ދަރިފުޅާއެވެ! ގޫގުލް އާއި، ވަޓްސްއަޕާއި ޓުވިޓަރާއި ސްނެޕްޗެޓާއި އިންސްޓަގްރާމާއި ފޭސްބުކް ފަދަ އިޖްތިމާއީ ވިޔުގަ ތަކުގެ ފުން ހިސާބު ހިސާބުގައި ހަމަ ކަށަވަރުން، ލައްކަ ގިނަ ފިރިހެނުންނާއި އަންހެނުންގެ އަޚުލާގު މިހާރު ވަނީ ގެއްލިފައެވެ! ވަރަށް ގިނަ ޒުވާން ފިރިހެނުންނާއި ޒުވާން އަންހެނުންގެ ހަމަބުއްދިވެސް ވަނީ މިބުނި ފުން ކަނޑުއޮޅިތަކަށް ވެއްޓި އޮބާލައި ގެއްލިފައެވެ! ތެދުގެ އެއްފަޅި އެކަނި ބުނެ ހުއްޓައިލާންވީ ކީއްވެ ހެއްޔެވެ؟ ނުރަޖެހި ބައެއް މުސްކުޅިންވެސް ހަމަ އެހާލުގައި އެބައުޅެއެވެ! އެންމެ ލަދުވެތި ފުރައިގެ އެތައް ލައްކަ އަންހެންކުދިންނެއް، އެކުދިންގެ ޝަރަފާއި އަޙުލާގު މިވަގުތު އެވަނީ އެއްކަލަ ފޫ ނެތް ވަޅުތެރެއަށް ގަސްތުގައި އެއްލާލައި ނަގައިލައިފައެވެ! މިހެންވެ، އިސްވެ ބުނެވުނު ޒަމާނީ ފަސޭހަތައް ބޭނުންކުރާއިރު ދަރިފުޅާއި ދަރިފުޅުފަދަ އެހެން ކުދިން ވަރަށްބޮޑަށް ސަމާލުވާން އެބަޖެހެއެވެ!
ދަރިފުޅާއެވެ! ބައްޕަ ދެންމެ އިޝާރާތް މި ކުރި ޒަމާނީ ވަސީލަތްތަކުގެ ފަސޭހަކަމާއި މައުލޫމާތުގެ މުއްސަނދި ކަމާއި ދޭދޭފަރުދުންގެ އިޖުތިމާއީ ގުޅުން ބަދަހިކޮށްދޭ އިލެކްޓްރޯނިކް ހޮޅުއަށިތަކުގެ ބޭނުން ހިފާއިރު ދަރިފުޅު ނަމޫނާއަކަށް ބަލަން އެންމެ ރަނގަޅީ މާމުތް ކުޅަނދުރެވެ! މާމުތްކުޅަނދުރަކީ މުޑުދާރު އެއްޗަކާ ކައިރިވާ މަޚްލޫގެއް ނޫނެވެ. މާމުތްކުޅަނދުރު ފައިދާ ހޯދަނީ ތާޒާ މަލުން އެ ސުއިއްޕަށް ފައިދާވާ މިންވަރަށެވެ. އެސޮރުގެ ބުރަ މަސައްކަތުން އިންސާނުންނަށް ފައިދާ ލިބެނީ މާ ފަހުންނެވެ. ފުރަތަމަ އެ ކުރާ މަސައްކަތަކީ އަމިއްލަ ނަފްސަށާއި އެ ކުޅަނދުރު ނިސްބަތްވާ ކުޑަ މުޖުތަމައަށް ލާބަ ހޯދައިދޭން ކުރާ މަސައްކަތެވެ! ދަރިފުޅު ނުކުރާންވީ ކަމަކީ މެހި އުޅޭގޮތަށް އުޅުމެވެ. މެއްސަކީ މުޑުދާރު ތަންތަނަށާއި އެނޫން ތަންތަނަށްވެސް ކައިރިވާ އެއްޗެކެވެ. ކުނިބުނިވެސް ރަހަބަލައެވެ. ތާޒާ ކާނާގައިވެސް ޖައްސައި ރަހަބަލައި ކައިއުޅޭ ސުއިއްޕެކެވެ. މިހެން އުޅުމުގެ ސަބަބުން އެއްތަނެއްގައި ހުރި ނުރައްކާ ޖަރާސީމު އަނެއްތަނަކަށް އެބަ ގެންދެއެވެ. ނުރައްކަލެއް ހުރިތާ ހުރުމުގެ ބަދަލުގައި ނުގެންދާންވީ ހިސާބުހިސާބަށް އެބަ ގެންދެއެވެ! ދަރިފުޅަކީ މުޑުދާރު ޚިޔާލާއި ވިސްނުން، އަނދިރީގައި ހުންނަންޖެހޭ މަންޒަރާއި ކުރެހުން، އައްޔަށް ނެރޭމީހަކަށް ނުވާށެވެ. އެންމެންނަށް ހިއްސާ ކުރަންޖެހޭ ކަމެއް ވަންހަނާކުރާ މީހަކަށްވެސް ނުވާށެވެ!
