް އޮންނާނީ އެނގިފައެވެ. ބޮޑު ވަޒީރުކަމުގައި ހުންނާން އޭނާގެ ރުހުން ހޯދުމަކީ އުނދަގޫ ކަމެއް ނޫނެވެ. އަހަރެން މި ހުންނަނީ ހައިރާންވެފައެވެ. އަބޫ މޫސާ ފަދަ މީހަކު ގަތުލުކުރެވުނީމާ ދެރަނުވި މީހަކު އަބޫ ޢަބްދުﷲ ކަހަލަ މޮޔައަކު ފެރްނާންދޯއާ ހަވާލުކުރާން ޖެހުނީމާ ދެރަވެގެން އުޅޭ ސަބަބެއް އަހަންނަކަށް ނޭނގެއެވެ.]
ޠަރީފް ވިދާޅުވިއެވެ. [ކްރިސްޓިއަނުން ވައުދާ ޚިލާފުވާނެއެކޭ އަހަރެން ޣައްދާރަކަށް ވީއިރު ހިތަކަށް ނާރައެވެ. މަލަޚާގައި އަހަރެމެންގެ އަޚުންނާއި އުޚުތުންނަށް ޖެހުނީ ނިކަމެތި ހާލުގެ މަތީން އަހަރެން ހަނދާން ނައްތައިލާނޭ ކަމަށް ހީކުރާނަމަ އެއީ ވަރަށް ބޮޑު ކުށް ހިއެކެވެ.]
[އަނެއްކާވެސް ތިޔަ ޖަޒުބާތުގައި ޖެހެނީއެވެ. މަލަޚާގައި އައްޒައިޣަރީ ފުރަތަމަވެސް ހަތިޔާރު ބެހެއްޓިނަމަ ކްރިސްޓިއަނުން އިސްލާމުންނާމެދު ކަންތައް ކުރި ގޮތަކަށް ނުކުރީހެވެ.]
ޠަރީފް ވިދާޅުވިއެވެ. [ދެން އަހަރެން ދަނީއެވެ.]
އަބޫ ދާވޫދް ކޮޅަށް ތެދުވެ ސަލާންކޮށްލުމަށްޓަކައި އަތްދިއްކޮށްލިއެވެ. އެކަމަކު ޠަރީފްގެ ހިތްޕުޅަށް ވެރިވީ ޚިޔާލުފުޅަކާއެކު ސަލާމަތް ދިއްކޮށްލެއްވި އަތްޕުޅު ދަންމަވައިގެންފިއެވެ. [ނޫނެކެވެ. މިއަދުން ފެށިގެން ދެ މީހުން ދާނީ ދެ މަގަކުންނެވެ.]
އަބޫ ދާވޫދް ގޮނޑީގައި އިށީނދެ ހަމަޖެހިލައިފިއެވެ. [އެންމެ ރަނގަޅެވެ. ކަލެއަށް ފެންނަ މަގަކުން ދާށެވެ. އެކަމަކު އެގޮތް މިގޮތަށް ތެޅި ވަރުބަލިވެގެން އެންމެ ފަހުން އަންނާނީ އަހަރެންގެ ގާތަށްކަން އަހަންނަށް އެނގެއެވެ. ކަލޭ އަމިއްލަ ނަފުސަށް މަކަރުހަދާން ބޭނުން ނޫނިއްޔާ އަބޫ ޢަބްދުﷲ ގާތަށް ދިއުމުގެ ބަދަލުގައި ކަލޭ ދާނީ ފެރްނާންދޯގެ އަރިހަށެވެ.]
ޠަރީފް ނުކުމެވަޑައިގަންނަވާން ދޮރާ ހަމައަށް ވަޑައިގަތުމަށް ފަހު ހުއްޓިވަޑައިގެން އަބޫ ދާވޫދާ ދިމާއަށް ބައްލަވައިލެއްވުމަށް ފަހު ނުކުމެވަޑައިގެންފިއެވެ.
ޠަރީފް ނުކުމެވަޑައިގަތީމާ އަބޫ ދާވޫދް އިރުކޮޅެއް ވާންދެން ވިސްނާން އިނުމަށް ފަހު އަތްތިލަބަޑިއެއް ޖަހައިލިއެވެ. އެޔާއެކު ނޯކަރަކު އައިސް އޭނާގެ އަމުރެއްގެ އިންތިޒާރުގައި އިސްދަށަށް ޖަހައިގެން ހުރެއްޖެއެވެ.
[ފުލުހުންގެ ވެރިޔާގެ ގާތަށް ދާށެވެ. ގައިބާރު ހުރި، ކުޅަދާނަ، ހުނަރުވެރި ހަތަރު ފަހުލަވާނުން އަހަރެން ވަރަށް އަވަހަށް ބޭނުމޭ އޭނާ ގާތު ބުނާށެވެ.]
ނޯކަރު އެނބުރި ދިޔައީމާ އަބޫ ދާވޫދް ކަރުދާހާއި ގަލަން ނަގައި، ސިޓީއެއް ލިޔާން ފަށައިފިއެވެ.
ކުޑައިރުކޮޅެއް ފަހުން ހަތަރު އޮފްސަރަކު އައިސް އެތަނަށް ވަދެއްޖެއެވެ. ސިފައިން ކަމުގައި ވިޔަސް އެމީހުން އަޅައިގެން ތިބީ ކްރިސްޓިއަން ހެދުމެވެ. އަބޫ ދާވޫދް އޭނާ ލިޔުނު ސިޓީ ކިޔައިލުމަށް ފަހު އެމީހުންނާ ދިމާއަށް ބަލައިލިއެވެ. [ގްރަނާދާއިން އައި މަންދޫބު އަހަރެމެންގެ މެހުމާނުޚާނާގައި ހުންނާނެއެވެ. އޭނާ މިހާރު ގެންދާނީ ދަތުރަށް ތައްޔާރުވަމުންނެވެ. ކަލޭމެން އޭނާގެ ފަހަތުން ދާށެވެ. އޭނާގެ މިސްރާބު ހުރީ ގްރަނާދާއަށްކަން ނުވަތަ މަލަޚާއަށްކަން ޔަގީންވާންދެން ފަހަތުން ދާންވާނެއެވެ. މަލަޚާއާ ދިމާއަށް ދާނަމަ އެއީ އަހަރެމެންގެ ރަސްގެފާނުގެ އެކުވެރިއެއްކަމުގައި ބަލާށެވެ. އެހެން ވެއްޖެނަމަ، ކަލޭމެންގެ ތެރެއިން އެކަކު އަހަރެންގެ މި ސިޓީ ހިފައިގެން އޭނާޔާއެކު ނުވަތަ އޭނާގެ ފަހަތުން މަލަޚާއަށް ދާށެވެ. އަނެއް ތިން މީހުން އެނބުރި އަންނާށެވެ. އޭނާ ދަނީ ގްރަނާދާއަށް ކަމުގައި ވަނީނަމަ އެއީ އަހަރެމެންގެ ރަސްކަމަށް ހުރި ވަރަށް ބޮޑު ނުރައްކަލެކެވެ. އެހެންވީމާ ކަލޭމެންގެ ވާޖިބަކަށް ވާނީ ކަލޭމެންގެ ފުރާނަ ނުރައްކަލުގެ ތެރެއަށް ހުށަހަޅައިގެން ނަމަވެސް އޭނާއަށް ގްރަނާދާއަށް ދިޔަނުދީ ހިފެހެއްޓުމެވެ. އޭނާޔާއެކު ދާނީ އެންމެ ފަސް މީހުންނެވެ. ކަލޭމެން ދާއިރު ރަނގަޅަށް އަމާޒަށް ތީރުޖަހަން ދަންނަ ދެތިން ތީރުވެރިންވެސް ގެންދާށެވެ. އޭނާގެ ބައިވެރިންނަށް، ކަމެއް ވެއްޖެކަން އެނގޭއިރު ތީރު ހުންނާން ވާނީ މަންދޫބުގެ މޭ ފޫއަޅުވައި ބޭރަށް ނުކުމެފައެވެ. މަޖުބޫރުވެގެން ނޫނީ އޭނާޔާއެކު ދާ މީހުން ގަތުލުނުކުރާށެވެ. އެޔަށް ފަހު ކަލޭމެންގެ ތެރެއިން އެކަކު މި ސިޓީ ހިފައިގެން މަލަޚާއަށް ގޮސް ރަސްގެފާނަށް އަރުވާށެވެ. އަދި ހިނގައިދިޔަ ކަންތައްތަކުގެ ޚަބަރުވެސް ތަފުސީލުކޮށް ދަންނަވާށެވެ. އަވަހަށް ދާށެވެ. ޠަރީފް ދަތުރަށް ނުކުތަސް އަދި މާ ދުރަކަށް ނުދެވޭނެއެވެ.]
(3)
ލޮއްޚާއިން ނުކުމެވަޑައިގަތުމަށް ފަހު އެތައް ކޯހެއްގެ ރާސްތާ ކަޑައްތުކުރެއްވޭންދެން ޠަރީފް، އޭނާގެ ބައިވެރިންނަކާ އެއްވެސް ވާހަކަފުޅެއް ނުދައްކަވައެވެ. ރޭގަނޑު އޭނާ، ބައިވެރިންނާއެކު ހޭދަކުރެއްވީ މެހުމާނުޚާނާއެއްގައެވެ. މެހުމާނުޚާނާގެ ވެރިއަކީ މޮރޮކޯ ދަރިކޮޅުގެ އިސްލާމެކެވެ. ޠަރީފް އަސްކޮޅުން ފައިބައިވަޑައިގެން ވިދާޅުވިއެވެ. [އަހަރެމެންނަށް ކަމެއް ކޮށްދިނުމުގެ ކުރިން އަހަރެމެންގެ އަސްތަކަށް ކާން ދެވޭނެގޮތް ހަދައިދޭށެވެ. މިރޭގެ ތިންދަން ހޭދަކުރުމަށް ފަހު އަހަރެމެން މިތަނުން ފުރާނަމެވެ.]
