މި ލިޔުން އަޅުގަނޑު ތަޚްސީސް ކުރާހިތްވަނީ އަޅުގަނޑުމެންގެ ތެރެއިން ކިޔަވައިދިނުމުގެ ބުރަ ޒިންމާ އުފުއްލަވާ މުދައްރިސުންނަށެވެ. އަދި، ހުއްޓައިލާނެ ވަގުތެއް ނުލިބި ތިޔަ އުޅުއްވާ ހީވާގި އެދުރުންގެ ތެރެއިން މި މުހިންމު ދާއިރާ ޚިޔާރު ކުރެއްވި ޒުވާން ޓީޗަރުންނަށެވެ. އަޅުގަނޑަކީ، ތަޖުރިބާކާރު މުދައްރިސުންނަށް އިތުރު ފިލާވަޅެއް ދެވޭވަރުގެ މީހަކަށް ނުވާތީއެވެ!
މުދައްރިސުކަން ކުރަން އަޅުގަނޑަށް ފުރުސަތެއް އަދި ލިބިފައި ނެތް ނަމަވެސް އަޅުގަނޑަކީވެސް އެއްދުވަސްވަރެއްގައި ދަރަވަރެކެވެ. ދަރިވަރެއްގެ ހައިސިއްޔަތުން އަޅުގަނޑުގެ ހިތުގައި ހަނދާނުގެ ގޮތުގައި ހަރުލާފައި ހުރީ އެ މުދައްރިސުން އަޅުގަނޑަށް ގުނަކުރަން ދަސްކޮށްދެއްވި ދުވަހެއް ނޫނެވެ. ހަތަރެސްކަން ގޮޅިއެއްގެ އޭރިޔާ ހޯދަން ތަކުރާރުކޮށް ކިޔައިދިން ދުވަހެއްވެސްނޫނެވެ. ބޭރު ގައުމަކަށް ގޮސް އަތުގައި ހުރި ޑޮލަރު އެރަށެއްގެ ފައިސާ އަށް ބަދަލުކޮށް އުޅޭއިރު، އަދި ދެރަށުގައި ތަކެތީގެ އަގު އަޅައިކިޔާއިރު ގުނަކުރުމާއި ގެއްލަން ދަސްކޮށްދިން މުދައްރިސުންނަށް ޝުކުރުވެރިވާކަށް ހަނދާނެއް ނުހުރެއެވެ. ތަޅުން އަޅައި ނިމިފައިވާ ކޮޓަރިޔަކަށް ބޭނުންވާ ވަރަށް ތަށިމުށި ހޯދަން އެނގެއެވެ. ނަމަވެސް މިހުނަރު ދަސްކޮށްދެއްވި މުދައްރިސުންގެ ނަމާއި ހިތްހެޔޮ މޫނުތައް ހަނދާނުގެ ދުންފިނީގެ ތެރެއަށް މަޑުމަޑުން ގޮސް ގެއްލިއްޖެއެވެ. ހަނދާނުގައި ހުރީ ކޮން އެއްޗެއް ކަމަށްތޯއެވެ؟
ބައެއް ދަރިވަރުންގެ ހަނދާނުގައި ހުންނަނީ އެއްވެސް ހައްގަކާ ނުލައި ލިބުނު އަދަބެވެ. ހައްގުވާ އަދަބަށް އަޅުގަނޑުމެން ރުހި ގަބޫލުވެ އެކަން މާބޮޑު ކަމަކަށް ނުވިއެވެ. ގިނަ ދަރިވަރުންގެ ހަނދާނުގައި ހުންނަނީ އެ ދަރިވަރުންނަށް މުދައްރިސުން ދެއްވި ނަސޭހަތާއި ހިތްވަރެވެ. އަތުލިޔުން ރީތިވެގެން ދެއްވި ހިތްވަރެވެ. ނުވަތަ ކުރު މަޒްމޫނެއް ލިޔެފައިވާލެއް ރީތިކަމުން މުޅި ކުލާހަށް އިވޭވަރަށް ތިޔަ މަޒްމޫނު ކިޔައިލަންވާނެ ނޫންހޭ ބުނުއްވައި މަޑުމަޑުން ކުލާހުގެ ކުރިއަށް ނެރެދެއްވިކަމެވެ.
އިއްޒަތްތެރި ކިޔުންތެރިޔާއެވެ! އަޅުގަނޑު މި ލިޔާ ބައި ކިޔުއްވައި ނިންމަވާފައި، ހަމަ އިންނެވި ގޮތަށް އިންނަވައި އަމިއްލަފުޅަށް އެއް މިނެޓުގެ ސުކޫތެއް ހޯއްދަވައި އެންމެ ފަހުން ކިޔުއްވި ޖުމްލަޔަށް ފުންކޮށް ވިސްނަވައިލެއްވުމަށް ހަނދުމަފުޅުކޮށްދެމުން ލިޔުން މިފަށަނީއެވެ.
