ދާދި ފަހުން، ބޮޑެތި ހާދިސާތަކެއް ހިނގައިދިޔަ ހައްޖު ދަތުރަކީ ވަރަށް ގިނަމީހުންނަށް އެދަތުރުގައި ދިމާވި ތަފާތު ކަންތައް ހިތުން ފިލައިގެން ނުދާނެ ދަތުރެކެވެ. ބައެއް މީހުންނަށް އެ ދަތުރުގެ ހަނދާންތައް ބިރުވެރިއެވެ. އަދި ވަރަށް ގިނަބަޔަކަށް، ހައްޖުގެ މަތިވެރި އަޅުކަމުން ލިބުނު ހިތަހަމަޖެހުމާއި އުފަލާއި، އަދި މި މާތް އަޅުކަމުގެ ދަތުރުގައި ދިމާވި އެކުވެރިންގެ މަތިން ހަނދާން ނެތުމަކީ ފަސޭހަކަމެއްނޫންކަންވެސް ކަށަވަރެވެ.
ހައްޖުގެ އަޅުކަންނިމި އެނބުރި އެމީހެއްގެ ގައުމަށް ފުރާންތިބި ހާޖީންގެ ގިނަބަޔަކު ޖިއްދާ އެއާޕޯޓުގައި ތިއްބެވެ. ޕާސްޕޯޓާއި ކަސްޓަމުގެ އިތުރުން ސަލާމަތީ ފުރަބަންޑާރަވެރިންގެ ކިބައިން މިންޖުވެގެންތިބި އަރަބި ދެ ހާޖީންގެ ތެރެއިން އެކަކު އިސްނަގައި އަމިއްލައަށް ތައާރަފުވުމުގެ ގޮތުން އޭނާގެ ކުރިމަތީގައި އިށީނދެއިން ހާޖީ އާއި ވާހަކަދައްކައިލާހިތުން ބުނެލިއެވެ.
"حجا مبرورا ، وسعيا مشكورا ، وذنبا مغفورا." މިއީ ހައްޖާގުޅިގެން އެކަކު އަނެކަކަށް ގިނަގިނައިން ކޮށްއުޅޭ ކުރު ދުޢާއެކެވެ. ޖަވާބުގައި އަނެއްހާޖީ ބުންޏެވެ. "ހުރިހާއެންމެންގެ ޙައްޖާއި ސަޢުޔުކުރުން މާތް ﷲ ގަބޫލުކުރައްވާނދޭވެ، އަދި އެންމެހައި މުސްލިމުންގެ ފާފަ ފުއްސަވައިދެއްވާނދޭވެ!"
އިސްނަގައިގެން އަމިއްލައަށް ތައާރަފުވި ހާޖީ، ވާހަކަދައްކައިލާހިތުން ބުންޏެވެ.. "ހާޖީއެވެ! މިއީ ތިބާގެ ފަރުޟު ހައްޖުހެއްޔެވެ! އަދި ނަމަކީ ކޮބައިތޯއެވެ؟ އަޅުގަނޑު ކުރާ މަސައްކަތަކީ، ގެދޮރުއެޅުމުގެ އަމިއްލަ ކުންފުންޏެއް ހިންގުމެވެ. މިއީ އަޅުގަނޑަށް ދިހަވަނަ ހައްޖު މިންވަރުކޮށްދެއްވި ފަހަރެވެ!"
"އަހަރެންގެ ނަމަކީ ސަޢީދެވެ. ނަމަވެސް އަހަރެންގެ ހައްޖުގެ ވާހަކައަކީ "ފުކެއް" ދިގު ވާހަކައެކެވެ. ތިބާ އަޑުއަހަން ފޫހި ވާހަކައަކަށްވެސް ވެދާނެއެވެ!"
