(29 ޑިސެމްބަރ 2025 ގައި ޝާއިއުކުރި ބަޔާ ގުޅޭ)
އައްޒަޣަލްގެ މާޔޫސީ
(1)
ބަދްރު ބިން މުޣީރާ ގާއިމު ހުންނެވީ ފަރުބަދަމަތީގެ މަރުކަޒެއްގައެވެ. ހަވީރުގެ ވަގުތު އޭނާ މަރުކަޒުގެ ގޯތިތެރޭގައި އޭނާގެ ލަޝްކަރަށް އިރުޝާދުދެއްވާން ހުންނެވިއެވެ. އެވަގުތު ވަރަށް ބާރަށް އަސް ދުއްވަމުން އައި ސަވާރަކު މަރުކަޒަށް ވަދެއްޖެއެވެ. އޭނާ އަހުގެ ލަގަނަށް ދަމައިލައި ބަދްރާ ތަންކޮޅެއް ދުރަށް މަޑުކޮށްފިއެވެ. ބަދްރު ދެތިން ފިޔަވަޅުފުޅު ކުރިއަށް ޖެހިވަޑައިގަތުމަށްފަހު ވިދާޅުވިއެވެ. [ބަޝީރެވެ. ތިޔަ ވަޑައިގަތީ ރަނގަޅު ޚަބަރަކާއިގެން ހެންނެއް ހިޔެއެއް ނުވެއެވެ.]
ބަޝީރް ބިން ޙަސަން އަސްކޮޅުން ފައިބައިވަޑައިގެން ބަދްރާ ސަލާންކޮށްލެއްވިއެވެ. [އަޅުގަނޑު ގެނައި ޚަބަރަކީ ރަނގަޅު ޚަބަރެއް ކަމަށް ގްރަނާދާގެ ރައްޔިތުން ދެކެއެވެ. އެކަމަކު އަޅުގަނޑު މި ހުންނަނީ ކަންބޮޑުވެފައެވެ. މަންޞޫރު ކޮބައިތޯއެވެ؟]
[ނަމާދުން ފައިބައިގެން ދެންމެއަކު ކޮޓަރިއަށް ހިނގައްޖެއެވެ. މިއަދަކީ އޭނާގެ ދުވަހެވެ. އޭނާ ގާތަށް ދަމާ ހިންގަވާށެވެ.] މިހެން ވިދާޅުވެފައި ލަޝްކަރުގެ މީހުންނާ ދިމާއަށް ބައްލަވައިލެއްވިއެވެ. [ދެން ހުރި އިރުޝާތުތައް ޢިޝާނަމާދުގެ ފަހުން ދޭނަމެވެ.]
ބަދްރު ބިން މުޣީރާއާއި ބަޝީރް ބިން ޙަސަނާ ދެ ބޭފުޅުން ވަޑައިގަތީ ދެވަނަ ބުރީގެ ކޮޓަރިކޮޅަކަށެވެ. ކޮޓަރިކޮޅުގައި ދަންމަރެއް ދިއްލައިފައި ހުއްޓެވެ. މަންޞޫރު ހުންނެވީ ތަނބިކަށިފުޅުގެ ދަހަނާ އައްސަވާށެވެ. ބަޝީރް ވެދެވަޑައިގަތީމާ ސަލާންކޮށްލެއްވުމަށްޓަކައި އަތްޕުޅު ދިއްކޮށްލައްވަމުން ވިދާޅުވިއެވެ. [ބަޝީރް ވަޑައިގެންނެވިކަން ވަރަށް ރަނގަޅެވެ. މިރޭ އަޅުގަނޑު ޒަޚަމް ވެއްޖެއްޔާ ބޭސްކުރާނީ ކާކުބާވައޭ ހިތަށް އަރާތާ ކިތަންމެ އިރެކެވެ.]
ބަޝީރް ވިދާޅުވިއެވެ. [މަންޞޫރު ޒަޚަމް ކޮށްލެވޭފަދަ ކަނޑިއެއް ކަސްތިއްޔާގެ ހަތިޔާރު ކާރުޚާނާއަކުން އަދިއެއް ނުހަދައެވެ.]
ތިން ބޭފުޅުން ގޮނޑިކޮޅުގައި އިށީނދެވަޑައިގެންފިއެވެ. މަންޞޫރު ބަޝީރާ ސުވާލުކޮށްލެއްވިއެވެ. [އަޅުގަނޑުމެންގެ މޫނުފޮރުވި މުޖާހިދާމެދު ގްރަނާދާގެ ރައްޔިތުން ތިބީ ކަންބޮޑުވެފައި ދޮގެއްތޯއެވެ؟]
[އާދޭހެވެ. ގްރަނާދާގެ ކޮންމެ މެހެފިލެއްގައިވެސް ދެކެވެނީ އެ ވާހަކައެވެ. ސަރަހައްދީ ބާޒުގެ ޖާގައިގައި މިހާރު ހުންނެވީ ސަރަހައްދީ މޫނުފޮރުވި މުޖާހިދެވެ.]
[ބަދްރު އަވަހާރަވެއްޖެކަމަށް އަދިވެސް އެމީހުން ގަބޫލުކުރޭ ދޮގެއްތޯއެވެ؟]
[ލަޝްކަރުގެ ބައެއް އޮފްސަރުން އަދިވެސް ގަބޫލުކުރަނީ ބަދްރު ދުނިޔޭގައި އެބަ ހުންނެވި ކަމަށެވެ. ދޭތެރެދޭތެރެއިން އަޅުގަނޑާ ސުވާލުކޮށް ކޮނުމުގެ މަސައްކަތް އެމީހުން ކުރެއެވެ. ޖަވާބުގައި އަޅުގަނޑު ބުނަނީ މުޖާހިދުންނަކީ ތާއަބަދު ދިރިތިބޭ ބައެއް ކަމުގައެވެ. މީގެ އިތުރަކަށް އަޅުގަނޑު އެއްވެސް ވާހަކައެއް ނުދައްކަމެވެ.]
ބަދްރު ވިދާޅުވިއެވެ. [އެންމެ ރަނގަޅެވެ. ގްރަނާދާގެ މީހުން އުފަލުން ތިބި ކަމުގައި ވިޔަސް ބަޝީރް ކަންބޮޑުވެވަޑައިގަންނަވާ ކަމަށް ވިދާޅުވި ޚަބަރަކީ ކޮބައިތޯއެވެ؟]
[އަބޫ ޢަބްދުﷲ ފެރްނާންދޯގެ ގައިދުޚާނާއިން ފިއްލަވައިގެން ގްރަނާދާއަށް ވަޑައިގެންފިއެވެ. ބޭރުގެ ނުރައްކާތެރިކަމުން ސަލާމަތްވެވަޑައިގަތްހައި އަވަހަކަށް ގްރަނާދާގެ ތަޚުތު އަބޫ ޢަބްދުﷲއާ ހަވާލުކުރައްވާނޭ ކަމަށް އައްޒަޣަލް އިއުލާނު ކުރައްވައިފިއެވެ. އެ ދުވަހަކާ ހަމައަށް ލޮއްޚާގެ ވެރިކަން އަބޫ ޢަބްދުﷲ އަށް ދެއްވައިފިއެވެ.]
ބަދްރު ބިން މުޣީރާ ވިދާޅުވިއެވެ. [ތިޔައީ ހަމަ ތެދުފުޅެއްތޯއެވެ؟ އައްޒަޣަލް އެވަރުގެ ކަތި ފިޔަވަޅުފުޅެއް އެޅުއްވީތޯއެވެ؟]
ބަޝީރް ވިދާޅުވިއެވެ. [އެއީ ކަތި ފިޔަވަޅުފުޅެއް ކަމުގައި ވަނީނަމަ އެ ކަތި ފިޔަވަޅުފުޅު އައްޒަޣަލް އަޅުއްވައިފިއެވެ. އަޅުގަނޑު އަބޫ މުޙްސިނާވެސް ބައްދަލުކުރީމެވެ. އޭނާ ވިދާޅުވި ގޮތުގައި ސަރަހައްދަށް ހަމަލަދިނުމުގެ ކުރިން އަބޫ ޢަބްދުﷲ ހުންނެވީ ފެރްނާންދޯ ގާތަށް ވަޑައިގަންނަވާން ކަމަރު ބަންނަވައިގެންނެވެ. ހާލަތު ބަދަލުވެގެން ދިޔަ ގޮތުން މަޖުބޫރުވެ ވަޑައިގެން އެބޭފުޅުންގެ ލަޝްކަރާ ގުޅިވަޑައިގަތީއެވެ. އަބޫ ޢަބްދުﷲގެ ނިޔަތާމެދު އަޅުގަނޑު ޝައްކު ކުރަނީއެއް ނޫނެވެ. އެކަމަކު އޭނާއަކީ މިނިޓަކު ދެފަހަރު މިޒާޛު ބަދަލުކުރައްވާ ޒުވާނެކެވެ. މިހާރުގެ ހާލަތު އޮތް ގޮތުން އޭނާޔާ އެއްވެސް ކަހަލަ ޒިންމާއެއް ހަވާލުކުރުމަކީ އަޅުގަނޑަށް ފެންނަ ގޮތުގައި ނުރައްކާތެރި ކަމެކެވެ. ޚަބަރު ލިބުނު ގޮތުގައި އަބޫ ދާވޫދް މިހާރުވީ ފެރްނާންދޯގެ ގާތުގައެވެ. އޭނާއަކީ ކިތަންމެފަދަ ބޮޑު ނުބައި ކަމެއްވެސް ކުރައްވާން އަބޫ ޢަބްދުﷲ ރުހިވަޑައިގަންނަވާ ގޮތް ހަދައިފާނޭ މީހެކެވެ.]
ބަދްރު ސުވާލުކުރެއްވިއެވެ. [އަބޫ ޢަބްދުﷲ ވަޑައިގަތީމާ ގްރަނާދާގެ ރައްޔިތުން އުފާކުރަނީތޯއެވެ؟]
[އާދޭހެވެ. އެމީހުން ދެކޭ ގޮތުގައި އަބޫ ޢަބްދުﷲގެ ދާވަނިކޮޅުގައި ޖެހިފައިވާ ކަޅު ލައްތައް ފިލައްޖެއެވެ. ބައެއް މީހުން ތިބީ ދެ ފިކުރެއްގެ މަތީގައެވެ. އެކަމަކު އެފަދަ މީސްމީހުންވެސް ޢަމަލީ ފިޔަވަޅެއް އަޅާކަށް ބޭނުމެއް ނުވެއެވެ.]
[މޫސައާ މެދު ކަންތައް ހިނގައިދިޔަ ގޮތުގެ ކަންބޮޑުވުންވެސް ރައްޔިތުންގެ ކިބައިގައި މިހާރު ނެތީތޯއެވެ؟]
[އަބޫ ޢަބްދުﷲ ވިދާޅުވާ ގޮތުގައި މޫސަ އޭނާގެ ގައިދުޚާނާއިން ފިއްލަވައިފިއެވެ. މުޅި ސަހަރަށް މަޝްހޫރުވެފައިވާ ގޮތަކީ މިއީއެވެ. މިކަން ސާބިތުކުރައްވާން އައްޒަޣަލްގެ ކުރިފުޅުމައްޗަށް ދެތިން ހެކިންވެސް އޭނާ ގެންނެވިއެވެ.]
[އައްޒަޣަލް އޭނާގެ ވާހަކަފުޅު ގަބޫލުފުޅު ކުރެއްވީތޯއެވެ؟]
[ފިއްލެއްވި ނަމަ އަބޫ މޫސާ އޭނާގެ އަރިހަށް ވަޑައިގަންވާނޭ ކަމުގައި އަޅުގަނޑު އައްޒަޣަލަށް ދެންނެވީމެވެ. އައްޒަޣަލް ވިދާޅުވިއެވެ. އަބޫ މޫސާއަކީ ނިކަން ޣީރަތްތެރި ބޭފުޅެކެވެ. އަބޫ ޢަބްދުﷲގެ ތުއްޕުޅުއިރުގެ އެކުވެރިއެކެވެ. އޭނާޔާ މެދު އަބޫ ޢަބްދުﷲ ކަންތައް ކުރެއްވި އިހާނެތި ގޮތުގެ ސަބަބުން ގްރަނާދާގެ އެއްވެސް މީހަކަށް މޫނުފުޅު ދައްކަވާންވެސް ބޭނުންފުޅު ނުވީއެވެ. އޭނާ ވަޑައިގަތީ މޮރޮކޯއަށް ކަމުގައި ހީފުޅުކުރެއްވޭ ކަމަށް އައްޒަޣަލް ވިދާޅުވިއެވެ. ކޯރްދޮބާގައި އުޅުނު އޭނާގެ އާއިލާގެ ވަރަށް ގިނަ މީހުން މޮރޮކޯއަށް ހިޖުރަކޮށްފިއެވެ. އައްޒަޣަލް ވިދާޅުވި ގޮތުގައި އޭނާ މިހާރުވެސް ގެންދަވަނީ އަބޫ މޫސާ ހޯއްދެވުމުގެ މަސައްކަތްޕުޅު ކުރައްވަމުންނެވެ. އަބޫ ޢަބްދުﷲ ދޮގު ހެއެްދެވީ ކަމުގައި ސާބިތު ވެއްޖެނަމަ އޭނާޔާމެދު ހެޔޮކޮށް ކަންތައް ކުރެއްވުމުގެ ވިސްނުންފުޅު ބަދަލު ކުރައްވާނޭ ކަމަށްވެސް ވިދާޅުވިއެވެ.]
