ހެޔޮކަމެއްގެ އަގު ލިބުނީ ހީވެސް ނުކުރާކަހަލަ ގޮތަކަށް

(ލިޔުނު މީހެއްގެ ނަން ނެތި، ފޯނަށް އައި މެސެޖެއްގެ ގޮތުގައި ލިބުނު ލިޔުމެއްގެ ތަރުޖަމާއެއް)

ބޭރު ރަށެއްގެ ރަށްބޭރު މަގެއްގައި އޭނާ ދުއްވި ކާރަށް ދިމާވި ކަމެއްގެ ސަބަބުން މަގުގެ އެއްފަރާތުގައި އަގުބޮޑު ކާރު ޕާކު ކޮއްފައި ކާރުން ފޭބީ، ބަލާބެލުމަށް ވަރަށް ތަނަވަސް އަންހެނެކެވެ. މަގު ހުރަސްކޮށް ދުވާރު މަތީގައި ކުލީ ކާރެއް ހުއްޓުވޭތޯ އޭނާ ވަރަށް މަސައްކަތް ކުރިއެވެ. ނަމަވެސް ދިހަވަރަކަށް މިނެޓު ވީއިރުވެސް ކާރެއް ނުލިބުނެވެ. އިރު އޮއްސެން ކައިރިވެއްޖެއެވެ.  ވިއްސާރަ ވިލާ ގިނަވުމުގެ ސަބަބުން ދުނިޔެމަތި އަނދިރިވަމުން އަންނަނީ ހައިރާންވާހައި އަވަހަށެވެ. މިހެން ލައްކަ ގިނައިރު ވީ ފަހުން ވަރަށް ބާ ޓެކްސީއެއް ހުއްޓައިފިއެވެ. އެކާރާއި މީނާ ދުއްވަން އާދަވެފައިހުރި އަގުބޮޑު ފަރި ކާރުތަކާ ހުރި ތަފާތެއްގެ ބޮޑުކަމުން ބާއެވެ. ކާރެއް މަޑުނުކޮށްގެން މާޔޫސްވާ ހިސާބުގައި ހަމަ ކުޑައިރުކޮޅެއް ކުރިން ހުއްޓި ހުރި މީހާ އެ ކާރަށް އަރަން މާ އަވަސްވެގެންނެއް ނޫޅުނެވެ!  މި މަޑު ކުރި ކާރު ދުއްވަން އިނީ ވަރަށް ކެތްތެރި ޒުވާނެކެވެ. އޭނާއަށް ލިބެން މިއުޅޭ ފަސިންޖަރު ކަމަނާ ވަކި ގޮތަކަށް ނިންމަވަންދެން ކާރު މަޑުކޮށްލައިގެން އިނެވެ. އެންމެ ފަހުން އެ އަންހެން މީހާ ކާރުގެ ދޮރުހުޅުވާލައި ފަހަތުގައި އިށީނދެ، ދާން ބޭނުން ހިސާބެއްގެ ނަން ޒުވާން ޑުރައިވަރު ގާތުގައި ބުނެލަމުންނެވެ.

މިއަންހެނާ  ޖެހިލުންވި ސަބަބަކީ އެ ކާރުގެ ބާ ކަމާއި ދުއްވަން އިން ޒުވާނާ އާ މެދުވެސް ޝައްކުވީތީއެވެ. ކާރު މަޑުކުރީ މީނާގެ ފަރި ކަމާއި ނަލަހެދިފައި ހުރި މިންވަރަށް ބަލައި އެއްޗެއް ފޭރިގަނެ ކޮންމެވެސް ނޭއްގާނީ ކަމެއް ކުރަން ކަމުގައި ހިތަށް އަރައިގެންނެވެ. ނިކަމެތިންނަށް ޝައްކު ކުރުމަކީ ކޮންމެ ހިސާބެއްގައިވެސް މުއްސަނދިން ކުރަމުން އަންނަ އިޖްތިމާއީ ހުތުރު ކަމެކެވެ. ދާންވި އެޑްރެސް ބުނުމުން  އާދޭހެވެ ބުނުން ފިޔަވައި ޑްރައިވަރު ވަކި އިތުރު އެއްޗެއް ނުބުނެއެވެ. ކާރު ދުއްވާ މީހާ ފަހަތް ބަލަން ހުރި ލޯގަނޑުން މީނާ އަށް ބަލައި ކަތި ކަމެއް ކުރޭތޯ މި ނަލަ އަންހެނާ އިނީ ވަރަށް ހުޝިޔާރަށެވެ. އެކަހަލަ އެއްވެސް ކަމެއް ފާހަގައެއް ނުވިއެވެ. ކުޑަ އިރުކޮޅެއް ފަހުން، މީނާ ކާރު ދުއްވާލެއް ފަރުވާތެރި ކަމުންނާއި ހިނގާ މީހުންނަށް ކުރާ އިހްތިރާމުން މި އަންހެން މީހާ ހިތްހަމަ ޖެހި ޑްރައިވަރާ ދެތިން ސުވާލު ކުރިއެވެ.

