އޭނާގެ އިންތިހާ ދަރަޖައަށް މުއްސަނދި ބައްޕަ މަރުވެއްޖެއެވެ. މަރުވީ އެކަށީގެންވާ ވަރަށް މުދާ ދޫކޮށްފައެވެ. ބައްޕަ މަރުވީ ފަހުން ދެމަފިރިންގެ ހުރި ހަމައެކަނި ދަރިފުޅު ދުވަސްތައް ހޭދަކުރަމުން ގެންދިޔައީ މަންމައަށް ޚިދުމަތްކުރުމުގައެވެ. ބައްޕަގެ ތަރިކައިން ލިބުނު ފައިސާގެ ބޮޑު ބައެއް ހޭދަކުރަމުން ގެންދިޔައީ މަންމައަށް ބޭނުންވާ އެއްޗެހި ހޯދުމާއި ޚިދުމަތްކުރުމުގައެވެ. މަންމަގެ އުފަލާއި އަރާމަށްޓަކައި ކުރަން ޖެހޭ ކޮންމެ ޚަރަދެއް ދިޔައީ ކުރަމުންނެވެ.
އެއް ދުވަހަކު އޭނާ ރީތި، ޒުވާން އަންހެންކުއްޖަކާ އިނދެފިއެވެ. އެހައިތަނުން ގޭގައި މަންމަގެ އިތުރަށް ދިރިއުޅޭނޭ އަންހެނަކުވެސް އައީއެވެ. އަނބިމީހާއަކީ ރީތި ކުއްޖަކަށް ވިޔަސް، ވަރަށް ނުބައި ކުއްޖެކެވެ. އަމިއްލަ އެދުން ބޮޑުކަމާއެކު ތިމާގެ ފައިދާއަށްޓަކައި ކޮންމެފަދަ ކަމެއްވެސް ކުރާން އޭނާ ހުންނަނީ ތައްޔާރަށެވެ. އަމިއްލަ ފައިދާއެއް ނެތް ކޮންމެ އެއްޗަކީ އޭނާގެ ކުރިމަތީގައި އެއްވެސް އަގެއް ނެތް އެއްޗެކެވެ. މައިދައިތަގެ އަގެއްވެސް އޭނާގެ ކުރިމައްޗަކު ނެތެވެ. އެންމެ ފަހުން އެ މުސްކުޅި މައިދައިތަގެ ދިރިއުޅުން ދަތިކޮށް، އަޖައިބުވާ ފަދަ އުނދަގޫ ޖައްސައިފިއެވެ. ޒުވާބުކުރުމާއި އެއްޗެހި ގޮވުމުގައި ހުރިހައި ހައްދެއް ހުރަސްކޮށްފިއެވެ.
ﷲ ގެ މިންވަރުފުޅުގައިވާ ގޮތަށް ކަންތައް ހިނގަމުން ގޮސް މައިދައިތަ މަރުބަލީގައި އޮށޯވެއްޖެއެވެ. ދެންވީ ކިހިނެއް ކަމަށްތޯއެވެ؟ ދަރިފުޅު ހުރުމާއެކުވެސް، އެ ފަކީރު، ޅީދަރިފުޅުގެ ރަޙުމެއް ނެތް ގޯނާއާއި އަޅައިނުލުމާއި ދޫ ނުބައިކަމުގެ ޝިކާރައަކަށް ވެއްޖެއެވެ. މުސްކުޅި މައިދައިތައަކީ ޅީދަރިއަށް ބޮޑު އުނދަގުލަކަށް ވެއްޖެއެވެ. ދުވަސް ފާއިތުވަމުން ދިޔަވަރަކަށް މައްސަލަތައް ދިޔައީ ގިނަވަމުން، ހޫނުވަމުންނެވެ. ހިތިކަން ދިޔައީ ބޮޑުވަމުންނެވެ. އެންމެ ފަހުން ޅީދަރިފުޅުގެ ކެތްތެރިކަން ކޮޅުން ލައިފިއެވެ. މައިދައިތަޔާ އެކީ ދިރިއުޅުން އޭނާއަށް ކެތް ނުކުރެވޭވަރުގެ ކަމަކަށް ވެގެން ހިނގައްޖެއެވެ.
އެއް ދުވަހަކު އޭނާ ފިރިމީހާ ގާތު ސާފުކޮށް ބުނެފިއެވެ. [ކަލެއަށް ދެން ޖެހޭނީ ދެ ގޮތުންކުރެ ގޮތެއް ޚިޔާރުކުރާށެވެ. އެއް ގޮތަކީ ކަލޭގެ މަންމަޔާއެކު އުޅުމެވެ. އަނެއް ގޮތަކީ މަށާއެކު އުޅުމެވެ. މަށަކަށް ދެނެއްވާ ކަލޭގެ މަންމަޔާއެއްކަކު ނޫޅެވޭނެއެވެ.]
