ހުސްވި މެއި މަހުގެ 25 ވަނަ ދުވަހު ކަޅު ނަސްލުގެ އެމެރިކާ މީހަކު،ފިހާރައަކުން ސިނގިރެޓް ފޮއްޓެއް ގަންނަން އަރަބި ފަލަސްތީނު މަތިކޮޅު މީހަކު ހިންގާ ފިހާރަޔަކަށް ވަދެ 20 ޑޮލަރުގެ ނޫޓެއް ދިއްކޮށްލިއެވެ. އެވަގުތު ފިހާރައިގެ ސޭޓަކަށް ހުރި މީހަކަށް ޝައްކުވި ގޮތުގައި އެއީ ހަމަ ކުޑަ ހިނދުކޮޅެއްގެ ކުރިން އެ ފިހާރައިން ބަލައި ނުގެން ވިހި ޑޮލަރުގެ ނޫޓެވެ! އެހިސާބުން ފިހާރައިގެ ފަރާތުން، އެމީހުންގެ އާދައިގެމަތިން ފުލުހަށް ގުޅައި މީހަކު ސައްހަ ނޫން ފައިސާ ދޭން އުޅުނުކަމަށް ބުނެ ފުލުހަށް އެންގީއެވެ.
ފުލުހުން އައިއިރު އެ ފިހާރައަށް ވަން ދެމީހުންނާއި ފަހުން ވަން ޖޯޖް ފްލޮއިޑް ތިބީ އެމީހުން އައި ކާރުގައެވެ. ފްލޮއިޑްގެ އަތުގައި ފުލުހުން ބިޑި އެޅީ އެ ކާރުގެ ދޮރުމަތިން ކަން އެ ފިހާރައިގެ ކެމެރާތަކުން ސާފުކޮށް ފެނެއެވެ. ނަމަވެސް ފްލޮއިޑް ހައްޔަރުކުރި ފުލުހުންގެ ގަދަބަދަވިކަމުން ފަނަރަވަރަކަށް މިނެޓުގެ ތެރޭގައި ފުލުހަކު ޖޯޖް ފްލޮއިޑް މަގުމައްޗަށް ވައްޓާލައި އޭނާގެ ކަރަށް ކަކުލުން އޮބިލެއް ބާރުކަމުން ނޭވަ ނުލެވި ހާސްވެގެން މަރުވެއްޖެއެވެ.
"ކަޕް ފުޑްސް" ކިޔާ އެ ފިހާރައިގެ ވެރިޔާ ﻣﺤﻤﻮﺩ ﺃﺑﻮ ﻣﻴﺎﻟﻪ ފަހުން ނޫސްވެރިންނަށް ކިޔައިދިން ގޮތުގައި އޭނާގެ ބައްޕަ އެމެރިކާގެ އެންމެ އުތުރުން ކެނެޑާ އާ އިންވެގެން އޮންނަ މިނެސޯޓާ ސްޓޭޓުގެ އެންމެ ބޮޑު އެއް ސަހަރުކަމުގައިވާ މިނިއޭޕޮލިސް ގައި އެވިޔަފާރި ފެށީ 1989 ގައެވެ. ބައްޕަ ނިޔާވުމުން އާއިލީ ވިޔަފާރިއެއްގެ ގޮތުގައި މެދު ނުކެނޑި އެތަން މިހާރު ހިންގަނީ އެއްބަނޑު އެއްބަފާ ހަތަރު ބެއިންނެވެ. މަހްމޫދް އަބޫ މައްޔާލޭ ( މިއީ ޝާމްކަރައިގެ އާންމު ބަހުރުވައިގައި، ލިޔުމުގައި އޮންނަ އަބަފިލި ކުޑަކޮށް އެބެފިއްޔަށް ވާ ގޮތަށް ކިޔާތީ އެމީހުން އެނަން ލިޔެ،ކިޔާގޮތެވެ) (Mahmoud Abumayyaleh) ކިޔައިދިން ގޮތުގައި އެފިހާރަޔަށް ވަންނަ ގިނަ މީހުންގެ ނަމުން ގޮވާލައި އުޅޭހައި އެންމެންވެސް ދެކި ފަރިތައެވެ. މަރުވި ޖޯޖް ފްލޮއިޑަކީވެސް އާންމުކޮށް ފިހާރަޔަށް އައިސް އުޅޭ މީހެކެވެ. ދުވަހަކުވެސް އޭނާގެ ކިބައިން އުނދަގުލެއް ނުފެނެއެވެ. ނަމަވެސް، އެދުވަހު ފްލޮއިޑް