މިފޮތް
بسم اللّه الرّحمن الرّحيم ، نحمد الله تعالى ، ونصلّي ونسلّم على نبيّه الكريم ، وعلى آله الطاّهرين وصحبه أجمعين
اللّـه سبحا نه وتعا لى އަށް ޙަމްދު ކޮށް، އެކަލާނގެ މަތިވެރި އިސްމުފުޅުގެ ބަރަކާތުން ފަށައިގަންނަ ހިނދު، އެބޭކަލެއްގެ އަތްޕުޅު މައްޗަށް، ކީރިތި قران ބާވައި ލެއްވި، މިއުއްމަތުގެ މާތް ނަބިއްޔާ، محمد صلى الله علىه وسلم ގެ މައްޗަށް صلواة ކިޔަވައި، سلام ލެއްވުން އެދި ދުޢާ ކުރަމެވެ. ކީރިތި ﷲ، އެމާތް ނަބިއްޔާގެ މައްޗަށް، سلام އާއި صلواة އާ، رحمة އާއި نعمة އާ، بركات ގެވާރޭ ވެއްސަވާނދޭވެ! އަދި އެކަމުގައި އެކަލޭގެފާނުގެ اهل بية އިންނާއި، އެންމެހައި ال اصحاب އިން ޝާމިލް ކުރައްވާފާނދޭވެ!
اسلامي عقيدة އަކީ، މިފަހަކަށް އައިސް، ގިނަބައެއްގެ ހިތުން ކައްސާލައި، ދުނިޔެ ދައްކަމުންދާ ކުލަތަކަށް، ތިމާމެންގެ އަމިއްލަ نفس ތައް ހެއްލި، ގެއްލި، ދުނިޔަވީ އަމާޒުތަކާއި މާއްދީ ފައިދާތަކުން ކިލަނބުވަމުން، اسلامي ރިވެތި އާދަކާދައާއި މަތިވެރި އުޞޫލުތަކަށް ހިޔަނި އެޅެމުން އަންނަ، މިޞްރާބެއް ނެތް އެއްޗަކަށް ވެގެންދާތަން އެބަ ފެނެއެވެ. އެހެން ނަމަވެސް، ދިވެހި اسلامي މި مجتمع ގައި، اسلامي عقيدة އަކީ ވާނެ އެއްޗެއް ވާން ކުޅި ކުޅިވަރަށް ދޫކޮށްލެވެން އޮތް އެއްޗެއް ނޫންކަން ޤަބޫލުކުރަން އެބަ ޖެހެއެވެ. اسلامي ހަމަތަކާއި އުޞޫލުތަކާ އަދި މުޅި منهج ބިނާވެފައިވަނީ އެ عقيدة ގެ މައްޗަށް ކަމަށްވާތީއެވެ.
ދިވެހި اسلامي مجتمع ގެ ދީނީ عقيدة ބަލިކަށިވެގެންދާންފެށީ، އިއްޔެއަކު އަދި މިއަދަކު ނޫނެވެ. އެކަން އެހެން ދިމާވަމުން ގޮސްފައިވަނީ، މިއަދު ދުނިޔެއަށް އައިސްފައިވާ ޒަމާނީ ކުރިއެރުމާއި، ތަރައްޤީއާއި، މަޢުލޫމާތު ފެތުރުމުގެ ވަޞީލަތްތައް އައުމަކުން އެކަންޏެއްނޫނެވެ. އިންޓަނެޓްގެ ވާހަކަ ދައްކާ އަޑު ނީވެނީއްސުރެ، މީގެ އެތައް އަހަރެއްގެ ކުރިން، ދިވެހި مجتمع ގައި اسلامي عقيدة ބަލިކަށިވަމުންދާތަން އަދި އެކަމަށް މެދުވެރިވަމުން ދިޔަ ސަބަބުތައް، ހަމަ ލޮލަށް ދިޔައީ ފެންނަމުންނެވެ. ޒަމާނާއި ރާއްޖޭގެ ސިޔާސީ މަސްރަޙަށް އައި ބަދަލާއި، ދީނީ ފިކުރަށް، ހައްދުފަހަނަޅައިދިއުމުގެ ހިޔަނިއެޅެން ފެށުމާ ހިސާބުންނެވެ.
