އެމެރިކާގައި ހުންނަ މުޅި ދުނިޔޭގެ އެންމެ ބޮޑު ކުތުބުޚާނާ، " ލައިބްރެރީ އޮފް ކޮންގްރެސް" އަށް މީގެ ދެތިން އަހަރު ކުރިން، އެމީހުންގެ ބަހުންނަމަ ވަރަށް ' ނާދިރު ތޯފާ' އެއް ލިބިއްޖެއެވެ. މިޒާތުގެ ތަދު އާސާރީ ތަކެތި އެއްކުރާ މީހަކު އޭނާ އަތުގައި އޮތް ފޮތެއް، ނީލަން ކިޔަން މަޝްހޫރު ކުންފުންޏެއް މެދުވެރިކޮށް، ވިއްކަން ގަސްތު ކުރާތީ،" ލައިބްރެރީ އޮފް ކޮންގްރެސް" އަށް ގުޅައި އެ ފޮތް މިހާރު ގަނެވޭނެ ކަމުގައި ކަބަރުކުރުމުންނެވެ. 189 އަހަރު ވެފައިވާ މި އަތުލިޔުން ގަތުމުގެ ފުރުސަތު ލިބުމުން، ވީ އެންމެ އަވަހަކަށް އެފަދަ ލިޔުމެއް ގަނެވޭވަރުގެ ބަޖެޓެއް ހޯދައި އެފޮތް ގަނެ، ލައިބްރެރީގެ އެންމެ ތަދު އާސާރީ ތަކެތީގެ ތެރޭގައި ހިމަނައިފިއެވެ.
އެތައް ދުވަހެއް ވަންދެން ފަރުދާގެ ފަހަތުގައި ލައްކަ ވާހަކަ ދެކެވި އެންމެ ފަހުން، މި މަޝްހޫރު ލައިބްރެރީއަށް މި ހޯދުނީ އެފްރިކާ ބައްރުގެ ހުޅަނގު ބިތުގައިވާ މިހާރުގެ ސެނެގޯލްގެ މަޝްހޫރު ފޫލާނީ ގަބީލާގެ މީހަކު، އެމެރިކާ އަށް ގަދަކަމުން ގެންގޮސް އަޅެއްގެ ގޮތުގައި ގެންގުޅެފައި، މީނާގެ ސާހިބު މީހާ ބުނި ބުނުމަށް މި މުސްލިމް، އިލްމުވެރި އަޅު ލިޔުނު އޭނާގެ އަމިއްލަ ޒާތީސިޔަރަތެވެ. މިހާރު 189 އަހަރު ވެފައިމިވާ މި އަތުލިޔުމުގެ މުހިންމު ކަމަކީ ހަމަ އެކަނި އޭނާއަށް ދިމާވި ތަފާތު ކަންކަން އަޅުގަނޑުމެނާ ހިސާބަށް ފޯރި ފޯރުމެއްނޫނެވެ. މީގެ ހަތަރު ސަތޭކަ އަހަރު ކުރިން ( 1619ގެ އޯގަސްޓް މަހު )ފެށުނު " އެޓްލާންޓިކް މާކަނޑު ހުރަސްކޮށް" ކުރެވުނު ވިޔަފާރި (މިނިވަންކަމާއެކު ފުދުންތެރި ދިރިއުޅުމެއް އުޅެމުން އައި ބަޔަކު ޖަހައިގަނެގެން ގެންގޮސް ވިއްކުމުގެ ވިޔަފާރި) ކުރުމުގެ ތެރޭގައި މިހާރު، އަޅުގަނޑުމެނަށް ޚިޔާލު ނުކުރެވޭވަރުގެ ޖިސްމާނީ އަނިޔާގެ އިތުރުން ވަރަށް ހިތްދަތި، އިހާނާތްތެރި މަލާމާތްވެސް ކަޅުނަސްލުގެ އެންމެން ހިމެނޭގޮތަށް އަތުލައިގަނެފައިވާ އަޅުންނަށް ރައްދުކުރުން އެ ޒަމާނުގައި ވަނީ އާންމުވެފައެވެ.