ބަދްރު ހިނދުކޮޅަކު ވިސްނަވައިލައްވާން އިންނެވުމަށް ފަހު ވިދާޅުވިއެވެ. [އަބޫ މަންޞޫރެވެ. އަވަހަށް ގްރަނާދާއަށް ވަޑައިގަންވާން ތައްޔާރުވެ ވަޑައިގަންނަވާށެވެ.]
މަންޞޫރު ވިދާޅުވިއެވެ. [އަޅުގަނޑު މީނީ ހަނގުރާމައަށް ނުކުންނާން ތައްޔާރުވެގެންނެވެ. ސަރަހައްދުގައި އޮތް ލަޝްކަރު މިހާރު އޮންނާނީ އަޅުގަނޑުގެ އިންތިޒާރުގައެވެ.]
[މަންޞޫރުގެ ބަދަލުގައި އެތަނަށް އަޅުގަނޑު ހިނގައިދާނަމެވެ.]
[ބަދުރު ރޭ ހަތަރުދަން ހޭދަކުރެއްވީ އަސްކޮޅުމަތީގައެވެ. އެހެންވީމާ އަރާމު ބޭނުންފުޅުވާނެއެވެ.]
[މަންޞޫރު ވީހައިވެސް އަވަހަކަށް ގްރަނާދާއަށް ވަޑައިގަތުމަކީ ވަރަށް މުހިއްމު ކަމެކެވެ. އަޅުގަނޑުގެ ސިޓީއެއް ގެންދަވައި އައްޒަޣަލަށް އަރުވާށެވެ. އޭނާ އަރިހު ވަރަށް ސާފުކޮށް ވިދާޅުވާށެވެ. އަޅުގަނޑުމެންގެ ހަނގުރާމައަކީ ރަސްކަލަކަށްޓަކައި ނުވަތަ ވަކި ވެރިއަކަށްޓަކައި ކުރާ ހަނގުރާމައެއް ނޫނެވެ. އަޅުގަނޑުމެންގެ ގުރުބާނީގެ ހަމައެކަނި ބޭނުމަކީ ގްރަނާދާއަކީ އަޅުގަނޑުމެންގެ މައި ދިފާޢީ މަރުކަޒު ކަމުގައި ހެދުމަށް ފަހު، އަޅުގަނޑުމެންގެ މުޖާހިދުން އެއްތަންކޮށް، ކްރިސްޓިއަނުންގެ އަނިޔާވެރިކަމުގެ ދަށުގައި ފިތިފައި ތިބި އިސްލާމް ރައްޔިތުން އެ އަނިޔާވެރިކަމުން ސަލާމަތްކޮށް، މިނިވަންކުރުމެވެ. އަބުލްޙަސަން އަވަހާރަވީމާ، އައްޒަޣަލަކީ އަޅުގަނޑުމެންގެ ރަސްގެފާނު ކަމުގައި ގަބޫލުކުރީ މި ދެންނެވުނު ބޭނުމަށްޓަކައެވެ. އަބޫ ޢަބްދުﷲގެ ގޮތާއި ބާވަތް އަޅުގަނޑުމެންނަށް އެނގިއްޖެއެވެ. ބޮޑުބޭބޭފުޅެއްގެ ހައިސިއްޔަތުން އަބޫ ޢަބްދުﷲގެ ހުރިހައި ކުށަކަށް މާފުދެއްވުމަކީ އައްޒަޣަލަށް އޮތް ޒާތީ ހައްގެކެވެ. އެކަމަކު އޭނާ މިހާރު ތައުބާވެވަޑައިގެން އިސްލާހުގެ މަގަށް އެނބުރިވަޑައިގެންފިއޭ ވިދާޅުވުމަށް ފަހު އޭނާއަށް ރަސްކަން ދެއްވައި އެކަން ގަބޫލުކުރާށޭ ރައްޔިތުން ގާތު ވިދާޅުވުމުގެ ހައްގެއް އައްޒަޣަލަކަށް ނެތެވެ. އައްޒަޣަލަށް ދަންނަވާށެވެ. އަބޫ ޢަބްދުﷲ އިޚްލާސްތެރިކަމާއެކު ތައުބާވެ ވަޑައިގަތް ކަމުގައި ވިޔަސް، އޭނާއަކީ ޣީރަތްތެރިކަން މަރުވެފައިވާ ބޭފުޅެކެވެ. މަރާއި ދިރިތިބުމާ ދެމެދު ތެޅިތެޅި ތިބި ރައްޔިތުންގެ ބޮލަށް ގަބުރެއް ސަވާރު ނުކުރައްވާށެވެ. ދިރިހުންނެވިހައި ދުވަހަކު އަމިއްލަ އިސްތަށިފުޅުގައި އެޅިފައި އޮތް ވާޖިބުތައް އަދާކުރެއްވުމަށް ފަހު، އިސްލާމުންގެ މިނިވަންކަމަށާއި އެބައިމީހުންގެ ހެވާއި ލާބައަށްޓަކައި، ދެން އަންނާނޭ ވެރިޔަކު ކަނޑައެޅުމުގެ ހައްގު ރައްޔިތުންނަށް ދޫކޮށްލައްވާށެވެ. އަބޫ ޢަބްދުﷲގެ ފަރާތުން އަޅުގަނޑަށް ކުރިމަތިވާނޭ ނުރައްކަލެއް ނެތެވެ. އޭނާ އަޅުގަނޑަށް މަކަރު ހައްދަވައި، އޮޅުވައިލައްވައިގެން ގަތުލުކޮށްލާން މަސައްކަތް ކުރެއްވިއެވެ. އަޅުގަނޑު އޭނާއަށް މާފުކޮށްފާނަމެވެ. އެކަމަކު އެއް ފަހަރު ޚިޔާނަތްތެރިވީ މީހަކުގެ އަތްމައެްޗަށް ގައުމުގެ ވެރިކަން ދޫކޮށްލެއްވުމާ އަޅުގަނޑު ދެކޮޅެވެ. ސަރަހައްދުގައި ކުޅަ ހަނގުރާމައަށް އޭނާ ހައެއްކަ މީހުން ނެރެދެއްވައިގެން ބަދަލު ވެވަޑައިގެންގެންފިކަމުގެ ހެކި ދެއްކެވުމުގެ ސަބަބުން އޭނާއަށް ދެއްވާން ޖެހޭނަމަ، ދެއްވާން އޮތް އެންމެ ބޮޑު އިނާމަކީ އޭނާގެ ފާއިތުވެދިޔަ ކުށްތަކަށް އަދަބެއް ނުދެއްވުމެވެ. އެކަމަކު އޭނާއަށް ލޮއްޚާގެ ވެރިކަން ދެއްވުމާއި ގްރަނާދާގެ ތަޚުތުގެ ވާރިސުކަމުގައި ގަބޫލުފުޅު ކުރެއްވުމަކީ އޭނާއަށް ހައްގުވާ އިނާމަށްވުރެ މާ ބޮޑު އިނާމެކެވެ.]
މަންޞޫރު ވިދާޅުވިއެވެ. [އައްޒަޣަލް ދެއްވާނޭ ޖަވާބު އަޅުގަނޑަށް އެނގެއެވެ. އޭނާ ވިދާޅުވާނެއެވެ. އަޅުގަނޑު އަބޫ ޢަބްދުﷲއަށް ހެޔޮކޮށް ހިތައި، ހައްގު މަގާމު ނުދީފިނަމަ ރައްޔިތުން ދެކޭނީ އަޅުގަނޑު ކުރި ޖިހާދަކީ އަމިއްލަ ބޭނުމަކަށްޓަކައި ކުރި ޖިހާދެއް ކަމުގައެވެ. މީގެ އިތުރަށް އަހުލީ ހަނގުރާމައެއް ފެށިދާނެތީވެސް އަޅުގަނޑު ބިރުގަނެއެވެ. އަބޫ ޢަބްދުﷲ އެފަދަ ކަމެއް ކުރުމަކީ ދުރުކަމެއް ނޫނެވެ.]
ބަދްރު ބިން މުޣީރާ ވިދާޅުވިއެވެ. [އޭނާގެ ކަރުފުޅުގައި ވާގަނޑެއް ޖަހައިގެން ބާޒާރުމަތީގައި ގަންނުހިންގުވާ ދޫކޮށްލެއްވުމަކީ ކުޑަ ހެޔޮކަމެއްތޯއެވެ؟ އައްޒަޣަލަށް ދަންނަވާށެވެ. އެއް ފަހަރު ޚަސީލަތް ދެނެގަނެވިފައިވާ ޚާއިނެއްގެ އަތްޕުޅުމައްޗަށް އުއްމަތާއި މިއްލަތް އާރާސްތުކުރުމުގެ މަސްއޫލިއްޔަތު ދޫކޮށްލާން ތައްޔާރަށް ތިބި، ޣާފިލު ބަޔަކު ކިޔާފާނެ އެއްޗަކަށް ނުބައްލަވާށެވެ. އިއްތިހާދުގެ މާނައަކީ ފަހަރެއްގައިވެސް އަހަކާއި ހިމާރެއް އެއް ގާޑިޔަލެއްގައި ބަނުމެއް ނޫނެވެ. ފަންސާސް ސިފައިން ކޮނޑުމަތީގައި ފަންސާސް ގަބުރު އުފުލުމަކީ އެބައިމީހުން ސަތޭކަ ސިފައިންނަށް ވުމެއް ނޫނެވެ. އަހުލީ ހަނގުރާމައެއް ފެށުނަނުދެއްވައި ދަފަރާ ކުރެއްވުމަށްޓަކައި ކުރައްވާން ޖެހިވަޑައިގަންނަވާ ކަމަކީ ނާގާބިލު ބައެއްގެ އަތްމައްޗަށް ވެރިކަން ދޫކޮށްލެއްވުމެއް ނޫނެވެ. އޭގެ ބަދަލުގައި ކުރައްވާން ޖެހިވަޑައިގަންނަވާ ކަމަކީ ނާގާބިލު މީހުންނަށް ތަޚުތާ ދިމާއަށް ބަލައިލާންވެސް ނުކެރެޭ ވަރަށް ރައްޔިތުން ހޭލުންތެރި ކުރެއްވުމެވެ. ރައްޔިތުންގެ ރައުޔު ބަދަލު ކުރެއްވުމުގެ މަސައްކަތް ކުރެއްވުމެވެ. ދިރިދެމި އޮންނާން ބޭނުންވާ ގައުމެއްގައި ފެންނާނީ ޣައްދާރުންނާއި ޚާއިނުން ކުދިކޮށް ކޮށައިލާ މަންޒަރެވެ. އެމީހުންނަށް ރިޝްވަތު ދީގެން ހިތްހަމަޖައްސައިދޭ މަންޒަރެއް ނޫނެވެ.]
މަންޞޫރު ވިދާޅުވިއެވެ. [ސިޓީފުޅު ލިޔުއްވާށެވެ. އަޅުގަނޑު މިހިރީ ގްރަނާދާއަށް ދާން ތައްޔާރަށެވެ.]
(2)
ދުވަސްކޮޅެއް ފަހުން މަންޞޫރު އެނބުރިވަޑައިގަތީ އައްޒަޣަލްގެ ޖަވާބުގެ ސިޓީފުޅަކާއެކުގައެވެ.
[ޢިއްޒަތްތެރި އެކުވެރިޔާއެވެ! މަނިކުފާނުގެ ސިޓީފުޅު އަޅުގަނޑަށް ލިބުނީ އަބޫ ޢަބްދުﷲ އޭނާގެ އެންމެ ފަހުގެ ގެއްލުން އަޅުގަނޑުމެންނަށް ދިންތަނާއެވެ. އޭނާ ދުޝްމިނުންނާ ލޮއްޚާ ހަވާލުކޮށްފިއެވެ. ފެރްނާންދޯގެ އަށްހާސް ސިފައިން އެރަށަށް އަރައިފިއެވެ. އަޅުގަނޑުގެ ނިޔަތް އެއްގޮތަކަށްވެސް ނުބައެއް ނޫނެވެ. އެކަމަކު ސިޔާސީ ކަތިފިޔަވަޅަށް ގުދުރަތުން މާފު ނުކުރައްވަނީ ކަމުގައި ވެދާނެއެވެ. މަނިކުފާނުގެ ކުރިފުޅުމަތީގައްޔާއި ގައުމުގެ ކުރިމަތީގައި އަޅުގަނޑުގެ ލަދުވެތިކަމުގެ ކަރުނަ ފިޔަވައި އެހެން އެއްޗެއް ނެތެވެ.
ލޮއްޚާގެ މައްޗަށް ކްރިސްޓިއަނުން ވެރިވުމަކީ އަޅުގަނޑުމެންގެ މެޔަށް ހަރައިލެވުނު ޚަންޖަރަކަށްވުރެ ކުޑަ ކަމެއް ނޫނެވެ. މަނިކުފާނު އަޅުގަނޑުގެ ގާތުގައި ހުންނެވިނަމަ މިފަދަ ނުބައި ފިޔަވަޅެއް ނޭޅުނީސްކަން ނޭނގެއެވެ. ހިތް ހަލާކުވެފައިވާ މުސްކުޅިއަކަށް މި ވަގުތު މިވަނީ މަނިކުފާނުގެ އެހީފުޅުގެ ބޭނުން ޖެހިފައެވެ. އެއީ އަޅުގަނޑުގެ އަމިއްލަ ބޭނުމަކު ނޫނެވެ. ގްރަނާދާގެ ތަޚުތާއި ތާޖުގެ ދިފާޢުގައެއްވެސް ނޫނެވެ. އިސްލާމުންގެ ޢިއްޒަތާއި މިނިވަންކަން ހިމާޔަތް ކުރުމަށްޓަކައެވެ.
