މިއަދު ދުނިޔޭގައި އެބަޔެއްގެ ބަސްވިކޭ ބަޔަކަށް ވެފައިވަނީ، ހުޅަނގާއި އިރުމަތީގެ ސެކިއުލަރިޒަމްއަށް އީމާންވާ މީހުންނެވެ. އެބައިމީހުންނަކީ ދިރިއުޅުމުގެ މައިދާނުގައި އެއްވެސް ދީނަކަށް ޖާގައެއްނެތްކަމަށް ދަޢުވާކުރާ މީހުންނެވެ. އެބައިމީހުންގެ މި ފިކުރު އިސްލާމީ ޤައުމުތަކަށް ވެސްވަނީ އިމްޕޯޓްކުރެވިފައެވެ. މިކަންކުރެވިފައިވަނީ ވަރަށް ވިސްނުންތެރިކަމާއެކު ދުރާލާ ރާވައިގެން ހިންގަމުންދާ ޕްރޮގްރާމުތައް މެދުވެރިކޮށެވެ.
ވެރިކަމުގެ ބާރުތައްފެށެނީ ރައްޔިތުންގެ ކިބައިން ކަމަށް ބުނުމަކީ މުޠުލަޤުގޮތެއްގައި ރަނގަޅު ބުނުމެއް ނޫންކަން އިސްލާމީ ތަރުބިޔަތުން ޒީނަތްވެފައިވާ މުވާޠިނުންތަކެއް ދިރިއުޅޭ މުޖުތަމަޢެއްގައި އެއިން އެއްވެސްމީހަކު ހަނދާނުން ފިލައިގެން ނުދާނެއެވެ. ވެރިކަމުގެ ބާރުތައް ރައްޔިތުންނާހަމައަށް އައިސްފައިވަނީ، ހަމައެކަނި اللَّهُ އަންގަވާފައިވާގޮތަށް އެކަލާނގެ ޤާނޫނު މިބިންމަތީގައި ތަންފީޛުކުރުމުގެ މަސްއޫލިއްޔަތާއިގެންކަން އެބައިމީހުންނަށް ޤަބޫލުކުރެވޭނެއެވެ. ވީމާ ވެރިކަމުގެ ބާރުތައް އެ ރައްޔިތުންގެ އަތުގައިވަނީ، ކޮންގޮތަކަށް އެ ބާރުގެ ބޭނުންކުރުމަށްކަން އެބައިމީހުން ދަންނާނެއެވެ.
ވެރިކަމަކީ اللَّهُ އަށް ޚާއްޞަވެފައިވާ ކަމެއްކަމާއި، ވެރިކަމެއް މީހަކަށްލިބެނީ ވެސް، އެ މީހަކަށް اللَّهُ ވެރިކަން ދެއްވުމުންކަމާއި، އަދި ވެރިކަމުންވަކިވަނީ ވެސް، އެކަލާނގެ އިރާދަފުޅާ ލައިގެންކަން ކަށަވަރުކޮށްދެއްވައި اللَّهُ ވަޙީކުރައްވާފައިވެއެވެ. "قُلِ اللَّـهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ ۖ بِيَدِكَ الْخَيْرُ ۖ إِنَّكَ عَلَىٰ كُلِّ شَيْءٍ قَدِيرٌ." (سورة آل عمران: 26) މާނައީ: [ކަލޭގެފާނު ވިދާޅުވާށެވެ! ވެރިކަން މިލްކުވެގެންވާ، ހައްދަވާ ބޮޑުކުރެއްވި ރަސްކަލާކޯއެވެ! އިބަރަސްކަލާނގެ އިރާދަކުރައްވާ މީހަކަށް ވެރިކަން ދެއްވަމުއެވެ. އަދި، އިބަރަސްކަލާނގެ އިރާދަކުރައްވާ މީހެއްގެ ކިބައިން ވެރިކަން ވަކިކުރައްވަމުއެވެ. އަދި، އިބަރަސްކަލާނގެ އިރާދަކުރައްވާ މީހަކު މަތިވެރިކުރައްވަމުއެވެ. އަދި، އިބަރަސްކަލާނގެ އިރާދަކުރައްވާ މީހަކު ނިކަމެތިކުރައްވަމުއެވެ. އެންމެހާ ހެޔޮކަންވަނީ، އިބަރަސްކަލާނގެ ޔަދުޤުދުރަތް ފުޅުގައެވެ. ހަމަކަށަވަރުން، އިބަރަސްކަލާނގެއީ، ކޮންމެކަމެއްގެ މައްޗަށް ކުޅަދުންވަންތަ ރަސްކަލާނގެއެވެ.]
