(20 އޯގަސްޓް 2021 ގައި ޝާއިއުކުރި ބަޔާ ގުޅޭ)
ކީރިތި ޤުރުއާނުގެ ތަޢާރުފާއި ތާރީޚު
ކީރިތި ޤުރުއާން ބާވައި ލެއްވިފައިވަނީ، މި އުއްމަތުގެ މާތް ނަބިއްޔާ މުޙަންމަދު ޞަލްޢަމް ގެ މައްޗަށް، އެކަލާނގެ ފޮނުއްވި ވަޙީގެ ގޮތުގައެވެ. އެހެންކަމުން، ވަޙީ އަކީ ކޮބައިކަން، މި ނުކުތާގައި ސާފުކޮށް އެނގުމަކީ ވަރަށް މުހިންމު ކަމެކެވެ.
ވަޙީގެ މަޤްޞަދާއި ބޭނުމަކީ ކޮބައިތޯއެވެ؟ ހަމަބުއްދި ސަލާމަތުންހުރި، ކޮންމެ އިންސާނަކަށްވެސް، އެނގި، ކަށަވަރު ވާނެފަދައިން، ﷲ، އިންސާނާ އުފައްދަވައި، މި ދުނިޔެއަށް ފޮނުއްވީ، އިމްތިޙާނެއްގެ ގޮތުގައެވެ. ﷲ ހެއްދެވި މަޚްލޫޤަކަށްވެ ހުރެ، ދުނިޔެމައްޗަށް ފޮނުއްވީތީ، އެ އިންސާނާ، އޭގެ ބަދަލުގައި، ފުރިހަމަ ކުރަން ޖެހޭ ވާޖިބުތަކެއް ހުންނާނެއެވެ. މި ދުނިޔޭގެ އެންމެހައި ތަކެތި، އެއިންސާނާގެ ޚިދުމަތުގައި ލައްވައި، އެ އިންސާނާގެ ދިރިއުޅުން ފުރިހަމަ ކުރައްވާފައި ވާތީއެވެ. ﷲ، އިންސާނާ މި ދުނިޔެމައްޗަށް ފޮނުއްވީ، ހިތަށް އެރިގޮތަކަށް ދުނިޔޭގައި އުޅެފައި، އެކަލާނގެ ޙަޟްރަތަށް އެނބުރި ދާކަށް ނޫނެވެ. އަދި ކިއެއްތަ ! މި ދުނިޔޭގައި އުޅުނުމަށް އެކަލާނގެ ވަޙީ ބަސްފުޅުން، އަންގަވައި އިންސާނާއަށް އޮޅުންފިލުއްވައިދެއްވާފައިވާ މަގުން ހިނގައި، އެކަލާނގެ ޙަޟްރަތަށް އެނބުރި ދާށެވެ.
މި ސަބަބަޢްޓަކައި، އިންސާނާ ދިރި ދުނިޔޭގައި އުޅޭ އިރު، އެއިންސާނާގެ މައްޗަށް، ދެކަމެއް ވާޖިބު ވެގެން ވެއެވެ.
- މިދުނިޔޭގައި ލެއްވި އެންމެހައި ތަކެތީގެ ފުރިހަމަ ބޭނުންހިފައި، ދުނިޔެއިން ލިބެންއޮތް އުފަލަކާއި އަރާމެއް ( ﷲ، އެނގެވި ގޮތުގައި ) ލިބިގަތުން.
- ދުނިޔޭގައި ﷲ ލެއްވި އުފަލާއި އަރާމު، އެއިންސާނާގެ އަމިއްލަ ބޭނުމަށް ހިފަމުންދިއުމުގައި، ﷲ ގެ ކުޅަދުންވަންތަ ކަމުގެ މަތިން ހަނދުމަ ކުރުން. އަދި، އެކަލާނގެ އަމުރުފުޅުތަކާ، ރުއްސަވާވޮޑިގެންވާ ގޮތާ ޚިލާފަށް އެއްވެސްކަމެއް ނުކުރުން.
