ޑރ. مُحَمّدُ مَشَالِي – މިސްރުގެ ނިކަމެތީންގެ ޑަކްޓަރު ނިޔާވެއްޖެ!

އަޅުގަނޑަށް ލަފާކުރެވެނީ މިސްރުގެ طَنْطَا ގެ ނިކަމެތީންނަށް ފަންސާހަކަށް އަހަރު ހިލޭކަހަލަ ގޮތަކަށް  ފަރުވާ ކޮށްދެއްވި ޑރ. މުޙައްމަދު މަޝާލީގެ ނަންފުޅު ތިބާ މިހައިތަނަށް އަޑުއައްސަވާފައެއް ނުވާނެ ކަމުގައެވެ.

މި މަޒްމޫނުގައި އެ ހިތްތިރި، އޯގާވެރި ޑަކްޓަރުގެ ޚިދުމަތާ ބެހޭގޮތުން  އޭނާއަށް ހައްގުވާ މިންވަރަށް އަޅުގަނޑަށް ލިޔެވިއްޖެނަމަ، މިދެންނެވި ޑރ.  މުޙައްމަދު މަޝާލީގެ ނަންފުޅު ތިބާ އިރާދަކުރެއްވިއްޔާ ދުވަހަކުވެސް ހަނދާނެއް ނުނެތޭނެއެވެ!

ހުސްވި ޖުލައި މަހުގެ 28 ވީ އަންގާރަ ދުވަހު މިސްރުގެ ޚަބަރުފަތުރާ ހުރިހާ މީޑީޔާއަކުން ފޮނުވި ހިތާމަވެރި ޚަބަރަކި އެމީހުންގެ ތެރޭގައި މަޝްހޫރުވެފައިވާ ގޮތުންނަމަ، "ނިކަމެތީންގެ ޑަކްޓަރު" ހަމަ ކުއްލި ގޮތަކަށް ނިޔާވި ޚަބަރެވެ. އުމުރުފުޅަކީ 76 އަހަރެވެ.

ދާދި ފަހަކާ ޖެހެންދެން އޭނާގެ ކްލިނިކުގައި ބަލިމީހުންނަށް ފަރުވާދެއްވުމުގެ ފީ އެއްގެ ގޮތުގައި ނެންގެވީ މިސްރުގެ 5 ޕައުންޑެވެ. އެއީ ދިވެހި 5 ރުފިޔާއާ ދާދި ހަމަ އެއް މިންވަރެވެ. ފައިސާގެ އަގުވެއްޓި ދިރިއުޅުމުގެ ޚަރަދު ބޮޑުވުމުން، ދިވެހި 10 ރުފިޔާގެ މިންވަރު، އާދެ، މިސްރުގެ 10 ޕައުންޑު ނަންގަވަން ފެއްޓެވީ ދާދި ފަހުންނެވެ. ހަމަ އެ ސަހަރުގެ ތަނަވަސް ހިސާބު ހިސާބުގައި އޭނާއަށްވުރެ ތަޖުރިބާ މަދު ޑަކްޓަރުން ނަންގަވާ އެވަރެޖް ފީއަކީ މިސްރުގެ 125 ށް ޕައުންޑުކަން އެނގިވަޑައިގެން ހުންނަވައެވެ.

