(20 ނޮވެމްބަރ 2025 ގައި ޝާއިއުކުރި ބަޔާ ގުޅޭ)
އަންހެން ބޭފުޅުންނަކީ أمّ الحـكــيــم (بـيـضـــاء) ، بـَــــرَّة، عَـاتـِكَــة، صَـفـــيّـــة، اَرْوَاى، أُمَــيْــمَـــة އެވެ. އަޅުގަނޑު عــبـــدالمـطَّــلِــب ގެފާނުގެ ބޭފުޅުންގެ ނަންފުޅުތައް މިބަޔާންކުރީ الّـــرحـيـــق المـخــتــــوم ގައިވާ ގޮތަށެވެ. މިބޭފުޅުންގެ ރީތިފުޅުކަމާއި އަޚްލާޤު ރަނގަޅުފުޅުކަމާއި ޤާބިލުކަމުގެ ސަބަބުން عــبـــدالمـطَّــلِــب ގެފާނުގެ ހިތްޕުޅުވަނީ އުފާވެރިކަމުން ފުރިފައެވެ. عــبـــدالمـطَّــلِــب ގެފާނުގެ ފިރިހެން ބޭފުޅުންގެ ތެރެއިން ފަސްބޭފުޅަކުވަނީ އިސްލާމްކަމުގެ ނުވަތަ ކުފުރުގެ ސަބަބުން ވަރަށްބޮޑަށް ނަންފުޅު ހިނގައި މަޝްހޫރުވެފައެވެ. އެބޭފުޅުންނަކީ عــبـــد اللّــــه، حَـــمْـــــزة، عــبّـــاس، أبـــوطــالــب، أَبـُــولَــهْب މި ފަސްބޭފުޅުންނެވެ. أَبـُــولَــهْب ގެ އަސްލު ނަމަކީ عــبــدالــعـــــزّى ކަމުގައި ބުނެވެއެވެ. ބައެއް މުއައްރިޚުން ޚިޔާލުކުރައްވާ ގޮތުގައި އޭނާއަށް أَبـُــولَــهْب ގެ ނަން ދެއްވީ ރަޙްމަތުގެ ނަބިއްޔާ صــلّـــــى اللّــــه عــلـيــــه وســلّـــــم އެވެ. ނުވަތަ ޞަޙާބީންނެވެ. ނަމަވެސް އެއީ ރަނގަޅު ވިސްނުންފުޅެއް ނޫނެވެ. إبـــن ســعـــد އޭނާގެ ޠަބަޤާތުގައިވަނީ ޞަރީޙުކޮށް އެވާހަކަ ލިޔުއްވައިފައެވެ. عــبــدالــعـــــزّى އަށް أَبـُــولَــهْب އެވެ ވިދާޅުވެ ނަންދެއްވީ ޚުދު عــبـــدالمـطَّــلِــب ގެފާނެވެ. عــبـــدالمـطَّــلِــب ގެފާނު އޭނާއަށް އެނަން ދެއްވި ސަބަބަކީ އޭނާގެ ރީތިކަމެވެ. ޗާލުކަމެވެ. ޢަރަބި ބަހުގައިވެސް ފާރިސީ ބަހުގައިވެސް ރީތިކޮށް ދޮންކޮށް ހުންނަ މޫނަށް އަލިފާނުގެ ހުޅުކޮޅު ނުވަތަ އަލިފާނުގެ ކޯތާފަތް މިފަދަ އިސްތިޢާރާތައް ބޭނުންކުރެއެވެ. (ސީރަތު ޝިބްލީ)