އަޅުގަނޑަށް އެހީތެރިވެވަޑައިގަތުމަށްޓަކައި ހަމަ މިހާރު ގްރަނާދާއަށް ވަޑައިގަންނަވާށެކޭ އަޅުގަނޑެއް ފަހަރެއްގައިވެސް ނުދަންނަވާނަމެވެ. މަނިކުފާނަކީ ގްރަނާދާގެ އެންމެ ފަހުގެ އުއްމީދެވެ. ގެނބެމުން މިދާ އޮޑީގެ އެންމެ ފަހުގެ އެހީތެރިޔާއެވެ. އަޅުގަނޑު ބޭނުންވަނީ މަނިކުފާނަކީ ނުބައިކަންކަމުން ރައްކާތެރިވެވަޑައިގެން ހުންނެވި ބޭފުޅެއްގެ ގޮތުގައި ދެކޭށެވެ. ބާޒުގެ ވާދީއަކީ އަޅުގަނޑުމެންގެ އެންމެ ފަހުގެ މަކާނެވެ. މަނިކުފާނު ސަރަހައްދުގެ ހަމަލަތައް ވަރުގަދަ ކުރައްވައިފިނަމަ ދެ މައިދާނެއްގައި ހިފަހައްޓައިލުން ދުޝްމިނުންނަކަށް ފަސޭހައެއް ނުވާނެއެވެ. އަޅުގަނޑު ލޮއްޚާ ދެވަނަ ފަހަރަށް ހިފޭތޯ މަސައްކަތް ކުރާނަމެވެ.
އަޅުގަނޑަށް ލަފާކުރެވޭ ގޮތުގައި ފެރްނާންދޯގެ ކުރިމަތީގައި ގްރަނާދާއަށްވުރެ ބާޒުގެ ވާދީގެ އަހުމިއްޔަތުކަން ކުޑައެއް ނުވާނެއެވެ. ގްރަނާދާއަށް ހަމަލަދިނުމުގެ ކުރީން ތިޔަ ތަނަށް އޭނާ ހަމަލަދިނުން ވަރަށް ބޮޑަށް އެކަށީގެންވެއެވެ. އެހެންވީމާ ތައްޔާރީތައް އަވަސް ކުރައްވާށެވެ. ދަރިފުޅާއެވެ! އަޅުގަނޑުމެންގެ ފަރުވާކުޑަކަމުގެ ސަބަބުން ދަރިފުޅުގެ ހިތްވަރުފުޅު އެއްގޮތަކަށްވެސް ބަލިނުކުރައްވާށެވެ. ދަރިފުޅު މާޔޫސީގެ ތެރެއަށް ވެދެވަޑައިގެންފިނަމަ އަންދަލުސްގެ އިސްލާމުން އުއްމީދުގެ ބައްތި އިރުއެރުމުގެ ކުރީން ނިވިދާނެތީ އަޅުގަނޑު ބިރުގަނެއެވެ.]
ބަދްރު ބިން މުޣީރާއާއި ބަޝީރް ބިން ޙަސަނާއި މަންޞޫރާ ތިން ބޭފުޅުން ތިއްބެވީ ހިތާމަވެރި މޫޑެއްގައެވެ. އައްޒަޣަލްގެ ސިޓީފުޅުގެ އަލީގައި ގްރަނާދާއާއި އަންދަލުހާއި އިސްލާމުންގެ ކުރިމަގާމެދު ޚިޔާލުފުޅު ބަދަލުކުރައްވަނީއެވެ. މިފަދައިން ވާހަކަފުޅު ދައްކަވާން އިރުކޮޅަކު ތިއްބެވުމަށް ފަހު މަންޞޫރު ޖީބުފުޅުން އަނެއްކާވެސް ސިޓީފުޅެއް ނަންގަވައި ބަދްރަށް ފޯރުކޮށްލައްވައިފިއެވެ.
[މިއީ އަބޫ ޢަބްދުﷲގެ އަނބިކަނބަލުން ދެއްވި ސިޓީފުޅެކެވެ. އަޅުގަނޑު ގާތު ވިދާޅުވީ ލޮއްޚާ ބީވެގެން ދިއުމުގެ ހިތާމަފުޅު ކުޑަ ނުވަނީސް މި ސިޓީފުޅު މަނިކުފާނަށް ނާރުވާށޭއެވެ. އެކަމަނާ ބިރުފުޅުގަންނަ ކަމަށް ވިދާޅުވީ ފިރިކަލުން ދިފާޢުކުރައްވާން ލިޔުއްވި ސިޓީފުޅެއް ކަމަށް ހިއްތަވައި، ވިދާޅުވުމުގެ ކުރީން ވީއްދަވައިލައްވަފާނެތީއެވެ.]
ސިޓީފުޅު ބަޝީރުގެ އަތްޕުޅަށް ދެއްވައިފައި ބަދްރު ވިދާޅުވިއެވެ. [ވިދާޅުވާށެވެ.]
ބަޝީރު ވިދާޅުވާން ފައްޓަވައިފިއެވެ.
[ފަޚުރުވެރިވުން ޙައްގު އަޚާއެވެ. ބޮޑުބޭބޭފުޅުގެ އިޒުނަފުޅާއެކު މަނިކުފާނުގެ ސިޓީފުޅު އަޅުގަނޑުވެސް ކިޔައިފީމެވެ. ބޮޑުބޭބޭފުޅު ޖަވާބުވެސް ދެއްވައިފިކަން އަޅުގަނޑަށް އެނގެއެވެ. ހުރިހައި ކުށެއް އަމިއްލަފުޅު އިސްތަށިފުޅުގައި އަޅުއްވައިފިނޫންތޯއެވެ؟ އެކަމަކު ދަންނަވަންތޯއެވެ؟ ހަގީގަތުގައި މި ގައުމީ ފާފައިގެ ބޮޑު ހިއްސާއެއް އެޅެނީ އަޅުގަނޑުގެ ބޮލުގައެވެ. އަޅުގަނޑުގެ ފިރިކަލުން ހިތްޕުޅުގެ ސާފުކަމާއި އިޚްލާސްތެރިކަމާއެކު ތައުބާވެވަޑައިގެންފިއޭ އަޅުގަނޑު ނުދެންނެވިނަމަ ބޮޑުބޭބޭފުޅު އޭނާއަކަށް އިތުބާރެއް ނުކުރެއްވީހެވެ. އެންމެ ފުރަތަމަ ކަމެއްގެ ގޮތުގައި އަމިއްލަފުޅަށް އަޖުމަ ބެއްލެވީހެވެ. އެންމެ ފުރަތަމަ ސިފާރިޝް ކުރެއްވީ ރާނީއެވެ. އަޅުގަނޑު އެކަމަނާގެ ވާހަކަފުޅަށް ތާއީދުކުރީމެވެ. އަޅުގަނޑު މި ސިޓީ މި ލިޔަނީ މަނިކުފާނުގެ ހިތްޕުޅުގައި ބޮޑުބޭބޭފުޅާމެދު ޝައްކެއް އުފެދިދާނެތީއެވެ.
މަނިކުފާނު ކަނޑިކޮޅު އުފުއްލެވީ އަޅުގަނޑުވެސް ހިމަނައިގެން އަންދަލުސްގެ ހުރިހައި އަންހެންދަރީންގެ ރައްކާތެރިކަމަށްޓަކައެވެ. ދަންނަވަންތޯއެވެ؟ އަލްޙަމްރާގެ ހަތަރުފާރުގެ އެތެރެއަށްވުރެ މާ ބޮޑަށް މަނިކުފާނުގެ ކަނޑިކޮޅަށް އަޅުގަނޑު އިތުބާރު ކުރަމެވެ. މަނިކުފާނުގެ ކޮއްކޮއެއްގެ ހައިސިއްޔަތުން އަޅުގަނޑުގެ އެންމެ ފުރަތަމަ އަދި އެންމެ ފަހުގެ ކުށަށް މާފުކުރައްވާތޯ ދެންނެވިދާނެތޯއެވެ؟ ﷲ ދެނެވޮޑިގެންވާނެއެވެ. މަނިކުފާނަކީ އަޚެއް ކަމުގައި އަޅުގަނޑު މި ދަންނަވަނީ އަޅުގަނޑުގެ ކުރިމަތީގައި އަޅުގަނޑާއި މަނިކުފާނާ ދެމެދު އޮތް ގުޅުމަކީ ލޭގެ ގުޅުމަށްވުރެވެސް ގާތް ގުޅުމެއް ކަމަށް ގަބޫލުކުރީތީއެވެ.
މަނިކުފާނުގެ ކޮއްކޮ އާއިޝާ]
ބަދްރު ބިން މުޣީރާ މަންޞޫރާ ދިމާއަށް ބައްލަވައިލައްވައިފައި ސުވާލުކުރެއްވިއެވެ. [މީގެ މާނައަކީ އަބޫ ޢަބްދުﷲގެ އަނބިކަނބަލުން އަދިވެސް އިންނެވީ ގްރަނާދާގައޭތޯއެވެ؟]
[އާދޭހެވެ. އެކަމަނާ ގެންދަވާން އަބޫ ޢަބްދުﷲ މަސައްކަތްކުރެއްވިއެވެ. އެކަމަކު ހަނގުރާމައިގެ ނުރައްކާތެރިކަން ބޮޑުވެފައި ވުމާއެކު އެކަމަނާ ވަޑައިގަތުން ރަނގަޅު ނުވާނެ ކަމަށް އަބޫ ޢަބްދުﷲގެ މަންމާފުޅު ވިދާޅުވީއެވެ.]
(3)
ކްރިސްޓިއަނުންގެ ފަނަރަ ހާސް މީހުންގެ ލަޝްކަރެއް ލޮއްޚާއަށް ޖަމާވެއްޖެއެވެ. އަބޫ ޢަބްދުﷲ ގްރަނާދާގެ އެކި ރަށްރަށަށް ޖާސޫސުން ފޮނުވައިގެން ފެރްނާންދޯ ދީފައިވާ ފައިސާގެ އެހީގައި، ޒަމީރު މަރުވެފައިވާ މުނާފިގުން ގަތުމުގެ މަސައްކަތް ފަށައިފިއެވެ. ފެރްނާންދޯއާ ގުޅުނު މީސްމީހުންގެ އުއްމީދުތައް އަލުން އާވާން ފަށައިފިއެވެ. އަބޫ ޢަބްދުﷲގެ ބާރު ދިޔައީ އެއްދުވަހުން އަނެއް ދުވަހަށް ގަދަވަމުންނެވެ.
އަނެއްކޮޅުން ކޮންމެ ގޮތެއް ހަދައިގެންވެސް އަމާންކަމުގައި ތިބޭން ބޭނުންވެގެން ތިބި މީސްމީހުން އެހެން މަސައްކަތެއް ފަށައިފިއެވެ. އެއީ ގްރަނާދާގެ އިސްލާމުން ދޫނުކޮށް ހަނގުރާމަ ކުރަމުން ގެންދާނަމަ، އެކަމުގެ އަދަބު ރަށުގައި ގާއިމުވެ ތިބި ނިކަމެތި އިސްލާމުންނަށް ލިބޭނޭ ކަމުގެ މެސެޖު ފެތުރުމުގެ މަސައްކަތެވެ. އަންދަލުހަކީ އިސްލާމުންނާއި ކްރިސްޓިއަނުންގެ ގައުމެކެވެ. އަދަދާއި ބާރަށް ބަލާނަމަ ވަރުގަދައީ ކްރިސްޓިއަނުންނެވެ. އެހެންވީމާ އެމީހުން ބުނާ ގޮތަށް ހެދުމަށްވުރެ ފައިދާހުރި ގޮތެއް އިސްލާމުންނަށް ނެތް ކަމުގައްޔާއި އެމީހުން އަމިއްލަ ރަށުގެ އަހުލުވެރިންނަށް އަނިޔާވެރި ނުވާނޭ ކަމުގެ އަޑު ފަތުރަމުން ގެންދާން ފަށައިފިއެވެ. އެމީހުން ބުނަމުން ގެންދާ ގޮތުގައި ކްރިސްޓިއަނުންގެ ބާރު ގަދަ ވެއްޖެނަމަ، އިސްލާމުން ރަށުން ބޭރުކޮށްލާނޭ ކަމަށް ދެކެވޭ ވާހަކަތަކަކީ ކުށްހިއެއްގެ މައްޗަށް ބިނާ ކޮށްފައިވާ ދޮގު ވާހަކަތަކެކެވެ. އިސްލާމުން ހިތުގެ އަޑީން އީމާންވެގެން ތިބިހައި ހިނދަކު އެއްވެސް ނުރައްކަލެއް ކުރިމަތި ނުވާނޭ ކަމަށް އެމީހުން ގެންދަނީ ކިޔަމުންނެވެ.
އަބޫ ޢަބްދުﷲއާ މެދު އެމީހުން ފަތުރަމުން ގެންދާ ވާހަކަތައް ހުރީ މި ދަންނަވާ ފަދައިންނެވެ. ފެރްނާންދޯއާ ގުޅިގެން ހުރެ، އަބޫ ޢަބްދުﷲ ބޭނުން ވަނީ އަންދަލުސްގެ އިސްލާމުންގެ ރައްކަލަށްޓަކައި މަސައްކަތް ކުރާށެވެ. ފެރްނާންދޯ ވަނީ އަބޫ ޢަބްދުﷲއާ ދިމާއަށް އެކުވެރިކަމުގެ އަތް ދިއްކޮށްފައެވެ. އެ އަތުގައި ނުހިފައިފިނަމަ، މާދަމާ، ފާތިޙެއްގެ ހައިސިއްޔަތުން އިސްލާމުންނާ މެދު ރަނގަޅަކަށް ފެރްނާންދޯ ކަމެއް ނުކުރާނެއެވެ.