ފަހަކަށް އައިސް މި ފެތުރުނު ހުރިހައި ވައްތަރެއްގެ އިޖްތިމާޢީ ވިޔުގަތަކުގައި ޑރ.  މުޙައްމަދު މަޝާލީގެ ނަންފުޅު "ނިކަމެތީންގެ ޑަކްޓަރު" ގެ ގޮތުގައި މުޅި އަރަބި ދުނިޔޭގައި މަޝްހޫރުވީ ޚުދު ނިކަމެތީންގެ ދޫދޫމަތީން އޭނާގެ ހިތްތިރި މަޑުމައިތިކަމުގެ ވާހަކަ ދެއްކޭލެއް ގިނަކަމުންނެވެ. ފަހަކަށް އައިސް ގިނަ ޒުވާނުން ކިޔަވަނީވެސް އެންމެ އަވަހަށް މުއްސަނދިވެވޭނީ ކޮން ރޮނގަކުން ކިޔަވައިގެންތޯ ބަލައި އެފަދަ އިލްމެކެވެ. އަދި ކިޔަވައިގެން ނިކުމެ ދަތުރުކުރަނީ ހަމަ އެ ލަނޑުދަނޑިޔާ ދިމާއަށެވެ. މިކަހަލަ ދުވަސްވަރެއްގައި އެކަހަލަ އޮޔެވަރެއް ފެތުރިފައިވާ ހިސާބެއްގައި ވަށައިގެން ތިބި އިންޖިނޭރުންނާ ޑަކްޓަރުން އަގުބޮޑު ގެތަކާއި މަޝްހޫރު މަރުކާތަކުގެ ކާރުތައް ގަނެ ދަޅަދައްކާއިރު މިއިން އެއްވެސް ކަމަކަށް ނުހެއްލި، ޑރ.  މުޙައްމަދު މަޝާލީގެ ހަނދާނުން އެއްގޮތަކަށްވެސް، ހިނދުކޮޅަކަށްވެސް ކައްސައިނުލީ އޭނާގެ ބައްޕަގެ ވަސިއްޔަތެކެވެ. " ދަރިފުޅާއެވެ، ދަރިފުޅަށް ބޭސްވެރިކަން ކިޔަވައިދިނީ ދަރިފުޅުގެ މަންމަ މިސްރެވެ. ބޭސްފަރުވާކުރުމުގެ އަގުބޮޑު އިލްމާއި މާތް ޚިދުމަތް ދަރިފުޅު ތިޔަ ކިޔަވައި ނިންމީ މުޅީން ހިލޭކަން އަބަދުވެސް ހަނދާންކުރާށެވެ. ބައްޕައަކީ ނިކަމެތި މުދައްރިސެކެވެ. ދަރިފުޅަށް ހިލޭ ކިޔެވޭނެގޮތް ދައުލަތުން ފަހިކޮށް ނުދިންނަމަ، ދަރިފުޅު ޙަކީމަކަށް ވީހީ ކޮން އެހެން ގޮތަކުން ހެއްޔެވެ؟ އެހެންވީމާ، ދަރިފުޅާއެވެ. ނިކަމެތީންގެ މަތިން ދުވަހަކުވެސް ހަނދާން ނައްތައިނުލައްޗެވެ!"

މިސްރުގެ ޓީވީ ޗެނެލަކަށް ޑރ. މަޝާލީ ކިޔައިދެއްވި ގޮތުގައި މިސްރުގެ شهادة ثانوي عامة  ހޯއްދެވީ ވަރަށް މަތީ މާކްސް ތަކަކާ އެކީގައެވެ. ބޭނުންފުޅު ރޮނގަކުން ޔުނިވަރސިޓީ ތައުލީމާ ކުރިމަތިލެވޭ ފެންވަރުގައެވެ. "ޘާނަވީ ޢާންމާ ސެޓްފިކެޓް" އަކީ މިރާއްޖޭގައިނަމަ އަޅުގަނޑުމެންގެ ދަރިވަރުން ގްރޭޑް 12 ނިންމައި " ކޭމްބްރިޖް އިންޓަރނޭޝަނަލް އެގްޒޭމް" ކުރުމަށްފަހު، އިނގިރޭސިވިލާތުން އެ ދޫކުރައްވާ، އޭ ލެވަލް ނިންމި ކަމުގެ ރަސްމީ ލިޔުމާ އެއް ފެންވަރުގެ ސަނަދެކެވެ. އެންމެ މޮޅު ދަރިވަރުންގެ ތެރޭގައި ހިމެނިވަޑައިގަތުމުން ދިރިއުޅުއްވި ރަށްފުށު ހިސާބުން ވެރިރަށް ޤާހިރާއަށް ބައްޕަ އަރިހުގައި ވަޑައިގެން ނަންހިނގާ ޔުނިވަރސިޓީއަކަށް ވަޑައިގެން ކަބަރުބެއްލެވިއިރު، ޑަކުތަރީކަމަކީ ނިކަމެތީންގެ ދަރިންގެ ހިޔަނި ފޯރާ ހިސާބަށްވެސް ކައިރިވެވޭވަރުގެ ކިޔެވުމެއްނޫނެވެ. މިކަމާ ހިތާމައިން ދެބަފައިން އެނބުރި އުފަން ރަށަށް ވަޑައިގެން މާގިނަދުވަސް ނުވަނީސް އެދުވަސްވަރުގައި ވެރިކަމުގައި ހުންނެވި ރައީސް ޖަމާލް ޢަބްދުއްނާޞިރު، މަތީ ތައުލީމުވެސް ހިލޭ ކިޔެވޭގޮތަށް ނިންމަވައިފިއެވެ! ޑރ. މަޝާލީ  50 އަހަރު ފަހުން މި އުފާވެރި ވާހަކަ ވިދާޅުވެދެއްވާއިރުވެސް ހުންނަވަނީ އެދުވަހުގެ ޖަޒުބާތު ހިތްޕުޅުގައި އާލާވެ، ފެންކަޅިވެ ވަޑައިގެންފައެވެ. " އަޅުގަނޑަށް ގޮވާލައްވާފައި ބައްޕަ ބުނުއްވިއެވެ، ދަރިފުޅާ މުޙައްމަދާއެވެ! އަވަހަށް މިސްރަށް ގޮސް ( ވެރިރަށް ޤާހިރާއަށް މިސްރު ކިޔުމަކީ ރަށްފުށުމީހުންގެ އާދައެކެވެ) ބައްޕަމެން ކުރީދުވަހު އެ ދިޔަ ޔުނިވަރސިޓީއަށް ގޮސް ދަރިފުޅުގެ މޮޅު ސެޓްފިކެޓްތައް ހުރަހަޅާށެވެ!"

