(5 ޑިސެމްބަރ 2025 ގައި ޝާއިއުކުރި ބަޔާ ގުޅޭ)
އައު އަޒުމުތައް
(1)
ޞަޚްރާ ފަތަހަ ކުރެއްވުމަށް ފަހު އަބުލްޙަސަން ތައްޔާރުކުރައްވާން ފެއްޓެވީ ކްރިސްޓިއަނުންނާ ދެކޮޅަށް ފައިސަލާކުރަނިވި ބޮޑު ހަނގުރާމައެއް ކުރައްވާށެވެ. މިހައި ތަނަށް ބަރްބަރީ އިސްލާމުންނާއި އަރަބި އިސްލާމުންނާއި އިސްޕޭނީ އިސްލާމުންގެ މެދުގައި އޮތް ދާޚިލީ ހަމަނުޖެހުމާއި އަރައިރުމުގެ ތެރޭގައި އުޅުނު އަމީރުންނާއި ގަބީލާތަކުގެ ސަރުދާރުން އެ ހުރިހައި ކަމެއް ދޫކޮށްލައިފައި ދުޝްމިނުންނާ ދެކޮޅަށް އެކަތިގަނޑަކަށް ވާން ފަށައިފިއެވެ. އިސްޕޭނިންނާއި ބަރްބަރީން ގަބޫލުކުރި ގޮތުގައި އަބުލްޙަސަނަކީ ހަމައެކަނި ވެރިއަކީއެއް ނޫނެވެ. އެއީ ހުރިހައި އިސްލާމުންގެ ވެރިޔާއެވެ. އޭނާ ވަނީ ސަލީބީ ދިދައިގެ ބަދަލުގައި ހަނދުފަޅީގެ ދިދަ އުހަށް އުފުއްލަވައިފައެވެ. ޢިލްމުވެރިންގެ ގިނަ ބަޔަކު ވަނީ މި ހަނގުރާމައަކީ ޖިހާދެއް ކަމަށް ފަތުވާ ނެރެފައެވެ. ޞަޚްރާގެ ފަތަޙައަށް ފަހު ގްރަނާދާއަށް ވަޑައިގެންވުނީމާ އަބުލްޙަސަނަށް ހަގީގީ މާނައިގައި ގްރަނާދާގެ ވެރިއަކަށް ވެވަޑައިގެންނެވުނު ކަމުގެ އިހުސާސް ކުރެއްވުނެވެ. ރައްޔިތުން ނުކުމެ ރަށްބޭރުން ފަށައިގެން ގަނޑުވަރާ ހަމައަށް އޮތް މުޅި މަގު ފުރައިލީ އެކި ބާވަތުގެ މަލުންނެވެ. ރޭގަނޑު އަބުލްޙަސަން އަލްޙަމްރާ ގަނޑުވަރުގެ މުންނާރަށް އަރައިވަޑައިގެން ރަށުތެރެއަށް ބައްލަވައިލެއްވިއެވެ. މުޅި ރަށް އޮތީ ދިއްލައި އަޅައިފައެވެ. މީސްތަކުންގެ އުފާވެރިކަމުގެ ނަޣަރާގެ ކެނޑިގެންނެއް ނުދެއެވެ. މި މަންޒަރު ފެނިވަޑައިގަތީމާ އަބުލްޙަސަން އުޑާ ދިމާއަށް ބައްލަވައިލައްވާފައި ދެއަތްޕުޅު އުފުލައިލެއްވުމަށް ފަހު ދުޢާފުޅު ކުރެއްވިއެވެ.
[ހުރިހައި ކަމަކަށް ކުޅަދުންވަންތަ އެންމެ މަތިވެރި ކަލާނކޯއެވެ. މިއަޅާގެ މުލައްދަނޑީގައި ބާރު ލައްވައިފާނދޭވެ. ޠާރިޤް ބިން ޒިޔާދުގެ ޢަޒުމުފުޅާއި މޫސާ ބިން ނުޞައިރްގެ ހިތްވަރުފުޅު މިއަޅާއަށް ދެއްވައިފާނދޭވެ. އެއް ފަރާތުން ފަރަންސޭސި ވިލާތުގެ ކޯރުތަކުން، އަނެއް ފަރާތުން ޗައިނާގެ ކޯރުތަކުން ފެން ބޮއި އުޅުނު އިސްލާމީ މުޖާހިދުންނަށް ދެއްވިފަދަ ކާމިޔާބީއެއް މިއަޅާގެ ގައުމުގެ މީހުންނަށްވެސް ދެއްވައިފާނދޭވެ. އަޅަމެންގެ ތެރޭގައިވާ ދެބައިވުންތައް އެއްބައިވަންތަކަމަށް ބަދަލުކޮށް ދެއްވައިފާނދޭވެ. މި ސަހަރާގެ ވެލިން ވަރުގަދަ ފަރުބަދައެއް އުފެއްދެވުމަކީ އިބަކަލާނގެ ކުޅަދުންވަންތަވެ ވޮޑިގެންވާ ކަމެކެވެ. އަޅަމެންގެ ވެރި ރަސްކަލާނކޯއެވެ. ކުޑަކުޑަ ފަތަޙައަކާ ގުޅިގެން އުފާކުރަމުން އެ ގެންދާ އަޅުތަކުންގެ އުއްމީދުތައް ގެއްލެނިނުކުރައްވާނދޭވެ. މި އަޅާއަކީ ނުކުޅެދުންތެރި ނިކަމެތި އަޅަކީމެވެ. އެހެންނަމަވެސް އިބަރަސްކަލާނގެ މި މަސައްކަތަށްޓަކައި ޚިޔާރު ކުރެއްވީ މިއަޅާ ކަމުގައި ވަނީނަމަ މި އަޅާއަށް ހިތްވަރާއި އަޒުމާއި ކެރުންތެރިކަން ދެއްވާނދޭވެ. ގެއްލިފައިވާ މިނިވަންކަން އަނބުރައި ގެނައުމަކީ މިއަޅާގެ ތަގުދީރުގައި ނެތް ކަމަކަށް ވަނީނަމަ އެކަމުގެ ތައުފީގު އަބޫ ޢަބްދުﷲއަށް ދެއްވައިފާނދޭވެ. އެހެން ނޫންނަމަ ގްރަނާދާގެ ވެރިކަމަށް އެކަށީގެންވާ މީހަކު ޚިޔާރުކުޅައުމުގެ ތައުފީގު މިއަޅާއަށް ދެއްވައިފާނދޭވެ.]
އަބުލްޙަސަން މި ދުޢާފުޅު ކުރައްވަމުން ގެންދެވިއިރު އަބޫ ޢަބްދުﷲ އިންނެވީ އޭނާގެ އައު މުރުޝިދާއެކު ގަނޑުވަރުގެ ކޮޓަރިކޮޅެއްގައެވެ. ހައެއްކަ ދުވަހުގެ ތެރޭގައި މުދައްރިސާއި ދަރިވަރު ވަނީ އާދަޔާ ޚިލާފަށް ގާތްވެފައެވެ. އަބޫ ޢަބްދުﷲ އޭނާގެ އާވާރާ މިޒާޖު ދޫކޮށްލައްވައި ހަމަ މަގަށް އެޅުއްވޭފަދަ މުދައްރިސަކާ ހަވާލު ކުރެއްވުނީތީ ބޮޑުބޭބޭފުޅު އައްޒަޣަލް ހުންނެވީ ވަރަށް އުފާފުޅުންނެވެ. އެ ދެމީހުން ކުޑަ ހިނދުކޮޅަކަށްވެސް ވަކިކުރައްވާކަށް އައްޒަޣަލް ބޭނުންފުޅެއް ނުވެއެވެ. އަބޫ ދާވޫދަކީ ޠަބީޢީގޮތުން ވަރަށް ފަރުވާތެރިވެގެން އުޅޭ މީހެކެވެ. އޭނާގެ ދަރިވަރުގެ ނާރުތަކުގައި ހިނގަނީ އަރަބި ލޭކަން އޭނާއަށް އެނގެއެވެ. އެހެންވީމާ އޭނާގެ މަގުސަދުގެ ވާހަކަ ދެއްކުމަކީ އަދި މުނާސިބު ކަމެއް ނޫންކަންވެސް އެނގެއެވެ. އޭނާ ގެންދިޔައީ އަބޫ ޢަބްދުﷲގެ ޚިޔާލުފުޅުތައް ދެނެގަތުމާއި މިޒާޖުފުޅު ދަސްކުރުމުގެ މަސައްކަތް ކުރަމުންނެވެ. މާ ގިނަ ދުވަސްތަކެއް ނުވެ އޭނާއަށް ފާހަގަ ކުރެވުނު ގޮތުގައި ވަގުތު އައިސް ޖެހުނީމާ ގްރަނާދާގެ ވަލީޢަހްދަކީ އޭނާ ބޭނުން ގޮތަކަށް ޖަހައިލެވޭ ބުމަރަކަށް ހެދިދާނެއެވެ.
އަބޫ ޢަބްދުﷲ އާ އެކަހެރިކޮށް ފުރަތަމަ ބައްދަލުވީ ދުވަހު އޭނާ ފުރަތަމަ ތީރު ދޫކޮށްލިއެވެ. އަބޫ ޢަބްދުﷲގެ އަތްތިލަފުޅުގައި ހުރި ނާރުފުޅުތަކަށް ބަލައިލާފައި ބުންޏެވެ. [މަނިކުފާނު ދުނިޔެއަށް ވަޑައިގެންފައި ވަނީ ގްރާނާދާގެ ވެރިކަން ކުރައްވާކަށް ނޫނެވެ.]
އޭނާއަށް އަބޫ ޢަބްދުﷲގެ މޫނުފުޅުމަތީން ފެނުނީ ކަންބޮޑުވެވަޑައިގަތުމުގެ އަސަރެވެ. އަބޫ ދާވޫދް ހިނިތުންވެލައިފައި ބުންޏެވެ. [މި ނާރުތަކުން އިޝާރާތްކުރަނީ ސިކަންދަރުގެ މަންޒިލަށެވެ. ޢަބްދުއްރަޙްމާން އައުޒަމްގެ މަތިވެރިކަމަށެވެ. އަޅުގަނޑުގެ ޢިލްމު ކުށް ކަމުގައި ނުވަނީނަމަ މަނިކުފާނުގެ ދިދަކޮޅު ޖަބަލުއްޠާރިޤްގައި ވިހުރުވޭނެއެވެ. މޮރޮކޯއާއި ފްރާންސްގެ ވެރިން ތިއްބަވާނީ މަނިކުފާނުގެ ވެރިކަމުގެ ދަށުގައެވެ.]
އަބޫ ޢަބްދުﷲ އަތްތިލަފުޅަށް ބައްލަވަން އިންނަވައިފައި ވިދާޅުވިއެވެ. [އެކަމަކު އަހަރެންގެ ބޮޑުބޭބެ ދެކެނީ އަހަރެން މިއީ އެއްވެސް ކަމަކަށް ކަމުނުދާވަރުގެ ސޮހޮލެއް ކަމުގައެވެ.]
[ދަންނަވަންތޯއެވެ؟ މޭވާ ފައްކާވާށާއި މާތައް ފޮޅޭން ކަނޑައެޅިފައިވާ ވަކި ވަގުތެއް އޮވެއެވެ. މަނިކުފާނުގެ މަތިވެރިކަން ފެނުމުގެ ވަގުތު ޖެހެންދެން ގާތްތިމާގެ ބޭފުޅުންނާއި އެކުވެރިން އެކަހަލަ ވާހަކަ ދައްކަވާނެއެވެ. އެއީ ފަހަރެއްގައިވެސް ނުބައި ނިޔަތެއްގައި ދައްކަވާ ވާހަކަފުޅެއް ނޫނެވެ. ހެޔޮ އެދިވަޑައިގަންނަވާތީ ދައްކަވާ ވާހަކަފުޅެވެ. ވަގުތު ޖެހެންދެން އިންތިޒާރު ކުރައްވާށެވެ.]
އެ ދުވަހުން ފެށިގެން އަބޫ ޢަބްދުﷲ ހީފުޅު ކުރައްވަނީ ތިމަން މިއީ ސިކަންދަރު ކަމުގައެވެ. އަދި އޭނާގެ މުރުޝިދު، އަބޫ ދާވޫދަކީ އަރަޞްޠޫ ކަމުގައެވެ. އެހެންވީމާ މިހާރު އިންތިޒާރު ކުރައްވަނީ ހެޔޮ ވަގުތަކަށެވެ. ހައެއްކަ ބައްދަލުވުމަށް ފަހު އަބޫ ޢަބްދުﷲ އެ އިންތިޒާރު ކުރައްވާ ވަގުތަކީ ކޮބައިކަން އަބޫ ދާވޫދަށް ވަރަށް ރަނގަޅަށް އެނގިއްޖެއެވެ. އެކަމަކު މުރުޝިދުގެ މަގުސަދަކީ ކޮބައިކަމެއް ދަރިވަރަކަށް އެއްގޮތަކަށްވެސް އެނގިވަޑައެއް ނުގަނެއެވެ. އަބޫ ޢަބްދުﷲގެ އެންގެވުމަށް މިއަދު އަބޫ ދާވޫދް އޭނާގެ ގެއިން ނުކުމެގެން އައި ވަގުތު އަބޫ ޢަބްދުﷲ ފެނުމާއެކު އޭނާގެ ކަންބޮޑުވެވަޑައިގަތުމަކީ ކޮބައިކަން ފިސާރި ރަނގަޅަށް އެނގިއްޖެއެވެ.
(2)
މުދައްރިސަށް އިހުތިރާމު ކުރެއްވުމުގެ ގޮތުން އަބޫ ޢަބްދުﷲ ތެދުވެވަޑައިގެންފިއެވެ. އަދި ކޮޓަރިކޮޅުގެ ދޮރުކޮޅު ލައްޕައިލުމަށް އަރިހުބޭކަލަކަށް އަންގަވައިފިއެވެ. ދެ ބޭފުޅުން އިށީނދެވަޑައިގަތީ މަޚުމަލުގެ ގޮދަޑިޖެހި ހައިވަކަރު ގޮނޑިކޮޅުގައެވެ.