"ނޫނެކެވެ! އަހަރެން ފޫއްސެއް ނުވާނެއެވެ! މި އެއާޕޯޓުގައި ކުރަންހުރި ހުރިހާކަމެއް ކޮށްނިމިއްޖެއެވެ. ދެން މިއޮތީ އިންތިޒާރުގެ ދިގު ވަގުތެވެ. މިއީ ތިޔަ ބުނުއްވާ ވާހަކަ ކިޔައިދެއްވަން ހަމަ އެންމެ ރަނގަޅު ވަގުތެވެ!" ސައީދު ހާޖީ އޭނާގެ ހައްޖުދަތުރުގެ ވާހަކަ ކިޔައިދެއްވަން ފެއްޓެވިއެވެ.
"އަހަރެންގެ ވާހަކައިގެ ބޮޑު ބަޔަކީވެސް ތިޔަ ބުނުއްވި "އިންތިޒާރެވެ." އުމުރުގެ ބޮޑުބައެއް ދިޔައީ ހައްޖުދަތުރަށް ފުދޭނެމިންވަރެއްގެ ފައިސާ އެއްކުރުމުގައެވެ. އަމިއްލަ ވިޔަފާރިއެއްގެ ގޮތުގައި ވަރަށް މުއްސަނދި މީހަކު ހިންގާ ހޮސްޕިޓަލެއްގައި އަހަރެން ތިރީސް އަހަރު މަސައްކަތް ކުރީމެވެ. ކޮންމެ މަހަކުވެސް، ހައްޖަށް ދިޔުމުގެ ބޭނުމުގައި މުސާރައިން ވަކި މިންވަރެއް ރައްކާކުރުމަށް އާދަކުރީމެވެ. އެއީ ހޮސްޕިޓަލުގައި މުވައްޒަފުންނަށް އޮންނަ ވަކި ފަންޑެއްގައެވެ.
ތިރީސްއަހަރުވަންދެން އެއްކުރި ފައިސާ ހޮސްޕިޓަލުން އަހަންނާ ހަވާލުކުރި ދުވަހު ކުއްލިއަކަށް ދިމާވީ އަހަރެން ފަރުވާދޭ ކުއްޖެއްގެ މަންމައާއެވެ. ހަމަ އަހަރެން ފެނުމުން އޭނާ ބުނީ ދެން ހިތްހެޔޮކުރާށެވެ، ދެން މި ހޮސްޕިޓަލަކުން އޭނާ އާއި އޭނާގެ ދަރިފުޅެއް ނުފެންނާނޭކަމުގައެވެ. އަދި އެދުވަހަކީ، އެ ދެމައިން އެ ހޮސްޕިޓަލަށް އަންނާނެ ފަހު ދުވަސްކަމުގައެވެ!
އޭނާގާތުގައި އެއީ ކީއްވެތޯ އެހީމެވެ. އަހަރެންގެ ފަރުވާއާއި މެދު ހިތްހަމަނުޖެހެނީތޯވެސް އެހީމެވެ! މިހެން އެހުމުން އޭނާ ވަރަށް ދެރަވެފައި ބުންޏެވެ! "ނޫނެކެވެ! ސައީދެވެ! ތިބާގެ ސަބަބުން އަޅުގަނޑުގެ ދަރިފުޅަށް، އެއްވެސް މީހަކު ހީވެސް ނުކުރާހައި ލުއިފަސޭހަވެއްޖެއެވެ. އެއީ ތިބާގެ ހިތްހެޔޮކަމާއި ކެތްތެރިކަމުންނެވެ. އަޅުގަނޑުގެ ދަރިފުޅަށް ފަރުވާ ދިނުމުގައި ތިބާގެ އޯގާތެރިކަމަށް މާތް ﷲ ހެކިވެވޮޑިގެންވާނެއެވެ!"