މެހުމާނުޚާނާގެ ވެރިމީހާ ބުންޏެވެ. [ތިޔައީ ކޮންމެވެސް އިއްޒަތްތެރި ބޭފުޅަކުކަން ގައިމެވެ. މިތާނގެ އެންމެ ރަނގަޅު ކޮޓަރީގައި ކްރިސްޓިއަނުންގެ ދެ އޮފްސަރަކު އެބަތިއްބެވެ. އެންމެ ރަނގަޅުފުޅު ކަމުގައި ވަނީނަމަ މަނިކުފާނަށްޓަކައި އަޅުގަނޑުގެ ގޭގެ ކޮޓަރިއެއް ހުސްކޮށްފާނަމެވެ. ބާކީ މިތިބަ މީހުންނަށް މެހުމާނުޚާހާނާގައި ކޮޓަރި އެބަހުއްޓެވެ.]
ޠަރީފް ވިދާޅުވިއެވެ. [އަހަރެން ބޭނުންވަނީ ހަމައެކަނި ނިދައިލާށެވެ.]
އޭނާ ބުންޏެވެ. [މިތާނގައި އަވަހާރަފުޅުލައްޕަވާން ދަތިފުޅުވެދާނޭ ކަމަށް އަޅުގަނޑަށް ފެނެއެވެ. މި ދެންނެވި ދެ އޮފްސަރުން ކައިރި ގެއަކަށް ގޮސް ހެސްކިޔައިފައި ރާ ބޮއިގެން އިސާހިތަކު އަތުވެދާނެއެވެ. ރޭގަނޑު ހަތަރުދަމު ތިބޭނީ ނުނިދައެވެ. އަދި އެހެން މީހަކަށް ނިދިޔަވެސް ނުދޭނެއެވެ. ހުރަސް ފާރުގެ އަނެއް ފަރާތުގައި އެހެރީ އަޅުގަނޑުގެ ގެއެވެ. ގޭގައި އޮންނެވިޔަސް އަޑުފައްގަނޑު މަނިކުފާނަށް އިވިވަޑައިގަންނަވާނެއެވެ. އެކަމަކު އަމަލުވެގެން ތިބެ މަނިކުފާނު އޮންނަވާ ކޮޓަރިކޮޅުގެ ދޮރުކޮޅުގައި ތަޅައެއް ނުގަނެވޭނެއެވެ.]
ޠަރީފް ވިދާޅުވިއެވެ. [އެންމެ ރަނގަޅެވެ. ތިޔަ ބުނާ ގޮތަށް އިންތިޒާމުކުރާށެވެ.]
ރޭގަނޑުގެ ފަރީއްކޮޅުން އަވަދިވެވަޑައިގެން އަވަހާރަފުޅަށް އޮށޯވެވަޑައިގަންނަވާން އުޅުއްވަނިކޮށް މެހުމާނުޚާނާއާ ވީ ފަރާތުން އަޑެއް އިވިވަޑައިގެންފިއެވެ. ރަނގަޅަށް އަޑު އައްސަވައިލެއްވީމާ އެއީ އަންހެނެއްގެ ރުއިމާއި އާދޭހުގެ އަޑުކަން އެނގިވަޑައިގެންފިއެވެ. އޭނާ އަވަހަށް މެހުމާނުޚާނާގެ ވެރިމީހާއަށް ވިދާޅުވެގެން ގެންނަވައިފިއެވެ. އޭނާ ކޮޓަރިއަށް ވަދެފައި، ޠަރީފް ސުވާލެއް ކުރެއްވުމުގެ ކުރީން ދަންނަވައިފިއެވެ. [ހީވާ ގޮތުގައި މިރޭވެސް އެ އައީ ކޮންމެވެސް ޝިކާރައަކާއިގެންނެވެ.]
[ތިޔަ ބުނަނީ މީސްމީހުންގެ އަންހެން ދަރިން ގަދަކަމުން މިތަނަށް ގެންނަ ވާހަކަ ހެއްޔެވެ؟]
[ތަނެއް ހިފުނީމާ އެތަނަކަށް ވެރިވާ ބަޔަކީ ނިކަމެތި ރައްޔިތުންގެ ރުހުން ގަދަކަމުން ނަމަވެސް ހޯދަން ދަންނަ ބައެއް ނޫންތޯއެވެ؟]
[އެއްވެސް މީހަކު އެކަމާ ދެކޮޅެއް ނުހަދާ ހެއްޔެވެ؟]
[މި އަވަށުގައި އިސްލާމުން އުޅެނީ ވަރަށް މަދުންނެވެ. އަމިއްލަ ގެ ސަލާމަތްކުރުމުގެ ބޭނުމުގައި އެހެން މީހުންގެ ގެ އަނދަމުންދާތަން ބަލަން އެމީހުން ތިބެނީއެވެ.]
[އެމީހުންގެ ކިބައިގައި އެއްވެސް ކަހަލަ ޣީރަތްތެރިކަމެއް ނެތީހެއްޔެވެ؟]
[ހީވާ ގޮތުގައި މަނިކުފާނު ތިޔަ ވަޑައިގެންނެވީ ކޮންމެވެސް އެހެން ގައުމަކުންނެވެ. އެ ގައުމެއްގެ ރަސްގެފާނު ފިނޑި ހިކަންޖަކަށް ވެފައި އަމީރުން ޣައްދާރުންނަށް ވީމާ ތިޔަ ވިދާޅުވާ ޣީރަތްތެރިކަމުގެ އެއްވެސް މާނައެއް ނޯންނާނެއެވެ.]
ޠަރީފް ކަނޑިކޮޅު ދަންމަވައިގެންފައި ވިދާޅުވިއެވެ. [އެކުވެރިޔާއެވެ. އަހަންނަށް މަގު އޮޅިފައި ހުންނަތާ ދުވަސްކޮޅެއް ވެއްޖެއެވެ. އަހަންނަށް ސީދާ މަގު ދެއްކީތީ ޝުކުރު އަދާކުރަމެވެ.]
ޠާރީފް ވަރަށް ބާރަށް ދުވެވަޑައިގެން، ގެއިން ބޭރަށް ނުކުމެވަޑައިގެންފިއެވެ. ވަޑައިގަތްގޮތަށް ވެދެވަޑައިގަތީ މެހުމާނުޚާނާއަށެވެ. އަންހެންމީހާގެ ރުއިމުގެ އަޑު އަންނަނީ އިމާރާތުގެ އެއްވަނަ ބުރިންނެވެ. ޠަރީފް ސިޑިން އަރައިވަޑައިގެން އެއްވަނަ ބުރީގެ ކޮރިޑޯއަށް ވަޑައިގެން ބާރަށް ވިދާޅުވިއެވެ. [ފިނޑިންނޭވެ! ކަލޭމެން ހީކުރަނީ ކީކޭކަމަށް ހެއްޔެވެ؟] ކޮރިޑޯގެ އެންމެ ކޮޅުގައި ހުރި ކޮޓަރިއެއްގެ ކުޑަދޮރުން ބޭރަށް އަލި ނުކުމެފައި ހުއްޓެވެ. މައި ދޮރު ހުރީ ލައްޕައިފައެވެ. އަންހެންކުއްޖާގެ އަޑު އިވެނީ އެ ކޮޓަރިންނެވެ. [އަޅުގަނޑު ދޫކޮށްލައްވާށެވެ. އަޅުގަނޑަށް ރަހުމުކުރައްވާށެވެ. އަޅުގަނޑު ދިޔަދެއްވާށެވެ.]
ޠަރީފް ކުޑަދޮރުން އެތެރެއަށް ބައްލަވައިލެއްވިއެވެ. އެތެރެއިން ފެނިވަޑައިގަތް މަންޒަރު އަލުން ބައްލަވައިލައްވާކަށްވެސް ކެރިވަޑައެއްނުގަތެވެ. ގައިކޮޅުގައި ހުރިހައި ބާރެއްލެއްވުމަށް ފަހު ކޮނޑުފުޅުން ޖެއްސެވިޖެއްސެވީނުން ދޮރު ވައްޓަވައިލައްވައިފިއެވެ. ރާގެ މަސްތުގައި ތިބި ދެ ވަހުޝީން އަންހެންކުއްޖާ ދޫކޮށްލުމަށް ފަހު ޠަރީފާ ދިމާއަށް އެނބުރިއްޖެއެވެ. އެމީހުންނަށް އެސްފިޔައެއް ޖަހައިލާނޭ ފުރުސަތެއްވެސް ޠަރީފް ނުދެއްވިއެވެ. ފުރަތަމަ ފެނުނީ އެކަކުގެ ބޯ ކަނދުރާއިން ވަކިވެގެން ދިޔަ ތަނެވެ. ދެން ފެނުނީ އަނެއް މީހާގެ ބަނޑު ފޫއަޅުއްވައިލެއްވި ތަނެވެ. ބިރުން އޮތް އަންހެންކުއްޖާ ހިނދުކޮޅަކަށް އެއްވެސް ހަރަކާތެއް ނެތި ބިންމަތީގައި އޮތެވެ. އެޔަށްފަހު އަމިއްލަ ބަރަހަނާ ހަށިގަނޑަށް ބަލައިލިއެވެ. އަދި ހަޅޭއް ލަވަމުން ދުވެފައި ގޮސް ކޮޓަރިން ނުކުމެއްޖެއެވެ. އެ ވަގުތު ޠަރީފްގެ ބައިވެރިންވެސް ކަނޑި ހިފައިގެން އައިސް އެތަނަށް ވަދެއްޖެއެވެ. އަންހެންކުއްޖާ ދުވެފައި ގޮސް އެއްވަނަބުރިން ބިންމައްޗަށް ފުންމައިލައިފިއެވެ. ޠަރީފް ދުވެވަޑައިގަތީ ތިރިއަށެވެ. ބޭރުގައި މެހުމާނުޚާނާގެ ވެރިމީހާވެސް ހުއްޓެވެ. ޠަރީފް އޭނާގެ އަބާކޮޅު ބާއްލުއްވައި އަންހެންކުއްޖާގެ ހަށިގަނޑު ފޮރުއްވައިފިއެވެ. މެހުމާނުޚާނާގެ ވެރިމީހާ އަންހެންކުއްޖާގެ ވިންދު ބަލައިލުމަށް ފަހު ބުނެފިއެވެ. [މި ކުއްޖާފުޅު ދިރިހުރުމުގެ ގައިދުން ސަލާމަތްވެއްޖެއެވެ.]