އަބޫ ދާވޫދް ބުންޏެވެ. [އަޅުގަނޑު ހީކުރީ މަނިކުފާނު އުޅުއްވާނީ ބާޒާރުމަތީގައި އުފާފާޅުކޮށް އެ އުޅޭ މީހުންގެ ތެރޭގައި ކަމަށެވެ. ގްރަނާދާގެ ވަލީޢަހްދު ކަންބޮޑުވެވަޑައިގެން ތިޔަ އުޅުއްވާ ކަމަކީ ކޮބައިތޯއެވެ؟]
އަބޫ ޢަބްދުﷲ ވިދާޅުވިއެވެ. [މޫސާއާއި އައްޒައިޣަރީއާއި ބަދްރު ބިން މުޣީރާގެ ކާމިޔާބީ ފާހަގަކުރަން އަޅުގަނޑުވެސް އުޅެން އަބޫ ދާވޫދް ބޭނުންވަނީ ހެއްޔެވެ؟ އެކަމަށްޓަކައި އަހަރެންގެ އެއްބަފާ ކުދިންތައް އެ އުޅެނީއެއް ނޫން ހެއްޔެވެ؟ ނޯކަރުންހެން އަސްތަކުގެ ލަގަނުގައި ހިފައިގެން ހިނގައި އުޅޭތަން ނުދެކެން ހެއްޔެވެ؟ އެމީހުން އެހެން އެ އުޅެނީ އަހަރެން މިއީ އެފަދައިން ވައި އަޅުވަމުން ދުވާ މީހަކު ނޫންކަން އެމީހުންނަށް އެނގޭތީއެވެ. އަދި އަހަރެން މިއީ ތާކުންތާކު ނުޖެހޭ މީހަކުކަން ބައްޕާފުޅަށް ދައްކަން ވެގެންނެވެ.]
އަބޫ ދާވޫދް ބުންޏެވެ. [މަނިކުފާނުގެ އެއްބައްޕާފުޅު ބޭފުޅުންނާ ބެހޭ އެއްވެސް ކަމެއް އަޅުގަނޑަކަށް އެނގިފައެއް ނެތެވެ. އެކަމަކު އައެްޒަޣަލަކީ މަނިކުފާނަށް ހެޔޮއެދިވަޑައިގަންނަވާ ބޭފުޅަކުކަން ދެނަހުރީމެވެ. ކަން މިހެން އޮތް ކަމުގައި ވިޔަސް މަނިކުފާނު ތަދުބީރު ކުރައްވާން ވާނީ ވަރަށް ވިސްނުންތެރިކަމާއެކުގައެވެ. މަނިކުފާނަކީ ގްރަނާދާގެ ވަލީޢަހްދެވެ. ވަލީޢަހްދުންނަށް ވާޖިބު ވެގެންވަނީ ތަޚުތަށް އަރައިވަޑައިގަތުމާ ހަމައަށް އެންމެ ބޮޑެތި ދުޝްމިނުންވެސް އެކުވެރިން ކަމުގައި ބައްލަވައިގެން އުޅުއްވާށެވެ. ކަނޑީގެ ބޭނުންފުޅު ކުރައްވައިގެން ދުޝްމިނުން ބަލިކުރެއްވުމުގެ ބާރަކީ ރަސްގެފާނަށް އޮންނަ ބާރެކެވެ. އެ ބާރެއް ވަލީޢަހްދަކަށް ނޯވެއެވެ. މާދަމާ ރަސްކަލަކަށް ވެވަޑައިގަންނަވާނީ މަނިކުފާނެވެ. އެ ބާރު ލިބިވަޑައިގެންނެވީމާ ދުޝްމިނުންގެ ކަނަދުރާއާއި މަނިކުފާނުގެ ކަނޑިކޮޅާއެވެ. އެ ވަގުތު އަންނާންދެން އެ ކަނދުރާތަކުގައި މަލުގެ ހާރު އަޅުއްވަމުން ގެންދަވާށެވެ.]
އަބޫ ޢަބްދުﷲ ވިދާޅުވިއެވެ. [އަހަރެންގެ ބޮޑުބޭބެޔާމެދު ތިޔަ ގެންގުޅެނީ ހާދަހާ ހިތްހެޔޮ ވިސްނުމެކެވެ. އޭނާވެސް އެ އުޅުއްވަނީ ވެރިކަން ހޯއްދަވަންކަން އަދި ނޭނގެނީތާއެވެ. އޭނާ އެ އުޅުއްވަނީ ބައްޕަވެސް ކުޅޭކުޅޭ އެއްޗަކަށް ހައްދަވައިގެންނެވެ. އަހަންނަކީ އެ ގޮތަށް ކުޅެވޭނޭ މީހަކު ނޫންކަން އޭނާ ދެނެވަޑައިގަނެއެވެ. އެހެންވީމާ ބޮޑުބޭބެ މަސައްކަތް ކުރައްވާނީ އަހަރެންގެ އެއްބަފައި އެހެން މީހަކު ވެރިކަމަށް ގެންނަވާށެވެ. އޭނާއަށް ވެރިކަން ކުރެއްވޭން އޮތް ގޮތަކީ އެއީއެވެ.]
[މާތް ﷲ ރަސްގެފާނުގެ އުމުރުފުޅު ދިގުކުރައްވާށިއެވެ. އަޅުގަނޑުގެ ހިތް ބުނާ ގޮތުގައި އެމަނިކުފާނު ދިރިދުނިޔޭގައި ހުންނަވައި މަނިކުފާނަކީ ގާބިލު ބޭފުޅަކު ކަމަށް ގަބޫލުފުޅު ކުރައްވައި ތަޚުތަށް އިސްކުރައްވާނެއެވެ.]
އަބޫ ޢަބްދުﷲ މާނޭވާފުޅެއް ލެއްވިއެވެ. [ބައްޕާފުޅު ކޮންމެ ކަމެއްވެސް ނިންމަވާނީ ބޮޑުބޭބެޔާ މަޝްވަރާ ކުރައްވައިފައެވެ. ބޮޑުބޭބެ އަހަރެންގެ ކޮޅަށް ބުރަވާނޭ ކަމަކަށް ނުފެނެއެވެ.]
އަބޫ ދާވޫދް ކުޑައިރުކޮޅަކު އިސްދަށަށް ޖަހައިލައިގެން އިނދެ ވިސްނައިލުމަށް ފަހު ބުންޏެވެ. [އަޅުގަނޑު މަނިކުފާނުގެ އަތްޕުޅު ބެލީމެއް ނޫންތޯއެވެ؟ އެ ވަގުތު އެއް ވާހަކައެއް އަޅުގަނޑު ނުދަންނަވަމެވެ. އެއީ ގަތް ބިރެއްގެ ސަބަބުންނެވެ.]
އަބޫ ޢަބްދުﷲ ވިދާޅުވިއެވެ. [ބިރު ނުގަނެ ބުނާށެވެ.]
އަބޫ ދާވޫދް ދެ ފަރާތް ބަލައިލުމަށް ފަހު ބުންޏެވެ. [އެއްވެސް މީހަކަށް މި ވާހަކަ އިވިއްޖެއްޔާ މަނިކުފާނުގެ އިތުރަށް އަޅުގަނޑަށްވެސް ވަރަށް ބޮޑު މުސީބާތަކާ ކުރިމަތިލާން ޖެހޭނެއެވެ. އަޅުގަނޑު ބިރުގަތީ އެހެންވެގެންނެވެ.]
އަބޫ ޢަބްދުﷲ ވިދާޅުވިއެވެ. [ކަންބޮޑުނުވާށެވެ. އެއްވެސް މީހަކަށް އަޑެއް ނީވޭނެއެވެ.]
އަބޫ ދާވޫދް ބުންޏެވެ. [އަޅުގަނޑަށް ލިބިފައިވާ ޢިލްމުވެރިކަން ބުނަނީ ބައްޕާފުޅު ދުނިޔޭގައި ހުންނަވަނިކޮށް މަނިކުފާނު ތަޚުތަށް އަރައިވަޑައިގަންނަވާނޭ ކަމުގައެވެ. އެއީވެސް ބައްޕާފުޅުގެ ރުހުންފުޅަކާ ނުލައެވެ. ގުދުރަތުން އެ ފުރުސަތު މަނިކުފާނަށް ދެއްވާނެއެވެ. އެއީ ވަރަށް ހިތި ނިންމެވުމަކަށް ވާނެއެވެ. އެކަމަކު އެ ނިންމެވުން ނިންމަވަން ވާނެއެވެ. އަންދަލުސްގެ ކާމިޔާބީ ލިޔުއްވިފައި ވަނީ އަބުލްޙަސަންގެ އަތްޕުޅަކު ނޫނެވެ. މަނިކުފާނުގެ އަތްޕުޅުގައެވެ.]
އަބޫ ޢަބްދުﷲގެ ހިތްޕުޅުގައި ހިނގައިގަތީ އުފާވެރިކަމާއި ހާސްވެވަޑައިގަތުމާއި ކަންބޮޑުވެވަޑައިގަތުމުގެ އަސަރުތައް އެކުއެކީގައެވެ. [އެ ދަނޑިވަޅު އަންނާނީ ކޮން އިރަކު ހެއްޔެވެ؟]
އަބޫ ދާވޫދް ބުންޏެވެ. [އަވަރަށް އަވަހަށް އަންނާނެއެވެ. އެކަމަކު އަޅުގަނޑުގެ ނަސޭހަތް ހަނދުމަފުޅު ނައްތަވައިލައްވައިގެން ނުވާނެއެވެ. އައްޒަޣަލް މިތާގައި ބަހައްޓަވައިފައި ބައްޕާފުޅު ވަޑައިގަތީ ކީއްވެގެންކަން އެނގިވަޑައިގެނޭތޯއެވެ؟ ބައްޕާފުޅަށް ޝައްކު ކުރެއްވޭ ކަހަލަ އެއްވެސް ކަމެއް ނުކުރައްވާށެވެ.]
އަބޫ ޢަބްދުﷲ ވިދާޅުވިއެވެ. [އަހަންނަށް އެނގެއެވެ. އެއީ އަހަންނަށް ބައްޕާފުޅު އިތުބާރު ނުކުރައްވާތީއެވެ.]
[އެހެންވީމާ ބައްޕާފުޅުގެ އިތުބާރު ހޯއްދެވުމަކީ މަނިކުފާނު ކޮންމެހެންވެސް ކުރައްވާން ޖެހޭނޭ ކަމެކެވެ. ތާޖާއި ތަޚުތަށްޓަކައި ވަރަށް ގިނަ ކަންތައް ކުރައްވާން ޖެހިވަޑައިގަންނަވާނެއެވެ. ބައްޕާފުޅަށާއި ބޮޑުބޭބޭފުޅަށް އެއްވެސް ކަހަލަ ޝައްކެއް ވެވަޑައިގެންފިނަމަ މަނިކުފާނަށް ލަފާފުޅު އަރުވާން ހުރުމަކީ އަޅުގަނޑަށް ކުރެވޭނޭ ކަމަކަށް ނުވާނެކަން ހަނދުމަފުޅު ބަހައްޓަވާށެވެ.]
އަބޫ ޢަބްދުﷲ ވިދާޅުވިއެވެ. [އަހަރެން ތިޔަ ނަސޭހަތަށް އަމަލުކުރާނަމެވެ.]
[އަޅުގަނޑުގެ ފުރަތަމަ ނަސޭހަތް އަޑު އައްސަވާށެވެ. ހަމަ މިހާރު ބައްޕާފުޅުގެ އަރިހަށް ވަޑައިގަންނަވާށެވެ. އަވަހާރަފުޅު ނުލައްޕަވާނަމަ ބައްޕާފުޅަށް ފަތަހައިގެ ތަހުނިޔާ ވިދާޅުވާށެވެ. އަދި ހަނގުރާމައިގައި ބައިވެރިވެ ވަޑައިނުގެންނެވުނީތީ ހިތާމަފުޅު ކުރައްވާ ކަމަށްވެސް ވިދާޅުވާށެވެ. އެޔަށްފަހު، މާދަމާ ހެނދުނު އެންމެ ފުރަތަމަ ކުރައްވާ ކަމަކަށް ލަޝްކަރުގެ އިސް ކޮމާންޑަރުންނާ ބައްދަލު ކުރެއްވުން ކަމުގައި ހައްދަވާށެވެ. އެ ކޮމާންޑަރުންނަށް އިނާމު ދެއްވުމަކީވެސް ވަރަށް ރަނގަޅު ކަމަކަށް ވާނެއެވެ. މިހެން ހެއްދެވީމާ ރަސްގެފާނު ވަރަށް އުފާފުޅު ކުރައްވާނެއެވެ. ފަހުން އެ ކޮމާންޑަރުންގެ ބޭނުން މަނިކުފާނަށް ހިއްޕެވޭނެއެވެ.]
[އަހަރެން ހަމަ މިހާރު ދަނީއެވެ.]
ވިދިގެން އައި ދުވަހު އަބުލްޙަސަން އައްޒަޣަލަށް ވިދާޅުވިއެވެ. [އަބޫ ޢަބްދުﷲ ތަރުބިއްޔަތުކުރަން ކޮއްކޮ ހަވާލުކުރި މީހާޔާ އަހަރެން ބައްދަލުކޮށްލާން ބޭނުމެވެ. އެއީ ގާބިލު މީހަކުތޯ ބަލައިލާން ޖެހޭނެއެވެ. އަހަންނަށް ފާހަގަ ކުރެވުނު ގޮތުގައި އަބޫ ޢަބްދުﷲގެ ވިސްނުމާއި ފިކުރަށް ވަރަށް ބޮޑު ބަދަލެއް އަތުވެއްޖެއެވެ. އަހަރެން އޭނާ ހަނގުރާމައިގައި ބައިވެރި ނުކުރީތީ ނުރުހިގެން އެ ވާހަކަ ދައްކައިފިއެވެ.]
އައްޒަޣަލް ވިދާޅުވިއެވެ. [އެކަހަލަ މުރުޝިދަކު ލިބުނީތީ ﷲ އަށް ޙަމްދާއި ޝުކުރު ހުއްޓެވެ.]