މިހިސާބަށް ވާހަކަ ދިޔުމުން އަޑުއަހަން އިން އެކުވެރިޔާ، ސައީދު ގާތުގައި އަހައިލިއެވެ. "ތިޔަހެން ވިއްޔާ އޭނާގެ ދަރިފުޅަށް ކުރަންޖެހޭ ބޭސް ކުރުން ހުއްޓައިލަން އެ އުޅުނީ ކީއްވެހެއްޔެވެ؟"
ސައީދު ކިޔައިދެއްވިއެވެ. "އަހަރެން ދެން ދިޔައީ ހޮސްޕިޓަލްގެ އޮފީސްބަޔަށެވެ. ގޮސް އެ ޒުވާންކުއްޖާގެ ބޭސްފަރުވާ ހުއްޓައިލަން އެކުއްޖާގެ މަންމަ ނިންމީ ކީއްވެތޯ ސުވާލުކުރީމެވެ. އެމީހުން ދިން ޖަވާބަކީ، އެކުއްޖާގެ ބައްޕަ އަދާކުރާ ވަޒީފާ ގެއްލުނީ ކަމުގައެވެ. ވީމާ ބޭސްފަރުވާގެ ޚަރަދުބަރަދު ކުރެވޭނޭ ގޮތެއްނެތީއެވެ."
މިހިސާބަށް އަޑުއަހާފައި ސައީދުގެ އެކުވެރިޔާ ބުންޏެވެ. "ތިޔަ ދިމާވީ ހާދަހައި ހިތްދަތިކަމެކެވެ!"
ސައީދު އޭނާގެ ވާހަކައިގެން ކުރިޔަށްދިޔައެވެ. "ވީ ދެރައިން އަހަރެން ދިޔައީ ހޮސްޕިޓަލުގެ މެނޭޖަރުގެ އަރިއަހަށެވެ. އަރިއަހަށް ގޮސް، ހޮސްޕިޓަލުގެ ކޮންމެވެސް ފަންޑެއްގެ ދަށުން އެ ނިކަމެތި ކުއްޖާއަށް އެހީތެރިވެދެއްވާތޯ އާދޭސްކުރީމެވެ. ދެއްވި ޖަވާބަކީ، މި ހޮސްޕިޓަލަކީ ވިޔަފާރިކުރާ ބޮޑު ކުންފުންޏެއްގެ އެއްގޮފި ކަމުގައެވެ. ކޮންމެ މެނޭޖަރެއްގެ ޒިންމާއަކީ އެމީހަކު ހިންގާތަނަކުން، ލިބެން އޮތް އެންމެ ބޮޑު ފައިދާއެއް މައި ކުންފުންޏަށް ހޯދައިދިނުމެވެ. އޭނާ އާއި ހަވާލުކުރެވިފައިވަނީ، ‘ ނިކަމެތިންނަށް ހިލޭ ސާބަހަށް ކަންތައްކުރާ ޖަމިއްޔާއެއް ނޫންކަން ‘ މެނޭޖަރު ވަރަށް ސާފުބަހުން، ތަންކޮޅެއް ދުރުގައި ތިބި މީހުންނަށްވެސް އިވޭވަރަށް، ދެތިން ހަތަރުފަހަރު އަހަންނަށް ހަނދާންކޮށްދެއްވިއެވެ!
މެނޭޖަރުގެ ކޮޓަރިކޮޅުން ނުކުމެވުނުއިރު އަހަރެން ހުރީ، ވީ މޮޅިން ހިތްހަލާކުވެފައެވެ. ދެރަވެގެން ދެން ކުރާނީ ކީތްބާއެވެ ހިތަށް އަރައި، އެވިސްނުމުގައި ހުއްޓައި ޖީބުގައި ހުރި ފައިސާތަކުގައިއަތް ޖެހިއްޖެއެވެ! ހިތަށް އަރައި ފައިބާ ޚިޔާލާއި ވިސްނުމުގެ ހަލުވިކަމުން ކުޑައިރުކޮޅަކު ގާފޮޅެއްގެމަތީގައި އިށީނދެގެން މަޑުމަޑުން އިނީމެވެ!