އަޅުން ގަނެ ވިއްކުމުގެ ވިޔަފާރި ކުރި މީހުންނާއި (އެ ޒަމާނުގައި ޖަނަވާރު ގެންގުޅުނު ދަށުދަރަޖައިގައި) އެ އަޅުން ލައްވައި މަސައްކަތް ކުރުވި މީހުންގެ އެންމެ އަތްމަތީ އެއް ހުއްޖަތަކީ: " އެއީ ތިމަންނާގެ އަމިއްލަ ފައިސާއިން ގަނެފައިވާ، މިހާރު މަގޭ މުދަލެވެ. ކޮންމެ އަނިޔާއެއް ކުރިޔަސް، ކޮންމެ އެއްޗެއް ކާންދިނަސް، ކާން ނުދިނަސް އެއީ އެހެން މީހަކާ ބެހޭ ކަމެއް ނޫނެވެ." އަނެއް ބަޔަކު ބުނަމުން އައީ "މި ކަޅު މީހުންނަކަށް ވަރުބަލިވުމާއި ތަދު އިހްސާސެއް ނުވާނެ" ކަމުގައެވެ. "ލޮލަށް ބަލައިލައިފިނަމަ އެ ލޮލުގައި ފުރާނަ ހުރިކަމެއް ރޫހެއް ހުރި ކަމެއް ނުދައްކާނެއެވެ". ދެފައިމައްޗަށް ކޮޅަށްތިބެ ހިނގާބިނގާވެ އުޅުނު ނަމަވެސް އެއީ އަހަރުމެން ނަސޯރާ ދީނުގެ އުޖާލާކަމުގައި މިތިބި ހުދުނަސްލުގެ ދޮންމީހުން ކަހަލަ އިންސާނުން ނޫން ކަމުގައެވެ. އިލްމުގެ ކަންފުޅެއްވެސް ލިބިފައިނުވާ ޖާހިލު، ހިއްސުތަކުން ބައެއް މަދު ޖަނަވާރުން" ކަމުގައެވެ!
1861 އަހަރުގެ އެޕްރީލް މަހުގެ 12 އިން 4 އަހަރުގެ ދިގު މުއްދަތަށް ކުރެވުނު އެމެރިކާގެ މަޝްހޫރު ދާޚިލީ ހަނގުރާމައިގެ މައިގަނޑު ސަބަބަކީ އަޅުންނާއި އަޅުވެތިކަން ނައްތައިލަށްވަން، އެދުވަސްވަރުގައި ވެރިކަމުގައި ހުންނެވި އެބްރަހްމް ލިންކަންގެ ނިންމެވުމެވެ. ނަމަވެސް، ދަނޑުބިންތަކުގައި ގިނަ އަދަދަކަށް އަޅުން ގެންގުޅުނު ދެކުނުގެ އިސްޓޭޓުތަކުން މިކަމާ ދެކޮޅުހަދައި އެންމެ ފަހުން ގައުމު ދެބައިވެ ދިގު ހަނގުރާމައެއް ކުރަން ޖެހުނީއެވެ. އެދުވަސްވަރުގައި (1861އާ ހަމަޔަށް) އެމެރިކާ އެކުލެވިގެންވަނީ ޖުމްލަ 34 އިސްޓޭޓުގެ މައްޗަށެވެ.