މި ކަންތައް ހިނގައިދިޔަތާ ތިންވަނައަށް ވީ ދުވަހު ބަދްރު ބިން މުޣީރާއަށް ޚަބަރު ލިބިވަޑައިގަތީ ކްރިސްޓިއަނުން އަނެއްކާވެސް ސަރަހައްދީ އިމުގައި އިސްލާމުންނަށް ގޯނާކުރަން ފަށައިފިކަމުގެ ޚަބަރެވެ. އެހެންވީމާ އަވަހަށް ލަޝްކަރު ތައްޔާރު ކުރުމުގެ އަމުރު ނެރުއްވައިފިއެވެ.
ނުކުމެވަޑައިގަތުމުގެ ކުރިން އަބުލްޙަސަންގެ ފައިންޕުޅު ދެކެވަޑައިގެން ވިދާޅުވިއެވެ. [އަޅުގަނޑު ފުރިހަމަ ތައްޔާރީގައި ގޮސް އެންމެ ފުރަތަމަ ޞަޚްރާއަށް ހަމަލަދިނީ ރައްޔިތުން ޣަފުލަތުގެ ނިދީން ހޭލެއްވުމުގެ މަގުސަދުގައެވެ. މި ފަތަހައިގެ ފައިދާއަކީ ހައެއްކަ މަސްދުވަހުގެ ތެރޭގައި ބޮޑު ހަނގުރާމައަކަށް ލަޝްކަރު ތައްޔާރުކުރާނޭ ފުރުސަތު ލިބުމެވެ. އެހައިތަނާ ޖެހޭންދެން މަނިކުފާނު މި ސަރަހައްދު ރަނގަޅަށް ބަލަހައްޓަވަމުން ގެންދަވާށެވެ. ކޮންމެހެން ބޭނުން ޖެހިއްޖެ ހާލަތެއްގައި ނޫނީ އަޅުގަނޑު މަނިކުފާނަކަށް ނުދަންނަވާނަމެވެ. މަނިކުފާނު މިހާރު ތިޔަ ގެންދަވާ ގޮތަށް އިރުއިރުކޮޅާ ސަރަހައްދީ އިމުގެ މަތީގައި ހަމަލާތައް ދެއްވަމުން ގެންދަވާނަމަ ތައްޔާރުވުމުގެ ފުރުސަތު އަޅުގަނޑުމެންނަށް ވަރަށް ރަނގަޅަށް ލިބޭނެއެވެ. އަދި ފެރްނާންދޯގެ ސަމާލުކަމަށް އަޅުގަނޑުމެންގެ ތައްޔާރީތައް އަންނާނެ ގޮތެއްވެސް ނުވާނެއެވެ.]
އަބުލްޙަސަންގެ ފައިންޕުޅު ދެކެވަޑައިގެންފައި އަލްޙަމްރާ ގަނޑުވަރުން ނުކުމެވަޑައިގަތްތަނާ ކުޑަ އަންހެން ކުއްޖަކު އައިސް ބަދްރުގެ އަތްޕުޅަށް ކުޑަ ކަރުދާސްކޮޅެއް އަރުވައިފިއެވެ. ބަދްރު އެ ކަރުދާސްކޮޅަށް ބައްލަވައިލެއްވި އިރު ލިޔެފައި އޮތެވެ.
[މަނިކުފާނަށް ފަތަހައިގެ ތަހުނިޔާ ދަންނަވަމެވެ. ރަބީޢާ.]
ކުޑަ ހިނދުކޮޅަކަށް ބަދްރު ބިން މުޣީރާގެ ހިތްޕުޅުގައި ލަތީފީ ބާނިތަކެއް އުފެދުނެވެ. އަދި ފަރިތަފުޅު ސޫރައެއް ލޯފުޅުމައްޗަށް ވެރިވެގެން ދިޔައެވެ. ބަދްރު ކުއްލިއަކަށް އެ ކަރުދާސްކޮޅު ގެނައި ކުއްޖާގެ މައްޗަށް ސަމާލުކަން ދެއްވިއެވެ. [އަހަރެންގެ ނަމުގައި އޭނާއަށް ޝުކުރު އަދާކުރާށެވެ. އަދި އަހަންނަށްޓަކައި ހެޔޮ ދުޢާކޮށްދޭށޭ ބުނާށެވެ.]
ހަވީރުވެގެން އައި އިރު ސަރަހައްދީ ބާޒު އަރާމު ކުރެއްވުމަށްޓަކައި އޭނާގެ ޖަގަހައަށް ވަޑައިގެންނެވިކަން ބައްޕަގެ ފަރާތުން ރަބީޢާއަށް އެނގުނެވެ.
(3)
އަބުލްޙަސަން ޞަޚްރާ ހިއްޕެވި ޚަބަރު ފެރްނާންދޯއަށް ލިބުނީ ސަރަހައްދީ ބާޒުގެ ކިބައިން ބަދަލު ހިފުމަށްޓަކައި ތައްޔާރުވަމުން ދަނިކޮށެވެ. އޭނާ ހަމަ އެ ވަގުތު އޭނާގެ ގަވަރުނަރުންނާއި އިސް ވެރިންނަށް އެންގީ ހަނގުރާމައަށް ތައްޔާރުވާށެވެ. ޔަހޫދީ ވިޔަފާރިވެރިން ކަމުގައި ހެދިގެން އުޅޭ ޖާސޫސުން ގެންދިޔައީ އަބުލްޙަސަންގެ ރޭއްވެވުމުގެ ޚަބަރު އޭނާއަށް ދެމުންނެވެ. އޭނާ ގަނޑުވަރުގެ ކުރިމައްޗަށް ވަރަށް ބޮޑު ސަލީބެއް އެރުވުމަށްފަހު ކަސްތިއްޔާގެ އާއްމުންގެ ކުރިމަތީގައި ހުވައެއް ކުރިއެވެ. އެއީ އަލްޙަމްރާ ގަނޑުވަރުގެ ދޮރުކޮޅުމައްޗަށް އެ ސަލީބު ނޭރުވެނީސް ހަމަނޭވައެއް ނުލާނޭ ކަމުގެ ހުވައެވެ. ރަސްކަމުގެ ހުރިހައި ބޮޑުން އޭނާއަށް ތާއީދުކުރިއެވެ. އޭގެ ފަހުން އޭނާގެ ވެރިކަމުގެ ދަށުގައި އޮތްހައި ތަނަކުން ކަސްތިއްޔާއަށް އައިސް ގްރަނާދާ ނުހިފެނީސް އެބައިމީހުންގެ ކަނޑިތައް އުރައަށް ނުލާނޭ ކަމަށް ސަލީބުގެ ކުރިމަތީގައި ހުވާކުރަމުން ގެންދިޔައެވެ.
އެއް ދުވަހަކު ގްރަނާދާގެ ޔަހޫދީއަކު އައިސް ފެރްނާންދޯއާ ބައްދަލުކޮށްފައި ސިޓީއެއް ދީފިއެވެ. ފެރްނާންދޯ އެ ސިޓީ ކިޔައިފައި ބުނެފިއެވެ. [ކަލޭ ތިޔަ ކުރީ ވަރަށް ބޮޑު ޚިދުމަތެކެވެ. މި ސިޓީގެ ޖަވާބު ގްރަނާދާއަށް ގެންގޮސް ދީފިއްޔާ ވަރަށް ބޮޑު އިނާމެއް ދޭނަމެވެ. ލިޔުމެއް ގެންދަން ބިރުގަންނަ ކަމުގައި ވަނީވިއްޔާ އަހަރެން ދޭ މެސެޖެއް އަނގަބަހުން ގެންގޮސްދޭށެވެ.]
ޔަހޫދީ ކަލޭގެ ކިޔައިފިއެވެ. [ލިޔުމެއް ގެންގޮސްދޭކަށް އަޅުގަނޑު ބިރެއް ނުގަނެއެވެ. އަޅުގަނޑު އައި މަގުމަތީގައި އެކި ތަންތަނުން ހުއްޓުވައި ފާސްކުރިއެވެ. އެކަމަކު އެ މީހުންނަކަށް މި ސިޓީފުޅެއް ނުފެނުނެވެ.]
ފެރްނާންދޯ ބުންޏެވެ. [ކަލެއަކީ ވަރަށް ހުސިޔާރު މީހަކު ކަމުގައި ފެނެއެވެ. އެކަމަކު އެވަރަށް ފާސްކުރި އިރު ކަލޭ ސިޓީ ފޮރުވީ ކިހިނެއް ހެއްޔެވެ؟]
ޔަހޫދީ ކަލޭގެ ބުންޏެވެ. [އަބޫ ދާވޫދް އޮތީ ސިޓީ އަޅުގަނޑުގެ ފައިވާން ކިބައިގެ އެތެރެއަށް ލައި ފަހައިފައެވެ.]
[ވަރަށް ރަނގަޅެވެ. މާދަމާ އަހަންނާ ބައްދަލުކުރާށެވެ.] މިހެން ބުނެފައި ޔަހޫދީ ކަލޭގެ ޝާހީ މެހުމާނުޚާނާއަށް ގެންދާން ފެރްނާންދޯ އަމުރުކޮށްފިއެވެ.
އެކަލޭގެ ގެންދިޔައީމާ އަނެއްކާވެސް ވަރަށް ފަރުވާތެރިކަމާއެކު ފެރްނާންދޯ އެ ސިޓީ ކިޔައިލިއެވެ. އަދި އިރުކޮޅަކު ވިސްނައިލުމަށް ފަހު ގޮސް ރާނީގެ ކޮޓަރިއަށް ވަދެއްޖެއެވެ.
[ކަމަނާ ދެރަފުޅު ވެއްޖެއެވެ.] އޭނާ އަނބިމީހާގެ ގާތުގައި އިށީނދެފައި ބުނެލިއެވެ.
[ތިޔަ ވިދާޅުވި އެއްޗެއް އަޅުގަނޑަކަށް ނޭނގުނެވެ.]
[އަބޫ ދާވޫދާ ބެހޭ ގޮތުން ވިދާޅުވީ ވާހަކަފުޅު ހަނދުމަފުޅުގައި އެބަހުރިތޯއެވެ؟ އޭނާ އަޅުގަނޑުމެންނަށް ވަފާތެރިއެއް ނުވާނެއޭ ވިދާޅުވީމެއް ނޫންތޯއެވެ؟ މިއޮތީ އޭނާ ފޮނުވި ސިޓީއެކެވެ. މި ސިޓީ ވިދާޅުވީމާ ހުރިހައި ޝައްކެއް ފިލައިގެން ހިނގައިދާނެއެވެ.] ފެރްނާންދޯ އެ ސިޓީ ރާނީ އަތަށް ދީފިއެވެ.
ރާނީ ސިޓީ ކިޔައިލުމަށް ފަހު އިރުކޮޅަކު ވިސްނައިލާން އިނެވެ. [މި ސިޓީ ކިޔައިލީމާ އޭނާޔާ މެދު އޮތް ޝައްކު އެބަ ފިލައެވެ. އެކަމަކު ސިޓީ ލިޔެފައި މިއޮތީ އަބޫ ދާވޫދްކަން ހަނދުމަފުޅުގައި ބަހައްޓަވާށެވެ. އޭނާއަކީ ދޮގެއް ތެދަކަށް، ތެދެއް ދޮގަކަށް ހެދުމުގެ މާހިރެކެވެ. އޭނާ އަންގައިފައި މި އޮތީ އަލްޙަމާއަށް ކުއްލިއަކަށް ހަމަލަދޭށެވެ. މީގައި ނުރައްކާތެރި ރޭވުމެއް އޮވެދާނެތީ އަޅުގަނޑު ބިރުގަނެއެވެ.]
ފެރްނާންދޯ ބުންޏެވެ. [އަބުލްޙަސަންގެ ރޭވުމާ ބެހޭ ގޮތުން އަޅުގަނޑުގެ ޖާސޫސުން ވަރަށް ގިނަ ޚަބަރު ގެނެސްދީފައި އެބަހުއްޓެވެ. އަޅުގަނޑުމެންގެ އަތުން ޞަޚްރާ ބީވެގެން ދިޔައީތީ ބަދަލު ހިފުމުގެ ގޮތުން ގްރަނާދާގެ ކޮންމެވެސް ތަނަކަށް ކުއްލި ހަމަލައެއްދޭން އަބޫ ދާވޫދް ދީފައި އޮތް ލަފައަށް އަޅުގަނޑު ތާއީދުކުރަމެވެ. އެހެން ހެދުމުގެ ނަތީޖާއަކަށް ވާނީ އިސްލާމުންގެ ޖޯޝާއި ފޯރި ކުޑަ ދުވަސްކޮޅަކަށް ނަމަވެސް ފިނިވެގެން ދިއުމެވެ. އެޔާއެކު އަޅުގަނޑުމެންގެ ސިފައިންގެ ހިތްވަރު އާލާވާނެވެސް މެއެވެ. ކާދިސްގެ ގަވަރުނަރު އެ މީހުން ނުވިސްނައި ތިއްބައި ކުއްލިއަކަށް ހަމަލަ ދީފިނަމަ އެބައިމީހުން ޞަޚްރާ ފަތަހަކުރިހައި ފަސޭހަ ކަމާއެކު އަޅުގަނޑުމެންނަށް އަލްޙަމާ ހިފިދާނޭ ކަމަށް ފެނެއެވެ.]
