(16 މޭ 2026 ގައި ޝާއިއުކުރި ބަޔާ ގުޅޭ)
ކަރުނައާއި ހިނިތުންވުން
(1)
އިރު އޮއްސުމުގެ ކުޑައިރުކޮޅެއް ކުރިއެވެ. އެންޖެލާއާއި ރަބީޢާ އަންދައިލާން ތައްޔާރުކުރަމުން ގެންދާ ދަރުފުނީގެ ވަށައިގެން މީހުން ޖަމާވާން ފަށައިފިއެވެ. އެ ދެކުދިން ތިބީ ލަކުޑީގެ ތަނބަކަށް އެކީގައި ބަނދެފައެވެ. ދަރުފުނީގެ ކައިރީގައި ތިބެގެން އެއް ބަޔަކު މަރިޔަމްގެފާނަށް ޙަމްދުސަނާ ކިޔަމުން އެބަ ގެންދެއެވެ. އެންމެންމެ ކެތްތެރިކަމެއް ނެތް ގޮތެއްގައި އިންތިޒާރުކުރަމުން ގެންދަނީ އިރު އޮއްސޭނޭ ވަގުތަކަށެވެ. ލޯޝާގެ ގަވަރުނަރު ޑޮން ލުއީއާއި އައު ބިޝޮޕް އިރުއިރުކޮޅާ ހުޅަނގު ފަރާތަށް އޮއްސެމުންދާ އިރަށް ބަލައިލައެވެ. އިރުއޮއްސުމާއެކު އިންތިޒާެރުކުރަން ޖެހޭނީ ފެރްނާންދޯގެ އެންމެ ފަހުގެ އަމުރަށްކަން އެއްވެފައި ތިބީ މީހުންނަށް އެނގެއެވެ. ރަސްގެފާނުގެ މަންދޫބު އައު ހުކުމެއް އިއުލާނު ނުކުރާނަމަ އިރު އޮއްސުމާއެކު ދަރުފުނީގައި ރޯކޮށްލެވޭނެއެވެ. އަނދައަނދައި އޮތް ދެ ދަންމަރު ހިފައިގެން ސިފައިންގެ ދެ މީހުން ދަރުފުނީގެ ކައިރީގައި އެބަތިއްބެވެ.
ނިމުން އަންނާނޭ ގޮތަކާމެދު ރަބީޢާއާއި އެންޖެލާގެ ހިތަކު އެއްވެސް ޝައްކެއް ނެތެވެ. އެކަމަކު ދަރުފުނީގައި ރޯކޮށްނުލައި ތިބީ ކީއްވެގެން ކަމެއް އެ ކުދިންނަކަށް ނޭނގެއެވެ.
އެންޖެލާ ބުންޏެވެ. [ދައްތާއެވެ. އަހަރެން އިހަށް މަރު ދެކެ ވަރަށް ބޮޑަށް ބިރުގަނެއެވެ. އެކަމަކު އެއީ އެހައި ބިރުވެރި ކަމެއް ނޫންކަން މިހާރު އެބަ އެނގެއެވެ. އުނދަގޫ ވެގެން މި އުޅެނީ ކުރަން މިޖެހޭ އިންތިޒާރެވެ. މިބައި މީހުން އިންތިޒާރުކުރަމުން އެ ދަނީ ކޮން ކަމަކަށް ބާވައެވެ؟]
[ދައްތަވެސް މި ހުންނަނީ ހައިރާންވެފައެވެ. އިރު އެހެރެގެން އޮއްސެނީއެވެ. ހީވާ ގޮތުގައި…]
[ހީވާ ގޮތުގައި ކީކޭ ހެއްޔެވެ؟]
[ކޮއްކޯއެވެ. އެއީ އެހައި ބޮޑު ވާހަކައެއް ނޫނެވެ. ދައްތައަށް ހީވާ ގޮތުގައި ގުދުރަތުން ލޯޝާގެ ކޯޓުގެ ނިންމުން ބަދަލު ކުރައްވައިފިއެވެ. ނިކަން ދެކިބަލާށެވެ. އިރުވެސް އެހެރީ ހުއްޓިފައެއް ނޫން ހެއްޔެވެ؟]
އެންޖެލާ ބުންޏެވެ. [ދައްތާއެވެ. މިއީ ތިޔަ ކަހަލަ ޚިޔާލީ ވާހަކަތަކުން އުއްމީދު ލިބިގަންނާވީ ވަގުތެއް ނޫނެވެ.]
ރަބީޢާ ބުންޏެވެ. [ދައްތަ މި ބުނަނީ އިންސާނާގެ ހުރިހައި ނިންމުމެއް ބަދަލު ކުރުމުގެ ބާރު ގުދުރަތަށް ލިބިގެންވާ ވާހަކައެވެ. ފަސްބަޔާ ހަމައަށް ހުޅުގަނޑު އަންނަ ވަގުތުވެސް ދައްތަ ބުނާނީ މިހެންނެވެ.]
[ދައްތާއެވެ. އަހަރެންގެ އީމާނަކީވެސް ތިޔައީއެވެ. އެކަމަކު މަރާއި އަހަރެމެންނާ ދެމެދު މިހާރު މިހިރީ ދެތިން ފިޔަވަޅެވެ. އަހަރެންގެ ފައިތިލަ ކައްސައިނުލާތޯ ދުޢާކުރާށެވެ.]
ރަބީޢާ ބުންޏެވެ. [ކޮއްކޮގެ ފައިތިލަ ކައްސައެއް ނުލާނެއެވެ. އަޒުމު ގުޑުވައެއް ނުލެވޭނެއެވެ. ކޮއްކޮއަށްޓަކައި ދައްތަ ފަޚުރުވެރިވަމެވެ. ކޮންމެ އިސްލާމީ އަންހެން ދަރިއަކު ކޮއްކޮއަށްޓަކައި ފަޚުރުވެރިވާނެއެވެ.]
[ދައްތަ ދުޢާކުރާށެވެ. އަހަންނަށް އެހީތެރިވެދޭށެވެ.]
ރަބީޢާ އުޑާ ދިމާއަށް މައްޗަށް ބަލައިލިއެވެ. [އޭ ސަޒާއައި ޖަޒާގެ ވެރި ރަސްކަލާކޯއެވެ. އަޅަމެންގެ ފައިތިލަތައް ސާބިތުކޮށްދެއްވައިފާނދޭވެ. އަޅަމެންގެ ނިކަމެތިކަމާއި ބާރެއް ނެތްކަން މޮޅަށް ދެނެވޮޑިގެންވަނީ އިބަކަލާނގެއެވެ. އެހެންނަމަވެސް ދުޝްމިނުންގެ މައްޗަށް އަޅަމެންގެ ބާރެއް ނެތްކަން ކަޝްފުވާނޭ ގޮތް އިރާދަނުކުރައްވާށިއެވެ. އަޅަމެންގެ ނިކަމެތިކަން ކަޝްފުވާ ތަނަކީ އިބަކަލާނގެ ޙަޟްރަތް އެކަނިކަމުގައި އިރާދަކުރައްވައިފާނދޭވެ. އަޅަމެންގެ ރުއިމުގެ އަޑު ދުޝްމިނުންނަށް އިވޭނޭގޮތް މެދުވެރި ނުކުރައްވައިފާނދޭވެ.]
ރަބީޢާ ދުއާކުރަމުން ދަނިކޮށް މައިދާނުގެ އެއްކޮޅުން ފަސް ސަތޭކައެއްހައި އަސްވާރުން ދައްކައިލައިފިއެވެ. އެޔާއެކު މީސްތަކުން ހަޅޭއްލަވައިގަތެވެ. [އެ މީހުން އަތުވެއްޖެއެވެ.]
އެއްވެފައި ތިބި މީހުން އަސްވާރުން ވަށައިލައިފިއެވެ. ދަރުފުނީގެ މައްޗަކަށް މިހާރު އެއްވެސް މީހަކު ސަމާލުކަމެއް ނުދެއެވެ. އަސްވާރުން ތިބީ ކަސްތިއްޔާގެ ސިފައިންގެ ހެދުން އަޅައިގެންނެވެ. މީސްތަކުން ސުވާލުކުރާން ފަށައިފިއެވެ. [މާތްވެގެންވާ ރަސްގެފާނުގެ ހުކުންފުޅަކީ ކޮބައިތޯއެވެ؟ މިހައި ލަސްވީ ކީއްވެގެންތޯއެވެ؟] ލޯޝާގެ ގަވަރުނަރާއި ބިޝޮޕާ ދެމީހުން ސަފުތައް ކަފަމުން ކުރިއަށް ދިޔައެވެ. ލަވަކިޔަމުން ދިޔަ ރާހިބުންވެސް އެހެން ހުރިހައި ކަމެއް ދޫކޮށްލައިފައި އަސްވާރުންގެ މައްޗަށް ސަމާލުކަން ދޫކޮށްލައިފިއެވެ. އެމީހުންވެސް މަސައްކަތްކުރަމުން ގެންދިޔައީ ބިޝޮޕާ ވީހައިވެސް ގާތަކަށް ޖެހޭށެވެ. އެކަމަކު އެތަނަށް ބޭރުން އައި ރާހިބުންގެ ތެރެއިން އެއް ރާހިބަކު ހުއްޓައިނުލައި ލަވަކިޔަމުން، މަޑުމަޑުން ގޮސް ދަރުފުނީގެ ކައިރިއަށް މަޑުކޮށްފިއެވެ. އެހެން ރާހިބުންނެކޭ އެއްފަދައިން އޭނާވެސް ހުރީ ހުދުކުލައިގެ ދިގު ހެދުމެއް ލައިގެންނެވެ. އެ ރާހިބުގެ އަޑު އިވުނީމާ ރަބީޢާއާއި އެންޖެލާގެ ސަމާލުކަން އޭނާގެ މައްޗަށް ހުއްޓިއްޖެއެވެ. އޭނާ ކުޑައިކޮށް އަރިއަކަށް ހުރެގެން ކެހެމުން ކަހަލަ ގޮތަކަށް ގޮސް ރަބީޢާމެންނާ ކައިރިވެލައިފައި ބޮލުގައި އޮތް ބޯ ފޮތިގަނޑު ނަގައިފިއެވެ. ފެނުނު މަންޒަރު، ރަބީޢާއާއި އެންޖެލާއަކަށް ގަބޫލުކުރާން ދަތިވިއެވެ. އޭނާގެ ބަރުއަޑާއި ރާގުން ސާފުކޮށް އެނގޭ ގޮތުގައި ހަޔާތުގައި ފުރަތަމަ ފަހަރަށް ލަވައެއް ކިޔޭތޯ މަސައްކަތްކުރަމުން ގެންދަނީއެވެ. އެހެން ރާހިބުން ކިޔަމުންގެންދާ ލަވަޔާ އެއްހަމަކުރެވޭތޯ މަސައްކަތް ކުރަމުން ގެންދަނީއެވެ. އެކަމަކު ބައެއް ފަހަރަށް އަޑު ހިނދިގެން ގޮސް މުޅީން ކެނޑިދެއެވެ. އަނެއް ބައި ފަހަރު އަޑު ވަރަށް ގަދަވެގެން ހިނގައިދެއެވެ. އެ މީހަކީ ބަޝީރް ބިން ޙަސަނެވެ.
އިރުގެ އެންމެ ފަހުގެ ދޯދިފަށާއެކު އުޑުމަތީން ރަބީޢާއާއި އެންޖެލާއަށް ފެންނަނީ އުއްމީދުގެ އަލިގަދަ ދެ ތަރިއެވެ. ހިތުގެ ހިނގުން ކުޑައިކޮށް ރަމަތަވެލީމާ ފަރާތްފަރާތަށް ނަޒަރު ހިންގައިލުމަށް ފަހު ރަބީޢާ ވައިއަޑުން ބުނެލިއެވެ. [އަޅުގަނޑުމެންނަށްޓަކައި ފުރާނަފުޅު ނުރައްކަލުގެ ތެރެއަށް ވައްޓަވައިނުލައްވާށެވެ. ﷲއަށްޓަކައި މިތަން ދޫކުރައްވައި ވަޑައިގަންނަވާށެވެ.]
ބަދްރު ތުންފަތްޕުޅުގައި އިނގިލިފުޅު ޖައްސަވައި ހިމޭނުން ތިބުމަށް އިޝާރާތްކޮށްލައްވައިފައި ބަޝީރުގެ ކޮނޑުފުޅުގައި ހިއްޕަވައިގެން ލަވަވިދާޅުވަމުން ކުރިއަށް ވަޑައިގެންފިއެވެ.
އަސްވާރުންގެ ވަށައިގެން އެއްވެ ތިބެގެން އަޑު ގަދަކުރަމުން ގެންދިޔަ މީހުން ޑޮން ލުއީއަށް ހިމޭންކޮށްލެވުނީ ލައްކަ މަސައްކަތުންނެވެ. އެޔަށް ފަހު އަސްވާރުންނާ މުޚާތަބުކޮށް އޭނާ ބުނެފިއެވެ. [ތިޔަ އައީ މާ ލަހުންނެވެ. އަހަރެމެންނަށް ދަރުފުނީގައި ރޯނުކޮށް މަޑުޖައްސައިލެވުނީ ކިރިޔާއެވެ. ގެނައި ހުކުމަކީ ކޮބައިހެއްޔެވެ؟]
އަސްވާރަކު ބުނެފިއެވެ. [އަހަރެމެން ވާހަކަދައްކަން ބޭނުންވަނީ ގަވަރުނަރާއެވެ.]
ޑޮން ލުއީ ނުރުހިފައި ބުނެފިއެވެ. [ގަވަރުނަރަކީ އަހަންނެވެ.]
އަސްވާރު ހަމަޖެހިލައިފައި ބުންޏެވެ. [މާތްވެގެންވާ ރަސްގެފާނު ކަލޭ މަގާމުން ވަކި ކުރައްވައިފިއެވެ. އަމުރުފުޅު ހިއްޕަވައިގެން ކައުންޓް އެންތަނީ ވަރަށް އަވަހަށް މިތަނަށް ވަޑައިގެންފާނެއެވެ. އަހަރެމެންނަށް އަންގަވައިފައި އޮތީ އަބޫ ދާވޫދްގެ ދަރިންގެ ހުކުން ތަންފީޒުކުރުން ލަސްކުރުވާށެވެ. އަހަރެމެން އަވަހަށް މި އައީ އެހެން ވެގެންނެވެ. ކައުންޓް އެންތަނީ ދާދި އަވަހަށް ވަޑައިގެން ރަސްގެފާނުގެ އެންމެ ފަހުގެ އަމުރުފުޅު އިއްވަވާނެއެވެ.]
ޑޮން ލުއީ ވަރަށް ކަންބޮޑު ވެއްޖެއެވެ. އެއްވެފައި ތިބި މީހުން ގަވަރުނަރާ ދިމާއަށާއި ބިޝޮޕާ ދިމާއަށާއި އަލަށް އައި އަސްްވާރުންނާ ދިމާއަށް ބަލަމުން ގެންދަނީއެވެ.
