(1 އޮކްޓޯބަރު 2021 ގައި ޝާއިއުކުރި ބަޔާ ގުޅޭ)
ﷲ، މި އިސްމު ފުޅަކީ، އެއާ އެއްފަދަ އެހެން އެއްވެސް އެއްޗެއްނުވާ، މުޅި ކާއިނާތާއި ޢާލަމްތަކާއި، ޚަލްޤުތަކުން، އުފެއްދެވި ފަރާތަށް، އަދި އެ އެންމެހައި ތަކެތީގެ ދިރުމާއި ހުރުމާ އަދި އުޅުމާއި ނެތިދިއުން، މިލްކުވެ ވޮޑިގެންވާ މަތިވެރި، ޙަޟުރަތަށް ނިސްބަތްވެގެންވާ މަތިވެރި ނަންފުޅެވެ. އެއީ ހަމައެކަނި އެކަލާނގެއަށް ޚާއްޞަ ވެގެންވާ ނަންފުޅެވެ. ﷲ، އެއީ ޢަރަބި ބަހެކެވެ. އެބަހުގެ ލަފުޒީ މާނަޔަކީ، އަޅުކަންކުރުން ޙައްޤު ވެގެންވާ އަޞްލު ފަރާތެވެ. މިބަހުގެ މާނަ ނުވަތަ އެއާ އެއްފަދަ އެހެން ބަހެއް، ދުނިޔޭގައި މީސްތަކުން ވާހަކަ ދައްކައި އުޅޭ އެހެން ބަސްބަހުން ހޯދުމަކީ އުނދަގޫ ކަމެކެވެ. އުރުދޫ ބަހުން ބޭނުން ކުރެވޭ " ޚުދާ " އަދި އިނގިރޭސި ބަހުގައި ބޭނުންކުރެވޭ " ގޯޑް " މާނަކުރެވެނީ ދުނިޔެ އުފެއްދެވި ފަރާތަށެވެ. އެއީ އެ އެނަމާ ގުޅުވައިގެން، އެއްކައުވަންތަކަން ނުހިމަނައެވެ. " ގޯޑް " މިބަސް، އެތައް " ދޭވީ " އަކަށާއި " ދޭވަތާ " އަކަށް ނިސްބަތް ކުރެވެއެވެ. އަދި އޭގެ އަންހެން ވައްތަރަށް " ގޯޑެސް " ބޭނުން ކުރެވިގެން މެއެވެ. އިންޑިއާގައި ބޭނުންކުރެވޭ ދެބަހެއްކަމުގައިވާ، މަރާތީ އާއި ހިންދީ ބަހުގައި، " އިޝްވަރު " އަދި " ޕަރަމޭޝްވަރު " މާނަކުރެވިގެންދަނީ މަތިވެރި ކަމާއި އިޙްތިރާމުގެ ގޮތުގައެވެ. " އިޝް " ގެ މާނަޔަކީ، ކަލާނގެ ނުވަތަ އެންމެ އިސް ފަރާތެވެ. " ވަރު " ގެ މާނަޔަކީ، މަތިވެރި އެވެ. " އިޝްވަރު " ގެ މާނަޔަކީ، މަތިވެރި ކަލާނގެ އެވެ. އޭގެ އަންހެން ވައްތަރަށް ކިޔެނީ، " އިޝްވަރީ " އެވެ. އަދި މިބަސް މާނަކުރެވެނީ އަންހެން ކަލާނގެއަށެވެ. " ޕަރަމްގެ މާނަޔަކީ ރޫޙާނީއެވެ. ޕަރަމޭޝްވަރު " ގެ މާނަޔަކީ، " ރޫޙާނީ އިޝްވަރު " އެވެ.
