ބިނާކުރާ ދުނިޔެއާއި ތައްޔާރީ އާޚިރަތް

އަސްލު ލިޔުއްވީ: މަވްލާނާ ވަޙީދުއްދީން ޚާން
ތަރުޖަމާ: ޢަބްދުﷲ ނަޢީމު އިބްރާހީމް


މިއަދުގެ ދުނިޔެއަށް ބަލައިލާއިރު ފިރިހެނަކަށް ވިޔަސް، އަންހެނަކަށް ވިޔަސް، އެންމެންމެ މި އުޅެނީ އަވަދިނެތިއެވެ. މަޝްޣޫލުވެގެން އުޅޭ ކަންތައްތައް ގިނަކަމުން އެ ބަޔަކު އެ އުޅޭ ކަމަކާ ގުޅޭ ވާހަކައެއް ނޫން އެހެން ވާހަކައެއް އަޑު އަހައިލާނޭ ވަގުތެއްވެސް ނުވެއެވެ. މީސްތަކުންނަށް ލިބިފައިވާ ވަގުތާއި ފައިސާގެ އޮންނަނީ އެންމެ ބޭނުމެކެވެ. ތިމާ ބޭނުންވާ މަންޒިލަށް ވާސިލުވުމަށްޓަކައި ހުރިހައި ވަގުތަކާއި ފައިސާއެއް ދަނީ ހޭދަކުރަމުންނެވެ.

މީސްތަކުން މިހައި އަވަދިނެތިކޮށް އުޅެނީ ކީއްވެގެން ހެއްޔެވެ؟ އެއީ އެންމެ ބޭނުމަކަށްޓަކައެވެ. ތިމާގެ ދިރިއުޅުން އެއް ދުވަހުން އަނެއް ދުވަހަށް ރަނގަޅުކުރުމުގެ ބޭނުމެވެ. ތިމާގެ ދުނިޔަވީ ކުރިމަގު ބިނާކުރުމެވެ. އުޖާލާކުރުމެވެ. އެކަމަކު ދިރިއުޅުން ކާމިޔާބުކުރުމުގެ މަގަށް ހުރަސްއަޅަނީ މަރެވެ. ކޮންމެ މީހަކީވެސް ލަހެއް ނުވެ މަރުވާނޭ މީހެކެވެ. އިންސާނާގެ ދިރިއުޅުމުގައި ޖެހޭ އެންމެ ފަހުގެ ސިއްކައަކީ އެއީއެވެ. އޭނާއަށް ޖެހެނީ ބުރަ މަސައްކަތުން ބިނާކުޅަ ދުނިޔެ ދޫކޮށްލައިފައި ދާށެވެ. އެ ދާގޮތަށް ގޮސް އިންސާނާ ވަންނަނީ އެކަނިވެރި ދުނިޔެއަކަށެވެ. އެ ދުނިޔޭގައި އޭނާ ހުންނަނީ މުޅީން ހުސްއަތާއެވެ.

ދުނިޔެއަށް އުފަންވާ ކޮންމެ މީހަކުވެސް ދުނިޔޭގެ ތެރެއަށް ހޭލައިގަތުމާއެކު ވަށައިގެން ތިބޭ އެހެން މީހުން ފަދައިން ދުނިޔަވީ އިސްތިލާހުގެ ވިސްނުމުގެ ތެރެއަށް ވަދެއެވެ. އެހެން މީހުންވެސް އުޅޭފަދައިން އޭނާވެސް މާއްދީ މަސައްކަތްތަކުގެ ތެރޭގައި އުޅެގަނެއެވެ. ނަތީޖާއަކީ މާއްދީ ވިސްނުމަކީ ސިލްސިލާކޮށް އެއް ނަސްލުން އަނެއް ނަސްލަށް ދެމިގެން އަންނަ ތާރީޚީ ވިސްނުމުގެ ބަޔަކަށް ވެގެން ދިއުމެވެ. އަދި މާއްދީ ވިސްނުމަކީ ސަގާފަތުގައި އެކުލެވޭ ކަމަކަށްވެސް ވެގެން ދިއުމެވެ. މި ވިސްނުމުން އެކަހެރިވެ، އެހެން ވިސްނުމެއްގެ ތެރެއަށް ވަނުމަކީ އެކަކަށްވެސް ނުކުރެވޭވަރުގެ ކަމަކަށް ވެގެން ދިއުމެވެ.

އިންސާނާގެ ހަގީގީ އިމްތިހާނު ފެށޭ ހިސާބަކީ މިއީއެވެ. ހަގީގީ ކާމިޔާބީ ހޯދުމަށްޓަކައި އިންސާނާއަށް ޖެހޭނީ މި ތާރީޚީ ސިލްސިލާއިން މިންޖުވެ، ބޭރަށް ނުކުންނާށެވެ. ވިރާސީ ސަގާފަތުގެ ތެރެއިން ނުކުމެ، ހަގީގަތުގެ މައްޗަށް ބުރަވާ ރައުޔެއް ގާއިމުކުރާށެވެ. މިފަދައިން ކަންތައްކުރާ މީހާއަށް ވަގުތުން އެއް ކަމެއް ޔަގީންވާނެއެވެ. އެއީ ތިމާގެ އަސްލު މަސައްކަތަކަށް ވާން ޖެހެނީ ދުނިޔެ ބިނާކުރުން ނޫންކަމެވެ. އަސްލު މަސައްކަތަކީ އާޚިރަތަށް ތައްޔާރުވުން ކަމެވެ. ކޮންމެ އާދަމުގެ ދަރިއެއްގެވެސް އެންމެ މުހިއްމު މަސްއޫލިއްޔަތަކީ މަރުގެ ކުރީގެ މަރުހަލާގެ ބޭނުންކޮށްގެން މަރުވުމަށް ފަހު އަންނާން އޮތް މަރުހަލާއަށް ތައްޔާރުވުމެވެ. މަރުވުމަށް ފަހު އަންނާން އޮތް ފަނާވުމެއް ނެތް، ދާއިމީ ދުނިޔޭގައި ކާމިޔާބު މީހަކަށް ވެވޭވަރުގެ ގާބިލު މީހަކަށް ވުމެވެ.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.