އަވަހާރަވުމުގެ މަހެއްހާ ދުވަސްކުރިން ދެއްކެވި ވާހަކަފުޅެއްގައިވެސް، ފެންކަޅިވެވަޑައިގެން ހުންނަވައި ވިދާޅުވިއެވެ. "ރައީސް ޖަމާލް ޢަބްދުއްނާޞިރު އެގޮތަށް ނުނިންމެވިނަމަ، އަހަރެން ކަހަލަ ނިކަމެތި ދަރިވަރަކު ޑަކުތަރީކަން ކިޔަވާނީ ކޮންގޮތަކުން ހެއްޔެވެ؟ މުސްކުޅި އުމުރުގައިވެސް އަހަރެން އުޅެންޖެހުނީހީ ބަސްދުއްވަން ނުވަތަ ބަހެއްގައި ޓިކެޓް ކަނޑާ މީހަކަށް ތޯއްޗެކެވެ!"

ޒުވާން މުޙައްމަދު މަޝާލީ ޘާނަވީގެ ފަހު އިމްތިހާނުގައި ހޯއްދަވާފައިވާ މާކްސްތައް މަތިވުމުގެ ސަބަބުން އެދުވަސްވަރު މުޅި މެދު އިރުމަތީގައިވެސް، ކިޔަވައިދިނުމުގެ ފެންވަރު ރަނގަޅުކަމަށް މަޝްހޫރު ކައިރޯ ޔުނިވަރސިޓީގެ ފެކްލްޓީއޮފް މެޑިސިންގައި ކިޔަވައިވިދާޅުވުމުގެ ފުރުސަތު ލިބިވަޑައިގަތެވެ. ފަހު އިމްތިހާނު ހެއްދެވީ 1967 ގައެވެ. މިސްރުމީހުން ލަދުގަންނަވަރުގެ ދެރަވުމަކުން ގެއްލުންވި، އިޒްރޭލާ ދެކޮޅަށް ކުރި ހިތާމަވެރި ހަނގުރާމައިގެ ތެރޭގައެވެ. ދަސްވެނިވެވަޑައިގަތުމަށްފަހު ސަރުކާރަށް ޚިދުމަތް ކުރަން ޖެހޭ މުއްދަތު ނިންމަވާފައި، އަމިއްލަފުޅު ކްލިނިކެއް ހުޅުއްވީ 1975 ވަނަ އަހަރު އެވެ.