މި ބަސްތަކަށް ބަލާއިރު، އެ ބަސްބަސް މާނަކުރެވެމުންދަނީ، ދުނިޔެ އުފެއްދެވި ފަރާތްކަމަށް ބަލައިގެން، އެފަރާތަށް ކަމަށްވިޔަސް، އެއްކައުވަންތަކަން މިއިން އެއްވެސް ބަހަކުން މާނަކޮށެއް ނުދެއެވެ. އަދި ހަމައެކަނި އެނަމެއް، އެފަރާތަކަށް ޚާއްޞަވެގެންވާކަންވެސް ދޭހަވެގެންނެއް ނުދެއެވެ. މިނަންނަން ބޭނުން ކުރެވެމުން އެދަނީ އެކިއެކި ކަލާނގެތަކަށެވެ. އޭގެ އަންހެން ވައްތަރުވެސް ހިމެނިގެންނެވެ.
" ބަގުވާން " މިނަންވެސް ބޭނުން ކުރެވެމުން އެދަނީ، ދުނިޔެ އުފެއްދެވި ފަރާތް ކަމަށް ބަލައިގެން އެފަރާތަށް އެކަންޏެއް ނޫނެވެ. އެއީ އެއްކައުވަންތަ ކަލާނގެއެއް ނޫނެވެ. އެހެނީ " ބަގުވާން ވަސުދޭވާ " އާއި " ޝިވާ " އަދި " ވިޝްނޫ " އަށްވެސް މުޚާތަބު ކުރެވެނީ " ބަގުވާން " ގެ ނަމުންނެވެ.
އިންޑިއާގައި އެކަނިވެސް، ސާޅީސް އެތައް ދީނެއް އޮވެއެވެ. އެތައް ވައްތަރެއްގެ އެތައް ކަލާނގެއަކަށް މީހުން ތަބާވެއެވެ. އެންމެ ކަލާނގެއެއް ފިޔަވައި، އެތައް ކަލާނގެއަކަށް މިދުނިޔެ ދައުރުވުމުގެ ބާރު ލިބިފައިވާނަމަ، އެކި ދުވަހު އިރު އަރާނީ އެކި ގަޑިއަށް އެކި ފަރާތުންނެވެ. އިރު ނާރާ ދުވސްވެސް ހިނގައިދާނެއެވެ. އިރު އަރައިފިނަމަ އޮއްސޭނީވެސް އެކި ދުވަހު، އެކި ދިމާލަށް އެކި ގަޑިތަކުގައެވެ. ދުނިޔޭގައި މިހާރު އުފެދިފައި މިއޮތް ސިޔާސީ ވާދަވެރިކަމާ އެއްގޮތަށް، ކަލާނގެ ތަކުގެ މެދުގައި ދީނީ ވާދަވެރިކަން އުފެދި ދުނިޔެ އެއްގޮތަކަށް ދައުރުވެ ހިނގުމަށް ހުރަސް ނޭޅިއެއް ނުދާނެއެވެ. މި ފަނާވަނިވި ދުނިޔޭގައިވާ ކޮންމެ އެއްޗަކީ، ނެތި ފަނާވެދާނެ އެއްޗެކެވެ. ދިރުން ދެއްވައި، ފުރާނަ އެޅުއްވި ކޮންމެ އެއްޗަކީ މަރުވެދާނެ އެއްޗެކެވެ. އެ ހުރިހާ ކަންކަމެއްގެ ބާރާއި ކުޅަދުންވަންތަކަން ލިބިވޮޑިގެންވަނީ ހަމައެކަނި ﷲ އަށެވެ. ނާމާން، ބިރުވެރި އެކި ސިފަސިފައިގާ، ކަލާނގެތަކެއްކަމަށް ކާފަރުން ބަލާ ބުދުތަކަށް، ކުރެވޭނީ ކޮންކަމެއް ހެއްޔެވެ. ޚަލްޤު ކުރެވޭނީ އަދި މަރު ގެންނެވޭނީ ކޮންގޮތަކަށް ކިހިނެއް ހެއްޔެވެ. އެހުރިހާ ކަލާނގެތައް އެކަން ކުރަންވެއްޖެ ނަމަ، މުޅި ދުނިޔެ އޮންނާނީ ނިޒާމުން ބޭރުގައެވެ. ދުނިޔޭގެ ކަންކަން އެއްގޮތަކަށް ނުހިނގާނެއެވެ.