ދަރިފުޅާއެވެ! ދުނިޔޭގެއިވާ އެތައް މިލިޔަން ކޮންޕިޔުޓަރުތަކެއް އެތައް މިލިޔަން ވިޔުގަތަކަކުން ގުޅައިދޭ އިންޓަނެޓަކީ ބޮޑު، މާސިންގާ މާރުކޭޓެއްކަން ދަރިފުޅު ހަނދާންކުރަން ޖެހެއެވެ! މި ބިޔަ ބާޒާރުގައި އެއްވެސް މީހަކު ހަމަ ހިލޭ ތަކެއްޗެއް ނުބަހައެވެ. ބެހިޔަސް، އެއީ ވަރަށް މަދު ބައެކެވެ. ގިނައީ ކޮންމެވެސް އެއްޗެއްގެ ބަދަލުގައި އެމީހުންގެ މުދާ ވިއްކާ މީހުންނެވެ. ބައެއް މީހުންގެ ‘ މުދަލުގެ’ ބޭނުން ހިފެނީ އަޚުލާޤު ވިއްކައިގެންނެވެ! އަނެއްބަޔަކު ވިއަކާ މުދަލަކީ ލޮލަށް ފެންނަ، އައިބެއް ހުރިނަމަ ބޭރުފުށަށް ފާޅުވާ ޒާތުގެ މުދަލެއްނޫނެވެ! އެހެނީ، އޭނާ ވިއްކަނީ އޭނާގެ ވިޔާނުދާ ވިސްނުމެވެ! މިއީވެސް އުޅޭ ބައެކެވެ. އެފަދަ މީހުންގެ ދަލުގައި ޖެހެނީ ހަމައެކަނި ކުޑަކުދިންނެއްނޫނެވެ. އެކި އުމުރުފުރާގެ މީހުންނެވެ. ދެޖިންސުންނެވެ. ދުނިޔޭގެ އެކި ކަންކޮޅުންނެވެ! ކޮންމެވެސް ރޮނގަކުން މަޝްހޫރުވާން އެދޭ ބަޔަކުވެސް އިންޓަނެޓުން ދިމާވާނެއެވެ. ދުނިޔެ އިސްލާހުކުރަން ބޭނުންބަޔަކާވެސް ދިމާވުން އެކަށީގެންވެއެވެ. ދަރިފުޅު ކުރަންވީ ކަމަކީ ރަނގަޅަށް ހޭލައިހުރެ، ފުންކޮށް ވިސްނައި، ތިމަންނާގެ މިތުރުންނާއި ހަތުރުން ދެނެގަންނަން ދަސްކުރުމެވެ! ދަރިފުޅާއެވެ! އިންޓަނެޓުން ތަފާތު ބޭނުންހިފާއިރު އެކިފާޑުފާޑުގެ ވިޔާނުދާ ފޮޓޯތަކާއި އަޚުލާގީ މިންގަނޑު ދަށް ޖޯކާއި ހެއްވާމަޖާ ޚަބަރުވެސް ފެންނާނެއެވެ. އެހެންނަމަވެސް، މީހެއްގެ ބަދުއަޚުލާގީ ވާހަކައެއް، ނުވަތަ ވަކި ބަޔަކު ނުބައިމީސްކޮށް، ނުވަތަ ސޭކުހައްދާފައި ކިޔައިއުޅޭ ޖޯކު، ނުވަތަ ހެއްވާ ސަމާސާ ވާހަކަތައް ފަތުރާ މީހަކަށް ދަރިފުޅު ވެގެންނުވާނެއެވެ! ވަކިބަޔަކު ބަދުނާމުކުރުމުގެ ގޮތުން ފަތުރާ ވާހަކަތަކުގެ ތެރެއަށް ދަރިފުޅު ވަދެނުގަންނާށެވެ! ހަނދާންކުރާށެވެ، އެއްވެސް އެއްޗެއް ވިއްކާ މީހަކު، ގަންނަމީހާގެ ގާތުން ލަފަޔަކަށް ނޭދޭނެއެވެ! ގަންނަމީހާ ޖެހޭނީ ހުޝިޔާރުވާށެވެ! ‘ ގަތުމުގެ’ ކުރިން ހިތާހިތާ ސުވާލުކޮށްލާށެވެ! މިއީ ތިމަންނާގެ މާތް ދީން ހުއްދަ ކުރާނޭ މުއާމަލާތެއްބާއެވެ؟ މި ކުރަން އުޅޭކަމަކީ މާތް ﷲ ރުއްސަވައި ވޮޑިގެންވާނޭ ކަމެއްބާއެވެ؟