ޠަރީފް އޭނާގެ ބައިވެރިންނާ ދިމާއަށް ބައްލަވައިލައްވައިފައި ވިދާޅުވިއެވެ. [އަވަހަށް އަސްތަކުގައި އަސްދާނުގޮނޑި އަޅުވައި ދަތުރަށް ތައްޔާރުކުރާށެވެ. އަހަރެމެން ހަމަ މި ވަގުތު ފުރަންވީއެވެ.] ދެން އެނބުރިވަޑައިގަތީ މެހުމާނުޚާނާގެ ވެރިމީހާއާ ދިމާއަށެވެ. [އެ ދެ ވަހުޝީން ގަތުލުކުޅައީ ކާކުހޭ މީހަކު އަހައިފިއްޔާ ބުނާށެވެ. ގްރަނާދާގެ ޣައްދާރު ވަޒީރަކަށް އަނިޔާލިބެމުންދާ އަންހެންކުއްޖަކު ފެނުނީމާ އިސްލާމްދީނަށް އެނބުރިވަނީއެވެ.]
ކުޑައިރުކޮޅެއް ފަހުން މި ކުޑަކުޑަ ގާފިލާ ބޭރަށް ނުކުތްވަގުތު އަށެއްކަ ސަވާރީން އައިސް އެތަނަށް މަޑުކޮށްފިއެވެ. އެތަނުން އެކަކު އަސް ކުޑަކޮށް ކުރިއަށް ޖައްސައިލުމަށް ފަހު އަހައިފިއެވެ. [މަނިކުފާނު މި ވަގުތު މިތާނގައި ކީއްކުރައްވަނީތޯއެވެ؟]
ޠަރީފް ކުޑަކޮށް ހަރުކަށި ރާގަކަށް އައްސަވައިލެއްވިއެވެ. [ކަލޭ ތިޔައީ ކާކުހެއްޔެވެ؟]
[އަޅުގަނޑުމެންނަކީ ސިފައިންނީމުއެވެ. މިރޭ މިތާނގައި މަޑުކޮލާނަމޭ ހިތައި އައީއެވެ. މަނިކުފާނަށް މިތަނުން ކޮޓަރިކޮޅެއް ލިބިވަޑައިނުގަތީތޯއެވެ؟]
[ނޫނެކެވެ. މިތާނގައި ހުސް ކޮޓަރި އެބަހުއްޓެވެ. ދާދި ދެންމެއަކު އަހަރެންވެސް އެއް ކޮޓަރި ހުސްކޮށްފީމެވެ.]
މިހެން ވިދާޅުވެފައި ޠަރީފް އަސްކޮޅު ދުއްވަވައިލެއްވިއެވެ. ދަތުރުމަތީގައި، ދަތުރުގެ އެއް ބައިވެރިއަކު އޭނާޔާ ގާތަށް ޖެހިލުމަށް ފަހު އަހައިލިއެވެ. [ދެންމެ ހިނގި ކަންތައްތަކަށް ފަހުވެސް މަނިކުފާނު ގަސްތުކުރައްވަނީ މަލަޚާއަށް ވަޑައިގަންނަވަންތޯއެވެ؟]
[މަލަޚާއަށް ދާ ވާހަކަ ބުނީ ކާކުހެއްޔެވެ؟]
[މަލަޚާއަށް ދާން ޖެހުމަކީ އެކަށީގެންވާ ކަމެކޭ ވިދާޅުވީމެއް ނޫންތޯއެވެ؟]
ކުޑަ ހިނދުކޮޅަކަށް ފަހު ޠަރީފް ވިދާޅުވިއެވެ. [ޙަސަނެވެ. އަހަރެން މިއީ ގްރަނާދާގެ ޣައްދާރެއް ކަމަށް ކަލޭވެސް ހީކުރަމެއް ނޫންހެއްޔެވެ؟]
ޙަސަން ކުޑަކޮށް ކަންބޮޑުވެފައި ބުނެލިއެވެ. [ތިޔައީ އަޅުގަނޑުމެންގެ ވެރިޔާއެވެ.]
[ނޫނެކެވެ. އަހަންނަށް އެނގެއެވެ. ކަލޭގެ ހިތުގައި އޮތް އެއްޗެއް ބުނަން ދަތިވެގެން އުޅެނީއެވެ. ދިރިއުޅުމުގެ ހިތި މަގުގައި އަހަންނާއެކު ހިނގަން ކަލެއަށް ވަނީ މަޖުބޫރުވެފައެވެ. މިއަދު އަހަރެން ހެޔޮ މަގު ޚިޔާރުކޮށްފިއްޔާ ކަލޭ ހަދާނީ ކިހިނެއް ހެއްޔެވެ؟]
ޙަސަން ކުޑަކޮށް ޖެހިލުންވެފައި އިނދެގެން ބުންޏެވެ. [ޒަމީރުގެ ބުރަކަމުގައި ފިތިގެން ހުރެ ދަތުރުކުރުމާއި އެ ބުރަކަމުން މިނިވަންވެގެން ހުރެ ދަތުރުކުރުމާ ވަރަށް ބޮޑަށް ތަފާތުވާނެއެވެ.]
ޠަރީފް ވިދާޅުވިއެވެ. [ޙަސަނެވެ. ކްރިސްޓިއަނުންނަކީ އަހަރެމެންގެ އެންމެ ބޮޑު ދުޝްމިނުންނެވެ.]
[އަޅުގަނޑުގެ ސާހިބާއެވެ. އަޅުގަނޑުގެ އަދަބުކުޑަ ކަމަށް މާފުކުރައްވާށެވެ. ދަންނަވަންތޯއެވެ؟ އަޅުގަނޑުމެންގެ ދުޝްމިނުންނަކީ ޚުދު އަޅުގަނޑުމެންނެވެ. ވަކި މީހަކީ ތިމާގެ ގާތިލުކަމަށް ގަބޫލުކުރުމަށްފަހު މިވެނި ގޮތަކަށް ތިމަން ގަތުލުނުކުރާށޭ އެމީހަކު ގާތު ބުނާނީ ކިހިނެއްތޯއެވެ؟ އަޅުގަނޑުމެން މިތިބީ އަމިއްލައަށް ހަތަރެސްފައި ބަނދެގެން ދުޝްމިނުގެ ކުރިމަތީގައި އިސްދަށަށް ޖަހައިގެންނެވެ. އަޅުގަނޑުމެންގެ ޚަންޖަރުވެސް އޭނާގެ އަތަށް ދީގެންނެވެ. ދެން އެންމެ އެތިފަރަކުން އަޅުގަނޑުމެން ގަތުލުކޮށްލުމާއި، މަޑުމަޑުން، ލަސްލަހުން، އަޅުގަނޑުމެން ޒަބަޙަކުރުމަކީ އޭނާގެ އިޚްތިޔާރުގައި އޮތް ކަމެކެވެ.]
ޠަރީފް ޖޯޝާއެކު ވިދާޅުވިއެވެ. [ނޫނެކެވެ. އަހަރެމެންގެ ޚަންޖަރުއްތައް އަދި ހުރީ އަހަރެމެންގެ އަތުގައެވެ. އަހަރެމެން ހަނގުރާމަކުރާނަމެވެ. އަބުރުވެރިކަމާއެކު ދިރިއުޅުމުގެ ފުރުސްތު ނުލިބިއްޖެއްޔާ އަބުރުވެރިކަމާއެކު މަރުވެގެން ދާނީއެވެ.]
[ﷲ މަނިކުފާނަށް ހިތްވަރު ދެއްވާށިއެވެ. އެކަމަކު އަބޫ ޢަބްދުﷲ އަޅުގަނޑުމެންނާ ބައިވެރިވާނޭ ކަމަކަށް ނުފެނެއެވެ.]
[އަހަރެމެންނާ ބައިވެރިވާން އޭނާއަށް މަޖުބޫރުވާނެއެވެ.]
ކުޑައިރުކޮޅަކަށް ފަހު ސިހިފައި ޙަސަނު ބުނެފިއެވެ. [އަޅުގަނޑުމެންގެ ފަހަތުން ބަޔަކު އެބައާދެއެވެ.]
ޠަރީފް އަތްޕުޅުން އިޝާރާތްކޮށްލެއްވީމާ އޭނާގެ ބައިވެރިން އަސްތައް މަޑުކޮށްފިއެވެ. ތަންކޮޅެއް ފަހަތުން އަހުގެ ފައިޖެހޭ އަޑު އެބައިވެއެވެ.