ﷲ އެއީ، ކޮން ކަހަލަ ކޮން ފަރާތެއްކަމާއި، ﷲ ގެ ބާރުފުޅު، އަދި ކުޅަދުންވަންތަ ކަމާއި، އެއްކައުވަންތަ ކަމާ، އަދި ހުސް ޠާހިރުވަންތަކަން ބަޔާން ކުރައްވައި، ތަފްޞީލު ކޮށް ދެއްވުމަށް، އެންމެ ގިނަ އާޔަތް ބާވައިލައްވާފައިވަނީ، ކީރިތި ޤުރުއާން ބާވައިލައްވަން ފެއްޓެވުމުގެ ކުރީ ކޮޅުގައެވެ. އެއީ، ޝަރީކު ކުރުމާއި ޖާހިލުކަން އިންތިހާއަށް ގޮސް، ޖަހާލަތުގެ ކަނު އަނދިރީގައި ޣާފިލުވެ، ގަދަ ނިދިން ނިދާފއި ތިބި، މައްކާގެ މުޝްރިކުންނަށް، ވިސްނައިގަންނަން އުނދަގޫ، އަދި ޤަބޫލުކުރަން ދަތި ކަމަކަށް ވާތީއެވެ. ކީރިތި ﷲ ގެ ޒާތުފުޅާ ގުޅިފައިވާ، އެންމެ ގިނަ އާޔަތް ހިމެނިފައިވަނީ ވެސް، ކީރިތި ޤުރުއާނުގެ ދެވަނަ ސޫރަތް ކަމުގައިވާ، ސޫރަތުލްބަޤަރާ ގައެވެ.
ކީރިތި ޤުރުއާނުގައި އައިސްފައިވާ " ﷲ " މިނަންފުޅު ހަމައެކަނި ނިސްބަތްވަނީ، މި ކާއިނާތު ތަކާއި ޢާލަމްތައް އަދި ޚަލްޤު ތައް އުފެއްދެވި މަތިވެރި ހުސްޠާހިރު ވަންތަ، އަދި އެއްކައުވަންތަ ފަރާތަށެވެ. އެއީ އެއްވެސް ޝައްކެއްނެތި، އަދި އެއްވެސް އޮޅުމެއްނެތި ސާފުވާން އޮތް ތެދު ޙަޤީޤަތެކެވެ. ކީރިތި ޤުރުއާނުގެ ތަރުޖަމާ ތަކުގައިވެސް، ﷲ، މިނަންފުޅު، އެގޮތުގައި ބޭނުން ކުރެވެމުން އެދަނީ، ދުނިޔޭގައި ލެއްވި އެންމެހައި މާދަރީ ބަސްތަކުގައި އެ ނަންފުޅުގެ ބަދަލުގައި ބޭނުންކުރާނެ، އަދި އެނަންފުޅު ސާފުކޮށް، ދޭހަކޮށްދޭނެ ދެވަނަ ނަންފުޅެއް އަދި މާނައެއް ފެންނަން ނެތީމައެވެ.
