ހަމަ ދާދި ދެންމެއަކު އުފަންވި ތުއްތު ދަރިފުޅަށް: ދަރިފުޅުގެ ބައްޕަ – ނިކް ބްރަޔަންޓް – 1

ކޯވިޑް- ނަވާރައިގެ އެންމެ ނުރައްކާ ދުވަސްވަރު، މި ލިޔުން ލިޔުއްވި ނިކް ބްރަޔަންޓް ހުންނެވީ، ޚަބަރު ފެތުރުމުގެ ދާއިރާގައި އެންމެ ނަން މަޝްހޫރު ބީބީސީގެ ރިޕޯޓަރެއްގެ ހައިސިއްޔަތުން (އޭނާ ދެކިލައްވާ ގޮތުގައި، މުޅި ދުނިޔޭގެ ނުރަސްމީ ވެރިރަށް) ނިއު ޔޯކް ގައެވެ. މިހާރުވެސް އޭނާ އާއި ހަވާލު ކުރެވިފައިވަނީ ނިއު ޔޯކް ސަހަރާއި އެ ސަހަރުގައި މައި އޮފީސް ހުންނަ  އދ ގައި ހިނގާ ކަންކަމުގެ ޚަބަރު ބީބީސީއަށް ފޮނުއްވުމެވެ.

ނިކް ބްރަޔަންޓް މަތީ ތައުލީމު ހޯއްދެވީ އިނގިރޭސި ވިލާތުގެ މަޝްހޫރު ކެމްބްރިޖް ޔުނިވަރސިޓީންނެވެ. އެއަށް ފަހު ޕީ އެޗް ޑީ ސަނަދު ހޯއްދެވީ ހަމަ އެހައިމެ މަޝްހޫރު އޮކްސްފޯޑް ޔުނިވަރސިޓީންނެވެ. ބީބީސީގެ ވަޒީފާގެ އިތުރުން މަޝްހޫރު ނޫސް މަޖައްލާތަކަށް އާދަވެގެން މަޒްމޫނު ލިޔުއްވައި އުޅުއްވައެވެ.

މި ލިޔުން ތަރުޖަމާކޮށް މި ވެބްސައިޓުގައި އަޅުގަނޑު ޝާއިއު ކުރާހިތްވި ސަބަބަކީ، މި ލިޔުމުގައި އެ ދުވަސްކޮޅު ނިއު ޔޯކް ގެ ހާލަތު މި ކުޅަދާނަ ލިޔުންތެރިޔާ ސިފަކޮށްދެއްވާފައިވާލެއް މޮޅުކަމުންނެވެ. މިހާރު މިވާ ކަންކަން ހަނދާނުގައި ނުހުންނާނެ ތުއްތު ކުދިންނަށާއި ފަހުން އަންނަން އޮތް ޖީލަށް ފެންނާނެ " ޕޯސްޓް ކާޑެއް" ކަހަލަ މަންޒަރެއް ކުރަހައިދޭ ލިޔުމަކަށް ވާނޭ ކަމުގެ އުންމީދުގައެވެ.

" ދަރިފުޅާއެވެ.  ދަރިފުޅު އުފަންވީ 2019 ވަނަ އަހަރުގެ ފަހުކޮޅު މުޅި ދުނިޔެއަށް އަޖައިބެއްހައި ހަލުވި މިނުގައި ފެތުރެންފެށި ރޯގާއެއްގެ ސަބަބުން ނިއު ޔޯކުގައި އިއުލާނު ކުރި ފުރަބަންދުގެ ތިންވަނަ މަހުގެ ތެރޭގައެވެ. އަދި އާންމުން ބޭރަށް ދިއުމުގެ ހުއްދަ ނުލިބޭތާ ތިންވަނަ ދުވަހުއެވެ. ދަރިފުޅު ދެލޯ ތިޔަ ހުޅުވައިލީ ފިސާރި ނުރައްކާ ދުވަސްވަރެއްގައެވެ.