اسلامي عقيدة ބަލިކަށިވުމަށް، ދިވެހި އިސްލާމީ މުޖުތަމަޢުގައި، ކަން ހިނގާފައިވާގޮތް އެއީ އެކަންކަމާމެދު ފުންކޮށް ވިސްނާލައިފި މީހަކު، ބިރުން ފިއްކަނޑައިގެންދާވަރުގެ ކަންކަމެވެ. اسلامي مجتمع އެއް ދީނީ ކަންކަމުންނާއި، އިންސާނަކަށްވީތީ ލިބެންޖެހޭ ޙައްޤުތަކުން محروم ކުރެވި، އިހުމާލު ވެވިފައިވާ ދިރިހުރި، ރީތި މިސާލެކެވެ. ވިސްނައި ފިކުރު ކުރާ ބަޔަކަށް އެކަންކަމުން ލިބޭނެ އެތައް ހާސް ފިލާވަޅެއް އެބަހުއްޓެވެ. އެހެންނަމަވެސް ފިލާވަޅު ލިބޭނީ، އެކަންކަމަށް ވިސްނައި ފިކުރު ކުރާ ބަޔަކަށެވެ.
ދިވެހި اسلامي مجتمع ގައި، ދީނީ عقيدة ބަލިކަށިވެ، އިސްލާމީ ރިވެތި އަޚުލާޤު ނެތިވެގޮސް، اجتماعى عدل ގެ ނިޒާމާއި ފޭރާން ވީދި، އަޚުންނާއި އުޚުތުންގެ މެދުގައި އިޙްތިރާމާއި ޤަދަރު ގެއްލި، އަމިއްލަ އެދުމާއި ދުނިޔަވީ ފައިދާ އާއި ލާބަޔަށް، މީސްތަކުންގެ ލޯތައް ހުއްޓި، ޢަމަލުތައް ތަރުތީބުވެގެން ދިއުމަށް މެދުވެރިވި ސަބަބުތައް ވަރަށް ގިނައެވެ.
ތިޔަ ބޭފުޅުން ވިދާޅުވަމުން ތިޔަގެންދަވާ މިފޮތް، علوم القران، ނުވަތަ قران ގެ علم، ނުވަތަ މިޒަމާނުގެ ބަހުން ނަމަ، قران ގެ ސައިންސް ގެ ފުރަތަމަ ފޮތް، އަޅުގަނޑު، އެކުލަވާލާފައި މިވަނީ، ދިވެހި ބަހުންނާއި، އިނގިރޭސި ބަހުން، އަދި އުރުދޫބަހުންނާއި عرب ބަހުން، ލިޔެވިފައިހުރި ކީރިތި قران އާބެހޭ ލިޔުމާއި ފޮތްތައް ކިޔައި، ބަލައި، އެކި އެކި ޢިލްމުވެރިންގެ ދީނީ ދަރުސްތައް އަޑުއަހައި، ވިސްނައި ފިކުރުކޮށް، ވަރަށް ގިނަ ދުވަސްތަކެއްވަންދެން އެއްކުރަމުން އައި މަޢުލޫމާތު ތަކެއްގެ އެހީގައެވެ. މައިގަނޑު ގޮތެއްގައި މުޅި ފޮތް ބިނާވެފައި މިވަނީ، ކީރިތި ޤުރުއާނުގައި އެކި ކަންކަމާ ގުޅިގެން އައިސްފައިވާ އާޔަތްތަކުގެ މައްޗަށެވެ. އަޅުގަނޑަށް ކުރެވުނު ނަމަ ކުރެވިފައި އޮންނާނެހާވެސް ކަމަކީ، އެ އާޔަތްތައް އެކި ކަންކަމާ އަދި އެކި ނަޒަރިއްޔާތާ ގުޅުވައިގެން އެއް ސުރުޚީއެއްގެ ދަށުން ތަރުތީބު ކޮށްލުމެވެ.
