
ފިރިހެންމީހާ އަކީ އަނާވަންތަކަން (އީގޯ) ހުރި މީހަކަށް ވެފައި އަންހެންމީހާ އަކީ ޖަޒުބާތީ (އިމޯޝަނަލް) މީހަކަށް ވެއްޖެނަމަ ގިނަފަހަރަށް ގޮތް ދޫނުކުރުމާއި އަރައިރުންވުން ގިނަވާނެއެވެ. މިގޮތަށް ދިމާވާނަމަ މިކަމުން އަރައިގަތުމަކީ ފަސޭހަ ކަމަކަށް ނުވާނެއެވެ. މިކަމުގައި އޮތް ހައްލަކީ ފިރިހެންމީހާގެ އަނާވަންތަކަން ބޮޑު ވެގެން އުޅޭ ވަގުތު އަންހެންމީހާ ހިމޭނުން ހުރުމެވެ. އަދި ހަމަ މިބީދައިން، އަންހެންމީހާ ޖަޒުބާތީވެގެން އުޅޭ ވަގުތު ފިރިހެންމީހާ ހިމޭނުން ހުރުމެވެ. އެކަކު އަނެކަކަށް ރައްދު ދިނުމުން ދުރުހެލި ވުމެވެ. މިނޫން ގޮތަކަށް މިކަން ޙައްލު ނުކުރެވޭނެއެވެ.
ބައެއް ފަހަރު ދެމަފިރިންގެ ޒުވާބަކާއި ނުލައިވެސް ރުޅި ގަދަ ވެދާނެއެވެ. އެފަދަ ހާލަތެއްގައިވެސް ރުޅި އޭގެ އެންމެ މައްޗަށް ދާނީ ކުޑަ އިރުކޮޅަކުންނެވެ. އެއީ އެކަމަށް ޖާގަ ދެވުނީމައެވެ. އަލިފާނަށް ދަރު އެޅުނީމައެވެ. ގުދުރަތީ ގާނޫނު ފައްކާ ގޮތުގައި މިފަދައިން އަންނަ ރުޅި ގަދަވެފައި ހުންނާނީ 30 ސިކުންތަށެވެ. އެވަގުތުކޮޅު ދިއުމާއެކު މަޑުމަޑުން ދާނީ މައިތިރި ވަމުންނެވެ. ވީމާ ރުޅި އޭގެ އެންމެ މައްޗަށް ދިއުމަށް ޖާގަ ނުދިނުމަކީ މުހިންމު ކަމެކެވެ.
މިދެންނެވުނު ގުދުރަތީ ގާނޫނަކީ ދެމަފިރިންގެ ހަނދާނުގައި ތާއަބަދު ބަހައްޓަން ޖެހޭ ކަމެކެވެ. މިކަމަށް އަހަރެން ކިޔާ ނަމަކީ ކުއްލި ފަރުވާގެ 30 ސިކުންތެވެ. މިކަމަށް ސަމާލުކަން ދެވިގެން ދިރިއުޅުން ކުރިޔަށް ގެންދެވޭނަމަ ދިރިއުޅުމުގައި ދިމާވާ ބޮޑެތި މައްސަލަތައް ކުރިމަތި ވުމަކީ ނާދިރު ކަމެކެވެ.
ހެއްދެވި ފަރާތުން ވަނީ ގުދުރަތުގައި ސަލާމަތީ ކަންކަން ލައްވާފައެވެ. މިގޮތުން ލައްވާފައިވާ ކަންކަން ދެނެގަނެ އެގޮތުގެ މަތީން އުޅުމަކީ އެންމެ މޮޅު ގޮތެވެ. ގުދުރަތީ ގޮތުން މިކަމުގައި ލައްވާފައިވާ ގޮތަކީ ހަނުހުރުމެވެ. މިއީވެސް ޖަވާބު ދިނުމުގައި ބާރުގަދަ ގޮތެކެވެ. މިކަން އެނގި މިގޮތަށް އުޅެވޭނަމަ ދިރިއުޅުން ބާއްޖަވެރި ވާނެއެވެ.