މެދު އުމުރުގެ ހަރު މީހަކު އޭނާއަށް ލިބުނު ދައުވަތަކަށް ކާވެނީގެ ހަފުލާއަކަށް ގޮސް މީހުންނާ ބައްދަލުވެ އުޅުމުގެ ތެރޭގައި ގޮނޑިއެއްގައި އެކަނި އިންނެވި ދޮށީ ބޭކަލަކު ފާހަގަވެގެން ރަނގަޅަށް ބަލައިލިއިރު އެއީ އޭނާއަށް ވަރަށް ޅަފަތުގައި ކިޔަވައިދެއްވި މުދައްރިސެކެވެ. މި މުދައްރިސް މިހާރު މި ފެނުނީ އޭނާއަށް ކިޔަވައިދެއްވިތާ ފަންސަ ތިރީހަކަށް އަހަރު ފަހުންނެވެ. މެދުތެރެއިން ދުވަހަކުވެސް ބައްދަލެއް ނުވެއެވެ! ވީ އުފަލުން މުސްކުޅި މުދައްރިސާ ސަލާންކޮށްލައި ހާލު އަހައިލާން ދިޔަ ފިޔަވަޅުތަކުގެ މަތީގައި މީނާގެ ހިތަށް، ޒަމާންވީ ހަނދާންތައް އަންނަމުންދެއެވެ. ފެންކަޅިވެ ލޯފޮހެމުން ވަރަށް އުފަލުން އަދި ކުޑަކޮށް ލަދުން ހުރެ މުދައްރިސުގެ އަރިހަށް ގޮސް އަމިއްލައަށް ތައާރަފުވެ އޭނާއަކީ ކާކުކަން ކިޔައިދީފިއެވެ. މުދައްރިސުވެސް ވަރަށް އޯގާތެރިކަމާއެކު އަޑުއައްސަވަން އިންނެވިއެވެ. ނަމަވެސް މި ދަރިވަރުގެ ނަމާއި އެ ބުނި ސްކޫލަކާއި ގުޅުވައި މިއީ ވަކި ކޮންކުއްޖެއްކަމެއް ހަނދާނެއް ނުވިއެވެ!
މާނޭވާއެއް ލާފައި ދަރިވަރު އަލުން ފަށައިފިއެވެ. އިއްޒަތްތެރި މުދައްރިސެވެ. އަޅުގަނޑުގެ އާއިލާ އެދުވަސްވަރު އުޅުނީ ވަރަށް ފަގީރު ހާލުގައެވެ. ސްކޫލަށް ބޭނުންވާ ފޮތް ފަންސުރުވެސް މަހެއްގެ ފަހުކޮށުނަމަ އަޅުގަނޑަކަށް ނުލިބެއެވެ. މިކަހަލަ ދަތި ދުވަސްވަރެއްގައި އަޅުގަނޑުގެ ކުލާހުގައި އުޅުނު ވަރަށް ތަނަވަސް ކުއްޖެއްގެ ގަޑި، އޭނާގެ ދަބަހުގައި އޮށްވައި ކޮންމެވެސް ގޮތަކުން އަޅުގަނޑު ސިއްރު ސިއްރުން ނެގީމެވެ. ހަމަ ކުޑައިރުކޮޅެއް ފަހުން އެ ދަރިވަރަށް އޭނާގެ ދަބަހުގައި ގަޑި ނެތްކަން އެނގިގެން މުދައްރިސަށް ޝަކުވާކުރި ނޫންތޯއެވެ. މުދައްރިސު އަޅުގަނޑުމެން ހުރިހާ ކުދިންނަށް އިވޭވަރަށް، އެ ގަޑި އަނބުރާ ރައްދު ކޮށްދެން ނަސޭހަތްތެރިވީމު ނޫންތޯއެވެ. އެހިސާބުންވެސް އަޅުގަނޑު ދެނެހެރި ކަމަކަށް ނުހަދަމެވެ. ދެން މުދައްރިސު އަޅުގަނޑުމެންގެ ތެރެއިން ދަބަސް ގެންގުޅޭ ކުދިންގެ ދަބަސް ފާސްކުރައްވައި އެވަރުންވެސް އޭނާގެ ގަޑި ނުފެނިގެން އަޅުގަނޑުމެނަށް އެންގެވީ ހުރިހާ ދަރިވަރުން ފާރަށް ކުރިމަތިލައި ދެލޯ މަރައިގެން ތިބުމަށެވެ.
އަޅުގަނޑުމެން ދެލޯ މަރައިލައިގެން ފާރުގައި ދެއަތް ޖައްސައިގެން ތިއްބައި މުދައްރިސު އަޅުގަނޑުމެން ބަލައި ފާސްކުރައްވަމުން ދުރުވެ އެ ގަޑި މުދައްރިސު ނެންގެވީ އަޅުގަނޑުގެ ޖީބުން ނޫންތޯއެވެ. އަޅުގަނޑުގެ ޖީބުން ގަޑި ނެންގެވުމަށްފަހު އެހިސާބުން ހުއްޓައި ނުލައްވައި ދެންތިބި ހުރިހާކުދިންގެ ޖީބު ބެއްލެވިކަން އެދުވަހުވެސް އަޅުގަނޑަށް ފާހަގަވިއެވެ. މިހާރު ދެން އަޅުގަނޑަކީ ކާކުކަން ހަނދާން ވެއްޖެ ދޮގެއްތޯއެވެ؟ މުދައްރިސު ވަރަށް ލޯބިން ހިނިތުންވެލައްވާފައި ބޯ ހޫރައިލެއްވިއެވެ!