މިސްރުގެ ދެކުނުން އުތުރަށް މެދުތެރޭކަނޑުގެ އައްސޭރީގެ ތިރި ދަނޑުބިންތަކާ ދިމާއަށް މަޝްހޫރު ނީލަކޯރު  ދަތުރުކުރުމުގައި ދެކަފިވެގެން ދާއިރު ތިނެސްކަން މާސިންގާ 'ޑެލްޓާއެއް' އުފެދެއެވެ. ( ޑެލްޓާ  Δއަކީ ގްރީކް އަލިފުބާގެ 4ވަނަ އަކުރެވެ. އިނގިރޭސިބަހުން އަރަބި ބަހަށް އަނބުރާފައިވަނީ دلتا މިހެންނެވެ.) ޠޮންޠޯ އަކީ މިދެންނެވި ބިންމޮޅު ތިނެސްކަން ބިމުގެ ދިމާމެދެއްހައި ހިސާބުގައިވާ، ބޮޑު ސަހަރެކެވެ. މިއީ މުޅި ދުނިޔެއަށް މަޝްހޫރު މިސްރުކަފަ ހައްދާ ހިސާބެވެ. މިސްރުގެ އެންމެ ދެކުނުން އެންމެ އުތުރަށް ދެމިގެންދާ މިކޯރުގެ ފެނާއި މިދެންނެވި (ޑެލްޓާގެ) ބިމުގެ މުއްސަނދިކަމާއި އެހިސާބުގެ ވައިގައި ހުންނަ ޚާއްސަ ސިފަތަކެއްގެ ސަބަބުން މިސްރުގެ ކަފަޔަކީ އޭގައި އެކުލެވޭ ހިމަހިމަ ނަރުތައް ނިސްބަތުން ދިގުކަމަށް މަޝްހޫރު ކަފައެކެވެ. މި މުހިންމު ސަހަރަކީ ވެރިކަންކުރާ ޤާހިރާގެ އުތުރުން ސަތޭކަވަރަކަށް ކިލޯމީޓަރުގައިވާ، ނިކަމެތީން ގިނަ ހިސާބެކެވެ. ޒުވާން ޑަކްޓަރު މުޙައްމަދު މަޝާލީ އަލަށް ކްލިނިކެއް ހުޅުއްވަން ގަސްތުކުރެއްވީ މިދެންނެވި ދަނޑުވެރިންނަށް ހޭހަންކުރެއްވުމަށް އެމީހުންގެ ތެރޭގައެވެ!

މިސްރު މީހުންނަށް މި ހިތްތިރި، ހިތްހެޔޮ ޑަކްޓަރުގެ ނަންފުޅު އެނގިފައި އޮތްނަމަވެސް، އަރަބި ދުނިޔޭގައި ޑަކްޓަރު މަޝާލީގެ ނަންފުޅު ވިދާލީ، ޔުނައިޓެޑް އެރެބް އެމިރޭޓްސްގެ ޒުވާނަކު އޭނާގެ ޔޫޓިޔުބް ޗެނެލްގައި މިހިނގާ 2020 ވަނައަހަރުގެ ކުރީކޮޅު ހާމަކުރި ހަގީގީ މަންޒަރު ތަކަކުންނެވެ. މި ޑަކްޓަރުގެ ނަންފުޅާއި އޭނާ  ހިލޭކަހަލަ ގޮތަކަށް އެ ދެއްވާ ޚިދުމަތް އެހެން އަރަބިންނަށް ދައްކައިލުމުގެ ގޮތުން ނިކަމެއްޗެއް ކަމުގައި ހެދިގެން ޑރ މަޝާލީގެ އަރިހުގައި ދެންނެވިއެވެ. " އަޅުގަނޑުގެ އަތުގައި މިސްރުގެ 10 ޕައުންޑުވެސް ނެތެވެ. އޮތީ ހަމައެކަނި 5 ޕައުންޑެވެ. އަޅުގަނޑަށް ބޭސްކޮށްދޭވާނަން ހެއްޔެވެ؟ ފަހުން، ލިބުނީމައި 5 ޕައުންޑު ގެނެސްދޭނަމެވެ. "  ޑަކްޓަރު ދެއްވި ޖަވާބަކީ، " އެއީ އެއްވެސް ކަމެއްނޫނެވެ، އަވަހަށް ހިނގާށެވެ" މިހެން ދެންނެވުމުން ޑަކްޓަރަށް ލިޔުމެއް ދައްކާތަން ފެނެއެވެ. އެ ލިޔުން ބައްލަވައިލައްވާފައި ވިދާޅުވާ އަޑު އިވެއެވެ. " ނޫނެކެވެ. ފައިސާގެ އެއްވެސް އިނާމެއް އަހަރެން ބޭނުމެއްނޫނެވެ. ކަލޭ އަތުގައި ނިކަމެތީންނަށް ޚަރަދު ކުރާނެ ފައިސާ ހުރިނަމަ އެފަދަ ކަންކަން ކުރާ ޖަމާއަތްތަކާ ގުޅުވައިދީފާނަމެވެ." މިހެން ބުނުއްވާފައި ކްލިނިކަށް ވަންނަވަން ހިގައިގަތުމުން، ޑަކްޓަރުން ބަލިދެނެގަންނަން ގެންގުޅުއްވާ ކަށިގަންޑެއް ވެދުން ކުރެއެވެ. ވަރަށް އުފަލުން، 'މިކަހަލަ ޚަރަދު ކުރައްވާނެ ކަމެއް ނެތޭ ' ބުނުއްވަމުން ލަދުން ހުންނަވައި އެ ހަދިޔާ ބަލައިގެންނެވިއެވެ.