އެންމެ ފަހުން ބިޝޮޕް ބުނެފިއެވެ. [ރަސްގެފާނު ފޮނުއްވި އަމުރުފުޅުގެ ފަތްކޮޅު އަހަރެމެންގެ އަތުގައި އެބައޮތެވެ. އެ ފަތްކޮޅުގައިވާ ގޮތުގައި އަމުރުފުޅު އެހެން ގޮތަކަށް ބަދަލުކުރައްވާން ގަސްތުފުޅު ކުރައްވާނަމަ އިރު އޮއްސުމުގެ ކުރިން އައު ފަތްކޮޅެއް ފޮނުއްވާނެއެވެ. އިތުރު ފަތްކޮޅަކާއިގެން އިރު އޮއްސުމުގެ ކުރިން އެމަނިކުފާނުގެ މަންދޫބަކު ވަޑައިނުގެންފިނަމަ ހުކުން ތަންފީޒުކުރަން ވަނީ އަންގަވައިފައެވެ. އިރު އެހެރަގެން އޮއްސުނީއެވެ. ރަސްގެފާނުގެ ފަތްކޮޅާއިގެން އެއްވެސް ބޭފުޅަކު އަދި ވަޑައެއް ނުގަނެއެވެ. އެހެންވީމާ ޑޮން ލުއީ އަމުރުފުޅު ކުރެއްވުމާއެކު އަހަރެމެން މި ދަރުފުނީގައި ރޯކޮށްލައިނާމެވެ. ކަލޭ ތިޔައީ ރަސްގެފާނުގެ މަންދޫބަކު ކަމުގައި ވަނީނަމަ ފަތްކޮޅު ގެންނާށެވެ. އެހެން ނޫނީ ކަލޭ ދައްކާ އެއްވެސް ވާހަކައެއް އަޑު އަހާކަށް އަހަރެމެން ބޭނުމެއް ނޫނެވެ.]
އަސްވާރު ބުންޏެވެ. [އަހަރެމެން މި އައީ ރަސްގެފާނުގެ އަމުރުފުޅަކާއިގެންނެވެ. ޑޮން ލުއީ އެހެރީ މަގާމުން ވަކިވެފައެވެ.]
ބިޝޮޕް ބުންޏެވެ. [އެކަމަކު ރަސްގެފާނުގެ ފަތްކޮޅު ނުލިބޭހައި ހިނދަކު އޭނާގެ އިޚުތިޔާރަކަށް އުނިކަމެއް ނާންނާނެއެވެ. ރަސްގެފާނުގެ ފަތްކޮޅު ގެންނާނީ ކައުންޓް އެންތަނީއޭ ކަލޭ ބުނެފީމުއެވެ. އޭނާއަށް ގަޑިއަށް ނާދެވުމަކީ އޭނާގެ ފަރުވާ ކުޑަކަމެވެ. އެއީ އަހަރެމެން އުފުލަން ޖެހޭ ޒިންމާއެއް ނޫނެވެ. ޑޮން ލުއީ ޖަވާބުދާރީވާން ޖެހޭ ކަމެއްވެސް ނޫނެވެ. އޭނާއަށް އަންގަވައިފައި އޮތީ އިރު އޮއްސޭންދެން އިންތިޒާރުކުރާށެވެ. މިހާރު އިރު އޮއްސިއްޖެއެވެ.]
އަސްވާރު ބުންޏެވެ. [އަހަރެމެންނަށް އިއްޒަތްތެރި ރަސްގެފާނު އަންގަވައިފައި އޮތީ އަބޫ ދާވޫދްގެ ދަރިން ހިމާޔަތްކުރާށެވެ. ފުރާނަޔާ ކުޅެލައިގެން ނަމަވެސް އެ ވާޖިބު އަހަރެމެން އަދާކުރާނަމެވެ.]
ގަވަރުނަރާއި ބިޝޮޕާ ދެ މީހުން ކަންބޮޑުވެފައި އެއްވެފައި ތިބި މީހުންނާ ދިމާއަށް ބަލައިލިއެވެ. އެމީހުން ތިބީ ބޭރުން މި އައި މީހުންގެ އަމަލުތަކާމެދު ހިތްހަމަޖެހިގެންނެއް ނޫނެވެ. އާއްމުންގެ ތެރެއަށް ނުބައި ޚިޔާލުތަކެއް ވައްދަން ބައެއް މީހުން މަސައްކަތްކުޅައެވެ. އެކަމަކު ފެރްނާންދޯގެ ސިފައިންނާ ދެކޮޅަށް އިނގިލިވެސް ހިއްލައިލާން ކެރޭ މީހަކު ނެތެވެ. އާއްމުންގެ ގިނަ ބަޔަކު ނުރުހިފައި ތިބި މަންޒަރު ފެނުނީމާ ޑޮން ލުއީ އެއްކަލަ އަސްވާރާ ދިމާއަށް ބުނެފިއެވެ. [ކަލޭ ތިޔައީ ކާކު ކަމެއް އަހަންނަކަށް ނޭނގެއެވެ. އަދި ކަލޭގެ ވާހަކަތަކުގެ ސައްހަކަން ހުރި މިންވަރެއްވެސް އަހަންނަކަށް ނޭނގެއެވެ. އަހަރެން ކުޑައިރުކޮޅަކަށް އިންތިޒާރުކުރާނަމެވެ. ކަލޭގެ ވާހަކަތަކަކީ ދޮގު ވާހަކަތަކަކަށް ވެއްޖެނަމަ ބޮޑު އަދަބު ލިބޭނޭކަން ހަނދާންކުރާށެވެ. ކައުންޓް އެންތަނީއަކީ ކޯރްދޮބާގެ ގަވަރުނަރެވެ. އޭނާ މިތަނަށް ފޮނުއްވާ ސަބަބެއް އަހަންނަކަށް ނުވިސްނެއެވެ. އަދި އަހަރެން މަގާމުން ވަކިކުރީ ކޮން ކުށެއް ކޮށްގެން ކަމެއްވެސް ނޭނގެއެވެ.]
އަސްވާރު ބުންޏެވެ. [ރަސްގެފާނު އަރިހު އަބޫ ދާވޫދް ޝަކުވާ ބަނީކަމުގައި ވެދާނެއެވެ. ކޮންމެ ސަބަބެއް އޮތް ނަމަވެސް މާ ގިނަ އިރުތަކެއްނުވެ މައްސަލަ މުޅީން ސާފު ވެގެން ހިނގައިދާނެއެވެ. ކައުންޓް އެންތަނީ އިސާހިތަކު ވަޑައިގެންފާނެއެވެ. އޭނާ ވަޑައިގަންނަވަންދެން ދަރުފުނީގެ ވަށައިގެން ފޯރިމަރާނީ އަހަރެމެންނެވެ. މިފަދަ ދަނޑިވަޅެއްގައި އެއްވެފައި ތިބި މީހުންގެ ފަރާތުން ގައިދީންނަށް ގޯނާއެއް ކުރިމަތިވުމަކީ އެކަށީގެންވާ ކަމެކޭ ކައުންޓް އެންތަނީ އޮތީ ވިދާޅުވެފައެވެ.]
ޑޮން ލުއީ ބުންޏެވެ. [ދަރުފުނި ބަލަހައްޓަން އަހަރެމެންގެ ސިފައިން އެބަތިއްބެވެ. އެވަރުން ފުދޭނެއެވެ.]
އަސްވާރު ބުންޏެވެ. [މިހައި ގިނަ މީހުން މިހައި ކައިރީގައި ތިބިތަން ފެނިވަޑައިގަތީމާ ކައުންޓް އެންތަނީ ކޯފާވާނެއެވެ. އެހެންވީމާ އެންމެ ރަނގަޅު ގޮތަކީ މީހުން ތަންކޮޅެއް ދުރަށް ޖެއްސުމެވެ.]
ޑޮން ލުއީއަކީ ހަރުކަށި މިޒާޖެއްގެ، ގޮތް ދޫނުކުރާ މީހެކެވެ. އެހެންނަމަވެސް އޭނާ މަގާމުން ދުރުކުރި ޚަބަރު ލިބުނީމާ ހުރީ ޖޯޝް ފިނިވެ މައިތިރިވެފައެވެ. ހިތުގައި ކެނޑިނޭޅި ހިގަނީ އެއް ސުވާލެކެވެ. އަހަރެން މަގާމުން ވަކިކުރީ ކީއްވެގެން ބާވައެވެ؟ މި ސުވާލެވެ. އޭނާގެ ޚިދުމަތުގެ އަގަކަށް މިހައި ނިކަމެތި އަދަބެއް ދޭންވީ ސަބަބެއް އެއްގޮތަކަށްވެސް ވިސްނައިގަނެވޭ ގޮތެއް ނުތްވެވެ. އޭނާ ދުށް ގޮތުގައި އަބޫ ދާވޫދްގެ ޝަކުވާގެ މައިތިރިއަކަށް ވާނީ ރާނީ އިޒަބެއްލާގެ ސިފާރިޝެވެ. އޭނާ ބޭނުންވަނީ ވީހައިވެސް އަވަހަކަށް ރާނީގެ ގާތަށް ދާށެވެ.
އަސްވާރު ލޮންސި ދިއްކުރަމުން މީސްތަކުން ދަރުފުންޏާ ދުރައް ޖައްސަން ފެށީމާ ޑޮން ލުއީ އެކަން މަނައެއް ނުކުރެއެވެ. އޭނާގެ މި ބަދަލު ފެނުނީމާ ބިޝޮޕްގެ ރުޅިވެސް މައިތިރިވެއްޖެއެވެ. ދެކެވުނު ވާހަކަތަކާމެދު ދެރަވެސް ވެއްޖެއެވެ. އެހެންވީމާ ސިފައިންގެ ސަފުތަކުގެ ފަހަތުގައި ދެ އަތް ފުރަގަހަށް ލައިގެން ކުރުކާލިކަނޑަން ފަށައިފިއެވެ. އަދި ބުނަމުން އެބަގެންދެއެވެ. [ބުނަން ހެއްޔެވެ؟ ކަލޭމެން އައި އިރު ކައުންޓް އެންތަނީގެ ލިޔުން ހިފައިގެން އައިނަމަ މި ހުރިހައި ވާހަކަތަކެއް ދައްކާކަށް ނުޖެހުނީހެވެ. ދެން އެންމެ ރަނގަޅެވެ. އޭނާ އެބަ ވަޑައިގަނޭތާއެވެ. ކަލޭމެން އޭނާ ދޫކޮށްލީ ކިހައި ހިސާބަކުން ހެއްޔެވެ؟ މިހާރު ވަރަށް ލަސްވެއްޖެއެއް ނޫން ހެއްޔެވެ؟ ހަނދުވެސް އޮއްސެނީއެވެ. ފަހަރެއްގައި މަގު އޮޅިވަޑައިގެންވެސްފާނެއެވެ.]
އަނެއްކޮޅުން ޑޮން ލުއީވެސް އަޑުލަމުން، މީހުން ދުރަށް ޖައްސަމުންދާ މަންޒަރު އެބަފެނެއެވެ.
ހަނދުމަހުގެ ފަސްވަނަ ރޭގެ ހަނދު އޭގެ ވާޖިބު އަދާކޮށްފައި ގޮސް ނިވައިވަނީއެވެ. ރޭގަނޑުގެ އަނދިރިކަން މަޑުމަޑުން ވެރިވަމުން ދަނީއެވެ. ބަދްރު ބިން މުޣީރާއާއި ބަޝީރް ބިން ޙަސަން ރާހިބުންގެ ސިފައިގައި ތިއްބަވައިގެން ގެންދަވަނީ ދަރުފުނީގެ ވަށައިގެން ބުރު ޖައްސަވަމުންނެވެ. ސަހަރުގެ ފުލުހުންގެ ވެރިޔާވެސް ވަށައިގެން ހުސިޔާރުކަމާއެކު ބުރުޖަހަމުން އެބަގެންދެއެވެ.
ބަދްރު ބަޝީރާ މުޚާތަބުކުރައްވައި ވިދާޅުވިއެވެ. [މިކަލޭގެ ސަމާލުކަން އެހެން ދިމާއަކަށް އަނބުރުއްވަން މަސައްކަތް ކުރައްވާށެވެ. ހުސިޔާރު ގޮލައެއް ފާޑު އެބަޖަހައެވެ.]
ބަޝީރް ކުރިއަށް ޖެހިވަޑައިގެން ފުލުހުންގެ ވެރިޔާއާ ދިމާއަށް ވިދާޅުވެއްޖެއެވެ. [ކިހައި ދެރަކަމެއްތޯއެވެ؟ ފައްޅީގެ ހުކުމަކަށް މީގެ ކުރިން މިހައި ބޮޑަށް އިހާނެތިކޮށް ހިތެވުނުކަމެއް އެނގޭކަށް ނެތެވެ.]
ދަންމަރު ހިފައިގެން ތިބި މީހުންވެސް ދަރުފުންޏާ ތަންކޮޅެއް ދުރަށް ޖައްސައިފައިވާތީ، އަނިދިރިކަމުން ފުލުހުންގެ ވެރިޔާއަކަށް ބަޝީރް ރަނގަޅަކަށް ފާހަގައެއް ނުކުރެވުނެވެ. އެހެންވީމާ އަހައިފިއެވެ. [ތިޔައީ ކޮން ބޭފުޅެއްތޯއެވެ؟]
ބަޝީރް ވިދާޅުވިއެވެ. [އަޅުގަނޑަކީ ތޮލޭދޯގެ ބޮޑު ފައްޅީގެ ރާހިބަކީމެވެ.]
[މިތަނަށް ވަޑައިގެންނެވީ ކީއްކުރައްވަންތޯއެވެ؟]
[އަޅުގަނޑު ދަތުރުކުރަމުން ދިޔައީ ސެބިއްޔާއާ ދިމާއަށެވެ. މި ކުޅިވަރު ފެނިގެން ވާނުވާ ބަލައިލަން އައީއެވެ. އަޅުގަނޑަކީ ޑަކްޓަރަކީމެވެ. އަޅުގަނޑު މި ދަނީ ސެބިއްޔާގެ ބިޝޮޕަށް ބޭނުންފުޅުވާ ޚާއްސަ ފަރުވާއެއް އަރުވަން ވެގެންނެވެ. އަޅުގަނޑުގެ ހިތުގައި އުފެދޭ ސުވާލެއް ދަންނަވައިލަންތޯއެވެ؟ ރަސްގެފާނު އަމުރުފުޅުކުރެއްވީމާ މިފަދަ ނުރައްކާތެރި ބޮޑު ކުށެއްގެ ހުކުންވެސް ފައްޅީގެ ކޯޓުން ބާތިލުކޮށްފާނެތޯއެވެ؟]
ފުލުހުންގެ ވެރިޔާ ބުންޏެވެ. [ހުކުން ބަދަލުކުރުމަކީ ކޯޓަށް ކޮންމެހެން ކުރަންޖެހޭ ކަމެއް ނޫނެވެ. ކޯޓުން ކޮންމެ ގޮތަކަށް ހުކުން ކުޅަޔަސް ރަސްގެފާނަށް އެ ހުކުން ބާތިލުކޮށްލެއްވިދާނެއެވެ.]
[އެހެން ހެއްދެވީމާ ކޯޓުގެ އަގު ވެއްޓޭނެއެއް ނޫންތޯއެވެ؟]
[ކޯޓުގެ މަސްލަހަތު އަޅުގަނޑުމެންނަށް ވުރެ ބޮޑަށް ދެނަވަޑައިގަންނަވާނީ ރަސްގެފާނެވެ.]
(2)
ބަޝީރް ފުލުހުންގެ ވެރިޔާއާ ވާހަކަފުޅު ދައްކަވަމުން ގެންދަވަނީއެވެ. ބަދްރު ބިން މުޣީރާ، ބަޝީރް ހުންނެވި ދިމާ ނޫން އަނެއް ދިމައިން ރަބީޢާގެ ގާތަށް ޖެހިވަޑައިގެން އޭނާގެ އައްސައިފައި ހުރި ވައުތައް ކޮއްޓަވައިލެއްވުމަށް ފަހު މަޑުމަޑުން ސުވާލުކުރެއްވިއެވެ. [އަހަށް އަރާން ރަބީޢާއަށް އެނގޭނެ ހެއްޔެވެ؟]
ރަބީޢާ އެއްވެސް ޖަވާބެއް ނުދީ ބަދްރާ ދިމާއަށް ބަލައިލިއެވެ.