ކިޔަނީ ކޮން ނަމެއްތޯ އެހުމުން އޭނާ ބުނީ ނަމަކީ އެޑަމް އެވެ. ޓެކްސީ ދުއްވުމަކީ މީނާ އާމުދަނީ ހޯދަން ކުރާ ދެވަނަ މަސައްކަތެވެ. އާއިލާއަށް ތުއްތު ދަރިޔަކު އިތުރުވާން އުޅޭތީ ލިބޭ ކޮންމެ ހުސްވަގުތެއްގެ ބޭނުން ހިފަނީ ކަމުގައެވެ. ވާހަކަ ދިގުކޮށް ފަހަތުގައި އިންނެވި ތަނަވަސް ފަސިންޖަރުގެ ހަމްދަރުދީ ހޯދަން ވާހަކަ ދިގުކުރާކަށް ނޫޅެއެވެ.  ކުޑައިރުކޮޅަކުން އެ އަންހެން މީހާ ބޭނުންވި ހިސަބަށް ކާރު މަޑުކޮށްލައިފިއެވެ. ކާރުން ފޭބުމުގެ ކުރިން، ދޭންވީ ކިހާވަރެއްތޯ އެހުމުން ހީނލާފައި ބުނީ އެއްޗެއް ދެއްވާނެ ކަމެއް ނެތެވެ! " މަސައްކަތް ނިންމާލައިފައި އަޅުގަނޑު މިދަނީ ގެއަށެވެ. އަޅުގަނޑުވެސް އުޅެނީ މިހިސާބުގައެވެ. ކަމަނާގެ ސަބަބުން އަޅުގަނޑުގެ މަގު ވަކި ދިގެއް ނުވެއެވެ. އެހެންވީމާ އެއްޗެއް ދެއްވާނެ ކަމެއް ނެތެވެ." ހައިރާންވެ، އެ އަންހެން މީހާ ލައްކަ ވާހަކަ ދެއްކީމައި ބުނީ، " ތިހެން ވިއްޔާ  އަޅުގަނޑަށް ޝުކުރު ކުރުމުގެ ގޮތުން އެހެން މީހަކަށް ހެޔޮކަމެއް ކޮށްދެއްވާށެވެ" !

މި ހިތްހެޔޮ ޒުވާނާގެ ކާރުން ފައިބައިގެން ކުޑަ ތަންކޮޅަކަށް ހިނގާލައިފައި ކުރިމަތިން ފެންނަން ހުރި ކެފޭއަކަށް ވަދެ ހޫނު ކޮފީތައްޓަކަށާއި  ކުޑަ ސެންޑްވިޗެއް ގެނެސްދޭށޭ ޚިދުމަތް ދޭން އައި މާބަނޑު ވެއިޓަރު ގާތުގައި ބުނެފިއެވެ.  މި އަންހެން ކުއްޖާ އެނބުރި އައިސް އޯޑަރު ދެއްވި ތަކެތި މޭޒުމަތީގައި ބަހައްޓައި ހިނިތުންވެލުމުން އޭނާގެ މޫނުމަތިން،" ހާދަހައި ވަރުބަލި ވެފައި ހުރިކަމަށް ފެންނަކަމަށް" ބުންނެވެ. ޖަވާބުގައި ވެއިޓަރު ބުނީ " މެޑަމް އެވެ. އަޅުގަނޑުގެ ބަނޑަށް މިހާރު ދުވަސްފުރެނީއެވެ. ވިހާނީ އަންނަ ހަފުތާގައި ނޫންކަމެއްވެސް ނޭނގެއެވެ. ކުޑަ އިރުކޮޅަކުން އަޅުގަނޑުގެ ދަންފަޅި ހަމަވާނެއެވެ. ގަޑި ހަމަވާއިރު މިހާރު ދެން ފައިމައްޗަށް ހުރެވެނީ ހަމަ ކިރިޔާއެވެ" މިހެން ބުނެ ރީތި އެއްޗެއް ބުނެ ހިނގައިގެންފިއެވެ.