ދަރިފުޅު އުފަންވުމުގެ ހަމަ ކުޑައިރުކޮޅެއް ކުރިން، މަންމަގެ ބަނޑުގައި ރިހުން އެންމެ ބާރުވި ވަގުތު ބައްޕަމެން މި އުޅޭ އިމާރާތާ ދިމާ މަތީގައި ފުލުހުންގެ ހެލިކޮޕްޓަރެއް، އުޑަކު ބިމަކު ނުޖެހި ހުއްޓި އޮތެވެ. އެ ހެލިކޮޕްޓަރުން ބިންމައްޗަށް އަލިކުރަން ފޮނުވާފައި ހުރި ބައްތިއެއްގެ އަލީގެ ވަރުގަދަކަމުން އެ އަލި ފޯރާ ތަންކޮޅެއް ރޭ އަނދިރިކަމުން، ދުވާލުގެ އަލިކަމަށް ބަދަލުކޮށްލައެވެ! ދަރިފުޅު މަންމަގެ ފޫޅުމައި ދައްތަގެ އަތްދަށު ބޭކެނބިދައްތަ މި އިމާރާތަށް ވަދެވަދެ ހުއްޓައި ފުލުސް އޮފިސަރުން އޭނާ ހުއްޓުވައި މި އިމާރާތަށް ވަންނަ ސަބަބެއް ހޯދަން ސުވާލު ކުރިއެވެ.

ދަރިފުޅު އުފަންވުމާއެކު ވީ އުފަލުން ބައްޕައަށް ބޭރު ބަލައިލެވުނު އިރު ފުލުހުންގެ ކާރު ފައްޗެއް ބްރޫކްލިން ފާލަމާ ދިމާއަށް ބާރަށް ދުއްވާފައި ދެއެވެ. ރަތްކުލައާއި ނޫކުލައިގެ ބޮކިތަކުގެ ބެބުޅުން ކޮންމެ ކާރެއްގެ ފުރާޅުމަތިން ފިސާރި ހައިބަތާ އެކު މާދުރަށް ދައްކަމުންނެވެ.

ދަރިފުޅު އުފަންވިރޭ ފުލުހުންގެ ކާރުތައް ދިޔަ މަގުން، ހަފުތާއެއް ވަންދެން ހަމަ ކޮންމެ ދުވަހަކު،  ހަމަ އެ ކާރުތައް ދިޔަ ކޮޅަށް އިންސާނުންގެ ބޮޑެތި ޖަމާއަތްތައް ފިސާރި ރުޅިންނާއި ހިތާމަ އެކުލެވޭ ރާގަކަށް އެންމެން އެކީގައި އަޑުހަރުކޮށް ގޮވަމުން ދިޔައީ " ކަޅުމީހުންގެ ފުރާނަވެސް މުހިންމެވެ"……. " ކަޅުމީހުންގެ ފުރާނަވެސް މުހިންމެވެ" މިހެންނެވެ. ކަޅުނަސްލުގެ މީހުންގެ ފުރާނަޔަށް އެއްވެސް ހުރުމަތެއް ނުދައްކައި، ފުލުހުންގެ ގަދަބަދަވިކަމުގައި ތަކުރާރުކޮށް ދުނިޔެ ދޫކުރަން ޖެހޭ ކަޅުނަސްލުގެ މީހުންގެ ލިސްޓު ދިގުވާލެއް އަވަސްކަމުގެ ރުޅީގައެވެ. އެކަމުގެ ބިރުވެރިކަމުގައެވެ. ދަރިފުޅު އުފަންވީ، އެތައް ހާސް މީހުން އެއްފަހަރައި އެއް އަޑަކުން " ކަޅުމީހުންގެ ފުރާނަވެސް މުހިންމެވެ"……. " ކަޅުމީހުންގެ ފުރާނަވެސް މުހިންމެވެ" މިހެން ގޮވަމުން ގޭދޮށުން ދަނިކޮށެވެ!

ތުއްތު ދަރިފުޅާއެވެ! ދަރިފުޅުގެ ކުޑަކުޑަ ފުއްޕާމޭ ފުރާލައި އަލަށް މިދުނިޔެއަށް ނޭވާއެއް ލީއިރު، މާޔޫސްވެ، ރުޅިގަދަވެ، ދެން ހަދާނެ ގޮތެއް ނޭނގިފައިތިބި އެތައް ބަޔަކު މުޅި އެމެރިކާގެ އެކި ކަންކޮޅުގައި މުޒާހަރާކޮށް، ހަޅުތާލުކޮށް، މަގުތައް ބަންދުކޮށް، އެއް އަޑަކުން ގޮވަމުން ދިޔައީ: " އަހަންނަކަށް ނޭވައެއް ނުލެވޭ!" މިހެންނެވެ! އެއީ ދަރިފުޅުގެ ކުޑަކުޑަ ފުއްޕާމޭ ފުރާލައި، ހަށިފުރާ، މި ނުރައްކާތެރި ދުނިޔެއަށް ދަރިފުޅުގެ އަލަތު ނޭވައިލި ވަގުތުވެސްމެއެވެ!