ރައީސް ލިންކަން އަޅުވެތިކަން ނައްތައިލައްވަން އުޅުއްވާތީ، އަދި އެކަން ކާމިޔާބު ވެއްޖެނަމަ އެބައެއްގެ މުޅި އިގްތިސޯދު ހަލާކުވާނެކަން ޔަގީންވާތީ، މިދެންނެވި 34 އިސްޓޭޓުގެ ތެރެއިން ދެކުނުގެ 13 އިސްޓޭޓެއް ނުކިޔަމަންތެރިކަން ދައްކައި އުތުރުގެ މައި ސަރުކާރާ ދެކޮޅަށް ހަނގުރާމަ އިއުލާން ކުރިއެވެ. ދިގު ހަނގުރާމައަކަށް ފަހު ބާޣީން ހަތިޔާރު ބެހެއްޓުމުން މައި ސަރުކާރަށް ނަސްރު ލިބުނީއެވެ. ރައީސް ލިންކަންގެ މަޝްހޫރު "އަޅުން މިނިވަންކުރުން އިއުލާން ކުރުމުގެ ގަރާރު" ގެ ދަށުން 4 މިލިޔަން އަޅުން މިނިވަނުން ކަމުގައިވިއެވެ. އަބުރުވެރި ދިރިއުޅުމެއް ފަހިކޮށްދިނުމުގެ ގޮތުން ދައުލަތުން މާ ބޮޑު އެހީތެރިކަމެއް ފޯރުކޮށް ނުދެއްވިނަމަވެސް، އެމީހުން މިނިވަނުން ކަމުގައި ހަމަޖެހުނެވެ.
ވަކިވެގަން ދެކުނުބައިގެ (ބާޣީ) ނައިބު ރައީސް އެލެގްޒެންޑަރ ހެމިލްޓަން ސްޓީވަންސް، ރައީސް އެބްރަހަމް ލިންކަން އަށް ކިޔަމެންވެވެން ނެތްކަމަށް ދެއްކެވި މައިގަނޑު ބަހަނާ އަކީ. " އަހަރުމެންގެ ސަރުކާރުގެ ބިންގާ އެޅިފައި މިވަނީ އަޅުވެތިކަމުގެ މަތީގައެވެ. އެ ބިންގަލުގެ އިތުރުން ހަތަރު މައިތަނބުވެސް ހަރުކުރެވިފައިވަނީ ފިސާރި ތެދު ހަގީގަތެއްގެ މަތީގައެވެ. އެއީ، ކަޅު ބަބުރުންނަކީ އެއްވެސް ހާލެއްގައި، ދުވަހަކުވެސް އަހަރުމެން ހުދުނަސްލުގެ މީހުންނާ އެއްފެންވަރުގެ ބަޔަކަށް ނުވާނޭކަމެވެ. އަހަރުމެން މާ މާތް ނަސްލަކުން އައިސްފައިވާތީ އަހަރުމެންގެ ކުރިމަތީގައި އެ ބަބުރު އަޅުން ބޯލަނބައި ކިޔަމަންވާން ޖެހުމަކީ އެމީހުންނަށް އޮތް އެންމެ ސާދާ، ގުދުރަތީ ގާނޫނީ ހަމައެވެ!"
އިސްވެ ލިޔެވުނު، (ބާޣީ) ނައިބު ރައީސް ސްޓީވަންސް ގެ އިލްމީ އެއްވެސް ބުރަދަނެއް ނެތް ރޯ ބުހުތާނު ވާހަކަތަކަށް ހުކުމުގެ މަންނަ ޖެހޭފަދަ އަގުމާތް ލިޔުމަކީ މިހާރު އަޅުގަނޑު އިންސާފު ކުރެވޭތޯ މިއުޅޭ، އުމަރު އިބްނު ސައީދު އަމިއްލަ އަތްޕުޅުން ލިޔުއްވާފައިވާ އޭނާގެ ޒާތީސިޔަރަތެވެ.
