އަހަރެންގެ ބައްޕަ އެންމެ ކުރާހިތްވާ އެއްކަމަކީ ހަމަ ޔަގީނުންވެސް އަހަރެންގެ ކުށް ދެއްކުމެވެ! ހަނދާން ނެތިގެން ނަމަވެސް އަހަންނަށް ނުކުރެވި ހުރި ކަންކަން، ފަހަތުން ހިންގަވަމުން ދައްކަވަމުން، ފަހަތުން ނުނެއްޓި އުޅުއްވުމެވެ! ބޮތްކާއި ފަންކާ ނުނިއްވާ އަހަރެން ކޮޓަރިން ބޭރުގައި އުޅޭވާހަކައެވެ. ކައިގެން އަތްދޮވެފައި އަހަންނަށް އިސްކުރު ބާރު ނުކުރެވި ހުރި ވާހަކައެވެ. ބައްޕައަށްވެސް އެ ފަންކާ ނިއްވައިލެވޭނެ ނޫންހެއްޔެވެ؟ އެ ބޮކި ނިއްވާ ސުވިޗަށް ބައްޕަ އަތް ނުފޯރަނީހެއްޔެވެ؟ އަހަރެން ހުޅުވި އިސްކުރު ބަންދު ކުރަން ޖެހެނީ ވަކި ތަފާތު ގޮތަކަށް ހެއްޔެވެ؟ އެވަރު ކަމެއް ކުރުމުގެ ބަދަލުގައި އަހަރެން ލައްވައި އެކަންކަން ކުރަން ހަނދާން ކޮށްދޭވަރުން ޅައުމުރުގައި އަހަރެން އެންމެ ފޫހިވާ މީހަކީ އަމިއްލަ ބައްޕަ ކަމުގައިވެސް ވިއެވެ. އައި ރުޅިން އެކަންކަމަށް އިޝާރާތް ކުރާނެ ފުރުސަތެއް ބައްޕައަށް ނުލިބޭވަރަށް، ފެންއިސްކުރު ބާރުކުރުމާއި، ބޮތްކާއި ފަންކާ ނިއްވާފައި ނޫނީ ކޮޓަރިން ނުނިކުންނަން އާދަ ކުރީމެވެ.
ބޮޑުވާ ވަރަކުން ބައްޕަގެ އެ 'އުނދަގޫ' ކުޑަވަމުން އައިކަންވެސް އެނގެއެވެ. ނަމަވެސް، ދެން ބައްޕަ ކިޔުއްވަން ފެއްޓެވީ އެހެން ލަވައެކެވެ! އަހަރެންގެ އުމުރުން ފަނަރަ ސޯޅަ ވީންސުރެ ދައްކަވާ ވާހަކައަކީ، ސިނގިރޭޓާއި މިހާރަކަށް އައިސް ޝީޝާ އެވެ މިކިޔާ ގުޑުގުޑާގެ ދުންބުއިމުގެ ހުތުރު އާދައާއި ދުންފަތުގެ ނުރައްކަލުގެ ވާހަކައެވެ. އަހަރުމެންގެ ފިލާވަޅުތަކުގައި އެކަންކަން ހިމެނިފައިވާކަން ބައްޕައަށް އެނގި ނުލައްވަނީތާއެވެ.
ޔުނިވާރސިޓީ ނިމެންވީއިރު ބައްޕަވެސް ހުންނެވީ އުމުރުން ދުވަސްވެ ގައިބާރު ދެރަވެފައެވެ. ޕެންޝަން ލިބިލެއްވި ފަހުން ބޭރަކަށްވެސް ނުދުރުވެއެވެ. ދެން ފެއްޓެވި ކަމަކީ އަހަރެން ބޭރުން އަންނަންދެއް ނިދިނުކުރައްވައި އަހަރެން ބޭރުން އަންނަންދެން ސޯފާގައި ހޭލާ އިންނެވުމެވެ. މިހެންވެ ރައްޓިހިންނާ އެކީގައި މަޖާކޮށްލަން ބޭރުގައިވެސް ގިނައިރު އުޅެވޭކަށް ނޯވެއެވެ. އަހަރެންގެ ރައްޓެހިންގެ ނަސީބު ރަނގަޅުކަން ހިތަށް އަރާ ކޮންމެ ފަހަރަކު ދެން ހިތަށް އަރަނީ ކިޔަވައި ނިމި ދަސްވެނިވާދުވަހުން ފެށިގެން ދެން އުޅޭނީ ވަޒީފާއެއް ހޯދައިގެން ގެއިން ނިކުމެ، ބައްޕަގެ 'އުނދަގުލުން' ސަލާމަތް ވެވޭތޯއެވެ.