ކްރިސްޓިއަން ލަޝްކަރާއެކު އަބޫ ދާވޫދްވެސް ލޮއްޚާއަށް އަތުވެއްޖެއެވެ. ހާލަތު ރަނގަޅަށް ބަލައި މުޢާއިނާ ކުރުމަށް ފަހު އޭނާ ފެރްނާންދޯއަށް އެންގީ ގްރަނާދާއަށް ފައިސަލާކުރުވަނިވި ހަމަލައެއް ދިނުމުގެ ވަގުތު ޖެހިއްޖެ ކަމުގައެވެ. ފެރްނާންދޯ ގޮސް ލޮއްޚާގެ ލަޝްކަރުގެ ކޮމާންޑަރުކަމާ ހަވާލުވެއްޖެއެވެ. އެޔަށް ފަހު ކުއްލިއަކަށް ލައަލްބެކާއާއި މެޝީނާއަށް ހަމަލަދީ އެ ސަރަހައްދު ހިފައިއެވެ. އަދި ސެޚްރާ ހިސާރުކޮށްފިއެވެ. އައްޒަޣަލް އޭނާގެ ލަޝްކަރުގެ ތިންބައިކުޅަ އެއްބައި ގްރަނާދާއަށް ދޫކުރެއްވުމަށް ފަހު ސެޚްރާއާ ދިމާއަށް ދަތުރު ފައްޓަވައިފިއެވެ. އޭނާ ވަޑައިގެން ޖާގަ ޖެއްސެވީ ސެޚްރާއާ ހައެއްކަ މޭލުގެ ދުރުމިނުގައެވެ. ހައެއްކަ ދުވަސް ވާންދެން ދުޝްމިނުންނާ ކުދިކުދި ކުރިމަތިލުންތައް ހިނގިއެވެ. ރަށުގެ އަހުލުވެރިން ހަނގުރާމަ ކުރަމުން ގެންދިޔައީ ރަށުގައި ބަންދުވެގެން ތިބެއެވެ. އައްޒަޣަލް ހަމަލަދެއްވަމުން ގެންދެވީ ފުރަގަހުންނެވެ. އުތުރު އިރުމަތި ފަރާތުން ކުއްލިއަކަށް ބަދްރު ބިން މުޣީރާ ހަލުވިކަމާއެކު ކުރިއަށް ޖެހިވަޑައިގެންފިއެވެ. ހާލަތަށް ބަލައިފައި މަޖުބޫރުވެގެން ފެރްނާންދޯ ސެޚްރާގެ ހިސާރު ދޫކޮށްލައިފިއެވެ. އެޔާއެކު އޭނާއަށް ލިބުނު ޚަބަރަކީ ފަރަންސޭސިވިލާތުގެ ރަސްގެފާނު ލަޝްކަރަކާއެކު ޕައިރެސީހާ ދިމާއަށް ދަތުރުކުރަމުންދާ ކަމުގެ ޚަބަރެވެ. ސެޚްރާގެ ހިސާރު ދޫކޮށްލުމަށް ފަހު ފެރްނާންދޯ އިސްކަން ދިނީ އޭނާގެ ލަޝްކަރުގެ ދިހަ ހާސް މީހުން ނުކުމެ އުތުރު އިރުމަތީން ކުރިއަރަމުން އަންނަ މުޖާހިދުންގެ ލަޝްކަރު ހުއްޓުވޭތޯ މަސައްކަތް ކުރާށެވެ. އޭނާ ދިޔައީ ލޮއްޚާއާއި ލައަލްބެކާއާއި މެޝީނާ ބެހެލެއްޓޭވަރުގެ ލަޝްކަރެއް އަބޫ ޢަބްދުﷲއާ ހަވާލުކޮށްފައެވެ. އެތަން ދޫކޮށް ދާން ޖެހުނީ ފަރަންސޭސި ރަސްގެފާނުގެ ހަމަލައިގެ ނުރައްކާތެރިކަން އޮތުމާއެކު އެކަން ހުއްޓުވާނޭ ގޮތެއް ރޭވުމަށްޓަކައެވެ.
(4)
ފަރަންސޭސި ރަސްގެފާނާއެކު ސުލްހައިގެ މުއާހަދާއެއް އެކުލަވައިލެވޭތޯ ބެލުމަށްޓަކައި ފެރްނާންދޯ ކްރިސްޓިއަން ފާދިރީންގެ ބަޔަކު ފޮނުވައިފިއެވެ. އެބައިމީހުން ރަސްގެފާނަށް ވިސްނައިދިނީ މިހާރު ކުރެވެމުންދާ ހަނގުރާމައަކީ ޞަލީބާއި ހަނދުފަޅިއާ ދެމެދު ކުރެވޭ މުގައްދަސް ހަނގުރާމައެއް ކަމުގައެވެ. މިފަދަ ދަނޑިވަޅެއްގައި ޞަލީބުގެ ހިޔަލުގައި ތިބި ދެ ގާއިދަކު އެކަކު އަނެކަކާ ހަނގުރާމަ ކުރާން ފަށައިފިނަމަ އެކަމުގެ ފައިދާ އިސްލާމުންނަށް ކުރާނޭ ކަމުގައެވެ. ކަސްތިއްޔާގެ އިސް ފާދިރީއާއި ފަރަންސޭސިންގެ އިސް ފާދިރީ ކަރާއި ކަރުޖައްސައި ސަލާންކޮށްފިއެވެ. އެޔާއެކު ދެ ރަސްކަލުންނަށްވެސް ޖެހުނީ ސަލާންކުރާށެވެ. އިސްލާމުންނާ ދެކޮޅަށް ކުރާ ހަނގުރާމައިގެ ސަވާބު ލިބިގަތުމުގެ އެދުމުގައި ފަރަންސޭސި ރަސްގެފާނު އޭނާގެ ދެހާސް ސިފައިންނާއި ވިހި ގުރާބު ފެރްނާންދޯއާ ހަވާލުކޮށްފިއެވެ.
މާ ކުރީއްސުރެ ފެރްނާންދޯއަށް ވިސްނިފައި އޮތް ގޮތުގައި މަލާގާ ހިފައިގެން ނޫން ގޮތަކަށް ގްރަނާދާގެ ބާރު ކަނޑުވައެއް ނުލެވޭނެއެވެ. މަލާގާއަކީ ގްރަނާދާގެ އެންމެ މުހިއްމު ބަނދަރެވެ. އެ ރަށް ހިފުމާއެކު ގްރަނާދާގެ ކަނޑުގެ ބާރު ނުވަތަ އައްސޭރިފަށުގެ ބާރު މުޅީން ކަނޑުވައިލެވުނީއެވެ. މި މަގުސަދު ހާސިލު ކުރެވިއްޖެނަމަ މިހާރުވެސް އޭނާގެ ބާރުގެ ދަށުގައި އޮތް އަލްމީރިއާގެ ބަނދަރާއެކު، މަލާގާގެ ބަނދަރު ލިބުނީމާ އަންދަލުހާއި މޮރޮކޯއާ ދެމެދު ކަނޑުދަތުރުކުރާން އޮންނަ ހުރިހައި މަގަކަށް ބާރު ފޯރުވުނީއެވެ. އެޔާއެކު އިސްލާމުންނަށް އެހީތެރިވާން އަންނާނެ ކަމަށް އެ މީހުން އުއްމީދުކޮށްގެން ތިބޭ ގައުމުތަކަށް އޮތް މަގުވެސް ބަންދު ކުރެވުނީއެވެ. މަލާގާ ހިފީމާ، ތިމަންމެން މިހާރު މިތިބީ ކްރިސްޓިއަނުންގެ ދަށުގައި ކަމުގެ އިހުސާސް އިސްލާމުން ކުރާނޭ ކަމުގެ ޔަގީންކަން ފެރްނާންދޯގެ ހިތުގައި އޮވެއެވެ. މީގެ އިތުރަށް ނެވާދާގެ ބާޣީ ގަބީލާތަކުގެ މައްޗަށްވެސް ބާރު ފޯރުވޭނޭ ކަމަށް އޭނާ ދެކެއެވެ. އެހެންވީމާ އޭނާ އަބޫ ޢަބްދުﷲއަށް އެންގިއެވެ. [އަހަރެންގެ ލަޝްކަރުން މަލާގާއަށް ކުއްލި ހަމަލައެއް ދޭނަމެވެ. އެއީ މުހިއްމު ރަށެއް ކަމުގައި ވާތީ އައްޒަޣަލް ގްރަނާދާ ދޫކޮށްފައި މަލާގާއަށް މިސްރާބު ޖަހާނެއެވެ. ދަނޑިވަޅުގެ ބޭނުންކޮށްގެން އަވަހަށް ގޮސް ގްރަނާދާ ހިފާށެވެ.]
ކުޑަ ދުވަސްކޮޅަކަށް ފަހު ފެރްނާންދޯގެ ކަނޑުމަތީގެ ލަޝްކަރު މަލަގާއާ ދާން ފުރައިފިއެވެ. ޚުދު އޭނާވެސް ހުޅަނގު ދެކުނުގައި ބުރެއް ޖަހައިލުމަށް ފަހު މަލަގާއާ ދިމާއަށް ދަތުރު ފަށައިފިއެވެ. ކަނޑުމަގުން މަލަގާއަށް ދިން ހަމަލައަކީ ކުޑަކޮށްވެސް ހީކުރެވިފައި ނެތް ކަހަލަ ހަމަލަައަކަށް ވުމުން، ކްރިސްޓިއަނުން އެ ރަށް ހިސާރުކުރީ އިސްލާމުންގެ ފަރާތުން މާ ބޮޑު ދެކޮޅު ހެދުމަކާ ކުރިމަތި ނުލައެވެ.
އައްޒަޣަލްގެ މުޅި ސަމާލުކަން ހުއްޓިފައި އޮތީ ލޮއްޚާއަށެވެ. މަލާގާގެ ހިސާރުގެ ޚަބަރު ލިބިވަޑައިގަތުމާއެކު ކުޑަ ލަޝްކަރެއް ގްރަނާދާއަށް ދޫކުރައްވައިފައި އޭނާ ދަތުރު ފެއްޓެވީ މަލާގާއާ ދިމާއަށެވެ. އެކަމަކު މަލަގާއާ ވަރަށް ކައިރިވީ ފަހުން އޭނާއަށް ލިބިވަޑައިގަތީ އަބޫ ޢަބްދުﷲ ގްރަނާދާއާ ދިމާއަށް ދާ ކަމުގެ ޚަބަރެވެ. އެހެންވީމާ މާޔޫސީއާއެކު، ލަޝްކަރުގެ ބޮޑު ބައެއް މަލާގާއާ ދިމާއަށް ފޮނުއްވައިފައި އޭނާ އެނބުރި ގްރަނާދާއަށް ދަތުރު ފައްޓަވައިފިއެވެ. އޭނާއަށް ވަޑައިގެންނެވުނުއިރު ގްރަނާދާގައި ތިބި ޣައްދާރުންގެ ބަޔަކު އަބޫ ޢަބްދުﷲއަށްޓަކައި ގްރަނާދާގެ ދޮރާށި ހުޅުވައިދީފިއެވެ. ދެން ފެނުނީ އަލްޙަމްރާގައި އަބޫ ޢަބްދުﷲގެ ދިދަ ވިހުރުވޭ މަންޒަރެވެ. ހިތްޕުޅަށް ކުޅަ ހިތި އަސަރާއެކު އައްޒަޣަލް އަނެއްކާވެސް މަލާގާއާ ދިމާއަށް އަނބުރައިލެއްވިއެވެ. މި ޚަބަރު އޭނާގެ ޚާއިނު ބޮޑޫބޭބެދަރިއަށް ލިބުމާއެކު ފަހަތުން ލަޝްކަރެއް ފޮނުވައި އައްޒަޣަލްގެ ލަޝްކަރަށް ހަމަލަދީފިއެވެ. އައްޒަޣަލްގެ ލަޝްކަރުގެ މުޖާހިދުން ވަރަށް ހިތްވަރާއެކު ހަނގުރާމަކުރިއެވެ. އެހެންނަމަވެސް ކްރިސްޓިއަނުންގެ އިތުރަށް އެބައިމީހުންގެ އަޚުންނާ ދެކޮޅަށް ހަނގުރާމަ ކުރާން ޖެހުނީމާ އިސާހިތަކު ހިތްވަރު އެލޭގޮތް ވެއްޖެއެވެ. ބަލިވެވަޑައިގަތީމާ އައްޒަޣަލް ހިމާޔަތް ހޯއްދެވީ އަލްޕުހަރާއިންނެވެ. އަނެއް ދުވަހު އޭނާއަށް ޚަބަރު ލިބިވަޑައިގަތް ގޮތުގައި މަލާގާގެ ލަޝްކަރުވެސް ފެރްނާންދޯއާ ހަނގުރާމަކޮށް ބަލިވެއްޖެއެވެ. އެޔާއެކު މަލާގާއަށް އެއްގަމު މަގުންނާއި ކަނޑުމަގުން ދާން އޮތް ހުރިހައި މަގެއް ބަންދުވެއްޖެއެވެ. އަލްޕުހަރާގެ ގަބަލީ މުޖާހިދުންގެ ފައުޖެއް ތައްޔާރު ކުރެއްވުމަށް ފަހު އައްޒަޣަލް އޭނާގެ މަރުކަޒަކަށް ޚިޔާރުކުރެއްވީ ބަސްތެވެ.