އަނބިމީހާއަށް ވިސްނައިދީ، ކެތްތެރިވެގެން އުޅޭނެ ގޮތެއް ހެދޭތޯ ދަރިފުޅު ވަރަށް ބޮޑަށް މަސައްކަތްކުރިއެވެ. ލައްކަ މަސައްކަތާއެކުވެސް އޭނާގެ ހަޔާތުގެ ބައިވެރިޔާ ރުހޭނެ ގޮތެއް ނުހެދުނެވެ. މިހާރު އޭނާގެ ކުރިމަތީގައި އޮތީ ދެ ގޮތެކެވެ. އެއް ގޮތަކީ މަންމަޔާ ވަކިވުމެވެ. އަނެއް ގޮތަކީ އަނބިމީހާ ދޫކޮށްލުމެވެ.
މި ކަމުގައި ވަކި ގޮތެއް ނިންމަން ވަރަށް އުނދަގޫވެއްޖެއެވެ. އޭނާ ވަރަށް ބޮޑަށް ވިސްނައި ފިކުރުކޮށްފިއެވެ. އެންމެ ފަހުން ނިންމީ މަންމަޔާއެކު އުޅުމުގެ ބަދަލުގައި އަނބިމީހާޔާއެކު އުޅުން މާ ރަނގަޅުކަމުގައެވެ. ދެން ވީ ކިހިނެއްތޯއެވެ؟ ދަރިފުޅުގެ ބޮލަށް ލޯބީގެ ފުރޭތަ ސަވާރުވެއްޖެއެވެ. ލަޢުނަތްލެއްވިގެންވާ ޝައިޠާނާ އައިސް އޭނާގެ ނިންމުން މުޅީން ރަނގަޅުކަމަށް ބޮލަށް ވައްދައިދީ، މަންޒަރު ރީތިކޮށްދީ، ގަޑުބަޑުކޮށް ނިންމައިފިއެވެ. ނަތީޖާއަކީ އެތައް ބުރައެއް އުފުލައިގެން އޭނާ ބަލައި ބޮޑުކުޅަ މަންމަޔާ ވަކިވާން ރުހި ގަބޫލުވެގަތުމެވެ.
އެއީ ފިނިކަން އިންތިހާއަށް އަރައިފައިވާ ރެއެކެވެ. ދަރިފުޅު، އޭނާގެ ޝައިޠާނީ ނިންމުން ތަންފީޒު ކުރުމަށްޓަކައި، ބަނޑުއަޅައި ވިހެއި އަމާ، ގޭގެ ފުރާޅުމަތީން ބިންމައްޗަށް ވައްޓައިލައިފިއެވެ. އާދޭހެވެ. ފުރާޅުމަތީން ބިންމައްޗަށެވެ. އާދޭހެވެ. އެއްވެސް ރަޙުމެއް ނެތި ބިންމައްޗަށް ވައްޓައިލީއެވެ. މުސްކުޅި މަންމަ، ބިންމަތީގައި އޮވެ، އެންމެ ފަހުގެ ނޭވާލަމުން ކުކުރަމުން ގެންދަނީއެވެ. ދަރިފުޅުގެ ނުބައިކަމާއި އަނިޔާވެރިކަމުގެ ޝަކުވާ، އޭނާ ހައްދަވައި ބޮޑުކުރެއްވި ﷲ ގެ ޙަޟްރަތުގައި ދަންނަވަމުން ގެންދަނީއެވެ. އެއްވެސް ރަޙުމެއް، ކުލުނެއް ނެތި ފުރާޅުމަތީން އޭނާ ބިންމައްޗަށް ވައްޓައިލީ ދަރިފުޅުގެ ޝަކުވާ ރަޙްމާނުވަންތަ ﷲ އަށް ދަންނަވަނީއެވެ.
ކުށްވެރިންނާއި މުނާފިގުންގެ އާދައެއް އޮވެއެވެ. އެއީ ކުރަމުން ގެންދާ ވިޔާނުދާ ކަންތައްތަކުގައި ނިގާބު އަޅުވައި، މަތިއޮމާންކޮށްގެން އާއްމުންގެ ކުރިމައްޗަށް ނެރެ، ހާމަކުރުމެވެ. މި ހިތްކަޅު ދަރިފުޅުވެސް ކަންތައް ކުޅައީ އެހެންނެވެ. މަންމަ ހިނަވައި، ކަފުންކޮށް، ވަޅުލުމަށް ފަހު ގޭގައި ތަޢުޒިޔާ ކިއުމުގެ އެއްވުމެއް ބާއްވައިފިއެވެ. އެއީ މީސްމީހުންގެ ހަމްދަރުދީއާއި ރަހުމުވެރިކަން ހޯދުމުގެ ބޭނުމުގައެވެ. ތަޢުޒިޔާ ކިޔައި ހެޔޮ ދުޢާކުރާނޭ ބަޔަކު އެއް ކުރުމުގެ ބޭނުމުގައެވެ. އެކަމަކު ހުރިހައި ކަމެއް މޮޅަށް ދެކެދެނެވޮޑިގެންވާ ﷲ އަށް އޭނާގެ އަނިޔާވެރިކަން ސިއްރު ނުކުރެވޭ ކަމެއް އޭނާއަކަށް ނޭނގެއެވެ. އެއީ ނިދިއަވަހާރަފުޅު އައުމެއް ނެތް، ހިތްތަކުގެ އެންމެ ފުނުގައިވާ ކަންތައްތަކަށް ދާންދެން ދެނެވޮޑިގެންވާ މަތިވެރި ކަލާނގެއެވެ.