ދިހަވަރަކަށްމިނެޓް ފަހުން އެއްކަލަ ވެއިޓަރަށް މީނާ އިޝާރާތެއް ކުރުމުން މޭޒުދޮށަށް އައިސް މަޑުކޮށްލުމުން ބިލަށް އެރީ ކިހައިވަރެއްތޯ ސުވާލު ކުރިއެވެ. އެ ބުނި މިންވަރަށްވުރެ އިތުރުވާ ވަރުގެ ފައިސާ ނޫޓެއް ދިނުމުން  ވެއިޓަރު ކޭޝިއަރު މޭޒު ދޮށަށް ގޮސް ފައިސަ ދައްކައި، އެނބުރި މޭޒުދޮށަށް އައި އިރު އެއްކަލަ އަންހެނާ ގޮނޑިއަކު ނެތެވެ!.

މީނާ އައިސް އެ މޭޒުމަތި ބަލައިލި އިރު ގަނޑެއްގައި ނޯޓެއް ލިޔެފައި އޮތެވެ. " ކޭޝިއަރު އެދިން ބާކީ ފައިސާ އަކީ އަހަރެންގެ ހަދިޔާ އެކެވެ. ލިބެން އުޅޭ ދަރިފުޅަށް މި ގަނޑުގެ ދަށުގައި، ހަދިޔާއެއް އޮންނާނެއެވެ!" ބަލައިލި އިރު އެ ކަރުދާހުގެ ދަށުގައި މި ވެއިޓަރުގެ ހަމަހުގެ މުސަރައަށް ވާހައި ފައިސާ ހުއްޓެވެ. ވީ އުފަލުން ގެއަށް ދިއުމުގެ ކުރިން އެ ކެފޭގެ ވެރިމީހާ ގާތުގައި، " އަހަރެން، ދެން އަންނާނީ ވިހައި ގަދަވެގެން " ކަމުގައި ބުނެ އެތަނުން ނިކުމެ ގެއަށްދާން ހިނގައިގަތެވެ!

ގެއަށް ވަދެ ވީ އުފަލުން ފިރިމީހާގެ ގައިގައި ބައްދައި ގަނެ އުފަލުން ރޮމުން ރޮމުން ބުންޏެވެ " އެޑަމް އެވެ، އިރާދަ ކުރެއްވީތީ އަހަރެން ހައެއްކަ މަސް ދުވަހު މަސައްކަތް ނުކުރިޔަސް އަތްމަތި ދަތި ނުވާވަރަށް، މިއަދު ދިމާވި ހިތްހެޔޮ އަނެހެނެއްގެ ފަރާތުން ބޮޑު އެހީތެރިކަމެއް ލިބިއްޖެއެވެ!"

ހެޔޮކަމުގެ އިނާމަކީ ގިނަ ފަހަރަށް ހަމަ ހެޔޮކަމެކެވެ. ހެޔޮ ކަންތައް ކޮށްދިން ވަގުތު ހަމަ ސީދާ އެމީހާގެ ފަރާތުން އެކަށީގެންވާ އިނާމެއް ނުލިބިދާނެއެވެ. ގިނަ ފަހަރަށް ލިބޭނީ ހަމަ ގައިމުވެސް ތެޔޮހަމެއް ނޫނެވެ! ވީވަރަކުން ހެޔޮކަންތައް ކުރާށެވެ. އެމީހަކަށް އެވަގުތަކު ކުރެވެން އޮތް މިންވަރަކުންނެވެ. ހުރިހައި ކަމެއް ފުރިހަމަ ވަންދެން މަޑުނުކުރާށެވެ. އެއީ އަންނާނެ ދުވަހެއް ނޫނެވެ!

ނިމުނީ

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.