އެއްފަހަރަކު މަސައްކަތްތެރިޔަކު އޭނާގެ އަންހެން ދަރިފުޅު ގޮވައިގެން އަހަރެންގެ ގާތަށް އައިސް ބުންޏެވެ. މިދަރިފުޅު ވަރަށް އަވަހަށް ކައިވެނި ކުރާނެއެވެ. އެކައިވެނި ބާއްޖަވެރިވޭތޯ ދުޢާ ކޮށްދޭށެވެ. ޖަވާބުގައި އަހަރެން ބުނީމެވެ. ކައިވެނި ކުރާ ފިރިހެނާ އާއި އަންހެނާ އަކީ ކައިވެނީގައި ދިމާވާނެ މައްސަލަ ތަކާއި ބަލިކަށިކަން ދެނެގަތުމުގެ ގާބިލުކަން ހުރި ދެމަފިރިން ކަމުގައި ނުވަނީ ނަމަ އެކައިވެންޏެއް ދެމެހެއްޓުމަކީ ނާދިރު ކަމެކެވެ.
ކައިވެނި ވުމަށްފަހު އެކަމުން ހުރިހައި ކަމެއް ހައްލު ވާނެ ކަމަށް ބެލުމަކީ އެންމެ ރަނގަޅު ގޮތެއް ނޫނެވެ. އޭގެ ބަދަލުގައި ކައިވެނިވާ ދެމީހުންވެސް އެކަކު އަނެކެއްގެ ކިބައިގައި ކުރީއްސުރެ ހިފާފައި ހުންނަ ސިފަތަކަށް ބެލުމަށްފަހު އެއީ އޭނާގެ ކިބައިގައި ހުރި ސިފަތައް ކަމުގައި ގަބޫލު ކުރުމެވެ. އެކަކު އަނެކަކު މިނެކިރަނީ ދަނޑިބުރިއަކުން ކަމަށް ވަނީނަމަ ނަތީޖާ ރަނގަޅެއް ނުވާނެއެވެ. އަދި އެގޮތުން މިނާ މިންގަނޑުން އަނެކާގެ ކިބައިގައި ތިމާ ނުރުހޭ ސިފަތަކެއް ހުރިނަމަ ތިމާ ބޭނުންވާ ބައިވެރިޔާ ނުލިބުނީ ކަމުގައި ނިންމައިގެން ނުވާނެއެވެ. މިގޮތަށް ނިންމަން ވެއްޖެނަމަ ދެމަފިރިންގެ ޙަޔާތުން ލިބެންޖެހޭ ފޮނިމީރުކަން ނުލިބޭނެއެވެ.
ޙަޤީޤަތުގައި ކޮންމެ ފިރިހެނަކީވެސް އަދި ކޮންމެ އަންހެނަކީވެސް ޢާންމުކޮށް ބަލާ ބެލުމަށް ތަފާތު ގޮތަކަށް ފެނުނު ކަމުގައި ވިޔަސް އެއްކަހަލަ މީހުންނެވެ. މާކަ ބޮޑު ތަފާތެއް ނުހުންނާނެއެވެ. މިއީ މިކަން އޮންނަ ގޮތް ކަމަށް ދެމަފިރިން ވެސް ގަބޫލު ކުރާނަމަ ތިމާއަށް ލިބިފައިވަނީ އެންމެ ރަނގަޅު ބައިވެރިޔާ ކަމުގައި ފެންނާން ފަށައިފާނެއެވެ.