ދުވަސްތައް ފާއިތުވަމުން އޮވެގެން ދެއެވެ. ރޭތައް ފަހަތަށް ގޮސް، އޮބަމުން ދެއެވެ. އަނިޔާވެރި ދަރިފުޅު ދިޔައީ ދުނިޔޭގެ އަރާމާއި އުފަލުގެ ތެރެއަށް ގެނބެމުންނެވެ. ﷲ އެތިފަހަރެއް އަޅުއްވައިފާނޭ ކަމަކަށް އެއްގޮތަކަށްވެސް ހިއެއް ނުކުރެއެވެ. ތިމާގެ ކުށަށް އަދަބެއް ލިބިދާނޭ ކަމަށް ގަންނަ ބިރެއް ނެތެވެ. ﷲ ތަޢާލާގެ އެތިފަހަރަކުން އެކަކަށްވެސް ސަލާމަތް ވެވޭނެތޯއެވެ؟ އެކަލާނގެ ދަރުބާރުގައި އިންސާފު ގާއިމުކުރެވޭނެއެވެ. ފައިސަލާ ކުރެއްވުމުގައި ހޭދަވެގެންދާނީ ކިހައި ދުވަހެއްކަން ދެނެވޮޑިގެން ވަނީ ހަމައެކަނި އެކަލާނގެއެވެ. ކޮންމެ ފައިސަލާއެއް ކުރެއްވުމަށްވެސް ވަކި ވަގުތެއް ވަނީ އެކަށައަޅުއްވައިފައެވެ.
އެންމެ ފަހުން، ބޮނޑިއެއް އެޅުއްވުމުގެ ވަގުތު އައިސް ޖެހިއްޖެއެވެ. އޭނާގެ މަންމައަށް ޖެހުނު ބަލި ﷲ އޭނާގެ މައްޗަށްވެސް ފާކުރައްވައިފިއެވެ. މި ބަލި ޖެހި، ގިނަ ދުވަސް ވުމާއެކު މީހާ ދެބަންދިހާރު ވެއްޖެއެވެ. މޮޔަބަލީގެ ޝިކާރައަކަށް ވެއްޖެއެވެ. މި ހާލަތަށް ދިޔައީމާ އަނބިމީހާގެ ހާސްކަން ބޮޑުވެއްޖެއެވެ. މައިދައިތައާމެދު ކަންތައް ކުރި ގޮތަށް ފިރިމީހާޔާމެދުވެސް ކަންތައް ކުރާން ފަށައިފިއެވެ. އަނިޔާވެރި ދަރިފުޅަށްވެސް ކުރިމަތިލާން ޖެހުނީ، އެ މީހަކަށްޓަކައި މުސްކުޅި އަމާ ފުރާޅުމަތީން ވައްޓައި މަރައިލީ އަނބިމީހާގެ ފަރުވާކުޑަކަމާއި އަޅައިނުލުމާއި ރަހުމުކުޑަކަމާއި ކުލުނު ކުޑަކަމާއެވެ.
އެއީވެސް ފިނިކަން ގަދަ ރެއެކެވެ. މޮޔަބަލި ބޮޑުވެ، ބީތާވާ ހިސާބަށް ދިޔައީމާ ގޮސް ގޭގެ ފުރާޅުމައްޗަށް އަރައިފިއެވެ. އޭނާ ފުރާޅު މައްޗަށް އެރީ އަމިއްލައަށެވެ. މީހަކުގެ އެއްވެސް އެހީތެރިކަމަކާ ނުލައެވެ. އަރައިގެން ގޮސް ހުއްޓުނީ، އެ ތަނުން މަންމަ ކޮއްޕައި ވައްޓައިލީ ތަނަށެވެ. އެހެން ހުރެފައި ކުއްލިއަކަށް ބިންމައްޗަށް ފުންމައިލައިފިއެވެ. އެސްފިޔައެއް ޖަހާލާހައި ކުޑަ ހިނދުކޮޅެއްގެ ތެރޭގައި އޭނާގެ ވިޔާނުދާކަމުގެ ބަދަލު ލިބި ނިމިއްޖެއެވެ. [1]
[1] ފޮތް: أنين القلوب ލިޔުއްވީ: مصطفى كامل – ފޮތް: قصص و مآس من عقوق الوالدين ސަފުހާ: 76-77