ބަދްރު ވިދާޅުވިއެވެ. [މިހާރަކު ނޫނެވެ. އިރުކޮޅެއް ވާންދެން ހަމަ ތިޔަ ހުރި ގޮތަށް ކޮޅަށް ހުންނާށެވެ.]
ރަބީޢާ ތަނބަށް ރީތިކޮށް ލެނގިލައިގެން ކޮޅަށް ހުރެއްޖެއެވެ.
ބަދްރު އަނެއްކާވެސް ވިދާޅުވެއްޖެއެވެ. [ރޭގަނޑު ހަތަރުދަމު ދަތުރުކުރަން ޖެހުމަކީ އެކަށީގެންވާ ކަމެކެވެ. އަސް ދުއްވަން ދަންނަމު ހެއްޔެވެ؟]
ތެޅެމުންދާ ހިތަށް ގަރާރުކަމެއް ގެނެވޭތޯ މަސައްކަތްކުރަމުން ރަބީޢާ ސުވާލުކޮށްލިއެވެ. [ބަދްރުގެ އަރިހުގައިތޯއެވެ؟]
[އާނއެކެވެ. އަހަންނާއެކުގައެވެ.]
[ބަދްރުގެ އަރިހުގައި ދަތުރުކުރާއިރު ރާސްތާ ދިގުކަމުގެ ޝަކުވާއެއް ނުކުރާނަމެވެ.]
[އަސް ދުއްވާން އެންޖެލާ ދަނޭހެއްޔެވެ؟]
[އޭނާއަކީ އަޅުގަނޑަށްވުރެ މާ މޮޅު އަސްވާރެކެވެ.]
[އެންމެ ރަނގަޅެވެ. ތައްޔާރަށް ހުންނާށެވެ.]
އެޔަށް ފަހު އެންޖެލާގެ ގާތަށް ޖެހިވަޑައިގެން އޭނާ އައްސައިފައި ހުރި ވައުތައްވެސް ކޮއްޓަވައިލައްވައިފިއެވެ. އަދި އެހެން އަސްވާރެއްގެ ގާތަށް ޖެހިވަޑައިގެންފައި ވިދާޅުވިއެވެ. [އަވަސްކުރާށެވެ. ކަލޭގެ ކަމަންދު ނިކަން އަވަހަށް އަހަރެންގެ އަތަށް ދޭށެވެ.] (ކަމަންދަކީ ހަމަލާގައި ތިބޭ މީހުން އެކަކު އަނެކަކުގެ ކަރުގައި އަޅުވައިފައި ދަމައިގަންނާން ގެންގުޅުނު މަޅިއެކެވެ. މަޅި ޖަހައިފައި ހުންނަނީ ދިގު ވަލެއްގެ އެއް ކޮޅުގައެވެ.)
އަސްވާރު އޭނާގެ އަސްދާނުގޮނޑީގައި އައްސައިފައި އޮތް ކަމަންދު ނަގައި ބަދްރުގެ އަތްޕުޅަށް އަރުވައިފިއެވެ.
ތަންކޮޅެއް ދުރުން އަސްތަކެއްގެ ފިޔަވަޅުގެ އަޑު އިވެން ފެށުމާއެކު އެއްވެފައި ތިބި މީހުންގެ ސަމާލުކަން އެ ދިމާއަށް އެނބުރިއްޖެއެވެ. ބަޝީރް ބިން ޙަސަން އޭރުވެސް ހުންނެވީ ފުލުހުންގެ ވެރިޔާއާ ވާހަކަފުޅު ދައްކަވައި އޭނާގެ ސަމާލުކަން އެހެން ދިމާއަކަށް ދިޔަނުދީ ހިފަހައްޓަވައިގެންނެވެ. އަސްތަކުގެ ފިޔަވަޅުގެ އަޑު އިވޭން ފެށީމާ އޭނާ ބުނެފިއެވެ. [މާތްވެގެންވާ ބައްޕާއެވެ. ކައުންޓް އެންތަނީ ވަޑައިގަތީހެން ހީވެއެވެ. އަޅުގަނޑަށް މާފުކުރައްވާށެވެ. އަޅުގަނޑު އެ ދިމާއަށް ޖެހިލާނަމެވެ. އެކަމަކު ފުރައިވަޑައިގަތުމުގެ ކުރީން މާދަމާގެ ވަގުތެއްގައި އަޅުގަނޑާ ބައްދަލުކޮށްލައްވާން ވާނެއެވެ.]
ބަޝީރްގެ ޖަވާބަކަށް އިންތިޒާރު ނުކޮށް އޭނާ އަޑު އަންނަ ދިމާއަށް ހިނގައިގެންފިއެވެ.
ގަވަރުނަރާއި ބިޝޮޕާ ދެމީހުން އޭރުވެސް ތިބީ އަސްވާރަކާ ވާހަކަދައްކާށެވެ. ގަވަރުނަރު ބުންޏެވެ. [ކައުންޓް އެންތަނީ އަރިހުގައި ލަޝްކަރެއް އައި ފާޑު އެބަ ޖަހައެވެ.]
އަސްވާރު ބުންޏެވެ. [އެމަނިކުފާނުގެ އަރިހުގައި ފަންސާހަކަށް މީހުން އަންނާނެއެވެ.]
ބިޝޮޕް ބުންޏެވެ. [އެހައި ގިނަ ބަޔަކު ގެންނެވުމުގެ ބޭނުމެއް ނުވިސްނެއެވެ.]
ބަދްރު ބިން މުޣީރާ ފައިމަގުގައި ކުރިއަށް ޖެހިވަޑައިގެންފައި ވިދާޅުވިއެވެ. [ސަބަބު އަޅުގަނޑު ދަންނަވައިފާނަމެވެ. އަޅުގަނޑާއެކު ހިންގަވާށެވެ.]
ބިޝޮޕް ކަންބޮޑުވެފައި އަހައިލިއެވެ. [ކަލޭ ތިޔައީ ކާކު ހެއްޔެވެ؟]
ބަދްރު ވިދާޅުވިއެވެ. [މަނިކުފާނަށް އަޅުގަނޑު އެނގިވަޑައެއް ނުގަނޭތޯއެވެ؟]
ބިޝޮޕް ބުންޏެވެ. [އަނދިރިކަމުން ތަނެއް ދޮރެއް އެނގޭވަރެއް ނޫނެވެ. ކަލޭގެ އަޑަކީ އަހަންނަށް ބީރައްޓެހި އަޑެކެވެ.]
ބަދްރު ވިދާޅުވިއެވެ. [މާތްވެގެންވާ ބައްޕާއެވެ. އެންމެ ފުރަތަމަ ވަރަށް މުހިއްމު ވާހަކައެއް މަނިކުފާނަށް ދަންނަވައިލާން އަޅުގަނޑު ބޭނުން ވެއެވެ. އޭގެ ފަހުން އަޅުގަނޑާ އެއްވެސް ސުވާލެއް ކުރައްވާން ޖެހިވަޑައި ނުގަންނަވާނޭކަން ޔަގީނެވެ.]
ބިޝޮޕް ބުންޏެވެ. [ޑޮން ލުއީގެ ކުރިފުޅުމަތީގައި ނުދެއްކޭ ވަރުގެ ވާހަކައަކަށް އޮތީ ކޮން ވާހަކައެއް ހެއްޔެވެ؟]
ބަދްރު ވިދާޅުވިއެވެ. [އަޅުގަނޑު ގަވަރުނަރު އަރިހުން ފަހުން މާފަށް އެދިފާނަމެވެ. އަޅުގަނޑު ދައްކާން އުޅޭ މުހިއްމު ވާހަކަ ދެންނެވޭނީ މަނިކުފާނުގެ އަރިހުގައެވެ. އެހެން އެއްވެސް މީހަކަށް އެ ވާހަކަ އަޑު އިއްވާކަށް އަދި ބޭނުމެއް ނޫނެވެ.]
ބަދްރު ބިޝޮޕްގެ މުލައްދަނޑީގައި ހިއްޕަވައިފިއެވެ. އޭނާ ކަންބޮޑުވެފައިވާ ހާލަތެއްގައި ބަދްރުގެ އަރިހުގައި ކުރިއަށް ހިނގައިގެންފިއެވެ. ތަންކޮޅެއް ދުރުގައި ހުންނެވި ބަޝީރަށް ބަދްރު ފާހަގަ ކުރެއްވުނީމާ އަރިހަށް ވަޑައިގެންފިއެވެ.
ބިޝޮޕް ބުންޏެވެ. [އެ މީހުން އެ އައީއެވެ. ތިޔަ ދައްކަން އުޅޭ ވާހަކައެއް އަވަހަށް ދައްކާށެވެ. އަހަރެންގެ އަތުން ދޫކޮށްލާށެވެ.]
އޭނާގެ މުލައްދަނޑި އޭރުވެސް ވަނީ ބަދްރުގެ ބާރުފުޅުގަދަ އަތްޕުޅުގެ ތެރޭގައެވެ. [ހިމޭނުން ހުންނާށެވެ.]
ބިޝޮޕްގެ ހިތަށް ކުއްލިއަކަށް ބިރުވެރިކަން ވަދެއްޖެއެވެ.
ބަދްރު ވިދާޅުވިއެވެ. [މީނާ ގެންދަވާށެވެ. މި ވައުވެސް ގެންދަވާށެވެ. އެއްކޮޅުގައި މި ކަލޭގެ އައްސަވައިފައި ބަހައްޓަވާށެވެ. އަނެއް ކޮޅު ހުހަށް ބާއްވަވާށެވެ. ގަވަރުނަރު ގޮވައިގެން އަޅުގަނޑު އެބަ އަންނަމެވެ.]
ހަޅޭއްލަވައިގަންނާން ބިޝޮޕް އުޅުނެވެ. އެހެންނަމަވެސް އޭނާގެ ކަނދުރާގައި ބަޝީރް ޚަންޖަރެއް ޖައްސަވައިފައި ހުރުމުގެ ސަބަބުން އަޑެއް އިއްވައިލާކަށްވެސް ނުކެރުނެވެ. ބަޝީރް އޭނާ ގޮވައިގެން ކުރިއަށް ހިންގަވައިގެންފިއެވެ.
އަސްތަކުގެ އަޑު މިހާރު ވަރަށް ކައިރިވެއްޖެއެވެ. ޑޮން ލުއީ އެ ދިމާއަށް ދާން ގަސްތުކޮށްފިއެވެ. އެ ވަގުތު ބަދްރު ކުރިއަށް ޖެހިވަޑައިގެން އޭނާގެ މުލައްދަނޑީގައި ހިއްޕަވައިފިއެވެ. އަދި ޚަންޖަރު އޭނާގެ ކަރުގައި ޖެއްސެވުމަށް ފަހު ވިދާޅުވިއެވެ. [އަހަންނާއެކު ހިނގާށެވެ. ވާހަކަދައްކަން އުޅުނަސް، ހަޅޭއް ލަވައިގަންނާން އުޅުނަސް…] ޖުމުލަ ފުރިހަމަ ނުކުރައްވައި ބަދްރު ޚަންޖަރުގެ ތުނޑު ޑޮން ލުއީގެ ކަރުގައި ޖައްސަވައިލެއްވުމަށް ފަހު ކުޑައިކޮށް ބާރުކޮށްލައްވައިފިއެވެ. އޭނާ ކުރާނޭ ކަމެއް ނެތުމާއެކު ބަދްރުގެ އަރިހުގައި ކުރިއަށް ހިނގައިގެންފިއެވެ.
ބަދްރުގެ އަސްވާރުން މިހާރު މަސައްކަތް ކުރަމުން ގެންދަނީ ފުލުހުންގެ ވެރިޔާގެ ސިފައިން ދަރުފުންޏާ ވީހައިވެސް ދުރަކަށް ގެންދާށެވެ. އެހެންވީމާ ދަރުފުނީގެ ވަށައިގެން ބާރަށް އަސް ދުއްވަމުން ގެންދަނީއެވެ. އެ ރަށުގެ ސިފައިން އަސްތަކުގެ ފައިދަށު ނުވެ ސަލާމަތް ވެގެން ދުރަށް ދުވަނީއެވެ.
ބަދްރު ވަޑައިގެން ރަބީޢާ ދަރުފުނި މަތީން ބޭލުއްވުމަށް ފަހު ޑޮން ލުއީ އަރުއްވައި ތަނބާއެކު ބަންނަވައިފިއެވެ. ހަމަ އެ ވަގުތު ބަޝީރް ވަޑައިގެން ބިޝޮޕްވެސް އެންޖެލާ ހުރި ތާނގައި، ތަނބާއެކު ބަންނަވައިފިއެވެ.
އަނެއްކޮޅުން ފެންނަ މަންޒަރުވެސް ވަރަށް ބޮޑަށް ބަދަލުވެގެން ހިނގައްޖެއެވެ. ދުރުން އައި ފަންސާސް އަސްވާރުން އެއްވެފައި ތިބި މީހުންނާ ހަމައަށް އާދެވުމާއެކު ﷲ އަކްބަރުގެ ނަޣަރާކޮށްފިއެވެ. އެއްވެފައި ތިބި މީހުންނަކަށް ހަދާނެނަހަދާނެއެއް ނޭނގުނެވެ. ކޮޅުކޮޅު މައްޗަށް ދުއްވައިގަތީމާ އަނދިރީގެ ތެރޭގައި އެކަކު އަނެކަކާ މުޑިއަރާން ފަށައިފިއެވެ. ބައެއް މީހުން ވެއްޓި މީސްމީހުންގެ ފައިދަށުވެސް ވާން ފަށައިފިއެވެ. ލޯޝާގެ ސިފައިން މިހާރު ދަރުފުނީގެ މަތީން ހަނދާން ނައްތައިލާފައި ދުވަމުންދާ މީހުންނާ ބައިވެރިވެގެން ޖާނު ސަލާމަތް ކުރެވޭތޯ އުޅެގެންފިއެވެ.
ދަރުފުނީގެ ކައިރީގައި ފާރައަށް ތިބި ހަތަރު އަސްވާރަކު އަހުން ފައިބައިފިއެވެ. ބަދްރު ބިން މުޣީރާ ހެދުންކޮޅު މަތީން ތުރުކުރައްވައިގެން ހުންނެވި ރާހިބުގެ ހެދުން ބޭލުއްވުމަށް ފަހު އެ ތަނުން އަހެއްގެ މައްޗަށް ސަވާރުވެވަޑައިގެންފިއެވެ. އެއް އަހަށް ބަޝީރު އަރައިވަޑައިގެންފިއެވެ. އަނެއް ދެ އަހަށް އެރީ ރަބީޢާއާއި އެންޖެލާއެވެ.
ބަދްރު ވިދާޅުވިއެވެ. [ބަޝީރެވެ. ރަބީޢާއާއި އެންޖެލާ ގޮވައިގެން އެތަނަށް ވަޑައިގެން އަޅުގަނޑަށް އިންތިޒާރު ކުރައްވާށެވެ. އަޅުގަނޑު ލަސްތަކެއް ނުވެ އަންނާނަމެވެ.]
ބަޝީރު ލަގަނަށް ސަމާލުވެވަޑައިގެންފިއެވެ. ބަދްރު އަރިހުގައި ތިބި ފަސް އަސްވާރުންނާ ދިމާއަށް ވިދާޅުވިއެވެ. [ކަލޭމެންވެސް ބަޝީރުގެ އަރިހުގައި ދާށެވެ.]