ގެންގުޅުނީ ސައްހަނޫން ނޫޓެއް ކަމަށް ޝައްކުވާތީ ފުލުހުންނަށް ގުޅީ އޭނާގެ މުވައްޒަފެކެވެ. މިހާރު އެންމެ ދެރަވަނީ އެކަމާއެވެ. އެމީހުން، (ފުލުހުން) އާންމުކޮށް ކުރާ ކަމަކީ ނޫޓް ލިބުނު ގޮތެއް އަހައި ތަހުގީގެއް ހިންގަނީއެވެ. ފިހާރަޔަށް ސައްހަނޫން ނޫޓެއް ގިނަފަހަރަށް ގެނެވެނީ ކަސްޓަމަރުންނަށް ވެސް ނޭނގި ކަމުގައި އަބޫ މައްޔާލޭ ނޫސްވެރިންގެ ގާތުގައި ބުންޏެވެ.
މި ދެންނެވުނު ހިތާމަވެރި މަރުގެ ސަބަބުން އެންމެ ފަހުން އެމެރިކާމީހުން، އަދި ވަކީން ކަޅު ނަސްލުގެ މީހުންނާއި މެކްސިކޯ ދަރިފަސްކޮޅުގެ މީހުންގެ ކެތްތެރިކަން ކޮޅުންލައި މަގުމައްޗަށް ނިކުތީއެވެ. ހަގީގަތުގައި އެމެރިކާ އެމެރިކާއަކަށް ހަދައި އެކި މަސައްކަތުގައި ދެމި ތިބި ތަފާތު ފަންތި އާއި ގިންތީގެ އެންމެން، ހުރިހައި ނަސްލެއްގެ މީހުން ފުލުހުންގެ އަނިޔާވެރިކަމާ އިދިކޮޅަށް ނިކުތީއެވެ. ބައެއް ފަހަރު ހީވާ ގޮތަކީ މި ހުރިހައި ކަމެއް މިވީ ސައްހަ ނޫން ވިހި ޑޮލަރާ ހެދީ ބާއެވެ؟ ނޫނެކެވެ! އަސްލަކީ ބައެއް މީހުންގެ ހިތުގައި ވާ އަސްލެއް ނެތް ރުޅިވެރިކަމާއި ނަފުރަތެވެ!
ޖަމަލެއްގެ ބުރަކަށި މައްޗަށް ހުއި އަރުވަމުންގޮސް، އެސޮރު އަދި ކޮޅަށް ހުރީތީ ވަކި ސުމާރެއް ނުބަލައި ހުއި އަރުވައިފާނެއެވެ. އެންމެ ފަހުން ކުޑަ މުއްވަރެއްގެ ހުއި އަރުވާއިރަށް އެސޮރަށް ކެތް ނުވެގެން ބަނޑު ޖަހައިފި ނަމަ، އަޅުގަނޑުމެން ބުނާނީ އެ ޖަމަލު އެ ބަނޑު ޖެހީ މުއްވަރެއްގެ ހުޔިގެ ބަރުދަނަށް ކެތްނުވެގެންނޭ ބާއެވެ؟ އެމެރިކާގެ ތަފާސް ހިސާބުން ފެންނަ ގޮތުގައި، (ވަރަށް ގިނަ ބަޔަކު އިތުބާރު ކުރާ ވޮޝިންޓަން ޕޯސްޓުގައިވާ ލިޔުމަކުން ފެންނަގޮތުގައި) ފައިބެ އަހަރު ފުލުހުންގެ އަތުން 1004 މީހަކު މަރުވެފައިވެއެވެ. މިއީ ގާތްގަނޑަކަށް ހަފުތާއަކު ވިއްސަކަށް މީހުންނެވެ! ހަގީގަތަކީ ފުލުހުންގެ އަނިޔާވެރިކަން އެކި ސިފަސިފައިގައި ފެންނަމުން ގޮސް މީސްމީޑިޔާގެ ބާރުގަދަކަމުން މިފަހަރު އެންމެން އެކައްޗެއް ކިޔައި މަގުތަކަށް ނިކުތީއެވެ. އެމެރިކާ އެކުލެވިގެންވާ ފަންސާސް އިސްޓޭޓުގައެވެ. އަދި އޮސްޓްރޭލިޔާ އާއި ޔޫރަޕުގައިވެސް ވަރަށް ގިނަބަޔަކު ރުޅިވެރިކަން ދައްކަމުން އެބަގެންދެއެވެ.