މި ދެވާޖިބު އިންސާނާއަށް އަދާކޮށް ފުރިހަމަ ކުރެވޭނީ، އެކަންކަމުގެ ފުރިހަމަ މަޢުލޫމާތު ލިބިގެންނެވެ. އެހެންކަމުން، މި ދުނިޔޭގެ އަޞްލާއި ޙަޤީޤަތް، އަދި، ދުނިޔޭގައި ލެއްވި އެންމެހައި ތަކެތީގެ ޙަޤީޤަތާއި، އެތަކެތީގެ ބޭނުން އެންމެ ފުރިހަމަގޮތުގައި ހިފާނެގޮތް ނޭނގޭ ކަމަށް ވަންޏާ، ކީރިތި ﷲ ގެ މިލްކުގައިވާ، އެކަލާނގެ މި ދުނިޔޭގައި ލެއްވި، ދުނިޔޭގެ އެއްވެސް ކަމެއް އަދި އެއްޗެއް، އިންސާނާއަށް، އޭނާގެ އަމިއްލަ ބޭނުމާއި ފައިދާއަށް، ބޭނުމެއް ނުކުރެވޭނެއެވެ.
ހަމަ އެފަދައިން، ﷲ ރުއްސަވާ ގޮތާއި އެކަލާނގެ އަމުރު ކުރައްވާ ކަންކަން، އަދި ރުހިވޮޑިގެން ނުވާ ކަންކަމާއި، ކޯފާވެވޮޑިގެންވާ ކަންކަން އިންސާނާއަށް ނޭނގޭ ކަމަށް ވަންޏާ، އެ އިންސާނާ ދުނިޔެމައްޗަށް ފޮނުއްވިއެއްކަމަކު، ﷲ، ރުހިވޮޑިގެންވާ ގޮތުގައި، މި ދުނިޔޭގެ ޙަޔާތް ބިނާކުރާކަށްވެސް އިންސާނާއަކަށް ނޭނގޭނެއެވެ.
أَفَرَأَيْتَ مَنِ اتَّخَذَ إِلَهَهُ هَوَاهُ وَأَضَلَّهُ اللَّهُ عَلَى عِلْمٍ وَخَتَمَ عَلَى سَمْعِهِ وَقَلْبِهِ وَجَعَلَ عَلَى بَصَرِهِ غِشَاوَةً فَمَنْ يَهْدِيهِ مِنْ بَعْدِ اللَّهِ أَفَلَا تَذَكَّرُونَ
ފަހެ، އެމީހެއްގެ އެދުންތައް އެއީ، އެމީހަކު އަޅުކަންކުރާ އިލާހެއްކަމުގައި ހަދައި، އަދި ޢިލްމު ލިބިފައިވުމާއެކުވެސް، ﷲ އެމީހަކު މަގުފުރައްދަވައި، އަދި އޭނާގެ އިވުމާއި ހިތުގައި ސިއްކަ ގައްސަވައި، އަދި އޭނާގެ ލޮލުގައި ފަރުދާއެއް ލައްވައިފި މީހާ، ކަލޭގެފާނު ދެކެވަޑައިގަތީމު ތޯއެވެ ؟ ﷲ މެނުވީ، އެމީހަކަށް ތެދުމަގު ދައްކަވާނީ ފަހެ، ކާކު ހެއްޔެވެ ؟ ފަހެ، ތިޔަބައިމީހުން ހަނދުމަ ނުކުރަނީ ހެއްޔެވެ ؟ (ޖާޡިޔަތު : 23)
ކީރިތި ﷲ، އިންސާނާ އުފައްދަވައި، އެއިންސާނާއާ ގުޅުންހުރި، ތިންކަމެއް، އުފައްދަވައި، ފުރިހަމަ ކުރެއްވިއެވެ. އެއީ، މަތީގައި ބަޔާން ކުރެވުނު ވާޖިބުތައް އަދާކުރުމަށް، އެ އިންސާނާއަށް ކުޅަދާނަކަން ލިބި ދެއްވުމަށްޓަކައެވެ. އެ ތިންކަމަކީ ؛
- ޙިއްޞުތަކާއި ގުނަވަންތައް ފުރިހަމަ ކުރެއްވުން . އެއީ، ލޮލާއި، ކަންފަތާ ނޭފަތް، އަދި އަނގަޔާއި ދުލާ، ހަތަރެސް ފަޔާ، ސިކުނޑިއާއި ހިތް