ކީރިތި ޤުރުއާނަކީ، އެއާ އެއްފަދަ އެހެން ދެވަނަ އެއްޗެއް ނުވާފަދަ މަތިވެރި، ބަލާޣަތްތެރި ފޮތެކެވެ. ކީރިތި ޤުރުއާނުގެ އާޔަތްތަކުގެ ޙަޤީޤީ މާނަޔަކީ، އޭގައި އެތައް ކަމެއް އަދި ޢިލްމެއް އެކުލެވިގެން، ރަނގަޅަށް އެނގިގެން ނޫނީ އޮޅުން ފިލާވަރަށްވުރެ، ޙިކުމަތްތެރި، ބަލާޣަތްތެރި، މާނަފުން އެއްޗެކެވެ. ކީރިތި ޤުރުއާނުގެ އާޔަތްތަކުގެ ޙަޤީޤީ މާނަ ދެނެގަތުމުގައި ބޭނުން ކުރެވޭ އެންމެ މުހިންމު އަސާސަކީ، ކައު އިތުރު ރަސޫލާ، ޢަރަބީންނަށް، ކީރިތި ޤުރުއާން ތަބްލީޣު ކޮށްދެއްވައި، ބަޔާންކޮށްދެއްވާފައިވާ ގޮތާއި ރަސޫލާގެ ސުންނަތެވެ.
ކީރިތި ޤުރުއާނުގެ ޠާޙާ ސޫރަތުގެ 113 ވަނަ އާޔަތުގައި ﷲ ވަޙީ ކުރައްވާފައ ވެއެވެ. "އެފޮތުގައި، ( އެބަހީ : ކީރިތި قران ގައި ) ތިމަން ﷲ ގެ ވަޢުދުގެ ބަސްފުޅުތައް ތަފްޞީލުކޮށް ބަޔާން ކުރެއްވީމެވެ. ( އެއީ ) އެއުރެން، ބިރުވެތިވެ، ތަޤުވާވެރި ވުމަށްޓަކައެވެ. ނުވަތަ އެއުރެންނަށް ހަނދާން ކޮށްދީ، ޢިބްރަތް ލިބިދިނުމަށެވެ." އެހެންކަމުން، ކީރިތި ﷲ، ތަފްޞީލުކޮށް ބަޔާންކޮށްދެއްވާފައިވާ އެކަލާނގެ ވަޙީ ބަސްފުޅު، އެކިޔާ މީހަކަށް ފަސޭހައިން، ރަނގަޅަށް ދޭހަވާނެގޮތަކަށް އޮތުމަކީ، ވަރަށް މުހިންމު ކަމެކެވެ. އަދި އޭގެ ބޭނުން، އެންމެ ފުރިހަމަ ގޮތުގައި ހިފޭނީވެސް އޭރުންނެވެ.
މި މަސައްކަތް އަޅުގަނޑު މިކުރީ، اسلامي عقيدة ހަރުދަނާކޮށް، އަޅުގަނޑުމެންގެ ޅަދަރީންނާއި ކިޔަވާ ކުދިންނަށް ދީނީ ގޮތުން ކޮންމެހެން އެނގެން ބޭނުންވާ ފިލާވަޅުތަކަކާއި މަޢޫލޫމާތުތަކެއް ފޯރުކޮށް ދިނުމުގެ މަތިވެރި މަޤްޞަދުގައެވެ. ދިވެހި اسلامي مجتمع، މިހާރު އޮތް ޙާލަތަށް ބަލާއިރު، اسلامي عقيدة ހަރުދަނާކޮށް، ﷲ ވޮޑިގެންވާކަމާއި، ކީރިތި قران އަށް އީމާންވުމާއި، ރަސޫލާގެ ނަބީކަން ކަށަވަރުކޮށް، އިންސާނާ މިބިންމަތީ އުޅުނުމަށް، އެއިންސާނާ ހެއްދެވި ފަރާތުން، ރިވެތި ހަމަތަކަކާއި އުޞޫލުތަކެއް ހަތް އުޑުމަތިން ބާވައިލައްވާފައިވާ ކަން ދެނެގަނެ، ކީރިތި ﷲ ގެ އަމުރުފުޅަށް ކިޔަމަންވެ، ކައު އިތުރު ރަސޫލާގެ ސުންނަތަށް ތަބާވެ، އެކަންކަމުގެ ސާބިތު ހެކި ޝައްކަކާނުލައި ހިތުގެ އަޑިން ޤަބޫލުކޮށް، ކަށަވަރު ކުރުމުގައި، މިފޮތުގައިވާ މަޢޫލޫމާތަކީ، ވަރަށްބޮޑު އެހީއަކަށް ވާނެކަން ކަށަވަރެވެ. އެހެނީ، މިފޮތުގައި ބަޔާން ކުރެވިފައި އެހެރީ، ކީރިތި قران ގެ އާޔަތްތަކުން އެކަންކަމަށް ހެއްކާއި ދަލީލު ލިބޭގޮތަށް، މި ނިކަމެތި އިންސާނުން خلق ކުރެއްވި މަތިވެރި ﷲ، ވަޙީ ކުރައްވާފައިވާ އެކަލާނގެ ބަސް ވަހީއެވެ. އިންސާނަކަށް ވީތީ، އަދި މުސްލިމަކަށް ވީތީ، اللّـه سبحا نه وتعا لى ގެ ބަސް وحي އާ ދެކޮޅެއް ނުހެދޭނެއެވެ. އާރާއި ބާރު، ޢިލްމާއި ޙިލްމު ކިތަންމެ ވަރަކަށް ލިބި ހުއްޓަސް، އެކަލާނގެ އަންގަވާފައިވާ އަމުރުފުޅުތަކަށް ގޮން ޖަހައި، ކީރިތި ޤުރުއާނަކީ، ޙުއްޖަތެއްކަމަކަށް ނުހެދޭނެއެވެ.
މީގެ ދިހަވަރަކަށް އަހަރު ކުރިން، ދިވެހިރާއްޖެ ދޫކޮށް، ރާއްޖެއިން ބޭރުގައި ދިރިއުޅެމުން އައިސް، މިފޮތް ލިޔަމުންދާއިރު، އަޅުގަނޑު ދިރިއުޅެމުން މިގެންދަނީ މެލޭޝިއާގެ ވެރިރަށް، ކުއާލަލަމްޕޫރުގައެވެ. މިފޮތް ލިޔެ، އެކުލަވައިލުމުގައި، ޢިލްމީގޮތުން، އަޅުގަނޑަށް އެހީތެރިވެ ވަޑައިގެން ދެއްވި އެންމެ ބޭފުޅުންނަށް، އިޚުލާޞްތެރިކަމާއެކު ޝުކުރު ދަންނަވަމެވެ. ކީރިތި ﷲ، އެބޭފުޅުންނަށް ދެދުނިޔޭގެ ބާއްޖަވެރިކަން މިންވަރު ކުރައްވާށިއެވެ. ކީރިތި ﷲ، އަޅުގަނޑުގެ މި މަސައްކަތުގައި ބަރަކާތް ލައްވައި، މި ފޮތުން ދިވެހި اسلامي مجتمع ގެ އެންމެހައި އަޚުންނާއި އުޚުތުންނަށް، ލާބަ އާއި މަންފާލިބި، ﷲ ގެ ރުއްސެވުމާއި، ދަރުމަ ލިބިގެންދާނެ ގޮތް މިންވަރު ކުރައްވާށިއެވެ.
1 ރަޖަބު 1436 ހ.
20 އެޕްރީލް 2015 މ.
