އެއްދުވަހަކު އަހުރެންނާއި ދިމާވި ތަންދޮރު ދަންނަ ރަނގަޅު މީހަކާއި ސުވާލު ކޮށްފީމެވެ. ތިބާގެ ޒަވާޖީ ޙަޔާތުގެ ހާލަތަކީ ކޮބައި ހެއްޔެވެ؟ ޖަވާބުގައި އޭނާ ބުނީ އޭނާގެ ޙަޔާތް ވަރަށް ރަނގަޅު ކަމުގައެވެ. އެއާއި ވިދިގެން އެޙަޔާތް ރަނގަޅުވީ ސަބަބަކީ ކޮބައިތޯ އަހައިލީމެވެ. އޭގެ ޖަވާބުގައި ބުނީ ނުފޫޒުން ސަލާމަތް ވެގެން އުޅުން ކަމުގައެވެ. މީގެ މާނައަކީ އެކަކު އަނެކާ ކުރާ ކަންކަމުގެ ތެރެއަށް ވަދެ އެކަންކަމާ ބެހުމުން ދުރުހެލި ވުމެވެ.
މިގޮތަކީ ގޭތެރޭގައި ކަންކަން ހަމަޖައްސަން ގެންގުޅެންވީ އެންމެ ރަނގަޅު ސިޔާސަތެވެ. މާތް ރަސްކަނލާގެ އަންހެނުންނާއި ފިރިހެނުން ހައްދަވާފައިވަނީ ތަފާތު ގޮތް ތަކަކަށެވެ. ކޮންމެ އަންހެނަކީވެސް އަދި ފިރިހެނަކީވެސް ތަފާތު މީހެކެވެ. އެހެން ކަމުން ކޮންމެ ކައިވެންޏަކީވެސް ތަފާތު ދެ ފިކުރެއް ގުޅިގެން އުފެދޭ ގުޅުމެކެވެ. މިގޮތުން މާތް ރަސްކަލާނގެ އުފައްދަވާފައިވާ ތަފާތު ފިކުރުތައް ބަދަލު ކުރަން އުޅުނަސް ލިބޭނެ ކާމިޔާބެއް ނޯންނާނެއެވެ. އޭގެ ބަދަލުގައި ތަފާތު ފިކުރުތަކާއެކު އުޅެން ދަސް ކުރުމަކީ އެންމެ ރަނގަޅު ގޮތެވެ.
ދެމަފިރީންގެ ދެމެދުގައި ހުންނަ ޚިޔާލު ތަފާތު ވުމަކީ އެކަކު އަނެކަކު ދެކެ ބިރުން ފިތްކަނޑައިގެން ދާންޖެހޭ ވަރުގެ ކަމެއް ނޫނެވެ. އެކަމުގައި ފޮރުވިގެންވާ ރަނގަޅު ގޮތްތަކެއް ހުންނާނެ ކަމަށް ވިސްނުމަކީ ބުއްދިވެރި ގޮތެވެ. އެއް ގޮތަކަށް ވިސްނާ އެއް ވައްތަރުގެ ޚިޔާލުގެ ދެމަފިރީންނަށް ކަންކަން ހާސިލުވާނީ މަދުންނެވެ. އެއާއި ޚިލާފަށް ބިނާ ކުރަނިވި ތަފާތު ޚިޔާލު ތަކާއެކު މަޝްވަރާގެ މަތީން ނިންމާ ނިންމުންތައް ރަނގަޅު ވެފައި މޮޅުވާނެއެވެ. އެންމެން އެއްގޮތަކަށް ވިސްނަނީ ނަމަ އިތުރު މޮޅު ގޮތެއް ހޯދަން ބޮޑަށް ވިސްނާނެ މީހަކު ނުހުންނާނެއެވެ. އެހެންކަމުން ގޭތެރޭގަޔާއި ގެއިން ބޭރުގައި ވެސް މިއީ އެންމެ މޮޅު ގޮތް ކަމުގައި ގަބޫލު ކުރާށެވެ.