- އިންސާނާ އުފެއްދެވި ސަބަބު ކަނޑަ އެޅުއްވުން
- އިންސާނާ އުޅެންވީ ގޮތް އަންގަވައި، ވަޙީ ބާވައި ލެއްވުން
ހަމަ އެއާއެކު، އިންސާނާ، އޭނާއަށް ލިބިގެންވާ ޙިއްޞުތައް ބޭނުންކޮށްގެން، އޭނާގެ ވަށައިގެން ހިނގާ ކަންކަމާއި، ވާނުވާ ދެނެގަނެއެވެ. އަދި، ސަބަބު ތައް މެދުވެރިވެގެން ދިމާވާ އެތައް ކަމެއް ދެނެގަނެ، ތަޖުރިބާ ކޮށް، ފިލާވަޅު ލިބިގަނެއެވެ. މި ދެގޮތުން ކުރެ ގޮތަކުން، އިންސާނާއަށް އެނގުން ނުވާ، ދޭހަނުވާ އަދި ފަހުމް ނުވާ އެހެނިހެން ކަނތައް ތައް، އެ އިންސާނާއަށް ޙާޞިލުވެގެންދަނީ، މާތް ﷲ ބާވާ ލައްވާ ވަޙީގެ ބަސްފުޅުންނެވެ. އެއީ މަގުދައްކައިދޭ ނަޞޭޙަތުގެ ބަސްފުޅަކަށް، އަދި ގަދަ ވެގެންވާ އިންޒާރާއި ކޯފާގެ ބަސްފުޅަކަށް، ނުވަތަ އެކަލާނގެ އަންގަވާ އަމުރުފުޅަކަށް، އަދި އިންސާނާއަށް މަގު ދައްކައިދޭ ފިލާވަޅަކަށްވެސް ވެގެން ހިނގައިދާނެއެވެ.
އުނގެނުމާއި ޢަމަލުކުރުމާ ގުޅިފައިވާ، މަތީގައި ބަޔާން ކުރެވުނު ތިން މަސްދަރަކީ، އެކަތި އަނެކައްޗާ ގުޅި ލާމެހިފައިވާ ކަންކަމެކެވެ. އަދި އެއިން ކޮންމެ ކަމެއްގައިވެސް މިން ތަކަކާއި އިންތަކެއް، ﷲ ވަނީ ލައްވަވާފައެވެ. މިސާލަކަށް، ޙިއްޞުތަކާއި ގުނަވަންތައް މަދު، އަދި އުނި އިންސާނުން ތިބޭ އިރު، ހުރިހާ ޙިއްޞަކާއި ގުނަވަނެއް ހަމަޔަށް ފުރިހަމަ ވެފައިވާ އިންސާނުން ވެސް ތިބެއެވެ. އެހެންކަމުން ބައެއް ޙާލަތްތަކުގައި، މިތިން މަސްދަރު، ފުރިހަމަޔަށް އެކުގައި މަސައްކަތް ނުކުރާނެ ގޮތްތައްވެސް ދިމާވެއެވެ. ޤުދުރަތީ ގޮތުން، އިންސާނާއަށް ލިބިގެންވާ، އެ ތިންމަސްދަރު ފުރިހަމަވެގެން، އެއިންސާނާގެ ބުއްދިއާއި ސިކުނޑިޔަށް ފެންނަ، ރަނގަޅާއި ނުބައި ގޮތް، ސަބަބަކާނުލައި ދޮގެއް ނުކުރެވޭނެއެވެ. މިސާލަކަށް، ލޮލާއި ސިކުނޑީގެ ބޭނުން ހިފައިގެން، އިންސާނާގެ ކުރިމަތިން ފެންނަ ހުދު ފާރެއްގެ ކުލަ ހުދުކަމަށް ޤަބޫލު ކުރެވިއްޖެ ހިނދެއްގައި، ދެލޯ މެރުމަށްފަހު، އެފާރާދިމާލަށް އެނބުރި ހުރެ އެއީ ހުދު ފާރެއް ނޫންކަމަށް ނިންމޭނެ އެއްވެސް ޙުއްޖަތެއް