މިހިސާބުން ކުރީގެ ދަރިވަރު ވަރަށް ހައިރާންވެ ނަންގަތެވެ. "އެދުވަހު އަޅުގަނޑު އެ ކުރި މުޑުދާރު ކަންތައް ތިޔަ ލޮބުވެތި މުދައްރިސު ވަންހަނާކުރައްވައި މުޅި ކުލާހަށް އަޅުގަނޑު ބޭޒާރު ނުކުރެއްވި ހިސާބުން އަޅުގަނޑު ބޭނުންވީ ރަނގަޅަށް ކިޔަވައިގެން މުދައްރިސަކަށް ވާށެވެ. އަޅުގަނޑު ޚިޔާރު ކުރީ ޤާނޫނު ކިޔަވާށެވެ. އެ ރޮނގުން މަތީ ތައުލީމު ހޯދައިގެން އެކުވެރި ދެ ވަކީލުންނާ ގުޅިގެން އަޅުގަނޑުމެންގެ އޮފީހެއްވެސް ހުންނާނެއެވެ. ނަމަވެސް އަޅުގަނޑަކީ ޔުނިވަރސިޓީގައި ޤާނޫނު ކިޔަވައިދޭ އުސްތާޒަކީމެވެ. މިހިސާބަށް އަޅުގަނޑަށް އާދެވުނީ، އެދުވަހު، އަޅުގަނޑު އެންމެ ޅަފަތުގައި ކުރެވުނު ކުށެއްގެ ސަބަބުން ތިޔަ މުދައްރިސު އަޅުގަނޑު ބޭޒާރުކޮށްނުލެއްވި ކަމުންނެވެ. މުޅި އުމުރަށް ނުފިލާވަރުގެ ލައްގަނޑެއް އަޅުގަނޑުގެ ނިތްކުރީގައި ނުޖެއްސެވިކަމުންނެވެ. އަޅުގަނޑުގެ ނަފްސުގެ އިއްޒަތް ގެއްލިދާނެފަދަ އެއްވެސް ކަމެއް ނުކުރެއްވީތީއެވެ."
"ނަމަވެސް، އިއްޒަތްތެރި މުދައްރިސެވެ، އެދުވަހުވެސް އެދުވަހުގެ ފަހުންވެސް އަޅުގަނޑު ވަކިން އެކަހެރި ކުރައްވައިގެންވެސް އަޅުގަނޑަށް އެ ވައްކަމާބެހޭ އެއްވެސް ވާހަކައެއް ނުދެއްކެވީ ކީއްވެތޯ އަޅުގަނޑު އަބަދުވެސް ހިތުގައި އޮވެއެވެ. އަދި ވަކިން ޚާއްސަކޮށް، ދިރިއުޅުމުގެ ހަރުފަތްތަކުން މަޑުމަޑުން ކުރިއަރަމުން އަންނައިރު ލިބޭ ކޮންމެ ކާމިޔާބެއްގައި އަޅުގަނޑުގެ ހިތުގައި އެ ސުވާލަށް ޖަވާބެއް ލިބިފައި ނުވާތީ، މިވަގުތު އެ ސުވާލަށް ޖަވާބެއް ދެއްވުން ކީއްތޯއެވެ؟"
" ދަރިފުޅާއެވެ، އެއީ ވަރަށް ދަތި ދުވަސްވަރެކެވެ. ކުލާހުގައި ތިބީ މުޅީންވެސް ނިކަމެތީންގެ ދަރިންނޭ ބުންޏަސް ދޮގަކަށް ނުވާނެއެވެ. މުދައްރިސުގެ ހިތުގައި ތިޔަކުދިންގެ ތެރެއިން ވަކި ކުއްޖަކަށް ވަކި ގޮތެއް ބާއްވަން ބޭނުންނުވާތީ އެދުވަހު ތިޔަކުދިންގެ ޖީބުތަށް ހުސްކޮށް ހެދިއިރު އަހަރެންވެސް ހުރީ ދެލޯ މަރައިގެންނެވެ!"
ޝުކުރިއްޔާ.
ވަރަށް ޢިބްރަތްތެރި ލިޔުމެއް. މިޒަމާނުގައި ވެސް މިބީދައިން މީހުން ޢަމަލު ތައް މިގޮތަށް ބަހައްޓާނަމައޭ އަޅުގަނޑު ގެ ހިތަށް އަރައެވެ.
ވަރަށް ސަޅި ލިޔުމެއް. ރީތިކޮށް ލިޔެފައި ހުންން ލިޔުން މަދު ދުވަސްވަރެއްގައި މި ފެނުނީ މުތެއް. ސަމީރުގެ ލިޔުންތަކަށް އަބަދުވެސް އިންތިޒާރު ކުރެވޭ
varah asaru koffi vvv iburaitheri filaavalheh miadhuge mujutamau ah
ماشاءالله، varah furihama, Iburaiytheri