ވަޒީފާއަކަށް އެދި ސިޓީ ލިޔުނު ކުންފުނިތަކުގެ ތެރެއިން އެއްތަނުން، ގުޅައި އެމީހުން އެބުނި ދުވަހު ގެއިން ނިކުންނަން އުޅުނީ ބައްޕަ އަށް ނޭނގި ސިއްރުންނެވެ. އެހެންނަމަވެސް، ހަމަ ނިކުމެ ނިކުމެ ހުއްޓައި އަހަރެންގެ ކޮނޑުގައި ފިރުމައިލީމައި ބަލައިލިއިރު އެހުންނެވީ ބައްޕައެވެ. ނާސްތާ ނުކޮށް ނިކުންނާތީ އަހަރެންގެ ޖީބަށް ފައިސާކޮޅެއް ލެއްވިކަން އެނގުނެވެ. ދެން އެ ފެއްޓެވީ ނަސޭހަތް ދެއްވާށެވެ. ގެއިން ނިކުންނަނީ ވުޟޫ ކޮށްގެންތޯ އެއްސެވިއެވެ. އިންޓަވިއު ކުރާ މީހުންގެ ކުރިމަތީގައި އިށީންނާނެ ގޮތާއި ބަލަންޖެހޭ ގޮތާއި އަދަބުވެރިކޮށް ވާހަކަ ދައްކަން ހަނދާން ކޮށްދިނުމާއި، ދުވަހަކު ނުނިމޭ، އަބަދު ތަކުރާރު ކުރައްވާ ގޮވެލިފައްޗެވެ. އެންމެ ފަހުން ސިޑިން ފައިބައިގެން ދަމުން ހިތަށް އެރީ، މިއަދު ވަޒީފާ ލިބުނު ނަމަ، މާދަމާވެސް ގެއިން ނިކުންނާނަމެވެ!
ބައްޕަގެ ސަބަބުން ގެއްލުނު ވަގުތު ފޫބައްދަން ކުލީ ކާރެއްގައި ގޮސް އެމީހުން ދިން އެޑްރެހަށް ފައިބައި އެ ކުންފުނީގެ ދޮރުމަތި ބަލައިލިއިރު ދޮރުކައިރީގައި ދޮރުފާރަވެރިޔަކުވެސް ނެތެވެ. ނަމަވެސް ވަޒީފާގެ އިންޓަވިޔުއަށް އަންނަ މީހުން މަގުހިނގާނެ ގޮތް ދައްކައިދޭ ތީރު އެކި ހިސާބުގައި ހުއްޓެވެ. އަހަރެން ވަންނަންޖެހޭ ގޭޓުދޮރު ހުރީ ހުޅުވި ވަޔާ ތެޅިތެޅިއެވެ. ގަޑި ބަލައިލި އިރު އަދި ދިހަވަރަކަށް މިނެޓް އެބައޮތެވެ. މިހެންވެ އެއްކަލަ ގޭޓު ދޮރު ކައިރިކޮށްލައި ބަލައިލިއިރު ނުލެއްޕެނީ ވަޔާ އައި ކުނިކޮޅެއް އެ ގޭޓުގެ ހުޅުތެރެޔަށް ވަދެ ތާށިވެފައިވާތީއެވެ. މިހެންވެ އެ ކުނިކޮޅު ނަގައި ދޮރު ރީތިކޮށް ލައްޕާލައިފީމެވެ. މިހެން ދިޔަ މަގުމަތީގައި އަހަންނަށް ފާހަގަވީ، އިމާރާތަށް ވަންނަން ހުރި ހާމަ، ތަނަވަސް ސަރައްކާލީގައި ދިއްލާފައި ހުރި ބޮކިތަކެވެ. ތަން ފަރުމާކޮށްފައި ހުރިގޮތުން ހެނދުނުގެ ރީތި އަލިން މުޅިތަން ވަނީ ލޯ ތަރަތަރަ ޖަހާވަރަށް އަލިކޮށްދީފައެވެ. އަހަރެން ހިތަށްއެރިއެވެ. ދޮރުފާރަވެރިޔާ މިއަދު ފެންނަން ނެތުމުން އޭނާއަށް އަދި އެ ބޮކިތައް ނިއްވާނެ ވަގުތު ނުވަނީއެވެ. މިހެންވެ، މިހާރު ދިއްލާފައި ބެހެއްޓުމުގެ ބޭނުމެއްނެތް ބޮކިތައް މާ ބޮޑު ފިކުރެއް ނެތި ނިއްވާލައިފީމެވެ.