ނޯންނާނެއެވެ. އެހެންކަމުން، ސަބަބެއް މެދުވެރިވެގެން، ލިބޭ ނުވަތަ އެނގޭ މަޢުލޫމާތުގެ ދޮގުތެދު، ހަމައެކަނި ޙިއްޞުތަކުން އެކަނި ހޯދައެއް ނުގަނެވޭނެއެވެ. މިސާލަކަށް، އެފާރު ރޭނި މީހަކީ ކާކުކަން ހޯދައިގަތުމަކީ، ހަމަ އެކަނި އެފާރު ފެނިގެން، ނުވަތަ އެ ފާރުގައި އަތްލައިގެން ހޯދައިގަނެވޭނެ އެއްޗެއް ނޫނެވެ. އެ ފާރު ރޭނި މީހަކު ހޯދައިގަތުމަށްޓަކައި، އިތުރު މަޢުލޫމާތާއި ސަބަބުތަކެއް ހޯދައިގެން ނޫނީ އޭގެ އަޞްލަށް ރުޖޫޢައެއް ނުވެވޭނެއެވެ.
ފަސް ޙިއްޞު، ސަލާމަތުން މަސައްކަތް ކުރާ ހިނދެއްގައި، ސަބަބު އެއީ އެއްވެސް ކަމަކަށް މަގުފަހިކޮށްދޭ އެއްޗަކަށް ނުވެއެވެ. އެހެނަސް، ޙިއްޞުތައް މަސައްކަތް ކުރުން ހުއްޓިއްޖެ ނަމަ، ސަބަބުތަކުން ޙާޞިލް ކުރެވޭނެ ނަތީޖާ ފެންނާނެއެވެ. އެހެނަސް، އެ ސަބަބުތަކުން ޙާޞިލް ކުރެވޭނެ ނަތީޖާ އަކީވެސް ވަކި އިންތަކެއް ހިމެނިގެންވާ ކަމެކެވެ. އެހެންކަމުން، ވަކި ހިސާބަކުން އެއިންތަކާ ހިސާބަށް ދެވޭ ހިނދު، އެ ހިސާބުން އެ ހުއްޓުނީއެވެ. ދެން އިތުރަށް، ކުރިޔަށް ދެވޭނެ ގޮތެއް، އަދި ކުރެވޭނެ ކަމެއްވެސް ނޯންނާނެއެވެ. މިސާލަކަށް، ކުރިން ދެންނެވުނު އެ ފާރު، ސަބަބާއި ޙިއްޞު ބޭނުން ކޮށްގެން، ﷲ ރުހިވޮޑިގަންނަވަނީ ކޮން ގޮތަކަށް ބޭނުން ކޮށްގެންކަން، ނުވަތަ ރުހިވޮޑިނުގަންނަވަނީ ކޮން ގޮތަކަށްކަން އެފާރުގެ ބޭނުން ހިފައިގެންކަން ހޯދައެއް ނުގަނެވޭނެއެވެ. މިހިސާބުން، އިންސާނާގެ ހިތުގައި އުފެދިގެން އަންނާނީ، ޖަވާބު ލިބެން ނެތް ސުއާލުތަކެވެ. އެކަން ހޯދައި ގަނެވޭނީ، ﷲ އެއަށް ޖަވާބު ދެއްވައިގެންނެވެ. މިފަދައިން، އިންސާނާގެ ހިތުގައި އުފެދޭ ސުއާލުތަކަށް ޖަވާބު ދެއްވުމުގައި ﷲ ބޭނުން ކުރައްވަނީ، އެކަލާނގެ ވަޙީ ބަސްފުޅެވެ. ވަޙީގެ ބަސްފުޅު ބާވައި ލެއްވުމުގައި، ﷲ ބޭނުންފުޅު ކުރައްވަނީ، އެކަލާނގެ އުފެއްދެވި އިންސާނުންގެ ތެރެއިން އިންސާނެކެވެ. ﷲ ގެ ވަޙީބަސްފުޅު އިންސާނާއަށް އަންގަވައި ދެއްވަނީ، ﷲ އިޚުތިޔާރު ކުރައްވާ އެކަލާނގެ އަޅުން ކުރެ އަޅަކު މެދުވެރި ކުރައްވައެވެ. އެއަންގަވާ އެންގެވުމަށް ކިޔިގެން ވަނީ، ވަޙީ އެވެ.