ޙަސަން ބުންޏެވެ. [އެވާނީ އަޅުގަނޑުމެންނާ މެހުމާނުޚާނާއިން ބައްދަލުވީ ސިފައިން ކަމުގައެވެ. އަމިއްލަ ފުރާނަ ސަލާމަތްކުރާން ވެގެން އެ ކްރިސްޓިއަނުންގެ ދެމީހުން މަރައިލެއްވީ މަނިކުފާނޭ އޭނާ ބުނީ ކަމުގައިވެސް ވެދާނެއެވެ. އެމީހުން އަޅުގަނޑުމެންގެ ފަހަތުން އެ އަންނަނީ އެހެން ވެގެންނެވެ.]
[ޠަރީފް ވިދާޅުވިއެވެ. [އެމީހުން އަހަރެމެންގެ ފަހަތުން އަންނަތާ ވަރަށް ގިނަ އިރުވެއްޖެއެވެ. ލޮއްޚާއިން ނުކުތް ވަގުތު އަހަރެން އެމީހުން ދުށީމެވެ. އައި މަގުމަތީގައިވެސް ދެތިން ފަހަރަކު ދުށީމެވެ. ކަލޭމެން އެންމެން އެއްފަރާތަކަށް ޖެހި ގަސްތަކުގެ ނިވަލަށް ވަންނާށެވެ.]
ޠަރީފްގެ އަމުރުފުޅަށް ކިޔަމަންވުމުގެ ގޮތުން އެމީހުން ގަސްތަކުގެ ފުރަގަހަށް ވަދެ، ބަލަހައްޓައިގެން ތިބެއްޖެއެވެ. ޠަރީފްވެސް އެއް ފަރާތަކަށް ޖެހިވަޑައިގެންފިއެވެ.
އެ ސަވާރީން އެތަން ފަސްދީ ދިޔައީމާ ޠަރީފް ނުކުމެވަޑައިގެންފިއެވެ. އަދި އެހެން ސަވާރީންވެސް ނުކުމެއްޖެއެވެ.
(4)
ރޭގަނޑުގެ ފުރަތަމަ ދަމުގެ ވަގުތެވެ. ސަވާރީން ދަތުރުކުރަމުން ދިޔަ މަގު ދޫކޮށް ވެލިމަގަކަށް އަނބުރައިލައި ހަނދުވަރުގެ ފަނޑު އަލީގައި ދަތުރު ކުރަމުން އެބަގެންދެއެވެ.
ޠަރީފް އިންނެވީ އަސްކޮޅުގެ މަތީގައި އިސްދަށަށްޖައްސަވައިގެންނެވެ. މަންޒިލާ ގާތްވަމުން ދިޔަވަރަކަށް އޭނާގެ ހިތުޕުޅުގެ ނުތަނަވަސްކަން ދިޔައީ ބޮޑުވަމުންނެވެ. މިހާރު އޭނާ އެ ހުންނެވީ ދެން ހަދާނީ ކިހިނެއް ބާވައޭ ވިސްނައިވަޑައިގަތުމުގެ މަރުހަލާޔާ މާ ދުރަށް ވަޑައިގެންނެވިފައެވެ. އަބޫ ދާވޫދާ ބައްދަލުކުރެއްވުމަށް ފަހު ލޮއްޚާއިން ނުކުމެވަޑައިގަތް ވަގުތު އޭނާގެ ފައިންޕުޅު ތުރުތުރުއެޅިއެވެ. ފުރަތަމަ ވިސްނެވީ ގްރަނާދާއަށް ވަޑައިގެން އަބޫ ޢަބްދުﷲއާ ބައްދަލު ކުރައްވައިފައި ހަނގުރާމަކުރުން ނޫން ގޮތެއް ނެތްކަމަށް ވިދާޅުވާށެވެ. [އަޅުގަނޑުމެން އަމިއްލައަށް ހުޅުވައިލި ދޮރުތަކުން ވަދެގަތް ޠޫފާން މިހާރު މިސްރާބު ޖަހައިފައި ހުރީ އަޅުގަނޑުމެންގެ ގެޔާ ދިމާއަށެވެ. ފެރްނާންދޯގެ ލަޝްކަރު ގްރަނާދާއަށް ވަނީމާ މަނިކުފާނުގެ ރަސްކަމެއްވެސް ނޯންނާނެއެވެ. އަޅުގަނޑުގެ ވަޒީރުކަމެއްވެސް ނޯންނާނެއެވެ. އާއްމު މީހުން ފަދައިން ދިރިއުޅުމުގެ ހައްގުވެސް އަޅުގަނޑުމެންގެ ކިބައިން ނިގުޅައިގަނެވުމަކީ އެކަށީގެންވާ ކަމެކެވެ.] ކަން މިހެން އޮތްނަމަވެސް އަހަރެމެން މިތިބީ ދުޝްމިނުންނާ ހަނގުރާމަކުރެވޭ ފެންވަރެއްގައި ބާވައެވެ؟ އަހަރެމެން ވަނީ ދުޝްމިނުންނަށްޓަކައި އަހަރެމެންގެ އެންމެ ވަރުގަދަ ކިއްލާތަކުގެ ދޮރާށި ހުޅުވައިދީފައެވެ. އަހަރެމެންގެ ހުރިހައި ބަލިފައެއް އެ މީހުންނަށް ރަނގަޅަށް އެނގެއެވެ. އެމީހުންނަށް ބިރުދެއްކުމަކީވެސް މިހާރު އަހަރެމެންނަކަށް ކުރެވޭނޭ ކަމެއް ނޫނެވެ.
އަނެއްކާވެސް ހިތްޕުޅަށް އެރިއެވެ. [ފެރްނާންދޯއަކީ އެހައި ވިޔާނުދާ މީހަކަށް ވެދާނެހެއްޔެވެ؟ އަހަރެމެން އަމިއްލަ ރައްޔިތުންގެ ކުރިމަތީގައި އަގުވެއްޓިގަތީ ކަލެއަށްޓަކައެވެ. އަބޫ މުޙްސިނާއި އައްޒަޣަލާ ހަނގުރާމަކުރީވެސް ކަލެއަށްޓަކައެވެ. ކަލޭގެ ބެލުމުގެ ދަށުގައި އަމާން ދިރިއުޅުމެއް އުޅޭވޭނެކަމަށް އަހަރެމެން ޔަގީންކުރީމެވެ. އަންދަލުސްގެ އަމަންއަމާންކަމަށްޓަކައި އަހަރެމެންގެ ރަސްކަމުގެ ބޮޑު ބައެއް ކަލެޔާ ހަވާލުކުރީމުއެވެ. މިހާރު ތިޔަ އުޅެނީ ގްރަނާދާވެސް އަހަރެމެންގެ އަތުން އަތުލާށެވެ. ކަލެއަކީ އަންދަލުސްގެ ރަސްގެފާނެވެ. ވައުދާ ޚިލާފުވުމަކީ ކަލޭގެ ޝަރަފާއި މަގާމާ އެކަށީގެންވާ ކަމެއް ނޫނެވެ. މުވައްރިޚުން ލިޔާނީ ކީކޭހެއްޔެވެ؟ އަހަރެމެން ކަލެޔަށް އެހީތެރިނުވިނަމަ އަބުލްޙަސަންގެ ފުތޫހާތުގެ އޮއިވަރު ހުއްޓުވުމަކީ ކަލެއަށް ކުރެވޭނޭ ކަމެއް ނޫން ކަމަށް އެއްބަހެއް ނުވާނަން ހެއްޔެވެ؟ އެއްވެސް މީހަކު ކަލެޔާ ދެކޮޅަށް އަޑު އުފުލައިފިނަމަ އަހަރެމެން ގެންދިޔައީ އެމީހަކުގެ ކަރުގައި ހިފަމުންނެވެ. ކަލެޔާ ދެކޮޅަށް ހަތިޔާރު އުފުލި ކޮންމެ މީހަކު ކަތިލައިގެން ގެންގޮސް ކަލޭގެ ފައިބުޑަށް ވައްޓައިލީމެވެ. އަހަރެމެންގެ ޚިދުމަތުގެ އަގު އަދާކުރަން ކަލެއަށް ފެނުނު ގޮތަކީ މަލަޚާގައި އިންސާނިއްޔަތާ ޚިލާފު އެތައް ޖަރީމާއެއް ހިންގި ހިޔަޅުތަކަށްޓަކައި އަހަރެމެންގެ ރަށުގެ ދޮރާށި ހުޅުވައިދޭން އެންގުން ހެއްޔެވެ؟ އަހަރެމެންގެ ކުށަކީ ކޮބައިހެއްޔެވެ؟ ނޫނެކެވެ. ނޫނެކެވެ. މިހާރު މި ވާހަކައަކުން ވާނޭ ފައިދާއެއް ނެތެވެ. މިހާރު ފެރްނާންދޯއަކަށް އަހަރެމެންގެ ބޭނުމެއް ނެތެވެ. މިހާރު އޭނާއަކަށް އަބުލްޙަސަނާއި އައްޒަޣަލްގެ ފަރާތުން ކުރިމަތިވާނޭ ނުރައްކަލެއް ނެތެވެ. އެތައް ގަރުނެއް ވާންދެން އަންދަލުސްގެ މައިދާންތަކުގައި އެބައެއްގެ ދިދަ އުފުލަމުން ދިޔަ މީހުންގެ ފަރާތުން ކުރިމަތިވާނޭ ނުރައްކަލެއްވެސް މިހާރަކު ނެތެވެ. ވެހެމުންދިޔަ ދުނީގެ ވާރެއިން ސަލާމަތްވާން ފެރްނާންދޯ ވަނީ ހިލަތަކުގެ ފުރަގަހަށެވެ. އޭނާޔާ ދެކޮޅަށް ހަނގުރާމަކުޅަ މުޖާހިދުންގެ ދުނިދަނޑިތައް ބިނދިއްޖެއެވެ. އެހެންވީމާ މިހާރު އެ ހިލަތަކުގެ ބޭނުން ކެނޑިއްޖެއެވެ. ހަނގުރާމަ ކާމިޔާބުކުރުމަށްޓަކައި ފެރްނާންދޯ ބޭނުންކުޅަ ހިލަތަކަކީ އަބޫ ޢަބްދުﷲއާއި އަހަންނާއި އަހަރެމެންގެ އެހެން ބައިވެރިންނެވެ.]
