ޙާފިޒް އަބޫބަކުރު ޠަރްޠޫޝީ (ރަޙިމަހުﷲ) އަކީ މަޝްހޫރު ދަންނަބޭކަލެކެވެ. އޭނާގެ ފޮތެއްގައި މައެއްގެ ދުޢާގެ ބަރަކާތާ ގުޅޭ ވާހަކައެއް ވަނީ ނަކަލު ކުރައްވައިފައެވެ. އޭނާ ލިޔުއްވައިފައި ވެއެވެ. އެއް ދުވަހަކު އަންހެނަކު ބަޤިއްޔް އިބްނި މަޚްލަދް (ރަޙިމަހުﷲ) ގެ އަރިހަށް އަތުވެއްޖެއެވެ. ބަޤިއްޔް އިބްނި މަޚްލަދަކީ އަންދަލުސްގައި އުޅުއްވި ބޭކަލެކެވެ. އޭނާގެ ޢިލްމުވެރިކަމާއި ތަޤްވާވެރިކަމުގެ ވާހަކައަކީ ދުރުދުރަށް ފެތުރި މަޝްހޫރުވެފައިވާ ވާހަކައެކެވެ. އެއީ ޢިލްމުވެރިކަމުގެ ކަނޑެކެވެ. ޙިކްމަތްތެރިކަމުގެ ފަރުބަދައެކެވެ. ފިކުރާއި ބުއްދީގެ ހުނަރުން ފުރިފައިވާ މާހިރެކެވެ. އަންދަލުސްގެ މަޝްހޫރު ޢިލްމުވެރިންގެ ތެރޭގައި ގުނައިލެވޭ، މޮޅު ބޭކަލެކެވެ.
މި ދެންނެވުނު އަންހެންމީހާ، ބަޤިއްޔް އިބްނި މަޚްލަދަށް ދެންނެވިއެވެ. [ރޫމީން އަޅުގަނޑުގެ ދަރިފުޅު ހައްޔަރުކޮށްފިއެވެ. ދަރިފުޅު މިނިވަންކުރަން ފިދްޔައެއްގެ ގޮތުގައި ދޭން އަޅުގަނޑުގެ ނިކަމެތި ގެގަނޑު ނޫން އެހެން އެއްޗެއް ނެތެވެ. އެ ގެ ވިއްކައިލާން އުޅެވޭ ވަރުގެ ހަކަތައެއް އަޅުގަނޑުގެ ގަޔަކު ނެތެވެ. އަޅުގަނޑުގެ ނަމުގައި ފިދްޔަ ދީފާނޭ ހެޔޮ މީހަކުގެ ނަން އަޅުގަނޑަށް ވިދާޅުވެ ދެއްވާށެވެ. ދަރިފުޅު ހައްޔަރުކުރި ފަހުން އަޅުގަނޑަކަށް ރޭގަނޑު ހަމަޖެހިގެން ނިދައެއް ނުލެވެއެވެ. ދުވާލު ގަރާރުކަމެއް ނާދެއެވެ. ރެޔާއިދުވާ މި ހޭދަކުރަނީ ދަރިފުޅުގެގެ މިނިވަންކަމަށް އެދި ދުޢާކުރުމުގައެވެ.]
އަންހެންމީހާގެ ވާހަކަ އައްސަވައިފައި ބަޤިއްޔް އިބްނި މަޚްލަދް ވިދާޅުވިއެވެ. [ތިޔަކަމާ ވިސްނައިލާނޭ ވަގުތު ދޭށެވެ. އަހަންނަށް ކުރެވޭން އޮތް ކަމެއް އިރާދަކުރެއްވިއްޔާ ކޮށްދޭނަމެވެ.] އެޔަށް ފަހު އިސްދަށަށް ޖައްސަވައިލެއްވުމަށް ފަހު ﷲ އަށް ދުޢާ ދަންނަވާން ފަށްޓަވައިފިއެވެ. އަނެއްކޮޅުން މަންމަވެސް ގެންދިޔައީ އޭނާގެ ދަރިފުޅަށްޓަކައި ދުޢާކުރަމުންނެވެ.
އެންމެ ފަހުން މަންމަގެ ދުޢާ ﷲ ތަޢާލާ އިޖާބަކުރައްވައިފިއެވެ. ދުވަސްކޮޅެއް ފަހުން އެއްކަލަ އަންހެންމީހާ، ބަޤިއްޔް އިބްނި މަޚްލަދްގެ އަރިހަށް އަތުވެއްޖެއެވެ. މި ފަހަރު އައީ ރޫމީންގެ ގައިދުގައި އޮތް ދަރިފުޅުވެސް ގޮވައިގެންނެވެ. އޭނާ ދަރިފުޅު ގާތު ބުންޏެވެ. [ދަރިފުޅާއެވެ. ދަރިފުޅު ހައްޔަރުކުރެވުނު ގޮތާއި މިނިވަންވީ ގޮތުގެ ވާހަކަ ނިކަން ޝޭޚަށް ދަންނަވައިދީބަލާށެވެ.]