ތީރުތައް ބަލަމުން އަހަރެން ކުރިޔަށް ދިޔައިމެވެ. ވަޒީފާ ހޯދަން އައިސް އުޅޭ އިތުރު މީހަކު އަދި ނުފެނެއެވެ. މިހެން ދިޔަ މަގުމަތީގައި، އެއްކަލަ ހަނދާންބަލި ދޮރުފާރަވެރިޔާ، ބޮޑު ޓައްޕަކަށް ފެންހޮޅިއެއްލައި ފެން އިސްކުރު ދޫކޮށްފައި ހުއްޓައި ފެނިއްޖެއެވެ. އެ ޓައްޕު ފުރިގެން ވަށައިގެން ބޭރަށް ފެން އޮހެއެވެ. އަދިވެސް އޭނާ ފެންނާކަށް ނެތެވެ. އަހަރެން ހިތަށް އެރިއެވެ. މި ކަންނެތް ދޮރުވާނުގެ މުސާރައިން ބައިދުވަހުގެ މުސާރަ މިހާރު ހައްގުވާނީ އަހަންނަށެވެ. މި ކުންފުނީގެ ވެރިން ވާ ރަނގަޅެވެ. އެކަހަލަ ހަނދާން ބަލި މީހަކު ކަނޑާނުލައި ގެންގުޅޭކަންވެސް ރަނގަޅުތާއެވެ!
އެންމެ ފަހުން ގޮސް ވަދެވުނު ކުޑަ މާލަމެއްގައި އިށީނދެ ތިބި އަހަންނާ އެއްފުރާގެ ޒުވާނުން ފެނިފައި އަހަރެން ހިތަށް އެރިއެވެ. އެތިބަ ތަނަވަސް ކުދިންގެ ކުރިމަތީގައި މަށަށް ވަޒީފާ ލިބުމުގެ ކުޑަވެސް ފުރުސަތެއް ނޯންނާނެއެވެ. ނަމަވެސް، އިށީންނަމުން ކައިރީގައި ތިބި ކުދިންނާ ސަލާންކޮށްލައި ދުރުގައި ތިބި ޒުވާނުންނަށް އިވޭވަރަށް ސަލާން ގޮވާލައި އިށީނދެފީމެވެ. އިރުކޮޅަކުން އެނގުނީ ބައެއްކުދިންނަކީ މިރަށުގެ އެމެރިކަން ޔުނިވަރސިޓީން ކިޔަވާފައި ތިބި ކުދިން ކަމުގައެވެ. ބޭރުގެ މަޝްހޫރު ޔުނިވަރސިޓީތަކުގެ ނަންތައްވެސް އިރުއިރުކޮޅާ އިވެއެވެ. އިންޓަވިޔު ކުރާ ކޮޓަރިޔަށް ވަންނަ މީހަކު އެތެރެއަށް ވަނުމަށްފަހު ހަތަރުފަސް މިނެޓު ވާހެން ވެސް ހިއެއްނުވެއެވެ. ވަންނަވަރަށްވުރެ ނިކުންނަލެއް އަވަސްހެންވެސް ހީވެއެވެ. މިހާރު އަހަރެންގެ ހިތަށް އަރަންފެށީ، އަހަރެން ކަހަލަ އާދައިގެ މީހެއްގެ އާދައިގެ ދަރިޔަކަށް، މި މުއްސަނދިންގެ ތެރޭގައި އޮންނާނީ ކޮން ފުރުސަތެއް ހެއްޔެވެ. މިތަނުގައި ދެން އިތުރަށް ބޭޒާރުވާން އިނުމުގެ ބޭނުމެއް ނެތެވެ. އެކަކުންޏެއް އެކަކުންޏެއްގެ ވަރުން ހަރުކޮނުނިއްޔާ މާ ރަނގަޅުވާނެއެވެ. މިކަހަލ ކުންފުނިން ވަޒީފާގެ ފުރުސަތެއް އޮތްކަމަށް އިއުލާނު ނެރެނީވެސް ކޮންމެވެސް 'މަތީ މީހެއްގެ' ދަރިޔަކަށް ވަޒީފާ ދީފައި، އާންމުގެ ލޮލުގައި އަނދުން އަޅުވާށެވެ. މިހެން ހިތަށް އަރައި ނިކުންނަން ހަމަ ތެދުވެ ހިންދަމައިލެވުނު ވަގުތު އަހަރެންގެ ނަން ގޮވައި އެތެރެއަށް ވަނުމަށް އިޝާރާތެއް ލިބިއްޖެއެވެ!