[އެކަމަކު އެ މީހުން ތިބޭނީ ނުވިސްނައިކަމުގެ ޔަގީންކަން ލިބިވަޑައިގަތީ ކިހިނެއްތޯއެވެ؟ މި ސިޓީއަކީ އަބޫ ދާވޫދް ގްރަނާދާއަށް ގޮސް އިސްލާމުންނާ ބައިވެރިވެ އަބުލްޙަސަންގެ ރޭވުމުގެ މަތީން ފޮނުވި ސިޓީއަކަށް ވުމަކީ އެކަށީގެންވާ ކަމެއް ނޫންތޯއެވެ؟]
[އަޅުގަނޑުގެ ހިތް ބުނަނީ ތިޔައީ ކަމަނާގެ ހިތްޕުޅުގައި އުފެދޭ ވަހުމެއް ކަމުގައެވެ. ތިޔައީ ތެދުފުޅަކަށް ވިޔަސް އަޅުގަނޑުމެން އަޅާ ފިޔަވަޅަކީ ކޮބައިކަން އޭނާއަށް އެނގެނީ އޭނާ ފޮނުވި ސިޓީގެ ޖަވާބު އަޅުގަނޑު ފޮނުވީމައެވެ. އޭނާ ހުންނާނީ ޖަވާބެއްގެ އިންތިޒާރުގައެވެ. އެހެންވީމާ ރައްކާތެރިކަމުގެ ފިޔަވަޅެއްގެ ގޮތުން އަޅުގަނޑު ހަދާނެ ގޮތް ދަންނަވަންތޯއެވެ؟ ކާދިސްގެ ގަވަރުނަރު ގޮސް އަލްޙަމާ ފަތަހަކުރަންދެން އަޅުގަނޑު މި ސިޓީއަށް ޖަވާބެއް ނުފޮނުވާނަމެވެ. އަލްޙަމާއަކީ ގްރަނާދާގެ ތަޅުދަނޑިއޭ އަބޫ ދާވޫދް ބުނެފައި އެބައޮތެއް ނޫންތޯއެވެ؟ އެއީ ދޮގެއް ނޫނެވެ. އެތަން ހިފުނީމާ ހަނގުރާމައިގެ ދެބައިކުޅަ އެއްބައި ކާމިޔާބު ކުރެވުނީއެވެ. އަޅުގަނޑު ހަމަ މިއަދު ކާދިސްގެ ގަވަރުނަރަށް އަންގާނަމެވެ. އަދި މާދަމާ އަޅުގަނޑު ލޮއްޚާއާ ދިމާއަށް ދަތުރު ފަށާނަމެވެ. އެބައިމީހުންގެ މުޅި ސަމާލުކަން ހުންނާނީ އަޅުގަނޑާ ދިމާއަށެވެ. އެހެންވީމާ އަލްޙަމާ ހިފުމުގެ ފުރުސަތު ކާދިސްގެ ލަޝްކަރަށް ވަރަށް ރަނގަޅަށް ލިބޭނެއެވެ. ކޯރްދޮބާއާއި ސެބިއްޔާގެ ލަޝްކަރަށްވެސް ތައްޔާރުވާން އަޅުގަނޑު އަންގާނަމެވެ. އެހެން ހަނގުރާމައެއްގައި އަޅުގަނޑުމެން ބަލިވިޔަސް ހަމަ ޔަގީނުންވެސް އަލްޙަމާގައި ބައްޔެއް ނުވާނެއެވެ.]
(4)
އަބުލްޙަސަންގެ ޖާސޫސަކު އައިސް ފެރްނާންދޯގެ ލަޝްކަރު ކަސްތިއްޔާއިން ނުކުމެ ދަތުރަށްފަށައިފިކަމުގެ ޚަބަރު އަރުވައިފިއެވެ. އަދި ކޯރްދޮބާއާއި ސެބިއްޔާގެ ލަޝްކަރުވެސް ތައްޔާރުވަމުންދާ ޚަބަރު ލިބިވަޑައިގެންފިއެވެ.
އަބުލްޙަސަން ލަޝްކަރު ތިން ބަޔަކަށް ބައްސަވައިލެއްވިއެވެ. އެއްބައި އައްޒަޣަލްގެ ގިޔާދަތުގެ ދަށުގައި ފޮނުއްވީ ސެބިއްޔާގެ ލަޝްކަރު ހުއްޓުވާށެވެ. ދެވަނަ ބައި ހަވާލުކުރައްވާން އަބޫ މޫސާއަށްވުރެ އެކަށޭނަ ބޭފުޅަކު ފެނިވަޑައެއް ނުގަތެވެ. އެހެންނަމަވެސް ބައެއް އަމީރުންގެ މަޝްވަރާގެ މަތީން ގްރަނާދާގައި އަބޫ ޢަބްދުﷲގެ އަރިހުގައި އަބޫ މޫސާ ބެހެއްޓެވީއެވެ. ލަޝްކަރުގެ ގިޔާދަތު ހަވާލުކުރެއްވީ ބަދްރު ބިން މުޣީރާއާއެވެ.
ބަދްރު ބިން މުޣީރާ ގްރަނާދާއަށް ވަޑައިގަތީ އޭނާގެ ލަޝްކަރުގެ ދެބައިކުޅަ އެއްބަޔަށްވުރެވެސް ގިނަ މީހުންނާއެކުގައެވެ. ވަޑައިގެން ކޯރްދޮބާގެ ސަރަހައްދީ އިމާ ދިމާއަށް ދަތުރުކުރާ ލަޝްކަރާ ހަވާލުވެވަޑައިގެންފިއެވެ.
ބާކީ އޮތްބައިގެ ގިޔާދަތާ ހަވާލުވެވަޑައިގަތީ ސީދާ އަބުލްޙަސަނެވެ. ދަތުރަށް ފެއްޓެވުމުގެ ކުރިން އަބޫ ޢަބްދުﷲ ގެންނަވައިފައި ވިދާޅުވިއެވެ. [ދަރިފުޅާއެވެ. ބައްޕައާއި ބޮޑުބޭބެ އައްޒަޣަލް ނެތް ހާލަތުގައި ދަރިފުޅުގައި ބޮލުގައި އެޅެނީ ވަރަށް ބޮޑު ޒިންމާއެކެވެ. އުމުރަށް ބަލާއިރު ދަރިފުޅު މިހާރު ތިޔަވަނީ ވެރިކަމާ ހަވާލުވާން ގާބިލު މީހަކަށް ވެފައެވެ. އެކަމަކު ބައްޕަ މި ދަނީ ދަރިފުޅަށް އެހީތެރިވާން އަބޫ މޫސާ ބަހައްޓައިފައެވެ. ބައްޕަގެ ކުރިމަތީގައި އޭނާއެކޭ އައްޒަޣަލެކޭ އެއްވެސް ތަފާތެއް ނެތެވެ. އޭނާގެ މަޝްވަރާއާ ޚިލާފަށް ދަރިފުޅު އެއްވެސް ކަމެއް ނުކުރައްޗެވެ. މި ހަނގުރާމައިގައި ބައްޕައަށް ކަމެއް ވެއްޖެނަމަ ހަނދާންކުރާށެވެ. އަންދަލުސްގެ ގެއްލިފައިވާ މިނިވަންކަން ދަރިފުޅު ނުހޯދާހައި ހިނދަކު ބައްޕަގެ ފުރާނައަށް ހަމަޖެހުމެއް ނުލިބޭނެއެވެ.]
އަބޫ ޢަބްދުﷲ ބުންޏެވެ. [މި ފަހަރުވެސް ބައްޕަގެ ލަޝްކަރުގެ ސިފައަކަށް ވުމުގެ ފުރުސަތު ނުލިބުނީ އަޅުގަނޑުގެ ނަސީބު ދެރަކަމުންނެވެ. ބައްޕަ އަޅުގަނޑާ ހަވާލުކުރައްވާ ކޮންމެ ކަމެއް ފުރިހަމައަށް ކުރެވޭތޯ އަޅުގަނޑު މަސައްކަތް ކުރާނަމެވެ. އެކަމަކު އަބޫ މޫސާފަދަ ކުޅަދާނަ އަދި ތަޖުރިބާކާރު ޖެނެރަލަކު ބައްޕަގެ ލަޝްކަރަށް ވަރަށް މުހިއްމު ވާނޭ ކަމަށް އަޅުގަނޑަށް ފެނެއެވެ. ބައްޕަގެ އަރިހުގައި އޭނާ ހުރުމަކީ ވަރަށް މުހިއްމު ކަމެކެވެ. އަޅުގަނޑަށް އެހީތެރިވާން އެހެން މީހަކު ބަހައްޓަވާށެވެ.]
އަބުލްޙަސަން ވިދާޅުވިއެވެ. [ދަރިފުޅުގެ ވާހަކަ ތެދެވެ. އެކަމަކު އަބޫ މޫސާ މިތާގައި ބައްހައްޓައިފައި މި ދަނީ އެހެން ބޭނުމެއްވެސް އޮވެގެންނެވެ. އެއީ ބޭނުން ވެއްޖެ ހިނދެއްގައި އިތުރު ސިފައިން ފޮނުވުމުގެ މަސްއޫލިއްޔަތު އޭނާ އަދާކުރާނެތީއެވެ.]
ގްރަނާދާ ދޫކުރައްވައި ދަތުރުކުރައްވަމުން ވަޑައިގެން އަބުލްޙަސަން ރަށެއްގެ ބަނޑުދޮށުގައި ޖާގަ ޖައްސަވައި ފެރްނާންދޯގެ ލަޝްކަރަށް އިންތިޒާރު ކުރައްވާން ފައްޓަވައިފިއެވެ. އަބޫ މޫސާގެ ބަދަލުގައި އޭނާގެ އަރިހުގައި ތިއްބެވީ ގްރަނާދާގެ އެންމެ ކުޅަދާނަ ދެ ކޮމާންޑަރުން ކަމުގައިވާ އައްޒައިޣަރީއާއި ނަޢީމް ރިޟްވާނެވެ.
މިތާގައި ތިއްބަވާތާ ދެ ހަފުތާ ވީ ފަހުން އަބުލްޙަސަނަށް ޚަބަރު ލިބިވަޑައިގަތް ގޮތުގައި ފެރްނާންދޯގެ ލަޝްކަރު މާ ދުރު ނޫން ހިސާބެއްގައި ޖާގަޖަހައިފިއެވެ. އައްޒަޣަލާއި ބަދްރު ބިން މުޣީރާގެ ފަރާތްޕުޅުންވެސް ލިބިވަޑައިގަތީ އެކަހަލަ ޚަބަރެކެވެ. އެ ބޭފުޅުންނާ މާ ދުރު ނޫން ހިސާބަކަށް ކޯރްދޮބާގެ ލަޝްކަރާއި ސެބިއްޔާގެ ލަޝްކަރުވެސް ފޭބި ޚަބަރެވެ.
އެހެންނަމަވެސް ތިން ވަނަ ހަފުތާގައި ލިބިވަޑައިގަތީ ވަރަށް ހިތާމަވެރި ޚަބަރެކެވެ. ކާދިސްގެ ލަޝްކަރެއް ކުއްލިއަކަށް ހަމަލަދީ އަލްޙަމާ ހިފި ޚަބަރެވެ. ކަސްތިއްޔާއާއި ކޯރްދޮބާއާއި ސެބިއްޔާއާ ތިން ރަށުން ތިން ދިމާއަކަށް ލަޝްކަރު ފޮނުވުމުގެ ބޭނުމަކީ ކޮބައިކަން އަބުލްޙަސަނަށް ވިސްވަޑައިގަތީ ދެނެވެ. އަލްޙަމާ ހިފުމަށްފަހު އެ ރަށުގެ އެތައް ބަޔަކު މަރައިފިކަމުގެ ޚަބަރުވެސް އަބުލްޙަސަނަށް ލިބިވަޑައިގަތެވެ.
އަލްޙަމާއަކީ ގްރަނާދާގެ ދިފާއަށްޓަކައި އޮތް އެންމެ މުހިއްމު ތަނެކެވެ. ބޭނުން ވަގުތަކު އެތަނުން ގްރަނާދާއަށް ހަމަލަ ދިނުމަކީ ވަރަށް ފަސޭހަ ކަމެކެވެ. ގްރަނާދާގެ ހުރިހައި ދިމާއަކުން އިވެނީ [ސަހަރޯ މަގޭ އަލްޙަމާ] އޭ ގޮވާ އަޑެވެ. އެންމެންމެ ކިޔަމުން ދިޔައީ ގްރަނާދާގެ ތަޅުދަނޑި ގެއްލިއްޖެ ކަމުގައެވެ.
އަބުލްޙަސަނަށް ގަބޫލުފުޅު ކުރެއްވުނު ގޮތުގައި ދެން ފެރްނާންދޯ މަސައްކަތްކުރާނީ އަބުލްޙަސަންގެ ސަމާލުކަން އަލްޙަމާއަށް އަނބުރުވައިލުމަށް ފަހު ކޮންމެވެސް އެހެން ރަށަކަށް ހަމަލަދޭށެވެ. އެހެންވީމާ އައްޒަޣަލާއި ބަދްރު ބިން މުޣީރާއަށް އެންގެވީ މިހާރުވެސް ތިއްބެވިތާގައި ތިއްބަވާށެވެ. އެޔާއެކު އޭނާގެ ލަޝްކަރުގެ ދެބައިކުޅަ އެއްބައި އައްޒައިޣަރީގެ ގިޔާދަތުގެ ދަށުގައި އަލްޙަމާއާ ދިމާއަށް ފޮނުއްވައިލެއްވިއެވެ.
އައްޒައިޣަރީ ވަޑައިގެން އަލްޙަމާ ހިސާރު ކުރައްވައިފިއެވެ. އަލްޙަމާއަށް ވަދެވެން ހުރި ހުރިހައި މަގެއް ބަންދު ކުރައްވައިފިއެވެ. ފެރްނާންދޯއަށް މި ޚަބަރު ލިބުމާއެކު އޭނާގެ ލަޝްކަރަށް އެނގީ ތިން ދިމާއިން ކުރިއަށް ދަތުރު ފައްޓާށެވެ.