ވިހިޑޮލަރުގެ އެހެން ވާހަކައެއް
މުޅިދުނިޔެއަށް މަޝްހޫރު އެމެރިކާ ޑޮލަރަކީ ބާރުގަދަ ނޫޓެކެވެ. ނަމަވެސް ބަލައިލަން ހުތުރު އެންމެ ކުލައެއްގެ މައްޗަށް އެކުލެވޭ ނަގުދު ފައިސާއެކެވެ. އަޅުގަނޑުމެން މިހާރު މިގެންގުޅޭ ރަންދިހަ ފަހެއްގެ ރީތި ދިވެހި ނޫޓޫތަކުގެ ކުރިމަތީގައި ނުވަތަ ޔޫރޯ، އެފްރިކާގެ ކުލަގަދަ ކަރުދާހު ފައިސާގެ ކުރިމަތީގައި، ފައިސާގެ ކުރެހުންތަކާއި ފަންނުވެރިކަމާއި ނަލަކަމަށް ބަލާއިރު އެމެރިކާ ޑޮލަރަށް ޖެހޭނީ ވަރަށް ފަހަތުގައި މަޑުކޮށްލާށެވެ. ސަލާމަތީ ކަންކަން އެންމެ މޮޅަށް ހިމެނިފައިވާ އެމެރިކާ ޑޮލަރު ނޫޓުން މުޅީންވެސް ފެންނަނީ އަބުއި ރައީސުންނާއި އެމެރިކާގެ ބާނީންގޮތުގައި ބެލެވޭ ހަރު އިސްރައްވެހި ދެބޭކަލުންނެވެ. އެއީ 10 ޑޮލަރުން ފެންނަ އެލެގްޒެންޑަރ ހެމިލްޓަން އާއި 100 ޑޮލަރުގައިވާ ބެންޖަމިން ފްރެންކްލިން އެވެ. މިއީ އެއްވެސް ދުވަސްވަރެއްގައި ވެރިކަން ކުރެއްވި ދެބޭކަލުންނެއް ނޫނެވެ. 1 ޑޮލަރުން ފެންނަނީ އެމެރިކާގެ ބާނީންގެ ތެރޭގައި ހިމެނިވަޑައިގަންނަވާ އަދި އެގައުމުގެ ފުރަތަމަ ރައީސް ޖޯޖް ވޮޝިންގްޓަން އެވެ. ވަރަށް މަދުން ފެންނަ 2 ޑޮލަރުގައިއެވާ ތޮމަސް ޖެފަރސަން އަކީވެސް އެމެރިކާގެ ބާނީންގެ ތެރޭގައި ހިމެނިވަޑައިގެންނެވި ރައީސެކެވެ. މިހައިތަނަށް ވެރިކަން ކުރެއްވި ބޭކަލުންގެ ތެރެއިން އެންމެ އިލްމުވެރި ބޭކަލަކީ މިދެންނެވި 3 ވަނަ ރައީސެވެ.