އެކުވެރި އަރަބި ޢިމާރާތުގައި ހިމެނޭ 7 ގައުމުގެ ވެރިރަށް، އަބޫދާބީގެ ޙާކިމް الشيخ زايد بن سلطان آل نهيان 1995 ވަނަ އަހަރު މިސްރަށް ވަޑައިގެންނެވިއެވެ. އެ ދަތުރުފުޅުގައި ޑަކްޓަރު މުޙައްމަދު މަޝާލީ އެ ކުރަށްވާ އިންސާނީ ޚިދުމަތުގެ ކަބަރު ލިބިވަޑައިގަތެވެ. އަދި އެހީތެރިވެދެއްވާ ޓީމުގެ މީހަކު ޑރ. މަޝާލީއާ ބައްދަލުކޮށް ޝައިޚް ޒާއިދުގެ މެސެޖު ފޯރުކޮށްދެއްވިއެވެ. އަބޫދާބީގެ ވެރިޔާ ހުންނެވީ ޑަކްޓަރު ދެކިވަޑައިގަންނަވާ ހިތްޕުޅުން ކަމުގައި ދެންނެވުމުން ވިދާޅުވިއެވެ. " شيخ زايد އަށް ވެދުން ދަންނަވާފައި ދަންނަވާށެވެ. އަޅުގަނޑުގެ ކްލިނިކު ބޭރުގައި ގޮނޑިއަޅައިގެން އެތިބި ނިކަމެތިން އެހެން ތިއްބައި އެމީހުން ދޫކޮށްފައި އަޅުގަނޑަކަށް ނުދެވޭނެއެވެ!"

އެމީހަކު އައިސް އެހެން ދެންނެވުމުން ފައިސާގެ ބޮޑު އަދަދެއް ދެއްވާފައި ޑަކްޓަރާ ހަވާލުކޮށް ނިކަމެތިންނަށް ބޭސް ބައްލަވައިގަތުމާއި ކްލިނިކަށް ބޭނުންވާ ތަކެތި ހޯދައި، އޭނާއަށް ފެނިވަޑައިގަންނަވާ ރަނގަޅު ގޮތަކަށް އެފައިސާ ޚަރަދު ކުރެއްވުން އެންމެ ރަނގަޅު ކަމުގައި ދަންނަވަން الشيخ زايد ވިދާޅުވިއެވެ. ދެވަނަ ފަހަރަށް އައިސް ޑަކްޓަރު މަޝާލީ އަރިހުގައި އެވާހަކަ ދެންނެވުމުން އެ ފައިސާގައި އަތްޕުޅުވެސް ޖައްސަވައިނުލައްވައި ވިދާޅުވިއެވެ. الشيخ زايد އަށް ޝުކުރު ދަންނަވާފައި، އެފަދަ ބޮޑެތި އަދަދުގެ ފައިސާއިން ނިކަމެތިންނަށް ގެދޮރު ބިނާކޮށްދެއްވުމުގައި މިސްރު ސަރުކާރުގެ އޮފީސްތަކުގެ ލަފާމަތިން ކަންތައް ކުރެއްވުންމުން މާ ގިނަ މީހުންނަށް އެ އެހީ ފޯރާނެ ކަމުގައި ދަންނަވަން ވިދާޅުވިއެވެ.