عــبـــدالمـطَّــلِــب ގެފާނުގެ ޙަޔާތްޕުޅުން އަޅުގަނޑު ދެން އަލިއަޅުވައިލާނީ ފީލުބާގައި މީހުންގެ ވާހަކައަށެވެ. އެ ހާދިސާ ހިނގި ދުވަސްވަރަކީ ޙަބަޝާގެ މީހުން (އިތިއޮޕިޔާގެ މީހުން) ޔަމަނުކަރަ ހިފައިގެން ޔަމަނުކަރައިގެ މައްޗަށް ވެރިކަންކުރާންތިބި ދުވަސްވަރެވެ. އެދުވަސްވަރު ހަބަޝާގެ ޝަހެންޝާހުގެ ފަރާތްޕުޅުން ޔަމަނުކަރައިގެ ގަވަރުނަރުޖަނަރަލަކަށް ހުންނެވީ أبـــــرهـــــــة (صـبــــاح) އެވެ. މަޑުމަޑުން ކުރިޔަށް ވަޑައިގެން އޭނާ ވަނީ ޔަމަނުކަރައިގެ މުސްތަޤިއްލު ރަސްކަލެއްގެ މަޤާމު ހޯއްދަވައިފައެވެ. ނަމަވެސް ޙަބަޝާގެ ރަސްގެފާނުގެ ނާއިބެއްގެ ނަންފުޅު ބޭރުފުށުން ގެންގުޅުއްވައެވެ. أبـــــرهـــــــة ޔަމަނުކަރައިގައި އޭނާގެ ވެރިކަން ވަރުގަދަކުރެއްވުމަށްފަހު ރޯމަން އެމްޕެޔަރާއި އެބައިމީހުންގެ ޙަލީފުން ކަމުގައިވާ ޙަބަޝާގެ ޝަހެންޝާހަށްޓަކައި މަސައްކަތްކުރައްވާން ފައްޓަވައިފިއެވެ. އޭނާގެ އަމާޒަކީ ޢަރަބީންގެ ތެރޭގައި ޢީސާއީދީން ފެތުރުއްވުމާއި ޢަރަބީންގެ ވިޔަފާރީގެ މައްޗަށް ވެރިވެވަޑައިގެންނެވުމެވެ. أُبْـــــرَهَـــــــةُ މިދެންނެވި މަޤްޞަދުގައި ވަރަށްބޮޑު ފައްޅިޔެއް ބިނާކުރެއްވިއެވެ. ޔަމަނުކަރައިގެ ވެރިރަށް ޞަންޢާގައެވެ. އެފައްޅީގެ ނަމަކީ އަލްޤަލީސް ނުވަތަ އަލްޤުލައިސު ނުވަތަ އަލްޤުއްލައިސު ކަމުގައި ޢަރަބި ލިޔުންތެރީން ލިޔުއްވައެވެ. ޔޫނާނީ ބަހުން އެފައްޅީގެ ނަމަކީ Ekklesia އެވެ. محــمّــــد بـــن إسحـــاق ލިޔުއްވައިފައިވެއެވެ. أُبْـــــرَهَـــــــةُ އެފައްޅި ބިނާކުރައްވައި އާރާސްތުކުރައްވައި ނިމިވަޑައިގެންނެވުމުން ޙަބަޝާގެ ޝަހެންޝާހަށް ލިޔުއްވިއެވެ. "ޢަރަބީން كــعـــبـــة ގައި ވަމުންދާ ޙައްޖު މިފައްޅިޔަށް އަނބުރައިނުލައެއް އަޅުގަނޑު ނުހުންނާނަމެވެ." إبـــن كــثـــيــــر ލިޔުއްވައިފައިވެއެވެ. "أُبْـــــرَهَـــــــةُ އެކަންވަނީ ފާޅުގައި ޔަމަނުގައި އިޢުލާން ކުރައްވައިފައެވެ. އެ އިޢުލާނާމެދު ހިތްހަމަނުޖެހި ރުޅިއައިސްފައިހުރި ޙިޖާޒުކަރައިގެ ޢަރަތްބެއް ކޮންމެވެސްގޮތަކުން އެފައްޅިޔަށް ވަދެ ފައްޅީގެ ތެރެޔަށް ބޮޑުކަމުގޮސް އެފައްޅިޔަށް އިހާނެތިކޮށް ހިތައިފައި ފިލައިގެން ހިނގައްޖެއެވެ. أُبْـــــرَهَـــــــةُ އަށް އެކަން އެނގިވަޑައިގެންނެވުމުން އޭނާ ވަރަށްބޮޑަށް ކޯފާއިސްވިއެވެ. كــعـــبـــة މުގުރައިނުލެއްވޭހައި ހިނދަކު ހިމޭނުން ނުހުންނަވާނެކަމަށް ހުވާކުރައްވައިފިއެވެ.