فاروق أحمد
ފެށުން
وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ
ތިމަން ކަލާނގެއަށް އަޅުކަން ކުރުމަށް މެނުވީ، ތިމަން ކަލާނގެ، ޖިންނީންނާއި އިންސީންނެއް ނުހައްދަވަމެވެ. ( ސޫރަތުއްޒާރިޔާތު : 51 )
ކީރިތި ﷲ، އިންސާނާ އުފައްދަވައި މި ދުނިޔޭގައި ދިރިއުޅުމަށް، މިބިންމައްޗަށް ފޮނުއްވީ ހަމައެކަނި އެންމެ މަޤްޞަދަކަށްޓަކައެވެ. ﷲ ގެ އަމުރުފުޅުތަކަށް ތަބާވެ، އެކަލާނގެއަށް އަޅުކަން ކުރުމަށްޓަކައެވެ. އެ އަޅުކަމަކީ ހަމައެކަނި، ފަރުޟު ފަސް ނަމާދުކޮށް، ރަމަޟާންމަހު ރޯދަހިފައި، قران ކިޔަވައި، ގެފުޅަށްގޮސް ޙައްޖުވުން އެކަންޏެއް ނޫނެވެ. އިންސާނާ މިބިންމަތީ ލައްވައި، އެއިންސާނާ އުޅުނުމަށް އަންގަވާފައިވާ މަގުން ކުރާ ކޮންމެ ކަމަކީ، އެކަލާނގެ ޙަޟުރަތުގައި، އިންސާނާ ކުރާ އަޅުކަމެކެވެ. ކީރިތި قران ބާވައިލައްވާފައިވަނީ، އެކަލާނގެއަށް އަޅުކަން ކުރުމަށް އެދުންވެރިވާ އިންސާނުންނަށް ހެވާއި ނުބައި ވަކިކޮށް އަންގައި، މަގުދައްކައިދޭ ފޮތެއްގެ ގޮތުގައެވެ. އެފޮތުގައި ބަޔާންވެ މަގުދައްކައިދީފައިވާ ކަންކަމުގެ އިތުރު ދަލީލާއި ރަނގަޅުގޮތް ނުވަތަ ދިންނަވާނޭމަގު، ސާފުވެގެންދަނީ، އެފޮތް އެބޭކަލެއްގެ މައްޗަށް ބާވައިލެއްވުނު، މިއުއްމަތުގެ މާތް ނަބިއްޔާ، އަދި ނަބީކަމާއި ރަސޫލުކަން ޚާތިމު ކުރެއްވި ކައު އިތުރު ރަސޫލާގެ ސުންނަތުންނެވެ.
كِتَابٌ أَنْزَلْنَاهُ إِلَيْكَ مُبَارَكٌ لِيَدَّبَّرُوا آيَاتِهِ وَلِيَتَذَكَّرَ أُولُو الْأَلْبَابِ
(މިއީ) ކަލޭގެފާނަށް ތިމަން ކަލާނގެ ބާވައިލެއްވި ބަރަކާތްތެރި ފޮތެކެވެ. (އެއީ) އެއުރެން އެފޮތުގެ އާޔަތްތަކުގެ މާނަތަކާމެދު ވިސްނައި ފުކުރު ކުރުމަށެވެ. އަދި ބުއްދީގެ އަހުލުވެރިން (އެއިން) ނަޞޭޙަތް ލިބިގަތުމަށެވެ. (ސޫރަތުއްޞާދު : 29)
ކީރިތި قران އަކީ، އެފޮތެއްގައި، އިންސާނާ ކުރުމަށް އަދި ނުކުރުމަށް، ﷲ އަންގަވައިފައިވާ ކަންކަން އެކަނި ހިމެނިގެންވާ ފޮތެއްނޫނެވެ. އިންސާނާ ދުނިޔޭގައި އުޅުމުގައި ޢަމަލުކުރަން ޖެހޭ އެތައް ކަންތައްތަކެއް، އެފޮތުގައި ހިމެނިގެން ވެއެވެ. އޭގެ ތެރޭގައި، އިންސާނާގެ ވިސްނުމާއި ފިކުރު ގެންގުޅެން ޖެހޭނެ ގޮތާއި، މިޒާޖާއި، އެކި އިންސާނުންގައި ހުންނާނެ އެކި ކަހަލަ އާދަ އާއި ގޮތްތަކާއި، މިދުނިޔޭގައި