މިކަމުން، ސާފުކޮށް އެނގިގެންދާ ކަމަކީ، ސަބަބާއި ޙިއްޞުތަކުގެ ބޭނުން ކޮށްގެން އެކަނި، އިންސާނާއަށް، އެއިންސާނާ އުޅޭންވީ ގޮތް ދެނެގަންނަން ނޭނގޭނެ ކަމެވެ. ކަންކަމުގެ ޙަޤީޤަތް ރަނގަޅަށް ސާފު ނުވާނެކަމެވެ. އެހެންކަމުން، އިންސާނާ އުފައްދަވައި، މިބިންމައްޗަށް ފޮނުއްވި ފަރާތުން، އެ އިންސާނާ އުޅެންވީ މަގު ދައްކަވައި ދެއްވަން ޖެހޭކަން، މިކަމުން ސާފުކޮށް އެނގެއެވެ.
މި މަވްޟޫއަށް ފަށައިގަންނަ ހިނދު، ﷲ ގެ ވަޙީ ބަސްފުޅާމެދު، ވާހަކަ ދެއްކުމަކީ، ﷲ ވޮޑިގެންވާކަން ޤަބޫލު ނުކުރާ އިންސާނެއް، ނުވަތަ އެކަލާނގެ، ތެދުމަގު ދައްކަވާފައިނުވާ އިންސާނެއްގެ ގާތުގައި ދައްކަން، ބޭކާރު ކަމެކެވެ. އެހެންނަމަވެސް، ﷲ އަށް އީމާންވެ، އެކަލާނގެ އެއްކައުވަންތަކަން ޤަބޫލުކުރާ އިންސާނަކަށް، ވަޙީއަކީ ނުވަތަ އެ އިންސާނާ އުޅެންވީ މަގު ދެއްކެވުމަކީ ކޮންމެހެން ބޭނުންވާނެ ކަމެކެވެ. އަދި އެފަދަ އިންސާނަކަށް، ﷲ ގެ ވަޙީ ބަސްފުޅު ޤަބޫލުކުރުމަކީ، ދަތި އުނދަގޫ ކަމަކަށްވެސް ނުވާނެއެވެ.
މި ދުނިޔެ އުފެއްދެވީ މަތިވެރިވަންތަ ފަރާތަކުންކަން ޤަބޫލުކޮށް، އިންސާނާ ދުނިޔެއަށް ފޮނުއްވީ ވަކި ހަމަތަކެއްގައި މިދުނިޔޭގައި އުޅުމަށް ކަން ޤަބޫލު ކުރެވޭ އިންސާނާ، އޭނާ އުފެއްދެވި ފަރާތުން، އޭނާއަށް މަގު ދައްކަވައި ނުދެއްވާނެކަމަށް ބަލައިގަތުމަކީ ކިހިނެއް ވާނެ ކަމެއް ހެއްޔެވެ ؟ މި ދުނިޔެއަށް، އިންސާނާ ފޮނުއްވުނީ ކީއްވެގެން، ކޮން ކަމަކު ކަން ނުއަންގަވައި، އަދި މި ފަނާވަނިވި ދުނިޔޭގައި އޭނާ އަދާކުރަން ޖެހޭ ވާޖިބާއި މަސްއޫލިއްޔަތު ނުއަންގަވައި އޭނާ މި ދުނިޔެއަށް ފޮނުއްވާނެ ހެއްޔެވެ ؟ އަދި އޭނާގެ މަންޒިލް މަޤްޞޫދަކީ ކޮބައިކަމާއި، މިފަނާވަނިވި ދުނިޔެއިން ނުކުމެދާ ހިނދު، ދެން ވާނެގޮތް ނުއަންގަވައި ދޫކޮށްލައްވާނެ ހެއްޔެވެ ؟ ޢާންމު އިންސާނަކު، މި ދުނިޔޭގައި ދިރިއުޅުމުގައި، އެހެން މީހަކު ތަނަކަށް ފޮނުވާ ހިނދު، ދަތުރަކަށް ފަށާ ހިނދު، އެ ދަތުރުގެ ބޭނުމަކީ ކޮބައިކަމާއި، އޭނާ ފުރިހަމަ ކުރަން ޖެހެނީ ކޮންކަމެއްކަން، އެނާގެ ވާޖިބާއި މަސްއޫލިއްޔަތަކީ ކޮބައިކަން، އަދި އެ ދަތުރު ނިންމާފަ އެނބުރި އައުމުން، އޭނާއަށް ލިބޭނީ ކޮން އެއްޗެއްކަން ނުއަންގައި، ތަނަކަށް ފޮނުވާނެ ހެއްޔެވެ ؟ ނުފޮނުވާނެކަން ކަށަވަރެވެ.
أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقًا فَفَتَقْنَاهُمَا وَجَعَلْنَا مِنَ الْمَاءِ كُلَّ شَيْءٍ حَيٍّ أَفَلَا يُؤْمِنُونَ
ހަމަކަށަވަރުން، އުޑުތަކާއި ބިން، އެކަތިގަނޑަކަށް ވެފައި ވަނިކޮށް، ފަހެ، ތިމަން ކަލާނގެ އެދޭތި ވަކިކޮށްލެއްވިކަން، ކާފަރުވި މީހުން ނުދަންނަނީ ހެއްޔެވެ ؟ އަދި ތިމަން ކަލާނގެ، ދިރޭ ކޮންމެ އެއްޗެއް، ފެނުން ހެއްދެވީމެވެ. ފަހެ، އެއުރެން، އީމާން ނުވަނީ ހެއްޔެވެ ؟ ( އަންބިޔާއު : 30 )
ޢާލަމްތައް ހައްދަވައި، އިންސާނުން ޚަލްޤު ކުރައްވައި، ބިމާއި އުޑުތައް ހަދުވަހުގެ ތެރޭގައި އުފައްދަވައި، މި ދުނިޔޭގެ އެންމެހައި ކަންކަން، އެކަލާނގެ ޔަދުޤުދުރަތްފުޅުގެ ދަށުން ހިނގަމުން އަންނަ މަތިވެރި ﷲ، އިންސާނާ މިބިން މައްޗަށް ފޮނުއްވުމަށްފަހު، އޭނާ އުޅެންވީ ގޮތް އަންގަވައި، އަދި އެނބުރި އެކަލާނގެ ޙަޟްރަތަށް ރުޖޫޢަ ވުމުން، އޭނާއަށް އޮތީ ކޮން އެއްޗެއްކަން ނުއަންގަވައި ދޫކޮށްލައްވަފާނެކަމަށް