މަލާގާގެ ހަނގުރާމައިގައި އައްޒައިޣަރީ ވަރަށް ހިތްވަރު ކުރެއްވިއެވެ. އެހެންނަމަވެސް މަހަކަށް ވުރެ ގިނަ ދުވަހަށް ހަނގުރާމަ ދިގުލައިގެން ދިއުމާއި، އެހީތެރިކަމެއް ލިބޭނޭ އެއްވެސް މަގެއް ނެތުމުގެ ސަބަބުން ލަޝްކަރުގެ ހިތްވަރު އެލިއްޖެއެވެ. ފަރުބަދަމަތީގެ މަގަކުން މަލާގާއަށް ވަދެވޭނޭ މަގެއް ފެނިވަޑައިގަނޭތޯ އައްޒައިޣަރީ ދެތިން ފަހަރަކު މަސައްކަތް ކުރެއްވިއެވެ. އެހެންނަމަވެސް ހުރިހައި ދިމާއަކުންވެސް ކުރިމަތިވެވަޑައިގަތީ ފެރްނާންދޯގެ ލަޝްކަރުގެ ހަމަލަތަކެވެ.
އިރުއުތުރުން ވަޑައިގަތުމުގެ ބަދަލުގައި އިރުދެކުނުން ވަޑައިގެންނެވޭތޯ ބަދްރު ބިން މުޣީރާވެސް މަސައްކަތް ކުރެއްވިއެވެ. އެހެންނަމަވެސް ކުދި ހަމަލަތަކަކުން ފެރްނާންދޯގެ ލަޝްކަރު ބަލިކުރެއްވޭވަރެއް ނުވިއެވެ. ކުރީގެ ހިތި ތަޖުރިބާތަކަށް ބަލައިފައި ލަޝްކަރު އޮތް ގޮތަށް ނުކުމެ ހަމަލަ ދޭކަށް ފެރްނާންދޯ އަމުރެއް ނުދިނެވެ.
(5)
މަލާގާގެ އަހުލުވެރިންގެ ހާލަތު ނާޒުކު ފައްތަރަކަށް ވެއްޓިއްޖެއެވެ. ކާބޯ ތަކެތި ގެނައުމުގެ މަގު ބަންދުވީމާ ބަނޑަށް ޖެހޭފަދަ ހާލަތަކަށް ދިއުމުގެ ސަބަބުން ލަޝްކަރުން ގަބޫލުކުރަމުން ދިޔައީ ހަތިޔާރު ބެހެއްޓުން ނޫން ގޮތެއް ނެތް ކަމުގައެވެ. އެކަމަކުވެސް އައްޒައިޣަރީ ހިތްވަރުފުޅު ދުލެއް ނުކުރައްވައެވެ. ސުލްހަވާން ވާހަކަދައްކާ މީހުންގެ ކުރިމަތީގައި އޭނާގެ އޮތީ އެންމެ ވާހަކަފުޅެކެވެ. [އަހަރެންގެ މުޅަމަސްގަނޑު މަތީން ނޫން ގޮތަކަށް ދުޝްމިނުންނަކަށް ރަށަކަށް ނޭރޭނެއެވެ.] ލަޝްކަރުގެ ހިތްވަރު އެލޭ ކޮންމެ ފަހަރަކު ރޫހު އާލާވެގެން ދަނީ އޭނާގެ ތަގުރީރުންނެވެ. އެހެންނަމަވެސް މަލާގާގެ ޖައްވުން ކަޅު ވިލާތައް ނޫން އެއްޗެއް ނުފެންނަވަރުވީމާ ރަށުގެ އަހުލުވެރިންނެކޭ އެއްފަދައިން ލަޝްކަރުގެ ހިތްވަރު އަނެއްކާވެސް އެލިއްޖެއެވެ. ޣައްދާރުންގެ ބަޔަކު މަލާގާގެ ދޮރާށި ހުޅުވައިފިއެވެ. އަދި އައްޒައިޣަރީ ހައްޔަރުކޮށް ފެރްނާންދޯއާ ހަވާލުކޮށްފިއެވެ.
ފެރްނާންދޯގެ އަމުރަށް އައްޒައިޣަރީއަށް އެތައް އަނިޔާއެއް ކުރުމަށްފަހު ޝަހީދު ކޮށްލައިފިއެވެ. އޭގެ ފަހުން ފެނިގެން ދިޔައީ މަލަޚާގެ ރައްޔިތުންގެ މައްޗަށް އަނިޔާވެރިކަމާއި ގަދަބަދަވިކަމުގައި އެފަދަ ދެވަނައެއް ފެންނާނޭ ކަމަށް ހީވެސް ނުކުރެވޭ ވަރުގެ ބޮޑު ޠޫފާނެއް ވެރިވެގެން ދިޔަތަނެވެ. ފެރްނާންދޯގެ ލަޝްކަރުގެ މީހުން ކާމިޔާބީގެ އުފަލުގައި ރާގެ ތެރެއަށް ޣަރަގު ވެގެން ހިނގައްޖެއެވެ. މަސްތުގެ ހާލަތުގައި ތިބެގެން ވަހުޝީ އަމަލުތައް ހިނަގަމުން ދިޔައީ އެޔެއްމިޔެއެއް ބަލައިލުމެއް ނެތިއެވެ. އަންހެންނުން ގެތަކުން ނެރެގެން ބާޒާރަށް ގެންގޮސްފިއެވެ. ރައްޔިތުންނަށް ރާ ބޯށާއި އޫރުމަސް ކާން މަޖޫބޫރުކޮށްފިއެވެ. ކަނޑީގެ ބާރުގައި ރައްޔިތުންގެ ހިތަށް ވައްދައިދެމުން ގެންދިޔައީ ތަނެއް ފަތަހަކޮށްފިނަމަ، ފާތިހުންގެ ކޮންމެ އަމުރަކަށް ކިޔަމަންވުމަކީ ރައްޔިތުންގެ ވާޖިބެއް ކަމުގައެވެ. ޣީރާތްތެރިކަން ފައުޅުކޮށް، ދެކޮޅު ހެދި ކޮންމެ ފިރިހެނަކު ދިރިހުއްޓައި އަންދައިލަނީއެވެ. އައްޒައިޣަރީއަށް ޚިޔާނާތްތެރިވުމަށް ފަހު ފެރްނާންދޯއަށްޓަކައި މަލަޚާގެ ދޮރާށި ހުޅުވައިދިން ޣައްދާރުން ޝަކުވާ ހިފައިގެން އޭނާގެ ގާތަށް ދިޔައީމާ ބުންޏެވެ. [މަލަޚާއަކީ އަންދަލުސްގެ ދޮރާށްޓެވެ. އެ ރަށުގައި ދުޝްމިނުންގެ އެކަކުވެސް ހުރުމަކީ އަހަރެން ރުހޭ ކަމެއް ނޫނެވެ. އަހަރެންގެ ލަޝްކަރުން ކަންތައްކުރާ ގޮތް ކަލޭމެންނަށް ކަމުނުދާ ކަމަށް ވަންޏާ މި ގައުމު ދޫކޮށްފައި ހިނގައިދާށެވެ. ކަލޭމެން މޮރޮކޯއަށް ދާން ބޭނުމިއްޔާ އަހަރެންގެ ގުރާބުފަހަރު ބަނދަރުގައި އެހެރީއެވެ. ގޮސް އެއިން ގުރާބަކަށް އަރާށެވެ.]
މަލަޚާ ލިބުނީމާ، ގްރަނާދާގެ ވެރިކަމުގެ ދަށުގައި ހުރިހައި ތަނެއް ކްރިސްޓިއަނުންނަށް ލިބުނީއެވެ. އޭގެ ތެރޭގައި މަލަޚާގެ ދެކުނުން ހުރި ބަނދަރުމަތީ ރަށްރަށްވެސް ހިމެނެއެވެ.
އައްޒަޣަލްގެ ވެރިކަން މިހާރު ދެމިއޮތީ އުތުރުން ޖީން އިން ފެށިގެން ގޮސް ދެކުނުން އަލްމެރިއާ އާ ހަމައަށެވެ. މަލަޚާގެ ބަނދަރު ގެއްލުމާއެކު އަލްމެރިއާގެ ބަނދަރު ވެފައިވަނީ އިސްލާމުންގެ ލޭނާރަށެވެ. މި ސަރަހައްދުގެ އިތުރަށް ގުއޭޒާއި ބީޣާވެސް އޮތީ އައްޒަޣަލްގެ ރަސްކަމުގެ ދަށުގައެވެ. ލިބިފައިވާ ވަސީލަތްތަކަށް ބަލާއިރު މި ރަސްކަން އޮތީ ދުޅަހެއު ހާލަތެއްގައެވެ. އަލްޕުހަރާސްގެ ވާދީތަކަށް ލިބޭ ފެނަކީ ސިއެއްރާ ފަރުބަދައިން ފައިބާ ފެނެވެ. މި ސަރަހައްދުން ލިބޭ ތާޒާ މޭވާ މުޅި އަންދަލުހުން ލިބޭ ވަރަށް ވުރެވެސް ގިނައެވެ. މީގެ އިތުރަށް އޮތް ސަރަހައްދަކީ މުޅީންހެން ކަހަލަ ގޮތަކަށް ފަރުބަދައެވެ. ނަޢަމް ސޫފި ބޭނުންވާ ވަރަށްވުރެ މާ ގިނައިން ހުރެއެވެ. ރައްކާތެރިކަމަށް ބަލާނަމަ ސަރަހައްދުގެ ފަރުބަތަކާއި ވާދީތަކުގެ ސަބަބުން އެކަށީގެންވާ ވަރަކަށް ރައްކާތެރިކަން ވަނީ ލިބިފައެވެ.
ފެރްނާންދޯގެ ލަޝްކަރު ރަނގަޅަށް ތައްޔާރުވުމަށް ފަހު ހައެއްކަ ދުވަހުގެ ތެރޭގައި ބީޣާއަށް ހަމަލަދީ، ރަށް ހިސާރުކޮށްފިއެވެ. އެކަމަކު ފަރުބަދަމަތީގައި ގާއިމުވެގެން ތިބި ގަބީލާތަކުގެ މުޖާހިދުން ތިރިއަށް ފައިބައި ހަތަރު ފަރާތުން ފެރްނާންދޯގެ ލަޝްކަރަށް ހަމަލަދީފިއެވެ. އަނެއްކޮޅުން ބީޣާގެ އަހުމިއްޔަތުކަން އެނގިވަޑައިގެންފައިވާތީ ބަދްރު ބިން މުޣީރާ އޭނާގެ ސަރަހައްދު ބެލެހެއްޓެވުން މަންޞޫރާ ހަވާލު ކުރެއްވުމަށް ފަހު ދެ ހާސް މުޖާހިދުންގެ ލަޝްކަރަކާއެކު ބީޣާއަށް ވަޑައިގެންފިއެވެ. ކުއްލިއަކަށް ދެއްވި ފުރަތަމަ ހަމަލައިގައިވެސް ދުޝްމިނުންގެ ފަސްހާސް މީހުން ގަތުލުވެގެން ޖަހަންނަމައަށް ހިނގައްޖެއެވެ. ވިދިގެން އައިރޭ އޭނާ ހަމަލަދެއްވީ ކާފަރުންގެ ލަޝްކަރުގެ ފުރަގަހުންނެވެ. އައްޒަޣަލް ލަޝްކަރަކާއެކު ރަށުން ނިކުމެ ވަޑައިގެން ހަމަލަދެއްވައިފިއެވެ. އެރި އިރާއެކު ފެރްނާންދޯގެ ލަޝްކަރު ހިސާރު ދޫކޮށްލުމަށް ފަހު އެނބުރި މަލަޚާއަށް ހިނގައްޖެއެވެ.
މަލަޚާގައި އަހަރެއްހައި ދުވަހު ތައްޔާރުވުމަށް ފަހު އަނެއްކާވެސް ފެރްނާންދޯ ބީޣާއަށް ހަމަލަދީފިއެވެ. މި ފަހަރު މައި ރަށަށް ހަމަލަދިނުމުގެ ބަދަލުގައި އޭނާގެ ލަޝްކަރުން ދިމާކޮށްލީ ވަށައިގެން ހުރި ކުދި އަވަށްއަވަށާއެވެ. ދަނޑުވެރިންގެ ގޮވާން ފޭރިގެންފިއެވެ. ދަނޑުތަކާއި މޭވާގެ ބަގީޗާތައް ހަލާކުކޮށްލައިފިއެވެ. ފަރުބަދަތައް މަތީން ފައިބާ ގަބީލާތަކުގެ މުޖާހިދުން ހުއްޓުވުމަށްޓަކައި ހުރިހައި ދިމާއަކުން މީހުން އައްޔަންކޮށްފިއެވެ. ބަދްރު ބިން މުޣީރާގެ ފަހުލަވާނުންނާއި ގަބީލާތަކުގެ ލަޝްކަރުތަކުން ކުއްލިއަކަށް ހަމަލަދިނުމުން ކާފަރުންގެ ލަޝްކަރަށް ވަރަށް ބޮޑަށް ގެއްލުން ލިބުނެވެ. އެކަމަކު އެޔަކުން ބީޣާގެ މީހުންނަކަށް މާބޮޑު ފައިދާއެއް ނުކުޅައެވެ. ހަ މަސްދުވަހުގެ ހިސާރަށް ފަހު، ރަށުގެ އަހުލުވެރިންނަށް ބަނޑުހައިހޫނުކަމާ ކުރިމަތިލާން ޖެހުމުން، އެ މީހުން އަމާންދީ ފެރްނާންދޯއަށް ކިޔަމަންތެރިވާން އެއްބަސްވެއްޖެއެވެ.