އެއަށްފަހު އޭނާ މީލާދީން 570 ވަނަ އަހަރު ނުވަތަ 571 ވަނަ އަހަރު ފަސްދޮޅަސްހާހުގެ ބޮޑު ލަޝްކަރެއް ތައްޔާރުކުރައްވައިގެން މައްކާއާ ދިމާޔަށް ދަތުރު ފައްޓަވައިފިއެވެ. އެލަޝްކަރާއެކު ތޭރަ ނީލަގެރި އެތް ވެސް ގެންދެވިއެވެ. އޭނާ ދަތުރުކުރެއްވި މަގުމަތީން ޔަމަނުގެ ސަރުދާރެއް ކަމުގައިވާ ذونــفــــــر އެލަޝްކަރާ ދިމާކުރެއްވިއެވެ. އެއަށްފަހު ޚަޘްޢަމްވަންހައިގެ ސަރުދާރު نـــفــيــل بــــن حبــيـب خــثـــعــمـــى ވެސް أُبْـــــرَهَـــــــةُ ގެ ލަޝްކަރާ ހަނގުރާމަކުރެއްވިއެވެ. ނަމަވެސް أُبْـــــرَهَـــــــةُ ޢަރަބީންގެ ދެލަޝްކަރުވެސް ބަލިކޮށްލެއްވިއެވެ. أُبْـــــرَهَـــــــةُ ޠާއިފާ ހަމަޔަށް ވަޑައިގެންނެވުމުން ޘަޤީފުވަންހައިގެ ސަރުދާރެއްކަމުގައިވާ مسـعــــود ވަފުދަކާއެކު ވަޑައިގެން أُبْـــــرَهَـــــــةُ އާ ބައްދަލުކުރެއްވިއެވެ. އޭނާ أُبْـــــرَهَـــــــةُ އަށް ދެންނެވިއެވެ. "އަޅުގަނޑުމެންގެ ބުދުފައްޅިޔަކީ މަނިކުފާނު އެތަނެއް މުގުރުއްވާން ތިޔަވަޑައިގެންނެވި މަޢުބަދެއް ނޫނެވެ. އެތަން ހުންނަނީ މައްކާގައެވެ. ވީމާ އަޅުގަނޑުމެންގެ ފައްޅި ދޫކޮށްލައްވާށެވެ. އަޅުގަނޑު މަނިކުފާނަށް މައްކާއަށް ވަޑައިގަންނަވާނެ މަގުދައްކާނެ ދައްލާލަކު ފޮނުވައިދޭނަމެވެ."