އަހަރެން ހިތަށް އެރިއެވެ. ބައްޕަ އާދަ ކޮށްދެއްވި ގޮތުގެ މަތިން މިހާރުވެސް މިހުރީ ވުޟޫމަތީގައެވެ. މަތްކަލާނގެއާ ވަކީލެވެ. ވަޒީފާ ލިބިއްޖެއްޔާ ރަނގަޅެވެ. އެމީހުން ބޭނުން މީހަކު މިހާރުވެސް ހޮވައިފައިވާ ނަމަ، އައި ދޮރުން ނިކުމެގެން ގެއަށް ދާނީއެވެ. މާދަމާއަކީ މުޅިން އާ ދުވަހެކެވެ. މިހެން އަމިއްލަޔަށް ހިތްވަރު ހޯދަމުން ގޮސް ދޮރު ހުޅުވާފައި އެތެރެއަށް ވަންއިރު، ކަންތައް ހުރީ ހީކުރި ގޮތާ މުޅިން ތަފާތު ގޮތަކަށެވެ! މޭޒުގެ އަނެއް ފަރާތުގައި ތިބީ ހިތްހެޔޮ ބައެކެވެ. އިންޓަވިޔު ކުރަން ތިބި ހަތަރުމީހުންވެސް ތިބީ ހިނިތުންވެފައެވެ! އެމީހުންނަށް އަހަރެން ކުރިން ފެނި ދެކެ ފަރިތަވެފައި ތިބި ކަހަލައެވެ. ފުރަތަމަ ސުވާލަކީ ވެސް ހައިރާކުރުވަނިވި ސުވާލެކެވެ. " ކޮބާ! ވަޒީފާ އަށް ނިކުންނަން ތައްޔާރު ހެއްޔެވެ!" އަހަރެން ހީކުރީ އެމީހުން ސަމާސާ ކުރަނީ ކަމުގައެވެ. ކުއްލިއަކަށް ހަނދާންވީ ބައްޕަގެ ނަސޭހަތެވެ. ކިތަންމެ އާދައިގެ ސުވާލަކަށްވެސް ވިސްނާލައިފައި އަމިއްލަ ނަފްސަށް އިތުބާރު ހުރިކަން ދައްކައިދޭ ޖަވާބެއް ދިނުމުގެ މުހިންމު ކަމެވެ. އަހަރެން ބުނީމެވެ. " ތިޔަ ބޭކަލުންގެ ސުވާލުތަކަށް އަޅުގަނޑު ދޭ ޖަވާބުތައް ކަމުދާނަމަ، އަޅުގަނޑު މިހުރީ ވަޒީފާ ފަށަން ތައްޔާރަށެވެ!" އެމީހުން ބުންޏެވެ. ކަލޭ ކުރިން ފޮނުވި ވަނަވަރު އަހަރުމެން ބަލައިފީމެވެ. ހުރިހައި ޝަރުތެއް ހަމަވެއެވެ. މިހާރު ގެނެސް ތިބި އެ ޒުވާނުން ކަލެއަށްވުރެ ވަކި މާ މޮޅެއް ނޫނެވެ. އަހަރުމެނަށް ސަނަދު ތަކުން ދޭހަވަނީ ކިޔެވުމަށް މޮޅުކަމެވެ. ނަމަވެސް މީހުންގެ ތެރޭގައި އުޅޭއިރު ކަންކަމަށް ފަރުވާތެރި މީހެއްތޯ، ކުންފުނީގެ މުދަލަށް ކުލުނެއް ހުންނަ ކަހަލަ މީހެއްތޯ އަހަރުމެން ބަލަން ޖެހެއެވެ. ކަލޭ، މި ކުންފުނީގެ ގޭޓު ކުރިމައްޗަށް އާދައިގެ ކުލީކާރެއްގައި ފޭބީންސުރެ އަހަރުމެން މިތިބެނީ ބަލާށެވެ. އެ ދޮރުގެ ހުޅު ތާށި ވެފައި އެހުރީ ވަޔާ އައި ފަތްކޮޅަކުން ނޫނެވެ. ދޮރު ފާރަވެރިޔާ އޭނާގެ އާދައިގެ މަތިން ދުވާލުގެ އަލިކަން ލިބުމުން ހުރިހައި ބޮކިތައް، ނިއްވިއެވެ. ކަލޭ އިށީނުމުގެ ކުރިން ވަށައިގެން ތިބި ކުދިންނާ ސަލާންކޮށްލުމުން، މީހުންގެ ތެރޭގައި އުޅުމުގެ ހުނަރުވެރިކަން ވެސް ކަލޭގެ ކިބައިން ފެނިއްޖެއެވެ!