އެޔާއެކު އަށް އަސްވާރުން ހަލުވި ކަމާއެކު އަސް ދުއްވައިލައިފިއެވެ. ބަދްރު އަހުގައި ކުރިއަށް ޖެހިވަޑައިގެން ކައިރީގައި ހުރި ފުލުހެއްގެ އަތުން ދަންމަރެއް އަތުލެއްވުމަށް ފަހު ދަރު ފުންޏާ ދިމާއަށް އެއްލަވައިފިއެވެ. ދަރުފުނީގައި އަވަހަށް ހުޅު ހިފާނޭ ގޮތް ހެދުމުގެ ގޮތުން ހުރީ ހިކި ހުއި އަޅައިފައެވެ. ވުމާއެކު ދަންމަރު ގޮސް ދަރުފުނީގެ މަތީގައި ޖެހުމާއެކު ހުޅު ހިފައިފިއެވެ. ގަވަރުނަރާއި ބިޝޮޕާ ދެމީހުން އަޑުގައި ނެތް ތަނަށް ހަޅޭއްލަވަމުން ގެންދެއެވެ. އެކަމަކު އެ ހައިޖާނުގެ ތެރޭގައި އެ މީހުންގެ އަޑު އަހާނޭ އެއްވެސް މީހަކު ނެތެވެ. މައިދާން އޮތީ ގިޔާމަތެއް ލައިގަތް ކަހަލަ ގޮތަކަށެވެ. ބަދްރުގެ އަސްވާރުން ގެންދިޔައީ އައްޑަނައިގެ އެހީގައި މީހުންތައް ދުރައް ޖައްސަމުންނެވެ. ކަންބޮޑުވެގެން ދުވާ މީހުން އޭރުވެސް އެކެއްގެ ގައިގައި ޖެހިފައި އަނެކެއްގެ ގައިގައި ޖެހިފައި ވެއްޓެމުން ތެދުވަމުން ތިބެގެން ދެއެވެ. އެއް ބަޔަކު ވަރަށް ބޮޑަށް ޒަޚަމްވެއްޖެއެވެ. އަނދިރީގެ ތެރޭގައި ލޯޝާގެ މީހުން ހީކުޅައީ އެތައް ހާސް އަސްވާރުންނެއް އެމީހުންގެ މައްޗަށް ފާވެގަތީ ކަމުގައެވެ. ލޯޝާގެ ފުލުހުންގެ ވެރިޔާއާއި އޭނާގެ ސިފައިން ވީތަނެއް މިހާރަކު ނޭނގެއެވެ. އަނދަމުންދާ އަލިފާނުގެ އަލީގެ ތެރެއިން ބައެއް މީހުންނަށް އެމީހުންގެ ގަވަރުނަރާއި ބިޝޮޕް ފާހަގަ ކުރެވިއްޖެއެވެ. އެކަމަކު އެކަކުވެސް އެ މީހުން ސަލާމަތްކުރާކަށް ނޫޅުނެވެ.
މާ ގިނަ އިރުތަކެއް ނުވެ މުޅި މައިދާން ހުސްވެއްޖެއެވެ. ސިފައިން އެއްކުރައްވައި އިންތިޒާމު ކުރެއްވުމަށް ފަހު ބަދްރު އެ މީހުންނާ މުޚާތަބު ކުރައްވައި ދިވާޅުވިއެވެ. [އަހަރެމެންގެ މަސައްކަތް ނިމުނީއެވެ. އެކަމަކު އެނބުރިދާން ވަރުބަލިނުވާ ތާޒާ އަސްތަކެއް އަހަރެމެންނަށް ބޭނުންވާނެއެވެ. ލޯޝާގައި މަދު ނުވާވަރަށް އަސް ހުންނާނެއެވެ. ގަޑިއެއްހައި އިރުގެ ތެރޭގައި ދަތުރަށް ފަށަން ޖެހޭނެއެވެ. ކަލޭމެން ތިޔަ ތިބީ ތައްޔާރަށް ހެއްޔެވެ؟]
މަންޞޫރު ބިން އަޙްމަދު ވިދާޅުވިއެވެ. [އާދޭހެވެ. އަޅުގަނޑުމެން ތައްޔާރެވެ.]
[އަވަހަށް ހިނގާށެވެ.]
(3)
ދޭއް ބައި ކޯހެއްހައި ދުރުމިނަށް ދަތުރު ކުރެއްވުމަށް ފަހު ބަޝީރް ބިން ޙަސަން ބައިވެރިންނާއެކު މަޑުކޮށްލެއްވީ ފައްޅިއެއްގެ ދޮރާށިދޮށަށެވެ. ދޮރާށިދޮށުގައި ރާހިބަކު އިންތިޒާރުގައި ހުއްޓެވެ. ބަޝީރް ފެނުމާއެކު ބޮޑު ދޮރާށި ހުޅުވަން އޭނާ ފާރަވެރިންނަށް އަމުރުކޮށްފިއެވެ. ފާރަވެރިން އެތެރެއިން މަކުޑިތައް ނައްޓައި ދޮރާށި ހުޅުވައިފިއެވެ.
އެތެރޭގައި ފައްޅީގެ އިމާރާތެއްގެ ފެންޑާގައި ތިން ރާހިބަކު ތިއްބެވެ. އެ މީހުން އައިސް ބަޝީރްގެ އަސްކޮޅާއި ދެ އަންހެންކުދިންގެ އަހުގެ ލަގަނުގައި ހިފައިފިއެވެ. އެންޖެލާއާއި ރަބީޢާއާއި ބަޝީރާ ވަޑައިގެން ވެދެވަޑައިގަތީ ތަނަވަސް ކޮޓަރިއަކަށެވެ. ކޮޓަރި ޒީނަތްތެރިކޮށްފައި ވަނީ އަގު ބޮޑު ތަކެތިންނެވެ. ދަންމަރުތައް ހަރުކޮށްފައި ވަނީ ރަނުގެ ބުޅިތަކެއްގައެވެ. ސަންގުމަރުމަރު ހިލައިގެ ތަޅަންމަތީގައި މޭޒެއްގެ ދޮށުގައި ގޮނޑި އަތުރައިފައި ހުއްޓެވެ. މޭޒުގެ މެދުގައި އަށެއްކަ އުށްބައްތި ދިއްލައިފައި ހުއްޓެވެ.
ބަޝީރު ވިދާޅުވިއެވެ. [މި ވަގުތަށް މިއީ އަހަރެމެންގެ ގެއެވެ. ދެ ކުދިން ރަނގަޅަށް އަރާމުކޮށްލާށެވެ.]
އެންޖެލާ ބިރުން ހުރެ އަހައިލިއެވެ. [އެކަމަކު މިއީ ފައްޅިއެއް…]
ބަޝީރް ހެދުންކޮޅުގެ މަތީން ތުރުކުރައްވައިގެން ހުންނެވި ރާހިބުގެ ހެދުން ބޭލުއްވުމަށް ފަހު ހިނިތުންވެވަޑައިގެންފައި ވިދާޅުވިއެވެ. [ފާއިތުވެ ދިޔަ ތިން ދުވަހުއްސުރެ މި ފައްޅި މިހިރީ އަހަރެމެންގެ ބާރުގެ ދަށުގައެވެ. ތިޔަ ދެކޭ ރާހިބުންނަކީ ހައްތަހައިވެސް އަހަރެމެންގެ މީހުންނެވެ. މި ފައްޅީގެ އަސްލު އަހުލުވެރިން މަތީބުރީގެ ކޮޓަރިއެއްގައި ހައްޔަރުކޮށްފައި އެބަ ތިއްބެވެ. ބަނޑުހައިވޭ ހެއްޔެވެ؟]
އެންޖެލާ ރަބީޢާއާ ދިމާއަށް ބަލައިލިއެވެ. އަދި ބަޝީރާ ދިމާއަށް ބަލައިލައިފައި ބުންޏެވެ. [މަނިކުފާނުގެ މި ގޭގައި ސީދާ ބަހުން ވާހަކަދެއްކުމަކީ ނާތާހުޒީބު ކަމެއް ކަމުގައި ނުވާނަމަ ދަންނަވަންތޯއެވެ؟ އަޅުގަނޑުގެ ދައްތަ އެއިނީ ބަނޑުހައި ވެގެންގޮސް ހާންތިވެފައެވެ.]
ރަބީޢާ ބުންޏެވެ. [އަހަރެންގެ ކޮއްކޮއަކީ އަންދަލުސްގެ އެންމެ މޮޅު ބޭސްވެރިޔާއެވެ. އަހަރެމެން ދެ މީހުންގެ ތެރެއިން ބޮޑަށް ބަނޑުހައިވެފައި އިނީ ކާކުކަން ދެނެވަޑައިގަތުމަކީ އޭނާއަކަށް ދަތިފުޅު ކަމަކަށް ނުވާނެއެވެ.]
[އަހަރެންގެ ދެ މެހުމާނުންވެސް ތިޔަ ތިބީ ވަރަށް ބޮޑަށް ބަނޑުހައި ވެފައިތާއެވެ.] މިހެން ވިދާޅުވެފައި އޭނާ އަތްތިލަބަޑިއެއް ޖައްސަވައިލެއްވީމާ ރާހިބަކު އެ ކޮޓަރިއަށް ވަދެއްޖެއެވެ.
ބަޝީރު ވިދާޅުވިއެވެ. [މި ކުދިންނަށް ކާނޭ އެއްޗެއް ގެނެސްދޭށެވެ. ދެން ތިޔަ ހެދުންވެސް ބަދަލުކޮށްލާށެވެ. މިހާރަކު ތިޔައިގެ ބޭނުމެއް ނެތެވެ.]
ކުޑަ އިރުކޮޅެއް ފަހުން ސިފައިންގެ ޔުނިފޯމުގައި ހުރި މީހަކު ބޮޑު ދޮލަނގެއް ހިފައިގެން އައިސް ކޮޓަރިއަށް ވަދެއްޖެއެވެ. އެ ދޮލަނގުގައި ހުރީ ރޮށީގެ އިތުރަށް ފިހެފައި ހުރި ބަކަރި މަސް ހުއްޓެވެ. އޭގެ ފަހުން އެހެން މީހަކު މޭވާ ދޮލަނގެއް ހިފައިގެން އައިސް މޭޒުމަތީގައި ބަހައްޓައިފިއެވެ.
ބަޝީރް ތެދުވެވަޑައިގެންފިއެވެ. [ހަމަޖެހިލައިގެން ތިބެ ކައިލާށެވެ. އަހަރެން އެބަ އަންނަމެވެ.]
ރަބީޢާ އަހައިލިއެވެ. [މަނިކުފާނު ފަރީއްނުކުޅައްވަނީތޯއެވެ؟]
ބަޝީރް ވިދާޅުވިއެވެ. [އަހަރެން ކާނީ އެހެން މީހުންނާ އެކުގައެވެ.]
ބަޝީރް އެ ކޮޓަރިން ނުކުމެވަޑައިގެން ފެންޑާއެއްގެ ތެރެއިން ވަޑައިގެން އެހެން ކޮޓަރިކޮޅަކަށް ވެދެވަޑައިގެންފިއެވެ. އެ ކޮޓަރީގައި ހަތަރު މީހަކު ތިއްބެވެ. އޭނާ ވެދެވަޑައިގަތީމާ އެ މީހުން ތެދުވެއްޖެއެވެ. ބަޝީރް ސުވާލުކުރެއްވިއެވެ. [އެންމެން ކެއީ ހެއްޔެވެ؟]
އެތަނުން އެކަކު ޖަވާބު ދިނެވެ. [އަޅުގަނޑުމެން ކައިފީމެވެ. އަބޫ މުޙްސިން ފަރީއްނުކުޅުއްވައެވެ.]
ބަޝީރް ވިދާޅުވިއެވެ. [އޭނާ މިހާރު ހުންނަވާނީ ބޮޑު ރާހިބާ ބަހުސުކުރައްވާށެވެ.]
ސިފައިން ހީނގެންފިއެވެ.
ބަޝީރް ވިދާޅުވިއެވެ. [އެންމެ ރަނގަޅެވެ. މިތަނަށް ވަޑައިގަންނަވާށޭ އޭނާއަށް ދަންނަވާށެވެ. އަހަރެމެންގެ ކެއުން މިތަނަށް ގެންނާށެވެ.]
މެންދަން ވާން ގާތްވެފައި ވަނިކޮށް ބަދްރު ބިން މުޣީރާގެ އަސްވާރުން ފައްޅީގެ އިމަށް ވަދެއްޖެއެވެ. ވޭތުވެ ދިޔަ ކުޑަ ވަގުތުކޮޅުގެ ތެރޭގައި ސިފައިންގެ މައި މަރުކަޒުގައި ހުރި އެންމެ ރަނގަޅު އަސްތައް ނެގުމުގެ އިތުރަށް އެ ތާނގައި ހުރި ފޭލިގެތަކާއި ސިފައިންނަށް ޚާއްސަ ގެތަކުގައި ހުޅުޖަހައި އަންދައިވެސް ލައިފިއެވެ. އަދި ސަހަރަށް ވަދެ ސަރުކާރުގެ ޚަޒާނާގެ މައްޗަށް ގަދަވެގަތުމަށް ފަހު ގަވަރުނަރުގެ ގޭގައިވެސް ރޯކޮށްލައިފިއެވެ.
ރަބީޢާއާއި އެންޖެލާއާ ދެ ކުދިން ހިމެނޭހެން އެތާނގައި އެ ވަގުތު ތިބި ސާދަ މީހުން ތިބީ އެބައިމީހުންގެ އިންތިޒާރުގައެވެ.
އެނބުރި ދާން އެންގެވުމުގެ ކުރިން ބަދްރު ބިން މުޣީރާ އަބޫ މުޙްސިނާ މުޚާތަބު ކުރައްވައި ވިދާޅުވިއެވެ. [ލޯޝާގައި އަޅުގަނޑުމެން ކުރާން ހުރި ކަންތައް ކޮށް ނިމިއްޖެއެވެ. އަބޫ މުޙްސިނަށް ކާމިޔާބީއެއް ހޯއްދެވުނުތޯއެވެ؟]
މި ސުވާލު ކުރެއްވީމާ ބަޝީރް ބިން ޙަސަން ހިނިފުޅުވަޑުވަން ފައްޓަވައިފިއެވެ. އަބޫ މުޙްސިން ކުޑަކޮށް ލަދުފުޅުން ހުންނަވައި ވިދާޅުވިއެވެ. [ﷲ ގަންދީ ދަންނަވަމެވެ. އެއީ ހަމަ ފައްކާ ހިމާރެކެވެ. މަނިކުފާނު އަޅުގަނޑު މިތާނގައި ބެހެއްޓެވިކަން މިވީ ބޭކާރު ކަމަކަށެވެ. އޭނާ އަމިއްލައަށް އަޅުގަނޑަށް ގޮވައި ގެންގޮސްގެން ތިމަންގެ ހިތަށް މިހާރު އިސްލާމްދީނުގެ ތެދުކަން އެބަ ވަދެއޭ ކިޔައިގެން ވާހަކަ ދެއްކިއެވެ. މިއަދު ތިޔަ ދަނީ ނޫންހޭ އެހެންވީމާ ތިމަންނާއަށް އިސްލާމްދީން އަދި ތަންކޮޅެއް ބޮޑަށް ކިޔަވައިދޭށޭވެސް ބުންޏެވެ. އެއް ދަން ހުސްވާންދެން އެތައް ވާހަކައެއް ދެއްކި ފަހުން އަޅުގަނޑަށް އެނގުނު ގޮތުގައި އެކަލޭގެ ރާބޮއިގެން ހުރެ އަޅުގަނޑު މޮޔަހައްދަން މަސައްކަތް ކުރީއެވެ.]