ހިތަށް އެރުމަކީ، ބުއްދީގެ ހަމަތަކުން ޤަބޫލު ކުރެވޭވަރުގެ ކަމެއްނޫނެވެ. އިންސާނާއަށް، އޭނާ އުޅެންވީ ގޮތާއި ނޫޅެންވީގޮތް، ﷲ އަންގަވަނީ، އެކަލާނގެ ވަޙީގެ ބަސްފުޅުންނެވެ. އިންސާނުންގެ ތެރެއިން، އެކަލާނގެ އިޚްތިޔާރު ކުރައްވާ، ރަސޫލު ބޭކަލުންނާއި ނަބީބޭކަލުން މެދުވެރި ކުރައްވައެވެ. ދީނީގޮތުން، ވަކިގޮތަކަށް ބަލައި، ވަކި ނަޒަރިއަޔާއަކުން، މީސްތަކުން ވިސްނައި ފިކުރުކުރުން އެއްކިބާކޮށް، ދުނިޔަވީ ހަމަތަކުންނާއި ދުނިޔެ ހިނގާގޮތާމެދު، ވިސްނައި ފިކުރު ކޮށްލުމުންވެސް، މިއީ ސަލާމަތް ބުއްދިއަށް ދާދި ފަސޭހައިން ޤަބޫލު ކުރެވޭނެ ފަދަ، ސާފު، ތެދު ޙަޤީޤަތެކެވެ. ކީރިތި ﷲ ގެ އެއްކައުވަންތަ ކަމާއި، ކުޅަދުންވަންތަކަމާ އަދި އިންސާނާ ޚަލްޤު ކުރައްވާ މިދުނިޔެމައްޗަށް ފޮނުއްވުމުގެ ސިއްރާއި ސަބަބާމެދު، އިތުރު ބަހުސަކަށް، އެއިންސާނާގެ ހަމަބުއްދި ތަންދޭ ކަމެއް ނޫނެވެ.
لَقَدْ أَرْسَلْنَا رُسُلَنَا بِالْبَيِّنَاتِ وَأَنْزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ وَأَنْزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ وَلِيَعْلَمَ اللَّهُ مَنْ يَنْصُرُهُ وَرُسُلَهُ بِالْغَيْبِ إِنَّ اللَّهَ قَوِيٌّ عَزِيزٌ
ހަމަކަށަވަރުން، ފާޅުވެގެންވާ ހެކިތަކާއެކު، ތިމަން ކަލާނގެ، ރަސޫލުން ފޮނުއްވީމެވެ. އަދި އެރަސޫލުންނާއެކު، ފޮތާއި ޢަދުލު އިންސާފުގެ ތިލަފަތް ބާވައި ލެއްވީމެވެ. (އެއީ) މީސްތަކުން ޢަދުލު އިންޞާފު ޤާއިމް ކުރުމަށްޓަކައެވެ. އަދި ތިމަން ކަލާނގެ، ދަގަނޑު ބާވައި ލެއްވީމެވެ. އޭގައި، ނުހަނު ގަދަފަދަ ކަމާއި، މީސްތަކުންނަށް މަންފާ ތަކެއް ވެއެވެ. އަދި އެއީ، ނުފެންނަ ތާނގައި، ﷲ އާއި އެކަލާނގެ ރަސޫލުންނަށް، ނަޞްރު ދެނީ ކާކުކަން، ﷲ ދެނެވޮޑިގެންވެ، އެކަން އެންގެވުމަށްޓަކައެވެ. ހަމަކަށަވަރުން، ﷲ އީ، ބާރުވެރި ވަންތަ، ޢަޒީޒު ވަންތަ މާތް ކަލާނގެއެވެ. (ޙަދީދު : 25)
ﷲ ގެ ވަޙީ ބަސްފުޅު، އެއްކޮށް ހުއްޓި، އެކަން ނިމުމަކަށް އައީ، ރަސޫލުކަމާއި ނަބީކަން ޚަތިމު ކުރެއްވި، މި އުއްމަތުގެ މާތް ނަބިއްޔާ މުޙަންމަދު ގެ ފާނަށް ބާވައި ލައްވައި ފުރިހަމަ ކުރެއްވި، ކީރިތި ޤުރުއާނުގެ ބަސްވަޙީ ފުރިހަމަކުރައްވައި ނިމުމާ ހިސާބުންނެވެ.