ކުޑައިރުކޮޅަކު މިހެން އިނދެ ވިސްނައިލުމުން އަހަރެން ކުރާންވީކަންތައް ވަރަށް ސާފުކޮށް، ހިތުގައި އެއްވެސް އަރައިރުމެއް ނެތްމިންވަރަކަށް ވިސްނި، ތަފާތު ވަސްވާސާއި ފިކުރުތަކުން ހިތް ސާފުވެއްޖެއެވެ! އެހިނދު، އަހަރެންގެ ވަށައިގެން ކިތަންމެ ގިނަބަޔަކު ހިނގާބިނގާ އުޅުނުކަމުގައިވިޔަސް، އެކަނިމައި އެކަނި މަޑުމައިތިރި އެކަހެރިތަނެއްގައި އިނދެ ސާފު ހިތަކައިގެން މީހަކު ﷲ އަށް ދުޢާ ދަންނަވާނޭ ބީދައިން އެ ހަލަބޮލި މާހައުލުގައި އިނދެ ﷲ ގެ ޙަޟްރަތުގައި ދުޢާއެއް ދެންނެވީމެވެ!
"ހައްދަވައި ބޮޑުކުރެއްވި ރަސްކަލާނގެއެވެ. މި ނިކަމެތި އަޅާގެ ހިތް އެންމެ ސާފުކޮށް އެނގިވޮޑިގެންވާނި ހަމަ އިބަރަސްކަލާނގެއަށެވެ. މިއަޅާގެ ހިތުގައިވާ އެންމެބޮޑު އެދުމަކީ އިބަރަސްކަލާނގެ ގެފުޅު އަރިއަހަށް ގޮސް އަޅުކަންކުރުމާއި، ކީރިތި ރަސޫލާގެ މިސްކިތްފުޅަށްގޮސް ނަމާދުކޮށް އެމާތް ރަސޫލާއަށް ޞަލަވާތް ކިޔަވައި ވެދުން ދެންނެވުންކަން އިބަރަސްކަލާނގެއަށް އެނގިވޮޑިގެންވާނެއެވެ. މި ނިކަމެތި އަޅާ މި އައީ ދިގު މުއްދަތެއްގައި އެކަމަށް ތައްޔާރުވަމުންނެވެ. ނަމަވެސް މި ހިނދުކޮޅުގައި މިއަޅާ މި ޚިޔާރުކުރީ، މިއަޅާ ޙައްޖަށްދާން އެއްކުރި ފައިސާއިން ނިކަމެތި ކުއްޖެއްގެ ފަރުވާއަށް އެފައިސާ ހަދިޔާކުރުމަށެވެ. އެއީ އެކުއްޖާގެ މުޅި ޙަޔާތަށް އެކަމުން ފައިދާކޮށް، ނިކަމެތި މަންމައެއްގެ ހިތަށް ލުޔެއްވެސް ހޯދައިދިނުމެގެ އުންމީދުގައެވެ. މިއަޅާގެ ދުޢާއަކީ އެކަން މިއަޅާގެ ފަރާތުން ގަބޫލުކުރައްވައި، މިއަޅާއަށް ކޮންމެވެސް ދުވަހަކުން ހައްޖުދަތުރެއް މިންވަރުކޮށްދެއްވުމެވެ!"
މި ދުޢާއިން އަވަދިވެގެން ދެން އަހަރެން ދިޔައީ އެ ހޮސްޕިޓަލުގެ ހިސާބުކިތާބު ބަލަހައްޓާ ބަޔަށެވެ. ގޮސް އަހަރެންގެ އަތުގައި ހުރި ފައިސައިން، އެއްކަލަ ކުއްޖާއަށް ހަމަސްދުވަހަށް ފަރުވާ ކުރެވޭނޭ މިންވަރަށް ފައިސާ ދައްކައިފީމެވެ. އަދި އެތަނުންމީހެއްގެ ގާތުގައި، ބަލިކުއްޖާގެ މަންމައަށް ގުޅައި، ފަރުވާ މެދުކަނޑައިނުލުމަށާއި ހޮސްޕިޓަލުގައިވާ ޚާއްސަ ފަންޑެއްގެދަށުން އޭނާގެ ދަރިފުޅަށް ހިލޭ ބޭސްކުރެވޭނޭކަން އެންގުމަށްވެސް އެދުނީމެވެ!