[އަނެއްކާ އޭނާގެ ކަރުގައި ނުހިއްޕަވަންތޯއެވެ؟]
[މަނިކުފާނު މަނާ ކުރައްވައިފައި ނެތް ނަމަ ތިޔަ ކަންތައްވެސް އޮތީހީ ކުރެވިފައެވެ.]
ބަދްރު ވިދާޅުވިއެވެ. [އެންމެ ރަނގަޅެވެ. ދެން ދަމާ ބަހީއެވެ.]
ފައްޅީގެ ސަރަހައްދަށް ވެދެވަޑައިގަތުމުގެ ކުރިން ބަދްރު ތަފާތު ތިން ތަނެއްގައި މަޑުކުރެއްވިއެވެ. އޭނާ ދަތުރުކުރެއްވީ ރޭގަނޑުއެވެ. ދުވާލު މަޑުކުރައްވަމުން ގެންދެވީ ރަށްރަށުގައި ހުރި ރާހިބުން ދިރިއުޅޭ ތަންތާނގައެވެ. އޭރު އެތަންތަން ވަނީ ރާހިބުންގެ ހެދުމުގައި ދިޔަ ބަދްރުގެ ފަހުލަވާނުންގެ ބާރުގެ ދަށުގައެވެ. އެ ތަންތާނގައި ތިބި ރާހިބުންނާއި އެހެން މީސްމީހުން ތިބީ ލޯޝާގައި ތިބި ރާހިބުން ފަދައިން ހައްޔަރުކޮށްފައެވެ. ބަދްރު މަޑުކުރައްވާ ކޮންމެ ތަނަކުން އޭނާގެ ބައިވެރިންނަށް ރަނގަޅަށް ކާންބޯންދީ އަސްތަކަށް ބޭނުންވާ ހުޔާއި ފެނާއި ކާނާ ފޯރުކޮށްދެމުން ގެންދިޔައެވެ. އެއިން ކޮންމެ ތަނަކުން ފުރާވަޑައިގަންވަނީ ލަޝްކަރަށް ބަޔަކު އިތުރު ކުރައްވައިގެންނެވެ. ފެރްނާންދޯގެ ވެރިކަން ހިނގާ ސަރަހައްދަށް ވެދެވަޑައިގެންނެވި އިރު ބައިވެރިންގެ އަދަދު ވަނީ ސަތޭކަ ފަންސާހަށް އަރައިފައެވެ.
(4)
ބަދްރު ބިން މުޣީރާ ފަރުބަދަމަތީގައި ހުރި ކިއްލާއެއްގެ ކޮޓަރިކޮޅެއްގައި ފިކުރުފުޅަކަށް ގެއްލިވަޑައިގެން ހުންނަވައި ދެކޮޅަށް ކުރުކާލި ކަނޑުއްވަމުން ގެންދަވަނީއެވެ. މޫނުފުޅުމަތީން ފެންނަނީ އުއްމީދު ގެއްލިފައިވާ ކަހަލަ ކުލަވަރެކެވެ. މާޔޫސީއާއި ހިތާމަފުޅުގެ އަސަރެވެ. އެ ވަގުތު ރަބީޢާ އައިސް ކޮޓަރިކޮޅަށް ވަދެއްޖެއެވެ. އެކަމަކު ބަދްރަކަށް އެ ކަމެއް ފާހަގައެއް ނުކުރެއްވުނެވެ. އިރުކޮޅަކު ހުރުމަށް ފަހު ރަބީޢާ ކުރިއަށް ފިޔަވަޅެއް އަޅައިފިއެވެ. [އަޅުގަނޑަށް ގޮވައިލެއްވިންތޯއެވެ؟]
ބަދްރު ސިހިވަޑައިގެންފައި ރަބީޢާއާ ދިމާއަށް ބައްލަވައިލެއްވިއެވެ. [އާނއެކެވެ. ރަބީޢާއެވެ. އަހަރެން ދައްކަން ވެފައި އޮތް ވަރަށް މުހިއްމު ވާހަކައެއް އެބައޮތެވެ. އިށީންނާށެވެ.]
ބަދްރުގެ އަޑުފުޅުގައި ހުރި ހިތާމައިގެ އަސަރު ފާހަގަ ކުރެވުނީމާ ރަބީޢާ ހައިރާންވިއެވެ. އޭނާ ގޮނޑިއާ ކައިރިއަށް ޖެހިލިއެވެ. އެކަމަކު ނުއެއް އިށީނދެއެވެ. ބަދްރު އަނެއްކާވެސް ވިދާޅުވިއެވެ. [ރަބީޢާއެވެ. އިށީންނާށެވެ.]
ރަބީޢާ ގޮނޑީގައި އިށީނުމަށް ފަހު ބުނެލިއެވެ. [ބަދްރު ވަރަށް ބޮޑަށް ކަންބޮޑުވެވަޑައިގެން ހުންނެވި ފާޑު އެބަޖަހައެވެ.]
ކުޑަ އިރުކޮޅަކު ހިމޭނުން ހުންނެވުމަށް ފަހު ބަދްރު ވިދާޅުވިއެވެ. [ރަބީޢާއެވެ. އަހަރެން ވިސްނަމުން މި ގެންދަނީ ރަބީޢާއާ ގުޅުން ހުރި ކަމަކާއެވެ. ކްރިސްޓިއަނުންނާ ދެކޮޅަށް އަހަރެމެން ކުރަމުން މި ގެންދާ ހަނގުރާމަ މިހާރު ފައިސަލާކުރުވަނިވި މަރުހަލާއަކަށް ހިނގައްޖެއެވެ. އެހެންވީމާ ރަބީޢާ މި ތާނގައި އުޅުން ރަނގަޅު ކަމަކަށް އަހަންނަކަށް ނުފެނެއެވެ.]
ރަބީޢާ ކުއްލިއަކަށް ކޮޅަށް ތެދުވެއްޖެއެވެ. ކޮންމެވެސް އެއްޗެކޭ ބުނަން އޭނާ ބޭނުންވިއެވެ. އެކަމަކު އަޑެއް ނުނުކުތެވެ. ކުރެވުނުހައިވެސް ކަމަކީ އާދޭހުގެ ނަޒަރަކުން ބަދްރާ ދިމާއަށް ބަލަހައްޓައިގެން ހުރުމެވެ.
ބަދްރު ވިދާޅުވިއެވެ. [ރަބީޢާއެވެ. އިށީންނާށެވެ. އަހަރެންގެ ވާހަކަ އަދި ނުނިމެއެވެ.]
ރަބީޢާ އިށީނދެއްޖެއެވެ. [ރަބީޢާއަށްވެސް މިހާރު އެނގޭނެއެވެ. ފެރްނާންދޯގެ ލަޝްކަރުން ގްރަނާދާ ހިސާރުކޮށްގެން ތިބޭތާ ގިނަ ދުވަސް ވުމުގެ ސަބަބުން ހާލަތު މިހާރު ވަނީ ވަރަށް ނުބައި ވެފައެވެ. ސިއެރާ ނެވާދާގެ މަގުން ލައިފައި އަހަރެމެން ފޮނުވަމުން ގެންދާ ސާމާނަކީ އެ ރަށުގައި ތިބި އެތައް ލައްކަ ބަޔަކަށް ފުދޭ ވަރެއް ނޫނެވެ. އެބައިމީހުން ތިބީ ނިވައްތައިގެންފައެވެ. ފޫހިވެ ރުޅި އައިސްފައެވެ. ފިނި މޫސުން މި އޮތީ ބޯމަތިވެފައެވެ. އެހެންވީމާ އަބޫ މޫސާއާއި އަހަންނާ ދެމީހުން ފައިސަލާއެއް ކުރީމެވެ. އަންނަ މަހުގެ ފުރަތަމަ ދުވަހު މޫސާ ގްރަނާދާގެ ލަޝްކަރާއެކު އެތެރެއިން ހަމަލަދެއްވާނެއެވެ. ހަމަ އެދުވަހު ފުރަގަހުން ހަމަލަދޭން އަހަރެން އޮންނާނީ ވައުދުވެފައެވެ. މިހެން ކަންތައް ކުރީމާ ފަތަހައިގެ ޔަގީންކަން އަހަރެމެންނަށް އެބަ އޮތެވެ. އެކަމަކު މި އަދު އަބޫ މޫސާގެ ސިޓީއެއް ލިބިއްޖެއެވެ. އޭނާ ލިޔުއްވައިފައިވާ ގޮތުގައި އަބޫ ޢަބްދުﷲގެ ވަޒީރުން ފެރްނާންދޯއާއެކު ސުލްހައިގެ މަޝްވަރާތައް ފަށައިފިއެވެ. އަމީރުންގެ ގިނަ މީހުން ތިބީ ސުލްހަވެރިވާން އެއްބަސްވެގެންނެވެ. މުނާފިގުންގެ މަސައްކަތުން އާއްމުންގެ ތެރެއަށްވެސް މި ޚިޔާލު ވަރަށް ބޮޑަށް ފަތުރައިފިއެވެ. އާއްމުންވެސް ތިބީ ސުލްހައިގެ ވާހަކަތަކަށް ތާއީދުކޮށްގެންނެވެ. ކަން މިހެން އޮތުމާއެކު ހަމަލާދޭ ދުވަހު އަބޫ ޢަބްދުﷲގެ ލަޝްކަރުގެ ނިޔަތް ބަދަލުވުމަކީ ދުރުކަމެއް ނޫނެވެ. އެހެންވީމާ އިހަށް ހަމަލަދިނުން މަޑު ޖައްސަވައިލައްވާން އަބޫ މޫސާ ގަސްތުކުރައްވައިފިއެވެ. އޭނާ ސިޓީގައި ލިޔުއްވައިފައިވާ ގޮތުގައި ހަމަލަދެއްވާނޭ އެހެން ދުވަހެއް ކަނޑައެޅުއްވުމަށް ފަހު އަންގަވާނެއެވެ. އަބޫ މޫސާއަކީ އުއްމީދު ނަންގަވައިލައްވާނޭ ބޭފުޅެއް ނޫނެވެ. އޭނާ ފަހަރެއްގައިވެސް މާޔޫސުވެވަޑައެއް ނުގަންނަވާނެއެވެ. އެކަމަކު އޭނާގެ ސިޓީ ކިޔައިލީމާ އަހަންނަށް ފާހަގަ ކުރެވުނު ގޮތުގައި ގްރަނާދާގެ ހާލަތު މިހާރު އޮތީ ނުރައްކާތެރި ފައްތަރެއްގައެވެ. ރަބީޢާއެވެ. އަހަރެން މި ދައްކާ ވާހަކަތައް ރަނގަޅަށް ވިސްނޭނޭ ކަމަށް ހީކުރަމެވެ. އަހަރެމެންގެ އަތުން ގްރަނާދާ ބީވެގެން ހިނގައްޖެ ނަމަ ކަސްތިއްޔާ ތޫފާން އަހަރެމެންނާ ދެކޮޅަށް ހިލިގަންނާނެއެވެ. އެހެންވީމާ އަހަރެން ގަސްތުކުރަނީ މިފަދަ ހާލަތެއް ކުރިމަތިވުމުގެ ކުރިން ރަބީޢާ މޮރޮކޯއަށް ފޮނުވައިލާށެވެ. މޮރޮކޯގެ ރަސްގެފާނަކީ އަހަރެންގެ ބައްޕަޔާ ވަރަށް ގާތް ބޭފުޅެކެވެ. މަންޞޫރާއި ބަޝީރްގެ އާއިލާގެ ވަރަށް ގިނަ ބޭފުޅުން މިހާރުވެސް ތިއްބެވީ މޮރޮކޯގައެވެ. އެތާނގައި ރަބީޢާއަކަށް އެއްވެސް ތަކުލީފެއް ނުޖެހޭނެއެވެ.]
ރަބީޢާއާ ދިމާއަށް ބެއްލެވުމުގެ ބަދަލުގައި ބަދްރު މިހާރު ހުންނެވީ ކުޑަދޮރުން ބޭރަށް ބައްލަވާށެވެ.
ރަބީޢާގެ ހިތް ގެނބެމުން ދާ ކަމުގެ އިހުސާސް ކުރެވޭން ފަށައިފިއެވެ. [އެހެންވީމާ ތިޔަ ހުންނެވީ އަޅުގަނޑު މޮރޮކޯއަށް ފޮނުއްވައިލައްވާން ނިންމަވައިގެންތާއެވެ.]
[ނޫނެކެވެ. އަހަންނާމެދު ކުށް ހިއެއް ނުކުރާށެވެ. މިއީ ހަމައެކަނި އަހަރެންގެ މަޝްވަރާއެކެވެ. މި މަޝްވަރާ ގަބޫލު ކުރާނޭ ކަމަށް އަހަރެން އުއްމީދު ކުރަމެވެ.]
[މަޝްވަރާއޭތޯއެވެ؟] ރަބީޢާގެ ލޮލުން ކަރުނަ ފައިބާން ފަށައިފިއެވެ. [ތިޔަހެން ވިދާޅު ނުވެ ރަބީޢާއޭ ކަލެއަކީ ހިތް ދެރަ ބަލިކަށި މީހެކޭ، ބާޒެއްގެ ހަލުވިކަމުގައި ހިފަހައްޓައިލެވޭ ވަރުގެ މީހެއް ނޫނޭ ވިދާޅުނުވީ ކީއްވެގެންތޯއެވެ؟ އެހެންވީމާ ކަލެއަކީ މިހާރު ބޭނުން މީހެއް ނޫނޭ އަހަރެންގެ އަމުރަށް ކިޔަމަންވެގެން މިތަނުން ރައްކާވެގެން ދާށޭ ވިދާޅުވާށެވެ.]
ބަދްރު ވިދާޅުވިއެވެ. [އަހަރެންގެ ދުނިޔޭގައި ތޫނު ކަށި ފިޔަވައި އެހެން އެއްޗެއް ނެތެވެ. ގުދުރަތުން ރަބީޢާ ހައްދަވައިފައި ވަނީ ތޫނު ކަށިތަކުގެ މަތީގައި ހިނގާކަށެއް ނޫނެވެ.]
ރަބީޢާ ބުންޏެވެ. [ގުދުރަތުން އަޅުގަނޑު އަނދައަނދައި ހުރި ދަރުފުންޏެއްގެ މައްޗަށްވެސް އެރުއްވިއެވެ. އެ ވަގުތުވެސް އަނދައިގެން ދިއުމުގެ ބަދަލުގައި އަޅުގަނޑު އެދުނީ ތިޔަ ވިދާޅުވާ ކަށީގެ މަތީގައި ހިނގާށެވެ. ބަދްރުގެ ދުނިޔޭގައި ހުރި ކަށިވެސް، ރީތި މާލެލާމެއްޔަށްވުރެ އަޅުގަނޑަށް މާ ރަނގަޅެވެ. ބަދްރާއެކު ކުރާ ދަތުރުގައި އަޅުގަނޑުގެ ފައި ތުރުތުރުއަޅާ ގޮތެއް ނުވާނެއެވެ. އަޅުގަނޑުވެސް ދިރިދުނިޔޭގައި މި ހުންނަނީ ބަދްރު ފަދައިން ވަކި މަގުސަދެއްގައިކަން ގަބޫލުފުޅު ނުކުރައްވަނީ ކީއްވެގެންތޯއެވެ؟ ގުދުރަތުން މި ވަނީ އަޅުގަނޑުގެ ދަތުރުވެސް ބަދްރު ދަތުރުކުރައްވާ މަގަށް އަނބުރުއްވައިފައެވެ. ބަދްރު ވައުދުވެވަޑައިގެންފައި އޮތީ ގްރަނާދާގެ ހިސާރު ނިމުމަކަށް އައީމާ… އެކަމަކު…] ރަބީޢާއަކަށް އިތުރަކަށް ވާހަކައެއް ނުދެއްކުނެވެ. އޭނާ މޫނުގައި ދެއަތް އަޅައިގެން ގިސްލާން ފަށައިފިއެވެ.