ކީރިތި ޤުރުއާނުގައި ﷲ ވަޙީ ކުރައްވާފައި ވެއެވެ.
وَأَنْزَلْنَا إِلَيْكَ الْكِتَابَ بِالْحَقِّ مُصَدِّقًا لِمَا بَيْنَ يَدَيْهِ مِنَ الْكِتَابِ وَمُهَيْمِنًا عَلَيْهِ فَاحْكُمْ بَيْنَهُمْ بِمَا أَنْزَلَ اللَّهُ وَلَا تَتَّبِعْ أَهْوَاءَهُمْ عَمَّا جَاءَكَ مِنَ الْحَقِّ لِكُلٍّ جَعَلْنَا مِنْكُمْ شِرْعَةً وَمِنْهَاجًا وَلَوْ شَاءَ اللَّهُ لَجَعَلَكُمْ أُمَّةً وَاحِدَةً وَلَكِنْ لِيَبْلُوَكُمْ فِي مَا آتَاكُمْ فَاسْتَبِقُوا الْخَيْرَاتِ إِلَى اللَّهِ مَرْجِعُكُمْ جَمِيعًا فَيُنَبِّئُكُمْ بِمَا كُنْتُمْ فِيهِ تَخْتَلِفُونَ
އަދި، ތިމަން ﷲ، ޙައްޤު ގޮތުގައި، ކަލޭގެފާނަށް ފޮތް ( ޤުރުއާން ) ބާވައި ލެއްވީމެވެ. އޭގެކުރިން ބާވައިލެއްވި ފޮތްތަކުގައިވާ ތަކެތި ތެދު ކުރަނިވި ގޮތުގައެވެ. އަދި، އެފޮތްތަކުގެ މައްޗަށް ހެކިވަނިވި ފޮތެއް ކަމުގައެވެ. ފަހެ، ﷲ ބާވައި ލައްވާފައިވާ ޙުކުމުން، އެއުރެންގެ މެދުގައި، ކަލޭގެފާނު ޙުކުމް ކުރައްވާށެވެ ! އަދި، ކަލޭގެފާނުގެ އަރިހަށް އައިސްފައިވާ ޙައްޤު ގޮތާ ޚިލާފަށް، އެއުރެންގެ އެދުންތަކަށް، ކަލޭގެފާނު ތަބާވެ ވަޑައި ނުގަންނަވާށެވެ ! ތިޔަބައިމީހުންގެ ތެރެއިން ކޮންމެ ބަޔަކަށްމެ، ޝަރީޢަތަކާއި ފާޅުވެގެންވާ މަގެއް، ތިމަން ﷲ ލެއްވީމެވެ. އަދި، ﷲ އިރާދަ ކުރެއްވިނަމަ، ތިޔަބައިމީހުން، އެއް އުއްމަތެއްކަމުގައި ލައްވައިފީސްކަން ކަށަވަރެވެ. އެހެނެއްކަމަކު، ( ތިޔަބައިމީހުން އުއްމަތް ތަކަކަށް ބައިބައި ކުރެއްވީ ) ތިޔަބައިމީހުންނަށް ދެއްވި ޝަރީޢަތްތަކާމެދު، ތިޔަބައިމީހުން އިމްތިޙާން ކުރެއްވުމަށްޓަކައެވެ. ފަހެ، ހެޔޮ ކަންތަކަށް ތިޔަބައިމީހުން ވާދަ ކުރާށެވެ ! ތިޔަބައިމީހުން އެންމެން، ރުޖޫޢަވުން އޮތީ، ﷲ ގެ ޙަޟްރަތަށެވެ. އޭރުން، ތިޔަބައިމީހުން އެކަންކަމާމެދު ޚިލާފުވެ އުޅުނު ކަންތަކުގެ ޚަބަރު، ތިޔަބައިމީހުންނަށް އެކަލާނގެ އަންގަވާނެތެވެ. ( މާއިދަތު : 48 )
(ނުނިމޭ)
