ޞަޙާބީންނާއެކު 365 ދުވަސް – 5: އަބޫބަކުރުގެފާނު ކީރިތި ރަސޫލާ ދެކެ ލޯބިފުޅުވާ ވަރު

އެއްދުވަހަކު އަބޫބަކުރުގެފާނު ގެފުޅު އަރިހަށް ވަޑައިގެން އެތާގައި ތިބި މީހުންނަށް އިސްލާމް ދީނަށް ގޮވައިލެއްވިއެވެ. އެކަމަކު އެ ތާގައި ތިބި މީހުންނަށް އެ ކަލޭގެފާނުގެ ވާހަކަފުޅު ކަމުނުގޮސްގެން އެކަލޭގެފާނަށް އަނިޔާ ކޮށްފިއެވެ. މިކަމުގަ އެންމެ އިސްވެ އުޅުނީ ޢުތުބާ ބިން ރަބިޢާ ނަމަކަށް ކިޔުނު މީހެކެވެ. އޭނަ އަބޫބަކުރުގެފާނުގެ މޫނުފުޅު ޒަޚަމް ކޮށްލިއެވެ. އެ ވަގުތު ރަސޫލުﷲ ޞައްލަﷲ ޢަލައިހި ވަސައްލަމްވެސް އެތާގައި ހުންނެވިއެވެ. އެމީހުން އެކަލޭގެފާނަށްވެސް އަނިޔާ ކުރިއެވެ. އަބޫބަކުރުގެފާނުގެ ގަބީލާ ކަމުގައިވާ ބަނޫ ތާއިމްގެ މީހުން އައިސް އެކަލޭގެފާނު ގެއަށް ގެންގޮސްފިއެވެ. އެމީހުން ދިޔައީ އެކަލޭގެފާނު އަވަހާރަ ވެއްޖެ ނަމަ ޢުތްބާ މަރައިލާނޭ ކަމަށް ހުވައި ކޮށްފައެވެ. އެކަމަކު އެ ދުވަހު ހަވީރު އަބޫބަކުރުގެފާނު ހޭފުޅު އަރައިފިއެވެ. އެކަލޭގެފާނު އެންމެ ފުރަތަމަ ބޭނުންފުޅުވީ ކީރިތި ރަސޫލާގެ ހާލުކޮޅު ބައްލަވާށެވެ. ރަސޫލާ ހުންނެވި ތަނަކަށް ގެންގޮސްދޭށޭ ވިދާޅުވިއެވެ. ގަބީލާގެ މީހުން މިކަމާ ނުރުހިގެން ނުކުމެގެން ހިނގައްޖެއެވެ. އެހެންވީމާ ކީރިތި ރަސޫލާގެ އަރިހަށް ގެންގޮސް ދެއްވާށޭ އެކަލޭގެފާނުގެ މަންމާފުޅު އަރިހު ދަންނަވައިފިއެވެ. ރޭވެ އަނދިރިވީމާ މަންމާފުޅު އުއްމު ޖަމިލާވެސް އެކު އަބޫބަކުރުފާނު ގޮވައިގެން ކީރިތި ރަސޫލާ އަރިހަށް ވަޑައިގަތެވެ. އަބޫބަކުރުގެފާނުގެ ހާލުކޮޅު ފެނިވަޑައިގަތީމާ އިތުރު އެކަލޭގެފާނު ކަންބޮޑުވެވަޑައިގަތެވެ. އަދި އެކަލޭގެފާނުގެ ނިތްކުރިފުޅުގައި ބޮސްދެއްވިއެވެ. ކީރިތި ރަސޫލާ ކަންބޮޑުވެވަޑައިގަތީމާ ލިބިވަޑައިގެންފައިވާ އަނިޔާތައް މާ ބޮޑު ކަމަކަށް ނުހައްދަވައި އެކަލޭގެފާނުގެ މަންމާފުޅަށް އިސްލާމްދީނުގެ ދައުވަތު ދެއްވައި އެކަމަނާ އިސްލާމްދީން ގަބޫލު ކުރައްވާތޯ ދުޢާފުޅެއް ކޮށް ދެއްވުމަށް އެދިވަޑައިގަތެވެ. ކީރިތި ރަސޫލާ އަބޫބަކުރުގެފާނުގެ މަންމާފުޅަށް ދީނަށް ގޮވައިލެއްވުމާއެކު އެކަމަނާ އިސްލާމްވެވަޑައިގެންފިއެވެ.

1 ޚިޔާލު

  1. އަޙްމަދު ޢިޔާން ނަޢީމް ލިޔުއްވާ ބައިތައް ހަދުވަސް ރޯދަ ނިމިގެން ފެންނާނެ ކަމުގެ އުންމީދުގައި އެބަހުރީމެވެ. ﷲ ތިބާއަށް ހެޔޮ ޖަޒާ ދެއްވާށި.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.