ރަބީޢާގެ ރުއިމުގެ ސަބަބުން ބަދްރަށް ވަރަށް ބޮޑަށް އަސަރުކޮށްފިއެވެ. [ރަބީޢާއެވެ. އަހަރެންގެ ވާހަކައިން ނުބައި މާނައެއް ނުނެރޭށެވެ. ރަބީޢާގެ ހަޔާތުގެ ބައިވެރިއަކަށް ވުމަކީ އަހަންނަށް ލިބޭ ޝަރަފެކެވެ. އަހަންނަށްޓަކައި ރަބީޢާއަކީ ދަތުރުވެރިއަކު ފިނިކޮށްލާން އެ ގަހެއްގެ ހިޔަލުގައި ޖައްސައިލާފަދަ ހިޔާދޭ ގަހެކެވެ. ރަބީޢާއާ އިންނާން އަހަރެން އެހީމެވެ. އެ ދުވަހު އަހަރެން ހީކޮށްގެން ހުރީ ގްރަނާދާގެ ހަނގުރާމައަށް ފަހު ހަޔާތުގެ ބައިވެރިއެއްގެ ގޮތުގައި ރަބީޢާއާއެކު ދުވަސްކޮޅެއް ހޭދަކޮށްލާން ލިބުމަކީ އަހަރެންގެ ހަޔާތުގެ މާޒީގެ ހިތިކަމާއި އުނދަގޫތަކަށް ލިބޭ ފުރިހަމަ އިނާމަކަށް ވާނޭ ކަމުގައެވެ. އެކަމަކު މިހާރު އަހަންނަށް ގަބޫލުކުރެވޭ ގޮތުގައި އަހަރެންގެ ދުނިޔޭގެ ހަނަފަސް ސަހަރާގައި އެއް ތޫފާން މައިތިރިވުމާއެކު އަނެއް ތޫފާން ބޯމަތިކުރާނެއެވެ. އަހަރެންގެ ބޮއްކުރާ ބޭލި ކަނޑަށް ބަލާނަމަ ގޮނޑުދޮށް އެއް ދުވަހުން އަނެއް ދުވަހަށް މިހިރަގެން ދަނީ ދުރުވަމުންނެވެ. އަހަރެން ކުރިމަތީގައި އޮތީ އެއް ރާޅަށް ފަހު އަނެއް ރާޅާ ކުރިމަތިލުމެވެ. ރަބީޢާއެވެ. ރަބީޢާއަށް އެންމެ ރަނގަޅު ގޮތަކީ މޮރޮކޯއަށް ދިއުމެވެ.]
ރަބީޢާ ހިތާމަވެރި ރާގަކަށް ބުނެލިއެވެ. [އަޅުގަނޑުގެ ބަލިކަށިކަމާއި ބާރެއް ނެތްކަމުގެ އިހުސާސް އަޅުގަނޑަށް ނިކަން ރަނގަޅަށް ކުރެވެއެވެ. ބަދްރުގެ ކުރީގެ ނިންމެވުމަކަށް އަމަލުކުރައްވާކަށް އަޅުގަނޑު މަޖުބޫރެއް ނުކުރާނަމެވެ. އަޅުގަނޑަކީ ބަދްރުގެ ހަޔާތުގެ ބައިވެރިއަކަށް ވުމުގެ ގާބިލުކަން ލިބިފައިވާ މީހެއް ނޫނެވެ. އެކަމަކުވެސް އެ ޝަރަފުން އަޅުގަނޑު މަހުރޫމު ނުކުރެއްވުން ވަރަށް ބޮޑަށް އެދެމެވެ. މައިދާނުގައި ތީރުޖެހުމާއި ލޮންސީގެ ހަމަލަތަކުގައި ބައިވެރިވުމަކީ އަޅުގަނޑަށް ނުކުރެވޭނޭ ކަމެއް ކަމުގައި ވެދާނެއެވެ. އެކަމަކު ޒަޚަމްވާ މީހުންނަށް ހޭހަންކުރުމަކީ އަޅުގަނޑަށް ކުރެވިދާނޭ ކަމެއް ނޫންތޯއެވެ؟ އަޅުގަނޑު މޮރޮކޯއަށް ނުފޮނުއްވާށެވެ. މަރުވުމުގެ ކުރިން ދިރިއުޅުމަށް އަލްވަދާއު ކިޔަން އަޅުގަނޑަށް މަޖުބޫރު ނުކުރައްވާށެވެ.]
ބަދްރު ބިން މުޣީރާ އޭނާގެ ކުރިމަތީގައި އިން ވަފާތެރިކަމާއި ތެދުވެރިކަމުން ފުރިފައިވާ އަންހެންކުއްޖާއާ ދިމާއަށް އިރުކޮޅެއް ވާންދެން ބައްލަވާން ހުންނެވިއެވެ. ކުއްލިއަކަށް އޭނާގެ ތުންފަތްޕުޅު މައްޗަށް ފަނޑު ހިނިތުންވުމެއްގެ އަސަރު ފާއްދައިލިއެވެ. އެކަމަކު އޭނާ މޫނުފުޅު އަނެއް ފަރާތަށް އަނބުރައިލެއްވިއެވެ. އަދި އިސްދަށަށް ޖައްސަވައިގެން މަޑުމަޑުން ދެކޮޅަށް ކުރުކާލި ކަނޑުއްވާން ފައްޓަވައިފިއެވެ. މި ގޮތުގައި ކުޑަ ހިނދުކޮޅެއް ހޭދަ ކުރެއްވުމަށް ފަހު ވަޑައިގެން ރަބީޢާގެ ގާތަށް ހުއްޓިވަޑައިގެންފިއެވެ. ރަބީޢާއަށް ބަދްރުގެ މޫނުފުޅުމަތީން ފެންނަނީ އޭނާގެ ނަސީބުގެ ފައިސަލާއެވެ. އޭނާގެ ހިތް އަނެއްކާވެސް މަޑުމަޑުން ގެނބެމުން ދަނީއެވެ.
ބަދްރު ވިދާޅުވިއެވެ. [ރަބީޢާއެވެ. އަހަރެންގެ ބޭނުމަކީ ތަބީޢާގެ ނިންމުމާމެދު ދެވަނަ ފަހަރަށްވެސް ވިސްނައިލާނޭ ފުރުސަތު ދިނުމެވެ. އެއީ އަހަރެންގެ ވާޖިބެކެވެ. އެޔާއެކުވެސް ރަބީޢާ ޚިޔާރުކުރަނީ މަޚްމަލުގެ ދޫލައިގެ ބަދަލުގައި ކަށީގެ މައިދާނެއްގައި އަހަންނާއެކު ހިނގަން ކަމުގައި ވަނީނަމަ އެކަމަށްޓަކައި އަހަރެން ޝުކުރު އަދާކުރަމެވެ. އަހަރެންގެ ދިރިއުޅުމަކީ ދެތިން އަހަރުގެ ނުވަތަ ދެތިން މަސްދުވަހުގެ ނުވަތަ އެންމެ ދެތިން ދުވަހުގެ ދިރިއުޅުމަކަށް ވެދާނެއެވެ. މި ހިތި ހަގީގަތުގެ މައްޗަށް ލޯ މަރައިލާން ގަސްތުކުރާނަމަ އަހަރެން މިހިރީ ހަމަ މިއަދު ރަބީޢާއާ އިންނާން ތައްޔާރަށެވެ. ރަބީޢާ ތިޔަ އިނީ ތައްޔާރަށް ހެއްޔެވެ؟]
ގަތް ލަދެއްގެ ސަބަބުން ރަބީޢާގެ މޫނު ރަތްވެގެން ދިޔައެވެ. އޭނާ އިސް ދަށަށް ޖަހައިލިއެވެ. ދޫ ވަނީ ތަޅުލެވިފައެވެ. އެކަމަކު އޭނާގެ ހިތުގައި ޖަހާ ވިންދުން ބަދްރު ބިން މުޣީރާގެ ސުވާލަށް ޖަވާބު ދެމުން އެބަގެންދެއެވެ.
ހިނދުކޮޅަކަށް ފަހު ބަދްރު ވިދާޅުވިއެވެ. [ރަބީޢާއެވެ. ރަބީޢާގެ ހިތްހަމަ ޖައްސައިދޭން އަހަރެން ބޭނުންވެއެވެ. އަދި އަހަރެންގެ ހިތް ހަމަޖައްސަންވެސް ބޭނުމެވެ. އެހެންވީމާ މި ބުނާ ވާހަކަޔާމެދު ރަނގަޅަށް ވިސްނައިލާށެވެ. އަހަރެން ނުކުންނަ މަގަށް ނުކުތުމުގެ ކުރިން ރަބީޢާގެ ކުރިމަގު ރައްކާތެރިކޮށްދޭން އަހަރެން ބޭނުމެވެ. އެއް ދުވަހަކު އަހަރެންގެ އަސް ހުހާ އެނބުރި އަންނަތަން ފެނުމަކީ ދުރުކަމެއް ނޫނެވެ. އެ ފަދަ ދުވަހެއް އަތުވެއްޖެނަމަ ރަބީޢާ ދަންނަ މީހަކު މި ވާދީ ތެރެއަކު ނޫޅޭނެއެވެ.]
ރަބީޢާ ކޮޅަށް ތެދުވެއްޖެއެވެ. [މިތަން ދޫކޮށް ދިއުމަކީ ބަދްރުގެ އަމުރުފުޅެއް ނަމަ ދެކޮޅުހެދުމަކީ އަޅުގަނޑަކަށް ކުރެވޭނޭ ކަމެއް ނޫނެވެ. އަމުރުފުޅެއް ނޫންނަމަ އަޅުގަނޑުގެ ދިރިއުޅުމާ ގުޅޭ ކަންތައް ނިންމުމުގެ އިޚުތިޔާރު އަޅުގަނޑަށް ދެއްވާށެވެ.]
ބަދްރު ވިދާޅުވިއެވެ. [އަހަރެންގެ ވާހަކަ އަދިވެސް ނުނިމެއެވެ. އަހަރެން ރަބީޢާއަށް ވިސްނައިދޭން މި އުޅޭ ވާހަކަ އެހެން ގޮތަކަށް ބުނަން ހެއްޔެވެ؟ ގްރަނާދާގެ ސިފައިން ފެރްނާންދޯގެ ކުރިމަތީގައި ހަތިޔާރު ބަހައްޓައިފިނަމަ އަލިފާނާއި ލެއިން މި ވާދީވެސް ސަލާމަތެއް ނުވާނެއެވެ. އެހެންވީމާ އިއްޒަތާއި ޝަރަފާއެކު ޝަހީދުވެގެން ދިއުން ނޫން މަގެއް ނުފެންނަ ގޮތް ވުމަކީ އެކަށީގެންވާ ކަމެކެވެ.]
[ތިޔަ ވިދާޅުވަނީ އިއްޒަތާއި ޝަރަފާއެކު ޝަހީދުވުމުގައި އަޅުގަނޑު ބައިވެރި ނުކުރައްވާނެ ވާހަކަތޯއެވެ؟]
ބަދްރު ވިދާޅުވިއެވެ. [ރަބީޢާއެވެ. އަހަރެން ރަބީޢާއަކަށް ކުޑަކޮށްވެސް ޝައްކެއް ނުކުރަމެވެ. ދަރުފުނީގެ މަތީގައި ހުރެގެން ރަބީޢާ ހިނިތުންވީތަން އަހަރެން ދުށީމެވެ. އެކަމަކު ކުޑަ ދުވަސްކޮޅެއްގެ އުފާވެރިކަމަށްޓަކައި އަހަރެން މި ދަތުރުކުރާ ނުރައްކާތެރި މަގަށް ރަބީޢާ ނެރުމުގެ އެއްވެސް ހައްގެއް އަހަންނަކަށް ނެތެވެ. އަހަރެންގެ ބައިވެރިއަކަށް ވެއްޖެނަމަ ރަބީޢާއަށް ހިތާމައާއި މުސީބާތް ފިޔަވައި އެހެން އެއްޗެއް ނުލިބޭނެއެވެ. ރަބީޢާއެވެ. އަހަރެން މި ހުންނަނީ ކޮންމެ ދުވަހަކު އެތައް ފަހަރަކު މަރުގެ ދޮރުގައި ޓަކި ޖަހައިލަޖަހައިލައެވެ. އަހަރެންގެ ކުރިމަތީގައި އޮތީ ހަމައެކަނި މިއަދެވެ. މާދަމައެއް ނެތެވެ.]
ރަބީޢާ ބުންޏެވެ. [ބަދްރެވެ. ބަދްރުގެ އަރިހުގައި އަޅުގަނޑު ހޭދަކުރާ ދެތިން ދުވަސް އެތައް ހާސް އަހަރެއްގެ ދިރިއުޅުމަށްވުރެ އަޅުގަނޑުގެ ކުރިމަތީގައި އަގުބޮޑުކަން ﷲ ދެނެވޮޑިގެން ވާނެއެވެ. ދިރިއުޅުގެ އެއްްވެސް މަގުސަދެއް ނެތިއްޔާ އެ ދިރިއުޅުން ގޮނޑުދޮށަށް ދޫކޮށްލައިފައި އައުން މާ ރަނގަޅެވެ. އެކަމަކު ދިރިއުޅުމުގެ އެންމެ ފަހުގެ މަންޒިލަކީ ހަމައެކަނި މަރު ކަމުގައި ވަނީނަމަ ގޮނޑުދޮށުގައި އިނދެގެން ރާޅު ގުނުމުގެ ބަދަލުގައި ރާޅުތަކުގެ ތެރޭގައި ބަދްރުގެ އަރިހުގައި ދަތުރުކުރުން މާ ރަނގަޅު ކަމުގައި އަޅުގަނޑު ނުދެކޭންވީ ކީއްވެގެންތޯއެވެ؟]
ހިނދުކޮޅެއްގެ ހިމޭންކަމަށް ފަހު ބަދްރު ބިން މުޣީރާ ވިދާޅުވިއެވެ. [ރަބީޢާއެވެ. އަހަރެން ރަބީޢާއާ އިންނާން އަހައިފީމެވެ. ޖަވާބަކީ ކޮބައި ހެއްޔެވެ؟]
ރަބީޢާ އިސް އުފުލައި ބަލައިލިއެވެ. ލަފުޒުތައް އޭނާގެ ތުންފަތާ ހަމައަށް އައިސްފައި ހުއްޓިއްޖެއެވެ. ޝުކުރުވެރިވުމާއި އިހުސާންތެރިކަން ހަނދާންކުރުމުގެ ޖަޒުބާތުވެސް އޭނާގެ މައްޗަށް ވަރަށް ބޮޑަށް ވެރިވެއްޖެއެވެ. ބަދްރަށް އޭނާގެ ލޮލުން ފައިބަމުންދާ ކަރުނަ ފެނިވަޑައިގެންފިއެވެ. އެއީ ލަފުޒުތަކަކަށްވުރެ މާ ވަރުގަދަ އެއްޗެއްކަން އޭނާއަށް އެނގިވަޑައިގަނެއެވެ.