ކަލޭމެން ޒުވާނުން އައުމުގެ ދިހަވަރަކަށް މިނެޓުގެ ކުރިން އެ ބޮކިތައް ދިއްލައި، އިސްކުރުން ފެން ދޫކޮށް ހެދީ ކަލޭމެންގެ ތެރެއިން އެކަންކަން ފާހަގަވަނީ، އަދި އިސްވެ އަމަލީ ފިޔަވަޅެއް އަޅަނީ ކިތައް މީހުންތޯ ބަލާށެވެ. މިހެން ކިޔައި ފާރުގައި ހުރި ބޮޑު ޓީވީ އިސްކިރީނެއް ދައްކައިލިއެވެ. ވާނުވާ ހުރިހާ ކަމެއް މިމީހުން މިތިބީ ބަލާށެވެ. މިހިސާބުން ދެންވީ ގޮތެއް ޚުދު އަހަންނަކަށްވެސް ނުވިސްނުނެވެ. ހިތަށް އެރި ޚިޔާލުތަކަށް ކެތްނުވެގެން ރޮވެން ފަށައިފިއެވެ. ރުއިން ވީ ހައްތާ ބާރެވެ. ކުންފުނީގެ ވެރިން ހައިރާންވެގެން ތެދުވެ އަހަންނަށް ހިތްވަރުދީ، ވެގެން އުޅޭގޮތެއް އަހައި ސުވާލު ކުރަން ފަށައިފިއެވެ. އެތައް އިރަކުން އަހަންނަށް ބުނެވުނީ އަހަރެންގެ ބައްޕަގެ މަތިން ހަނދާވީއެވެ. "ތިޔަ ކުރެއްވި ހުރިހައި ޓެސްޓަކުން އަޅުގަނޑު މިއަދު މި ފާސްވީ ބައްޕަގެ މިންނަތް ތަރުބިއްޔަތުންނެވެ. "
އެމީހުންގެ ތެރޭގައި އަހަރެން ކުޑައިރުކޮޅަކު ބައިންދައި، ވަޒީފާ ލިބުނު ކަމާއި، އަންނަންވާ ދުވަހާއި، ފެށޭ މުސާރަޔާ މިކަހަލަ ވާހަކަ ދައްކައި އަހަރެން ހިތްމަޖައްސައިދީ، އެހެން ދޮރަކުން އަހަރެން ބޭރަށް ނެރެދީފިއެވެ! އަހަންނަކީ ކުޑައިރުންސުރެ، ފިކުރު ބޮޑުވާހިނދު ހިނގަން އާދަވެފައިހުރި މީހަކީމެވެ. ވިސްނަން ފަސޭހައީ އެކަނި ހިނގުމުގެ ތެރޭގައެވެ. ބޮޑު ބަހެއްގައި އެންމެންގެ ތެރޭގައި ވިސްނުމަކީ ކުރެވޭވަރުގެ ކަމެއްނޫނެވެ. އެހެންވެ އެދުވަހު ގެއަށް ދާން ގަސްތުކުރީ ހިނގައިފައެވެ. ބައްޕަގެ ހިތްހެޔޮކަމާއި ކުޅަދާނަކަން ނޫން ކަމެއް ހިތަކަށް ނާރައެވެ. އަހަރެން އެންމެ ކުޑައިރު ދޫނިހިފަން ދަސްކޮށްދެއްވައި، ދޫނިކޮށި ހަދަން ދަސްކޮށްދެއްވިއެވެ. ގުޑިއަރުވާ މޫސުމުގައި އެންމެ ރީތި ގުޑި އަރުވާނީ އަހަރުމެންގެ ގެއިންނެވެ. އަހަންނަށް ލިބޭ ކޮންމެ އުފަލެއްގައި ބައްޕަ ބައިވެރިވާކަން