މި ނުކުތާގައި މިފޮތް ލިޔުމުގައި، ދިވެހިބަހުގައި، ކީރިތި ﷲ އަށް ނިސްބަތްކޮށް، ދިވެހި ބަހުގައި ބޭނުން ކުރެވޭ ބައެއްގޮތްގޮތުގެ މައްޗަށް، ވަރަށް ސާބިތުކަމާއެކު، ފުންކޮށް ވިސްނައި ފިކުރު ހިންގީމެވެ. ދިވެހި ބަހުގައި، ﷲ އަށް ނިސްބަތްކޮށް، އެކި ގޮތްގޮތަށް ބޭނުން ކުރެވެމުން ދެއެވެ. ކީރިތި ﷲ، ﷲ ސުބުޙާނަހޫ ވަތަޢާލާ، ހެއްދެވި ފަރާތް، ހައްދަވައި ގެންގުޅުއްވާ އިލާހު، މާތް ކަލާނގެ، މާތްރަސްކަލާނގެ، ހައްދަވައި ބޮޑު ކުރެއްވި ﷲ، ރައްބު، އަދި މިނޫންވެސް ބައެއް ނަންނަން ބޭނުން ކުރެވެއެވެ. މިއިން ކޮންމެ ނަންފުޅެއްވެސް ދިވެހިބަހުގައި ނިސްބަތްވަނީ ކީރިތި ﷲ އަށެވެ. ﷲ ސުބުޙާނަހޫ ވަތަޢާލާ އަށެވެ. ހެއްދެވި ފަރާތަށެވެ. ހައްދަވައި ބޮޑު ކުރެއްވި ﷲ އަށެވެ. " މާތްރަސްކަލާނގެ " މިނަންފުޅު ނުވަތަ މިބަސް މިއީ، ވަރަށްގިނަ ދިވެހި ތަރުޖަމާގައި، ﷲ އަށް ނިސްބަތްކުރައްވައި، ދިވެހި، ދީނީ ޢިލްމުވެރިން ބޭނުން ކުރައްވާފައިވާ ނަންފުޅެކެވެ. އެވޭލާ ޒަމާނުއްސުރެ، މާތް ރަސްކަލާނގެ، ދިވެހިން ނިސްބަތް ކުރަނީ ﷲ އަށެވެ. އެއީ ދިވެހި ބަހުން ﷲ ގެ ލަފުޒީ މާނަ ނޫންކަމަށްވެސް ވެދާނެއެވެ. ނުވަތަ ލަފުޒީ ނޫން މާނައެއް ކަމަށްވެސް ވެދާނެއެވެ. އެއީ، ﷲ ގެ މަތިވެރި ދަރުބާރުގައި، ﷲ، ރަސްކަލަކަށް ނުވަތަ ރަސްކަލާނގެޔަކަށްވެފައި، ބޮޑުވަޒީރާއި އެހެނިހެން ވަޒީރުން، ނުވަތަ އެހެނިހެން ކަލާނގެތައް ބައިވެރި ކުރެވި، އެދަރުބާރުގައި ޝާމިލުކުރެވި، އޭގެ ތެރެއިން ﷲ އީ، ރަސްކަލެއް ކަމަށް ބަލައިގެން، ބޭނުންކުރެވޭ ގޮތެއް ނޫނެވެ.
އަޅުގަނޑުގެ ނަޒަރުގައި، ﷲ އަށް ނިސްބަތްކޮށް، ﷲ ގެ މާނަ ދެނެގަތުމުގައި، އެކަލާނގެ މަތިވެރިކަން އިޙުސާސް ކޮށްގަތުމުގައި، " މާތް، ރަސް، ކަލާނގެ " މާނަކުރުމަށް، މާތް، މަސްއަލައެއް ނެތެވެ. ކަލާނގެ ވެސް މައްސަލައެއް ނެތެވެ. އެހެނަސް " ރަސް " ކަލާނގެ، ﷲ އަށް ނިސްބަތްކޮށް މާނަކުރުމުގައި، އަޅުގަނޑުގެ އަމިއްލަ ޒަމީރު އެއްބަހެއް ނުވެއެވެ. އެހެނީ ރަސް ކަލާނގެ ލަފުޒީގޮތުން މާނަ ކުރެވިދާނެ ގޮތްގޮތަށް ބަލާއިރު، ވަޒީރު ކަލާނގެ، ނުވަތަ އެހެންވެސް ކަލާނގެތައް އެނަމާ ގުޅިގެން، ﷲ ގެ ބައިވެރިންގެ ގޮތުގައި ވިސްނުމަށް މަގުފަހިވެ ދިއުމީ، ބަސް އުފެދިފައި އޮންނަގޮތުން މުސްތަޙީލު ކަމެއްނޫނެވެ. އެހެން ކަމަށް ވާއިރު، އެއްކައުވަންތަ ﷲ ގެ އެއްކައުވަންތަކަން، ބަހުގެ ގޮތުން ގެއްލިގެން ހިނގައިދާނެ ފުރުޞަތު ކޮންމެވެސް ސިފައެއްގައި އެބަ އޮތެވެ.
