ކީރިތި ރަސޫލާ އިސްލާމްދީނަށް ގޮވައިލެއްވުމުން ވަރަށް ގިނަ މީހުން އިސްލާމްދީނަށް ވަނެވެ. އޭގެ ތެރޭގައި މުއްސަނދިންނާއި ފަގީރުންނާއި އަޅުންނާއި މިނިވަނުންވެސް ހިމެނެއެވެ. މުއްސަންޖަކަށް ވިޔަސް ފަގީރަކަށް ވިޔަސް ޤުރައިޝުންގެ އަނިޔާއާއި ދުއްތުރާލާ ކުރިމަތިލާން ނުޖެހޭ އެކަކުވެސް މީގެ ތެރޭގައި ނުހިމެނެއެވެ. އިސްލާމްދީން ގަބޫލުކުރި މީހުންގެ ތެރެއިން އެންމެ ބޮޑަށް އަނިޔާ ކުރީ އަޅުންނަށެވެ. އަޅުންގެ ސާހިބުން އެމީހުންނަށް އަނިޔާކޮށް މަރައިވެސް ހެދިއެވެ. މެރި މީހުންގެ ތެރޭގައި ހިމެނޭ އެއް ބޭކަނބަލަކީ ޢައްމާރު އިބްނު ޔާސިރުގެ މަންމަ އަދި ޔާސިރުގެ އަނބިކަމަނާ ސުމައްޔާއެވެ. ޢައްމާރު އިބަނު ޔާސިރް ފަހުން ވެވަޑައިގަތީ ވަރަށް ޚާއްސަ ޞަޙާބީއަކަށެވެ.
އަބޫބަކުރުގެފާނަކީ މުއްސަނދިކަމާއި މަޝްހޫރުކަން ލިބިވަޑައިގެން ހުންނެވި ދީލަތި ސަހާބީއެކެވެ. ފަގީރުންނާއި ބަލިހާލުގައި އުޅޭ މީހުންނަށް އެހީތެރިކަން ފޯރުކޮށް ދެއްވުމަކީ އެކަލޭގެފާނު ކުރައްވާ ކަމެކެވެ. އެކަލޭގެފާނު އިސްލާމްދީން ގަބޫލުކުރެއްވުމަށް ފަހު އަތްޕުޅުގައި ހުރި ހުރިހާ ފައިސާއެއް ޚަރަދު ކުރެއްވީ މުސްލިމުންނަށް އެހީތެރިވެ ވަޑައިގެންނެވުމަށެވެ. އިސްލާމް ދީނަށް ވަނުމުގެ ސަބަބުން އަނިޔާ ލިބެމުން ދިޔަ އެތައް އަޅުންނެއް އެކަލޭގެފާނު ވަނީ ފައިސާ ދެއްވައިފައި ބައްލަވައިގަނެ މިނިވަން ކުރައްވައިފައެވެ. އިސްލާމްދީނުގެ ފުރަތަމަ މުއައްޒިން (ބަންގި ގޮވާ މީހާ) ބިލާލުގެފާނު ބައްލަވައިގަނެ މިނިވަން ކުރެއްވީވެސް އަބޫބަކުރުގެފާނެވެ.
ސާނިޔަސްނައިން ޚާންގެ ލިޔުއްވުމެއްގެ ތަރުޖަމާއެއް
Keep it up