ޙަޤީޤަތަކީ މިއީއެވެ. ވީމާ މުސްލިމު މުޖުތަމަޢެއްގައި، އެ މީހަކަށް ވެރިކަމެއް ލިބިއްޖެނަމަ، اللَّهُ ގެ ޙުކުމް ތަންފީޛު ކުރުމަށް މަސައްކަތްނުކުރުމަކީ، اللَّهُ އަށް ހަރާންކޯރުވުން ފިޔަވައި އެހެންކަމެއްނޫނެވެ. މި ބިންމަތީގައި އެކަމުގެ ސަޒާ އެ މީހަކަށް ނުލިބުނުނަމަ، ޤިޔާމަތްދުވަހުން މާ ވޭންދެނިވިގޮތުގައި އެކަމުގެ ބަދަލު އެ މީހަކަށް ލިބޭހުއްޓެވެ.
މާތްނަބިއްޔާ صَلَى اللَّهُ عَلَيهِ وَسَلَّمَ ޙަދީޘްކުރައްވާފައިވެއެވެ. {الإِمَامُ رَاعٍ وَمَسْؤُولٌ عَن رَعِيَّتِهِ.} (رَوَاهُ الْبُخَارِىُّ) މާނައީ: {ވެރިމީހާއީ، އޭނާގެ ރައްޔިތުންގެ ކަންތައްތަކުގައި މަސްއޫލުވެރި މީހާއެވެ. އަދި އޭނާއީ އެބައިމީހުންގެ ކަންތައްތަކާމެދު ސުވާލުވެވޭނޭ މީހެކެވެ.}
މުސްލިމުން ޤަބޫލުކުރާގޮތުގައި އިސްލާމީ މުޖުތަމަޢެއްގައި ރައްޔިތުންގެ ވާޖިބަކީ، ހެޔޮގޮތުގައި ވެރިމީހާގެ ބަސް ޤަބޫލުކުރުމާއި، اللَّهُގެ ޙުކުމް ތަންފީޛުކުރުމުގެ މަގުގައި ވެރިމީހާއަށް އެހީތެރިވެދިނުމެވެ. މި މައުޟޫޢުގައި ރަސޫލު اللَّهِ صَلَى اللَّهُ عَلَيهِ وَسَلَّمَ ޙަދީޘްކުރައްވާފައިވެއެވެ. {اسْمَعُوا وَأَطِيعُوا، فَإِنَّمَا عَلَيْهِمْ مَا حُمِّلُوا، وَعَلَيْكُمْ مَا حُمِّلْتُمْ.} (رَوَاهُ مُسْلِمٌ) މާނައީ: {ތިޔަބައިމީހުން ވެރިންގެ ބަސްއަހައި ކިޔަމަންތެރިކަން އަދާކުރާށެވެ. ހަމަކަށަވަރުން، އެބައިމީހުން އަދާކުރަންވީ ކަންކަމުގެ ޒިއްމާ އެއުރެން އުފުއްލަންޖެހޭހުއްޓެވެ. އަދި ތިޔަބައިމީހުން އަދާކުރަންވީ ކަންކަމުގައި ޒިއްމާވާނީ ތިޔަބައިމީހުންނެވެ.}
އަލްޤުރްޠަބީ ވިދާޅުވެފައިވެއެވެ. [މި ބަސްފުޅުގެ މާނައަކީ، ރައްޔިތުންގެމެދުގައި ޢަދުލުއިންސާފު ޤާއިމުކުރުމާއި، ދިރިއުޅުމުގެ ސިޔާސަތު ހެޔޮގޮތުގައި އެކަށައެޅުން މުސްލިމުންގެ ވެރިންގެ ޒިއްމާއެއްކަމުގައި اللَّهُ ލައްވާފައިވެއެވެ. އަދި ވެރިންނަށް ކިޔަމަންތެރިކަން އަދާކުރުމާއި، އެންމެހައިކަމެއްގައި އެބައިމީހުންނަށް ނަސޭހަތްތެރިވެ، އެހީތެރިވުން ރައްޔިތުންގެމައްޗަށް ވާޖިބުކުރައްވާފައިވެއެވެ. ފަހަރެއްގައި ވެރިން އެބައިމީހުން އަދާކުރުން ވާޖިބުކުރައްވާފައިވާ ޙައްޤުތައް އަދާކުރުމުގައި ފަރުވާކުޑަކުރި ކަމުގައިވިއަސް، ތިޔަބައި މީހުންގެމައްޗަށް اللَّهُ ވާޖިބު ކުރައްވާފައިވާ ކަންކަން ފުރިހަމަކުރުމުގައި ތިޔަބައިމީހުން އެކަލާނގެމަގުގައި ނުއުރެދޭށެވެ. އެހެނީ ހަމަކަށަވަރުން، ވެރިންނާއި ރައްޔިތުން މި ދެބައިމީހުންމެ އަދާކުރަންޖެހޭ ޙައްޤުތައް އަދާކުރުމުގައި ފަރުވާކުޑަކޮށްފިނަމަ، اللَّهُ ތަޢާލާ އެބަޔަކަށް ޙައްޤު ޢުޤޫބާތް ދެއްވާހުއްޓެވެ.] (އަލްމުފްހިމު ލިމާއަޝްކަލަ މިން ތަލްޚީޞި ކިތާބި މުސްލިމި،ވޮލިއުމް 4، ޞަފްޙާ 55)