މީގެ ތިން އަހަރު ކުރިން ލިބުނުއިރު، ހަލާކުވާން ފަށާފައި ހުރި ބައެއް ގަނޑުތަކުގެ އާބާތުރަފިލުވުމުގެ މަސައްކަތަށް ފަހު އާންމުންނަށް މިހާރު ފެންނަން މިއޮތް އަތުލިޔުން މުހިންމުވެ ނާދިރު ތޯފާއެއް ކަމުގައި ވެގެންދިޔަ އެއް ސަބަބަކީ މި ލިޔެފައިވާ މީހާގެ ކުޅަދާނަކަން މި އަތުލިޔުމުން ސާފުވާލެއް ފުރިހަމަ ކަމުންނެވެ. އަޅުގަނޑު އިޝާރާތް މިކުރާ ލިޔުން މި ނަސީބު ދެރަ އިލްމުވެރިޔާ ލިޔުއްވާފައިވަނީ އަރަބި ބަހުންނެވެ! މީނާއަކީ ހުޅަނގު އެފްރިކާގެ މަށް އެފްރިކާ މީހެކެވެ. މިހާރުވެސް އެހިސާބުގައިވާ އެންމެ ބޮޑު ގަބީލާ ކަމުގައިވާ ފޫލާނީ ގަބީލާއަށް ނިސްބަތްވި މީހެކެވެ. ފޫލާނީ ގަބީލާއަކީ މިހާރުވެސް މަދުވެގެން 25 މިލިޔަން މީހުން ނިސްބަތްވާ މަޝްހޫރު ގަބީލާއެކެވެ. (މިއީ މުޅި އޮސްޓްރޭލިޔާގެ މިހާރުގެ އާބާދީއެވެ!) ވަރަށް ހަގު އުމުރުގައި އަރަބި ބަހާއި ކީރިތި ޤުރްއާނާއި ދީނީ އިލްމު އުނގެނުނީ އާއިލާތެރޭގައިވާ އިލްމުވެރި ބޭބެމެންގެ ފަރާތުން ކަމުގައި ލިޔުއްވިއެވެ.
މި އިލްމުވެރި އަޅު، އުމަރު އިބްނި ސައީދުގެ ޒާތީސިޔަރަތު އޭނާ ފައްޓަވާފައިވަނީ، ބިސްމިނަށް ފަހު ޙަމްދު ޞަލަވާތުންނެވެ. އެއަށް ފަހު الملك (ތަބާރަ) ސޫރަތުންނެވެ! ކީރިތި ޤުރްއާނުގެ 114 ސޫރަތުންކުރެ سورة الملك އޭނާ ޚިޔާރު ކުރެއްވި ކަމީ،އޭނާފަދަ ބުރަ މަސައްކަތަށް ހޭނިފައި ނުވާނޭ އިލްމުވެރިޔަކު ލައްވައި ފިސާރި ބުރަ މަސައްކަތް ސާޅީހަކަށް އަހަރު ކުރުވި ފަހުންވެސް އޭނާގެ ޅަފަތުގައި ހޯއްދަވައިފައިވާ އިލްމުގެ ހަރުދަނާކަމެވެ. ކީރިތި ޤުރުއާނާ ބެހޭ އިލްމު ހަނދާނުގައި ހަރުލާފައި ހުރިލެއް ސާބިތު ކަމެވެ. އަޅުވެތިކަމުގެ ދިގު މުއްދަތުގައި އޭނާ މުތޯލިއާ ކުރައްވާނެ ޚަތިމެއް ހޯއްދަވާނީ ކޮންގޮތަކުންތޯއެވެ؟ ހިތްޕުޅުގައި ހުރި އިލްމެއް ތަކުރާރު ކުރެއްވުން ނޫނީ، ހަނދާނުގައި ހަރުލައްވަން އިތުރަށް ވަކި ކުރައްވާނީ ކޮންކަމެއްބާއެވެ؟ އޭނާގެ ވަގުތަކީވެސް އެހެން ބައެއްގެ މިލްކެކެވެ!