އަޅުގަނޑުމެން، މުސްލިމުން މިތިބީ، ކީރިތި ޤުރުއާނުގައި، އެހެން ކަލާނގެތަކެއްގެ ވާހަކަ އައިސްފައި އޮވެމެ، އެންމެ ކަލަކު ވޮޑިގެންވާކަން، ﷲ ގެ ބަސްވަޙީން ސާބިތުވެ ކަށަވަރުވާތީ، މީސްތަކުން ގެންގުޅޭ އެހެން ކަލާނގެތައް ދޫކޮށްލައި، ޝިރުކު ކުރުމުން އެއްކިބާވެ، އަޅުގަނޑުމެންގެ ކަލާނގެއަކީ ހަމައެކަނި ﷲ ކަމާއި، ﷲ ގެ އެއްކައުވަންތަ ކަމާއި، އެކަލާނގެ ވޮޑިގެންވާކަމަށް ހެކިވެ، ޝައްކަކާނުލައި ހިތުގެ އަޑިން ޤަބޫލުކޮށް، ﷲ އަށް އީމާން ވެގެންނެވެ.
މި ސަބަބަށްޓަކައި، އަޅުގަނޑު، މި ފޮތް ލިޔުމުގައި، " މާތް ރަސްކަލާނގެ " އެއްވެސް ގޮތަކަށް ބޭނުން ކޮށްފައެއް ނުވާނެއެވެ. އެއީ ބަހުގެ ގޮތުންވެސް، ކީރިތި ﷲ އާ ބައިވެރި ކުރުވިދާނެ އެއްވެސް އެއްޗަކަށް، ނަމަކަށް އަދި ކަމަކަށް ޖާގަ ނުދިނުމުގެ ނިޔަތުގައެވެ. އެކަލާނގެއަށް އެއްވެސް ސިފައެއްގައި، އެއްވެސް ޙާލެއްގައި، އެއްވެސް ގޮތަކަށް، ބައިވެރިޔަކު ނުވެއެވެ. އެއީ އެއްކައުވަންތަ، ހުސް ޠާހިރުވަންތަ ﷲ އެވެ. ﷲ އަށް ނިސްބަތްކޮށް، މިފޮތުގައި ބޭނުން ކުރެވިފައި ވާނީ، ﷲ، ﷲ ސުބުޙާނަހޫ ވަތަޢާލާ، އަދި، ކަލާނގެ އެވެ. އަދި ނަން އިތުރުގެ ގޮތުގައި، މަތިވެރިވަންތަ، މާތް، ގަދަކީރިތިވަންތަ، ކުޅަދުންވަންތަ، އެއްކައުވަންތަ، ހުސް ޠާތިރުވަންތަ، މިފަދަ ގޮތްގޮތަށް ބޭނުންކުރެވިފައި ވާނެއެވެ. ކުރިން ދެންނެވުނު ގޮތަށް، " މާތް ރަސްކަލާނގެ "، ﷲ އަށް ނިސްބަތްކުރުމުން، ބަހުގެ ގޮތުންވެސް އަދި އަދަބީ ގޮތުންވެސް، ކުޑަކޮށްވެސް، މާނަ އަރާރުންވެ، އެއްވެސް ޙާލަތެއްގައި، އަދި އެއްވެސް ޒަމާނެއްގައި، އެއްވެސް ވަރަކަށް، އެއްވެސްގޮތަކަށް، ﷲ ގެ އެއްކައުވަންތަ ކަމާމެދުގައި ، އަޅުގަނޑުމެން، އެއްވެސް މީހެއްގެ ހިތުގައި، ޝައްކެއް، ވަސްވާހެއް އަދި ވަހުމެއް ނުއުފެދޭނެކަން ކަށަވަރު ކުރުމަށްޓަކައެވެ. ވަﷲ އަޢުލަމް.