އަނެއްކާވެސް ޠަރީފްގެ ހިތްޕުޅަށް އެރިއެވެ. [އެކަމަކު އަބޫ ދާވޫދަކީވެސް އޭގެތެރެއިން އެއް ހިލައެއް ނޫން ހެއްޔެވެ؟ އޭނާއަށް ދިނީ ލޮއްޚާގެ ގަވަރުނަރުކަމުގެ މަގާމެވެ.] މި ސުވާލުގެ ޖަވާބުވެސް އައީ ޠަރީފްގެ ހިތްޕުޅުންނެވެ. [އޭނާގެ ބޭނުން އަދިވެސް ހިފެން އޮތީއެވެ. ފެރްނާންދޯ ބޭނުންވަނީ އޭނާގެ ކުރިމަތީގައި ބަލިވީ އެންމެން މަރައި ހުސްކުރާށެވެ. އަބޫ ދާވޫދޭ ކިޔޭ ހިލައަކީ އޭނާގެ ކަނޑިތައް ތޫނުކުރާން ބޭނުންކުރާ އެއްޗަކަށް ހެދިދާނެކަމަށް ފެރްނާންދޯއަށް އަދިވެސް ގަބޫލުކުރެވެނީއެވެ. އޭނާގެ ދުޝްމިނުންގެ ހަށީގަނޑުގައި އެންމެ ލޭ ތިތްކެއްވެސް ދައުރުކުރާކަށް ފެރްނާންދޯއެއް ނޭދެއެވެ. ބުރިކޮށްލާންވީ ލޭނާރު ފާހަގަކޮށް ދައްކައިދެނީ އަބޫ ދާވޫދެވެ. އަހަރެމެން ފަދައިން އަބޫ ދާވޫދްގެ ބޭނުން ކެނޑިއްޖެކަމަށް ފެރްނާންދޯއަށް ފެންނަ ދުވަހެއް އައުމަކީވެސް ދުރުކަމެއް ނޫނެވެ. މި ވަގުތަށް ބަލާއިރު އޭނާގެ ބޭނުން އެބައޮތެވެ. އަބޫ ދާވޫދް އަހަންނަށް ޔަގީންކަން ދިނީ އަބޫ ޢަބްދުﷲއަށް ޚިޔާނަތްތެރިވެގެން ފެރްނާންދޯގެ ހިތް އުފާކޮށް ދިނުމަކީ އަހަންނަށް ކުރެވިދާނޭ ކަމެއް ކަމުގައެވެ. އެއީ ބޮޑު މަކަރެކެވެ. އަބޫ ޢަބްދުﷲއާ ދެކޮޅަށް ފެރްނާންދޯ ނިންމި ނިންމުމަކީ އަބޫ ދާވޫދްގެ މަޝްވަރާގެ މަތީން ނިންމި ނިންމުމަކަށް ނުވާނެ ހެއްޔެވެ؟ އަބޫ ޢަބްދުﷲއަށް މަކަރުހެދި މީހަކު އަހަންނަށް މަކަރެއް ނުހަދާނެ ހެއްޔެވެ؟ އަހަރެން މަލަޚާއަކަށް ނުދާނަމެވެ. އެކަމަކު ގްރަނާދާއަށް ގޮސް އަހަރެން ވަކި ކުރާނީ ކޮން ކަމެއް ހެއްޔެވެ؟ މޫސަ އޮންނެވީ އަހަރެންގެ ގައިދުގައެވެ. އޭނާ މިނިވަންކުރުމުގެ ނުރައްކަލާ ކުރިމަތިލުމަކީ އަހަންނަށް ކުރެވިދާނެ ކަމެކެވެ. އަހަރެން އޭނާއަށް ދަންނަވާނަމެވެ. [މޫސާއެވެ. އަޅުގަނޑުމެންގެ ގައުމަށް މަނިކުފާނުގެ ބޭނުން ޖެހިއްޖެއެވެ.] އެކަމަކު މޫސައަށްވެސް މިހާރު ކުރެއްވޭނީ ކޮން ކަމެއް ހެއްޔެވެ؟]
ސިކުނޑިފުޅުގައި މިފަދަ ހައިޖާނެއް އުފެދިގަތީމާ ޠަރީފް އޭނާގެ ބައިވެރިންނާ ވާހަކަފުޅު ދައްކަވައެވެ. މެހުމާނުޚާނާއަށް ވެދެވަޑައިގަތުމުގެ ކުރީން ވަޑައިގަންނަވާންވީ ތަނެއް އޮތީ ނުނިންމެވިއެވެ. އެއް ފިޔަވަޅުފުޅު މަލަޚާއާ ދިމާއަށް ހުރިއްޔާ އަނެއް ފިޔަވަޅުފުޅު ހުރީ ގްރަނާދާއާ ދިމާއަށެވެ. އެކަމަކު މެހުމާނުޚާނާއިން ނުކުމެވަޑައިގަތްއިރު ވަޑައިގަންނަވާން އޮތީ އެންމެ ދިމާއަކަށްކަން އެނގިވަޑައިގެންފިއެވެ. އަނިޔާލިބެމުންދިޔަ އަންހެންކުއްޖެއްގެ ހިތާމަވެރި މަރުގެ ސަބަބުން އޭނާގެ ޒަމީރު ހޭލައިފިއެވެ. އެއީ އޭނާގެ މުޅި ހަށިކޮޅަށް އެރި އެންމެ ވަރުގަދަ ލޮޅުމެވެ. އޭނާ ވެއްޓިވަޑައިގަތުމުގެ ކުރީން ސަމާލުވެވަޑައިގެންފިއެވެ. ގައުމުގެ ނިކަމެތި އަންހެންކުއްޖެއްގެ ރުއިމުގެ ސަބަބުން އެ ގައުމުގެ ބޮޑު ވަޒީރު ގެނެސް، ކާމިޔާބީއާއި ނާކާމިޔާބީއާ މެދު ވިސްނައިވަޑައިގަތުމެއް ނެތި ހަނގުރާމަކުރައްވާން މަޖުބޫރުވެފައިވާ މީހުންގެ ސަފަށް ވައްދައިފިއެވެ. ޠަރީފްގެ ކުރިފުޅުމަތީގައި މިހާރު އޮތީ އެންމެ މަގެކެވެ.
ފަޖުރުލީ ވަގުތު އޭނާގެ އަސްކޮޅު މަޑުކޮށްލީ ކޯރެއްގެ އައްސޭރިއަށެވެ. އޭނާ ބައިވެރިންނާ ދިމާއަށް ބައްލަވައިލައްވައިފައި ވިދާޅުވިއެވެ. [ނަމާދުކޮށްލަމާ ބަހީއެވެ.]
ކޯރުން ވުޟޫކޮށްލެއްވުމަށް ފަހު ގިބްލައަށް ކުރިމަތިލައްވައިގެން ހުއްޓިވަޑައިގެންފިއެވެ. ނަމާދުން އަވަދިވެވަޑައިގެން ދުޢާކުރެއްވުމަށްޓަކައި އަތްޕުޅު އުފުއްލައިލެއްވީ ވަގުތު ދޫފުޅުން އެއްވެސް ލަފުޒެއް ބޭރެއް ނުކުރެއްވުނެވެ. ލޯފުޅުން ހޯސްލައިފައި އޮހިގަތީ ކަރުނަފޮދެވެ. އޭނާ މޫނުފުޅުގައި ދެ އަތްތިލަފުޅު އަޅުއްވައިލެއްވިއެވެ. އެތައް މަސައްކަތްޕުޅަކާއެކު ވިދާޅުވެވުނެވެ.
[އޭ އަޅަމެންގެ ވެރިރަސްކަލާނކޯއެވެ. އަޅަމެން މިވަނީ ގަދަރުވެރި ދިރިއުޅުމަކާ މާ ދުރަށް ސޮއްސައިލައިފައެވެ. ފަސްބައިގައި ޖެހިފައިވާ ކަޅު ލައްތައް އަޅަމެންގެ ކަރުނައިން ނުދޮވެވުމަކީ އެކަށީގެންވާ ކަމެކެވެ. އަޅަމެން ވަނީ އިބަކަލާނގެ އަމުރުފުޅަށް ނުކިޔަމަންތެރިވެފައެވެ. އިބަކަލާނގެ ރަޙުމަތްޕުޅަށް ފުރަގަސްދީފައެވެ. އަޅަމެންގެ ކުރިމައްޗަށް ލަދުވެތިކަމާއި އަގުޥެއްޓުން އައި ހިނދު، އެދި މި ދަންނަވަނީ އަބުރުވެރި މަރެއް ދެއްވާތޯއެވެ. ނޫނެކެވެ. އަބުރާއި އިއްޒަތުގެ ވާހަކަ ދެންނެވުމަކީ އަޅަމެންނާ އެކަށީގެންވާ ކަމެއް ނޫނެވެ. އަބުރުވެރި މަރެއްގެ ތަސައްވަރުކުރުމަކީވެސް އަޅަމެންގެ ހައްގުގައި އޮތް ކަމެއް ނޫނެވެ. އަޅަމެން އެދި ދަންނަވަނީ ޒަމީރުގެ އަޒާބުން އަޅަމެން ސަލާމަތްކުރައްވާތޯއެވެ. އަޅަމެންގެ ކޮންމެ ނޭވައެއް މިވަނީ މަރަށްވުރެ ހިތި އެއްޗެއް ކަމުގައި ވެފައެވެ. އިބަކަލާނގެ މިލްކެއްކަމުގައިވާ، މި ބިމަށް މިހާރު އަޅަމެންގެ ބުރަ އުފުލުންވެސް ބުރަވެއްޖެ ކަހަލައެވެ. އަޅަމެންގެ ފާފަތައް ފުއްސަވައިދެއްވައިފާނދޭވެ.]