އެމެރިކާ ޑޮލަރުގެ 20 ޑޮލަރުގެ ނޫޓޫގައި މިހައިތަނަށް މިފެންނަ ރައީސް އެންޑްރޫ ޖެކްސަން އަކީ ވަރަށް ގިނަ މީހުން މިހާރު ގަބޫލުކުރާގޮތުގައި އެމެރިކާ ރަމްޒުކޮށްދޭ ފައިސާއިން ފެންނަން އެކަށީގެންވާ ބޭކަލެއް ނޫނެވެ. އޭނާގެ އަނިޔާވެރި ތާރީޚަށް ބަލާއިރު އެމެރިކާގެ އަސްލު ވަޒަންވެރިންކަމުގައިވާ 'ރެޑް އިންޑިއަންސް' ނުވަތަ މިހާރު އާންމުކޮށް ކިޔާގޮތުގައި "ނޭޓިވް އެމެރިކަންސް" އަށް އެންޑްރޫ ޖެކްސަން އަސްކަރީ އޮފިސަރެއްގެ ގޮތުގައި ހުންނެވިއިރު ދެއްކެވި އަނިޔާވެރި ގަދަބަދިވިކަމުގެ ސަބަބުންނެވެ. ހަމަ އެހެންމެ ކަޅު ނަސްލުގެ މީހުންނަށްވެސް ކަންތައް ކުރައްވާފައިވަނީ ހަމަ އެހައިމެ އަނިޔާވެރިކޮށް ކަމަށްވާތީއެވެ.
އެންމެ ފަހުން ވެރިކަމުގައި ހުންނެވި ރައީސް ބަރަކް އޮބާމާއަށް އެމެރިކާގެ ސްކޫލް ކުއްޖަކު ސިޓީއެއް ފޮނުވައި އެމެރިކާގެ ފައިސާއިން އަންހެނެއްގެ މޫނު ނުފެންނާތީ ޝަކުވާ ކުރިއެވެ. މި އަންހެން ކުއްޖާ ރައީސް އޮބާމާ އަށް ދެންނެވީ، އޭނާ ގަބޫލުކުރާގޮތުގައި އެމެރިކާގެ ކުރު ތާރީޚުގައި ވަރަށް ކުޅަދާނަ ހިތްވަރުގަދަ އަންހެނުން ވަނީ އެކި ދުވަސްވަރު އެކި ރޮނގުރޮނގުން ފެނިފައެވެ. އެމެރިކާގެ ރައީސަށް 2014 ވަނަ އަހަރު ސިޓީއެއް ފޮނުވިއިރު އެ އަންހެން ކުއްޖާގެ އުމުރުން 9 އަހަރެވެ. ނަމަވެސް އޭނާ ލިޔުނު ސިޓީގެ ޖަވާބުގައި އޮބާމާގެ މާލީ ވަޒީރު ޖޭކޮބް ލިޔު ސޯފިޔާގެ 11 ވަނަ އުފަންދުވަހު ގުޅުއްވައި އުފާވެރި ޚަބަރެއް ދެއްވިއެވެ. އެއީ ދާދި އަވަހަށް އަންހެނެއްގެ މޫނު، އެމެރިކާ ޑޮލަރުގައި ހިމެނުމުގެ މަސައްކަތް ފެށޭނެ ކަމަށް ވިދާޅުވުމެވެ. ނަމަވެސް އެއީ ވަރަށް އުނދަގޫ އަދި ވަގުތުހޭދަވާނޭ ކަމެއްކަން މި ކުޑަކުއްޖާއަށް ވިސްނަވައިދެއްވިއެވެ.
މާލީވަޒީރު އެ އިޝާރާތް ކުރެއްވި ހެރިއަޓް ޓަބްމަން އަކީ އަޅު އަންހެނަކަށް ލިބުނު އަޅު ކުއްޖެކެވެ. އުފަންވީ 1820 ގައެވެ. މިހިނގާ 2020 ގައި ހެރިއަޓް ޓަބްމަންގެ މޫނު ޖެހި 20 ޑޮލަރުގެ ނޫޓު ނެރެވޭތޯ އޮބާމާގެ ސަރުކާރުން ގަދައަޅައި މަސައްކަތް ކުރެއްވީ މި އަހަރަކީ ހެރިއަޓް ޓަބްމަން އުފަންވިތާ 200 އަހަރު ފުރޭ އަހަރު ކަމުގައިވާތީއެވެ. ނަމަވެސް މިހާރު ރައީސްކަމުގައި ހުންނެވި ޓްރަމްޕްގެ ސަރުކާރުން މިކަން ފަހިކޮށެއް ނުދޭނެއެވެ. މިހާރުގެ ސަރުކާރުން ބުނާގޮތުގައި ގިނަބަޔަކު އިންތިޒާރުކޮށް ދެކޭހިތުން ތިބި ނޫޓު ނެރޭ ދުވަސް އަންނާނީ 2028 ހިސާބުގައެވެ.