މައި މަރުކަޒަކަށް ބީޣާ ހެދުމަށް ފަހު ފެރްނާންދޯ އައްޒަޣަލްގެ ވެރިކަމުގެ ދަށުގައި ހުރި ހުރިހައި ތަނެއް އަތުލައިގެންފިއެވެ.
(6)
ބަޝީރް ބިން ޙަސަން އިންނެވީ ބަދްރު ބިން މުޣީރާގެ އަތްޕުޅަށް ލިބިވަޑައިގެންފައިވާ ޒަޚަމްގައި ބޭސް އަޅުއްވާށެވެ. އެ ވަގުތު މަންޞޫރު އެ ކޮޓަރިކޮޅަށް ވެދެވަޑައިގެންފިއެވެ.
ބަދްރު ބިން މުޣީރާ ސުވާލުކުރެއްވިއެވެ. [މަންޞޫރު އަދިވެސް ވަޑައިނުގެން ހުންނެވީތޯއެވެ؟]
މަންޞޫރު ވިދާޅުވިއެވެ. [އަޅުގަނޑު ނުކުންނާން އުޅެނިކޮށް އޭނާ މިތަނަށް ވަޑައިގެންފިއެވެ.]
[އައްޒަޣަލް މިތަނަށް ވަޑައިގެންނެވީތޯއެވެ؟]
[އާދޭހެވެ. އަޅުގަނޑު މި އައީ ތިރީގައި، ބައްދަލުކުރާ ކޮޓަރީގައި އިންނަވާށޭ ދަންނަވައިފައެވެ.]
[އޭނާގެ އަރިހުގައި ވަޑައިގެންނެވީ ކޮން ބޭފުޅުންނެއްތޯއެވެ؟]
[އަބޫ މުޙްސިން އެބަ އިންނެވިއެވެ. އަރިހުގައި ހައެއްކަ ސިފައިންވެސް އައެެވެ. އަޅުގަނޑުމެންގެ ފާރަވެރިން އެމީހުން އެތެރެއަށް ވަނަކަ ނުދިނެވެ.]
[އައްޒަޣަލް އެކަމާ ޝަކުވާއެއް ނުކުރައްވާތޯއެވެ؟]
[ހުންނެވީ ކަންބޮޑުވެވަޑައިގެންފައެވެ. އަޅުގަނޑު ވާހަކަދައްކައިގެން ހިތްޕުޅު ހަމަޖައްސައިދީފީމެވެ. އެއީ މިތާނގައި އޮންނަ އާއްމު އުސޫލެކޭ، އަދި އެއިން މީހަކު އަންނަކަމުގެ ޚަބަރެއް ވެފައިވެސް ނުވުމާއެކު އެހެން ހަދަން ޖެހުނީކަމަށް ދެންނެވީމެވެ.]
ބަދްރު ބިން މުޣީރާ ސުވާލުކުރެއްވިއެވެ. [އަޅުގަނޑުގެ ސިޓީއެއް ހިއްޕަވައިގެން އޭނާއަށް އަރުވާން ވަޑައިގަންނަވާ ވާހަކަ ނުދަންނަވަންތޯއެވެ؟]
[ދެންނެވީމެވެ. އަޅުގަނޑު ސިޓީފުޅު އެރުވިންވެސްމެއެވެ. އެކަމަކު ވިދާޅުނުވެ އަޅުގަނޑުގެ އަތަށް އަނބުރައި ދެއްވީއެވެ. ވިދާޅުވީ އެހައި ދުރުން ވަޑައިގެންފައި ދެން ސީދާ ވާހަކަފުޅުދެއްކެވުން މާރަނގަޅު ވާނެ ކަމުގައެވެ.]
[ސީދާ ވާހަކަފުޅު ދެއްކެވިޔަސް އަޅުގަނޑު އަރުވާން އޮންނާނީ ސިޓީގައި އޮތް ޖަވާބޭ ވިދާޅުނުވަންތޯއެވެ؟]
[އޭނާ ހުންނެވީ ވަރަށް މޮޅިފުޅުވެފައެވެ. އެހެންވީމާ އެފަދަ ވާހަކައެއް ދެންނެވުން ރަނގަޅުކަމަށް އަޅުގަނޑަށް ނުފެންނާތީ ނުދަންނަވަމެވެ.]
ބަދްރު ވިދާޅުވިއެވެ. [އަޅުގަނޑު އުޅުނީ އޭނާގެ ފައިންޕުޅު ސީދާ ނުދެކެން ވެގެންނެވެ. އެކަމަކު މިހާރު މި އޮތީ މަޖުބޫރުވެފައި ނޫންތޯއެވެ؟ ތިޔަ ދެ ބޭފުޅުން އަޅުގަނޑާއެކު ތިއްބަވާން ވާނެއެވެ. އަޅުގަނޑުގެ ވާޖިބުން އެއްފަރާތް ވެވޭކަމަށް ފެނިވަޑައިގެންފިއްޔާ އިސްލާހުކޮށް ދެއްވާން ވާނެއެވެ.]
އޭގެ ކުޑައިރުކޮޅެއް ފަހުން ބަދްރު ބިން މުޣީރާއާއި ބަޝީރް ބިން ޙަސަނާއި މަންޞޫރާ ތިން ބޭފުޅުން ކިއްލާގެ ޚާއްސަ ކޮޓަރިކޮޅަކަށް ވަޑައިގެންފިއެވެ. ކުޑަ އިރުކޮޅެއްގެ ތެރޭގައި އައްޒަޣަލްވެސް ވަޑައިގެންފިއެވެ. އޭނާ ހިނދުކޮޅަކު އިސްދަށަށް ޖައްސަވައިގެން އިންނެވުމަށް ފަހު ވިދާޅުވިއެވެ. [އަޅުގަނޑު މި އައީ ކޮންކަމަކުކަން މަނިކުފާނަށް އޮންނާނީ އެނގިވަޑައިގެންފައެވެ. މަނިކުފާނުގެ ޖަވާބުފުޅަކަށް އަޅުގަނޑަކަށް އިންތިޒާރެއް ނުކުރެވުނެވެ. އަޅުގަނޑު ދެކެ ކޯފާވެފައި އިންނެވިކަން މޫނުފުޅުމަތީން ވަރަށް ސާފުކޮށް އެނގެއެވެ. އަޅުގަނޑު މި އައީ ދިފާޢުގައި ބަހަނާތަކެއް ދެއްކުމުގެ ބޭނުމުގައެއް ނޫނެވެ. ހާލަތު ބަދަލުވެގެން ދިޔަ ގޮތުން މަނިކުފާނުގެ މަޝްވަރާއަށް އެދި ދެންނެވޭގޮތް ނުވީތީ އަޅުގަނޑު ހިތާމަކުރަމެވެ. އަޅުގަނޑަކީ ފިނޑިއެއް ކަމަށް މަނިކުފާނު ހީފުޅު ކުރައްވައިފާނެއެވެ. އެކަމަކު ފުރާނަ ސަލާމަތްކޮށްގަތުމުގެ އެއްވެސް ޚިޔާލެއް އަޅުގަނޑު ނުގެންގުޅޭކަން ﷲ ދެނެވޮޑިގެން ވާނެއެވެ. މި ވަގުތުވެސް އަޅުގަނޑު ބަލަނީ އަޅުގަނޑަކީ މަރުވެފައިވާ މީހަކު ކަމުގައެވެ. އަޅުގަނޑު މި އައީ ކަނޑި ދޫކޮށްލީ އަތް ބުރިވީމާކަމުގައި ދަންނަވާށެވެ. އޭގެ ކުރިއަކުން ފުކަކަށްވެސް ދުލެއް ނުދެމެވެ. ކޯރެއްގެ ފެންގަނޑު ދެމިގެން ދިޔަނުދީ ހިފަހައްޓަން ހިކިވެލި އެޅުމަކުން ނުފުދޭނޭކަން މީގެ ދެތިން އަހަރު ކުރީން ވިސްނުނުނަމަ ރަނގަޅޭ މިހާރު ހިތަށް އަރައެވެ. އަޅުގަނޑުގެ ލަފާކުރުންތައް ރަނގަޅެއް ނޫނެވެ. އަޅުގަނޑު ފަދަ ދުރުނުވިސްނޭ މީހަކަށް ގައުމެއްގެ ވެރިކަން ހައްގެއް ނޫނެވެ. މަނިކުފާނަށް ހުށަހަޅާން ހިތާމައިގެ ކަރުން ނޫން އެއްޗެއް އަޅުގަނޑުގެ އަތަކު ނެތެވެ. މަނިކުފާނު އަޅުގަނޑަށް މާފު ނުކުރައްވާނޭކަން އެނގެއެވެ. އަބޫ ޢަބްދުﷲއަށް އިތުބާރު ކުރުމަކީ އަޅުގަނޑު ކުޅަ ވަރަށް ބޮޑު ކުށެކެވެ. އެ ކުށަށްޓަކައި ޚުދު އަޅުގަނޑު އަމިއްލައަށް، އަމިއްލަ ނަފުސަށް މާފެއް ނުކުރާނަމެވެ. އަޅުގަނޑުގެ ޒަމީރު ތާއަބަދަށް އަޅުގަނޑަށް މަލާމާތްކުރާނެއެވެ. އަޅުގަނޑު ފެރްނާންދޯއަށް ބޯލަނބާން އެއްބަސްވީ އިތުރު ގުރުބާނީއަކުން ކުރާނޭ ފައިދާއެއް ނެތްކަން ޔަގީންވީމައެވެ. އަޅުގަނޑުމެންގެ ފައިތިލަތައް ލުހިއްޖެއެވެ. ދުޝްމިނުން ހަތަރު ފަރާތުން އަޅުގަނޑުމެން ވަށައިލައިފިއެވެ. ގައުމުގެ އެއް ބަޔަކު ތިބީ ދުޝްމިނުންގެ އަޅުވެތިކަން ގަބޫލުކޮށްގެންނެވެ. މިނިވަންކަމުގެ ރޫޙުގައި ތިބި މީސްމީހުންގެ ދިފާޢީ ހަކަތަ ދޫވަމުން ގޮސް ގޮތް ހުސްވެއްޖެއެވެ. އަޅުގަނޑުގެ ކުރިމަތީގައި އެ ވަގުތު އޮތީ ދެ ގޮތެކެވެ. އެއް ގޮތަކީ ފެރްނާންދޯގެ އަޅުވެތިކަން ގަބޫލުކޮށް، އިސްލާމުންނަށް ލިބޭން އޮތް ބޮޑު ގެއްލުމުން ސަލާމަތްކޮށް ދިނުމެވެ. އަނެއް ގޮތަކީ ކަނޑައެޅިގެން ބަލިވާނޭކަން ޔަގީންވާ ހަނގުރާމައެއް ކުރަމުން ގެންދިއުމެވެ. އެ ދަނޑިވަޅުގައި ޝަހީދުވެގެން އަޅުގަނޑުގެ ފަސްބައިގައި ލައްގަނޑެއް ނުޖެހި ސަލާމަތްވެގަނެވުނީހެވެ. އެކަމަކު އެ ވަގުތު އަޅުގަނޑަށް ފެނުނު ގޮތުގައި އެއީ އަންދަލުހާއި ގްރަނާދާއިން ކާފަރުންގެ އަތްމައްޗަށް ގޮސްފައިވާ ރަށްރަށުގެ އިސްލާމުންގެ މިއަދުގެ ހާލަތާއި މާދަމާގެ ހާލަތަށް ނުވިސްނައި ލޯމަރައިލުންފަދަ ކަމެކެވެ. އަޅުގަނޑާއި އަޅުގަނޑަށް ތާއީދުކުރާ ދޮޅަހަކަށް މީހުންނަށް ދެތިން އަހަރެއްހައި ދުވަހު މިނިވަންކަންމަތީ ތިބެވިދާނެއެވެ. އެކަމަކު ބާކީ ތިބި، މިނިވަންކަން ނިގުޅައިގަނެވިފައިވާ އިސްލާމުންގެ ހާލަތު ދާނީ ދުވަހުން ދުވަހަށް ނުބައިވަމުންނެވެ. ބަދަލުހިފުމުގެ ރޫހުގައި ކާފަރުން އެބައިމީހުންގެ ދިރިއުޅުން ދަތިކޮށްލާނެއެވެ. އަޅުގަނޑަށް އިހުސާސްކުރެވުނު ގޮތުގައި ކަންތައްތައް ހަމަޖެހި އަމާންކަން އައީމާ ބައެއް އިސްލާމުން އަނެއްކާވެސް އައު ރޫޙަކާއެކު ތެދުވުމަކީ އެކަށީގެންވާ ކަމެކެވެ. ގުދުރަތުން އެބައިމީހުންގެ ވެރިއަކަށް އަޅުގަނޑަށްވުރެ މާ ރަނގަޅު މީހަކު ޚިޔާރު ކުރައްވައިފާނެއެވެ. އަޅުގަނޑު ހުއްޓާނުލައި ހަނގުރާމަ ކުރިއަށް ގެންދިޔަ ނަމަ އެބައިމީހުންގެ ހަލާކު މާ އަވަސްވެގެން ދާނެއެވެ. އެހެންވެއްޖެނަމަ އެމީހުންނަށްވެސް އޮންނާނީ އަޅުގަނޑުހެން ހިތާމައިގެ ކަރުނަ އޮއްސާން ޖެހިފައެވެ.]