މި ދުޢާފުޅު ފެށްޓެވީވެސް ކަރުނަފޮދުންނެވެ. ނިންމަވައިލެއްވީވެސް ކަރުނަފޮދުންނެވެ. އެޔަށް ފަހު ޠަރީފާއި އޭނާގެ ބައިވެރިން އަސްމައްޗަށް ސަވާރުވެއްޖެއެވެ.
ކޯރު ހުރަސް ކުރެއްވުމަށް ފަހު އަނެއް ފަރާތަށް ވަޑައިގެންނެވުމާއެކު ގްރަނާދާގެ މިސްކިތްތަކުގެ މުންނާރާއި އަލްޙަމްރާގެ ގުއްބުތައް ފެނިވަޑައިގެންފިއެވެ. އޭނާ އެ ދިމާއަށް ބައްލަވާން އިންނަވައިފައި ވިދާޅުވިއެވެ. [ނިކަން ބަލައިބަލާށެވެ. އެހެރަ ފެންނަނީ ގްރަނާދާއެވެ. އަހަރެމެންގެ ގްރަނާދާއެވެ. ޙަސަނާއެވެ. އެއީ އަންދަލުސްގައި އޮތް އަހަރެމެންގެ އެންމެ ފަހުގެ ޖަގަހައެވެ. އަހަރެމެން އެ ކިއްލާ ރައްކާތެރިކުރާނަމެވެ. ﷲ ގެ ރަޙްމަތްފުޅުން މާޔޫސްވުމަކީ އަހަރެމެން ކޮށްގެން ވާނޭ ކަމެއް ނޫނެވެ. ގްރަނާދާގެ ދިހަލައްކަ މީހުންގެ އާބާދީގެ ތެރެއިން އެއްލައްކަ ޒުވާނުން ދިރިތިބޭން އަހުދުވެއްޖެނަމަ އެ މީހުން އިނދަޖައްސައިލެވޭނީ ކާކަށް ހެއްޔެވެ؟ ސަރަހައްދީ ބާޒުގެ ކުޑަކުޑަ ލަޝްކަރަކުން ފެރްނާންދޯގެ ބޮޑު ލަޝްކަރުގެ ދަތްޕިލާ ދުއްވައެއް ނުލާހެއްޔެވެ؟ ޠާރިޤްގެ އެއްހާސް މުޖާހިދުންގެ ލަޝްކަރަކުން ރޮޑްރިކްގެ ތާޖު އެކޮޅުކޮޅުން ޖަހައެއްނުލާ ހެއްޔެވެ؟ އޭނާގެ ދަރުބާރު ބިމާހަމައެއް ނުކުރޭ ހެއްޔެވެ؟ އަހަރެމެންގެ ލަޝްކަރުގައި މަދު މީސްކޮޅެއް އޮތްއިރުވެސް އަހަރެމެން ވަނީ ދުޝްމިނުންގެ ބޮޑެތި ލަޝްކަރުތައް ބަލިކޮށްފައެވެ. މިއަދު އަހަރެމެންގެ ލަޝްކަރުގައި ލައްކައިން މުޖާހިދުން އެބަތިއްބެވެ. ވުމާއެކުވެސް ފެރްނާންދޯގެ އަޅުވެތިކަމަށް ރުހިގެން ތިބޭންވީ ހެއްޔެވެ؟ ކާބަފައިންގެ އަތުގައި ހުރި ކަނޑިތައް އަހަރެމެންގެ އަތުގައި…]
ޠަރީފަށް ޖުމުލަ ނުނިންމެވެނީސް ގަސްތަކުގެ ތެރެއިން ފަތުއަޑު ކިޔައިފައި އައި ދުންޏެއް އޭނާގެ އަރިކަށިފުޅަށް ހެރިއްޖެއެވެ. އޭނާ އުފްއޭ ވިދާޅުވެލެއްވުމަށްފަހު އަސްކޮޅުމައްޗަށް ގުދުވެވަޑައިގެންފިއެވެ. އެޔާއެކު ދެން އައި ދުނި ހެރުނީ އޭނާގެ ބުރިކަށިފުޅަށެވެ. ޠަރީފްގެ ބައިވެރިން ވަށައިގެން އެނބުރި ހޯދާން ފަށައިފިއެވެ. ދެން ފެނުނީ ދުންޏެއްގެ ޝިކާރައަކަށްވެ އެހެން ސަވާރީއަކު ޒަޚަމްވީ ތަނެވެ. އެޔާއެކު ގަސްތަކުގެ ތެރެއިން އަސްތަކެއްގެ ފިޔަވަޅުގެ އަޑު އިވުނެވެ. އެބަޔަކު އެ ދަނީ ދުރަށްކަން އަޑުން އެނގެއެވެ.
ޠަރީފް ވަރަށް ބާރަށް ވިދާޅުވިއެވެ. [ޙަސަނާއެވެ. އެމީހުންގެ ފަހަތުން ދާން މަސައްކަތް ނުކުރާށެވެ. އަހަރެން ކުރަންޖެހޭ ލައްކަ ކަންތައް އަދި އެބަހުއްޓެވެ.]
ޠަރީފް އަސްކޮޅު މަޑުމަޑުން ދުއްވަވައިލެއްވިއެވެ. އޭނާގެ ބައިވެރިން ރުޅި އައިސް ދަތްކުނޑިވިކައިގެން ތިބެ ފަހަތްޕުޅުން އާދެއެވެ. ތަންކޮޅަކަށް ވަޑައިގެންނެވުނުތަނާ ޙަސަން އައިސް ޠަރީފާ އަރައިހަމަކޮށްފައި ދެންނެވިއެވެ. [މަޑުކުރައްވާންވީ ނޫންތޯއެވެ؟ އަޅުގަނޑު ދުނި އުފުރައިލެވޭތޯ ބަލާނަމެވެ.]
[ނޫނެކެވެ. އަހަންނަށް ލިބިފައިވާ ކުޑަ ހިނދުކޮޅުގެ މުހިއްމުކަން ވަރަށް ބޮޑެވެ. ވަގުތު ނަގައިލާން ނޫޅޭށެވެ.]
[ތިޔަ ހާލަތުގައި މާ ދުރަކަށް ވަޑައެއް ނުގެންނެވޭނެއެވެ. އެންމެ ކުޑަމިނުން ޒަޚަމް ބަލައިލިޔަ ދެއްވާށެވެ.] މިހެން ބުނެފައި ޙަސަން ޠަރީފްގެ އަސްކޮޅުގެ ލަގަނުގައި ހިފަހައްޓައިލިއެވެ. އަދި އޭނާގެ އަހުގެ ލަގަނަށް ދަމައިލިއެވެ.
ޠަރީފް އަސްކޮޅުން ފައިބައިވަޑައިގެންފިއެވެ. [ޙަސަނާއެވެ. ކަލެއަކީ ވަރަށް ގޮތް ދޫނުކުރާ މީހަކީމުތާއެވެ.] މިހެން ވިދާޅުވެފައި އަސްކޮޅުގެ ކައިރިއަށް ޖެހިވަޑައިގެން ހުންނަވައިފިއެވެ. [އަވަސްކުރާށެވެ.]
ޙަސަން އޭނާގެ ފޮށާ ނިއުޅުވައިލުމަށްފަހު އެހެން ބައިވެރިއަކުގެ އަތަށް ދީފައި ބުންޏެވެ. [މި ފޮށާ ދެފަޅިކޮށްލަދޭށެވެ.]
ދެ މީހަކު އަހުން ފައިބައި ޠަރީފަށް އެހީތެރިވެދޭން އުޅުނެވެ. އެކަމަކު އޭނާ ވިދާޅުވިއެވެ. [އަހަރެންގެ ހާލު ރަނގަޅެވެ. ޙަސަނާއެވެ. އަވަސްކުރާށެވެ.]
ޙަސަން އެއް ދުނި ދަމައިގެންފައި އެއްލައިލިއެވެ. އެކަމަކު އަނެއް ދުނި ދަމައިގަތް ވަގުތު ޠަރީފް ހޭފުޅުނެތިއްޖެއެވެ. ދެ ޒަޚަމްގައި ރަނގަޅަށް ބޭސްއަޅައި ބަނުމަށްފަހު ޙަސަން، އެހެން މީހުންގެ އެހީތެރިކަމާއެކު ޠަރީފް ބިންމަތީގައި ބާއްވައިފިއެވެ. ކުޑައިރުކޮޅަކުން ހޭފުޅުއަރައި ފެންފޮދެއް ހިއްޕެވުމަށްފަހު ތެދުވަޑައިގަންނަވާން އުޅުއްވިއެވެ. ޙަސަން ދެންނެވިއެވެ. [މި ހާލަތުގައި އަސްކޮޅުގައި ދަތުރުފުޅުކުރެއްވުން ރަނގަޅެއް ނުވާނެއެވެ. ކައިރީގައި މިއޮތް އަވަށަށް މަނިކުފާނު ދޫކޮށްލައިފައި އަޅުގަނޑުމެން ގްރަނާދާއަށް ގޮސް ގާޑިޔަލެއް ގެންނަންތޯއެވެ؟]
ޠަރީފް ތެދުވެވަޑައިގަތުމަށްފަހު އަމުރުވެރި ރާގަކަށް ވިދާޅުވިއެވެ. [ނޫނެކެވެ. އަހަރެންގެ ފުރާނަ ނުގެންދަވައި މަޑުކުރައްވައިފައިވަނީ އެންމެ ފަހުގެ ވާޖިބު އަދާކުރުމުގެ ފުރުސަތު ދެއްވާންވެގެން ކަމުގައި ހީވެއެވެ.]