ދަރިފުޅު ކިޔައިދިނެވެ. [އަޅުގަނޑު ހައްޔަރުކުރީ ރޫމީންގެ ރަސްދަރިއެކެވެ. ހައްޔަރުކޮށްފައި ބޭއްވީ އޭނާގެ ހުރަގެއެއްގައެވެ. ގައިދީން ބަލަހައްޓާން ޚާއްސަ ފާރަވެރިޔަކު ކަނޑައަޅައިފައި ހުއްޓެވެ. އެއީ ވަރަށް ދޫނުބައި، އަނިޔާވެރި މީހެކެވެ. އަޅުގަނޑު އޮތީ އަތުގައި ބިޑި އަޅުވައި، ފައިގައި ހިލިހިލާ ޖަހައިފައެވެ. ފާރަވެރިޔާގެ އަނިޔާއާއި ދޫނުބައިކަން އަޅުގަނޑު ގެންދިޔައީ ބަރުދާސްކުރަމުންނެވެ. އެއް ދުވަހަކު ބުރަ މަސައްކަތް ކުރާން އަޅުގަނޑުމެން ގޮޅިން ނެރެފިއެވެ. މަސައްކަތް ނިންމައިފައި އައިސް ގޮޅިއަށް ވަންތަނާ އަޅުގަނޑުގެ ފައިގައި ޖަހައިފައި އޮތް ހިލިހިލާގަނޑު ބުރިވެގެން ވެއްޓިއްޖެއެވެ.]
ހިލިހިލާގަނޑު ބުރިވެގެން ވެއްޓުނު ވަގުތަކީ އޭނާގެ މަންމައާއި ބަޤިއްޔަ އިބްނި މަޚްލަދް ދުޢާކުރެއްވި ވަގުތެވެ. ޒުވާނާ ވާހަކަ ކުރިއަށް ގެންދިޔައެވެ.
[ހިލިހިލާގަނޑު ބުރިވީމާ ފާރަވެރިޔާ ވަރަށް ބޮޑަށް ރުޅި އަތުވެއްޖެއެވެ. ދެންމެދެންމެއަކު ރޮލާކައިފާނޭހެން ހީވާ ކަހަލަ ގޮތަކަށް އަޅުގަނޑާ ދިމާއަށް ކަޅިއަޅައިގެންފައި އަހައިފިއެވެ. ހިލިހިލާގަނޑު ބުރިކޮށްލީ ކަލޭހެއްޔެވެ؟
އަޅުގަނޑު މާފަށް އެދިފައި ބުނެފީމެވެ. އަހަރެން ހިލިހިލާގަނޑަކު އަތެއްވެސް ނުލަމެވެ. ބުރިވެގެން ވެއްޓުނީ އަމިއްލައަށެވެ. އެ ވަގުތު ދަގަނޑުތަޅާ މީހަކު ގެނެސްގެން ހިލިހިލާގަނޑު ބައްދައިފައި އަޅުގަނޑުގެ ފައިގައި ޖަހައިފިއެވެ. ދެތިން ފިޔަވަޅެއް އެޅުނުތަނާ އަނެއްކާވެސް ހިލިހިލާގަނޑު ބުރިވެގެން ވެއްޓިއްޖެއެވެ. އެހައި ވަރުގަދަ ހިލިހިލާގަނޑެއް އަމިއްލައަށް ބުރިވެގެން ވެއްޓުމަކީ އަޖައިބުވާ ފަދަ ކަމެކެވެ. ފާރަވެރިޔާ ހައިރާންވެ އަންތަރީސްވެއްޖެއެވެ. އެއީ އާދައިގެ ކަމެއް ނޫނެވެ. އޭނާ އެހެން ސިފައިންނަށް ގޮވައި، ގެނެސްފިއެވެ. އެމީހުންނަށް މި ވާހަކަ ކިޔައިދީފިއެވެ. ޖަލުގެ ބޮޑެތި ވެރިންނާ ހަމައަށް މި ޚަބަރު ހިނގައްޖެއެވެ. އެމީހުން މަޝްވަރާ ކުރުމަށްޓަކައި ދީނީ ބޮޑުން ހާޒިރުކޮށްފިއެވެ. ހުރިހައި ކަމެއް ހިނގި ގޮތަށް އެ މީހުންނަށްވެސް ކިޔައިދީފިއެވެ. މި ވާހަކަތައް އަހައިފައި ބޮޑު ފާދިރީ އޭނާގެ ބައިވެރިންނާއެކު އަޅުގަނޑު އޮތް ތަނަށް އަތުވެއްޖެއެވެ. އޭނާ އަހައިފިއެވެ. ކަލޭގެ މަންމަ ދުނިޔޭގައި އެބަ އިން ހެއްޔެވެ؟ އަޅުގަނޑު އާނއެކޭ ބުނުމުގެ ގޮތުން ބޯ ޖަހައިލީމެވެ. އޭނާ ބުންޏެވެ. ކަލޭގެ މަންމަގެ ދުޢާ އިޖާބަކުރައްވައިފިއެވެ. ﷲ ތަޢާލާ ކަލޭ މިނިވަންކުރެއްވީމާ އަހަރެމެން ކަލޭ ހައްޔަރުކޮށްފައި ބާއްވާނީ ކިހިނެއް ހެއްޔެވެ؟ މި ވާހަކައަށް ފަހު ރޫމީން ނުހަނު އިޙްތިރާމާއި ޢިއްޒަތާއެކު އަޅުގަނޑު މިނިވަންކޮށް އިސްލާމުންގެ ގާފިލާއާ ހަވާލުކޮށްފިއެވެ.]
އަނިޔާ ލިބިފައިވާ، ހިތާމަވެރި މަޔަކުގެ ދުޢާ ﷲ ތަޢާލާ އިޖާބަކުރައްވައިފިއެވެ. [1]
[1] ފޮތް: الدعاء المأثور و آدابه ލިޔުއްވީ: حافظ ابوبكرطرطوشى ޞަފްޙާ: 42