ދަރިފުޅާއެވެ! ދަރިފުޅުގެ ހަމަލޮލަށް ދުވަހަކުވެސް ފެނިފައިނުވާ ‘ ރަހުމަތްތެރިން’ ނަކީ ކޮން ރަހުމަތްތެރިންނެއް ހެއްޔެވެ؟ އެމީހުންނަކަށް ( އެ ބުނާ ‘ ރަހުމަތްތެރިންނަކަށް’ ) ދަރިފުޅުގެ ކާފައެއް، މާމައެއް، ބައްޕައެއް، މަންމައެއް، ޚުދު ދަރިފުޅެއްވެސް ނޭނގެއެވެ. ވީމާ އެފަދަ މީހަކީ ކޮން އުމުރެއްގެ ކޮން ދީނެއްގެ ކޮން ގައުމެއްގެ މީހެއްކަންވެސް ނޭނގޭ ހާލުގައި އެއީ ރަހުމްތެރިންކަމުގައި ނުބަލާށެވެ! މީހަކު ލިޔާ އެއްޗަކުން އެމީހެއްގެ ތެދުވެރިކަމެއް ނުފެންނާނެއެވެ. އެމީހުންގެ މުދާ ވިއްކަން އެތިބެނީ ފިލައި، މޫނުގައި އެމީހުން ބޭނުން މޫނުމައްޗެއްއަޅައިގެންނެވެ!
ދަރިފުޅާއެވެ! އަމިއްލަނަން ވަންހަނާކޮށްގެން ކޮންމެވެސް ފަންވަތުނަމަކުން އެހެން މީހުންނާއި މުޚާތަބުކުރާ މީހުންގެ ކިބައިގައި ހުންނާނީ ކޮން ތެދުވެރިކަމެއްހެއްޔެވެ؟ އޭނާގެ އަމިއްލަ ނަފްސަށް އޭނާ ނުކުރާ އިތުބާރެއް އޭނާއަށް ކުރާނީ ފަހެ ކާކުހެއްޔެވެ؟ ދަރިފުޅުވެސް، ނަން އޮޅުވައިލައިގެން އެހެން މީހުންނާ މުޚާތަބު ނުކުރާށެވެ. ބައްޕަ އާއި ދަރިފުޅުގެ މަންމަ، ދަރިފުޅަށް އިސްލާމީ ތާރީޚުގެ އެންމެ އަލިގަދަ ދުވަސްވަރުގެ ތަރިންގެ ތެރެއިން އެންމެ އަލިގަދަ އެއް ފަހުލަވާނުގެ ނަމުން ދަރިފުޅަށް ނަންދިނީ ލައްކަ ވިސްނައިފައެވެ. ދަރިފުޅު ކޮންމެ ނަމެއްގެ ދަށުން އިންޓަނެޓުގައި ހަރަކާތްތެރިވިނަމަވެސް ދަރިފުޅަކީ ކާކުކަން މާތް ﷲ އަށް ވަންހަނާކުރެވޭނެހެއްޔެވެ؟
ދަރިފުޅާއެވެ! ދަރިފުޅަށް ގޯނާއެއް ކުރި މީހަކަށް ބަދަލުގައި އަނިޔާއެއް ނުދޭށެވެ! އެމީހާ ކަންތައް އެކުރީ އޭނާގެ ތަރުބިއްޔަތުން ދަސްވި ގޮތުގެ މައްޗަށެވެ. ބައްޕަމެން ދަރިފުޅު ބޮޑުކުރީ ބަދަލުހިފަން ދަސްކޮށްދީގެނެއްނޫނެވެ. ކޮންމެ ކަންވާރަކުންމެ ތިކިޖަހައި ނީރުންވާނީ، އެއެއްޗެއްގައި ހުރި އެއްޗަކުންނެވެ!