މިހައިތަނަށް ވާހަކަފުޅު ގެންދެވުމަށް ފަހު އައްޒަޣަލް ބަދްރު ބިން މުޣީރާއާ ދިމާއަށް ބައްލަވައިލެއްވިއެވެ. އޭނާ އިންނެވީ ހިމޭނުންނެވެ. އިރުކޮޅަކު އިންނެވުމަށް ފަހު އައްޒަޣަލް ވިދާޅުވިއެވެ. [އެކަމަކު އަޅުގަނޑު މަނިކުފާނާއި މަނިކުފާނުގެ ކުޅަދާނަ މުޖާހިދުންގެ މަތީން މާޔޫސްވީއޭ ނުހިއްތެވުން އެދެމެވެ. މަނިކުފާނަކީ ގްރަނާދާއާއި އަންދަލުސްގެ އެންމެ ފަހުގެ އުއްމީދެވެ. މި ވާދީއަކީ އަޅުގަނޑުމެންގެ ގައުމުގެ އެންމެ ފަހުގެ ކިއްލާކަމުގައި ވެގެންދާން މާ ގިނަ ދުވަހެއް ނެތްކަން އަޅުގަނޑަށް ޔަގީނެވެ. އެފަދަ ދުވަހަކަށް ތައްޔާރުވެވަޑައިގަތުމަށް މަނިކުފާނަށް ވަގުތު ލިބިވަޑައިގަންނަވާނޭ ގޮތް ހެދުމަށްޓަކައި ކްރިސްޓިއަނުންގެ ލަޝްކަރު މިތަނާ ދުރުގައި ތިބޭނޭ ގޮތް ހެދުމަކީ ވަރަށް މުހިއްމު ކަމެކެވެ. އެކަމަށްޓަކައި އަޅުގަނޑު…]
އައްޒަޣާލް ހިމޭންވެވަޑައިގެންފިއެވެ.
ބަދްރު ވިދާޅުވިއެވެ. [ވިދާޅުވާށެވެ. ހުއްޓަވައިލެއްވީ ކީއްވެގެންތޯއެވެ؟]
އައްޒަޣަލް ޖެހިލުންވެވަޑައިގެން ހުންނަވައި ވިދާޅުވިއެވެ. [މަނިކުފާނު ގަދަކަމުން މައިދާނަށް ނެރުނީ އަޅުގަނޑު ކަމަށް އަޅުގަނޑު ފެރްނާންދޯ ގާތު ބުނެފީމެވެ. އަދި މި ސަރަހައްދަކީ މިނިވަންތަނެއް ކަމަށް އޭނާ ގަބޫލުކޮށްފިއްޔާ މަނިކުފާނު ގްރަނާދާގެ އެއްވެސް ކަމަކާ ބެހިވަޑައިނުގަންނަވާނެއޭ އަޅުގަނޑު ބުނީމެވެ.]
ބަދްރު ސުވާލުކުރެއްވިއެވެ. [އަޅުގަނޑު ދިރިދުނިޔޭގައި އެބަހުއްޓޭ މަނިކުފާނު އޭނާ ގާތު ވިދާޅުވީތޯއެވެ؟]
[ނޫނެކެވެ. އަޅުގަނޑު އެހެންނެއް ނުބުނަމެވެ. އަޅުގަނޑު ބުނީ މަނިކުފާނުގެ ބަދަލުގައި މި ސަރައްދުގެ ވެރިއަކަށް ހުންނަވާ ބޭފުޅަކު އަޅުގަނޑު ދަންނަވާ ގޮތަކަށް ކަންތައް ކުރައްވާނެއޭއެވެ.]
[އެހެންވީމާ މަނިކުފާނު ތިޔަ ވަޑައިގަތީ ފެރްނާންދޯގެ ފަރާތުން އެކުވެރިކަމުގެ މެސެޖު ހިއްޕަވައިގެން ދޮގެއްތޯއެވެ؟]
[ﷲއަށްޓަކައި ދަންނަވަމެވެ. އަޅުގަނޑުގެ ނިޔަތާމެދު ޝައްކު ނުކުރެއްވުން އެދެމެވެ. އަޅުގަނޑުގެ ހަމައެކަނި ބޭނުމަކީ މަނިކުފާނަށް ތައްޔާރުވެވަޑައިގަންނަވާނޭ ފުރުސަތު އެރުވުމެވެ. އަޅުގަނޑު މި އައީ ފެރްނާންދޯގެ ސިޓީއެއްވެސް ހިފައިގެންނެވެ.]
އައްޒަޣަލް މިހެން ވިދާޅުވެފައި ބަދްރުގެ އަތްޕުޅަށް ސިޓީއެއް އަރުވައިފިއެވެ. ބަދްރު އެ ސިޓީ ބަޝީރުގެ އަތްޕުޅަށް ދެއްވައިފައި ވިދާޅުވިއެވެ. [ކިޔުއްވާށެވެ.]
ބަޝީރު ބިން ޙަސަން ފޫހިފުޅު ރާގަކަށް ސިޓީ ވިދާޅުވާން ފައްޓަވައިފިއެވެ.
[ރަސްގެފާނު އައްޒަޣަލްގެ އެދުންފުޅަކަށް އަޅުގަނޑު މަންޞޫރު ބިން އަޙްމަދާއި އޭނާގެ ބައިވެރިންނާ ދިމާއަށް ރަޙްމަތްތެރިކަމުގެ އަތް ދިއްކުރަމެވެ. ދިގު ހަނގުރާމަތަކަކަށް ފަހު، އަންދަލުސްގެ ޢާއްމު ރައްޔިތުންގެ ލާބަޔަށްޓަކައި ކްރިސްޓިއަނުންނާއި އިސްލާމުންގެ މެދުގައި ސުލްހަވެރިކަން ގާއިމުކޮށް އަމާންކަމުގެ މަގެއް ހޯދުމަކީ މުހިއްމު ކަމެއް ކަމުގައި އަޅުގަނޑަށް ގަބޫލުކުރެވިއްޖެއެވެ. އަޅުގަނޑުގެ މި އިހުސާންތެރި ހުށަހެޅުން، އަޅުގަނޑުމެންގެ އެންމެ ބޮޑު ދުޝްމިނު ގަބޫލުފުޅު ކުރައްވާނޭ ކަމަށް ހީކުރަމެވެ. އަމަންއަމާންކަމަށްޓަކައި އަޅުގަނޑު މިކުރާ މަސައްކަތުގަތުގައި ބައިވެރިވެވަޑައިގަންނަވާނޭ ކަމަށްވެސް ހީކުރަމެވެ. ސުލްހައަށްޓަކައި އަޅުގަނޑުމެންގެ ހުށަހެޅުން މި ދަންނަވަނީއެވެ.
(1) ތަދްމީރް ފަރުބަތަކާއި ޖަބަލުއްޝަލީރާ ދެމެދު އޮތްތަނަކީ ބާޒުގެ ސަރަހައްދު ކަމަށް މަޝަހޫރުވެފައިވާ ސަރަހައްދެވެ. އެ ސަރަހައްދު ވެގެންދާނީ މިނިވަން ސަރަހައްދަކަށެވެ. މަންޞޫރު ބިން އަޙްމަދު ނުވަތަ އެމީހުން ބޭނުންވާ އެހެން މީހަކުނަމަވެސް ވެރިކަމަށް ހޮވުމުގެ އިޚްތިޔާރު އެ ސަރަހައްދުގެ ރައްޔިތުންނަށް އޮންނާނެއެވެ.
(2) ބޭރުން އަންނަ ހަމަލައެއް ދިފާއުކުރުމަށްޓަކައި ކުރާ ކޮންމެ ހަނގުރާމައެއްގައި އަޅުގަނޑުމެން އެ ސަރަހައްދުގެ ވެރިކަމަށް އެހީތެރިވާނަމެވެ.
މި އިހްސާންތެރި ހުށަހެޅުމާއެކު އަޅުގަނޑުމެން އެދޭ ކަންކަން މި ދަންނަވަނީއެވެ.
މި ވަގުތު މަންޞޫރް ބިން އަޙްމަދުގެ ބާރުފުޅުގެ ދަށުގައި އޮތް އުތުރުގެ ބަނދަރާއި އިރުމަތީގެ ބަނދަރު އަޅުގަނޑުމެންނާ ހަވާލުކުރައްވާން ވާނެއެވެ. އަދި އޭގެ ފަހުން މަންޞޫރު ބިން އަޙްމަދުވެސް ނުވަތަ އޭނާގެ ބަދަލުގައި ވެރިކަމަށް ވަޑައިގަންނަވާ އެހެން ބޭފުޅަކު ކަމުގައި ވިޔަސް، އަޅުގަނޑުމެންގެ ސަރަހައްދަށް ހަމަލައެއް ނުދެއްވާނޭކަމުގެ ޔަގީންކަން ދެއްވާން ވާނެއެވެ. ގްރަނާދާއާއި އަންދަލުސްގެ ވެރިން މިހާރު ތިއްބެވީ އަޅުގަނޑުމެންނާ ބައިއަތު ހިއްޕަވައިގެންނެވެ. އެހެންވީމާ އެއިން އެއްވެސް ތަނެއްގައި ހިނގާ އެއްވެސް ކަމަކަށް ބާރެއް ނުވަތަ ނުފޫޒެއް ފޯރުއްވައިގެން ނުވާނެއެވެ. އިސްލާމަކަށް ވިޔަސް ނުވަތަ ކްރިސްޓިއަނަކަށް ވިޔަސް، އަޅުގަނޑުމެންނާ ދެކޮޅަށް ތެދުވާ އެއްވެސް ބާޣީއަކަށް އެއްވެސް ބާވަތެއްގެ މަދަދެއް ދެއްވައިގެން ނުވާނެއެވެ.]
ސިޓީ ވިދާޅުވެ ނިންމެވުމަށް ފަހު ބަޝީރް ބިން ޙަސަން ބަދްރު ބިން މުޣީރާއާ ދިމާއަށް ބައްލަވައިލެއްވިއެވެ. ދެން ތިއްބެވި ބޭފުޅުންގެ ނަޒަރުފުޅުވެސް ހުއްޓިފައި ހުރީ އޭނާޔާ ދިމާއަށެވެ. ބަދްރުވެސް އެބޭފުޅުންނާ ދިމާއަށް ބައްލަވައިލައްވައިފައި ސުވާލުކުރެއްވިއެވެ. [މި ހުށަހެޅުންތަކާ ބެހޭ ގޮތުން މަންޞޫރު ވިދާޅުވަނީ ކީކޭތޯއެވެ؟]
މަންޞޫރު، ބަޝީރާ ދިމާއަށް ބައްލަވައިލެއްވިއެވެ. އެޔަށް ފަހު އަނެއްކާވެސް ބަދްރާ ދިމާއަށް ބައްލަވައިލައްވައިފައި ވިދާޅުވިއެވެ. [ތިޔަ ސުވާލުކުރައްވަނީ އަންދަލުސްގެ އިސްލާމުންގެ ޖަނާޒާ އުފުލާން ތައްޔާރަށް ހުރިތޯ ކަމުގައި ވަނީ ވިއްޔާ އަޅުގަނޑުގެ ޖަވާބަކީ ނޫނެކޭއެވެ.]
ބަދްރު ސުވާލުކުރެއްވިއެވެ. [ބަޝީރް ވިދާޅުވަނީ ކީކޭތޯއެވެ؟]
ބަޝީރް ވިދާޅުވިއެވެ. [އަޅުގަނޑުމެންގެ ގައުމުގެ ނައު ގެނބެނީކަން އަޅުގަނޑަށް ޔަގީންވިޔަސް، އެ ނައު ދޫކޮށްލައިފައި ހުއިކޮޅެއްގައި އެލިގަންނާން އުޅޭކަށް އަޅުގަނޑު ބޭނުމެއް ނޫނެވެ.]
ބަދްރު ބިން މުޣީރާ، އައްޒަޣަލާ ދިމާއަށް ބައްލަވައިލައްވައިފައި ވިދާޅުވިއެވެ. [އަޅުގަނޑުމެން ވަރުބަލިވެއްޖެކަމާއި ނިދި އަންނާން ފަށައިފިކަން ފެރްނާންދޯއަށް ޔަގީންވެއްޖެއެވެ. އޭނާ ބޭނުންވަނީ އަޅުގަނޑުމެންގެ ކަރުގައި ހިފުމުގެ ކުރީން ނިންދަވާށެވެ. އަޅުގަނޑުމެންގެ ކަންފަތްދޮށުގައި ނާނާވިދާޅުވާން އޭނާ ޚިޔާރުކުޅައީ ގްރަނާދާގެ ރައްޔިތުން ޣާފިލުކަމުގެ ނިދީން ހޭލެއްވުމަށްޓަކައި އެތައް މަސައްކަތްޕުޅެއް ކުރެއްވި މުޖާހިދެކެވެ. އޭނާގެ އިހުސާންތެރިކަމުގެ ބޭހަކީ އަޅުގަނޑުމެންނަށް ދޭ ނިދާބޭހެކެވެ. އެ ބޭސް އަޅުގަނޑުމެންނަށް ދެއްވުމާ އޭނާ ހަވާލުކުޅައީ އިއްޔެއާ ހަމައަށް ގްރަނާދާގެ ދިފާޢުގައި އުފުލައިލެވިފައި ހުރި ވަރުގަދަ ކަނޑީގެ ވެރިޔާއެވެ. ގްރަނާދާގެ އެންމެ ފަހުގެ އުއްމީދު މިއަދު އަޅުގަނޑުމެން ތިޔަ ގެންދަވަނީ މާޔޫސީގެ އަނދިރި ވަޅުގަނޑަކާ ދިމާއަށެވެ. އަޅުގަނޑުމެންގެ ކާބަފައިންނާއި މުޙްސިނުންނާއި ގާއިދުންގެ ކުރިފުޅުމަތީގައި އަޅުގަނޑުމެންގެ ފުރާނައިގެ އަގު ވަރަށް ބޮޑެވެ. މަނިކުފާނު ތިޔަ ވަޑައިގެންނެވީ ލަދުވެތިކަމާއެކު ކަކޫމައްޗަށް ތިރިވެ ތިބެގެން ނަމަވެސް އަޅުގަނޑުމެންގެ ފުރާނަ ސަލާމަތްކުރުމުގެ މަޝްވަރާ ދެއްވާށެވެ.