ހޮސްޕިޓަލުގައި މޮޅެތި ޑަކްޓަރުންގެ ބެލުމުގެ ދަށުން ވިހަން، މަންމަ ހޮސްޕިޓަލަށް ނުދިޔަ ސަބަބަކީ، ދަރިފުޅު އުފަންވާން ދިމާވި ދުވަސްވަރަކީ މީހުން ހަސްފަތާލު ދެކެ ބިރުން އުޅުނު ދުވަސްވަރަކަށް ވީތީއެވެ. އަދި ދަރިފުޅު އުފަންވުމުގެ ދެތިންރޭ ކުރިން ކޮންމެ ރެއަކު މަގުތައް ބެދެން ފެށީ އެއްވެސް ވައްތަރެއްގެ ދުއްވާ އުޅަނދަކަށް ނުވަދެވޭ މިންވަރަށެވެ. ހަޅުތާލު ކުރާ މީހުންނާއި އެމީހުން އުޅޭނޫޅޭގޮތް ބަލައި ބައެއް ކަންކަން ހުއްޓުވަން އައިސް ތިބި ފުލުހުންގެ އެކި ފެންވަރުގެ ގެމަތަކާއި އެމީހުންގެ ކާރުތަކުންނެވެ. މީހުން ގިނަކަމުން މަގުތައް ބެދެމުން ދިޔަވަރަކަށް މަންމައާއި ބައްޕަ އެންމެ ކަންބޮޑުވީ ދަރިފުޅު ވިއްސަން ބައްޕަމެން ވާހަކަ ދައްކައި އެއްބަސްވި ފޫޅުމައި ދައްތައަށް މިހިސާބަށް އާދެވޭނެ ގޮތެއް ނެތިދާނެތީއެވެ. އަދި މަންމައަށް ނުވަތަ ދަރިފުޅަށް ނުރައްކަލެއް ދިމާވެއްޖެނަމަ ޑަކްޓަރުން ތިބި ހިސާބަކަށް ދެވޭނެ ގޮތެއް ނުފެނިދާނެތީއެވެ!

މުޅި ނިއުޔޯކު އޮތީ ފުރަބަންދެއްގައެވެ. ފާއިތުވި ގަރުނެއްހައި ދުވަހުގައިވެސް އިންސާނުން ނުދެކޭހައި ހަލުވި މިނެއްގައި ފެތުރެމުންއައި ބިރުވެރި ރޯގާއެއްގެ ސަބަބުންނެވެ. ދަރިފުޅު އުފަންވުމާ ހަމަޔަށް، ހަމަ އެކަނި ނިއުޔޯކުންވެސް ސަތާރަ ހާސް ފުރާނަ މިދުނިޔެ ދޫކޮށްފިއެވެ! ހަލަބޮލިކަމަށް މަޝްހޫރު ނިއުޔޯކް މިއޮތީ މި ބިރުވެރިކަމުގެ އިތުރުން، މުޒާހަރާތަކާއި ހަޅުތާލުކުރުމުގެ ސަބަބުން ގުނަވަންތައް އައްސިވެ ގުޑައިލެވޭނެ ގޮތެއް ނެތިފައެވެ!

