އިންސާނާ ދުނިޔެއަށް އުފަންވާއިރު މި ދުނިޔޭގައި ހުންނަނީ އޭނާ ދިރިހުރުމަށް ބޭނުންވާ ހުރިހައި ކަމެއް (ލައިފް ސަޕޯޓިންގ ސިސްޓަމް) ގާއިމު ކުރެވިފައެވެ. މިއީ އިންތިހާ ދަރަޖައަށް ފުރިހަމަ ނިޒާމެކެވެ. އިންސާނާ ބޭނުންވާ ކުދިކުދި ކަންތައްތަކާއި ބޮޑެތި ކަންތައްތަކަށް ދާންދެން ވަނީ އެއްވެސް އަގަކާ ނުލައި ފުރިހަމަ ވާނޭ ގޮތް މެދުވެރި ކުރައްވައިފައެވެ. ބިމުން ފެށިގެން އިރާ ހަމައަށް ލައްވައިފައިވާ ހުރިހައި ތަކެއްޗެއް، އެއްވެސް އިސްތިސްނާއެއް ނެތި، މަސައްކަތް ކުރަމުން ގެންދަނީ އިންސާނާގެ ޚިދުމަތުގައެވެ.
އޭގެ ފަހުން ދެން އަންނަނީ ކުއްލިއަކަށް އިންސާނާ މަރުވާ ދުވަހެވެ. އިންސާނާއަކީ އަބަދީ ދިރިއުޅުމަކަށް ލޯބި ކުރުން އޭނާގެ މިޒާޖުގައި ލައްވައިފައިވާ މަޚުލޫގެކެވެ. އެކަމަކު (ގިނަވެގެން) ސަތޭކައެއްހައި އަހަރު ދުވަހުގެ ތެރޭގައި ކޮންމެ އަންހެނަކަށާއި ކޮންމެ ފިރިހެނަކަމަށްމެ ޖެހެނީ އޭނާގެ ރުހުމާ ޚިލާފަށް، އަބަދަށްޓަކައި މި ދުނިޔެ ދޫކޮށްފައި ދާށެވެ.
ދުނިޔެއަށް އުފަންވާ ކޮންމެ އިންސާނަކުވެސް ދެ ކަމެއް ތަޖުރިބާ ކުރެއެވެ. ފުރުތަމައީ ދިރިހުރުމުގެ ތަޖުރިބާއެވެ. ދެވަނައީ މަރުގެ ތަޖުރިބާއެވެ. އިންސާނާ މިކަމާމެދު ފުންކޮށް، ސީރިއަސްކަމާއެކު ވިސްނައިލައިފިނަމަ ވަރަށް ބޮޑު ހަގީގަތެއް އޭނާއަށް އެނގިގެން ދާނެއެވެ. އެއީ އިންސާނާ އުފެއްދެވުމަށް ފަހު މި ދުނިޔޭގައި އާބާދު ކުރައްވައިފައި ވަނީ އިނާމެއްގެ ގޮތުގައި ނޫންކަމެވެ. އިމްތިހާނެއްގެ ގޮތުގައި ކަމެވެ. އޭނާ މި ދުނިޔޭގައި އުޅޭއިރު ފުރިހަމަ މިނިވަނެއްކަމެއް އިހުސާސް ކުރެއެވެ. މި މިނިވަންކަން އިހުސާސް ކުރެވޭ ގޮތް މެދުވެރި ކުރައްވައިފައި ވަނީ މިނިވަންކަން ރަނގަޅު ގޮތުގައި ބޭނުން ކުރަނީ ކާކުތޯއާއި ނުބައި ގޮތުގައި ބޭނުން ކުރަނީ ކާކުތޯ ބެއްލެވުމުގެ ގޮތުންނެވެ. ފުރިހަމަ އުސޫލުތަކުގެ މަތީގައި ދިރިއުޅުން ވޭތުކުރަނީ ކާކުތޯއާއި އެއްވެސް އުސޫލަކަށް ތަބާނުވެ ދިރިއުޅުން ވޭތުކުރަނީ ކާކުތޯ ބެއްލެވުމުގެ ގޮތުންނެވެ.
