
ގަދީމީ ރަށެއްގައި މާކުރީ ޒަމާނެއްގައި އުމުރުން ދޮށީ އަންހެނަކު އުޅުނެވެ. މި ވާހަކައިގެ ކަންކަން ހިނގި ދުވަސްވަރު މީނާގެ ފިރި މަރުވެ ހުވަފަތް ވިއިރު ދުނިޔޭގައި ހުރީ އެންމެ ދަރިއެކެވެ. ޒުވާން އުމުރުގެ ފިރިހެން ކުއްޖެކެވެ. އިހުގެ ރަށްރަށުގެ ރަށްފުށު ހިސާބު ހިސަބުގައި، އާދައިގެ މީހުންނަށް ކުރެވެން އޮންނަނީ އެއް އަތުގެ އިނގިލިތަކުން ގުނައިލެވޭހައި މަދު ބާވަތުގެ މަސައްކަތެވެ. ކައިރީގައި ކަނޑެއް ނުވަތަ ކޯރެއް އޮތްނަމަ މަސްވެރިކަން ކުރެވެން އޮވެއެވެ. އެންމެ އާންމު އެއް މަސައްކަތަކީ ދަނޑުވެރިކަން ކުރުމުވެ. ފުފޭ، ބަނޑިޔާ، ފެންފިނިކުރާ ދޯރު، ޖާޑި އާއި މަރުތަބާން ފަދަ ކަންވާރު ކޯރުމަށިން ތައްޔާރުކޮށް އުޅެނީ އެފަދަ ހުނަރު އާއިލީ މަސައްކަތެއްގެ ގޮތުގައި ވާރުތަވެ ދަސްވި މަދު އާއިލާތަކެއްގެ މެދުގައެވެ.
އަދާ ކުރާނެ ވަޒީފާއެއް، ކުރާނެ މަސައްކަތެއް ނެތުމުން މި ހުވަފަތް އަންހެނާގެ ފިރިހެން ދަރި ކޮންމެވެސް މަސައްކަތެއް ހޯދަން ބަނދަރުމަތީ ސަހަރަކަށް ހިނގައްޖެއެވެ. މި ދަރި ގެއިން ނިކުމެ އުފަންވި ގެއާއި ރަށް ދޫކޮށް ދިޔުމުން އެކުއްޖާގެ މަންމަގެ އެކަނިވެރިކަން ފިލުވުމުގެ ގޮތުން ކޮންމެ ދުވަހަކު ކޮންމެވެސް ހެޔޮކަމެއް ކުރަން ނިންމައިފިއެވެ. މިރޮނގުން ވިސްނައި މީނާގެ ނިންމުމަކީ ކޮންމެ ދުވަހަކުވެސް މީނާއަށް ބޭނުންވާ ވަރަށްވުރެ އިތުރަށް ދެތިން ރޮށިފިހެ ނިކަމެއްޗަކަށް ކާންދިނުމެވެ.
މިގޮތަށް ނިންމައި ކޮންމެ ދުވަހަކުވެސް ނާސްތާރޮށީގެ ދެރޮށި ފިހެ މީނާގެ ގޭ ކައިރިން ދާ މީހުންނަށް ފެންނަ ގޮތަށް ބާއްވަން ފަށައިފިއެވެ. ހަމަ ކޮންމެ ދުވަހަކުމެ އެ ދެރޮށި ބާއްވަނީ މީނާގެ ދަރިޔަށް ހެޔޮ ދުޢާ ކުރަމުންނެވެ. އެ ދަރީގެ ސަލާމަތާއި ރައްކާތެރި ކަމަށެވެ. އެނާ ބަލިވެއްޖެ ހިންދެއްގައި އޭނާއާ އަޅައިލާނެ ހެޔޮ ލަފާ އެކުވެރިން މިންވަރު ކުރެއްވުން އެދެމުންނެވެ.
ބޭނުން ޖެހިފައިވާ މީހަކު ގެންދާ ގޮތަށް ތާޒާ ދެރޮށި ބާއްވަން މީނާ އާދަކޮށްފިއެވެ. މިހެން ރޮށި ބާއްވާފައި މީނާވެސް ނާސްތާ ކުރަން އިންނަން ފަށައިފިއެވެ. މިހެން އިންދައި އޭނާ ފިހުނު ރޮށި ގެންދަމުން މީހަކު ބުނާ އަޑު އިވުނެވެ. " ކަލޭ ކުރާ ފާފަވެރި ކަންކައް ކަލޭގެ ކިބައިގައި ހަރުލާނެ! ކަލޭ ކުރާ ހެޔޮ ކަންކަމުގެ ނަތީޖާ އެނބުރި އަންނާނެ!" މިނޫން އިތުރު ލަފުޒެއް ނުބުނެއެވެ. ރޮށި ބޭއްވުން އާދަޔަކަށް ވީ ފަދައިން އެއްކަލަ މީހާގެ ގޮވެލިވެސް އެއީ ހެނދުނުގެ ބައެއްގެ ގޮތުގައި ހިމެނިއްޖެއެވެ!