أُبْـــــرَهَـــــــةُ އެކަން ޤަބޫލުކުރެއްވިއެވެ. ޘަޤީފުވަންހައިގެ މީހުން أُبْـــــرَهَـــــــةُ އަށް މަގުދައްކާން أبــــورغــال އެވެ ކިޔުނު މީހަކު ފޮނުވައިދިނެވެ. أُبْـــــرَهَـــــــةُ ގެ ލަޝްކަރަށް މައްކާއާ ތިންކޯހުގެ (ދެމޭލު) ދުރުމިނުގައިވާ "اَلْــمُــغَــمَّس" އާހަމަޔަށް އާދެވުނުތަނާ أبــــورغــال މަރުވެއްޖެއެވެ. ޢަރަބީން ވަރަށްގިނަ ދުވަސްތަކެއް ވާންދެން އޭނާގެ މަހާނަމައްޗަށް ހިލައުކަމުން ގެންދިޔައެވެ. ހަމައެފަދައިން بـيـت اللّــــه އަށް ޙަމަލަދޭން އައި ބަޔަކަށް އެއްބާރުލުންދިނީތީ ޘަޤީފުވަންހައިގެ މީހުންނަށްވެސް އެތައްދުވަހެއް ވާންދެން މަލާމާތްކުރިއެވެ. ޘަޤީފުވަންހައި މީހުންގެ ބޭނުމަކީ ލާތައެވެ ކިޔޭ ބުދުގެ ފައްޅި ޙިމާޔަތްކުރުމެވެ. محــمّــــد بـــن إسحـــاق ލިޔުއްވައިފައިވެއެވެ. أُبْـــــرَهَـــــــةُ، اَلْــمُــغَــمَّس އާ ހަމައިން އޭނާގެ އިސްލަޝްކަރު ކުރިޔަށް ނެރުއްވައިފިއެވެ. އެބައިމީހުން ތިހާމަތުގެ އަހްލުވެރީންނާއި قـــــريـش ންގެ ވަރަށްގިނަ ނަޢަމުސޫފިތައް ފޭރިގަތެވެ. އޭގެތެރޭގައި ރަޙްމަތުގެ ނަބިއްޔާ صــلّـــــى اللّــــه عــلـيــــه وســلّـــــم ގެ ކާފައިކަލުން عــبـــدالمـطَّــلِــب ގެފާނުގެ ދުއިސައްތަ ޖަމަލުވެސް ހިމެނެއެވެ.
أُبْـــــرَهَـــــــةُ އެއަށްފަހު އޭނާގެ ފަރާތްޕުޅުން މައްކާއަށް ޤާޞިދަކު ފޮނުއްވިއެވެ. أُبْـــــرَهَـــــــةُ އެ ޤާޞިދު މެދުވެރިކުރައްވައި މައްކާގެ މީހުންނަށް ޚަބަރު ފޮނުއްވިއެވެ. "އަހަރެން އައީ ތިޔަބައިމީހުނާ ހަނގުރާމަ ކުރާކަށެއް ނޫނެވެ. އަދި ކީއްހެއްޔެވެ. އަހަރެން އައީ ތިޔަ ރަށުގައި ހުންނަ ގެފުޅު މުގުރާށެވެ. ތިޔަބައިމީހުން އަހަންނާ ހަނގުރާމަ ނުކުރާކަމުގައިވާނަމަ އަހަރެން ތިޔަބައިމީހުންގެ ޖާނަކާ މާލަކާ ހުރަހޮޅިޔެއް ނުގަންނާނަމެވެ." އެދުވަސްވަރު މައްކާގެ އެންމެ އިސްވެރިޔަކީ عــبـــدالمـطَّــلِــب ގެފާނެވެ. أُبْـــــرَهَـــــــةُ ގެ ޤާޞިދު މީހުންކުރެން އަހައި އޮޅުންފިލުވައިގެން އެކަލޭގެފާނުގެ ފައިންޕުޅު ދެކެފައި أُبْـــــرَهَـــــــةُ ގެ މެސެޖު ރައްދުކުރިއެވެ. عــبـــدالمـطَّــلِــب ގެފާނު ވިދާޅުވިއެވެ. "އަހަރެމެންނަކަށް أُبْـــــرَهَـــــــةُ އާ ހަނގުރާމަކުރެވޭފަދަ ބާރެއް ލިބިފައެއް ނުވެއެވެ. މިއީ اللّــــه ގެ ގެފުޅެވެ. އެކަލާނގެ އެދިވޮޑިގެންވާނަމަ އެކަލާނގެ އެގެފުޅު ޙިމާޔަތްކުރައްވައިފާނެއެވެ." ޤާޞިދު ދެންނެވިއެވެ. "ކަލޭގެފާނު އަޅުގަނޑާއެކު أُبْـــــرَهَـــــــةُ ގެ އަރިހަށް ހިންގަވާށެވެ." عــبـــدالمـطَّــلِــب ގެފާނު އެކަން ޤަބޫލުކުރެއްވިއެވެ. ޤާޞިދާއެކު أُبْـــــرَهَـــــــةُ ގެ އަރިހަށް ވަޑައިގެންނެވިއެވެ. عــبـــدالمـطَّــلِــب ގެފާނަކީ ނުހަނު ހައިބަތުހުރި ރީތި ބޭކަލެކެވެ. ނުހަނު ކީރިތި މޫރިތި ޝަޚްޞިއްޔަތެއްގެވެރި ބޭކަލެކެވެ. أُبْـــــرَهَـــــــةُ އަށް އެކަލޭގެފާނު ފެނިވަޑައިގެންނެވުމުން އޭނާގެ ހިތްޕުޅަށް ވަން ހައިބަވަންތަކަމުގެ ސަބަބުން އެކަލޭގެފާނު ދޫލަމަތީގައި ބައިންދަވައިފައި އޭނާ ތަޚުތުގައި އިންނަވާކަށެއް ކެރިވަޑައެއް ނުގެންނެވިއެވެ. أُبْـــــرَهَـــــــةُ ތަޚުތުން ފައިބައިވަޑައިގެން عــبـــدالمـطَّــلِــب ގެފާނުގެ އަރިހުގައި ދޫލަމަތީގައި އިށީނދެވަޑައިގެންފިއެވެ.
أُبْـــــرَهَـــــــةُ، عــبـــدالمـطَّــلِــب ގެފާނާ ސުވާލުކުރެއްވިއެވެ. "ކަލޭގެފާނު އެދިވަޑައިގަންނަވަނީ ކޮންކަމެއްތޯއެވެ؟" عــبـــدالمـطَّــلِــب ގެފާނު ވިދާޅުވިއެވެ. "މަނިކުފާނުގެ ލަޝްކަރު ހިފައިގަތް ތަކެތީގެ ތެރޭގައި އަޅުގަނޑުގެ ދުއިސައްތަ ޖަމަލުވެއެވެ. އެތަކެތި ދޫކޮށްދެއްވާށެވެ." أُبْـــــرَهَـــــــةُ ވިދާޅުވިއެވެ. ކަލޭގެފާނު ތިޔަ އެދިވަޑައިގެންނެވީ ކަލޭގެފާނުގެ ޖަމަލު ތަކަށެވެ. އަޅުގަނޑު މުގުރާން މިއައި ގެއަކީ ކަލޭގެފާނާއި ކަލޭގެފާނުގެ ކާބަފައިކަލުންގެ ދީނުގެ މަރްޖިޢެވެ. ނާރެހެވެ. އެކަމަކު ކަލޭގެފާނު އެގެޔާ ބެހޭގޮތުން އެއްވެސް ވާހަކަފުޅެއް ނުދެއްކެވީމުއެވެ." عــبـــدالمـطَّــلِــب ގެފާނު ވިދާޅުވިއެވެ. އަޅުގަނޑަކީ ހަމައެކަނި އަޅުގަނޑުގެ ޖަމަލުތަކުގެ ވެރިޔާއެވެ. އަޅުގަނޑު މަނިކުފާނާ މިވާހަކަ ދެއްކީ އެޖަމަލުތަކާ ބެހޭގޮތުންނެވެ. ތިޔަ ވިދާޅުވި ގޭގެވެސް ވެރި ރައްބަކު ވޮޑިގެންވެއެވެ. ޚުދު އެކަލާނގެ އެގެފުޅު ޙިމާޔަތް ކުރައްވައިފާށިއެވެ." أُبْـــــرَهَـــــــةُ ވިދާޅުވިއެވެ. "އެކަލާނގެއަކަށްވެސް އަޅުގަނޑުގެ ކިބަޔަކުން އެގެފުޅު