އަޅުގަނޑަށް ފާހަގަކުރެވޭ ގޮތުގައި މުޅި ކީރިތި ޤުރުއާނުން އޭނާ މުލްކު ސޫރަތް އެ ޚިޔާރު ކުރެއްވި ސަބަބަކީ އެ ބަރަކާތްތެރި ސޫރަތުން އޭނާގެ ހަލާކުވެފައިވާ ހިތްޕުޅަށް ލިބޭ ޚާއްސަ ތަސައްލީގެ ސަބަބުންނެވެ. ﷲ ގެ ކުޅަދުންވަންތަ ކަމާއި އެ ކުޅަދުންވަންތަ ކަމުގެ ފުރިހަމަ ކަމުގައި އިންސާނާގެ ނުކުޅެދުންތެރިކަމަށް އިޝާރާތް ކުރައްވާފައިވާތީއެވެ. އެކަލާނގެއީ އިންސާނުން ކުރެ އެންމެ އަމަލު ރަނގަޅީ ކާކުތޯ އިމްތިޙާނު ކުރެއްވުމަށްޓަކައި މަރުވުމާއި ދިރުން އުފެއްދެވި ރަސްކަލާނގެއެވެ. ދިރިއުޅުމަކީ އިމްތިޙާނެއް ކަމާއި ކޮންމެ ކަމެއްގައިވެސް ޙިކުމަތެއް ވާނޭކަމެވެ. އޭނާއަށް މި ހިތްދަތި ދަތުރު ދިމާވި ނަމަވެސް، އޭނާ އަޅުވެތި ކުރި މީހުންގެ މައްޗަށް ހުރިހާ ކާއިނާތެއްގެ ވެރި ރަސްކަލާނގެ ވޮޑިގެންވާކަން ޔަގީންވެ ކަށަވަރުވެލައްވާތީއެވެ.
މި މާތް ސޫރަތް ކިޔަން އާދަވެފައިވާ މީހަކަށް، ކައްވަޅުގެ ޢަޒާބުން މިންޖުވާނޭކަން މީނާއަށް އެނގިލައްވާތީއެވެ. އެ ސޫރަތުގެ އާޔަތްތައް ކިޔަވާ މީހެއްގެ ފާފަ ފުއްސަވައިފުމަށް ދާންދެން އެ އާޔަތް ތައް ޤިޔާމަތް ދުވަހުން ޝަފާޢަތްތެރިވާނޭކަން ކީރިތި ރަސޫލާ ޙަދީޘް ކުރައްވާފައިވާކަން ވެސްމި ޢިލްމުވެރިޔާއަށް ރަނގަޅަށް އެނގިވަޑައިގެންފައިވާތީއެވެ! އެންމެ ޅަފަތުގައި ހޯއްދަވާފައިވާ އިލްމުގެ ހަރުދަނާކަމުންނެވެ. ޒުވާން ދުވަސްވަރު ކިޔަވައިދެއްވަން އުޅުއްވާފައިވާތީވެސް މެއެވެ.
ލައިބްރެރީ އޮފް ކޮންގްރެސް އަށް ލިބުނު އަގުބޮޑު ދުވަސްވީ ލިޔުމުގެ ވެރިޔާ ޢުމަރް އިބްނި ސަޢީދަކީ 1770 ގައި ހުޅަނގު އެފްރިކާގެ މިހާރުގެ ސެނެގޯލް އަށް އުފަން މުސްލިމެކެވެ. ބަޔަކު، މީނާ އަތުލައިގަނެގެން އެމެރިކާއަށް ގެންދިޔައީ އޭނާގެ އުމުރުން ސާޅިހަށްވުރެ ދޮށީ އުމުރުގައެވެ. 1864 ވަނަ އަހަރު އޭނާ ހެއްދެވި ފަރާތަށް އަނބުރާ ގެންދެވިއިރު އުމުރަކީ ގާތްގަނޑަކަށް 90 އަހަރެވެ. ކިޔަވައިވިދާޅުވެގެން ހުންނެވި، އަބުރުވެރި ތަނަވަސް މީހަކު ބަނދެގެން ސާޅީހަކަށް ދުވަހުގެ ބިރުވެރި ދަތުރަކަށް ފަހު އެޓްލާންޓިކް މާކަނޑު ހުރަސްކޮށް އެމެރިކާއަށް ގެންގޮސް، އޭނާގެ މޮޅުކަން އެއްވެސް އެއްޗަކަށް ނުވާ ބައެއްގެ އަޅުވެތިކަމުގައި، ގައިބާރު ދެރަވެ، ލޯބޯ ކޮށިވެ މުސްކުޅިވެ މުޅި އުމުރު ނަގައިލީއެވެ! 1831 ގައި ޢުމަރް އިބްނި ސަޢީދު އޭނާގެ ޒާތީސިޔަރަތު ފައްޓަވަމުން ލިޔުއްވިއެވެ.
«بسم الله الرحمن الرحيم. الحمد لله والإحسان من قديم والجود والمنِّ والإجلال والكرم. الحمد لله الذي خلق الخلق لعبادته حتى يرى أفعالهم وأقوالهم. من عمر إلى شيخ حنته سألتني أن أكتب حياتي، لا أستطيع أن أكتب حياتي فقد نسيت اللغة العربية، ولا أفهم إلا القليل منها نحويًا ولغويًا. يا إخوتي سألتكم بالله لا تلوموني فأنا الآن ضعيف الجسد كذلك». يتابع :«اسمي عمر بن سعيد ومكان مولدي فوت تور بين البَحرَين. طلبت العلم في بندر فوت عند شيخ يسمى محمد سعيد وهو أخي، وعند الشيخ سليمان كمبه والشيخ جبريل عبدالله. أنا يثبت (ظللت) طالب علم خمسًا وعشرين سنة. رجعت إلى مكاني ست سنين. جاء في بلدنا جيشٌ كبير قتل كثيرًا من الناس. أخذني ومشى حتّى البحر. باعوني في يد النصرانيّ الذي اشتراني يمشي (أمشاني) إلى السفينة الكبيرة في البحر الكبير. مشينا في البحر الكبير شهرًا ونصف.. باعوني واشتراني رجل صغيرٌ ضعيفٌ سيء يسمى جونسون، كافر جدًا لا يخاف الله في شيء»
އުމަރުގެ ގެ ފަރާތުން ޝެއިޚް ހަންޓަރ އަށް
އުމަރު އިބްނު ސަޢީދު މިތަނުގައި ޝެއިޚް ހަންޓަރ ގެ ނަމުން އެ މުޚާތަބު ކުރައްވަނީ، ފިލައިގެން އުޅުއްވަނިކޮށް ޖަލަށްލާފައި ހުންނެވި ދުވަސްވަރު މީނާ ބަލަހައްޓަން ހަވާލުވި މިސްޓަރ ހަންޓަރ އަށެވެ. މި ހަންޓަރވެސް އުމުރުން ދޮށީވުމުން މިސްޓަރ ހަންޓަރ އޭ ބުނާބީދައިން މިތަނުގައި ޝެއިޚް ހަންޓަރ ގެ ނަމުން މުޚާތަބު ކުރައްނީ ކަމުގައި ގަބޫލުކުރެވެއެވެ.
" އޭ ޝެއިޚް ހަންޓަރ އެވެ. ވިދާޅުވި ފަދައިން އަހަރެންގެ ހަޔާތާ ބެހޭގޮތުން އަހަރެން މިހާރު ދެން ލިޔާނީ ކޮން އެއްޗެއްހެއްޔެވެ. އަހަރެންގެ އަމިއްލަ މާދަރީ ބަސް ވެސް މިހާރު ހަނދާން ނެތިއްޖެއެވެ. (ލަފާކުރެވޭ ގޮތުގައި އެއީ ހުޅަނގު އެފްރިކާގައި ވަރަށް އާންމު، ފޫލާ ބަހުގެ ގޮތްޕެއް ކަމުގައިވާ ( Pulaar Language) ޕުލާރ ބަހެވެ.) އަހަރެން ދަސްކުރި އަރަބި ބަސްވެސް މިހާރު ހިތުގައި ހަރުލައިފައެއް ނެތެވެ. އިއްޒަތްތެރި އަޚްއެވެ. އަހަރެންގެ މައްޗަށް މާ ހަރުކަށި ވެނުލައްވާށެވެ.
بسم الله الرحمن الرحيم. الحمد لله އެވެ.