ސައީދު ހާޖީގެ ވާހަކަ އަޑުއަހަން އިން އެކުވެރިޔާ މިހާރު އިނީ، މި އިވޭ ވާހަކައިގެ ބާވަތުން ވަރަށް ބޮޑަށް ފެންކަޅިވެފައެވެ. ވާހަކައިގެ ބާކީ އަޑުއެހުމަށް ވަރަށް ޝައުގުވެރިކަމާއެކު މިހެން އިނދެ އަހައިލިއެވެ! "ތިބާގެ ކިބައިގައި މާތް ﷲ އަބަދުވެސް ބަރަކާތްލައްވަވާށިއެވެ. އަދި ތިބާފަދަ އެހެންމީހުންވެސް މި ދުޢާގައި ޝާމިލުކުރަމެވެ. އެއްކުރި ފައިސާކޮޅު ހޮސްޕިޓަލުގެ ޚާއްސަފަރުވާދޭ ބަޔަށް ދީފައި، ދެން ހައްޖަށް މިފަހަރު ތިޔަ ދުރުވެވުނީ ކޮންގޮތަކުންތޯއެވެ؟"
ސައީދު ހާޖީ އޭނާއަށް ދެން ކަންތައް ދިމާވިގޮތުގެ ވާހަކަ ކިޔައިދިނެވެ. "މުޅި އުމުރުގައި ހައްޖަށް ދާން އެއްކުރި ފައިސާއިން ދެން އެކަން ނުކުރެވޭނެކަން އެނގި ވަރަށް ދެރަވީމެވެ. މޮޅިންހުރެ ގެއަށް ދިޔައިރު، ހިތުގެ އެއްބައި ހަމަ އުފަލުން ފުރެނީއެވެ. އަހަރެން ފަރުވާދިން ކުއްޖާއަކީ ރަނގަޅަށް ފަރުވާދެވިއްޖެނަމަ އޭނާގެ ބަލިން ފުރިހަމައަށް ފަސޭހަވެ، އާދައިގެ ރަނގަޅު ދިރިއުޅުމެއް އުޅެވޭނޭ ކުއްޖެކެވެ. ފަރުވާކުރުން ހުއްޓާލައިފިނަމަ މުޅި އުމުރުގައި އެހެންމީހުންގެ އެހީގައި ނޫނީ އުޅެވޭނެ ކުއްޖެއްނޫނެވެ. އެކުއްޖާގެ ދިރިއުޅުމަށް ސީދާއެހީއެއްވެވި، އޭނާގެ ނިކަމެތި މަންމަގެ ހިތަށް ހިތްހަމަޖެހުމެއް ހޯދައިދެވެން މާތް ﷲ އަހަރެން މެދުވެރިކުރެއްވިކަމަށްޓަކައި އުފާކޮށް ޝުކުރުދެންނެވީމެވެ.
ހިތަށް އަރައިފައިބާ ތަފާތު ޝުއޫރުތައް ގިނަކަމުން، އެރޭ ނިދުނީ ރޮވެމުންނެވެ. ހަމަ ފުންނިދި ލިބުމުން އަހަންނަށް ހުވަފެނުން ފެންނަންފެށީ ކަޢުބަތުﷲ ގެފުޅު އަރިއަހުގައި ޠަވާފުކޮށް އުޅެނިކޮށެވެ. ބައެއްމީހުން، އަހަންނަށް މަބްރޫރު ހައްޖަކަށް އެދި ބާރަށް، އަޑުހަރުކޮށް ގޮވަމުން ގެންދިޔައެވެ. އަނެއްބަޔަކު ގޮވަނީ އަޅުގަނޑު މިހާރު މިހުރީ ބިމުގައި ހައްޖުވުމުގެ ކުރިން ﷲގެ ޙަޟްރަތުގައި ޙައްޖުވެފައިކަމުގައެވެ. އަދި އެމީހުންގެމަތިންވެސް ދުޢާކުރުމަށް ހަނދާކޮށްދީ ގޮވަމުން ގެންދިޔައެވެ! އެރޭގެ ނިދިން ހޭލެވުނުއިރު އަހަރެން ހުރީ ކުރީރޭގައި ނިދި މީހާގެ ގޮތުގައެއް ނޫނެވެ! ހޭލެވެނުއިރު އިހްސާސް ކުރެވުނީ އާދަޔާޚިލާފު އުފަލަކާއި ހިތްހަމަޖެހުމެކެވެ. ބުނެދޭންވެސް އުނދަގޫ ކަހަލަ، ވަރަށް ފުން އުފާވެރިކަމެކެވެ! ފަތިސްނަމާދުކޮށް އަވަދިވެގެން ﷲ ނިންމެވި ގޮތަކަށް ރުހި ހިތްހަމެޖެހިގެން އަހަރެންގެ ހަޔާތުން މުޅިން އާދުވަހަކާ ކުރިމަތިލައިފީމެވެ.