ޑަކްޓަރު އެ ވިދާޅުވި ގޮތަށް ސަރަހައްދީ ކައުންސިލްތަކާ ގުޅިވަޑައިގެން ހޮސްޕިޓަލަކާއި ވަރަށް ގިނަ ގެދޮރު الشيخ زايد ގެ ހިލޭ އެހީފުޅެއްގެ ގޮތުގައި އެހިސާބުގައި އެޅުއްވިކަމަށްވެއެވެ.

މިސްރުގެ ޓީވީ ޗެނެލަކުން ޑރ. މަޝާލީ އާ އިންޓަރވިޔު ކުރަން ފޮނުވި ނޫސްވެރިޔާއަށް މޭޒުމަތީގައި އޮތް ގަޑިއެއް ފާހަގަވިއެވެ. އެއީ ކެލްކިޔުލޭޓަރުން ނަންބަރު ފެންނަހެން ވަގުތު އަންގައިދޭ ސުމޭކު ގަޑިއެކެވެ. މި ގަޑީގައި ކަމަރެއްވެސް ނެތެވެ. އެ ގަޑި ބާވެ މިހާރުދެން އާކުރައްވާކަށް ނުވޭތޯ ދެންނެވުމުން ވިދާޅުވިއެވެ. " މިހާރުވެސް އެ ގަޑި ބަރާބަރަށް ހިނގައެވެ. ކްލިނިކުގައި އެ ގަޑި އޮންނާނީ މޭޒުމަތީގައެވެ. އެހަރެން ބޭރަށް ދާނަމަ، ފަޓުލޫނު ޖީބުގައެވެ.  އަހަރެން އުޅެނީ ހިނގާފައި ފައިމަގުގައެވެ. ނޫނީ އާންމުންނާ އެކީގައި ބަސްދަތުރުގައެވެ. ދެހާސް ޕައުންޑަށް ލިބޭ ގަޑިޔާއި ދިހަހާސް ޕައުންޑަށް ފަހައިދޭ ކޯޓުފަޓުލޫނު އެއީ އަހަރެން ގަޔާވާ ތަކެއްޗެއް ނޫނެވެ."

ބަލިމީހުން ބެއްލެވުމުގެ ފީ އެއްގެ ގޮތުގައި މިހާރުވެސް މިސްރުގެ ދިހަ ޕައުންޑު ނަންގަވަނީ  ކީއްވެތޯ އެއްސެވުމުން ވިދާޅުވީ،  " މި ކްލިނިކުގެ ގޮނޑިތަކުގައި އެތިބި ނިކަމެތިންނަށް ނިކަން ބަލައިލަ ބަލާށެވެ. އެމީހުންގެ އަތުން އަހަރެން ބޮޑު އަގެއް ނަގައިފިނަމަ، އެތަނުން ގިނަމީހުން މިރޭ ނިދާނީ ނުކައެވެ!"

އަދި، އޭނާގެ ހަނދާނުގައި ހަރުލާފައި ހުރި ބައެއް ތަންކޮޅުކޮޅު ނޫސްވެރިޔާއަށް ވިދާޅުވެދެއްވިއެވެ. ތިން ދަރިން ގޮވައިގެން އައި އަންހެނަކު ދެންނެވިކަމަށްވެއެވެ. ޑަކްޓަރެވެ. މިކުދިންގެ ބައްޕަ ވީ ޖަލުގައެވެ. މިކުދިން މިތިބީ ހުންއައިސްފައެވެ. އަޅުގަނޑުގެ ނިކަމެތިކަމުން މިކުދިން ބަލައި، ބޭހެއް ލިޔެދޭނެ ޑަކްޓަރަކު މަނިކުފާނު ފިޔަވައި މިހިސާބަކު ނެތެވެ. " އެފަދަ މީހުންގެ އަތުން ބޮޑު އަގެއް ނަގަން އަހަންނަކަށް ނުކެރޭނެއެވެ!"