އެންމެ ފުރަތަމަ ކޯރްދޮބާގެ ލަޝްކަރާ ކުރިމަތިލައްވާން ޖެހިވަޑައިގަތީ ބަދްރު ބިން މުޣީރާއާއެވެ. ފެރްނާންޑޯގެ ލަޝްކަރަށް ސަރަހައްދީ އިން ހުރަސް ކުރުމުގެ ފުރުސަތު ދެއްވުމުގެ ބަދަލުގައި ބަދްރު އިން ހުރަސް ކުރައްވައި ވަދެވަޑައިގެން އެ ލަޝްކަރާ ހަމަލަދެއްވައިފިއެވެ. ކޯރްދޮބާގެ ލަޝްކަރާ އަޅައި ބަލާއިރު ބަދްރުގެ ލަޝްކަރުގެ މީހުން މާ މަދެވެ. އެހެންނަމަވެސް އޭނާގެ ހަނގުރާއިގެ އުސްލޫބާއި އުކުޅުގެ މޮޅުފުޅުކަމުގެ ސަބަބުން ކޯރްދޮބާގެ ލަޝްކަރަކަށް ހިފަހައްޓައެއް ނުލެވުނެވެ. ބަދްރު ގެންގުޅުއްވީ ގެރިއްލާ ހަނގުރާމައިގެ އުކުޅުތަކެވެ. ލަޝްކަރުގެ މީހުން ފިލައި ތިބެފައި އެއް ދިމާއަކުން ނުކުމެ ހަމަލަދީފައި އަނެއްކާވެސް ފިލަނީއެވެ. ދެން ނުކުންނަނީ އެހެން ދިމާއަކުންނެވެ. ބަދްރުގެ ލަޝްކަރުން މި ގޮތަށް އެ ދުވަހުގެ ހަތަރުދަމު އެކު ދިމަދިމައިން ހަމަލަދެމުން ގެންދިޔައެވެ.
ގްރަނާދާގެ ލަޝްކަރުގެ ވެރިއަކީ ސަރަހައްދީ ބާޒުކަން ކޯރްދޮބާގެ ލަޝްކަރަށް އެނގިއްޖެއެވެ. އެހެންވީމާ ކުރިއަށް ފިޔަވަޅެއް އެޅިޔަސް، ފަހަތަށް ފިޔަވަޅެއް އެޅިޔަސް ސަލާމަތްވާނޭ ގޮތެއް ނެތްކަން އެމީހުންނަށް ވިސްނިއްޖެއެވެ. ކޮންމެ ދިމާއަކުންވެސް ކުރިމަތިލާން ޖެހިފައިވަނީ ހަލާކާކަން އެނގިއްޖެއެވެ. އެވެސް މަރެވެ. މިވެސް މަރެވެ.
އަނެއްކޮޅުން އައްޒަޣަލްގެ ލަޝްކަރުން ގެންދަނީ ސެބިއްޔާގެ ލަޝްކަރު ތަޅައި ބުރުވަމުންނެވެ.
ކޯރްދޮބާގެ ޖެނެރަލަށް މެދުވެރިވީ ހާލަތު ފެރްނާންދޯއަށް އެނގުމާއެކު އޭނާ ލަޝްކަރާއިގެން ގޮސް ލޮއްޚާއަށް ހަމަލަދީފިއެވެ. އޭނާ މިފަދަ ވިޔާނުދާ ކަމެއް ކޮށްފާނޭކަން އަބުލްޙަސަނަށް ކުރިންވެސް ލަފާކުރެއްވިފައިވާތީ ލޮއްޚާ ފެނިވަޑައިގަންނަވާ ހިސާބަށް ވަޑައިގެންފިއެވެ. އެހެންނަމަވެސް ޖާސޫސުންގެ ފަރާތުން އެނގިވަޑައިގަތް ގޮތުގައި އެމީހުންގެ ލަޝްކަރުގައި ތިބި މީހުންގެ ޢަދަދު އަބުލްޙަސަންގެ ލަޝްކަރަށްވުރެ މާ ގިނައެވެ. ގްރަނާދާއިން މާ ގިނަ ބަޔަކު ނުގެންނެވޭނޭކަން އެނގިވަޑައިގެންފައިވާތީ އެތަނަށް ވަޑައިގަންނަވާން އެންގެވީ އައްޒަޣަލަށެވެ. ލޮއްޚާގެ ޚަބަރު އައްޒަޣަލަށްވެސް އޮތީ ލިބިވަޑައިގެންފައެވެ. އެކަމަކު ބޭބޭފުޅަށް އެހީތެރިވެވަޑައިގަންނަވާން ވަޑައިގަތުމުގެ ކުރީން ސެބިއްޔާއަށް ހަމަލަދެއްވައި ވަރަށް ބޮޑެތި ގެއްލުން ދެއްވުމަށް ފަހު ލޮއްޚާއާ ދިމާއަށް މިސްރާބު ޖައްސަވައިފިއެވެ. މީގެ އިތުރަށް ސެބިއްޔާގެ ލަޝްކަރު އަލްޙަމާއާ ދިމާއަށް ދަތުރު ފަށައިފިނަމަ ހިސާރު ނިންމަވައިލައްވާފައި ލޮއްޚާއަށް ވަޑައިގަންނަވާން އައްޒައިޣަރީއަށް އެންގެވިއެވެ.
ސެބިއްޔާގެ ފިނޑި ލަޝްކަރުގެ ބަޔަކު އައި ދިމާއިން އައްޒައިޣަރީ އަމްޙަމާގެ އިން ފާރު ވަރަށް ބޮޑަށް ހަލާކު ކޮށްލެއްވިއެވެ. ރަށް ފަތަހަ ކުރެއްވުމަށްވުރެ ބޮޑު ކަމަކަށް މިހާރު ކުރިފުޅުމަތީގައި އޮތީ ލަޝްކަރުގެ ސިފައިން ސަލާމަތްކުރާނޭ ގޮތެއް ހޯއްދެވުމެވެ. އެމީހުންގެ ވަށައިގެން މިހާރު އެ އޮތީ ސެބިއްޔާގެ ލަޝްކަރެވެ. އެ ލަޝްކަރު ދަނީ ހައްތަހާ ކައިރިވަމުންނެވެ. މާޔޫސީގެ ހާލަތުގައިވެސް އައްޒައިޣަރީ އިސްކަންދެއްވީ ހަތިޔާރު ބެހެއްޓެވުމުގެ ބަދަލުގައި ހަނގުރާމަ ކުރައްވާށެވެ. ވުމާއެކު ހިތްވަރުފުޅާއެކު މަސައްކަތް ކުރައްވައި ލަޝްކަރު އެއްފަރާތަކަށް ޖައްސަވައި ދިފާއުގެ ފުރުސަތު ބޮޑުވާގޮތް ހައްދަވައިފިއެވެ. އެންމެ ކުރީގައި ތިބީ ލޮންސިވެރިންނެވެ. އޭގެ ފަހަތުގައި ފައިމަގުގައި ހަނގުރާމަކުރާ މީހުންނެވެ. ލޮންސިވެރިން ހަމަލާދީ މަގު ހުޅުވައިދިނީމާ ފައިމަގުގައި ހަނގުރާމަކުރާ މީހުންނާއި އޭގެ ފަހަތަށް ތިބި މީހުން އެއްވެސް އަނިޔާއެއް، ގެއްލުމެއް ނުވެ ކޯރު ހުރަސްކުރަން އޮތް ބުރިޖާ ހަމައަށް ހިނގައްޖެއެވެ. އެކަމަކު ދުޝްމިނުންގެ ފައުޖެއް ބުރިޖުގެ އަނެއް ކޮޅުގައި ތައްޔާރަށް އޮތެވެ. އިސާހިތަކު ހަނގުރާމައިގެ މައިދާން ހޫނު ވެއްޖެއެވެ. ވަށައިގެން ތީރު އޮހޭން ފަށައިފިއެވެ. ކުއްލިއަކަށް ކޯރުގެ އަނެއް ފަރާތުން ﷲ އަކްބަރުގެ ނަޣަރާގެ އަޑު އިވޭން ފަށައިފިއެވެ. އެޔާއެކު ފެނުނީ ހިރަފުހުގެ ޠޫފާނެއްގެ ތެރެއިން ފަސް ސަތޭކައެއްހައި އަސްވާރުން ނުކުމެ ބުރިޖުގެ ކޮޅުގައި ތިބި ކާފަރުންނާ ހަމަލަދިން ތަނެވެ. މާ ގިނަ އިރުތަކެއް ނުވެ މުޅި ލަޝްކަރުގެ ވަސް ފުހެލައި ނިންމައިލައިފިއެވެ.
އައްޒައިޣަރީގެ ލަޝްކަރު ބުރިޖު ހުރަސްކޮށް ކޯރުގެ އަނެއް ފަރާތަށް ހިނގައްޖެއެވެ. ލަޝްކަރަށް ލިބުނު އެހީތެރިކަމަކީ ގްރަނާދާއިން އައި އެހީތެރިކަމެއްކަން އެނގިވަޑައިގަތީ ސަލާމަތުގެ އައްސޭރިއަކަށް ވަޑައިގެންނެވުނު ފަހުންނެވެ. އެހީތެރިވާން އައި ލަޝްކަރުގެ ކޮމާންޑަރާ ބައްދަލު ކުރައްވާން ބޭނުންފުޅު ވެގެން ވިދާޅުވީމާ މޫނު ނިވައިކޮށްގެން އިން އަސްވާރަކު ކުރިއަށް ޖެހިލިއެވެ. އަދި އަމުރުވެރި ރާގަކަށް ބުނެލީއަޑު އިވުނެވެ. [މިއީ ވާހަކަ ދައްކާން އޮތް ވަގުތެއް ނޫނެވެ. އަވަހަށް ލޮއްޚާއަށް ވަޑައިގަންނަވާށެވެ.]
މޫނު ނިވައިކުރި މީހާގެ އަޑު އައްޒައިޣަރީއަށް އެނގިވަޑައިގެންފިއެވެ. [އަޅުގަނޑާ ތިޔަ ގޮތަށް ވާހަކަފުޅު ދައްކަވާނީ މޫސާ ބިން އަބީ ޣައްސާން ފިޔަވައި ކޮން ބޭފުޅަކުތޯއެވެ؟]
މޫސާ ވިދާޅުވިއެވެ. [އެކަމަކު އަޅުގަނޑު މިތަނަށް އައިކަން އެއްވެސް އިތުރު މީހަކަށް އެނގިގެން ނުވާނެއެވެ. ރަސްގެފާނު ވަރަށް ކޯފާ ވާނެއެވެ. އެހެންވީމާ މި ވާހަކަ އެއްގޮތަކަށްވެސް ވިދާޅުވެގެން ނުވާނެއެވެ. ގްރަނާދާ ދޫކޮށްލުމަކީ މުޅިއަކުން ރައްކާތެރި ކަމެއެް ނޫނެވެ. އަބޫ ޢަބްދުﷲ މިހާރުވެސް ހީފުޅުކުރައްވާނީ އަޅުގަނޑު އެބަހުރި ކަމުގައެވެ.]
މިހެން ވިދާޅުވެފައި މޫސާ އޭނާގެ ލަޝްކަރާއެކު ވަޑައިގަތް ގޮތަށް ބޯ ހިރަފުހުގެ ތެރެއަށް ގެއްލިގެން ހިނގައްޖެއެވެ.
(5)
ގްރްނާދާގައި ބާކީ ތިބި ހުރިހައި ސިފައިން ފައިސަލާކުރުވަނިވި ހަނގުރާމައެއް ކުރުމަށްޓަކައި ލޮއްޚާގެ ބަނޑުދޮށަށް ޖަމާވަމުންދާ ކަމުގެ ޚަބަރު ބަދްރު ބިން މުޣީރާއަށް ލިބިވަޑައިގަތީމާ ބަދްރު ފުރަތަމަ ނިންމެވީ ކޯރްދޮބާގެ ލަޝްކަރަށް އެންމެ ފަހުގެ ހަމަލަ ދެއްވާށެވެ. މި ނިންމެވުމާއެކު މަންޞޫރު ބިން އަޙްމަދަށް އެންގެވީ ދެ ހާސް އަސްވާރުންނާއެކު ކޯރްދޮބާގެ ލަޝްކަރުގެ ފުރަގަހަށް ވަޑައިގަންނަވާށެވެ.
މަންޞޫރް ބިން އަޙްމަދު ރަށްރަށާއި ސަހަރުތައް ގިރާކުރައްވަމުން އަޖައިބެއްފަދަ ހަލުވިކަމާއެކު ކޯރްދޮބާގެ ލަޝްކަރުގެ ފުރަގަހަށް ވަޑައިގެންފިއެވެ. ލަޝްކަރު އައި ޚަބަރު ބަދްރު ބިން މުޣީރާއަށް ލިބިވަޑައިގެންނެވުމާއެކު ފައިމަގުގައި ހަނގުރާމަކުރާ ލަޝްކަރު ފަސް މޭލެއްހައިތަން ފަހަތަށް ޖައްސަވައިލެއްވިއެވެ. އަދި އަސްވާރުންނަށް އެންގެވީ ކަނާތްފަރާތުންނާއި ވައަތްފަރާތުން ދުޝްމިނުންނަށް ހަމަލަދޭށެވެ. ސިފައިން ފަހަތަށް ޖެހޭތަން ފެނުނީމާ ކޯރްދޮބާގެ ލަޝްކަރުން ގަބޫލުކުރީ އައްޒައިޣަރީގެ ލަޝްކަރެކޭ އެއްފަދައިން ބަދްރުގެ ލަޝްކަރުވެސް ލޮއްޚާގެ ހަނގުރާމައިގައި ބައިވެރިވުމަށްޓަކައި ދާން ތައްޔާރުވަނީ ކަމުގައެވެ. ފެރްނާންދޯގެ ފަރާތުން އެމީހުންނަށް އަންގައި އަމުރުކޮށްފައި އޮތީ ލޮއްޚާގެ ހަނގުރާމައިގައި ވަކި ގޮތެއް ނިމޭންދެން އިސްލާމުންގެ ލަޝްކަރަށް އެއްވެސް ދިމާއަކަށް ދިޔަނުދީ ހިފަހައްޓާށެވެ. މަންޞޫރު ބިން އަޙްމަދުގެ ލަޝްކަރު އައި ކަމެއް އޭރަކު އަދި ކާފަރުންނަކަށް ނޭނގެއެވެ. އެހެންވީމާ ކާފަރުންގެ ކޮމާންޑަރުން އެންގީ ބަދްރު ބިން މުޣީރާގެ ލަޝްކަރަށް ހަމަލަދޭށެވެ. އޭރު ބަދްރުގެ ލަޝްކަރުން ފަހަތަށް ޖެހުނު ސިފައިންގެ ތެރޭގައި ތިބި ތީރުވެރިން ޚަންދަގެއްގެ ފަހަތުގައި ޖާގަޖަހައިފިއެވެ.