ދަރިފުޅާއެވެ! ބައްޕަ އެންމެ ޖެހިލުންވެ ކަންބޮޑުވާކަމަކީ، އިންޓަނެޓުގެ ގަދަކަނޑުގައި ދަރިފުޅު ރާޅައި އަޅައި އުޅޭއިރު ދަރިފުޅަށް ފެންނަންނުވާނޭ ބައެއް ފޮޓޯ އާއި މަންޒަރު ފެނިދާނެތީއެވެ! އެހުންނަނީ ހަރާންކަންކަމެވެ. އެކަހަލަ ވިޔާނުދާކަމެއްގައި ހިނދުކޮޅެއްވެސް ހޭދަ ނުކުރާށެވެ. ވަލުކުއްތާއެއްގެ ކައިރިން ފިލަން ދުއްވައިގަންނަ ފަދައިން އިންޓަނެޓުގައިވާ އެފަދަ ހޮޅުއަށިތަކާ ދުރަށް ދާށެވެ. އެއީ، ހަގީގަތުގައި ނަރަކަޔާއި ދުރަށް ދާ ދިޔުމެއްކަން އަބަދުވެސް ދަރިފުޅު ހިތުގައި ބާއްވާށެވެ!
ތިޔަ އިންޓަނެޓަކީ، އަހަރުމެންގެ މަންފާއަށާއި ލާބައަށް ހުރި އެއްޗެއްކަމުގައި ހަދަންވީއެވެ. އެއީ އަހަރުމެން މަގުފަރައްދަން އީޖާދުކުރެވުނު އެއްޗެއްކަމުގައިނުހަދައި، އެއީ އަހަރުމެންގެ ކުރިއެރުމަށް ހުރި ލާމަސީލު ވަސީލަތެއްކަމުގައި ހަދަން ތިބީވެސް ހަމަ އަހަރުމެންނެވެ. އޭތީގެ ބޭނުން ހިފާނީ އަހަރުމެންނެވެ. އަހަރުމެންގެ ބޭނުން އޭތި ހިފިޔަދީގެންނުވާނެއެވެ! އެ މޮޅު އީޖާދުގެ އެހީގައި ކަންކަން އިސްލާހު ކުރަމާހެއްޔެވެ! އެއީ އަހަރުމެންގެ ހަލާކު ކަމުގައި ނަހަދަމާހެއްޔެވެ!
ދަރިފުޅު ލިޔެ އުޅޭއިރު ނިކަން ވިސްނައިގެން ލިޔާށެވެ. ދަރިފުޅު ލިޔާފަދައިން ކޮނޑުގައި ތިއްބަވާ މަލާއިކަތުންވެސް ލިޔުއްވާނެއެވެ! އެންމެންގެ މަތިން މާތްﷲ ބައްލަވައިވޮޑިގެންވެއެވެ.
މިއަދުގެ އިންޓަރނެޓް ދުނިޔޭގައި ބޭނުނެތެރި ޢާރޓިކަލްއެއް