ޠަރީފް އަސްކޮޅަށް ސަވާރުވެވަޑައިގެންފިއެވެ. ބައި މޭލެއްހައި ތަނަށް ވަޑައިގެންނެވުނުތަނާ އަސްކޮޅުގެ މަތީގައި އޮށޯވެވަޑައިގެންނެވޭ ކަހަލަ ގޮތަކަށް ވާތަން ޙަސަނަށް ފެނިއްޖެއެވެ. އަސްކޮޅުވެސް ދެ ދިމާއަކަށް ހޫރޭކަހަލަ ގޮތެއް ވާން ފަށައިފިއެވެ. ޙަސަން އޭނާގެ އަސް ޠަރީފްގެ އަސްކޮޅާ ކައިރިކުރުމަށްފަހު އޭނާގެ އަސް މައްޗަށް ޠަރީފް ނަގައިފިއެވެ.
ޠަރީފް ކުކުރައިވަޑައިގަތުމަށް ފަހު ވިދާޅުވިއެވެ. [އަހަރެން ނިކަން އަވަހަށް މޫސަޔާ ހަމައަށް ގެންގޮސްދޭށެވެ.]
(5)
މޭވާގެ ބަގީޗާތަކުގެ ތެރެއިން ލައިފައި ގޮސް ބައު ގެއެއްގެ ކައިރިއަށް ޙަސަން މަޑުކޮށްފިއެވެ. ގޭގެ ތޭރިޖެހި ކުޑަ ދޮރަކުން ކަޅު ބަބުރަކު ބަލައިލިއެވެ.
[ޙަސަން ބުންޏެވެ. [ދޮރާށި ހުޅުވާށެވެ. އަވަސްކުރާށެވެ.]
ވަކި ބަޔަކު އެނގުމާއެކު ބަބުރުކަލޭގެ ދޮރާށި ހުޅުވައިފިއެވެ. ދޮރާށިން އެތެރެއަށް ވަނުމަށް ފަހު ގޯތިތެރެއިން ލައިފައި ގޮސް ޙަސަންގެ އަސް މަޑުކޮށްލީ ގޭގެ ފެންޑާއަށެވެ. އޭރު ގޭތެރެއިން ދެތިން ނޯކަރުން ނުކުމެއްޖެއެވެ. ޙަސަންގެ އެންގުމަށް އެމީހުން ޠަރީފް އަހުން ބާލައިގެން ގެންގޮސް ކޮޓަރިކޮޅަކަށް ވައްދައިފިއެވެ. އޭރު އޭނާ އޮންނެވީ އަނެއްކާވެސް ހޭފުޅުނެތިފައެވެ.
ޙަސަން ނޯކަރަކާ ދިމާއަށް ބުނެފިއެވެ. [ވަރަށް އަވަހަށް އަންނާށޭ ޔަޢްޤޫބް ގާތު ބުނާށެވެ.]
ބަބުރަކު ދުވެފައި ހިނގައްޖެއެވެ. މާ ގިނަ އިރެއް ނުވެ އެނބުރި އައިސް ބުނެފިއެވެ. [އޭނާ އެބައާދެއެވެ.]
އިރުކޮޅަކުން ފެނުނީ ހަށިގަނޑު ރަނގަޅު، މެދު އުމުރުގެ މީހަކު އައިސް ވަންތަނެވެ. އެއީ ޔަޢްޤޫބެވެ. އޭނާ ޠަރީފާ ދިމާއަށް ބަލައިލައިފައި ޙަސަނާ ދިމާއަށް ސުވާލުގެ ނަޒަރަކުން ބަލައިލިއެވެ.
ޙަސަން ބުންޏެވެ. [ސާހިބާގެ އަމުރުފުޅު އޮތީ މޫސަ ގައިދުން ވީއްލައިގެން މިތަނަށް ގެންނާށެވެ.]
ޔަޢްޤޫބް ޝައްކުގެ ނަޒަރަކުން ފުރަތަމަ ޙަސަނާ ދިމާއަށް، ދެން އެތާނގައި ތިބި އެހެން މީހުންނާ ދިމާއަށް ބަލައިލިއެވެ. އޭނާގެ ހިމޭން ނަޒަރުން ދޭހަވަނީ އެ އަމުރު ތަންފީޒުކުރަން ދެކޮޅުހަދާކަމެވެ.
ޙަސަން ބުންޏެވެ. [ޔާގޫބާއެވެ. ވަގުތު ނަގައިނުލާށެވެ. އަވަސްކުރާށެވެ.]
ޔަޢްޤޫބް ކުޑަކޮށް ޖެހިލުންވެފައި ހުރެގެން ބުނެފިއެވެ. [ސާހިބާ އެ އޮންނެވީ ހޭފުޅުނެތިފައެވެ. އެ މަނިކުފާނު އަމުރުފުޅު ނުކު…]
ޙަސަން ރުޅި އައިސްފައި ބުންޏެވެ. [ސާހިބާގެ ފަރާތުން އަހަރެން މިކުރާ އަމުރަށް ކިޔަމަންވާށެވެ. އަވަސްކުރާށެވެ.]
[ސާހިބާ އަޅުގަނޑު ގަތުލުކުރައްވާނެއެވެ.]
[ސިންގާއެއް ހިޔަޅަކަށް ހަމަލައެއް ނުދޭނެއެވެ. ހިނގާށެވެ. ކަލެޔާއެކު އަހަރެންވެސް ދާނަމެވެ.]
ކުޑައިރުކޮޅެއް ފަހުން ޙަސަނާއި ޔަޢްޤޫބާއި އިތުރު ނޯކަރަކާ ތިން މީހުން އިމާރާތުގެ ދެވަނަ ބުރީގެ ހަނި ފެންޑާއަކުން ލައިފައި ގޮސް ހުއްޓުނީ ކޮޓަރިއެއްގެ ދޮރުމައްޗަށެވެ. ނޯކަރު ދޮރުގައި ލައިފައި އޮތް ތަޅު ހުޅުވައިފިއެވެ. ކޮޓަރީގެ އެއް ފަރާތުގައި ހުރި ހިލަ ސިޑިއަކުން އެމީހުން ތިރިއަށް ފައިބާން ފަށައިފިއެވެ. ވިއްސަކަށް ހަރުފަތަށް ފޭބުނުއިރު އެމީހުން ތިބީ ދަގަނޑު ތޭރިޖަހައިފައިވާ ގޮޅިއެއްގެ ކުރިމަތީގައެވެ. ޔަޢްޤޫބް އެ ގޮޅީގެ ދޮރު ހުޅުވައިފިއެވެ. އެތެރެއަށް ވެރިވެފައި އޮތީ ކަނުއަނދިރިކަމެވެ. ޔަޢްޤޫބް ކުރިއަށް ޖެހިލައި ދޮރާ ކައިރީގައި ހުރި ދަނގަޑު ހެންޑެއްޔެއަކަށް އަނބުރައިލިއެވެ. އެޔާއެކު ފާރުން ތަންގަނޑެއް ކެހިގެން ގޮސް ހުޅުވިއްޖެއެވެ. އެތަނުން ފަނޑު އަލިކަމެއް ބޭރަށް ނުކުމެފައި ހުއްޓެވެ. އެތަނުން އެތެރެއަށް ބަލައިލިއިރު މުޅި ކޮޓަރި އޮތީ ހުހަށެވެ. އެއް ފަރާތުކަނުގައި މީހަކު އެމީހުންނާ ދިމާއަށް ބަލަހައްޓައިގެން އިނެވެ. އެއީ މޫސާ އިބްނި އަބީ ޣައްސާނެވެ. ހިތްވަރުފުޅުގަދަކަމާއި ކުޅަދާނަފުޅުކަމަށް މަޝްހޫރު މުޖާހިދެވެ. އޭނާގެ މިލައިފައިވާ މޫނުފުޅު ފެނުނީމާ މިހާރުވެސް ބަޔަކު ޖެހިލުންވާހައި ވަރުގަދަ ޝަޚްސިއްޔަތެއްގެ ވެރިއެކެވެ.
ޙަސަން ކުރިއަށް ޖެހިލައިފައި ދެންނެވިއެވެ. [އަޅުގަނޑު މި އައީ ޠަރީފް ބިން މާލިކްގެ އަމުރުފުޅަށް މަނިކުފާނު މި ހުރަގެއިން ނެރެގެން ގެންދާށެވެ.]
މޫސާ ހަމަހިމޭންކަމާއެކު ޙަސަނާ ދިމާއަށް ބައްލަވާން އިންނެވީއެވެ. ޙަސަން ވާހަކަ ކުރިއަށް ގެންދިޔައެވެ. [އޭނާ އޮންނެވީ ވަރަށް ބޮޑަށް ޒަޚަމްވެވަޑައިގެންފައެވެ. އޭނާގެ އެންމެ ފަހުގެ އެދުންފުޅަކީ މަނިކުފާނުގެ ފައިންޕުޅު މައްޗަށް ވެއްޓިވަޑައިގަތުމެވެ. އަޅުގަނޑުމެން އޭނާ މިތަނަށް ގެނައީ ހޭފުޅުނެތިފައިވާ ހާލުކޮޅުގައެވެ. މަނިކުފާނު އޭނާއަށް މާފުނުކުރައްވާނޭކަން އަޅުގަނޑުމެންނަށް އެނގެއެވެ. އެކަމަކު އޭނާ ތައުބާވެވަޑައިގެންފިއެވެ. ހީވާ ގޮތުގައި މާ ގިނަ އިރެއްނުވެ އޭނާ ﷲ ގެ ޙަޟުރަތަށް ވަޑައިގެންފާނެއެވެ. އަޅުގަނޑުމެން އެންމެންނަކީވެސް ކުށްވެރިންނެވެ. މަނިކުފާނު އަޅުގަނޑުމެންނަށް އަދަބެއް ދެއްވާން ބޭނުންފުޅިއްޔާ ދެއްވާށެވެ. ފިލަން ދުއްވައިގަންނަ ބަޔަކަށް އަޅުގަނޑުމެން ނުވާނޫއެވެ.]