އަހަރެން ހަނދާނެތުނީ ބައްޕަ ހަނދާން އެ ކޮށްދެއްވި ދެތިން ކަމަކާ ހެދީ ހެއްޔެވެ. އަހަރެންގެ ފަހަތުން ދެތިން ދުވަހަކު ދުރުވެ ބޮކި ނިއްވަން ބުނުއްވީތީ ބައްޕަގެ ރީތި ހުރިހައި ސިފަތައް އަހަރެން ހަނދާންނެތުނީތީ ލަދުން ހަލާކުވެއްޖެއެވެ. ގޭގައި ގިނަވާނީ ބައްޕަ އަމިއްލަޔަށް ކުރެއްވި ކަންކަމެވެ. މަންމަ ފައިފުއްސެއް ބޭނުންވެއްޖެ ކަމަށް ނަންގެންފިއްޔާ ދެތިން ދުވަހުގެ ތެރޭގައި މަންމަ އުކައިލަން ހުރި ފޮތިކޮޅުކޮޅުން ފައިފުއްސެއް އެކުލަވައިލައްވާނެއެވެ. ރައްޓެހިންގެ ދަރިންނަށް މުޅީންވެސް ދެއްވާނީ އަމިއްލަޔަށް ހައްދަވައިފައިވާ ހަދިޔާއެވެ!
މިހެން މިކަހަލަ ޚިޔާލުތަކެއް ހިތަށް އަރައި ފައިބަމުންދެއެވެ. އާދައިގެ ހިނގުމެއްގައި ހިނގަމުން ގޭދޮށަށް ފޯރި އިރު ބައްޕަ ހުންނެވީ ދޮރާށި ކައިރީގައެވެ. އަހަރެންގެ އިންތިޒާރުގައެވެ! ބައަޕަ ހުންނެވި ހިސާބަށް ދެވުމުން ބައްޕަގައިގައި ބައްދައިގަނެވުނީ އެތައް އަހަރެއް ކޮށްފައި އަލަށް ބައްޕަ ފެނިގެން ބައްދައިލެވުނު ހެންނެވެ! ބައްޕަގެ ތޫނު ވިސްނުމުން އަހަންނަށް ދިމާވި ހުރިހައި ކަމެއް، ހިތަށް އަރައި ފޭބި ހުރިހައި ޖަޒުބާތެއް ބައްޕަޔަށް ހަމަ ރަނގަޅަށް އެނގި ޔަގީންވާ ކަހަލައެވެ. އަހަރެން އިތުރަށް ދެރަވެ ލަދުގަންނާނެ އެއްވެސް އެއްޗެއް ނުބުނުއްވައެވެ.
ބައްޕަގެ ހިތްހެޔޮ ހިނިތުންވުމުން ބައްޕަގެ ހިތުގެ ސާފުކަން އަހަންނަށް އެއްވެސް ޝައްކަކައި ނުލައި ހާމަވެ ޔަގީން ވެއްޖެއެވެ! " ދަރިފުޅު މިއަދު އަންނާނީ ހިނގާފައޭ ބައްޕަ ހަމަ ހިތަށް އެރީ " ކަމުގައި ބުނުއްވިއެވެ. އަދި ބުނުއްވިއެވެ. " ސްކޫލުގައި އުޅުނުއިރުވެސް، ބޮޑު ކަމެއް ދިމާވިއްޔާ، ދަރިފުޅު އަންނާނީ ހިނގާފައިކަން އަދިވެސް ބައްޕަ ހަނދާން އެބަހުއްޓެވެ." އަވަހަށް އެއްޗެއް ކައިގެން، ލިބުނު ވަޒީފާގެ ވާހަކަ ބައްޕަޔަށް ކިޔައިދޭން ހިނގާށެވެ!" (ތަރުޖަމާއެއް)
ނިމުނީ