ކޮންމެވެސް ރަސްކަލެއްގެ ދަރުބާރުގައި ބޮޑު ޢިލްމުވެރިއެއްގެ މޮޅު ކަމާއި ރަނގަޅު ކަމުގެ ވާހަކަ ދެކެވިއްޖެއެވެ. އެ ވަގުތު އެ ޢިލްމުވެރިޔާއާ ބައްދަލު ކުރެއްވުމުގެ އެދުންފުޅު ރަސްގެފާނުގެ ހިތްޕުޅުގައި ހިނގައިގެންފިއެވެ. އަދި އޭނާ ގެންނާން އަމުރު ކުރައްވައިފިއެވެ.
އެ ޢިލްމުވެރިޔާ ރަސްގެފާނުގެ ދަރުބާރަށް ވަދެ ސަލާމް ދެންނެވުމަށް ފަހު ދެންނެވިއެވެ. "މަނިކުފާނުގެ ޢުމުރުފުޅު އެތައް ހާސް އަހަރަކަށް ދަންމަވާށިއެވެ."
ރަސްގެފާނު ވިދާޅުވިއެވެ. "އަހަރެން ކަލޭ މި ގެނައީ ކަލޭގެ ތަޢުރީފު އަޑު އަހައިފައެވެ. އެހެން ނަމަވެސް ތިޔަ ބުނި އެއްޗަކުން އަހަރެންގެ ހިތުގައި ކަލޭގެ މައްޗަށް އޮތް ޤަދަރު ފުހެވިގެން ހިނގައްޖެއެވެ. ތިޔަ ދެއްކީ ވަރަށް މޮޔަ ވާހަކައެކެވެ. އަހަރެން އެތައް ހާސް އަހަރެއް ވާންދެން ދުނިޔޭގައި ނުހުންނާނޭކަން އެނގި ހުރެ ތިޔަ ކަހަލަ އެއްޗެކޭ ބުނީ ކީއް ވެގެން ހެއްޔެވެ؟"
ޢިލްމުވެރިޔާ ދެންނެވިއެވެ. "މާތް ޞާޙިބާއެވެ. އަޅުގަނޑު ދުޢާ ކުޅައީ މަނިކުފާނު އެތައް ހާސް އަހަރެއް ވާންދެން މި ދުނިޔޭގައި ލަހައްޓަވާތޯއެއް ނޫނެވެ. ޢަދުލު އިންޞާފާއި ހެޔޮ ޢަމަލު ތަކަކީ މަރުވާނޭ އެއްޗެއް ނޫނެވެ. އަޅުގަނޑު ދުޢާ ކުޅައީ ޢަދުލު އިންޞާފާއި ހެޔޮ ޢަމަލުގެ ސަބަބުން މަނިކުފާނުގެ ނަންފުޅު އެތައް ހާސް އަހަރަކަށް ދަންމަވާތޯއެވެ. މަނިކުފާނުގެ ޙަޤީޤީ ޢުމުރުފުޅަކީ އެއީއެވެ."
އާދެ، ހެޔޮ ޢަމަލު ތަކަކީ ދުވަހަކުވެސް "މަރު ވާނޭ" އެއްޗެއް ނޫނެވެ. އިންސާނާ މަރު ވުމަށް ފަހު އެތައް ހާސް އަހަރަކަށް އޭނާގެ ޢަމަލުތައް ނުވަތަ އޭނާގެ ނަން ދެމި ހުންނާނެއެވެ. ހެޔޮ ޢަމަލެއް ނެތް ނަމަ ދުނިޔޭގައި ހުއްޓަސް އެ މީހެއްގެ ނަމެއް ނޯންނާނެއެވެ.
ކޮންމެ މީހަކީވެސް މި ދުނިޔެ ދޫކޮށް ދާނޭ މީހެކެވެ. އެކަކަށްވެސް ތާއަބަދު ދުނިޔެއަކު ނުހުރެވޭނެއެވެ. އެހެންވީމާ ދުނިޔޭގައި އުޅޭން ލިބިފައި އޮތް ކުޑަ ދުވަސްކޮޅުގެ ތެރޭގައި ތިމާގެ ޢަމަލުތަކުގެ ސަބަބުން ނަން ދިރި އޮންނާނޭ ފަދަ ގޮތަކަށް ދިރިއުޅުން ވޭތު ކުރެވޭތޯ ބަލަން ވާނެއެވެ.
ރީތި ނަމެއް ލިބޭ ފަދަ ގޮތަކަށް ދިރިއުޅުން ވޭތު ކުރުމަކީ އުނދަގޫ ކަމެއް ނޫނެވެ. އެހެން މީހަކަށް ތިމާގެ ފުށުން ގެއްލުމެއް ނުލިބި އެހެން މީހުންނަށް ފައިދާ ހުރި ކަމެއްގެ މަތީގައި ދެމި ހުންނަ މީހާއަކީވެސް ކުރިމަގަށްޓަކައި "ހެޔޮ ޢަމަލު" ރައްކާ ކުރަމުން ގެންދާ މީހެކެވެ. އެހެން ނަމަވެސް ތިމާގެ ސަބަބުން އެހެން މީހުންނަށް އުނދަގޫ ފޯރައި އެކި ކަހަލަ ގެއްލުންތައް ލިބެމުންދާ މީހެއްގެ ނަން އޭނާ މަރު ވުމާއެކު ފުހެވިގެން ހިނގައިދާނެއެވެ.
ކޮންމެ މީހަކުވެސް މަސައްކަތް ކުރަންވީ ޅެންވެރިޔާ ވިދާޅު ވެފައިވާ ފަދައިން ފަސްގަނޑު މަތީން ފޮހެވިގެން ނުދާނޭ ފަދަ ގޮތަކަށް ތިމާގެ ނަން ލިޔެލާފައި މަރުގެ ދާނުގައި އޮށޯވެވޭތޯއެވެ. އެހެން ހަދައިފި މީހަކަށް ގެއްލުމެއް ނެތެވެ.