 ދަރިފުޅު މި ދުނިޔެއަށް އުފަންވުމުގެ ދުވަސްކޮޅެއް ކުރިން، ބައްޕައަށާއި މަންމައަށް، ދެންމެ މި ބުނި ރޯގާ ޖެހިއްޖެއެވެ. މި ހިންގާ ވިހިވިހީގެ ކުރިން ބައްޕަމެން މި ރޯގާގެ ނަންވެސް ނުދަންނަމެވެ. ތެދެކެވެ ފައިބެ އަހަރުގެ ފަހުދުވަސްވަރު އިރުމަތީ އޭޝިޔާގައި މިބަލި ފެތުރެން ފަށައިފިއެވެ. ނަމަވެސް، އެމެރިކާގައި އުޅޭ މީހުންނަށް ރޭކައިލީ މާފަހުންނެވެ! މަންމަގެ ބަނޑުގައި ދަރިފުޅު އޮތް އިރުވެސް، މި ރޯގާގެ ސަބަބުން މަންމަ ކެއްސަމުން ކެއްސަމުންގޮސް ނޭވާނުލެވި ނޭވާ ހިނދޭ ކޮންމެ ފަހަރަކު، އަދި ގައިގައިއަޅާ ވޭނުގެ ސަބަބުން މަންމަ އަށް ކެތް ނުކުރެވިގެން ގިސްލެވި ރޮވޭ ކޮންމެ ފަހަރަކު، ބަނޑުގައި އޮވެ ދަރިފުޅު ތޮޅިލާކަން މަންމައަށް އެނގުނެވެ! މަންމަ އުޅެނީ ހޮސްޕިޓަލަށް ދާންޖެހިދާނެތީ ބިރުންކަންވެސް ފަހަރެއްގައި ދަރިފުޅަށް އިހްސާވި ކަމަށްވެސް ވެދާނެއެވެ. ދަރިފުޅާއެވެ! ދަރިފުޅާ މަންމަޔާ ގުޅިފައިވާލެއް ބަދަހިކަމުން، ބައްޕަމެން ދެމަފިރިން، ދަރިފުޅުގެ ސަލާމަތަށާއި މަންމަގެ ސަލާމަތަށް ކަންބޮޑުވެފައި ތިބި މިންވަރުވެސް މަންމަގެ ހުވާސް، ދަރިފުޅަށް އިހްސާސްވެފައިވެދާނެ ކަމަށް ބައްޕަ ގަބޫލު ކުރަމެވެ. މުޅި އެމެރިކާގެ ވިޔަފާރީގެ ނާރެސް ކަމުގައިވާ ނިއުޔޯކުގައި ބައްޕަމެން އުޅެން ޖެހިފައިވާތީ، ކަންބޮޑުވުމަކީ މިހާރު ހޭނިފައިވާ އާދައެކެވެ. ދަރިފުޅުގެ ދޮށްޓައްތިބި ކުދިން، ދަރިފުޅު ތަންކޮޅެއް ބޮޑުވީމައި، ބައްޕައަކީ ނިކަން އަވަހަށް ކަންބޮޑުވާ މީހެކޭވެސް ފަހަރެއްގައި  ބުނެފާނެއެވެ. ދަރިފުޅާއެވެ! ނޫސް މަޖައްލާއެއް، ނުވަތަ ޓީވީ އިސްޓޭޝަނެއްގެ މުރާސިލެއްގެ ވަޒީފާގައި ގިނަދުވަހު އުޅެން ޖެހުނު ކޮންމެ މީހަކަށް އެނގޭނެ ފަދައިން، މިވަޒީފާއަކީ ފަސޭހަ ވަޒީފާއެއް ނޫނެވެ! އިންސާނީ ނަސްލުގެ ފަތިފުށް ފެނިފެނި ބައްޕަމެން ތިބެން ޖެހެނީ ކޮންމެ ކަމަކަށް ތައްޔާރަށެވެ!

ދަރިފުޅާއެވެ! ކުއްޖަކު ދުނިޔެއަށް އުފަންވާހިނދު މައިން  ކެތްކުރަން އެޖެހޭ ވޭނަކީ އެކި މީހުން އެކިމިންވަރަށް ތަހައްމަލު ކުރާ ރިހުމެކެވެ. ނަމަވެސް ކިތަންމެ ބުރަ ކަމެއްވެސް ކޮންމެވެސް މިންވަރަކަށް ލުއި ކުރެވެން އޮތްނަމަ އިންސާނުން އެ ލުއިގޮތެއް ހޯދާނެއެވެ. މިގޮތުން، އެ ޚުތޫރަތްތެރި ވަގުތު އަމިއްލަޔަށް ކުރެވެން ހުރި  ކަންތައް ކުރާނޭ ގޮތް މަންމައަށް  އިވޭވަރަށް ބައްޕަ ކިޔައިދެމެވެ.  މަންމަ ގެންގުޅޭ ފޮތެއް ބަލައިގެން މަޑުމައި ތިރި އަޑަކުން، ހިތަށް ތަސައްލީ ލިބޭ ރާގަކަށް އެ ފޮތުގައި ހުންނަ އިރުޝާދުތައް ބައްޕަ ކިޔައިދެމެވެ. މަންމަ ނޭވާ ލާންޖެހޭ ގޮތްގޮތާއި ހިތްހަމަޖެހޭ މަންޒަރުތަކާއި އުފާވެރި ހަނދާންތައް ހިތަށް ގެނެސް ބިރުވެރި ނާމާން ޚިޔާލު ސިކުންޑިން ދުރަށް ނެރޭނެ ގޮތްގޮތެވެ. ކިތަންމެ ވަރަކަށް ތައްޔާރު ވެވުނު ނަމަވެސް ދަރިފުޅު އުފަންވީ އެ ފޮތް ލިޔުނު މީހަކު ހީވެސް ނުކުރާނެ ކަހަލަ ހަލަބޮލި ނުރައްކާ ދުވަސްވަރެއްގައެވެ!