އިންސާނާ ދިރިއުޅުމުގައި ކުރިމަތިލާން ޖެހިދާނެ ހުރިހާ ހާލަތަކާއި ސަބަބުތައް ހިމަނުއްވާފައި ވެއެވެ. ދުނިޔެއާއި އާޚިރަތާ ގުޅުންހުރި އަދި އިންސާނާއަށް ކޮންމެހެން ބޭނުންވާ ޢާންމު އަދި ޚާއްޞަ މަޢޫލޫމާތާއި، ﷲ އަށް ބިރުވެތިވުމާއި، އެކަލާނގެއަށް ލޮބުވެތި ވުމާއި، ﷲ ގެ ޙަޟުރަތުން ދަރުމައާއި ޘަވާބާއި ރަޙުމަތް ލިބިގަންނާނެ ގޮތުގެ ފުރިހަމަ މަޢުލޫމާތު، އެފޮތުގައި، ﷲ ބަޔާން ކުރައްވާފައި ވެއެވެ. ޖުމްލަ ގޮތެއްގައި ބުނާނަމަ، އިންސާނާ މި ދުނިޔޭގައި ދިރިއުޅުމުގައި، އެއިންސާނާ ހެއްދެވި ފަރާތުން، އެ އިންސާނާގެ ޢަމަލުތައް ބަހައްޓަންވީ ގޮތުގެ އެންމެހައި މަޢުލޫމާތު، ވަރަށް ފުރިހަމަޔަށް، އެފޮތުގައި ބާޔާން ކުރެވިފައި އެބަ އޮތެވެ. ދުނިޔޭގައި އުޅެ ނެތި ދިއުމުގައި އިންސާނާ ކުރިމަތިލާނެ ހުރިހައި ކަމަކާއި، އެންމެހައި ޙަޤީޤަތްތައް އެ ފޮތުގައި، ﷲ ވަނީ އަންގަވައި ބަޔާން ކުރައްވާފައެވެ. އެފޮތަކީ، އެންމެހައި ޚަލްޤުތަކުން ހެއްދެވި ފަރާތުން، އެ ޚަލްޤުތަކުންނަށް ފޮނުއްވިގެންވާ، އަދި ހިސާބު ބައްލަވާ ދުވަހާ ހަމަޔަށް، އެ ޚަލްޤުތަކުންނަށް މަގުދައްކައި ދިނުމުގައި، ބޭނުން ކުރެވޭނެ އެންމެ ފުރިހަމަ ވަޞީލަތް ކަމުގައި ނޫނީ ނުވެއެވެ.
ކީރިތި قران އަށް ކަމޭ ނުހިތައި، އެއީ އެއްވެސް އެއްޗަކަށް ނުހަދާ ބަޔަކަށް، އެއީ ކުރިން ހިނގައި ގޮސްފައިވާ އަދި މިހާރުގެ ޙާލަތަށް ބޭނުމެއްނެތް އެއްޗަކަށް ވެދާނެކަމަށް ބަލަމާ ހިނގާށެވެ. غافل ކަމުގެ އަނދިރީގައި ތިބި މިފަދަ ބަޔަކަށް، ރައްދުގައި ދޭން އޮތް ޖަވާބަކީ، ކީރިތި قران އަކީ، ހަމައެކަނި، މީގެ 1،400 އަހަރުކުރިން ހިނގާފައިވާ ކަންތައްތަކެއް ބަޔާން ކުރެވިފައިވާ ފޮތެއް ނޫންކަމެވެ. އެ ފޮތުގައި، ﷲ އިންސާނާއަށް، އެއިންސާނާ ދުނިޔެއަށް ފޮނުއްވައި، ދުނިޔޭގައި އެއިންސާނާ އުޅޭނެ ރަނގަޅު ގޮތް ބަޔާން ކުރައްވައި މަގު ދައްކަވައިދެއްވާފައި ވެއެވެ. އަދި މި ދުނިޔެ އުފެދި ނިމިގެންގޮސް، މީސްތަކުން ދުނިޔޭގައި ކޮށްފައިވާ ކަންކަމަށް عدل ވެރި ޝަރީޢަތަކުން ޙުކުމް ކުރެވިގެންދާނެ ދުވަހާ ހަމަޔަށް، ހުރިހާ ޙާލަތެއްގައި، ހުރިހާ ތާރީޚެއްގައިވެސް ކަންހިނގައިދާނެ ގޮތް، ﷲ ވަނީ، އެފޮތުގައި އަންގަވައި، ހެއްކާއި ދަލީލާއެކު، ވަރަށް ސާފުކޮށް ބަޔާން ކޮށްދެއްވާފައެވެ.