[ރަބީޢާއެވެ. އަހަރެންގެ އެއްވެސް ވާހަކައަކުން ރަބީޢާގެ ހިތުގައި ޖެހުނު ކަމުގައި ވަނީނަމަ އަހަރެން މިހިރީ މައާފަށް އެދެން ތައްޔާރަށެވެ. ތިޔަ ރޮނީ ކީއްވެގެން ހެއްޔެވެ؟]
ރަބީޢާ ކަރުނަ ފޮހެލަމުން ހިނިތުންވެލެވޭތޯ މަސައްކަތްކުރިއެވެ. [ކުޑައިކޮށް ރޮވުނީތީ މައާފަށް އެދެމެވެ. އަޅުގަނޑުމެންގެ ވާހަކަ މި ދިމާއަށް އެނބުރިގެން ހިނގައިދާނޭ ކަމަކަށް ކުރިއަކުން ހިއެއް ނުކުރަމެވެ. މިއީ އާރެއް ބާރެއް ނެތް ނިކަމެތި އަންހެނެއްގެ ޝުކުރުވެރިކަމުގެ ކަރުނައެވެ.]
[އެހެންވީމާ ހަމަ މިއަދު އަހަންނާ އިންނާން ރަބީޢާ އެއްބަސް ހެއްޔެވެ؟]
ރަބީޢާ ސީރިއަސް ރާގަކަށް ސުވާލުކޮށްލިއެވެ. [ބަދްރު އަޅުގަނޑާ ސަމާސާ ކުރައްވަނީތޯއެވެ؟]
[މިއީ ސަމާސައެއް ނޫނެވެ. އިތުރު މައްސަލައެއް ކުރިމަތި ނުވާނަމަ އޮއްސެންދާ އިރުގެ އެންމެ ފަހުގެ ދޯދިތައް ބަދްރު ބިން މުޣީރާއާއި ރަބީޢާ ބިންތި އަބޫ ދާވޫދް ދެކޭނީ ދެމަފިރިންގެ ގޮތުގައެވެ.]
[ހަމަ މިއަދުތޯއެވެ؟ އެހައި އަވަހަށްތޯއެވެ؟]
[އާނއެކެވެ. ރަބީޢާ ދެކޮޅު ނުހަދާނަމަ ހަމަ މިއަދުއެވެ.]
ބަދްރު ބިން މުޣީރާއާ ދިމާއަށް ބަލައިލުމަށް ފަހު އިތުރު އެއްވެސް ވާހަކައެއް ނުދައްކައި ރަބީޢާ ހަލުވި ފިޔަވަޅުތަކެއް އަޅަމުން ގޮސް ކޮޓަރިކޮޅުން ނުކުމެއްޖެއެވެ.
(5)
ރަބީޢާގެ ދެފައިގައި ވަނީ ބާވަތެއްގެ ތުރުތުރެއް އެކުލެވިފައެވެ. ހިތުގެ ހިނގުން ވަނީ އަވަސް ވެފައެވެ. އޭނާގެ ހިނގުން ބައެއް ފަހަރު ލަސްވެއެވެ. އަނެއް ބައި ފަހަރު ވަރަށް އަވަސްވެގެން ހިނގައިދެއެވެ. އޭނާ ވަރަށް ބާރަށް [އެންޖެލާ… އެންޖެލާ…] އޭ ގޮވަމުން ގޮސް އޭނާގެ ކޮޓަރިއަށް ވަދެއްޖެއެވެ. އެންޖެލާ އެ ވަގުތު އިނީ ކޮޓަރީގެ ބެލްކަނީގައި ބޭރަށް ބަލަހައްޓައިގެންނެވެ. އޭނާ އެނބުރި ރަބީޢާއާ ދިމާއަށް ބަލައިލިއެވެ. ރަބީޢާ ދުށް ގޮތުގައި އޭނާ އެ އައީ ކޮއްކޮއަށް ވަރަށް ބޮޑު ޚަބަރެއް ދޭން ވެގެންނެވެ. އެހެން ނަމަވެސް އެންޖެލާގެ ލޮލުން ކަރުނަ ފައިބާތަން ފެނުނީމާ ކުޑަކޮށް ކަންބޮޑުވާ ގޮތް ވެއްޖެއެވެ.
[ކޮއްކޯއެވެ. ކިހިނެއްވީ ހެއްޔެވެ؟ ތިޔަ ރޮނީ ކީއްވެގެން ހެއްޔެވެ؟]
ރަބީޢާ ކަންބޮޑުވެފައި އެންޖެލާއާ ދިމާއަށް ބަލަނީއެވެ. އެންޖެލާ ކަރުނަ ފޮހެލަމުން ސުވާލުކޮށްލިއެވެ. [އަހަރެމެން ފުރަނީ ކޮން އިރަކު ހެއްޔެވެ؟]
ރަބީޢާ އަހައިލިއެވެ. [ކޮން ތަނަކަށް ހެއްޔެވެ؟]
[ދައްތާއެވެ. އަހަންނަށް އެއްވެސް ކަމެއް ސިއްރުކުރުމުގެ ބޭނުމެއް ނެތެވެ. އޭނާ އެ ވަޑައިގަތީ ހުރިހައި ވާހަކައެއް އަހަންނަށް ވިދާޅުވެ ދެއްވައިފައެވެ.]
[ކާކު ހެއްޔެވެ؟ ބަޝީރް ބިން ޙަސަން ހެއްޔެވެ؟]
[އާނއެކެވެ. އޭނާ އެ ވަޑައިގަތީ ދެންމެއެވެ.]
[އޭނާ ވިދާޅުވީ އަހަރެމެން ދެމީހުން މޮރޮކޯއަށް ދާ ވާހަކަ ދޯއެވެ؟]
[އާނއެކެވެ.]
[އެކަމަކު އަހަރެމެން މޮރޮކޯއަކަށް ނުދަމެވެ. ކޮއްކޯއެވެ. ގަބޫލުކުރާށެވެ. އަހަރެމެން ތިބޭނީ މިތާނގައެވެ. އެހެން އެއްވެސް ތަނަކަށް ނުދާނަމެވެ.]
އެންޖެލާ ބުންޏެވެ. [ދައްތާއެވެ. އަހަރެންގެ ހިތްހަމަ ޖައްސައިދޭން ތިޔަ ކަހަލަ ހުވަފެނީ ވާހަކަ ނުދައްކާށެވެ. މިއީ އަހަރެމެންގެ ތަގުދީރުގައި ލިޔުއްވައިފައިވާ ގޮތެވެ.]
[ކޮއްކޮ ބަޝީރަށް ދެންނެވީ ކީކޭ ހެއްޔެވެ؟]
[އަހަރެން ދަންނަވާނީ ވަކި ކީކޭ ހެއްޔެވެ؟ އޭނާ އައިސް ވިދާޅުވީ ދައްތަޔާއެކު މޮރޮކޯއަށް ދާން ތައްޔާރުވާށޭއެވެ. އޭނާވެސް ހުންނެވީ ހިތާމަފުޅުންނެވެ. ދައްތާއެވެ. އެއީ އޭނާ ހިތްޕުޅުން އެދިވަޑައިގަންނަވާ ގޮތް ނޫންކަން އަހަންނަށް ވަރަށް ރަނގަޅަށް އެނގެއެވެ. އަހަންނަށް އެއްވެސް އެއްޗެކޭ ބުނެވުމުގެ ކުރިން އޭނާ އެނބުރި ވަޑައިގެންފިއެވެ. ދައްތާއެވެ. އޭނާގެ މައްޗަކަށް އަހަރެންގެ އެއްވެސް ޝަކުވާއެއް ނެތެވެ. މިއަދުވެސް އޭނާ އަހަންނަކަށް އެއްވެސް ކަހަލަ ވައުދެއް ނުކުރައްވައެވެ. އެކަމަކު ދައްތަގެ ބާޒު ވަނީ ދައްތަޔާ ކާވެނިކުރައްވާން ވައުދުވެވަޑައިގެންފައެއް ނޫން ހެއްޔެވެ؟ އެހެންވީމާ އަހަރެމެން މޮރޮކޯއަށް ފޮނުއްވައިލައްވާ ސަބަބެއް ވަރަށް ސާފުކޮށް އޭނާ ވިދާޅުވާން ވާނެއެއް ނޫން ހެއްޔެވެ؟ ގްރަނާދާގެ ހާލަތު އޮތީ ނާޒުކު ފައްތަރެއްގައިކަން އަހަންނަށްވެސް އިހުސާސް ކުރެވެއެވެ.]
ރަބީޢާ ބުންޏެވެ. [އަހަރެން ދެންމެ ބަދްރާ ދެއްކި ވާހަކައަކީ ހުވަފެނެއް ނޫންނަމަ މިއަދުގެ އިރުއޮއްސޭނީ ދައްތަޔާއި ބަދްރާ ދެމީހުންގެ ކާވެންޏާ އެކުގައެވެ. ކޮއްކޯއެވެ. ގަބޫލުކުރާށެވެ. އަހަރެމެން މޮރޮކޯއަކަށް ނުދަމެވެ. އެ އަމުރު ބާތިލު ވެއްޖެއެވެ.]
އެންޖެލާއަށް ބޭއިޚްތިޔާރުގައި ރަބީޢާގެ ގައިގައި އޮޅުލައިގަނެވިއްޖެއެވެ. [ދައްތާއެވެ. އަހަރެން ހައްލައިލާން ނޫޅޭށެވެ. ﷲއަށްޓަކައި ތެދު ބަހުން ބުނާށެވެ.]
[ކޮއްކޯއެވެ. ދައްތަ މި ހަދަނީއަކީ ދޮގެއް ނޫނެވެ. ގަބޫލުކުރާށެވެ. ހަމަޖެހިލައިގެން އިށީންނާށެވެ. އަހަރެން ހުރިހައި ވާހަކައެއް ކިޔައިދޭނަމެވެ.]
އެންޖެލާ ގޮނޑިއެއްގައި އިށީނދެއްޖެއެވެ. ރަބީޢާ ޖެހިގެން ހުރި ގޮނޑީގައި އިށީނދެ އޭނާޔާއި ބަދްރާ ދެމެދު ދެކެވުނު ވާހަކަތައް ތަފުސީލުކޮށް އެންޖެލާއަށް ކިޔައިދީފިއެވެ.
(6)
ކިއްލާގެ އަނެއް ފަރާތުގައި ހުރި ތަނަވަސް ކޮޓަރިއެއްގެ ތެރޭގައި ބަލިމީހުންނަށް ފަރުވާ ދެއްވުމުގައި ބަޝީރް ބިން ޙަސަން އަވަދިނެތި އެބަ އުޅުއްވައެވެ. އޭނާގެ އަރިހުގައި އެހެން ބައެއް ޑަކްޓަރުންވެސް ހަރަކާތްތެރިވެއެވެ. އެ ވަގުތު ބަދްރު ބިން މުޣީރާ ވަޑައިގެން އެ ކޮޓަރިއަށް ވެދެވަޑައިގެންފިއެވެ. އޭރު ބަޝީރް ޒަޚަމްވެފައި އޮތް މީހަކުގެ މުލައްދަނޑީގައި ބޭސް އަޅުއްވަނީއެވެ. އޭނާގެ ބައިވެރިއަކު ބޮލުން އިޝާރާތެއް ކޮށްލީމާ ބަޝީރް އެނބުރިވަޑައިގެން ބައްލަވައިލެއްވިއެވެ. އަދި ބޭސް އަޅުއްވައި ނިންމެވުމަށް ފަހު ތެދުވެވަޑައިގެންފިއެވެ.
ބަދްރު ވިދާޅުވިއެވެ. [މިތާނގައި އަދި ކިހައި އިރެއް ވާނެތޯއެވެ؟]
ބަޝީރް ވިދާޅުވިއެވެ. [މިހާރު މަސައްކަތް ނިމުމަކާ ގާތްވެއްޖެއެވެ.]
[ޚާއްސަ ވާހަކައެއް ދައްކައިލާން އަޅުގަނޑު އެބަ ބޭނުންވެއެވެ.]
[ސީދާ މި ވަގުތު ވާހަކަފުޅު ދައްކަވާން ބޭނުންފުޅު ނޫން ކަމުގައި ވަނީނަމަ އަދި އެކަކު ބެލިޔަދެއްވާށެވެ. އަޅުގަނޑު ނޫން މީހަކު ލައްވައި ފަރުވާ ކުރުވާކަށް އޭނާ ބޭނުމެއް ނުވެއެވެ.]
[މި ވަގުތު ނޫނަސް އެންމެ ރަނގަޅެވެ. ތިޔަ ވިދާޅުވާ ކަމެއް ނިންމަވައިފައި އަޅުގަނޑުގެ ކޮޓަރިއަށް ވަޑައިގަންނަވާށެވެ.]
އޭގެ ކުޑައިރުކޮޅެއް ފަހުން ބަޝީރް އިންނެވީ ބަދްރުގެ ކޮޓަރިކޮޅުގައެވެ. [މަނިކުފާނު ވަރަށް ކަންބޮޑުވެވަޑައިގެންފައި ހުންނެވި ފާޑު އެބަޖަހައެވެ. އަނެއްކާ ގްރަނާދާއިން މާ ދެރަ ޚަބަރެއް ލިބިވަޑައިގަތީތޯއެވެ؟]
[ނޫނެކެވެ. އަޅުގަނޑު ވާހަކަ ދައްކައިލާން ބޭނުން ވަނީ ރަބީޢާއާއި އެންޖެލާއާ ބެހޭ ގޮތުންނެވެ.]
[އެންޖެލާ ގާތު އަޅުގަނޑު ބުނެފީމެވެ. މޮރޮކޯއިން އަންނަ ނައު ބަނދަރުކުރާނޭ ދުވަހަކާއި ގަޑިއެއް މަނިކުފާނަށް އެނގިވަޑައިގަނޭތޯއެވެ؟ އަދި ވަންނާނީ ކޮން ބަދަރަކަށްކަން އެނގިވަޑައިގަނޭތޯވެ؟]
[އަދި އަޅުގަނޑަކަށް އެއްވެސް ޚަބަރެއް ނުވެއެވެ. އެއް ދުވަހުން ނުވަތަ ދެ ދުވަހަކުން އަންނާނެ ކަމަށް ގަބޫލުކުރެވެއެވެ. ހީވާ ގޮތުގައި ބަނދަރުކުރާނީ އަލްމޭރިއާގެ އުތުރުގައެވެ. މި ދިޔަ މަހުވެސް ނައު ވަނީ އެ ބަނދަރަށެވެ.]
[އެހެންވީމާ ވަރަށް އަވަހަށް ރަބީޢާއާއި އެންޖެލާއާ ދެ ކުދިން ބަނދަރަށް ގެންދާން ޖެހޭނެއެއް ނޫންތޯއެވެ؟]
[އަޅުގަނޑު ވާހަކަދައްކަން ބޭނުންވަނީ ތިޔަ ކަމާ ބެހޭ ގޮތުންނެވެ.]
[އެކަން މިހާރު އޮތީ ނިމިފައެއް ނޫންތޯއެވެ؟]
ބަދްރު ބިން މުޣީރާ ހިނދުކޮޅަކު ވިސްނައިވަޑައިގަތުމަށް ފަހު ވިދާޅުވިއެވެ. [ބަޝީރެވެ. މި މައްސަލައިގައި ވަރަށް ދިގުކޮށް ރަބީޢާއާ ވާހަކަދެއްކުމަށް ފަހު އަޅުގަނޑު މިހާރު ގަސްތުކުރަނީ ދެކުދިން މޮރޮކޯއަށް ނުފޮނުވާށެވެ.]