އަދިވެސް ކިޔައިދެއްވިއެވެ. " އެއްދުވަހަކު ކުޑަ އަންހެން ކުއްޖަކު ކްލިނިކަށް އައިސް ބުނެފިއެވެ. ޑަކްޓަރެވެ. އަޅުގަނޑަށް ބޭހެއް ލިޔެދެއްވާށެވެ. އަޅުގަނޑުގެ މަންމަ ލަދުން ތިރީގައި، މައްޗަށް އަންނަން ނުކުރިފައި އެބަހުއްޓެވެ. މިއަދު އަދި މަންމަ އަށް އެންމެ ޕައުންޑެއްވެސް ނުލިބެއެވެ.  މަންމަ ވިއްކަނީ ޒުވާރި ފިހެގެންނެވެ. އަދި މިގަޑީގައި ޒުވާރި ގަންނާނެ މީހަކު ނާދެއެވެ. މަންމައަށް 10 ޕައުންޑު ލިބެންދެން އަޅުގަނޑަކަށް ކޮޅަކަށް ނުހުރެވޭނެއެވެ"  އަނެއްކާވެސް ޑަކްޓަރު ސުވާލު ކުރެއްވިއެވެ." އެފަދަ މީހުންގެ އަތުން ބޮޑު އަގެއް ނަގަން އަހަންނަކަށް ކެރޭނެހެއްޔެވެ!"

މިހުރިހައި ކަމަކަށްވުރެ ބޮޑަށް އެންމެ ހިތްދަތިވި ދުވަހަކީ ކުޑަ ފިރިހެން ކުއްޖަކު ގައިގައި އަމިއްލަޔަށް ރޯކޮށްލައިގެން މަރުވި ދުވަސްކަމުގައި ވިދާޅުވެ، މިހާރުވެސް ފެންކަޅިވެހުންނަވައި، އެވާހަކަ ކިޔައިދެއްވިއެވެ. " އެދުވަހު އެކުއްޖާގެ މަންމަ ގާތުގައި އެކުއްޖާ ބުނިކަމަށްވެއެވެ. މަންމާއެވެ. އަޅުގަނޑަށް އިންސިއުލިން އިންޖެކްޝަނެއް ޖަހަން ޖެހޭނެއެވެ." މަންމަ ބުނިކަމަށްވެއެވެ. " ދަރިފުޅާއެވެ. މިއަދު ދަރިފުޅަށް އިންސިއުލިން ގަންދީފިއްޔާ ކޮއްކޮމެން ތިބެންޖެހޭނީ ނުކައެވެ!" ޑަކްޓަރު ވިދާޅުވިއެވެ. " އެ ދުވަހު އެކުއްޖާ އަމިއްލަޔަށް ގައިގައި ރޯކޮށްލައި ހޭނެތުމުގެ ކުރިން ބުންޏެވެ. މަންމާއެވެ، އަހަރެން މި މަރުވަނީ، ކޮއްކޮމެން ބަނޑުހައިވިޔަ ނުދޭންވެގެންނެވެ." ޑަކްޓަރު މުޙައްމަދު މަޝާލީ ވިދާޅުވި ގޮތުގައި އެދުވަހު އެ ކުޑަކުއްޖާ މަރުވީ މީނާގެ އަތްދަނޑިމަތީގައެވެ. ފަރުވާއެއް ދެވޭތޯ އުޅުއްވަނިކޮށެވެ!

މި ހިތްތިރި ޑޮކްޓަރު އެބަދުވެސް ވިދާޅުވަމުން ގެންދެވީ، " ތިމަންނަ މިހުރީ ހިތްހަމަޖެހި ފުދިފައެވެ. އަހަރެން ބޭނުން މިންވަރަށްވުރެ، އަދި އަހަރެން ދެކޭ ގޮތުގައި އަހަންނަށް ލިބެންވާވަރަށްވުރެ އިތުރަށް މާތް ﷲ އަހަންނަށް އެތައް ނިޢުމަތެއް ދެއްވައިފިއެވެ!

 މި މާތް ޑރ. މުޙައްމަދު މަޝާލީގެ އަގުހުރި ޚިދުމަތް ލިބިވަޑައިގަތް ބޭފުޅުންގެ ދުޢާ ގަބޫލުފުޅު ކުރައްވައި އެ ދުޢާގެ ބަރަކާތާއި ފައިދާ ޑޮކްޓަރަށް ލިބިގެންދާނޭ ގޮތް މިންވަރު ކުރައްވައި އޭނާގެ ފުރާނަފުޅަށް ސުވަރުގޭގެ ދާއިމީ ނިޢުމްތް މިންވަރު ކުރަށްވާށި އެވެ. އާމީން