ވަޒީފާއަށް ނިކުތުމުގެ ކުޑައިރުކޮޅެއްކުރިން، ހޮސްޕިޓަލު މެނޭޖަރު ފޯނުކޮށް އޭނާއަށް ވަރަށްބޮޑުކަމެއް ކޮށްދެން ޖެހިއްޖެކަމުގައި ބުނެފިއެވެ. ކުރަންވީ ކޮންކަމެއްތޯ ސުވާލުކުރުމުން ބުނެފިއެވެ. ހޮސްޕިޓަލް ހިންގާ ކުންފުނީގެ ވެރިޔާ މިއަހަރުވެސް ހައްޖަށް ވަޑައިގަންނަވަން ބޭނުންފުޅުވެއްޖެއެވެ. އޭނާ އަބަދުވެސް ވަޑައިގަންނަވާނީ އޭނާއަށް ‘ ފިޒިޔޯތެރަޕީ ‘ ދޭ އެހީތެރިޔާއާއި އެކީގައެވެ. ނަމަވެސް އެހީތެރިޔާގެ އަންހެނުން އިނީ ވިހަން ތައްޔާރުވެފައެވެ. އެހެންވެ މިއަހަރު އޭނާއަށް ދެވޭކަށް ނެތެވެ. މިހާރު ހޮސްޕިޓަލުގެ މެނޭޖަރު އަހަރެންގާތުގައި މި އެދެނީ އެ އެހީތެރިޔާގެ ބަދަލުގައި ވެރިޔާގެ އަރިއަހުގައި ހައްޖަށް ‘ގޮސްދިނުމަށެވެ! ‘ހަމަވަގުތުން އާނއެކޭ ބުނެ ﷲ އަށް ޝުކުރުގެ ސަޖިދަކޮށް އުފަލުން ވަޒީފާއަށް ދިޔައީމެވެ! އެކުވެރިޔާއެވެ! އަހަންނަށް މާތް ﷲ މިންވަރުކުރެއްވީ ގާތުން އެއްވެސް ޚަރަދަކާއި ނުލައި ލިބުނު ހައްޖު ދަތުރެކެވެ! އަދި ކުންފުނީގެ ވެރިޔާ، އަހަރެން އޭނާއަށް ފަރުވާދިނުމުގައި ކަންތައްކޮށްދިންލެއް ރަނގަޅުކަމަށް ވިދާޅުވެ ފައިސާގެ ބޮޑު އިނާމެއްވެސް ދެއްވިއެވެ. ހައްޖުދަތުރުގައި އަހަންނާއި ވެރިޔާއާއި ކޮންމެވެސް މިންވަރެއްގެ ގާތް ގުޅުމެއްވެސް އުފެދުނެވެ. އަހަރެންގެ ހާލުއަހުވާލު އެއްސެވުމުން ކިޔައިދިނީމެވެ. އެއްކަލަ ކުއްޖާގެ ބޭސްފަރުވާގެ ވާހަކަވެސް ކިޔައިދިނީމެވެ.