އަޅުވެތިކަމުގެ އަނދިރި، ހިތްދަތި ދުވަސްވަރުގެ ކަންކަން ހަމަޖެހިފައިވާ ގޮތުގައި އަޅަކަށް ލިބޭ ދަރިންވެސް އެ އަޅުގެ ސާހިބު މީހާ ބޭނުން ހިނދެއްގައި ވިއްކާލެވެއެވެ. ދެމަފިރިންގެ ތެރެއިން އެކަކު ވިއްކުމުގެ އިޚްތިޔާރު ވެސް ސާހިބު މީހާއަށް ލިބިގެންވެއެވެ. ހެރިއެޓް ޓަބްމަން މަޝްހޫރުވީ އޭނާގެ ހިތްވަރުގަދަކަމާއި، އެ ހިތްވަރުގެ ބޭނުން ހިފީ މުޅީންވެސް އެހެން އަޅުން މިނިވަން ކުރުމަށް ކަމުގައިވާތީއެވެ. އަޅުވެތިކޮށްގެން ކަޅުމީހުން ގިނައިން ގެންގުޅެފައިވަނީ އެމެރިކާގެ ދެކުނުގެ ދަނޑުބިންތަކުގައެވެ.
ހެރިއަޓް ޓަބްމަން ގެ ސާހިބު މީހާއަށް ފިލައިގެން އުތުރަށް ގޮސް، އަޅުން މިނިވަންކުރަން ގޮވާލައި އެކަމަށް ހިތްވަރުދޭ މީހުންގެ ހިމާޔަތުގައި ހުރެ، އޭނާ ކުރިން އަޅެއްގެ ގޮތުގައި އުޅުނު ދެކުނުގެ ސަރަހައްދު ތަކަށް ތަފާތު 19 ފަހަރު ސިއްރުން ގޮސް 300 އަށްވުރެ ގިނަ އަޅުންނަށް މިނިވަންކަން ހޯދައިދިން ކަމަށް ލިޔުންތަކުން ފެނެއެވެ! އޭނާ ދެކިލެއްވި ގޮތުގައި އިންސާނުންނަކީ އަޅުވެތިކުރެވިގެންވާނޭ ބައެއް ނޫނެވެ. އެކަކު އަނެކަކު އަޅުވެތިކޮށްގެން ގެންގުޅުމަކީ ޝައިތޯނީ ވިސްނުމެކެވެ.
އަލަށް ޗާޕުކޮށް ނެރެން ބޭނުންވާ ޑޮލަރުގައި މިފަދަ ޚިދުމަތްތެރިއެއްގެ ޒިކުރާ ދެމެހެއްޓުމުގެ ބޭނުމުގައި ކުރީގެ ރައީސް އޮބާމާ އެކަން ފާސްކުރެއްވި ނަމަވެސް މިހާރު ވެރިކަމުގައި މިހުންނެވީ މާ ހަރުކަށި އާންމު ރައްޔިތުންގެ އިޙްސާސްތަކަށް ފަރުވާލެއް ބަހައްޓަވާ ވެރިޔެއް ނޫނެވެ. ވަށައިގެން ތިއްބެވީވެސް ހުދު ނަސްލުގެ ދޮން މުއްސަނދިންނެވެ. ސަލާމަތީ ފިޔަވަޅުތައް ވަރުގަދަކުރުމުގެ ހުއްޖަތް ދައްކަމުން އެމީހުންނަށް ވީވަރަކުން، ކަޅު ނަސްލުގެ ކުރީގެ އަޅު އަންހެނެއްގެ މޫނު އެމެރިކާގައި އެންމެ މަގުބޫލު، އެންމެ ގިނައިން ހިނގާ 20 ޑޮލަރުގެ ނޫޓުން ފެންނާކަށް ބޭނުމެއް ނުވާނެއެވެ!