ނޫސްވެރިން އަމިއްލަ ގައުމާ ދުރުގައި އުޅޭއިރު ދިމަވާ ކަންކަމަށް ބައްޕަކަހަލަ ނޫސް ރިޕޯޓަރުން ހާނުވައި އެކި ހާލަތުގައި ކަން ކުރާނޭގޮތުގެ އަތްމަތީ ފޮތެއް ލިޔުއްވި އޮސްޓްރޭލިޔާ ލިޔުންތެރިއަކު، ހަނގުރާމަ ހިނގާ ތަންތަނުން ޚަބަރު ހޯދައި ފެތުރުމުގައި ކަންތައް ކުރާނޭ ގޮތް ލިޔެފައިވާ ފޮތުން ތަންކޮޅަކާ، ދަރިފުޅު އުފަންވި ދުވަސްވަރަކާ މާ ބޮޑު ތަފާތެއް ނެތެވެ!

ދަރިފުޅާއެވެ! އާންމު ގޮތެއްގައި، މައިންބަފައިންނަށް ވާގޮތަކީ ދަރިޔަކު އުފަންވެ، އެދަރިފުޅު އަލަށް ފެންނަ ހިނދު ހިފެހެއްޓުމެއްނެތި، އުފަލަށް ކެތްނުކުރެވިގެން ކަރުނަ އޮހެން ފެށުމެވެ! ދަރިފުޅު  އަލަށް ފެނުމުން ބައްޕަ އެންމެ އުފާވީ ދަރިފުޅާއި މަންމަގެ ފުރާނަ ސަލާމަތްވީތީއެވެ. އެއްވެސް ނުރައްކަލެއް ދިމާނުވެ ފޫޅުމާމައަށް ހުރިހާ ކަމެއް ބެލެހެއްޓުނީމައެވެ. ބައްޕަމެން ތިބީ ބިރުން ގޮތް ހުސްވެފައެވެ. ކިތަންމެ ހުޝިޔާރު މީހަކަށްވެސް ކާރެއް ދުއްވޭނީ އެންމެ ފުރަތަމަ އެ ކާރު އޮތް ތާކަށް ގޮސް އެ ކާރަށް އެރިގެންނެވެ. ދުއްވޭނީ މަގުގައި ތަން އޮވެގެންނެވެ. ދަރިފުޅު އުފަންވިރޭ އެއީ ކުރެވޭވަރުގެ ކަމެއް ނޫނެވެ. ބައްޕަ އެންމެ އުފާވީ ގޭތެރެއިން ހުރިހާ ކަމެއް ހަމަޖެހުނީތީއެވެ!