ކޯރްދޮބާގެ ލަޝްކަރު ޚަންދަގާ ހަމައަށް ދިއުމާއެކު ކުރިމަތިލާން ޖެހުނީ ތީރުގެ ވާރެޔާއެވެ. ފަހަތަށް ޖެހުން ނޫން ގޮތެއް އެ ލަޝްކަރަކަށް ނެތެވެ. އެކަމަކު އޭރު މަންޞޫރު ބިން އަޙްމަދުގެ ލަޝްކަރު ފަހަތުން ހަމަލަދީފިއެވެ. ދެފަރާތުން ފަހައިގަތީމާ ކާފަރުންގެ ލަޝްކަރު މެދުގައި ތާށިވެއްޖެއެވެ.
ކަނާތްފަރާތުންނާއި ވައަތްފަރާތުން ބަދްރު ބިން މުޣީރާގެ ލަޝްކަރެވެ. ފަހަތުން މަންޞޫރު ބިން އަޙްމަދުގެ ލަޝްކަރެވެ. ކުރިމަތީގައި އޮތީ ޚަންދަގެވެ. ޚަންދަގުގެ ފުރަގަހުގައި ތިބީ ބަދްރުގެ ފަހުލަވާނުންނެވެ. ކޯރްދޮބާގެ ލަޝްކަރު ވަނީ ކަނޑުގެ ޠޫފާނެއްގައި އޮޔާއެކު ބާރަށް ބޮޑު ފަރުބަދައަކާ ދިމާއަށް ދަމަމުން ގެންދާ އޮޑިއަކާ އެއްގޮތް ވެފައެވެ.
ކަންބޮޑުވެގެން ތެޅިފޮޅިގަތުމުގެ ތެރޭގައި އަމިއްލަ އަސްތަކުގެ ފައިދަށުވެ އެތައް ބަޔަކު މަރުވެއްޖެއެވެ. ބައެއް މީހުން އަހާއެކު ގޮސް ޚަންދަގަށް ވެއްޓިއްޖެއެވެ. އާދައިގެ ސިފައިންނަށް ވަމުންދާ ގޮތެއް ކޮމާންޑަރުންނަކަށް ނޭނގެއެވެ. ކޮމާންޑަރުންނަށް ވަމުންދާ ގޮތެއް އާދައިގެ ސިފައިންނަކަށް ނޭނގެއެވެ. ފަތަހައިގެ އުއްމީދުގައި ކޯރްދޮބާގެ ލަޝްކަރަށް ހިތްވަރާއެކު ހަނގުރާމަ ކުރެވެން އޮތް ނަމަވެސް އިސާހިތަކު ހިތްވަރު އެލިއްޖެއެވެ. ފިލައިގެން ދިއުމުގެ ފުރުސަތު ލިބުނީ ވަރަށް މަދު މީހަކަށެވެ. މެންދުރުވެގެން އައި އިރު މައިދާން ފުރިފައި އޮތީ ކޯރްދޮބާގެ ސިފައިންގެ ހަށިތަކުންނެވެ. ބާކީ ތިބި މީސްކޮޅު ހަތިޔާރު ބަހައްޓައި އަމާންދީފިއެވެ.
(6)
ލޮއްޚާގެ ހަނގުރާމައިގައި ފެރްނާންދޯގެ ފަންސާސް ހާސް ސިފައިންނާ ހަނގުރާމަ ކުރުމަށްޓަކައި އަބުލްޙަސަންގެ ތިރީސް ހާސް ސިފައިން ތިބީ ތައްޔާރު ވެގެންނެވެ. ދެ ދުވަސްް ވާންދެން ފެރްނާންދޯގެ ނާއިބާއި ގްރަނާދާގެ ލަޝްކަރު މީހުން އެމީހުންގެ ހެވިކަން ދައްކަމުން ދިޔައެވެ. ހަނގުރާމަ ފެށުމުގެ ގޮތުން ފެރްނާންދޯގެ ލަޝްކަރުގެ ކޮމާންޑަރަކު މައިދާނަށް ނުކުތުމުންނެވެ. އެމީހާ ހުރީ ބޮލުން ފެށިގެން ފައިތިލަޔާ ހަމައަށް ދަނގަޑު ދަހަނާއިން ފޮރުވިގެންނެވެ. އޭނާ ކަނޑި އުފުލައިލިއެވެ. އިސްލާމުންގެ ލަޝްކަރުން ނުކުތީ ނަޢީމް ބިން ރިޟްވާނެވެ. އޭނާ ހުންނެވީ ދަގަނޑު ތާކިހަލެއް އަޅުއްވައިގެން ވަރަށް އާދައިގެ ހެދުމެއް ލައްވައިގެންނެވެ.
ދެ ފަހުލަވާނުންގެ ކަނޑިއާއި ކަނޑި ޖެހި ކަނި ބުރާން ފަށައިފިއެވެ. ކަސްތިއްޔާގެ ކޮމާންޑަރު ކިތަންމެ ވަރުގަދަ ދަހަނާއެއް އަޅައިގެން ހުރި ކަމުގައި ވިޔަސް ނަޢީމް ދެއްކެވިފަދަ ކުޅަދާނަކަމެއް ނުދެއްކުނެވެ. އޭނާ ގެންދެވީ ކަނޑީގެ އެތިފަހަރުތައް ބާލުއްވަމުންނެވެ. ކާފަރުކަލޭގެ ދިން ދެތިން ހަމަލައެއް މަތަކުރެއްވުމަށް ފަހު ނަޢީމް ފުރިހަމަ ބާރުފުޅާއެކު އޭނާގެ ކޮނޑާ ދިމާއަށް ކަނޑީގެ އެތިފަހަރެއް ބޭލުއްވިއެވެ. އަޅައިގެން ހުރި ދަގަނޑު ދަހަނާ ފޫ ނުދިޔަ ކަމުގައި ވިޔަސް ވީ ތަދެއްގެ ބޮޑުކަމުން އޭނާ އެއް ފަރާތަކަށް އަރިއަޅައިލިއެވެ. ހަމައަކަށް އެޅިލާނޭ ފުރުސަތެއް ނަޢީމް އޭނާއަކަށް ނުދެއްވިއެވެ. ދެވަނަ އެތިފަހަރާއި ތިންވަނަ އެތިފަހަރު ދޫކޮށްލެއްވީ ކުރިއަށްވުރެ މާ ބާރަށެވެ. ފުލުފުލުގައި ހައެއްކަ ފަހަރު ޖައްސަވައިފިއެވެ. އެކަލޭގެ އަރައި އިން އަސް ދިޔައީ ފުންމައިގެންނެވެ. އަޅައިގެން އިން ދަހަނާގެ ބަރުކަމުންނާއެކު ކަނޑައި ވައްޓައިލީ ރުއްގުޅިއެއްހެން ބިންމައްޗަށް ގުޅައަކަށް ޖެހިއްޖެއެވެ. ތެދުވާން އުޅެނިކޮށް ނަޢީމް އަސްމަތީން ފުންމަވައިލެއްވިއެވެ. އަދި އޭނާގެ ދަގަނޑު ތޮފި ނެންގެވުމަށް ފަހު ބޯ ކަނޑައިލިއެވެ. އަބުލްޙަސަންގެ ލަޝްކަރުގެ ނަޣަރާގެ އަޑު އަރައިގެން ދިޔައެވެ. ފެރްނާންދޯގެ ދެވަނަ މީހާ މައިދާނަށް ނުކުތީމާ މުގާބިލާއަށް ނުކުންނެވީ އައްޒައިޣަރީއެވެ. ކަސްތިއްޔާގެ ކޮމާންޑަރު އިނީ ދަގަނޑު ދަހަނާ އަޅައިގެންނެވެ. ދެ ފަހުލަވާނުން އެކަކު އަނެކަކާ ދިމާއަށް ލޮންސީގެ ހަމަލައެއް އަމާޒުކޮށްލިއެވެ. އައްޒައިޣަރީ އެކަލޭގެ ދިން ހަމަލައިން ރެކިވަޑައިގަތުމަށް ފަހު ސީދާ އޭނާގެ މެޔަށް އަމާޒުކޮށް ލޮންސީގެ ހަމަލައެއް ދެެއްވައިފިއެވެ. ދަގަނޑު ދަހަނާގައި ޖެހިފައި ލޮންސި ބިންދައިގެން ހިނގައްޖެއެވެ. އެކަމަކު ކާފަރުކަލޭގެ ބިންމައްޗަށް ވެއްޓިއްޖެއެވެ. އައްޒައިޣަރީ އަހުން ފުންމަވައިލެއްވުމަށް ފަހު އެ ކަލޭގެ ގަތުލު ކޮށްލައްވައިފިއެވެ.
ލަޝްކަރުގެ ވަރުގަދަ ދެ ކޮމާންޑަރުންނަށް ވީ ގޮތް ފެނުނީމާ މުޅި ލަޝްކަރު އެކީގައި ހަމަލަދޭން ފެރްނާންދޯ އަމުރުކޮށްފިއެވެ.
އިރުއޮއްސޭންދެން ހަނގުރާމަ ކުރިއަށް ދިޔައެވެ. ރޭވެ އަނދިރިވީމާ ދެ ލަޝްކަރު އެނބުރި ޖަގަހައަށް އަތުވެއްޖެއެވެ.
ދެވަނަ ދުވަހުވެސް ހަމަ އެ ގޮތަށް ހަނގުރާމަ ކުރިއަށް ދިޔައެވެ. ފުރަތަމަ ދުވަހެކޭ އެއް ގޮތަށް ފުރަތަމަ އޮތީ ވަކިވަކިން މުބާރިޒާކުރުމެވެ. ދެ ފަރާތުންވެސް ވަކި މީސްމީހުން މައިދާނަށް ނުކުމެ އެމީހެއްގެ ހުރި ކުޅަދާނަކަމެއް ދައްކަމުން ދިޔައީއެވެ. އޭގެ ފަހުން އާއްމު ހަނގުރާމަ ފެށިއްޖެއެވެ. އިރު އޮއްސޭން ކައިރި ވީއިރުވެސް ވަކި ބަޔަކަށް ކާމިޔާބީއެއް ނުލިބެއެވެ. ދެ ފަރާތުންވެސް މަރުވީ މީހުންނާއި ޒަޚަމްވީ މީހުންގެ އަދަދު ފުރަތަމަ ދުވަހަށްވުރެ ގިނައެވެ. ތިންވަނަ ދުވަހަކީ ދެ ފަރާތަށްވެސް ވަރަށް ޚުތޫރަތްތެރި ދުވަހެކެވެ. ދުޝްމިނުންގެ ލަޝްކަރަށްވުރެ އަބުލްޙަސަންގެ ކަންބޮޑުވެވަޑައިގަތުން މާ ބޮޑެވެ. ގްރަނާދާއިން މޫސާ ވަނީ ދެ ހާސް މީހުންގެ ލަޝްކަރެއް ފޮނުއްވައިފައެވެ. އެކަމަކު ފާއިތުވި ދެ ދުވަހުގެ ތެރޭގައި އިސްލާމުންގެ ފަސް ހާހެއްހައި މީހުން ވަނީ ޝަހީދުވެފައެވެ. ނުވަތަ ޒަޚަމްވެފައެވެ. އަބުލްޙަސަންގެ ލަޝްކަރުގެ އޮފުސަރުން ބުނާ ގޮތުގައި ކާފަރުންގެ ލަޝްކަރުން މަރުވީ މީހުންނާއި ޒަޚަމްވީ މީހުންގެ އަދަދު ވިހި ހާހަށްވުރެ މަދެއް ނުވާނެއެވެ. އެކަމަކު އެބައިމީހުންގެ ލަޝްކަރާ ގުޅުމަށްޓަކައި އަންދަލުސްގެ އެކި ރަށްރަށުން މި ދެ ދުވަހު އެކަނިވެސް ފަނަރަ ވަރަކަށް ހާސް މީހުން އަތުވެއްޖެއެވެ.
ބަދްރު ބިން މުޣީރާ އޭނާގެ ކުޑަކުޑަ ލަޝްކަރާއިގެން ނުކުމެވަޑައިގެން ކޯރްދޮބާގެ ލަޝްކަރަށް އަޔަނުދީ ހިފަހައްޓަވަމުން ގެންދަވާކަން އަބުލްޙަސަނަށް އެނގިވަޑައިގަނެއެވެ. އެކަމަކުވެސް އޭނާގެ ކަންބޮޑުވެވަޑައިގަތުން ކުޑައެއް ނުތްވެވެ. އޭނާގެ ލަޝްކަރުގެ މުޖާހިދުން ހަނގުރާމަކުރަމުން ގެންދަނީ ކާމިޔާބީ ހާސިލުކުރެވޭނީތޯ ނުވަތަ ޝަހީދުވާނީތޯ ވިސްނައި ފިކުރުކުރުމަކާ ނުލައެވެ. ސަބަބަކީ އެބައި މީހުން މައިދާން ދޫކޮށް ފިލައިގެން ހިނގައްޖެނަމަ ދެތިން ދުވަހެއްގެ ތެރޭގައި ކާފަރުންގެ ލަޝްކަރު ގްރަނާދާގެ ބޭރު ފާރާ ހަމައަށް ދާނޭކަން ކަށަވަރުވުމެވެ.
ތިންވަނަ ދުވަހު ހަނގުރާމައަށް ސަފުތައް ރުކުރުވައިލުމާއެކު ކަސްތިއްޔާގެ ލަޝްކަރުން މީހަކު މައިދާނަށް ނުކުމެއްޖެއެވެ. މީނާވެސް އިނީ ދަގަނޑު ދަހަނާ އަޅައި މުޅީން ކަހަލަ ގޮތަކަށް ފޮރުވިގެންނެވެ. މޫނު ފެންނައިރު ހީވަނީ ގެރިއެއްގެ މޫނު ފެންނަހެންނެވެ. ހަތިޔާރުގެ ބަރުކަމާހުރެ އަހަށްވެސް ކިރިޔާ ހިފަހައްޓައިލެވެނީއެވެ. ބަރުބަރީ ޒުވާނަކު އޭނާޔާ މުގާބިލާ ކުރުމަށްޓަކައި ނުކުމެއްޖެއެވެ. އެހެންނަމަވެސް މާ ގިނަ އިރުތަކެއްނުވެ ލޮންސީގެ އެތިފަހަރެއް އަރައި އަހުން ވެއްޓިއްޖެއެވެ. ދެން ނުކުތީ އިސްޕޭނީ އިސްލާމެކެވެ. އޭނާގެ ކަނޑިވެސް ވެގެން ދިޔައީ އެ ދަގަނޑު ދަހަނާއެޅި މީހާގެ ކުރިމަތީގައި ބޭކާރު އެއްޗަކަށެވެ. ދެވަނަ މީހާވެސް ޝަހީދުވީއެވެ. އެޔާއެކު ފެރްނާންދޯގެ ލަޝްކަރުން ނަޣަރާގެ އަޑު އުފުލިގެން ދިޔައެވެ. ކާފަރު އަސްވާރު މައިދާނުގެ ވަށައިގެން ބުރެއް ޖަހައިލުމަށް ފަހު އިސްލާމުންގެ އެހެން މީހަކަށް އިންތިޒާރު ކުރާން ފަށައިފިއެވެ.