ސަލާމަތެއް ނުކުރެއްވޭނެއެވެ." عــبـــدالمـطَّــلِــب ގެފާނު ވިދާޅުވިއެވެ. "އެހެންވީއިރު ތިޔަ އިންނެވީ މަނިކުފާނެވެ. އެގެފުޅު އެހެރީއެވެ. ދެން ވާނެގޮތެއް އެނގިވަޑައިގަންނަވާނީ މަނިކުފާނަށެވެ. އެންމެ މޮޅަށް އެކަން ދެނެވޮޑިގެންވާނީ އެކަލާނގެއެވެ." މިވާހަކަފުޅުގެ ތެރޭގައި عــبـــدالمـطَّــلِــب ގެފާނު އިތުރަށް ވިދާޅުވިއެވެ. "އެއީ މާތް اللّــــه ގެ ގެފުޅެވެ. މިއަދާ ހަމައަށްވެސް އެކަލާނގެ އެއްވެސް މީހަކު އެގެފުޅުގެ މައްޗަށް ވެރިވެގަތަކަ ނުދެއްވައެވެ." عــبـــدالمـطَّــلِــب ގެފާނު އެހެން ވިދާޅުވެފައި أُبْـــــرَهَـــــــةُ ގެ އަރިހުން ތެދުވެވަޑައިގެން ވަޑައިގެންފިއެވެ. أُبْـــــرَهَـــــــةُ އެކަލޭގެފާނުގެ ޖަމަލުތައް ދޫކޮށްލެއްވިއެވެ. (عــبـــدالمـطَّــلِــب ގެފާނު އެޖަމަލުތައް ހެއްދެވީ ގެފުޅުގެ ހަދްޔަކަށެވެ.)
އެފަދަ ބޮޑު ލަޝްކަރަކާ ހަނގުރާމަކުރާނެ ބާރެއް قـــــريـش ންނަކަށް ލިބިފައެއް ނުވެއެވެ. އެހެންކަމުން عــبـــدالمـطَّــلِــب ގެފާނު قـــــريـش ންނަށް އެންގެވިއެވެ. ތިޔަބައިމީހުންގެ އަނބިދަރީން ގޮވައިގެން ފަރުބަދަތަކުގެމައްޗަށް ހިނގައިދާށެވެ. عــبـــدالمـطَّــلِــب ގެފާނުގެ ބޭނުންފުޅަކީ قـــــريـش ންގެ ޤަތުލު ޢާންމެއް ހިނގިޔަ ނުދެއްވުމެވެ. قـــــريـش ންނަށް އެގޮތަށް އަމުރުކުރެއްވުމަށްފަހު عــبـــدالمـطَّــلِــب ގެފާނު ވަޑައިގެންނެވީ ޙަރަމްފުޅުގެ ތެރެޔަށެވެ. قـــــريـش ވަންހައިގެ ކުރިޔަށް ތިއްބެވި ބައެއް ސަރުދާރުން ގޮވައިގެންނެވެ. އެކަލޭގެފާނު ގެފުޅުގެ އަރިހަށް ވަޑައިގެން ގެފުޅު ޙިމާޔަތްކޮށްދެއްވުން އެދިވަޑައިގެން ނުހަނު ފުރިހަމަ ދުޢާފުޅެއް ކުރެއްވިއެވެ. އިސްލާމީ ތާރީޚުގެ މުއައްރިޚުންގެ ތެރެއިން إبــــن هـشــام އާއި إبــــن جــــــريــــر އާއި سهـيـــلــــى ވަނީ عــبـــدالمـطَّــلِــب ގެފާނު ޅެންބަހުން ކުރެއްވި ދުޢާފުޅު ނަކަލުކުރައްވައިފައެވެ. ތިރީގައި މިވަނީ އެ ދުޢާފުޅުގެ އަވަސް ތަރުޖަމާއެކެވެ.
– ޔާ އިލާހީއެވެ! އަޅުތަކުންވެސް އެބައިމީހުންގެ ގެދޮރު އަމިއްލަޔަށް ޙިމާޔަތް ކުރެއެވެ. އިބަކަލާނގެވެސް އަމިއްލަފުޅު ޒާތުފުޅުން އިބަކަލާނގެ ގެފުޅު ޙިމާޔަތް ކުރައްވައިފާނދޭވެ.