އިންސާނާ ފުންކޮށް ވިސްނައިލައިފިނަމަ އެނގިގެންދާނީ މަރަކީ އޭނާ، އޭނާގެ ޚާލިގުގެ ކުރިމައްޗަށް ހާޒިރުވާން އޮތް ދުވަސްކަމެވެ. އިންސާނާއަކީ ތާއަބަދު ދިރިހުންނާނޭ އަބަދީ މަޚުލޫގެކެވެ. އޭނާގެ ދިރިއުޅުން ބެހިފައި ވަނީ ދެ ބަޔަކަށެވެ. އެއީ މަރުވުމުގެ ކުރިން ވޭތުކުރާ ބަޔާއި މަރުވުމަށް ފަހު ވޭތުކުރާ ބައެވެ. މަރުވުމުގެ ކުރީގެ ބަޔަކީ އިމްތިހާނުގެ މުއްދަތެވެ. މަރުވުމަށް ފަހުގެ ވަގުތަކީ އިމްތިހާނު ނިމިގެން އެ އިމްތިހާނުގެ ނަތީޖާއެއްގެ ގޮތުން އިނާމު ނުވަތަ އަދަބު ލިބިގަތުމުގެ މުއްދަތެވެ.
އިންސާނާ މިއަދު، މި ދުނިޔޭގައި ދިރިއުޅެނީ ދިރިހުރި އަދި ޝުއޫރު ލިބިގެންވާ މަޚުލޫގެއްގެ ގޮތުގައެވެ. އޭނާގެ މި ދިރުމާއި ޝުއޫރަކީ މުސްތަގިއްލު ވުޖޫދެކެވެ. މާނައަކީ ތާއަބަދަށް ދެމިގެންވާ ދިރުމަކާއި ޝުއޫރެކެވެ. އޭނާ މި ދުނިޔޭގައި ހޭދަކުރާން ކަނޑައެޅިގައިވާ މުއްދަތު ހަމަކޮށް، މި ވަގުތީ ދުނިޔެއިން ނެރެ، އެހެން ދުނިޔެއަކަށް ފޮނުވައި ލެވެނީ ހަމަ އެ ދިރުމާއި ޝުއޫރާ އެކީގައެވެ.
އެ ލަމަހާއަކީ ކޮންމެ އަންހެނަކާއި ފިރިހެނެއްގެ މައްޗަށް ހަމަ ކަށަވަރުންވެސް އަންނާނޭ ލަމަހާއެކެވެ. އެއީ ހިތަށްވެސް ނުގެނެވޭފަދަ ސީރިއަސް ލަމަހާއެކެވެ. މަރުވުމަށް ފަހު އަންނާން އޮތް ދުނިޔޭގައި އުޅޭނީ ހަމަ މި އިންސާނާއެވެ. އެކަމަކު އޭނާއަށް މި ދުނިޔޭގައި ލިބިފައިވާ ހުރިހައި ވަސީލަތަކާއި އަސްބާބެއް ވާނީ އޭނާގެ އަތުން ނިގުޅައިގަނެވިފައެވެ. އޭނާގެ ފަހަތުގައި އޮންނާނީ އޭނާ އެ ދުނިޔެއަކާ އަބަދަށްޓަކައި ވަކިވީ ދުނިޔެއެވެ. ކުރިމަތީގައި އޮންނާނީ ކާމިލުވެގެންވާ ވަސީލަތާއި އަސްބާބާއެކު އޭނާ އަބަދުގެ އަބަދަށް ދިރިއުޅޭނޭ ދުނިޔެއެވެ. ބުއްދިވެރިއަކީ އަންނާން އޮތް ކާމިލު ދުނިޔެއަށްޓަކައި އަމިއްލަ ނަފުސު ތައްޔާރުކުރާ މީހާއެވެ.
(މަވްލާނާ ވަޙީދުއްދީން ޚާންގެ ލިޔުއްވުމެއްގެ ތަރުޖަމާ)