ޙަސަންގެ އިޝާރާތަކަށް ޖެހިލުންވެފައި ހުރެގެން ޔަޢްޤޫބް އެ ދޮރު މުޅީން ހުޅުވައިލިއެވެ. މޫސަ ވަޑައިގެން ބޭރަށް ނުކުމެވަޑައިގެންފިއެވެ. އަދި އިރުކޮޅަކު ހިމޭނުން ހުންނެވުމަށް ފަހު ވިދާޅުވިއެވެ. [ޠަރީފަކީ އަބޫ ޢަބްދުﷲގެ އަމުރަށް ކޮންމެފަދަ ބޮޑު ފާފައެއް ކުރާންވެސް ތައްޔާރަށް ހުރި މީހެކެވެ. ކުއްލިއަކަށް އޭނާގެ މައްޗަށް ތިޔަ ސަވާރުވެގަތް ހެޔޮކަމުގެ ސަބަބެއް އަހަންނަކަށް ނުވިސްނެއެވެ.]
ޙަސަން ދެންނެވިއެވެ. [ޠަރީފް ޒަޚަމްކޮށްލީ ފެރްނާންދޯގެ މީހުންނެވެ. ހުރިހައި ވާހަކައެއް ތަފުސީލުކޮށް އެނގިވަޑައިގަތީމާ ފަހަރެއްގައި މަނިކުފާނު އޭނާއަށް މާފުކުރެއްވުމަކީ އެކަށީގެންވާ ކަމެކެވެ. އޭނާ އިންތިޒާރުގައި އެބައޮންނެވިއެވެ. މަނިކުފާނަށް ކޮންމެވެސް ވާހަކަފުޅެއް ދަންނަވާން އޭނާ ބޭނުންފުޅުވެއެވެ.]
(6)
ޠަރީފް ކުކުރައިވަޑައިގެންފައި ވިދާޅުވިއެވެ. [އަވަހަށް އަރެން މޫސަގެ އަރިހަށް ގެންދާށެވެ.]
އެތާނގައި ތިބި މީހުންގެ ތެރެއިން މީހަކު ދެންނެވިއެވެ. [މޫސަ މިހާރު އެބަ ވަޑައިގަނެއެވެ.]
ޠަރީފް ލޯފުޅު ހުޅުވައިލައްވައި ދެ ފަރާތަށް ބައްލަވައިލެއްވުމަށް ފަހު މަޑުން ތެދުވެވަޑައިގެން އިށީނދެވަޑައިގެންފިއެވެ. [މި ހާލަތުގައި އެމަނިކުފާނުގެ ފައިންޕުޅު ދެކޭކަށް އަހަރެން ބޭނުމްެއް ނޫނެވެ. އެމަނިކުފާނު އޮންނެވި ގޮޅީގެ ކުރިމައްޗަށް އަހަރެން ގޮވައިގެން ހިނގާށެވެ. އެމަނިކުފާނު އަހަރެންގެ ގާތަށް ވަޑައިގަންނަވާ ވަރުގެ އުރަތްޕެއް ހުރި މީހަކު ކަމުގައެއް އަހަރެން ނުވަމެވެ.]
ޠަރީފް ފައިންޕުޅު އެނދުދާންކޮޅުން ބޭރަށް ވައްޓަވައިލެއްވިއެވެ. ދެ މީހަކު އަރިހަށް ލެފިލައި ދެ މުލައްދަނޑިފުޅުގައި ހިފައިގެން އޭނާ ބޭރަށް ނެރެފިއެވެ. އެ ވަގުތު ނޯކަރަކު އައިސް ދެންނެވިއެވެ. [މޫސަ އެބަ ވަޑައިގަނެއެވެ.]
ޠަރީފް ވިދާޅުވިއެވެ. [އަހަރެންގެ އަތުން ދޫކޮށްލާށެވެ. އަހަންނަކަށް އެހީތެރިކަމެއް ބޭނުމެއް ނުވެއެވެ.]
ނޯކަރުން ހިތާ ދެކޮޅަށް އޭނާގެ އަމުރުފުޅަށް ކިޔަމަންގެންފިއެވެ. ޠަރީފް މަޑުމަޑުން ދެ ފިޔަވަޅުފުޅެއް ކުރިއަށް އެޅުއްވިއެވެ. އެ ވަގުތު މޫސަ އެ ދިމާއަށް ވަޑައިގަންނަވާތަން ފެނިވަޑައިގެންފިއެވެ. އޭނާގެ މޫނުފުޅަށް ކުއްލިއަކަށް އަނދިރިވާން ފަށައިފިއެވެ. އެކަމަކުވެސް ވަރަށް ދަތި ހާލުކޮޅުގައި ކުރިއަށް ޖެހިވަޑައިގެންފިއެވެ. ވެއްޓިވަޑައިނުގެން ސަލާމަތްވެވަޑައިގަންނަވާން ވެގެން ޗެންޗޭނުގައި ހިފަހައްޓަވައިލެއްވިއެވެ. މޫސާ ކައިރިއަށް ވަޑައިގެން ޝައްކުގެ ގޮތަކަށް ޠަރީފާ ދިމާއަށް ބައްލަވައިލެއްވިއެވެ. ޠަރީފްގެ ދޫފުޅުން ވޭނީ އަޑުފުޅެއް ނުކުތެވެ. [މޫސާއެވެ. އަޅުގަނޑަކީ މަނިކުފާނުގެ ކުށްވެރިއަކީމެވެ. މި ވަގުތު އަޅުގަނޑު މިހިރީ މަރުގެ ތުންފަތްމަތީގައެވެ. އެކަމަކު އޭގެ ކުރީން… އޭގެ ކުރީން…]
ޗެންޗޭނުން ދޫކޮށްލެއްވުމަށް ފަހު އޭނާ ކުރިއަށް ޖެހިވަޑައިގެން މޫސާގެ ފައިންޕުޅު މައްޗަށް ވެއްޓިވަޑައިގެންފިއެވެ. މޫސަ އިރުކޮޅެއް ވާންދެން އެއްވެސް ހަރަކާތެއް ނުކުރައްވައި ހުންނެވިއެވެ. އެޔަށް ފަހު ފަހަތަށް ޖެހިވަޑައިގަންނަވާން އުޅުއްވިއެވެ. އެކަމަކު ޠަރީފް އޮންނެވީ އޭނާގެ ފައިންޕުޅުގައި ވަރަށް ބާރަށް ހިފަހައްޓަވައިގެންނެވެ. ހޭފުޅުނެތެމުންދާ ހާލުކޮޅުގައިވެސް އޭނާގެ އަތްޕުޅުގައި ބާރު އެބަހުރިކަން ދޭހަވެއެވެ. ކުއްލިއަކަށް މޫސާއަށް އިހުސާސްވެވަޑައިގަތީ އޭނާގެ ފައިތިލަފުޅު ތެމެމުންދާ ކަމުގައެވެ. ޠަރީފް ކީރިތިކުރައްވަނީއެވެ. އެކަމަކު މޫސާގެ ފައިންޕުޅު ތެމެމުން ދިޔައީ އޭނާގެ ކަރުނަފޮދަކުންނެއް ނޫނެވެ. މޫސާގެ ހިތްޕުޅުގައި މީހަކު ބާރުގަދަ އެތިފަހަރެއް ޖެހިކަހަލައެވެ. މާޒީގެ ހުރިހައި ހިތިކަމެއް ހަނދުމަފުޅު ނައްތަވައިލެއްވުމަށް ފަހު ޠަރީފް އަތްދަނޑިފުޅުމައްޗަށް ނަންގަވައިފިއެވެ. ޠަރީފްގެ މޫނުފުޅުން އޮހެމުން ދިޔައީ އޭނާގެ ހޫނު ލޭފޮދެވެ. މޫސާ އޭނާ ގެންދަވައި އެނދުދާންކޮޅުގައި ބާއްވަވައިފިއެވެ. އެޔާއެކު ވަރުބަލިފުޅުވެފައިވާ ދަތުރުވެރިޔާ އޭނާގެ އެންމެ ފަހުގެ މަންޒިލަށް ވަޑައިގެންފިއެވެ.
މޫސާ ވިދާޅުވިއެވެ. [إنَا للّه و إنّا إليه راجعون] އެއްވެސް އިޚްތިޔާރުފުޅަކާ ނުލައި މޫސައަށް ކީރިތިކުރެއްވިއްޖެއެވެ. އޭނާގެ ކަރުނަފޮދު އޮހެމުން ދިޔައީ ޠަރީފްގެ މޫނުފުޅަށެވެ. ޠަރީފްގެ އިސްތަށިފުޅު އުނގުފުޅުމަތީގައި ބާއްވަވަމުން މޫސާ ވިދާޅުވިއެވެ. [ޠަރީފެވެ. މަނިކުފާނަކީ އަޅުގަނޑުމެންގެ ބޭފުޅެކެވެ.]
(ނުނިމޭ)