އައްޒަޣަލް ރަސްގެފާނެވެ. މަނިކުފާނު ވިދާޅުވާ ގޮތުގައި ދުޝްމިނުންގެ ޝަރުތުތަކަށް އެއްބަސްވީމާ ތައްޔާރުވާނޭ ވަގުތު އަޅުގަނޑުމެންނަށް ލިބޭނެއެވެ. އެކަމަކު ދުޝްމިނުން އެ ގެންދަނީ އަޅުގަނޑުމެންގެ މައްޗަށް ފާވެގަނެ، އެންމެ ފަހުގެ ހަމަލާ ދޭން ތައްޔާރުވަމުންކަން މަނިކުފާނަށް އެނގިވަޑައިނުގަތީ ކީއްވެގެންތޯއެވެ؟ ޢަމަލީ ދުނިޔޭގައި ބާރުގަދަ މީހުންނާއި ބަލިކަށި މީހުންނާ ދެމެދު ކުރެވޭ ޢަހުދެއްގެ މާނައެއް ނެތެވެ. އެފަދަ މުޢާހަދާއެއްގެ ސަބަބުން ބަލިކަށި މީހުން ކަސްތޮޅު އެޅުވިފައި ތިބޭނީއެވެ. ބާރުގަދަ މީހުންނަށް އެބައިމީހުންގެ ހަތިޔާރު ތޫނު ކުރުމުގެ ފުރުސަތު ލިބޭނީއެވެ.
ބާރުގަދަ ބަޔަކީ އަޅުގަނޑުމެން ކަމުގައި ވަނީނަމަ އަޅުގަނޑުމެންގެ ދިރިތިބުމަށްޓަކައި ދުޝްމިނުންގެ ހެޔޮއެދުމެއްގެ ބޭނުމެއް ނޯންނާނެއެވެ. އަޅުގަނޑުމެންނަކީ ބަލިކަށި ބަޔަކު ކަމުގައި ވަނީނަމަ އަޅުގަނޑުމެންގެ ދިރިތިބުމަށްޓަކައި ދުޝްމިނުންގެ ހެޔޮއެދުމަކުން ނުފުދޭނެއެވެ. އަޅުގަނޑުމެންގެ މިނިވަންކަމާއި އަބުރާއި އިއްޒަތުގެ ވަސީލަތަކީ ހަމައެކަނި އަޅުގަނޑުމެންގެ ކަނޑިއެވެ. އަޅުގަނޑުމެންގެ ކަނޑިތައް އުރަތަކަށް ލެވޭނީ ފަތަޙައިންނެވެ. ނުވަތަ މަރުވުމުންނެވެ. މަލަޚާ ފަތަޙަ ކުރުމަށް ފަހު ބަނދަރުގެ ސަރަހައްދު ދޫކޮށް ފައިބައިގެން ދާށޭ، އިސްލާމުންނަށް އެންގި ބަޔަކަށް އަޅުގަނޑުމެން އިތުބާރު ކުރާންވީތޯއެވެ؟ އަޅުގަނޑުމެންގެ ގައުމުގެ އަންހެން ދަރީންނާއި ކުޑަކުދީންގެ ލެއިން އެ މީހަކުގެ އަތް ތަތްތެޅިފައިވާ މީހަކަށް އިތުބާރުކުރާން މަނިކުފާނު އަޅުގަނޑުމެންނަށް ލަފާފުޅު ދެއްވަނީތޯއެވެ؟ އަޅުގަނޑުގެ ސުވާލެއް އެބައޮތެވެ. މަލަޚާގެ މަގުތައްމަތީގައި އަޅުގަނޑުމެންގެ އަންހެން ދަރީންގެ އަބުރު ކަތިލެވެމުން ދިޔައިރު އެ އިޙްސާންތެރި، ހިތްހެޔޮ ވެރިން ކޮބައިތޯއެވެ؟ މަނިކުފާނު ތިޔަހުންނެވީ އަމިއްލަފުޅަށް ދުޝްމިނުންގެ މަޅީގައި ޖެހިވަޑައިގެންފައި ކަމުގައި ވިޔަސް، އަޅުގަނޑުމެން އެ ކެހިވެރި މަޅީގައި ޖައްސަވަން ނޫޅުއްވާށެވެ. މަނިކުފާނު ކަންބޮޑުވެވަޑައިގަންނަވަނީ އަޅުގަނޑުމެންގެ ގުރުބާނީ ތާނކުންތާނކު ނުޖެހި ހިނގައިދާނެތީ ނޫންތޯއެވެ؟ ދަންނަވަންތޯއެވެ؟ އަޅުގަނޑުމެންގެ ގުރުބާނީއަކީވެސް އޭގެ ޒާތުގައި މަގުސަދެކެވެ. އަޅުގަނޑުމެންގެ މަގުސަދަކީ އަބުރުވެރި މިނިވަން ދިރިއުޅުމެއް ކަމުގައި ވަނީނަމަ، އަބުރުވެރި މަރެއްގެ މަގު އަދިވެސް ބަންދެއް ނުވެއެވެ.]
ބަދްރު ބިން މުޣީރާ ޖޯޝާއެކު ކޮޅަށް ތެދުވެވަޑައިގެންފިއެވެ. [އެއްވެސް ގައުމެއްގެ ލެޔަކީ ކިތަންމެ ވަރަކަށް އޮހުނަސް ހުސްވާނޭ އެއްޗެއް ނޫނެވެ. އެ ލޭ ހިކެނީ ޚިޔާނާތްތެރި ދިރިއުޅުމަކަށް ގައުމުގެ ދަރިން ރުހުނީމައެވެ. މިނިވަންކަމުގެ އަގު އާދާކުރާން އަޅުގަނޑުމެން ދަންނަމޭ ފެރްނާދޯ ގާތު ވިދާޅުވާށެވެ. މިހައިތަނަށް ފެރްނާންދޯގެ ލަޝްކަރުގެ އޮއިވަރުގައި ޖެހިފައި ވެއްޓުނީ ވެލީގެ ފާރުތަކެކެވެ. މި ވާދީއާ ދިމާކޮށްލައިފިނަމަ އޭނާޔާ ބައްދަލުކުރާނީ އެކަތައިގެ ފާރުތަކެކެވެ. މިއީ ވޭތުވެދިޔަ ގަރުނުތަކުގައި އެތައް ޠޫފާނަކާ ކުރިމަތިލައިފައިވާ ފާރުތަކެކެވެ. މަނިކުފާނަށް މިތަނަށް ވަޑައިގަންނަވާން މަޖުބޫރުކުރިވީ އަޅުގަނޑުމެންނަށްޓަކައި މަނިކުފާނުގެ ހިތްޕުޅުގައި އޮތް ހަމްދަރްދީކަން އަޅުގަނޑަށް އެނގެއެވެ. ކަށިތައް ނޫން އެހެން އެއްޗެއް ނެތް މަގަކުން އަޅުގަނޑުމެން ހިނގައިގަތުމަކީ މަނިކުފާނު ބޭނުންފުޅުވާ ގޮތެއް ނޫނެވެ. އެކަމަކު ދަންނަވަންތޯއެވެ؟ މި ފިޔަވަޅުތައް ވަނީ އެ ކަށިތަކަށް ހޭނިފައެވެ. މި ހަށިގަނޑަކީ މަލުގެ ދާނަށް އާދަވެފައިވާ ހަށިގަނޑެއް ނޫނެވެ. މަނިކުފާނު ހިތާމަފުޅު ކުރައްވަނީ މަނިކުފާނުގެ ވެރިކަމުގެ ދަށުގައި އަޅުގަނޑުމެން ވީ ގުރުބާނީ ބޭކާރުވެގެން ދާތީ ނޫންތޯއެވެ؟ މަނިކުފާނުފަދަ އަލްޙަމްރާގައި މަޚުމަލުގެ ދާނަށް އާދަވެވަޑައިގެންފައިވާ ބޭފުޅަކަށް، މުސްކުޅިފުޅުވީމާވެސް އަޅުގަނޑުމެންނާއެކު ހަނގުރާމަކުރައްވާން ޖެހިވަޑައިގެންނެވީތީ އަޅުގަނޑުމެންވެސް ހިތާމަކުރަމެވެ. އަބޫ އަބްދުﷲއަށް ގްރަނާދާގެ ތަޚުތަށް އަޅުގަނޑުމެން ތަހުނިޔާ ދަންނަވަމެވެ. މަނިކުފާނަށް އަންދަލުސްގެ ތަޚުތަށް މަރުހަބާ ދަންނަވަމެވެ. އަޅުގަނޑުމެންނާމެދު ފިކުރުފުޅު ނުކުރައްވާށެވެ. އަޅުގަނޑުމެންގެ ލޯހުޅުވުނީ ކަނޑީގެ ހިޔަލުގައެވެ. އަޅުގަނޑުމެން ނިދާނީ ދުނީގެ ވާރޭގެ ތެރޭގައެވެ.]
އައްޒަޣަލް މިހައިތަނަށް ކޮންޓުރޯލު ކުރައްވައިގެން ހުންނެވި ކަރުނަފޮދު ލޯފުޅުން ހޯސްލައިފައި އޮހޭން ފަށައިފިއެވެ. އޭނާގެ ތުރުތުރުފުޅުއަޅަމުންދިޔަ ތުންފަތްޕުޅުން ވޭނީ އަޑުފުޅެއް ނުކުތެވެ. [ބަދްރެވެ. ބަދްރެވެ. ބަދްރެވެ. މަނިކުފާނުގެ އަގެއް ނެތް ބައިވެރިޔާގެ ގައިގައި ބޭނުމެއް ނެތް ގޮތަކަށް ކޮޅުފައިން ނުޖައްސަވާށެވެ. މީގެ ފަހުން މަނިކުފާނަކަށް މި ލޮބުވެތި ބިމުން އަޅުގަނޑު ފެނިވަޑައެއް ނުގަންނަވާނެއެވެ. އަޅުގަނޑު މި ދަނީ އެފްރިކާއަށެވެ. އަޅުގަނޑުފަދަ ބަލިކަށި މީހަކުގެ ބޭނުންފުޅެއް މަނިކުފާނަކަށް ނޯންނާނެއެވެ. ބާކީ ތިބި މީހުން އެބައިމީހުންގެ ވެރިއެއް ކަމުގައި އަބޫ ޢަބްދުﷲ ބަލައިގެންފިއެވެ. އަންދަލުސްގައި އިސްލާމުންނަށް ފަހި ކުރިމަގެއް އޮތް ނަމަ އެ ކުރިމަގަކީ މަނިކުފާނެވެ. މަނިކުފާނުގެ ފަހަތްޕުޅުން ދާން ބޭނުންވާ ބަޔަކު އަންދަލުސްގައި ތިބިނަމަ، އެބަޔަކު މިތަނަށް އަންނާނެއެވެ. އަޅުގަނޑުގެ އަތުގައި ރަނާއި ޖަވާހިރުގެ އެތިކޮޅެއް އެބަހުއްޓެވެ. އެއީ ގައުމުގެ އަމާނަތެކެވެ. އެތަކެތި އަޅުގަނޑު މަނިކުފާނާ ހަމައަށް ފޮނުވާނަމެވެ. ވަކިވުމުގެ ކުރީން އަޅުގަނޑު ދަންނަވާން އޮތީ އެންމެ ވާހަކައެކެވެ. އަޅުގަނޑުގެ ކަރުނައިގެ ނުބައި މާނައެއް މަނިކުފާނު ނުނެންގެވުން އެދެމެވެ. މިއީ ހިތާމައިގެ ކަރުނައެވެ.]
އައްޒަޣަލް ކޮޅަށް ތެދުވެވަޑައިގެންފިއެވެ. [ދެން އަޅުގަނޑު ބޭނުންވަނީ ދާށެވެ.]
ބަދްރު ވިދާޅުވިއެވެ. [މަނިކުފާނު ތިޔަ ހުންނެވީ ވަރުބަލިފުޅުވެފައެވެ. މިރޭ އަރާމުކުރައްވައިފައި މާދަމާ ވަޑައިގަންނަވާށެވެ.]
[ނޫނެކެވެ. އަޅުގަނޑު ބޭނުންވަނީ ހަމަ މިހާރު ދާށެވެ.]
ހަވީރު، ބަދްރު ބިން މުޣީރާއާއި އޭނާގެ ބައިވެރިން ތިއްބެވީ ބުރިޖުގެ މަތީގައި އައްޒަޣަލަށް އަލްވަދާޢު ވިދާޅުވާށެވެ.
(ނުނިމޭ)