ﷲ ގެ އިސްމުފުޅު، ނުވަތަ ﷲ އަށް ނިސްބަތްކޮށް ބޭނުން ކުރެވޭ ކަލިމަފުޅާއި ނަންފުޅު، ދެހާސް ހަސަތޭކަ ނުވަދިހަ ހަތް ފަހަރު، ކީރިތި ޤުރުއާނުގައި، އައިސްފައި ވެއެވެ. ﷲ ގެ އިސްފުޅުގެ ބަރަކާތާއި، އެ އިސްމުފުޅު ތަފްޞީލުކޮށްދެއްވުމުގައި، އަދި އެއިސްމުފުޅުގެ އަޞްލު މާނަ ދެނެގަނެ އިޙުސާސް ކުރުމުގައި، ﷲ ގެ ވަޙީ ބަސްފުޅުން، ކީރިތި ޤުރުއާނުގައި ސަމާލުކަން ދެވިފައިވާ މިންވަރު ވަޒަން ކުރެވިގެން ދެއެވެ.
" ރައްބު " މިބަހަކީ، ލިޔެ ކިއުމުގައި ބޭނުން ކުރެވޭ ބަހެކެވެ. މި ބަހުގެ މާނަޔަކީ، " އުފައްދަވާ، ބައްލަވާ ވޮޑިގެންވާ، މަތިވެރި ކަލާނގެ " އެވެ. އެހެންކަމުން، ﷲ އީ ހަމައެކަނި ދުނިޔެ ހެއްދެވި ފަރާތް އެކަންޏެއް ނޫނެވެ. އެއީ، ދުނިޔެ އުފައްދަވައި، ދުނިޔޭގެ އެންމެހައި ކަންކަން ތަރުތީބު ކުރައްވައި، އެކަންކަން މޮޅަށް ބައްލަވާ ވޮޑިގެންވާ، އަދި ދުނިޔޭގެ އެންމެހައި ތަކެތި މިލްކުވެ ވޮޑިގެންވާ، މަތިވެރި ފަރާތެވެ. ދުނިޔޭގެ އެންމެހައި ކަންކަމުގެ ބާރު ލިބިވޮޑިގެންވަނީ ﷲ އަށެވެ. އެއީ، އެ ހުރިހައި ކަމެއް ހިންގެވުމުގެ ބާރު ލިބިވޮޑިގެންވާ ކުޅަދުންވަންތަ ﷲ އެވެ. އެކަލާނގެ ކުޅަދުންވަންތަކަން ފެތުރިގެންވަނީ ހަމައެކަނި މި ފަނާވަނިވި ދުނިޔޭގެ މައްޗަށް އެކަންޏެއް ނޫނެވެ. އެންމެހައި އުޑުތަކާއި ތަރިތަކުގެ މަތީގައިވާ ޢާލަމްތަކަށް އެކަލާނގެ ކުޅަދުންވަންތަކަން ފޯރުވިގެން ވެއެވެ. އެއީ އެންމެހައި ޢާލަމްތަކާއި ޚަލްޤުތަކުން އުފެއްދެވި މަތިވެރި ﷲ އެވެ.
ކީރިތި ޤުރުއާނުގެ އަލްޙަޝްރު ސޫރަތުގައި ﷲ ވަޙީ ކުރައްވާފައި ވެއެވެ.
