ކާމިޔާބު ދިރިއުޅުމެއް ހޯދުމުގެ ގޮތުން ކުރަން ޖެހޭ އެންމެ މުހިންމު އެއް ކަމަކީ ތިމާގެ ހަޔާތް ބާއްޖަވެރި ކުރުމުގެ ގޮތުން ކުރަން ބޭނުންވާ ކަންކަން ރޭވުމުގެ ހުނަރު ދެނެގަތުމެވެ. އެގޮތުން ބަލަންޖެހޭ އެންމެ މުހިންމު އެއް ކަމަކީ ތިމާ އަކީ ކާކު ކަން މިނެ ކިރާލުމެވެ. ތިމާގެ ވަށައިގެންވާ މާހައުލާއި ވެށި ދެނެގަތުމާއި އެމާހައުލާއި އެވެށީގައި ތިމާ އަށް ރަނގަޅަށް ކުރެވޭނީ ކޮން ކަމެއްތޯ ދެނެގަތުމެވެ. މިކަންކަން ދެނެގަތުމަށްފަހު އެވަގުތާއި ހާލަތާއި ގުޅޭ ގޮތުން ކުރިޔަށް ފިޔަވަޅު އެޅުމެވެ.
މިގޮތުން ކުރިޔަށް އެޅުނު ފިޔަވަޅަކީ ރަނގަޅު ފިޔަވަޅެއްތޯ ނުވަތަ ރަނގަޅު ނޫން ފިޔަވަޅެއްްތޯ އެނގޭނެ ގޮތަކީ އެފިޔަވަޅަކާއި ގުޅިގެން ނުކުންނަ ނަތީޖާ އަކުންނެވެ. ނަތީޖާ ރަނގަޅު ވެއްޖެނަމަ އެއީ ރަނގަޅު ފިޔަވަޅަކަށް ވީއެވެ. ނަތީޖާ ގޯސް ވެއްޖެނަމަ އެއީ ގޯސް ފިޔަވަޅެކެވެ. ޢާންމު ޙާލަތަށް ބަލާފައި ތިމާ އެޅީ ކޮންކަހަލަ ފިޔަވަޅެއްތޯ ނިންމުމަކީ ރަނގަޅު ގޮތެއް ނޫނެވެ. ބުއްދިވެރި ގޮތަކީ އެޅުނު ފިޔަވަޅުން ނުކުތް ނަތީޖާ އިން ގޮތެއް ނިންމުމެވެ.
ކައިވެނީގެ ގޮތުން އޮންނަ ގުޅުމަކީ ލޭގެ ގޮތުން އޮންނަ ގުޅުމަކަށް ނުވާތީ އެގުޅުން ބެލެވިފައި އޮންނަނީ ވަރަށް ނާޒުކު ގުޅުމެއްގެ ގޮތުގައެވެ. އެހެންކަމުން މި ނާޒުކު ގުޅުން ރަނގަޅު ގޮތުގައި ދެމެހެއްޓޭނީ އިހްސާސް ތަކާއި ގުޅިގެން ފިޔަވަޅު އެޅުމުގެ ބަދަލުގައި އިހްސާސް ތައް ދިމާވާ ސަބަބު ތަކާއި ގުޅިގެން ފިޔަވަޅު އެޅިގެންނެވެ. ލޭގެ ގޮތުން އޮންނަ ގުޅުމަކީ ގުދުރަތީ ގޮތުން ގުޅިފައިވާ ގުޅުމަކަށް ވާތީ އެގުޅުމަކީ ވަކި ކުރެވެން އޮންނަ ގުޅުމެއް ނޫނެވެ. އެއާ ޚިލާފަށް ކައިވެނީގެ ގުޅުމަކީ ދެމީހަކު ބައިވެރިވެގެން އުފައްދާ ގުޅުމަކަށް ވާތީ ކާމިޔާބު ކަމާއެކު އެގުޅުން ދެމެހެއްޓުމަކީ ފަސޭހަ ކަމެއް ނޫނެވެ. އެހެން ކަމުން އެގުޅުން ދެމެހެއްޓޭނީ ދިމާވާ މައްސަލަތައް ވިސްނުންތެރި ކަމާއި ޙިކްމަތްތެރި ކަމާއެކު ޙައްލު ކޮށްގެންނެވެ.