އަބުލްޙަސަންގެ އިޒުނަފުޅަކަށް އެދިވަޑައިގެން ނަޢީމް ބިން ރިޟްވާން ކުރިއަށް ޖެހިވަޑައިގެންފިއެވެ. އެކަމަކު ނުކުމެވަޑައިގެންނެވުމުގެ ކުރީން އެއް ފަރާތަކުން ކުއްލިއަކަށް ފެނުނީ އަސްވާރަކު މައިދާނަށް ނުކުތްތަނެވެ. އެ މީހަކު އަރައި އިން އަސް އޮތީ ދަލުން ފޯވެފައެވެ. އެހެންވީމާ އެ މީހަކު އެ އައީ ދުރު ދަތުރެއް ކޮށްފައިކަން ވަރަށް ރަނގަޅަށް އެނގެއެވެ. ލައިގެން ހުރި ހެދުންވެސް ގްރަނާދާގެ ހެދުމަކާ ވައްތަރެއް ނޫނެވެ. ލައިގެން ހުރީ ހުދު ކުލައިގެ ހެދުމެކެވެ. ލޯ ފިޔަވައި މުޅި މޫނު ނިވައި ކޮށްފައި ވަނީ ރަތް ކުލައިގެ ފޮށައަކުންނެވެ. އޭނާ ގްރަނާދާގެ ސަފުން ބޭރަށް ވަކި ހިސާބަކަށް ނުކުމެފައި ހުއްޓިއްޖެއެވެ. އެޔަށް ފަހު ވިދަވިދައި އޮތް ކަނޑި އުރައަށް ލައިފިއެވެ. މީސްތަކުންނަށް ހީކުރެވުނީ އެ އުޅެނީ ލޮންސިން ހަމަލަދޭން ކަމަށެވެ. އެކަމަކު ލޮންސިވެސް ބިމަށް ޖަހައިފިއެވެ. ދެ ލަޝްކަރުގެ މީހުންވެސް މި މަންޒަރު ބަލަން ތިބީ ހައިރާންވެފައެވެ.
މޫނު ފޮރުވައިގެން އިން އަސްވާރު ކުއްލިއަކަށް އަސް ދުއްވައިލައިފިއެވެ. ކްރިސްޓިއަން އަސްވާރުވެސް ލޮންސިއަށް ސަމާލުވެލުމަށް ފަހު އަސް ދުއްވައިލައިފިއެވެ. އެކަމަކު މޫނު ފޮރުވައިގެން އިން އަސްވާރު ކުޅަދާނަކަމާއެކު ލޮންސީގެ ހަމަލައިން ރެކިގެންފިއެވެ. އަދި ކުޑަ ތަންކޮޅަކަށް ދުއްވައިލުމަށް ފަހު އަނބުރައިލިއެވެ. މީގެ ކުރިން އޭނާގެ އަތަކު އެއްވެސް އެއްޗެއް ނެތެވެ. އެކަމަކު މިހާރު އަތުގައި ވަލެއް އެބައޮތެވެ. ކާފަރު އަސްވާރަށް އެނބުރިލެވުމުގެ ކުރިން އެއްކޮޅުގައި މަޅިއެއް ޖަހައިފައި އޮތް ވާގަނޑު އެއްލައިފިއެވެ. މަޅި ރަނގަޅަށް އެކަލޭގެ ކަރަށް މެހިއްޖެއެވެ.
އަހުގެ ދުވެއްޔާއި ބާރާއެކު އެހެރަ ވަރުގަދަ ކަލޭގެ ބިންމައްޗަށް ވެއްޓިއްޖެއެވެ. އަހުގެ ދުވެއްޔެއް ނުހުއްޓެއެވެ. އެކަލޭގެ ބިންމަތީގައި ކޫއްތެމުން އޮވެގެން އާދެއެވެ. ގްރަނާދާގެ ލަޝްކަރުގެ ތެރެއިން ހުނުމުގެ އަޑު އަރައިގެން ދިޔައެވެ. އަސްވާރު އެ ދިޔަ ގޮތަށް ގޮަސް މަޑުކޮށްލީ އަބުލްޙަސަންގެ ކުރިފުޅުމައްޗަށެވެ. އަދި މޫނުގައި އޮތް ފޮށާ ނަގައިފިއެވެ. [އަޅުގަނޑު މި އައީ ކޯރްދޮބާއިން އުފާވެރިކަމުގެ ޚަބަރަކާއިގެންނެވެ.]
ވީ އުފާފުޅެއްގެ ބޮޑުކަމުން އަބުލްޙަސަނަށް ހަޅޭއްފުޅު ލައްވައިގަނެވުނެވެ. [ބަދްރު! ތިޔަ ގެންނެވި ފަތަހައިގެ ޚަބަރަކީ ވަރަށް ފުރިހަމަ ޚަބަރަކަށް ވާނޭކަން ޔަގީނެވެ. އެކަމަކު ފަތަޙައިގެ ބަދަލުގައި އަޅުގަނޑު ބޮޑަށް އުފާވަނީ މަނިކުފާނު ވަޑައިގަތީމައެވެ. އަޅުގަނޑު މި ހުންނަނީ ޣައިބުގެ މަދަދެއްގެ އިންތިޒާރުގައެވެ. މަނިކުފާނުގެ އަރިހުގައި އައީ ކިތައް މީހުންތޯއެވެ؟]
[އަޅުގަނޑުމެންނަށް ގެއްލުނީ ފަސް ސަތޭކައެއްހައި މީހުންނެވެ. އޭގެ ބަދަލުގައި ދެ ހާސް މީހުން އިތުރު ވެއްޖެއެވެ. އަބޫ މަންޞޫރުވެސް ވަޑައިގެންފިއެވެ.]
އަބުލްޙަސަންގެ މޫނުފުޅުމަތީން ނުތަނަވަސްކަން ފައުޅުވިއެވެ. [ތިޔަ ވިދާޅުވާ ލަޝްކަރު ނުގެންނެވީ ކީއްވެގެންތޯއެވެ؟ މިއަދަކީ މިކަންތައް ވަކި ގޮތަކަށް ނިންމޭނޭ ދުވަހެކެވެ.]
ބަދްރު ވިދާޅުވިއެވެ. [ފިކުރުފުޅު ނުކުރައްވާށެވެ. ކުޑައިރުކޮޅަކުން ލަޝްކަރުވެސް އަންނާނެއެވެ.]
އައްޒަޣަލް ހަރުއަޑުފުޅުން ނަޣަރާ ކުރެއްވުމަށް ފަހު ވިދާޅުވިއެވެ. [މުސްލިމުންނޭވެ. މިއަދަކީ ތިޔަބައިމީހުންނަށްޓަކައި ވަރަށް ބަރަކާތްތެރި، އުފާވެރި ދުވަހެކެވެ. ކޯރްދޮބާގެ ލަޝްކަރު ބަލިވެ، މައިދާން ދޫކޮށް ފިލައި ރައްކާވެއްޖެއެވެ. ތިޔަބައިމީހުންގެ ސަރަހައްދީ ބާޒު ތިޔަބައިމީހުންނަށް އެހީތެރިވެވަޑައިގެން ދެއްވުމަށްޓަކައި ވަޑައިގެންފިއެވެ.]
މި ޚަބަރާއެކު ލަޝްކަރުގެ އެންމެން އެކީގައި ﷲ އަކްބަރުގެ ނަޣަރާކޮށްފިއެވެ.
ބަދްރު ވިދާޅުވިއެވެ. [މަނިކުފާނު ތިޔަ އިއުލާނުކުރެއްވީ މުޅިއަކުން ރަނގަޅަކަށް ނޫނެވެ. ކޯރްދޮބާގެ ލަޝްކަރަށް ފިލައިގެން ދާނޭ ފުރުސަތެއް އަޅުގަނޑުމެން ނުދެމެވެ. އެބައިގަނޑު އެއްކޮށް ކަހަލަ ގޮތަކަށް މައިދާނުގައި އަޅުގަނޑުމެންގެ ބާރުގެ ދަށުގައި އެބަތިއްބެވެ. ގިނައީ ގަބުރެވެ. ފިލައިގެން ދެވުނީ ގިނަ ވެގެން ހައެއްކަ މީހުންނަށެވެ.]
ނަޢީމް ބިން ރިޟްވާން ﷲ އަކްބަރުގެ ނަޣަރާ ކުރެއްވުމަށް ފަހު ވިދާޅުވިއެވެ. [މި ފަތަހައިގެ އުފަލުގައި މިއަދު ކަސްތިއްޔާގެ ލަޝްކަރުން ފަނަރަ މީހުން ނަރަކައަށް ފޮނުވައިލާން އަޅުގަނޑު އަހުދުވެއްޖައީމެވެ. ހެޔޮ ފާލެއްގެ ގޮތުގައި އަޅުގަނޑު ބޭނުން ކުރާނީ މަނިކުފާނުގެ ލޮންސިކޮޅެވެ.] މިހެން ވިދާޅުވެފައި އޭނާގެ ލޮންސި ބަދްރަށް ދެއްވުމަށް ފަހު ކުރިއަށް ޖެހިވަޑައިގެން ބަދްރު ބިންމައްޗަށް ޖައްސަވައިފައި ހުރި ލޮންސި ނަންގަވައިފިއެވެ.
ނަޢީމް ނުކުމެވަޑައިގެން ފެރްނާންދޯގެ ލަޝްކަރުން ނުކުތް ހަތަރު މީހުން ގަތުލުކޮށްލައްވައިފިއެވެ. އެޔާއެކު ފެރްނާންދޯ އަމުރުކުރީ މުޅި ލަޝްކަރު އެކީގައި ހަމަލަދޭށެވެ.
(7)
މެންދުރުވެ ހަނގުރާމައިގެ މައިދާން އެންމެ ހޫނުވީ ވަގުތު ބަދްރުގެ ލަޝްކަރާއެކު މަންޞޫރު ބިން އަޙްމަދު ވަޑައިގެންފިއެވެ. ތިންދަން ނިމޭން އައި އިރު ފެރްނާންދޯގެ ލަޝްކަރު ބަލިވާނޭ ކަމުގެ ނިޝާންތައް ފެންނާން ފަށައިފިއެވެ.
ނަޢީމް ސާދަ މީހުން ގަތުލުކުރައްވައިފިއެވެ. ފަނަރަވަނަ މީހާޔާ ހަމަލަދެއްވާން އުޅުއްވަނިކޮށް ކާފަރުންގެ މީހަކު އޭނާގެ މޭފުޅަށް ލޮންސިއަކުން ހަމަލަ ދީފިއެވެ. ވެއްޓިވަޑައިގަންނަވާން ދިޔަ ވަގުތު ބަދްރު ވަޑައިގެން ހިފަހައްޓަވައިފިއެވެ. ބަދްރު އުޅުއްވީ ޒަޚަމްވާ މީހުންނަށް ފަރުވާދޭ ފޭލިގެއަށް ނަޢީމް ގެންދަވާށެވެ. އެކަމަކު ނަޢީމް ވިދާޅުވެއްޖެއެވެ. [ބަދްރެވެ. އަޅުގަނޑުގެ ވަގުތު އައިސް ޖެހިއްޖެކަން އެނގެއެވެ. އަޅުގަނޑުގެ އަހުދު އަދި ނުއެއް ފުއްދެއެވެ. މިހާރު ސާދަ މީހުން ގަތުލު ކޮށްފީމެވެ. އެކަމަކު އަދި މަދެވެ. އަޅުގަނޑުގެ ޒަޚަމުން މާ ގިނައިން ލޭ އަޔަ ނުދީ ހިފަހައްޓަވައި ދެއްވާށެވެ. އަދި އަޅުގަނޑުގެ އަތަށް ލޮންސިއެއް ދެއްވައިފައި ދުޝްމިނުންނާ ކައިރިއަށް ގެންގޮސް ދެއްވާށެވެ.]
އެ ވާހަކަފުޅުގެ ސަބަބުން ބަދްރަށް ވަރަށް ބޮޑަށް އަސަރުކޮށްފިއެވެ. އެދިވަޑައިގަތް ގޮތަށް ނަޢީމްގެ އަތްޕުޅަށް ލޮންސިއެއް ދެއްވުމަށް ފަހު ޒަޚަމްގައި އަތްޕުޅު އަޅުއްވައި ލޭ މަނާކުރެއްވޭތޯ މަސައްކަތް ކުރައްވަމުން އޭނާ ދުޝްމިނުންނާ ދިމާއަށް އަނބުރުއްވައިފިއެވެ. އެކަމަކު ދުޝްމިނުންނާ ކައިރިވެވަޑައިގަތްތަނާ ނަޢީމްގެ އަތްޕުޅުން ލޮންސި ދޫވަމުންދާ ކަމުގެ އިހުސާސް ބަދްރަށް ކުރެއްވިއްޖެއެވެ. އެހެންވީމާ އޭނާގެ އަތްޕުޅުގައި ބާރަށް ހިފަހައްޓަވައިފައި ވިދާޅުވިއެވެ. [ހުސިޔާރުވެވަޑައިގަންނަވާށެވެ. މިއީ ނަޢީމްގެ ފަނަރަ ވަނަ ޝިކާރައެވެ.]
