ޞަޙީޙް މުސްލިމް: ހަދީސު ނަންބަރު 2

ޙަދީޘު ނަންބަރު (2):

عَنْ رِبْعِيِّ بْنِ حِرَاشٍ [1]  أَنَّهُ سَمِعَ عَلِيًّا [2] رَضِيَ اللَّهُ عَنْهُ يَخْطُبُ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ لاَ تَكْذِبُوا عَلَيَّ فَإِنَّهُ مَنْ يَكْذِبْ عَلَيَّ يَلِجِ النَّارَ [3]

ތަރުޖަމާ (2):

މާތް ﷲ ރުއްސުންލެއްވި ޢަލީގެފާނު ޚުޠުބާ ދެއްވަމުން ވިދާޅުވިއަޑު އެއްސެވިކަމަށް، މާތް ﷲ ރަޙްމަތްލެއްވި ރިބްޢީ އިބްނު ޙިރާޝްގެ ކިބައިން ރިވާވެގެން ވެއެވެ. އެކަލޭގެފާނު ވިދާޅުވިއެވެ. رَسُولُ اللَّهِ ޞައްލަﷲ ޢަލައިހި ވަސައްލަމް ޙަދީޘުކުރެއްވިއެވެ. ތިމަން ކަލޭގެފާނަށް ނިސްބަތްކޮށް ތިޔަބައިމީހުން ދޮގުނުހަދާށެވެ! މިހެނީ ތިމަން ކަލޭގެފާނަށް ނިސްބަތްކޮށް ދޮގުހަދައިފިމީހާ ދާހުށީ ނަރަކައަށެވެ.

[1] މިކަލޭގެފާނުންގެ ނަންފުޅަކީ ރިބްޢީ އިބްނު ޙިރާޝް އިބްނު ޖަޙަޝް އެވެ. އެކަލޭގެފާނަކީ ތާބިޢީންގެ ތެރެއިން މަތީ ދަރަޖައިގެ ބޭކަލެކެވެ. ނަސަބުފުޅަކީ އަލްޣިޠްފާނީ، ޢިބްސީއެވެ. ކުއްނިއްޔަތަކީ އަބޫ މަރްޔަމެވެ. ދިރިއުޅުއްވީ ކޫފާގައެވެ. އަވަހާރަވީ ހިޖުރައިން 104 ގައެވެ.

[2] ޢަލީގެފާނަކީ ޢަބްދުމަނާފުގެ ފުތް ހާޝިމުގެ ފުތް ޢަބްދުލްމުއްޠަލިބުގެ ފުތް އަބޫޠާލިބުގެ ދަރިކަލުން ޢަލީއެވެ. ކުއްނިއްޔަތަކީ އަބުލްޙަސަންއެވެ. ލަޤަބަކީ އަބުއްތުރާބެވެ. ދުނިޔޭގެ އަލިކަން ދެކެވަޑައިގަތީ ހިޖުރައިގެ 23 އަހަރު ކުރީއަހަރުގެ ރަޖަބު މަހުގެ 13 ވަނަ ދުވަހު، މާތްވެގެންވާ މައްކާގައެވެ. އެއީ މީލާދީން 17 މާރޗް 599 އެވެ. ކުޑަކުދިންގެ ތެރެއިން އެންމެ ފުރަތަމަ އިސްލާމްވެ ވަޑައިގަތީ އެކަލޭގެފާނެވެ. އަދި ޢާއްމުންގެ ތެރެއިން ތިންވަނަ އަށް އިސްލާމީ ނޫރުން އަލިކަން ލިބިވަޑައިގަތީވެސް އެކަލޭގެފާނަށެވެ. އެކަލޭގެފާނަކީ ކީރިތި ރަސޫލާގެ ޅީދަރިކަލެކެވެ. ލޮބުވެތި ރަސޫލާގެ އެންމެ ލޮބުވެތި ދަރިކަނބަލުން، ފާޠިމަތުގެފާނުންގެ ފިރިކަލުންނެވެ. ސުވަރުގޭގެ ޒުވާނުންގެ ސާހިބުންގެ ގޮތުގައި އުޅުއްވާނެ ދެޒުވާނުން ކަމުގައި ކީރިތި ރަސޫލާ އުފާވެރިކަމުގެ ޚަބަރު ދެއްވާފައިވާ، އެކަލޭގެފާނުންގެ ކާފަ ދެދަރިކަލުން، ޙަސަނުގެފާނާއި ޙުސައިނުގެފާނުންގެ ބަފައިކަލުންނެވެ. އަދި އިސްލާމީ ދައުލަތުގެ ހަތަރުވަނަ ޚަލީފާއެވެ. ވެރިކަން ކުރެއްވި ދުވަސްވަރު ދިރިއުޅުއްވީ ކޫފާގައެވެ. އަވަހާރަވީވެސް ކޫފާއަށެވެ. ފަސްދާނު ލެވުނީ ކޫފާގައެވެ. އެއީ ހިޖުރީ ސަނަތުން 40 ވަނަ އަހަރުގެ ރަމަޟާން މަހުގެ 21 ވަނަ ދުވަހެވެ. މިފޮތުގެ ޙަދީޘު ނަންބަރު 113 ވަނަ ޙަދީޘުގެ ނޯޓުގައި ޢަލީގެފާނާބެހޭގޮތުން ކޮންމެވެސް ވަރަކަށް އިތުރަށް ލިޔެވޭތޯ ބަލާނަމެވެ.

[3] މުސްލިމުގެ އިތުރުން މިޙަދީޘު ރިވާކުރަށްވާފައި ވަނީ އިމާމު އަޙްމަދެވެ. އަދި ހަ އިމާމުންގެ ތެރެއިން އިމާމު ނަސާއީއާއި އަބޫދާއޫދު ފިޔަވައި އަނެއް ތިން އިމާމުންނެވެ.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.