ދަރިފުޅު އުފަންވި ދުވަސްވަރު އެންމެނަށް އުޅެން ޖެހިފައިވަނީ ނޭފަތާއި އަނގަ ނިވާވާކަހަލަ މޫނުމައްޗެއް އަޅައިގެންނެވެ. ބައެއް މީހުން އަމިއްލަޔަށް އެމީހެއްގެ މޫނަށް ހެޔޮވަރު މޫނުމަތި ފޮތިން ހަދައިގެންނެވެ. އެއް ސަބަބަކީ ޑަކްޓަރުންނަށާއި ނަރުހުން ބޭނުން ކުރަން ބޭސްފިހާރަތަކުގައި ހުންނަ، ބޭނުންކޮލާފައި އެއްލައިލާ މޫނުމަތިތައް ހުސްނުކޮށް ބަހައްޓަން ވެގެންނެވެ. ދަރިފުޅުގެ ދޮންބެއާއި ދޮންދައްތަ އުފަންވި ދުވަހު ބައްޕަމެންގެ ގެ އޮތީ ދެފަރާތުގެ ރައްޓެހިންނާއި ތިމާގެ މީހުނުން ފުރިފައެވެ. މިފަހަރު ބައްޕައަށް އެމީސްމީހުން މިފެންނަނީ ބައްޕަގެ ޖީބުގައި އަބަދު އޮންނަންޖެހޭ އަތުފޯނުންނެވެ. މި ކުޑަ ފޯނުން ފެންނަނީ ތިމާގެ މީހުންގެ ދެ ލޮލެވެ. އުފަލުން ހިނިތުންވެފައިވާބައި އެވަނީ އެއްކަލަ ފޮތި މޫނުމަތިން ނިވާވެފައެވެ. އުފާވެރިކަން އަޑުން އިވެއެވެ. ލޮލުންވެސް ފާހަގަވާ ފަހަރާއި ނުވާ ފަހަރެވެ. ކޮންމެވެސް އެއްކޮޅަކުން އިންޓަނެޓުގެ ސިގްނަލްގެ ބާރު ދެރަވެއްޖެ ނަމަ ބައްޕައަށް ފެންނަނީ ކުދި ކުދި ގޮޅިތަކެކެވެ!

ދަރިފުޅާއެވެ. ދަރިފުޅަށް މަންމަ  ބުއްޖައްސަން އާދަވެ އެކަމަށް ހަމަ ހޭނުނު ގޮތަށް، ބޭރުގައި އެ އަޑުގަދަކުރާ މީހުންގެ އަޑަށާއި ގޮވާ ގޮވުމަށްވެސް ބައްޕަ ހޭނެން ފަށައިފިއެވެ. ބައެއް ފަހަރު ދަރިފުޅުގެ ރުއިމަށްވުރެ އެމީހުންގެ އަޑުގަދަހެންވެސް ބައްޕައަށް ހީވެއެވެ! މި ރުޅިވެރިކަމެއް ފެށުނީ ޚަބަރު ގަޑިތަކުގައި ދުނިޔޭގެ ހުރިހާ ހިސާބެއްގެ ޓީވީތަކުން ދެއްކި ކުރު ވީޑިއޯއެއްގެ ސަބަބުންނެވެ. އެ ވީޑިއޯގައި ފެންނަނީ ޖޯޖް ފްލޮއިޑް ކިޔުނު ކަޅުނަސްލުގެ މީހަކު މަގެއްގެ އެއްފަރާތަށް ވައްޓާލައި އޭނާ ވައްޓައިލި ފުލުސްމީހާ އެ ޖޯޖް ފްލޮއިޑްގެ ކަރަށް ކަކުލުން އޮބައި ނޭވާ ހުސްވެ މަރުވަންދެން އޭނާގެ ކަރަށް އޮބައިގެން ދުލެއް ނުދީ ހުރުމުގެ ސަބަބުންނެވެ! ރޯމާ ދުވާލު، މަގުމަތީގައި، އެތަނުގައި ތިބި މީހުން އާދޭސްކޮށްކޮށްތިއްބައި  އަށެއްކަ މިނެޓުގެ ތެރޭގައި އިންސާނެއްގެ ފުރާނަ ދުއްވައިލީއެވެ! މިއީ މިހާރު އާ ކަމެއް ނޫނެވެ. ނަމަވެސް އިޖުތިމާއީ ވިޔުގަތަކުގައި މި ފްލޮއިޑް މަރާލި ވީޑިއޯ ދައުރުވާންފެށިލެއް ބާރުކަމުންނާއި މިހާރު ޚަބަރެއް ހިއްސާކޮށްލުމުގެ ފަސޭހަކަމުން ކަންކަން ރާވައިލާން ފަސޭހައީއެވެ. ނަސްލީ ތަފާތު ކުރުމުގެ އެންމެ ބާރުގަދަ ހެއްކަކަށް މިކަން ވީއެވެ.

(ނުނިމޭ)

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.