ދުނިޔެ އާބާދުކޮށް އެކަލާނގެ ދީން ބިންމަތީގައި ޤާއިމުކުރުމަށް ކީރިތި ﷲ އިންސާނުންނާއި ޙަވާލުކުރައްވާފައިވާ މަސްއޫލިއްޔަތުގެ އެންމެ މުހިއްމު އެއް އަސާސަކީ މުސްލިމް މުޖުތަމަޢެކެވެ. އަދި މުސްލިމް މުޖުތަމަޢުގެ ބިންގަލަކީ މުސްލިމް ޢާއިލާއެކެވެ. އެހެންކަމުން އިސްލާމްދީނުގައި ފުރިހަމަ މުސްލިމް ޢާއިލާއެއް ބިނާކުރުމަށް ވަރަށް ބޮޑު އިސްކަމެއް ދެއްވާފައި ވެއެވެ. ޢާއިލާ ހަމަޖެހޭ، ވަރުގަދަ އަސާސެއްގެ މަތީގައި ވުމާއި، ޢާއިލާގެ ފަރުދުންގެ މެދުގައި ލޯތްބާއި ކުލުނުގެ މައްޗަށް ބިނާވެފައިވާ ގުޅުމެއް އޮތުމަކީ މުސްލިމް ޢާއިލާގެ މައިގަނޑު އެއް ސިފައެވެ.
މުސްލިމް ޢާއިލާގެ ބިންގަލަކީ ހެޔޮގޮތުގައި ކުރެވޭ ކައިވެންޏެވެ. އިސްލާމީ އަސާސުގެ މައްޗަށް ޢާއިލާ ބިނާކުރުމުގެ މަޤްޞަދުގައި ވެވޭ ކައިވެނީގެ ޢަޤުދެވެ. ކޮންމެ ކަމެއްގައިވެސް އިސްލާމީ އަސާސަކަށް ވާންޖެހޭނީ ﷲގެ ދަރުމައަށް އެދުމާއި އެކަލާނގެއަށް ބިރުވެތިވުންކަމުގައި ވާއިރު، މިއަސާސުގެ މައްޗަށް ކުރެވޭ ކައިވެނީގެ ޢަޤުދަކުން ޢާއިލާ އުފެދުމަށް ފަހު އެޢާއިލާއަކީ، ޢާއިލާގެ މެމްބަރުންނަށް ހިމާޔަތް ލިއްބައިދޭ، އެންމެން އެކަތިގަނޑެއްގެ ގޮތުގައި ހިފަހައްޓާ ފަރާތަކަށް ވާންޖެހެއެވެ. އެއް ޢާއިލާގެ މެމްބަރުންގެ މެދުގައި އޮންނަން ޖެހޭ ގުޅުން ބަޔާންކުރައްވަމުން ކީރިތި ﷲ ވަޙީކުރައްވާފައި ވެއެވެ. وأُوْلُوا الأَرْحَامِ بَعْضُهُمْ أَوْلَى بِبَعْضٍ فِي كِتَابِ اللَّهِ – سورة الأنفال: 75 (އަދި ގާތްތިމާގެކަން ލިބިގެންވާ މީހުން ފަހެ، އެމީހުންނަކީ ﷲ ކަނޑައަޅުއްވައި ނިންމަވާފައިވާ ޤުދުރަތުގެ ޤާނޫނުގައި އެކަކު އަނެކަކަށް އެހީވެ ވާގިވެރިވެ އުޅުމަށް ވަކީން އައުލާކަން ބޮޑުވެގެންވާ ބައެއް މެއެވެ.)