– މާދަމާ އެބައިމީހުންގެ ޞަލީބާއި އެބައިމީހުންގެ ތަދުބީރުތައް އިބަ އިލާހު ރޭއްވެވުންތެރިކަމުގެ މައްޗަށް ގަދަވިޔަ ނުދެއްވާނދޭވެ.
– ޞަލީބާއި ޞަލީބުގެ އާލުންގެ މައްޗަށް އިބަ އިލާހުގެ އާލުންނަށް މަދަދު ފޯރުއްވަވާނދޭވެ.
– އޭ މިއަޅާގެ ރައްބެވެ. އިބަ އިލާހު ފިޔަވައި އެހެން ފަރާތަކުން އެބައިމީހުންގެ މައްޗަށް މިއަޅާ މަދަދަކަށް އުންމީދެއް ނުކުރަމެވެ. އެހީއަކަށް ނޭދެމެވެ. އޭ މިއަޅާގެ ރައްބެވެ. އެބައިމީހުންގެ ކިބައިން އިބަ އިލާހުގެ ޙަރަމް ރައްކައުތެރި ކޮށްދެއްވާނދޭވެ.
– މިގޭގެ ކޮންމެ ދުޝްމިނަކީ އިބަ އިލާހުގެ ދުޝްމިނެކެވެ. އެބައިމީހުން އިބަ އިލާހުގެ ރަށް ހަލާކުކުރިޔަ ނުދެއްވާނދޭވެ."
عــبـــدالمـطَّــلِــب ގެފާނު މި ދުޢާފުޅު ކުރެއްވުމަށްފަހު އެކަލޭގެފާނުގެ އެކުވެރީން ގޮވައިގެން އެކަލޭގެފާނުވެސް ފަރުބަދަތަކުގެ މައްޗަށް ވަޑައިގެންފިއެވެ. أُبْـــــرَهَـــــــةُ އޭގެ އަނެއްދުވަހު އޭނާގެ ލަޝްކަރާއިގެން މައްކާއަށް އަރައިވަޑައިގަންނަވާން ދަތުރު ފެއްޓެވިއެވެ. ނަމަވެސް އޭނާގެ އެތްތަކުގެ މުޤައްދިމަކަށް ހަމަޖައްސަވައިފައިވާ محـــمـــــود އެވެ ކިޔުނު ގަދަފަދަ ބިޔަ އެތް ކުއްލިޔަކަށް އިށީނދެއްޖެއެވެ. އެތްގޮވީން އުޅެއުޅެ އެއްގޮތަކަށްވެސް ކުރިޔަކަށް ނުދިޔައެވެ. (އެޓްލަސް ސީރަތެ ނަބަވީ: ޑޮކްޓަރ شــــوقـــــى أبــــو خـــلــيـــل)
أُبْـــــرَهَـــــــةُ ގެ ލަޝްކަރު އެގޮތުގައި ކުރިޔަށްނުދެވި މަޑުކޮށްގެން ތިއްބައި އަރަހުށި މާތް اللّــــه އެބައިމީހުންގެ ހަލާކު ފޮނުއްވައިފިއެވެ. އެކަލާނގެ ފޮނުއްވީ އަބާބީލު ދޫނިބައިބައިގަނޑުގަނޑެވެ. އެއިން ކޮންމެ ދޫންޏެއްވެސް ތިން ހިލަކޮޅު ގެނެއެވެ. ތުނބުން އެއްހިލަ ދެފައިގެ އިނގިލިތަކުން ދެހިލަކޮޅެވެ. އަބާބީލު ދޫނިތައް އެލަޝްކަރާ ދިމާޔަށް ހިލައުކާން ފެށުމުން އެހިލަތަކުން ޖެހޭމީހުންގެ ގުނަވަންތައް ބުރިވެގެން ފައިބާން ފަށައެވެ. ގިނައިރެއްނުވެ އެމީހަކު މަރުވެދެއެވެ.
( ނުނިމޭ)