މަޑުމަޑުން ވަރުފުޅު ދޫވަމުން ދިއުމާއެކުވެސް ނަޢީމް ވިދާޅުވިއެވެ. [ބަދްރެވެ. އަޅުގަނޑު ގައިކޮޅާ ކައިރި ކުރައްވައިފައި ބަހައްޓަވާށެވެ. އަޅުގަނޑުގެ އަހުދު ފުއްދަން ބޭނުމެވެ.]
[ނަޢީމް އަހުދުފުޅު ފުއްދަވައިފީމުއެވެ.] ބަދްރު މިހެން ވިދާޅުވެފައި ކުރިމަތީގައި ހުރި ކާފަރު ކަލޭގެ މެޔަށް ލޮންސި ޖައްސަވައިފިއެވެ. އެކަލޭގެ މަރުވެގެން ވެއްޓިއްޖެއެވެ. އެޔާއެކު ނަޢީމްވެސް ހޭފުޅު ނެތިއްޖެއެވެ. ބަދްރު އަވަސް އަވަހަށް ނަޢީމް ގޮވައިގެން ފޭލިގޭދޮށަށް ވަޑައިގެންފިއެވެ. ދެ މީހަކު އައިސް އޭނާ ނަގައިގަނެގެން ގެންގޮސް ފޭލިގެއަށް ވައްދައިފިއެވެ.
ބަދްރުވެސް ފޭލިގެއަށް ވަދެވަޑައިގެންފިއެވެ. ބަޝީރް ބިން ޙަސަން އުޅުއްވަނީ ޒަޚަމްވެފައި ތިބި މީހުންނަށް ފަރުވާ ކުރެއްވުމުގައި އަވަދިނެތިއެވެ. ނަޢީމް ފޭލިގެއަށް ވެއްދުމާއެކު އޭނާގެ މައްޗަށް ބަޝީރް ސަމާލުކަން ދެއްވައިފިއެވެ.
ބަދްރު ވިދާޅުވިއެވެ. [ބަޝީރެވެ. މީނާ ސަލާމަތްކުރެއްވޭތޯ ބައްލަވާށެވެ.]
ބަޝީރް ބިން ޙަސަން އޭނާގެ ވިންދު ބައްލަވައިލެއްވިއެވެ. އެޔަށް ފަހު ހެދުން ވީއްދަވައިލައްވައިފައި ޒަޚަމަށް ބައްލަވައިލެއްވިއެވެ. އަނެއްކާވެސް ވިންދު ބައްލަވައިލެއްވުމަށް ފަހު ބަދްރާ ދިމާއަށް ބައްލަވައިލައްވައިފައި އިސްތަށިފުޅު ހޫރުއްވައިލެއްވިއެވެ.
ބަދްރު މޮޅިވެރިކަމާއެކު ސުވާލުކުރެއްވިއެވެ. [ބަޝީރަށް ކުރެއްވޭނޭ އެއްވެސް ކަމެއް ނެތީތޯއެވެ؟]
ބަޝީރު ވިދާޅުވިއެވެ. [މި ޒަޚަމާއެކު ކުޑަ އިރުކޮޅަކަށް ދުނިޔޭގައި އޮންނެވިކަމީވެސް މުއުޖިޒާތެކެވެ. އޭނާގެ މަރަށް ކުޑަ ވަގުތުކޮޅަކަށް ހުރަސްއެޅިފައި އޮތީ ހިތްޕުޅުގައި އޮތް އެދުންފުޅެއްގެ ބާރުގަދަކަން ކަމުގައި ވެދާނެއެވެ.]
[ހޭފުޅު އަރައިފިއްޔާ އޭނާގެ އަހުދުފުޅު ފުއްދަވައިފިއޭ ދަންނަވާށެވެ.] މިހެން ވިދާޅުވެފައި ބަދްރު ފޭލިގެއިން ނުކުމެވަޑައިގެންފިއެވެ.
އޭގެ ކުޑަ އިރުކޮޅެއް ފަހުން ފެރްނާންދޯގެ ލަޝްކަރުން ބަލިވުމުގެ ނިޝާންތައް ފެނިވަޑައިގަތީމާ ތަމްރީނުކޮށްފައިވާ ޚާއްސަ ޖަމާއަތެއް ތައްޔާރު ކުރައްވައިފިއެވެ. އެއީ ފިލައިގެން ދާން އުޅެގެންފިނަމަ ފަހަތުން ދާން ތައްޔާރު ކުރެއްވި ޖަމާއަތެކެވެ.
އަސުރުން އިރު ތިރިވީތަނާ ފެރްނާންދޯގެ ލަޝްކަރު، މަރުވެފައި ތިބި މީހުން މައިދާނަށް ދޫކޮށްލާފައި ފިލަން ދުއްވައިގެންފިއެވެ.
ލަޝްކަރުގެ މީހުން ވަށައިގެން ޖަމާވުމަށްފަހު ފަތަހައިގެ އަޑު އުފުލަން ފެށީމާ އަބުލްޙަސަން އަހުން ފައިބައިވަޑައިގެން ސަޖިދައަށް ތިރިވެވަޑައިގެންފިއެވެ. ސަޖިދައިން ތެދުވެވަޑައިގަތްއިރު ލޯފުޅު ވަނީ އުފާވެރިކަމުގެ ކަރުނަފޮދުން ފުރިފައެވެ.
ވަށައިގެން ބައްލަވައިލެއްވުމަށް ފަހު އަބުލްޙަސަން ސުވާލުކުރެއްވިއެވެ. [އަހަރެމެންގެ ސަރަހައްދީ ބާޒު ކޮބައިހެއްޔެވެ؟]
އައްޒަޣަލް ޖަވާބުދެއްވިއެވެ. [އޭނާ ލަޝްކަރާއެކު ވަޑައިގެންފިއެވެ.]
[ކޮން ތަނަކަށްތޯއެވެ؟]
[ފިލައިގެން ދިޔަ ކާފަރުންގެ ފަހަތުންނެވެ.]
[އަޅުގަނޑު އޮންނާނީ އެހެން ނުހައްދަވާށޭ ދަންނަވައިފައެވެ. ލަޝްކަރު އޮތީ ވަރަށް ބޮޑަށް ވަރުބަލިވެފައެވެ.]
[އޭނާ ވަޑައިގަތީ މަނިކުފާނު އަރިހުން މައާފަށް އެދިވަޑައިގަންނަވާ ކަމަށް ދަންނަވާށޭ އަޅުގަނޑު ގާތު ވިދާޅުވެފައެވެ. އޭނާއަކީ ފަތަހައެއް ފުރިހަމަ ނުކުރައްވައި ދޫކޮށްލައްވާ ބޭފުޅެއް ނޫނެވެ. މަނިކުފާނުގެ އަމުރުފުޅަށް އިހުތިރާމު ކުރެއްވުމުގެ ގޮތުން އޭނާގެ އަރިހުގައި ގްރަނާދާގެ އެއްވެސް ސިފައަކު ނުގެންދަވައެވެ.]
އަބުލްޙަސަން ވިދާޅުވިއެވެ. [ތިޔަ ހީފުޅުރެއްވީއަކީ ރަނގަޅަކަށް ނޫނެވެ. ﷲ ގަންދީ ދަންނަވަމެވެ. އަޅުގަނޑުގެ މުޅި ލަޝްކަރު ގެންދެވި ނަމަވެސް މިހައިވަރަކަށް އަޅުގަނޑު ކަންބޮޑެއް ނުވީހެވެ. އޭނާގެ ލަޝްކަރުގެ އެންމެ މީހަކު ޝަހީދުވުމަކީވެސް ފޫބެއްދޭނޭ ގެއްލުމެއް ނޫންކަމަށް އަޅުގަނޑަށް ގަބޫލުކުރެވެނީއެވެ.]
އައްޒަޣަލް ވިދާޅުވިއެވެ. [ފިކުރުފުޅު ނުކުރައްވާށެވެ. އޭނާއަކީ ފިސާރި ރަނގަޅަށް އަސްކަރީ ކަންތައް ދެނެވަޑައިގެން ހުންނެވި ބޭފުޅެކެވެ. ދުޝްމިނުންގެ މައްޗަށް ހަމަލަދެއްވަނީ ސިންގާއެއް ފަދައިންނެވެ. ފިލައިގެންދާ މީހުންގެ މައްޗަށް ޖެހިވަޑައިގަންނަވަނީ ބާޒެއް ފަދައިންނެވެ.]
[ކޯރްދޮބާގައި ލިބުނު ކާމިޔާބީ ތަފުސީލު ހޯދަން އަހަރެން ބޭނުމެވެ. ޢައްބާހެވެ. ކަލޭ އޭނާޔާއެކު އުޅުނީމެއް ނޫން ހެއްޔެވެ؟ ލަޝްކަރުގެ ހިތްވަރު އާލާކުރެއްވުމުގެ ބޭނުންފުޅުގައި އޭނާ ވާހަކަ ބޮޑުކުރައްވައިގެން ދެއްކެވީހެން ހީވޭ ހެއްޔެވެ؟]
ޢައްބާހަކީ ގްރަނާދާގެ ލަޝްކަރުގެ ސިފައެކެވެ. އޭނާ ދެންނެވިއެވެ. [އެތާގައި ހިނގި ކަންތައްތައް ގަބޫލުކުރެވޭނީ ލޮލަށް ފެނުނު މީހަކަށެވެ. ދައްކާ ވާހަކައަކުން މީހަކަށް ގަބޫލުކުރެވޭ ވަރު ވާނެ ހެންނެއް ހިޔެއް ނުވެއެވެ.] މިހެން ދަންނަވައިފައި ޢައްބާސް ހަނގުރާމައިގެ ތަފުސީލު ދަންނަވައިފިއެވެ.
އޭނާ މަންޞޫރު ބިން އަޙްމަދުގެ ކުޅަދާނަފުޅުކަމާއި ހިތްވަރުފުޅު ގަދަކަމުގެ ވާހަކަ ދެންނެވީމާ އަބުލްޙަސަން ވިދާޅުވިއެވެ. [ބަދްރު ބިން މުޣީރާގެ ތުރުކަހުގައި އެވަރުގެ ތޫނު ތީރު ހުރިކަން ކުރިން އެނގުނު ނަމަ އަހަރެން މާކުރިން ހަނގުރާމަ އިއުލާނު ކުރީމުހެވެ.]
ރޭގަނޑު އަރާމު ކުރުމަށް ފަހު ސިފައިން ހޭލީ ފަތިސް ނަމާދުގެ ބަންގިއަށެވެ. އަބުލްޙަސަނަށް ރަނގަޅަށް އަވަހާރަފުޅު ލެއްޕެވުނީ އެތައް ދުވަހަކަށް ފަހުގައެވެ. ނަމާދު ކުރެއްވުމަށްޓަކައި ފޭލިގެކޮޅުން ނުކުމެވަޑައިގަތުމާއެކު ފާރަވެރިންނާ ފުރަތަމަވެސް ކުރެއްވި ސުވާލަކީ މިއީއެވެ. [ބަދްރު ބިން މުޣީރާ ވަޑައެއް ނުގަނޭ ހެއްޔެވެ؟]
ފާރަވެރިން ނޫނެކޭ ދެންނެވުމުގެ ގޮތުން ބޯ ހޫރައިލިއެވެ.
ނަމާދަށް ފަހު އަބުލްޙަސަންގެ އެންގެވުމުގެ މަތީން ބަދްރު ބިން މުޣީރާގެ ސަލާމަތަށް އެދި ދުޢާކުރުން އޮތެވެ. މެންދުރުވެގެން އައި އިރު އަބުލްޙަސަންގެ ކަންބޮޑުވެވަޑައިގަތުން ވަރަށް ބޮޑު ވެގެން ހިނގައްޖެއެވެ. ވުމާއެކު ބަދްރުގެ ޚަބަރެއް ވޭތޯ ބެލުމަށްޓަކައި ބަޔަކު ފޮނުއްވައިފިއެވެ. އަދި ލަޝްކަރުގެ ބައެއް ކޮމާންޑަރުންނާއެކު ފަރުބަދައަކަށް އަރައިވަޑައިގެން ބައްލަވާން ފައްޓަވައިފިއެވެ.
އެތަނުން ކޮމާންޑަރަކު ކުއްލިއަކަށް އެއް ފަރާތަށް އިޝާރަތްކޮށްފައި ދަންނަވައިފިއެވެ. [އެ ފަރާތް ބައްލަވައިލައްވާށެވެ.]
އަބުލްޙަސަންގެ އުފާފުޅުގެ ކޮޅެއް ނެތެވެ. ކުރިފުޅުމަތީން، ދުރުން ފެނިވަޑައިގަތީ ބޯ ހިރަފުހުގެ ވިލާގަނޑެއް ނަގަމުން އަންނަ ތަނެވެ.
އަބުލްޙަސަން އެ ދިމާއަށް ދެތިން ސަވާރުން ފޮނުއްވައިފިއެވެ. ކުޑައިރުކޮޅަކުން އެ މީހުން އައިސް ސަރަހައްދީ ބާޒު އެނބުރި ވަޑައިގަތް ވާހަކަ ދަންނަވައިފިއެވެ.
އައްޒަޣަލް ވިދާޅުވިއެވެ. [އަޅުގަނޑުވެސް އުފާވެރި ޚަބަރެއް ދަންނަވަންތޯއެވެ؟]
އަބުލްޙަސަން ސުވާލުކުރެއްވިއެވެ. [އެއީ ކޮން ޚަބަރެއް ހެއްޔެވެ؟]
އައްޒަޣަލް ވިދާޅުވިއެވެ. [ސަރަހައްދީ ބާޒު ވަޑައިގަތީ ވަރަށް ގިނަ ޣަނީމާ މުދަލާއިގެންނެވެ.]
އަބުލްޙަސަންގެ ސިފައިން ޣަނީމާ މުދަލުގެ ތަފުސީލު އޭނާއަށް އެރުވިއެވެ. ބަދްރު ވަޑައިގަތީ ވަރަށް ގިނަ ނަޢަމް ސޫތްޕާއި އަހާއި ގޮދަނާއި އެހެނިހެން ބާވަތްބާވަތުގެ ކާބޯ ތަކެއްޗާ އެކުގައެވެ.
(ނުނިމޭ)
