އިންސާނީ ނަސްލު ދެމެހެއްޓުން

ކީރިތި ﷲ އިންސާނުން އުފައްދަވައި މިބިންމައްޗަށް ފޮނުއްވާފައިވަނީ ވަރަށް މަތިވެރި މަޤްޞަދެއްގައެވެ. އެއީ އެކަލާނގެ ޙަޟްރަތަށް އަޅުކަންކުރުމެވެ. އެކަލާނގެ ވަޙީކުރައްވާފައި ވެއެވެ. وَمَا خَلَقْتُ اْلجِنَّ وَاْلإِنْسَ إِلاَّ لِيَعْبُدُونِ – سورة الذاريات 56 (ޖިންނީންނާއި އިންސީން ތިމަން ރަސްކަލާނގެއަށް އަޅުކަންކުރުމަށް މެނުވީ ނުހައްދަވަމެވެ.) މީގެ އިތުރުން ދުނިޔެ އާބާދުކޮށް ކީރިތި ﷲގެ ދީން މިބިންމަތީގައި ދެމެހެއްޓުމުގެ ބޮޑު އަމާނާތާއި ޙަވާލުވީވެސް އިންސާނާއެވެ. ކީރިތި ﷲ ވަޙީކުރައްވާފައި ވެއެވެ. إِنَّا عَرَضْنَا الأَمَانَةَ عَلَى السَّموَاتِ وَاْلأَرْضِ وَاْلجِبَالِ فَأَبَيْنَ أَنْ يَحْمِلْنَهَا وَأَشْفَقْنَ مِنْهَا وَحَمَلَهَا اْلإِنْسَانُ إِنَّهُ كَانَ ظَلُوْمًا جَهُوْلاً – سورة الأحزاب 72 (ހަމަކަށަވަރުން ތިމަން ﷲ އުޑުތަކާއި، ބިމާއި، އަދި ފަރުބަދަތަކުގެ މައްޗަށް އަމާނާތް ހުށަހެޅުއްވީމެވެ. ދެން އެކަން އުފުލުމުން އެތަކެތި އެއްކިބާވެ މަނާވެގަތެވެ. އަދި އެކަމާއިމެދު އެތަކެތި ބިރުވެތިވިއެވެ. އަދި އިންސާނާ އެކަން އުފުލިއެވެ. ހަމަ ކަށަވަރުން އެއިންސާނާއަކީ ތަންދޮރު ނުދަންނަ މޮޔައަކު ކަމުގައި ވިއެވެ.)

މިދެންނެވުނު އަމާނާތުގެ މަސްއޫލިއްޔަތު ފުރިހަމަ ގޮތުގައި ދެމެހެއްޓުމަށް އިންސާނީ ނަސްލު ދެމެހެއްޓުމަކީ އިންސާނާގެ ކޮނޑުގައި އެޅިފައިވާ ބޮޑު މަސްއޫލިއްޔަތެކެވެ. ސަލާމްލެއްވި އާދަމުގެފާނާއި ޙައްވާގެފާނު ހައްދަވައި އެދެކަނބަލުންގެ ފުށުން އިންސާނީ ނަސްލުގެ ފެށުމާއެކު އެކަލާނގެ ވަނީ މިކަމުގެ މަގު އިންސާނާއަށް ފަހިކޮށްދެއްވާފައެވެ. މިކަން ބަޔާންކުރައްވަމުން އެކަލާނގެ ވަޙީކުރައްވާފައި ވެއެވެ. يَا أَيُّهَا النَّاسُ اتَّقُواْ رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيرًا وَنِسَاء  – سورة النساء:1 (އޭ މީސްތަކުންނޭވެ! ތިޔަބައިމީހުންގެ ވެރިރަސްކަލާނގެ ޙަޟްރަތަށް ތިޔަބައިމީހުން ތަޤްވާވެރި ވާށެވެ. އެކަލާނގެއީ އެންމެ ނަފުސަކުން ތިޔަބައިމީހުން ހެއްދެވި ރަސްކަލާނގެއެވެ. އަދި އެ ނަފުސުގެ ކިބައިން އޭގެ އަނެއް ޖިންސު ހެއްދެވިއެވެ. އަދި އެ ދެކަނބަލުންގެ ކިބައިން ގިނަ ފިރިހެނުންނާއި އަންހެނުން ފެތުރުއްވެވިއެވެ.)

އިންސާނީ ނަސްލު މިގޮތަށް ދެމެހެއްޓުމުގެ މަސްއޫލިއްޔަތު އުފުލުމުގެ މަގު އިންސާނުންނަށް ފަހިކޮށްދެއްވުމަށްޓަކައި އެކަލާނގެ ވަނީ އިންސާނުންގެ ދެޖިންސުގެ ދެމެދުގައި ކުލުނާއި ލޯބި ލައްވަވާފައެވެ. ކީރިތި ﷲ ވަޙީކުރައްވާފައި ވެއެވެ. وَمِنْ آيَاتِهِ أَن خَلَقَ لَكُمْ مِنْ أَنفُسْكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدّةً وَرَحْمَةَ – سورة الروم: 21 (ތިޔަބައިމީހުންނަށްޓަކައި ތިޔަބައިމީހުންގެ ނަފުސުން، ތިޔަބައިމީހުން އެކަނބަލުންގެ ފުށުން ހިތްހަމަޖެހުން ލިބިގަތުމަށް އަނެއް ޖިންސު އުފައްދަވައި، ތިޔަބައިމީހުންގެ މެދުގައި ކުލުނާއި އޯގާވެރިކަން ލެއްވުން އެއީ އެކަލާނގެ ޤުދްރަތްތެރިކަމުގެ ހެކިތަކުގެ ތެރެއިން ހެއްކެކެވެ.)

މިދެންނެވި ކުލުނާއި ލޯބީގެ ގުޅުން ވަކި މިންގަނޑުތަކެއްގެ ތެރޭގައި ހިފަހައްޓައި، ނަސްލު އޮޅުމާއި، އަޚްލާޤީ މިންގަޑުތަކުން މުޖުތަމަޢު ބޭރުވެގެން ދިއުމުން މުޖުތަމަޢު ދުރުހެލިވެ އޮވެ ނަސްލު ދެމެހެއްޓުމަށްޓަކައި އުފެދޭ ކުޑަ މުޖުތަމަޢަކީ އިސްލާމީ ނަޒަރުގައި ޢާއިލާއެވެ. މިޢާއިލާ އުފެދުމާއި، ޢާއިލާގެ މަސްއޫލިއްޔަތުތަކާއި، ޢާއިލާގެ ޙައްޤުތަކަކީ އިސްލާމްދީނުގައި ވަރަށް ފުރިހަމައަށް ކަނޑައަޅުއްވާފައިވާ ކަންކަމެވެ.