ހައްޖުގެ އަޅުކަމުގައި އޭނާ އުޅުއްވަމުން އެ ބަރަކާތްތެރި ބިމުގައި ހުންނަވައި، ހޮސްޕިޓަލުގެ އިސްމީހުންނާއި ގުޅުއްވައި ވަރަށް ގިނަކަންކަން ބަދަލުކުރަން އެންގެވިއެވެ. އެއްކަލަ ކުއްޖާގެ ފަރުވާ ކުރަންޖެހޭނީ ވެރިޔާގެ އަމިއްލަ ޚަރަދުގައި ކަމަށާއި، ކުރިމަގުގައި އެފަދަ ކަންކަމަށް ޚާއަސަ ފަންޑެއް އޮންނަންޖެހޭނަކަމަށް އެންގެވިއެވެ! އަދި އެ ބަލިކުއްޖާގެ ބައްޕައަށް ވެރިޔާގެ ކުންފުންޏަކުން ވަޒީފާ ހަމަޖައްސަންވެސް އަމުރުކުރެއްވިއެވެ. އަދި އަހަރެން ބެހެއްޓި ފައިސާ އަހަންނަށް ރަށްދުކުރުމަށްވެސް ހިސާބުކިތާބާއި ބެހޭ ބަޔަށް އަމުރުކުރެއްވިއެވެ! އެކުވެރި ހާޖީއެވެ. ﷲ ގެ ރަހްމަތްފުޅު ނިކަން ބައްލަވާށެވެ! އަހަރެންގެ ހައްޖުދަތުރުގެ ވާހަކަ މި ކިޔައިދެވުނީއެވެ! މާތް ﷲ އަށްވުރެ މޮޅަށް ރާއްވަވާ ފަރާތެއް އަޅެ ވޭހެއްޔެވެ؟ "
ހިތްހެޔޮ ސައީދު ހާޖީގެ ވާހަކަ ކަނުލައި އަޑުއަހަން އިން އެކުވެރިޔާގެ ދެލޮލޮން ކަރުނަ އެއްވެސް ހިފެހެއްޓުމެއްނެތި އޮހެމެންދެއެވެ. އޭނާ އިންތަނުން ތެދުވެ، ސައީދު ހާޖީގެ ނިތްކުރީގައި ބޮސްދީފައި ބުންޏެވެ. " މާތް ﷲ ގަންދީ ބުނަމެވެ. ދުވަހަކުވެސް މިހާ ލަދެއް ނުގަންނަމެވެ! އަހަރެން ކޮންމެ އަހަރަކު ހައްޖަށް އަންނަތާ މިހާރު މިވީ ދިހަވަނަ އަހަރެވެ. ކޮންމެ އަހަރަކު ހައްޖަށް އައުމަކީ މަގޭހިތުން ވަރަށް މޮޅުކަމެކެވެ! އަދި، ކޮންމެ ހައްޖަކަށްފަހު މާތް ﷲ ގެ ޙަޟްރަތުގައި އަހަރެންގެ ދަރަޖަ އުފުލެމުން އަންނާނޭކަމަށް އަހަރެން ހީކުރީމުއެވެ. އެކުވެރި ސައީދެވެ! އަހަރެން ކަހަލަ މީހުންގެ ހައްޖަކާއި ތިބާގެ ހައްޖާއި އެއްހާސް ގުނަ ތަފާތެވެ! އެއީ، ގެފުޅު އަރިއަހަށާއި ހައްޖަށް، އަހަރުމެން އަންނަނީއެވެ! ތިބާ ހެއްޔެވެ؟
"ތިބާގެ ޙައްޖަކީ އަހަރުމެން ހައްދަވައި ބޮޑުކުރެއްވި މަތިވެރިފަރާތުގެ ދަޢުވަތަކަށް، މި މާތް ބިމަށް އައިސް އަދާކުރެވުނު ހައްޖެކެވެ! މާތް ﷲ ތިޔަ ޞާލިޙް އަޅާގެ ފާފަ ފުއްސަވައި ޙައްޖު ގަބޫލު ކުރައްވާނދޭވެ!" ދެ ހާޖީން ދެ ދިމާއަށް ފުރުމުގެ ކުރިން ސަލާންގަލާންކޮށް ވަކިވީ މި ދުއާއަށް ފަހުގައެވެ!