ނުވިސްނަން އުޅުނުވަރަކުން މި އަންހެނާގެ ހިތަށް އިރުއިރުކޮޅާ އަރަނީ ކޮންމެ ދުވަހަކު އެ އިވޭ އެއްޗެއްގެ މާނައަކީ އަޅެ ކޮބައިބާއެވެ. މިހެން ވިސްނުމުގެތެރޭގައި ހިތަށް އެރީ އެ ރޮށިގެންދާ މީހަކީ ކާކުތޯ ނުވަތަ ކޮން ހިސާބެއްގެ މީހެއްތޯ ބަލައިލުމެވެ. ޖެހިގެން އައި ދުވަހު އާދައިގެ މަތިން ދެ ރޮށި ބާއްވާފައި އެ ގެންދާ މީހަކު ފެންނާނެހެން ހުއްޓައި އައީ ވަރަށް ނިކަމެތި، ސިފަހުތުރު މީހެކެވެ. މިހެން ހުއްޓައި ރޮށި ގެންދަމުން އޭނާގެ ގޮވެލި ގޮވައިލަމުން ހިނގައި ގެންފިއެވެ. މީނާ ހިތަށް އެރިއެވެ. ދެމަހެއްހައި ދުވަހު ހިލޭ ނާސްތާ ގެންދާއިރު އަދި މީނާގެ ކިބައިން ޝުކުރުގެ ބަހެއް ނީވެއެވެ. ހެޔޮ ދުޢާ އެއް ނުކުރެއެވެ. ބޯ ދިއްކޮށްލައި ހިނިތުންވެނުލައެވެ.
މިހެން އުޅެނިކޮށް މީނާގެ ނަފްސު މީނާއަށް ވަސްވާސް ލާންފަށައިފިއެވެ. މީނާގެ ހިތައް އެރީ، އެ ރޮށިގެންދާ މީހާގެ ފަރާތުން ރީތިކަމެއް ނުފެންނާތީ އޭނާއަށް ކެއްސެއް ދިނުމަކީ ހަމަ އެންމެ ރަނގަޅު ކަމެކެވެ. މި ވިޔާނުދާ ވިސްނުމުގެ ދަށުން، ޖެހިގެން އައި ދުވަހު ކަންތައް ކުރި ގޮތަކީ، ކޮންމެ ދުވަހަކު އޭނާ މޮޑޭ ފުއްގަނޑު ދެބައިކޮށް އެތަނުން އެއްބަޔަށް ވަރުގަދަ ވިހައެއްލައި ރޮށި ފިހެ ބޭރުގައި ބާއްވަން ތައްޔާރުވުމެވެ. ތައްޓަކަށް ދެ ރޮށިލައި ބޭރުގައި ބަހައްޓައި އޭނާގެ ދަރިފުޅަށް ދުޢާކުރަން އުޅުމުގެ ތެރޭގައި މީނާއަށް ހެޔޮ ވިސްނުން ލިބިއްޖެއެވެ. އަވަސް އަވަހަށް އެއްކަލަ ޒަހަރުލީ ދެ ރޮށި އުނދުނުގެ އަލިފާންގަނޑު ތެރެއަށް އެއްލާލައިފިއެވެ. އެއްކަލަ ތަށިވެސް ރަނގަޅަށް ދޮވެ ހިއްކައި، އަލުން ދެރޮށި ފިހެ ކުރިޔެކޭ އެއްގޮތަށް ކަންތައް ކޮށްފިއެވެ. އަދި ކުރަން އުޅެވުނު ކަންތަކާމެދު ހިތުގައި ޖެހި ދުވަހަކުވެސް އެކަހަލަ ކަމެއް ނުކުރާން އަމިއްލައަށް ވައުދުވެއްޖެއެވެ.