هُوَ اللَّهُ الَّذِي لَا إِلَهَ إِلَّا هُوَ عَالِمُ الْغَيْبِ وَالشَّهَادَةِ هُوَ الرَّحْمَنُ الرَّحِيمُ ۞ هُوَ اللَّهُ الَّذِي لَا إِلَهَ إِلَّا هُوَ الْمَلِكُ الْقُدُّوسُ السَّلَامُ الْمُؤْمِنُ الْمُهَيْمِنُ الْعَزِيزُ الْجَبَّارُ الْمُتَكَبِّرُ سُبْحَانَ اللَّهِ عَمَّا يُشْرِكُونَ ۞ هُوَ اللَّهُ الْخَالِقُ الْبَارِئُ الْمُصَوِّرُ لَهُ الْأَسْمَاءُ الْحُسْنَى يُسَبِّحُ لَهُ مَا فِي السَّمَاوَاتِ وَالْأَرْضِ وَهُوَ الْعَزِيزُ الْحَكِيمُ ۞
އެކަލާނގެއީ ﷲ އެވެ. އެކަލާނގެއީ، އެކަލާނގެ މެނުވީ އެހެން އިލާހަކު ނުވާ މަތިވެރި ކަލާނގެއެވެ. ނުފެންނަ ކަންތަކާއި، ފެންނަ ކަންތައް ދެނެވޮޑިގެންވާ މަތިވެރި ކަލާނގެއެވެ. އެކަލާނގެއީ ރަޙުމާނު ވަންތަ، ރަޙީމު ވަންތަ މަތިވެރި ކަލާނގެއެވެ. އެކަލާނގެއީ ﷲ އެވެ. އެކަލާނގެއީ، އެކަލާނގެ މެނުވީ އިލާހަކު ނުވާ، މަތިވެރި ކަލާނގެއެވެ. އެއްކައުވަންތަ، މަތިވެރި ކަލާނގެއެވެ. ޠާހިރުވަންތަ، މަތިވެރި ކަލާނގެއެވެ. ހުރިހައި އުނިކަމަކުން ހުސްދުރުވެ ވޮޑިގެންވާ، މަތިވެރި ކަލާނގެއެވެ. އަމާންކަން ދެއްވާ، މަތިވެރި ކަލާނގެއެވެ. ހުރިހައި އެއްޗެއް ރައްކާތެރި ކުރައްވައި ބަލަހައްޓަވާ، މަތިވެރި ކަލާނގެއެވެ. ޖައްބާރު ވަންތަ، މަތިވެރި ކަލާނގެއެވެ. ޢަޟްމަތް ތެރި ވަންތަ، މަތިވެރި ކަލާނގެއެވެ. އެއުރެން ޝަރީކުކުރާ ތަކެތިން، ﷲ ހުސް ޠާހިރު ވަންތަވެ ވޮޑިގެން ވެއެވެ. އެކަލާނގެއީ ﷲ އެވެ. ހުރިހައި އެއްޗެއް ހައްދަވާ، މަތިވެރި ކަލާނގެއެވެ. ހުރިހައި އެއްޗެއް އުފައްދަވާ، މަތިވެރި ކަލާނގެއެވެ. ޞޫރަ ކުރައްވާ، މަތިވެރި ކަލާނގެއެވެ. އެންމެހައި ރިވެތި ނަންފުޅުތައް މިލްކުވެ ވޮޑިގެންވަނީ އެކަލާނގެ އަށެވެ. އުޑުތަކާއި ބިމުގައި ވާހައި ތަކެއްޗެއް، އެކަލާނގެއަށް ތަސްބީޙަ ދަންނަވަތެވެ. އަދި އެކަލާނގެއީ ޢަޒީޒު ވަންތަ، ޙަކީމުވަންތަ މަތިވެރި ކަލާނގެއެވެ. (الحشر: 22-24)
(ނުނިމޭ)
