
ކައިވެނީގެ ގުޅުމަކީ ޢާއިލާއެއް ބިނާ ކުރުމަށް އެޅޭ އެންމެ ފުރަތަމަ ބިންގަލެވެ. އިންސާނީ ނަސްލު ދެމެހެއްޓުމަށްޓަކައި ކީރިތި ﷲ އުފައްދަވާފައިވާ ދެޖިންސުގެ ދެމީހުންގެ ދެމެދުގައި ޤާއިމުކުރެވޭ މަތިވެރި ގުޅުމެކެވެ. ދެމީހުންގެ ފުށުން ހެޔޮލަފާ ދަރިފަސްކޮޅެއް އުފެދުމުގެ މަތިވެރި މަޤްޞަދުގައެވެ. އެހެންކަމުން، ކައިވެނި ކުރެވޭ ފެންވަރުގެ ކޮންމެ މީހަކަށް ދީނުގައި ވަނީ ކައިވެނި ކުރުމަށް ގޮވައިލައްވާފައެވެ. މާތް ﷲ ރުއްސުންލެއްވި ޢަބްދުﷲ ބްނު މަސްޢޫދުގެ އަރިއަހުން އަލްބުޚާރީއާއި މުސްލިމް ރިވާކުރައްވާފައި ވެއެވެ. ރަސޫލުﷲ صلى الله عليه وسلم ޙަދީޘުކުރެއްވިއެވެ. يَا مَعْشَرَ الشَّبَابِ مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ (އޭ ޒުވާނުންގެ ޖަމާޢަތެވެ. ތިޔަބައިމީހުންގެ ތެރެއިން ފިރިއެއްގެ ވާޖިބުތައް ފުރިހަމައަށް އަދާކުރުމުގެ ކުޅަދާނަކަން ލިބިގެންވާ މީހާ ކައިވެނިކުރާހުށިކަމެވެ.)
އިސްލާމްދީން ހުއްދަކުރާ ކައިވެނީގެ ރުކުންތަކެއް ވެއެވެ. މިގޮތުން ކައިވެނީގެ ފުރަތަމަ ރުކުނާއި ދެވަނަ ރުކުނަކީ ކައިވެނި ކުރުން އިސްލާމްދީނުގައި ހުއްދަވާ އަންހެނަކާއި ފިރިހެނަކާއި ދެމީހުންނެވެ. ކައިވެނި ހުއްދަވުމަށްޓަކައި އަންހެންމީހާއަކީ ޢިއްދައެއްގައި އިން މީހަކު ކަމުގައި ވެގެން ނުވާނެއެވެ. އަދި ކައިވެނިކުރާ ދެމީހުންނަކީ ކައިވެނި ކުރުން ޙަރާމް ދެމީހުންކަމުގައި ވެގެން ނުވާނެއެވެ. ކައިވެނީގެ ތިންވަނަ ރުކުނަކީ ވަލީވެރިޔާއެވެ. އެއީ، އަންހެންމީހާގެ ފަރާތުން އޭނާއާއި ވާރުތަވެރިކަމުގެ ގޮތުން އެންމެ ގާތްމީހާއެވެ. އޭނާއަށް ނާދެވޭ ޙާލަތެއްގައި އޭނާގެ ވަކީލަކުވެސް ފުދޭނެއެވެ. ހަތަރުވަނަ ރުކުނަކީ ތެދުވެރި ދެހެކީންނެވެ. މި ދެ ރުކުން ފުރިހަމަނުވެ ކައިވެނި ފުރިހަމަ ނުވާނެކަން ކީރިތި ރަސޫލު ގެ ޙަދީޘުން ސާބިތުވެއެވެ. މާތް ﷲ ރުއްސުންލެއްވި ޢާއިޝާގެ އަރިއަހުން އަލްބައިހަޤީއާއި އައްދާރަޤުޠްނީ ރިވާކުރައްވާފައި ވެއެވެ. ރަސޫލުﷲ صلى الله عليه وسلم ޙަދީޘްކުރެއްވިއެވެ. لا نكاح إلا بولي وشاهدي عدل (ވަލީވެރިޔަކާއި ތެދުވެރި ދެހެކިން ލައިގެން މެނުވީ ކައިވެންޏެއް ނުކުރެވޭނެއެވެ.) ކައިވެނީގެ ޞީޣާއަކީ ވެސް ކައިވެނީގެ ރުކުނެކެވެ. އެއީ ވަލީވެރިޔާގެ ފަރާތުން އަންހެންމީހާ އަނބިކޮށްދިނުމާއި ފިރިމީހާ އެކަން ގަބޫލުކުރުމެވެ.
