
އަބުބަކުރުގެފާނަކީ ކީރިތި ރަސޫލާގެ ޞަޙާބީއެކެވެ. އެކަލޭގެފާނަކީ މީލާދީން 632 ވަނަ އަހަރު ކީރިތި ރަސޫލާ ސުވަރުގެ ވަޑައިގަތީމާ އިސްލާމީ ވެރިކަމަށް އިސްކުރެވުނު ފުރަތަމަ ޚަލީފާއެވެ. އަބޫބަކުރުގެފާނު އުފަންވެވަޑައިގަތީ މައްކާއަށެވެ. އެކަލޭގެފަނަކީ ޤުރައިޝް ވަންހައިގެ ބޭކަލެކެވެ. އެކަލޭގެފާނުގެ ބައްޕައަކީ މައްކާގެ ނުފޫޒު ގަދަ ބޭކަލެއް ކަމުގައިވާ އުޘްމާން އަބީ ޤުޙާފާ އެވެ. މަންމައަކީ ޤުރައިޝް ވަންހައިގެ ބަނޫ ތާއިމްގެ އުއްމުލް ޚައިރުއެވެ.
އަބޫބަކުރުގެފާނު އުފަންވެވަޑައިގަތީ މީލާދީން 573 ވަނަ އަހަރު ކީރިތި ރަސޫލާ ދުނިޔެއަށް ވަޑައިގަތުމުގެ 2 އަހަރު ފަހުންއެވެ. އެކަލޭގެފާނު މުއްސަނދި އަދި މަޝްހޫރު އާއިލާ އަކަށް ނިސްބަތްވެ ވަޑައިގަތް ކަމުގައި ވިޔަސް އެކަލޭގެފާނުގެ ކިބައިގައި ބޮޑާކަމެއް ނެތެވެ. އެކަލޭގެފާނަކީ އިތުރުފުޅު ނުހައްދަވާ ބޭކަލެކެވެ. ނުބައި މަގަކުން ނުހިންގަވައެވެ. ކާމިޔާބު ވިޔަފާރިވެރިއެކެވެ. އެކަލޭގެފާނު ކުރެއްވި ވިޔަފާރިއަކީ އިންސާފާއި ތެދުވެރިކަމާއެކު ކުރެއްވި ވިޔަފާރިއެކެވެ.
އަބޫބަކުރުގެފާނާއި ކީރިތި ރަސޫލާއާ ދެބޭކަލުން ތުއްޕުޅުއިރުއްސުރެ އުޅުއްވީ އެކީގައެވެ. ދެބޭކަލުންގެ ދަރިފަސްކޮޅު ގުޅެނީ ހަތްވަނަ ކާފާފުޅާ ހަމައިންނެވެ. މުޙައްމަދުގެފާނަށް ރަސޫލުކަން ބާވައިލެއްވީ މީލާދީން 610 ވަނަ އަހަރުއެވެ. އެއީ ރޯދަމަހެއްގެ ތެރޭގައެވެ. އެކަލޭގެފާނު އަބޫބަކުރުގެފާނަށް ދީނަށް ގޮވައިލެއްވުމާއެކު އީމާންވެވަޑައިގެންފިއެވެ. އެއީ މުޙައްމަދުގެފާނަކީ އިތުރުފުޅު ނުހައްދަވާ ބޭކަލެއްކަން އަބޫބަކުރުގެފާނަށް އެނގިވަޑައިގަންނަވާތީއެވެ.
އަބޫބަކުރުގެފާނު ދުވަހަކުވެސް ކީރިތި ރަސޫލާގެ ވާހަކަފުޅަކަށް ނުވަތަ ނިންމުންތަކަކަށް ޝައްކެއް ނުކުރައްވައެވެ. އެކަލޭގެފާނު އިސްލާމް ދީން ހިތްޕުޅުގެ އަޑިން ގަބޫލުފުޅު ކުރެއްވިއެވެ. އަބޫބަކުރުގެފާނަކީ ކީރިތި ރަސޫލާގެ އާއިލާގެ ބޭރުން އެންމެ ފުރަތަމަ އިސްލާމް ދީން ގަބޫލުކުރެއްވި ކަލޭގެފާނެވެ.
ސާނިޔަސްނައިން ޚާންގެ ލިޔުއްވުމެއްގެ ތަރުޖަމާއެއް