ޢާއިލާއަކީ އިސްލާމްދީނުގައި ކަނޑައެޅިފައިވާ ގޮތުގެ މަތީގައި ބިނާކުރެވުނު ޢާއިލާއެއްނަމަ އެޢާއިލާގެ ފަރުދުންގެ ބާއްޖަވެރިވުމާއި ދިންނެވުމަކީވެސް ޢާއިލާއިން އެކަމަށް މަސްއޫލުވެރިވާން ޖެހޭ ކަމެކެވެ. މީގެ މާނައަކީ ޢާއިލާގެ ކޮންމެ މެމްބަރެއްގެ ފާފަ ޤިޔާމަތް ދުވަހުން ޢާއިލާގެ އިސްމީހާގެ ބޮލުގައި އެޅޭ ވާހަކައެއް ނޫނެވެ. އެހެނަސް އެޢާއިލާގެ މެމްބަރުން ދިންނަވާނޭ މަގުން އެމީހުން ކުރިއަށް ގެންދިއުމަށް މަސައްކަތް ކުރުމަކީ އޭނާއަށް ﷲ އަންގަވާފައިވާ ކަމެކެވެ. އެކަލާނގެ ވަޙީކުރައްވާފައި ވެއެވެ. يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَاراً وَقُودُهَا النَّاسُ وَالْحِجَارَةُ – سورة التحريم: 6 (އޭ އީމާންވީ މީސްތަކުންނޭވެ! ތިޔަބައިމީހުންގެ ނަފުސުތަކާއި ތިޔަބައިމީހުންގެ އަހުލުން ނަރަކައިގެ އަލިފާންގަނޑުން ރައްކައުތެރި ކުރާށެވެ. އެއަލިފާންގަނޑު ރޯކުރާނޭ ދަރުކަމުގައި ވާހުށީ މީހުންނާއި ހިލައެވެ.)
މިދެންނެވި ގޮތުގައި ބިނާކުރެވޭ މުސްލިމް ޢާއިލާއަކީ ދީނުގައި ކަނޑައެޅިފައިވާ އުޞޫލުތަކަށް ޙުރުމަތްތެރިކޮށް ހިތާ، އިސްލާމީ ރިވެތި އަދަބުން އަޚްލާޤުލިބިގެންވާ، އިސްލާމްދީނާއި ބީރައްޓެހި ސިފަތަކަށް ތަބާނުވާ، ޙަލާލުތަކެތިން ކައިބޮއި ހަދާ، ޙަލާލު މުދަލުން މުޢާމަލާތް ހިންގާ، ދިރިއުޅުމުގެ ޚަރަދުތައް ކުރުމުގައި އިސްރާފުނުކޮށް މެދުމިން އިޚްތިޔާރުކުރާ ޢާއިލާއަކަށް ވާނެއެވެ.
މިފަދަ ޢާއިލާއެއްގައި ހިމެނިގެން ޞާލިޙު ގޮތުގައި ދިރިއުޅުން ވޭތިކޮށްފައިވާ ހުރިހާ އެންމެނަށް ސުވަރުގެ ލިބުން އެދިވަޑައިގެން މަލާއިކަތްބޭކަލުން މިފަދައިން ދުޢާކުރައްވާނެތެވެ. رَبَّنَا وَأَدْخِلْهُمْ جَنَّاتِ عَدْنٍ التي وَعَدتَّهُم وَمَن صَلَحَ مِنْ آبَائِهِمْ وَأَزْوَاجِهِمْ وَذُرِّيَّاتِهِمْ إِنَّكَ أَنتَ الْعَزِيزُ الْحَكِيمُ – سورة غافر: 8 (އަޅަމެންގެ ވެރިރަސްކަލާކޮ! އެއުރެން އަބަދަށް ދެމިހުންނަނިވި ސުވަރުގޭގެ ބަގީޗާތަކަށް ވައްދަވައިފާނދޭވެ. އެބަގީޗާތަކަކީ އެއުރެންނަށާއި، އެއުރެންގެ މައިންބަފައިންނާއި، އަނބިދަރިންކުރެ ހެއުއަމަލުކުރުންމަތީ ދެމިތިބެއްޖެ މީހުންނަށް ދެއްވުމަށް އިނބަރަސްކަލާނގެ ވަޢުދުކުރައްވާފައިވާ ބަގީޗާތަކެވެ. ހަމަކަށަވަރުން އިނބަރަސްކަލާނގެއީ ގަދަކީރިތިވަންތަ ޙިކުމަތްވަންތަ ރަސްކަލާނގެއެވެ.)