ޖެހިގެން އައި ދުވަހު ހެނދުނު މީނާގެ އާދައިގެ މަތިން ދެ ރޮށި ބާއްވައި ނާސްތާ ކުރަން އިށީނުމުގެ ކުރިން ދޮރުގައި މީހަކު ޓަކިޖަހާލައި އެއްޗެއް ބުނިހެން ހީވެގެން ދޮރު ހުޅުވައިލިއިރު ކުރިމަތީގައި ހުރީ އޭނާގެ ދަރިފުޅެވެ. މަސައްކަތެއް ހޯދަން ދެތިން މަސް ކުރިން މަންމައަށް ގޮވާން ރައްކާ ކޮށްދީފައި ކުރާނެ ހަލާލު މަސައްކަތެއް ހޯދިން ދިޔަ ފިރިހެން ދަރިފުޅެވެ! ހުރީ ވަރަށް އުފަލުންނެވެ. އާންމުންނަށް ރޭކާނުލާ ކިތަންމެ ކަމެއް މަންމައިންގެ ލޮލަށް ޔަގީންކަމާއެކު ފެންނާނެއެވެ. ދަރިފުޅަށް އެއްވެސް ދެރަކަމެއްވިތޯ ވަރަށް ސުވާލުކޮށް ގެއަށް ވައްދައިފިއެވެ. އަވަހަށް ސަލާންގަލާން ކޮށް މަންމައަށް ކުރަންވާ އިހްތިރާމް އަދާކޮށްފައި ގޮނޑިއެއްގައި އިށީނދެ މީނާގެ ހާލު މަންމައަށް ކިޔައިދޭން ފަށއިފިއެވެ.
މީނާ ކިޔައިދިން ގޮތުގައި ދެމަހާއި ދުވަސްކޮޅަކު ކުރި މަސައްކަތުން ރައްކާކުރެވުނު ފައިސަ ހިފައިގެން މަންމަ ދެކިލާން ރަށަށް އައީ ކުޑަ ދުވަސްކޮޅެއް ކުރިންނެވެ. ނަމަވެސް ވަކި ހިސާބަކުން ފޭރޭ ބަޔަކު މީނާގެ މަގުބައްދައި ގޯނާ ކުރުމުގެ ތެރޭގައި މީނާއަށް އެހީވެދީ ސަލާމަތް ކުރުމުގެ ގޮތުން މި ޒުވާނާގެ އަތަށް ދަނޑިބުރިޔެއްދީ އެމީހުން ފައްސައިލާން އެހީވީ އުމުރުން ދޮށީ ނިކަމެތި މީހެއް ކަމުގައި ކިޔައިދިނެވެ. ބުރަ މަސައްކަތުން ހޯދި ފައިސާކޮޅު ސަލާމަތްވީ އެމީހާ އެހީވި ކަމުން ކަމުގައި ކިޔައިދިނެވެ. އަދި ވެފައިހުރި އަނީޔާގެ ސަބަބުން ގައިގައި ވަރުޖެހިލަންދެން އޭނާގެ ޖިފުޓީގައި މަޑުކޮށްލަން ކީވަރުން މަޑުކޮށްލީ ކަމުގައެވެ. އޭނާ ކޮންމެ ދުވަހަކު ހެނދުނު ގެއިން ނިކުމެ އެނބުރި އަންނަނީ ދެ ރޮށި ހިފައިގެން ކަމާއި، އެތަނުން އެއް ރޮށި މީނާއަށް ދީ އޭނާ ކަނީ އެއްރޮށި ދެބައި ކޮށްލައިގެން ހެނދުނު އެއްބައި ރޭގަނޑު އެއްބައި ކަމުގައެވެ. ކުރީގައި އޭނާ ކައި އުޅެނީ ދުވާލު އެއްރޮށްޓާއި ރޭގަނެ އަނެއް ރޮއްޓެވެ. އެއީ މިހސާބުގެ ކޮންމެވެސް މީހަކު އޭނާއަށް ފިހެދޭ ދެ ރޮށިކަމުގައިވެސް ކިޔައިދިން ކަމުގައި ބުންޏެވެ!
މި އަންހެން މީހާ ހަމަ ހައިރާންވެ، ބުނެވުނީ ހަމަ އެކަނި سبحان الله އެވެ! ކުއްލިއަކަށް ހަނދާންވީ އެއްކަލަ މީހާގެ ގޮވެއްޔެވެ.
" ކަލޭ ކުރާ ފާފަވެރި ކަންކައް ކަލޭގެ ކިބައިގައި ހަރުލާނެ! ކަލޭ ކުރާ ހެޔޮ ކަންކަމުގެ ނަތީޖާ އެނބުރި އަންނާނެ!"
ނިމުނީ
ވަރަށް ރަނގަޅު ލިޔުމެއް
varah ibraiytheri ehaame nala vaahaka eh