ކައިވެނި ފުރިހަމަ ކުރުމުގައި ކައިވެނީގެ ރަނަކީ މުހިއްމު އެއްޗެކެވެ. އިސްލާމީ ކައިވެނީގެ ރަނަކީ ފިރިމީހާގެ ފަރާތުން އަންހެންމީހާއަށް ދިނުން ވާޖިބު އެއްޗެކެވެ. މިއީ ފިރިމީހާ ހިތުންރުހުމުން އަނބިމީހާއަށް ދޭންޖެހޭ އެއްޗެކެވެ. މިއީ ވަކިމިންވަރެއް ކަނޑައެޅިފައި އޮތް އެއްޗެއް ނޫނެވެ. އަގެއްހުރި ކޮންމެ އެއްޗެއްވެސް ފުދޭނެއެވެ. މާތް ﷲ ރުއްސުންލެއްވި ސަހްލު ބްނު ސަޢްދުގެ އަރިއަހުން އަލްބުޚާރީ ރިވާކުރައްވާފައި ވެއެވެ. ރަސޫލުﷲ صلى الله عليه وسلم (ކައިވެނީގެ ރަނަކަށް ދޭނެ އެއްޗެއް ނުލިބިގެން އުޅުނު މީހަކަށް) ޙަދީޘްކުރެއްވިއެވެ. تزوج ولو بخاتم من حديد (ދަގަނޑު އަގޮޓީއެއް ނަމަވެސް (ރަނުގެ ގޮތުގައި) ދީފައި ކައިވެނި ކުރާށެވެ.)
ކައިވެނިކުރާ ދެމީހުންގެ ރުހުމުގައި ކައިވެނި ކުރުމީވެސް، ކައިވެނި ޞައްޙަވުމުގެ ޝަރުޠެއްކަމުގައި ޖުމްހޫރު (ގިނަ) ޢިލްމުވެރިން ވިދާޅުވެއެވެ. އެހެންކަމުން، އެއްވެސް ވަލީވެރިޔަކަށް އޭނާ ވަލީ ދޭންޖެހޭ އަންހެންނާ، އޭނާގެ ރުހުމާއި ނުލައި ގަދަކަމުން ކައިވެނި ކުރުމުގެ ހުއްދައެއް ނުއޮންނާނެއެވެ. އަންހެނާގެ ހުއްދަނެތި އޭނާ ކައިވެނިކުރުން މަނާކުރައްވާފައިވާ ޙަދީޘުތައް އިތުރު ރަސޫލުﷲ صلى الله عليه وسلم ގެ އަރިއަހުން އެތައް ގޮތަކުން ރިވާވެފައި ވެއެވެ. އަނެއްކޮޅުން އަންހެންމީހާ އޭނާ ރުހޭ މީހަކާއި ކައިވެނި ކުރަން އުޅުމުން އެފިރިހެންމީހާއާއި އިނުން މަނާކުރެވޭނޭ މަޤުބޫލު އުޒުރެއް ނެތި އެކަމަށް ހުރަސް އެޅުންވެސް ވަލީވެރިޔާއަށް ހުއްދަނުވާނެ ކަމަށް ގިނަ ޢިލްމުވެރިން ވިދާޅުވެއެވެ.