ބަޝީރްގެ މިލައިފައިވާ މޫނުފުޅަށް ތާޒާކަން ވެރިވެއްޖެއެވެ. [އަޅުގަނޑުގެ ހުވަފެން ސީދާވީއެވެ.]
[އާދޭހެވެ. ތިޔަ ހުވަފެންފުޅުގެ ތައުބީރުގެ އެންމެ ފަހުބައި އަޑު އައްސަވާށެވެ. އެއީ ހައިރާންފުޅުވާނޭ ކަމެއްކަން ޔަގީނެވެ.]
[ފަހުބައި އަޅުގަނޑަށް އެނގެއެވެ. މަނިކުފާނު ރަބީޢާއާ ކާވެނިކުރައްވާން ނިންމެވީ ނޫންތޯއެވެ؟]
[އެހެންތޯއެވެ؟ އެހެންވެއްޖެއްޔާ އަޅުގަނޑު އޭނާޔާ އިންނަނީ ކޮން ދުވަހަކުތޯއެވެ؟]
[މިއަދުއެވެ.]
[ތިޔަ ހުރިހައި ކަމެއް ބަޝީރަށް އެނގިވަޑައިގަތީ ކިހިނެއްތޯއެވެ؟ އެންޖެލާ ދެންނެވީތާއެވެ. އެންޖެލާ ގާތު ބުނާނީ ރަބީޢާކަން ގައިމެވެ.]
[ނޫނެކެވެ. އަޅުގަނޑު ގާތު އެއްވެސް މީހަކު އެއްވެސް ވާހަކައެއް ނުބުނެއެވެ. މަނިކުފާނުގެ މޫނުފުޅަކީ އަޅުގަނޑަށްޓަކައި ހުޅުވިފައިވާ ފޮތެކެވެ. މަނިކުފާނަކީ މުޅި ދުނިޔެއަށް އޮތް އަރަތެކެވެ. އެކަމަކު އަޅުގަނޑަކަށް އަރަތެއް ނޫނެވެ. ދެން ނިކަން ވިދާޅުވެ ބައްލަވާށެވެ. އަޅުގަނޑަށް އެނގުނީ ކިހިނެއްހެން ހީފުޅުވޭތޯއެވެ؟]
[އަޅެ ވިދާޅުވެބައްލަވާށެވެ.]
[ރަބީޢާއާ ބައްދަލު ކުރެއްވުމަށް ފަހު ކަންބޮޑުވެވަޑައިގެން ހުންނަވައި އަޅުގަނޑު ގާތަށް ވަޑައިގަތުމާއެކު މަނިކުފާނުގެ ނިންމެވުން ބަދަލުކުރައްވައިފިކަން އަޅުގަނޑަށް އެނގިއްޖެއެވެ. އެޔަށް ފަހު ގްރަނާދާއާ ބެހޭ ގޮތުން ނުބައި ޚަބަރެއް ލިބިވަޑައިގަތީއެއް ނޫނޭ ވިދާޅުވުމާއެކު އަޅުގަނޑަށް މުޅީން ކަށަވަރު ވެއްޖެއެވެ. މީގެ އިތުރަށް ސިޔާސީ ނުވަތަ އަސްކަރީ ކަންބޮޑުވެވަޑައިގަތުމެއް އޮތް ނަމަ މަނިކުފާނު ފުރަތަމަ ގެންނެވީހީ މަންޞޫރެވެ. ނުވަތަ މަޝްވަރާ މަޖިލިސް އެއްކުރައްވާނީއެވެ. ރަބީޢާ ނުގޮސް މިތާނގައި މަޑުކުރާނީއޭ ވިދާޅުވީމާ އަޅުގަނޑުގެ ބާޒަށް އަރިހުގައި އުދުހޭނޭ ބައިވެރިއަކު ލިބިވަޑައިގަތީކަން އަޅުގަނޑަށް އެނގިއްޖެއެވެ.]
[އެކަމަކު އަޅުގަނޑު ކާވެނިކުރާނީ މިއަދުކަން އެނގިވަޑައިގަތީ ކިހިނެއްތޯއެވެ؟]
[ވަރަށް މުހިއްމު ނިންމެވުމެއް ނިންމަވައިފިކަން މަނިކުފާނުގެ މޫނުފުޅުމަތީން ފައުޅުވެއްޖެއެވެ. މަނިކުފާނުގެ ކޮންމެ މުހިއްމު ނިންމެވުމަކީ ވަގުތުން އަމަލުކުރައްވާ ނިންމެވުމެއްކަން އަޅުގަނޑަށްވުރެ ބޮޑަށް އެނގޭނީ ކާކަށްތޯއެވެ؟]
[ތިޔަ ވިދާޅުވަނީ އަޅުގަނޑަކީ އަވަސް އަރުވައިލައިގެން ކަންތައް ކުރާ މީހެކޭތޯއެވެ؟]
[ނޫނެކެވެ. ސިފައިންގެ މީހެއްގެ ކިބައިގައި ހުންނަ އެންމެ މުހިއްމު އެއް އާދައަށް އަޅުގަނޑު ތާރީފުކުޅައީއެވެ. އާދައިގެ ދޫނިތައް އުދުހެން ޚިޔާލުކޮށް ނިމޭއިރު ބާޒު ވިލާތަކާ ވާހަކަ ގޮވައިފައި އެނބުރި އަތުވެދެއެވެ. ރަބީޢާ އެއްވެސް ތަނަކަށް ނުފޮނުއްވައި މިތާނގައި ބަހައްޓަވާން މަނިކުފާނު ނިންމެވީމާ ކާވެނި ކުރެއްވުން މާދަމައަށް ލަސްކުރެއްވުމަކީ ކުރައްވާނޭ ކަމެއް ނޫންކަން އަޅުގަނޑަށް އެނގެއެވެ.]
ބަދްރު ވިދާޅުވިއެވެ. [އެންމެ ރަނގަޅެވެ. އަޅުގަނޑު ކާވެނިކުރާނީ މިއަދު ކަމަށް ބަލަމާ ހިންގަވާށެވެ.]
ބަޝީރް ހިނިފުޅުވަޑުވައިލެއްވިއެވެ. [ބަލާކަށް ނުޖެހެއެވެ. އަޅުގަނޑަށް ކަށަވަރުކޮށް އެނގެއެވެ.]
[އެންމެ ރަނގަޅެވެ. އަންދަލުސްގެ އަފްލާޠޫނާ އަޅުގަނޑު ސުވާލެއް ކޮށްލާނަމެވެ. އަފްލާޠޫންގެ ނިންމެވުން އޮތީ ކިހިނެއްތޯއެވެ؟]
ބަޝީރް ވިދާޅުވިއެވެ. [އަޅުގަނޑަށް އޮތް ކަމަކީ އަންހެން ކުއްޖެއްގެ ގާތުން މައާފަށް އެދިފައި އިހަށް ނިންމި ނިންމުން ބަދަލުކޮށްފީމޭ ބުނުމެއް ނޫންތޯއެވެ؟ އެއީ އެހައި ފަސޭހަ ކަމެއް ނޫނެވެ. މިކަހަލަ ކަންކަމުގައި އަފްލާޠޫންގެ ސިކުނޑިވެސް މަސައްކަތެއް ނުކުރެއެވެ.]
ބަދްރު ސީރިއަސް ރާގަކަށް ވިދާޅުވިއެވެ. [ބަޝީރެވެ. އަޅުގަނޑު އެދެނީ ބަޝީރުގެ ކަންތައްވެސް މިއަދު ނިންމަވައިލައްވާށެވެ.]
[ބަދްރެވެ. ތިޔަހެން ވިދާޅުވުމުގެ ބޭނުމެއް ނެތެވެ. އޭނާޔާ ވަކިވުމަކީ އަޅުގަނޑަށް ބަރުދާސްކުރަން ދަތި ކަމެކެވެ. އޭނާ މޮރޮކޯއަށް ފޮނުއްވާން ނިންމެވި ނިންމެވުން ބަދަލު ކުރެއްވީތީ ޝުކުރު ދަންނަވަމެވެ. އޭނާ ފޮނުއްވައިލެއްވި ނަމަ މަނިކުފާނުގެ އެކުވެރިޔާގެ ބޭރުފުށުން އެއްވެސް ކަހަލަ އަލާމަތެއް ފެނިވަޑައިނުގަތަސް، އޭނާގެ މުޅި ދިރިއުޅުން އޮތީހީ އެކޮޅުކޮޅުން ޖެހިފައެވެ. އަޅުގަނޑުގެ ހުނުމުގެ އަޑު އިވިވަޑައިގަތަސް އެއީ އެއްވެސް ކަހަލަ އަސަރެއް ނެތް އަޑެއްކަމުގެ އިހުސާސް މަނިކުފާނު ކުރެއްވީހެވެ.]
ބަދްރު ވިދާޅުވިއެވެ. [ބަޝީރެވެ. އެންޖެލާ ވާފަދައިން ބަޝީރުވެސް އޭނާ ދެކެ ލޯބިފުޅުވާކަން އަޅުގަނޑަށް އެނގިފައި އޮތް ނަމަ އޭނާ މޮރޮކޯއަށް ފޮނުވައިލާކަށް ނޫޅުނީމުހެވެ. އެ ވާހަކަވެސް ނުދެއްކީމުހެވެ. އެކަމަކު ފަތިހު އެ ވާހަކަ އަޅުގަނޑު ދެއްކީމާ ބަޝީރުގެ މޫނުފުޅުމަތީން އެއްވެސް ކަހަލަ ކަންބޮޑުވެވަޑައިގަތުމެއް ނުވަތަ ނުރުހުންވެވަޑައިގަތުމުގެ އަސަރެއް އަޅުގަނޑެއް ނުދެކެވެ.]
ބަޝީރް ވިދާޅުވިއެވެ. [އެ ވަގުތު އަޅުގަނޑުގެ ކުރިމަތީގައި އޮތީ އަޅުގަނޑުގެ ޒާތީ މައްސަލައެއް ނޫނެވެ. ބަދްރު ބިން މުޣީރާފަދަ މުޖާހިދަކު އެ މަނިކުފާނުގެ އެންމެ އަޒީޒު އެދުންފުޅަށް އަލްވަދާއު ވިދާޅުވާނީ ކިހައި ވަރެއްގެ މަޖުބޫރީއެއް އޮވެގެންކަން އަޅުގަނޑަށް އިހުސާސް ކުރެވުނެވެ. އަޅުގަނޑަށް ފެނުނީ އެ މުޖާހިދެއްގެ ކަނޑިކޮޅުން މުޅި ގައުމުގެ ހިމާޔަތް ކުރައްވަމުން ގެންދަވާ މުޖާހިދު އެ މަނިކުފާނުގެ ހަޔާތްޕުޅުގެ ބައިވެރިއަކަށް ވާން ހުރި ކުއްޖާ ދުރަށް ފޮނުއްވައިލައްވާން ތައްޔާރުވެވަޑައިގެން ހުންނެވި މަންޒަރެވެ. މަނިކުފާނު އެ ވަގުތުވެސް އަޅުގަނޑުގެ ކުރިމަތީގައި ހުންނެވީ އަޒުމުފުޅުގެ ހަރުދަނާ ކަމާއެކު ފަރުބަދައެއްހައި ވަރުގަދަކޮށެވެ. އަޅުގަނޑަށް ހިތްވަރު ލިބުނީ މަނިކުފާނުގެ އަޒުމުފުޅުންނެވެ. މަނިކުފާނު ނިންމެވީ ގައުމުގެ އަޅުވެތިކަމުގެ ހިލިހިލާ ބުރިކޮށްލެއްވުމަށްޓަކައި އެހެން ހުރިހައި ކަމެއް ދޫކޮށްލައްވާށެވެ. އެފަދަ ދަނޑިވަޅެއްގައި މަނިކުފާނުގެ އެންމެ ގާތް އެކުވެރިއެއްގެ ހައިސިއްޔަތުން ލޯބީގެ ފަސްބައިގައި އަޅުގަނޑަށް އެލިގަނެވޭނީ ކިހިނެއްތޯއެވެ؟ ރަބީޢާއަށްޓަކައި އަޅުގަނޑުގެ ހިތުގައި ހިތާމައިގެ ޝުއޫރު އުފެދުނެވެ. އެއީ މޮރޮކޯގައި ދިރިއުޅުމުގެ ބަދަލުގައި މަނިކުފާނުގެ އަރިހުގައި ޝަހީދުވުންވެސް އޭނާއަށް ރަނގަޅުވާނެކަން އަޅުގަނޑަށް އެނގޭތީއެވެ.]
ބަދްރު ވިދާޅުވިއެވެ. [ބަޝީރެވެ. މިއީ އަޅުގަނޑުގެ ހަޔާތުގައި މި ގޮތަށް ބަދަލުކޮށްލަން މަޖުބޫރުވީ ފުރަތަމަ ނިންމުމެވެ. ރަބީޢާގެ ހިތް ހަލާކުކޮށްލާކަށް އަޅުގަނޑުގެ ހިތެއް ހަމައެއް ނުޖެހުނެވެ. ކުރިއަށް އޮތް ތަނުގައި ދިމާވާނޭ ހުރިހައި ނުރައްކަލެއްގެ ވާހަކަ އަޅުގަނޑު އޭނާ ގާތު ބުނީމެވެ. އަމާން ގޮނޑުދޮށެއްގައި ދިރިއުޅުމުގެ ބަދަލުގައި އޭނާ ނިންމީ އަޅުގަނޑާއެކު ބިޔަ ރާޅުތަކުގެ ތެރޭގައި ދަތުރުކުރާށެވެ. މިއީ ރަނގަޅު ނިންމުމެއްކަން ނުވަތަ ނޫންކަން ދެނެވޮޑިގެންވާނީ ﷲ އެވެ. އަޅުގަނޑުގެ އަޒުމަކަށް ކުޑަކޮށްވެސް ބަދަލެއް ނާންނަކަމުގެ ޔަގީންކަން އަޅުގަނޑު މިހާރުވެސް އަރުވަމެވެ. ދުޝްމަނުންނަށްޓަކައި އަޅުގަނޑުގެ ކަނޑީގެ ތޫނުކަން ދުވަހަކުވެސް ކެނޑިގެންނެއް ނުދާނެއެވެ. ރަބީޢާގެ ކަންތަކުގައި އަޅުގަނޑު މިހައި އަވަހަށް ނިންމުން ބަދަލުކުރީމާ ބަޝީރް މަލާމާތް ކުރައްވާނެއޭ ހިތައި ވަރަށް ޖެހިލުންވިއެވެ. އެކަމަކު އަޅުގަނޑާމެދު ކުށް ހީފުޅެއް ނުކުރެއްތީ ޝުކުރު ދަންނަވަމެވެ. ދެން އެންޖެލާ ގާތަށް ވަޑައިގެން އޭނާގެ ހިތް ހަމަ ޖައްސަވައި ދެއްވާށެވެ.]
އިރު އޮއްސިގެން އައި ވަގުތު ސަރަހައްދީ ބާޒުގެ ވާދީގެ ތެރެއިން އިވެނީ ބެރު ދުންމާރީގެ އަޑެވެ. ބަދްރު ބިން މުޣީރާގެ ކާވެނި ރަބީޢާއާ ކުރެވިއްޖެއެވެ. ބަޝީރް ބިން ޙަސަން ކާވެނި އެންޖެލާއާ ކުރެވިއްޖެއެވެ.
(ނުނިމޭ)