ގަދަކީރިތިވަންތަ ﷲ އަށް ޙަމްދު ހުއްޓެވެ. އެކަލާނގެއީ އަޅުތަކުންގެ މައްޗަށް ދީލަތިވަންތަކަމާއެކު އިޙްސާންވެ ވޮޑިގަންނަވާ، އަޒަލުއްސުރެ ޤާއިމްވެވޮޑިގެންވާ ރަސްކަލާނގެއެވެ. އެކަލާނގެއަށް އަޅުކަން ކުރުމަށްޓަކައި އެންމެހައި ޚަލްޤުތަކުން ހެއްދެވި މާތް ﷲ އަށް ޙަމްދު ހުއްޓެވެ. އެކަލާނގެ އަޅުތަކުން ހެއްދެވީ އެމީހުންކުރެ ޢަމަލުތަކާއި މަސްމަގު އެންމެ ރަނގަޅީ ކާކުތޯ އިމްތިހާނު ކުރެއްވުމަށްޓަކައެވެ.
ޝެއިޚް ހަންޓަރ އެވެ. އަހަރެންގެ މާދަރީ ބަހާއި އުފަން ބިމުގައި ބޭބެމެން ގާތުން ދަސްކުރި އަރަބި ބަހުން ބޮޑުބައެއް މިހާރު ހަނދާން ނެތިފައިވާތީ އަރަބި ބަހުގެ ރީތި ހަމަތަކުން އަހަންނަކަށް މިހާރަކު ނުލިޔެވެއެވެ. އެބަހުގެ ރީތި މަޖާޒީ ބަސްބަހާއި މަތިވެރި ގަވާއިދުތައް މި އުމުރުގައި މިހާރު ހަނދާނުގައި ހުންނަން ބޭނުންވާ މިންވަރަކަށް ނެތެވެ. މާތް ﷲ ގަންދީ ބުނަމެވެ. މި އުމުރުގައި އަހަރެން ކުއްވެރި ނުކުރެއްވުން އިންތިހާއަށް އެދެމެވެ. އަހަރެންގެ ދެލޮލާއި ހަށިގަނޑު މިހާރު އެވަނީ ވަރަށް ކަމީނާ ވެފައެވެ.
އަހަރެންގެ ނަމަކީ ޢުމަރު އިބްނު ސަޢީދެވެ. އުފަންވީ ދެކޯރުގެ(ސެނެގާލް ކޯރާއި ގެމްބިއާ ކޯރު) ދެމެދުގައިވާ ފުޓް ޓޫރް (މިހާރުގެ ސެނެގާލް) އަށެވެ. އަހަރެން ތައުލީމު ހޯދީ ޝެއިޚް މުޙައްމަދު ސަޢީދު ގާތުންނެވެ. އެއީ އަހަރެންގެ އުފަން ބޭބެއެވެ. އަދި ޝެއިޚް ސުލައިމާން ކެމްބެހް އާއި ޝެއިޚް ޖިބްރީލް ޢަބްދުލް އަކީވެސް އަހަރެންގެ ލޮބުވެތި ދެ އެދުރުންނެވެ. ކިޔެވުމާއި ކިޔަވައިދިނުމުގައި 25 އަހަރު ހޭދަކުރީމެވެ.
(ނުނިމޭ)
މިހާރަކަށް އައިސް ފެންނަ ލިޔުމެއް ކިޔާލީމާ ތަފާތު ލިޔުމެއް ކިޔާލެވުނު ހެނެއް ހިއެއް ނުވެއެވެ. ސަމާީރު ކޮންމެ ލިއުމަކީ ތަފާތު ލިއުމެކެވެ. މައުލޫމާތުން ފުރިފައިވާ ޝައުޤުވެރި ލިއުމެކެވެ. މިއީވެސް މިސާލެއް ނެތްފަދަ ރީތި ފުރިހަމަ ލިއުމެކެވެ. ދެވަނަ ބަޔަށް އިންތިޒާރު ކުރަމެވެ. ސަމީރައް ބަރަކާއް ލައްވާށިއެވެ.