ކީރިތި قران އަށް ތަބާވެ، އެއީ އިންސާނާގެ ޙަޔާތަށް ކިހާ މުހިންމު ފޮތެއްކަން ހިތުގެ އަޑިން ޤަބޫލު ކުރާ މީހަކަށް، قران ގެ ޢިލްމު އެނގެން ޖެހެއެވެ. އާޔަތްތަކުގެ މާނަ ދޭހަވާން ޖެހެއެވެ. އެއީ އެ އިންސާނާގެ ޙަޔާތުގެ ވޮށެއްކަމުގައްޔާއި، ރަނގަޅާއި ނުބައި ވަކިކޮށްދޭ ނޫރެއްކަމުގައި ބަލައިގެން، އެއިންސާނާގެ ޢަމަލުތައް ސީދާ ކުރުމަށްޓަކައެވެ. އަދި ކީރިތި قران ގައި ﷲ އަންގަވާފައިވާ މަގުން ހިނގައި، އެކަލާނގެޔަށް، ޙައްޤު ގޮތުގައި އަޅުކަން އަދާކުރުމަށް ޓަކައެވެ.
މިފޮތް، ދިވެހި ބަހުން ލިޔެ، ކީރިތި قران ގެ މާނަޔާއެކު، އެކުލަވާލައި ތައްޔާރު ކުރެވިފައި މިވަނީ، قران ގެ ޢިލްމުން، ކޮންމެވެސް މިންވަރެއް، އެކަމަށް އެދުންވެރިވާ ބަޔަކަށް ޙާޞިލުވާނެ ވަޞީލަތެއްގެ ގޮތުގައި ބަލައިގެން، ދިވެހި اسلامي مجتمع އަށް، ކުރެވޭ ހަދިޔާއެއްގެ ގޮތުގައެވެ. ވިސްނައި ފިކުރުކޮށް، ޢިބްރަތެއް ޙާޞިލް ކުރުމަށް ބޭނުންވާ ބަޔަކަށް، ﷲ ގެ ރަޙުމަތްފުޅާއެކު، ފޯރުކޮށްދެވޭ އެހީއެއްގެ ގޮތުގައެވެ.
ކީރިތި قران ގެ ޢިލްމުން، ހިތްތައް އަލިކޮށް، ސާފުކުރުމަށް، އަދި ﷲ ވޮޑިގެންވާ ކަމާއި، އެކަލާނގެ ޒާތުފުޅާ ގުޅިފައިވާ ހެއްކާއި ދަލީލު ދަސްކޮށް، ދެނެގަނެ، ﷲ ރަސްކަންފުޅަށް ބިރުވަތައި، އަޅުކަން ކުރުމަށް ބޭނުންވާ ބަޔަކަށް، ﷲ ގެ حضرة ގައި އެބައިމީހުންނަށް އޮތް ވާޖިބު އަދާކޮށް، އެކަލާނގެ ރުހިވޮޑިގެންވާ މަގުން ހިނގައި، އެކަލާނގެ ރުއްސަވާ އަޅެއްގެ ގޮތުގައި، އެކަލާނގެ حضرة އަށް ދަތުރުކުރުމުގެ އުއްމީދު، ކީރިތި قران ގެ އަލީގައި ލިބިގަނެ، ސުވަރުގޭގެ ދާއިމީ نعمة އާއި رحمة އަށް އެދުންވެރިވާ މީހަކަށް، ﷲ ގެ ރުއްސެވުމާއި އިރާދަފުޅާއެކު، އެކަން ހިންމަވައިދެއްވާނެކަން، މިފޮތުގައި ބަޔާންކޮށް ހެކިކޮށްދެއްވާފައި ވެއެވެ. އެހެނީ، މިފޮތުގައި ބަޔާން ކުރެވިފައި އެވަނީ قران ގެ އާޔަތްތަކެވެ. ﷲ ގެ ބަސް وحي އެވެ.
ކީރިތި ﷲ، އަޅަމެންނަށް، ދުނިޔޭގައިވެސް ހެޔޮކަން، އާޚިރަތުގައިވެސް ހެޔޮކަން ދެއްވައި، އަޅަމެންގެ ކަށްވަޅު އަލި ކުރައްވައި، ކަށްވަޅުގެ ޢަޒާބު ލުއިކޮށްދެއްވައި، ނަރަކައިގެ ޢަޒާބުން ދިންނަވައި، ސުވަރުގެވަންތަ ވެރިންގެ ތެރޭގައި އަޅަމެން ލައްވައި، ދެދުނިޔޭގެ ބާއްޖަވެރިކަން މިންވަރު ކޮށްދެއްވާށިއެވެ. امين . و الْحَمْدُ لِلَّهِ رَبِّ الْعَالَمِين
(ނުނިމޭ)
